BLACK HORSE- 1

BLACK HORSE - 1

Kawngkhar inhawng sa chu ka en a, ka nui sak ringawt.Ka pasal hian In lamah Office a nei tho a,vawitam ka lut tawh,In a a awm chuan a hun tam zawk hetah hian a hmang ti ila ka sawi sual kher lo ang,keipawn hun ka hmang hnem ve viau tho bawk.Engdang vangmah ni lo in ka Pasal duhtak in a hun tam zawk a hmanna hmun anih avangin keipawh ka lut reng reng a,hna a thawh laiin pui thei lo mahila Lehkhabu dahna chhuar lian zet a Lehkhabu chi hrang hrang inrem tlar tuar mai zing a mi Ka duh duh chu ka lo chhiar zawk thin a.A chang chuan ka muthilh zui tak hial tum a awm bawk.

Ka nem hawng a, mahse, a ruak hiau,Hetah hian a awm tih ka hrechiang a, Toiletah a kal lawk animaithei..

“Ka sawi nawn tawh lo ang,tunah khan that rawh” tawngri lo chhuahna lam hawiin ka inher nghal zawk bawk.

Tukverh nawrtawlh theih a siam chu a inhawng vek a, min hnungchhawn zawngin Balconyah chuan Mipa sang leh pian nalh zet a ding a, a kekawr ipte a zen tut a,a kut lehlamin a beng bulah Phone a keng a, tawnglo in a ngaithla vung vung bawk.Tu nge anih hre turin a hmel hmuh ka mamawh lo,Ka pasal,Kum hnih lai ka chenpui tawh Simon Malsawmzuala ani tih ka hai lo.Mahse...tu nge that tura a tih kha??!!!

“Aih, eng chhuanlam mah ka duh lo,that rawh”Zawi fiah zet hian a ti leh hmuk a, ka hriat hmasak zawk khan ka hresual emaw ka ti a, a sawi nawn leh takah chuan ka hresual lo tawp tih a chiang.A Phone a la sawn a, a kekawr ipte ah a thun zui daih bawk.

Tu chungchang nge an sawi tak ang? Ka pasal hi ka hrechiang, Mipa luhlul leh tihmawh em em nimahse midang thah duhna khawp thinlung sual a pu lo tih ka hria.A tawngtam lo a, a thinchhe bawk, a tawng chhuah chhun pawh a nem hran hauh lo,Hetiang mizia neitu pawh  nise midang that tur khawpin a rilru a chhia tihna ani chuang lo.

Dawhkan lian zet awm chu ka ban a,ka tum loh lutukin Paper Clip dahna bawm Plastic a siam awm chu ka ti tla palh a, chhuat phah Tile chang zetah chuan a tla ri bawl a,a chhin a lo nghet lo ani ngei ang, a baw chhuak vek bawk,Simon-a ka en vat a, thawm hriaiin a rawn inher nghal vut bawk.A hmelpa leh chang zetah chuan nidang a ka la hmuh ngai loh thinrimna niawm tak ka hmu thei bawk.Chhar tumin ka thu hniam nghal a, a thusawi ka hria tih a hriat ka duh lo bur,ka awmdanah khan a tawng ngaihthlak tum ka ang tlat.A hna chungchang engmah ka sawi ve a duh lo tih lah ka hriatsa a ni bawk.Ka pasal anih hmain kum khat aia tam hret  ka hre tawh bawk a, ka hrechiang ve thawkhat chuan ka hria.

“Hon...eng nge i tih tlak a?” ka bul mai atangin a rawn ti a, ka thil tih tlak lah chu a baw nuaih bawk nen ka chhar khawm leh rih a.

“Paper clip hi,i chhin nghet lo lutuk a” pangngai tak hian ka ti a, a rawn thu hniam ve nghal a, min rawn chhar pui a.

“Um,anih hi..i lo luh lai pawh ka hre hleinem” bung deuh hian a ti nghut a,ka nui lui sak thung.

“Rawn barakhaih che ka tum a,thawm dim tawkin ka rawn pan che a, ka vai fuh palh leh si anih hi” ka rilru a lo lang hmasa ber ka sawi ta zawk, ka beisei aiin ka sawi mar tha phian bawk.

“Ha....Naupangchhia thei lutuk,Pasal nei i nih tawh hi aw” a nui huk a.Min fiam dan fo a ni a, huatah ka la lem lo.

“A ho e,Pasal nei tawh pawh hian a chang chuan uang deuh hlek a khawsak te kan chak ve animai a” ka dingchhuak zui nghal a, ani pawh a rawn ding mar ve a.Kan inlenhleih bawk nen ka melh chho ha mai.Mahse, nidang ka ang thei lo.A thusawi khan min kam tlat a,ka hriatthiam chiah si loh hlauhna hian min tuam tlat a ni ber.

“Um,a dik reng,he nui hmel hi..ka ta chauh ani a,a ni reng bawk ang..” ka khabe ah a rawn dawm a,rawn kun hniamin a hmui chhah lam lek lek fawh nuam zet chuan ka hmui a rawn bawhthuah nghal chat bawk,a kut lehlamin ka kawngah a kuah a, kei pawn a nghawngah ka kuah let ve a, ka dingdihlip ak ak bawk.

Ka inlahrang ta nge nge, vawitamtak he roomah hian Hmangaihna kan lo chen dun tawh a, Cough ah mai ni lo in a chang chuan chhuatah pawh...tun tumah hi chuan kalna tur kan nei a, chutiang a thlen loh nan ka inven rih angai..

‘I hman chuan kal ka duh tawh a “ a kawrkilh ka khawih pah a, ka samah a rawn fawp leh zauh a,a rum hak bawk.

“Hman e,mahse...thildang ka duh in ka hria...” ka mawngtamah a tham a, eng nge a duh sawi ngai lo in ka hria..mahse, tunah chuan kan kalna turah kan tlai ka hlau rih zawk.

“Aih, hei chu hundang ala tam, mahse, vawiin chiah hi Sangpuii tan Pasal neihni a nimaithei..a neih nawn ka ring lo ve ngawt a,khawiahmah tlai i phal ngai loh kha...” nui chungin a kut ka laksawn sak a, lungawi vak lo hian a phun hluk a, eng nge a sawi ka hre lo.

“Nang tereuh hi...i duh duh hian min hnuk kual lo teh...” ka nui hak hak ringawt.Tukverh inhawng lam chu ka pan a, ka khar fel a..diktak chuan keipawn a duh kha ka duh ve tho,kum hnih zet kan innei tawh chung hian ka la hne thei lo..Nupa nun hi Sex vang hian a hlawhtling thei a, a hlawhtling lo thei bawk ngei ang..mahse, Nupa nih nan Sex a pawimawh ber ka ti chuang hauh lo.

Inneihna hmun kan thlen chuan mi an lo tam tawh viau, Motor dahna tur kan zawng kual leh rih a, Ka naupanlai atanga ka thian a ni a,School khatah kan kal dun bawk.Kan eizawnna kawng kan thlan erawh a hrang hlak.College lian leh lar ve thawkhat takah ka thawk a.Ani erawh chu Doctor ani thung.Kan vanneih vang nge ka hre lo.Sawkar lamin min la nghet ve ve tawh bawk.Kan inneihin ka best ah ka hmang a, ani pawh hian hian min hman ve a tum nasa ngiang mai.Mahse, Simon-a Nu damlohna avangin ka pha ta zawk.Lungawi vak lo mahse Damlohna thil ani miau a, tihngaihna dang a awm lo.

“Hey...ka beisei aiin in rawn hma..” Sangpuii u Mipa in a lo ti thuai a.An unau hi Mipa pahnih leh hmeichhia pakhat anni a, an vaiin an puitling em em vek.Ka nuta te 3 nen an inkawm vek bawk.Kan In a inhnaih bawk a kan inpawh viau mai.

“Nia, In lamah rawn kal kual hmasak kan tum zet a, kan thulh leh ta mai” ka ti let ve thuai a,Simon -a nu Damlohna avangin kan hnenah a rawn awm rih a..Ka duh ang pawn Sangpuii ka buaipui hman meuh lo,kan hnenah reilote chhung atan a rawn khawsa ve a ni a,Ka pasal nu mahnise ka ngaina a a lungawilohna engmah siamsak ka duh lo.

“Angai hleinem,Biakin lam pawh a awl rei chuan a zahthlak mai mai..sawlam saw kan family thutna tur a tih deuh ania” tih pahin a kawk a..Simon-a ngawi deuh ngul chu ka en a,ka thil hriat thawi bawk kha ka rilruah a rawn lang lehnghal zat a...engthil nge tih ka zawh a tha in ka hre ta zawk.

Inneih inkhawm zawh veleh thlalakna hun an hmang leh a, kan thian hlui kan kim viau mai,ka beisei loh zetin Zasangi pawh a lo kal ve bawk, ani hi Sap pasalah neiin Londonah an khawsa a,fa an la nei lo thung.A then chu pasal fanau nei tawh te anni a, a then Kawppui ngaihtuah reng reng lo an awm bawk.Kan han inhmuhkhawm takah chuan kan ri le lu mai,Eizawnna a hrang a, mahni hmazawnah theuh kan buai a, inhmuhkhawm tak tak hun a awmthei tawh lo..

“Mate...sawlamah sawn ka va phei ve lawk ang” ka beng bulah zawi sup hian a rawn ti a. A thlekna lam ka en a, ka nu leh ka pa ka va hmu a.Biakinah khan ka hmu a,Inkhawm ban hnuah erawh kan thian ho kan han inhmukhawm leh rih a, ka lo ngaihsak leh tawh lo.

“Um, keipawh ka lo kal ang” ka ti a. Min chhang tawh lo in a pan phei zui chu a ni der.

“Hmingthan,inpa hi chu a va han nelawm loh tak..” ka bul hnai ber a ding Ruatdika chuan a ti boh a,a nui tho nangin a ti tak tak tih a hmelah a lang tho.

“Naaa..nel i tum lo anih ka ring zawk” nui chungin ka ti let ve a, a then Leh sak a..

“Maithei...a lian bawk si,min chum thal tawp mai ang tih ka hlau ani ber..” an vaiin an nui zui nghal hawk hawk bawk.

 Ka nui ve ringawt, a awmna lam ka va hawi a, Ka nu nen an ding dun a, an piah deuhah ka pa a awm bawk,Hmeltha a sawi tur ani lo.Mahse, a lian a, a pian a nalh zuih mai,ngo lam ai chuan hang lam a hnaih mah mah zawk a, a mit meng a lian a, a mithmul a tam a, a sam dum chhah zet nen chuan a inhmeh vel vek.Mahse, Ruatdika sawi kha a dikna lai a awm, a nui hmel hmuh tur a tam vak lo,a nui ngai lo tihna erawh a ni lo,kan pahnih a kan awm emaw kan chhungte, thiante nen pawh..tawng tam berah tang ngai lo mahse a awm chuan nuam kan ti vek.Tupawn a bulah thil sawise a tuipui loh zawng ani emaw ni lo emaw tha takin a ngaithla zo vek zel a,kan In a kan awmpui te leh kan Driver te pawh nise an mil tawkin a kawm thei vek.

Kum hnih liamta lamah ka let leh ta nge nge,Kan thawhpuinu Pa Boral tumin kan intawng a, ka Bialpa,tihtakzet a ka kawp awmchhun nen kan inthen atangin kum a liam tawh a, Mipa ngaihsak miah lo a nun hmangin ka duh duh ka ti aniber,mahse, kan inhmuh hmasak ber ni atangin kan inhip tawn chat aniber.Khawi atangin emaw ka number a lo nei a, tlang takin min duh tih min hrilh tawp,Mipa rin leh harsa ka tih avangin ka lo hnar thung,mahse, a beidawng miah lo.Keilahin ka mipa duhzawng anih zia ka hre tam tial tial a, ka hnar tih hre lo ang hmiahin kan In ah a lo kal a, tlai tin kan college bulah min lo nghak ziah bawk,Scooty ka nei a, mahse, ka accident avangin ka khalh leh ngam ta rih lo a, a rual a haw mai a lo rem bawk nen ka haw ve ta ziah.ka u phei chuan ‘Tlangval hman’ tiin a koh fiam phah hial.Mahse, ka beisei angin vawikhatmah min duh tih a sawi leh ta miah lo,thian nge kan nih a inngaizawng pawh ka hrethiam lo hial zawk.Thla thum tal tap nitin min bia a, ka bulah a awm ani ber,keipawn tlai tin a rual a haw pawh ngaiah ka nei tan tawh.Amahah ka innghat fel vek ani ber, mahse, a reh thut a, karkhat aia tam ka hmu lo ringawt..ka mangang a, khawiah nge a awm ang?,Hmeichhe dang a tawng ani angem?, nge a damlo zawk???

Zawhna hlirin ka khat vek,be hmasa turin ka ngam bawk si lo..a thianpa, kan Inah pawh a rawn hruai ve zauh zauh thin ka zawt ta nge nge..ani lah chuan a damloh thu leh amah be mai tur a min duh zawk thu min lo hrilh fel et.

Ka call ta chuang lo,nihnihlai ka nghak leh a, ka insum zo ta ngang lo,ka call a, mahse, a pick lo...vawithum lai ka call a, a pick lo vek,a na viau anih ka ring ta zawk.An inah vawikhat ka hna banin min hruai tawh a, Aizawl chhuahlam vengah, Tlang chung lamah ani a, an thenawm hnaiah In pali vel a awm ve bawk a, a lan dan maiah pawh an vai chuan an khawsa thei thawkhat ang tih a chiang.

An gate bulah ka ding ren rawn a, a Motor dahna ah a Car a awm a, a chhuak lo tih a chiang, Oh...engtin nge a chhuah ang?, a damlo tih min hrilh kha mawle a..Door Bell ka hmet a, a reh thiap mai,tumah chenpui a nei lo a, lang a kal nula pakhat leh Cook a nei a, Driver pakhat lang a kal bawk a nei a..Anu leh a naute 3 erawh Shillongah an In ah an awm vek tih ahma in ka hre tawh bawk.

“Hmingthan...”ka hming a min ko ri ka hriat rualin ka ding chawt a, rang fe hian ka hawilet nghal vat bawk.Kekawrbul leh T-shirt dum ha in ka hnung maiah a lo ding a, a nui suk bawk,a chawn sei thlurh mai chu hmul in a khuh dap a,nidang aiin a lang sang lehzual bawk.

“Let leh ka lo tum chiah a..” mawl hmel zet hian ka ti a, ka nuih chhan hre miah loin ka nui ngawt bawk.

“Lo lut phawt la,bakah thlah tho i ngaih hmel ka tia” a nui leh suk a, ka hawi let vat a,ka Taxi hman kha min lo nghak turin ka ti ta si lo...mawl ka inti hnuhnawh a awmzia a awmtawh der lo.

“Um...mahse, ka beisei aiin ka hmu tha che” a mithmul a ti sang zauh a, a ngaihna hre lo hmel a pu bawk,mahse, a reh leh nghal mai thung.

“Lo lut phawt la...” ati leh sup a..Ka tawi khawtlai deuh nangin ka zui ta nge nge.

Engkim a kal tluang ta purh, a lo damlo hauh lo,a thianpa khan min lo bum mai mai a ni tih a hnuah ka hre chhuak chauh bawk, kan awmdanah kan Induhtawn ve ve niin a hria a, mahse, kan luhlul a kan induhtawk dun lutuk a engtikah mah kan sawi chhuah a rin loh avangin a ma thu in hma ala mai zawk tih a hnuah amah ngeiin a sawi leh ta tho.

Hei hi a ni ka nun a mi Pawimawh ber lo ni ta Simon-a nen a kan intawn dan chu....

Ka nu hnenah ka hrilh hmasa ber a, ka nu nimahse Fanu mal ka ni a, ka tan chuan thian ani tel bawk,ka thuruk midangin hreve se ka tih zawng zawng chu ka nu hi ka hrilh thin a, Sangpuii pawh ka best ani tehmeuh mai, mahse, ka nu aiin ka ring lo zawk,ka thuruk sawichhuakin emaw ka tan thilpawi a ti ang tih lam a ni lo, ka nu ai a ka tan a tha hretu an awmlo tih ka hriatchian avang zawkin ka nu hnenah ka natna te ka hlimna te ka hrilh hnem zawk.

“Mipa fel leh rintlak tak ani ngei ang, mahse, hei aia hriatchian lehzual hi chu la tum la a va tha em” ati a, a sawi dik..Pasal nei rual ka ni tawh a, chutiang chiah chu Simon-a pawh ani bawk,tleirawl ang a inkawp mai mai rual kan ni tawh tlat lo.

An chhungkaw chanchin leh a eizawnna lam hriatchian tumin ka zawt ta ngei,A pa a boral tawh a, a nu leh a naute Shillongah an awm thu min hrilh leh a,  Dawr lian tak tak pathum lai a nei a, a dawr lah Aizawl a inti changkang ho chuan an dawr ber ani bawk.Shillong a dawr hawng lo a Aizawl lam daih ah a hawn na chhan ka zawt a.

“Aizawlah hian thawmhnaw tha kan buaipui nasa ber alawm,thawmhnaw changkang tak inbel avanga changkang emaw inti lah an tam em em bawk,tu te pawh ni se tu nge annih lam ka en lo,ka dawr a ka thil zawrh an lei anih chuan  a tawk mai.Pawisa khawi a mi nge an neih  ka ngaihtuah lo e,chuan,Mizo ka ni a, ka ramah ngei hian inbenbel ka duh a, ka thihna hmun tur atan pawh he ram ngei hi ka thlang bawk ” nui chungin a ti a. A sawi dik thawkhat viau ang.

“Thiannu, Simon-a hi i la serious ta riau in ka hria” nui chungin Sangpuii’n min ti a, engmah mumalin ka la hrilh lo,ka nui ringawt.

“Tlem chuan...tak takin ka serious ve ta deuh chu anih hi maw” ka ti ve mai.

“A tha lawm pasal nei rual i ni ve tawh tho a, a fel ang, mahse...” sawi zo lo in a ngawi leh daih..

“Eng nge mahse chu?” hrethiam lo fe hian ka ti a, ka melh kar bawk,a hmui a seh nauh nauh a, a hmel buai deuh nak chu ka hmuh hmaih hauh lo bawk.

“Aaaa, eng lem mah, a ngai leh lo mai..” ati leh a, za vak lo hian a nui lui sak bawk,ka ngaih a tha lo sauh thung.

“Sawi mai mai teh,ka rilru i ti nuam lo ania” ka ti a, hmeichhe dang kawp a lo nei anih vaih chuan eng ang takin nge ka nat ang ka hrethiam lo a ka ngaihtuah peih hek lo.

“Englo...ih...a chanchin an sawi hi i hre ve ngai em?” ka lu ka thing ringawt, tunhma in ka hre ngai lo,Aizawlah hian mi hausa tak tak an tam tawh lutuk, mi hlun leh zaithiam emaw footballer emaw mibik tak annih loh chuan a mimal tak a hriat nalh an har tawh.

“Shillong lam chhuak anni tih chu ka sawi ngai lo in i hria anga, mahse, hetiang a an hausak thutna hi a la rei miah lo a....” awmze nei lo zet hian a ban a vai a...

“Chuan...?” ka tum loh lam a sawi takah chuan ka thaw huai mai.

“Eng emaw eizawnna dik lo hmang a hausa niin an sawi asin..”

“Eng thil dik lo nge i sawi tum chiah?”

“Chu tak chu ka hre mai bik lo, mahse...dik lo erawh a awm”

“A dik lo ber sawitur an hriat si loh chuan a buaithlak anih chu...” ka ti nghat a, a ner nak thung.

“Nia, ni tho...mahse...” a ti leh talh..

“A sawitu te chu ka hre hauh lo,mahse, An tluk loh vangah ka ngai,mi hi kan hnuaiah an kun than chuan kan dinhmun aia sang an rawn ni tur hi kan tuar thiam lo fo thin zawk alawm” ka ti awlsam et, ka ngaihdan diktak a ni chiah bawk.

“Awi, chutiang pawh a ni lo.Ka Cousin Rinsanga te nen khan College an kal ho thin a, Rinsanga te Inluah a tawm thin a,class kal chungin hna a thawk bawk an ti asin,tunah kum tam pawh a vei hma in a lian ta thut a,rimtak a thawk a hausa tur chuan a tlem berah  kum sawm atanga sawmhnih chu angai hrim hrim” duhthawh zet hian Boruak a hip kawk kawk bawk.

Eng in nge tibuai ka hre hauh lo,engvangin nge Simon-a hausakna pawh chuan a tihbuai chiam ka hrethiam pha hek lo.A thawkrim a, malsawmna dawngtlakin a thawkah kei chuan ka ngai nghet hmak.

“Anih leh tuemaw talin a thil dik lo tih chu an man chhuak tawh em?”

“Aih...aaaa, ka hre lo..” ati bah nak mai,ka nui sak thung..A hriat ka ring lo sa hrim hrim zawk.Tu emaw hlawtlinna hi a hunkal tawh lo hretu tan chuan kut thawh hauh si lo a na tak a insawisakna hmanrua ani tih ka hrethiam a.Rinsanga te tan pawh an Inluah tawm tu,harsa ve tak a College kal thin kha an chungah a awm ta daih si a, na an tih zia sawi kher lo mahse,nuam an ti lo a, a hma ang khan hmusit leh viau in a hun kal tawh te sawi sawi mahse tunah chuan an tluk ta miau si lo a a beidawnthlak ve em bawk atin ni.

“Okhey...thiannu, min ngaituah tih ka hria..mahse, kei chu Simon-a hi a hausakna lam ka en hauh lo,amah anih ang ang hian ka duh a,a sum tel lo pawh hian ka tan chuan Mipa awmchhun a ni tlat...”dam thlapin ka ti a,a bu tak nangin a rilru a nuam chuang lo tih a hmel buai nakah chuan a lang thei tho mai.

Kan inneihna pawh hun a kal leh tawh,vawikhatmah rinhlelhna ka nei lo a rinhlelh turin a awm ngai hek lo.Kan inneih tirh te kha chuan Sangpuii thilsawi kha ka hrechhuak fo mai, a sumdawnna lam engmah ka sawi ve a duh lo tih min hrilh tum phei chuan Sangpuii sawi kha a dik anih ka ring thelh bawk,mahse, sumdawnna hi ka kalna lam a ni lo , ka hnaah ka tui a, Nilengin buai takin Naupang zingah ka khawsa a,a sumdawnna lam engmah hriatpui ka nei lo pawh pawi ka ti ta hauh lo.

“Kan kal mai dawn mi?, thil pawimawh a awm thut a” ka bulah a rawn ding a, ka ngaihtuahna ka lo kawm tui lutuk a min rawn pan tih pawh ka lo hre lo..