BLACK HORSE- 3

Chapter- 3

Chaw kan ei chhungin kan tawng mang lo,kan boruak ipik churh mai chuan ka awm a ti nuam lo a, mahse, engvang nge anih ka hre hauh bawk si lo.Ka nu leh Simon-a awmdanah chuan thinrim inthup,sawi chhuak si lo an ang ber,Simon-a hian ka nu hi a chhun lo emaw ka lo ti thin kha ania, tunah chuan ka nu nen an in an zia ka ngaihtuah leh ta thung.

“Min lo mut san mai rawh, naktukah kan kal dawn thut avangin tih tur ka ngah riau a” ati sup a, a Laptop a keng a, ka chalah a rawn fawp zauh a, a chhuak zui nghal daih bawk.

Ka Phone nghawr dar darah ka harh a,ka lak hma in a tawp leh lawi.Tu nge min rawn call tu ka en a, Ruatdika..tun ang hunah eng nge min biak duh chhan ni ang??

“Hello...” rei pawh a ring hmain a rawn ti nghal a, ka naupan lai atanga  ka kawm tawh a ni a, ani leh Sangpuii nen kan pathum hian kan inkawm nasa hle bawk, mahse, an khawsa thei a, College erawh hmun dangah a kal ta thung.Engtiklai pawn ka mamawh chuan min hnial ngai lo.Mahse, Mipa a ni a, ka thuruk zawng zawng te erawh ka hrilh lem lo.

“Eng nge ni ta?”

“Eng ni lo e.Naktukah Simon-a te zin an tum ami?” engtin nge a lo hriat hman ka hre hauh lo.

“Um, ngatinge?”

“I kal ve dawn nge dawn lo?” eng chu a hria ni maw? Nimin leh vawiin hian mi zawng zawng hi an danglam ta vek nimai hian ka hria.

“Dawn lo e,eng nge min zawh i tum ber a? a tlai tawh em hi..” ka ti hlak a,kan innel  bawka ka thinrim leh ka lungawilohna pawh ka ti lang hreh lem lo.

“Naktukah Sangpuii te chawei turin ka sawm a, in nupa in rawn sawm ve che u ka tum mawle” ati tha ve mai..

“Aaa, ka hre lo, naktukah ka lo be leh ang che..Mangtha phawt..”

Sana ka en a, dar 12 a pel tawh, mahse, Simon-a a lo la mu lo cheu,ka tho ta nge nge, a Office ah a awm ngei ang tih ka hria.Muangchangin a Office ka pan thla a,Living Room leh kitchen lam a thim vek tawh a, a office erawh chiang takin a eng kalh thung.

Room kawngkhar in kau sa deuh atang chuan eng a rawn chhuak raih a, Dawr hi lian tak tak pathum kan nei a, mahse, zan thleng a buaipui ngai engmah a awm ka ring si lo, a chang chuan a sumdawnpui te nen an inhmukhawm a, Phai lam atangin a zawmpui vai ho an lo kal tum a awm bawk.Ka lut tur chiah chu tawngthawm ka hriat avangin ka ding chat mai.

“Ok, i hrilh chuan a that chu..” a ti sup a, mi tawng ngaihthlak ruk hi a mawi lo tih ka hria,mahse, zanin chu eng nge ka hriat ka hre lo, ka ngaithla chak tlat.Ka pasal ani a, tlangnel tak a lut mai tur ka ni,mahse, hna chungchang anih chuan ka tlangnel thei hauh si lo.Engmah ka ngaihven ve a ngai lo tih min hrilh chamchi a, hei vang te pawh hi a ni mahna le.

“Ka theih anga rangin ka lo haw ang” ati leh a,a Mangtha thawm ka hre zui nghal a,a chhan ka sawithiam si loh  ka chhungrilah hlauhthawnna a rawn lut leh a,tu nge a zin tur a hrilh chu ni ta ang?,kei a nupui ngei pawh mumal in min hrilh si lo.

Ka lut ang nge lut lo ang tih ka ngaihtuah a, a be zo tawh tho a lut ila thil pawi anih ka ring ta lo,ka nem hawng a,ka thawm a hriat veleh rang zet hian a rawn hawi chhuak vut a,mut chhuak hmel pawh a pu lo,a Laptop bulah Beer can a awm a,zu hi regular chuan a in lo, mahse, Beer hi chu tuisik ang vel hian angai niberin ka hre thin thung.

“I la muhil lo mi?” a laptop khup pahin a ti sup a, a rawn tho chhuak zui bawk.

“Muhil e, ka harh leh a, i lo la mu si lo a,ka rawn en che a” ka ti tha ve mai, tu nge a lo biak kha ka hre lo a zawh erawh ka tum chuang lo.Ka pasal nimahse tu pawh a biak apiang lo hriat ve zel tum kha thil atthlak a ni tih ka hre ve tlat.

“Ka zo chiah e, chho ila..” chhang lo in ka inher a, min rawn zui a,kawngka bul a Switch a hmeh rualin a thim nghal thiap mai..Ka kawngah a rawn kuah a,Stepah kan chho dun a,engmah kan sawi lo ve ve.

“In lo let har angem?” ka ti sep a,a darah ka lu ka nghat a.A lungphu chuan ka kut a nghawr dat dat in ka hre hial bawk.

“Ka hre lo le,a awmdan a zir aniang chu” ati sup a, a mut a chhuah hmel leh ta viau lawi.

“Lo kal ve thei ila tha tur ania”

“Um..mahse, ka nu nen kan kal chuan a tawk rih mai,ka nu dah pah a ni bawk a” ati leh charh a, ka ngawi ta hle hle,ka kal ve duh lo te chu ka kal malek anga nimai.

Kan inneih tirh atangin tih takzetin kan inhauh ka la hre miah lo,inhnial satliah hi chu kan nei zauh zauh,mahse kan inhnial anih pawhin kan thinrim rei ngai lo,tun tum erawh hi chu ka chhungrilah lungawilohna in ka khat ti ila a dik ber ang.

“I muhil em?” ati leh sup a,ka muhilah ngai se ka duh avangin ka che lo a, ka chhang hek lo.Min rawn kuah a, ka samah a fawp zauh a, ani pawh a che zui ta bik lo.

Engtin nge Ruatdika khan a zin dawn tih a rawn hriat daih theih ni?,keipawh khan kan chawei hma khan ka hre ve chauh ania, a chhuak leh bawk si lo,ka thianpa ani a, ka thian anih ang ngei hian Simon-a nen pawh a inpawh tha hle tho, a chang chuan ka tel lo pawn an inhmu fo,mahse, a tihtur engkim hre tur khawp chuan Simon-a nen hian an inkawm ngeih hauh lo tih ka chiang,kan inhriat tirh atang a tun thleng hian Simon-a thian tak tak chu pakhat chiah ka hria.A sumdawnna lam a a thian te hi chu ka hre deuh vek a.Nel pawh ka nel viau vek,thian a ngaina lo a, amah chauh in rei tak tak Office ah a inkhung thin a,a chang chuan Aizawla a dawr ni lo hi hmun dangah ka hriatpui si loh sumdawnna a nei ni hian ka hre thin,kan inneih hma khan Sangpuii khan min hrilh thawi zauh tawh a, mahse, eng nge dik lo ber chu a hre lo a, keipawn ka hre hek lo.

Dim zet a chevel thawmah ka harh a, khua a lo eng tawh,ka inlet a, ka rin ang ngeiin Simon-a a lo tho leh daih tawh, ka thawh khalh ngai mang lo chu a ni e.

“Khawnge i kal dawn?” ka puansin theh hlim pahin ka ti a, min rawn en zawk a.

“Vawiin kan chhuah hmain tih fel tur ka nei a, Emily a lo kal dawn a” ati a,ka mitthla ah Emily a lo lang a, Simon-a Dawr thar ber a Sales manager ani a,nula nalh leh inkhaithli tharh mai,lu zo veh vawh leh hna thiam zet ani bawk.

“Um..” ka ti ringawt,Hmeichhe dang kawp tur hian ka ring chhin ngai lo.

A rawn kal hnai a khumah a rawn thu a, min en ngur bawk.

“Sorry aw..” a ti sup a, a ngaihna hre lo zet in ka en ha thung.

“Engvang chuan?”

“Nimin khan chhungkaw thil a inrawlh lo tur a ti che ka ang em a, mahse, chutiang lam a ni lo ania, ka nupui i ni a, ka chhungkaw neihchhun ah hian nang hi ka tan chuan i hlu ber tih i hriat kha..” min rawn ban thut a, amah si chetin min pawt bet a,a awmdan tehthut chuan min ti hamhaih letling a, engtia han chhan let tur nge pawh ka hre lo.

“Engemaw tal sawi la” ati leh sup a, a Perfume rim pa zet,amah nen a inhmeh ka tih em em thin chuan ka hnar a rawn verh a, he Perfume hi chu amah ka hrittirh atangin ka hriatchhuah kumkhua na tur a ni tih ka hre daih tawh.

“Ka ngai ngawt ang che” a dang sawi tur ka hre lo, kan inneih kum hnih chhung hian vawi engemaw zat min zin san tawh,thil thar a ni lo, mahse, a zin apiangin ka muhil tha thei lo thin a, a lo haw hun ka nghakhlel em em ziah bawk.

“Kei pawh,lo haw leh vat ka tum dawn alawm” min kuai dak a, a hmelah chuan a thiltum ka hria, ka mit ka chhing a, a hmui lum ham ham chuan ka hmui a rawn si a, ka chhang mai lo, ngen ngawl zet hian ka hmui hnuailam a rawn pet a, ka chhang ta nge nge,a rum hawk mai,min nem mu a, rei tak in kiss tawh lo ang mai hian a duhthawh em em bawk.

“Nizan khan i muhil daih a..” ati sup a, chhang lo in a hnute hmur tereuhte chu ka hmet niap niap a,diktak chuan ka muhil hauh si lo.

“I zin dawn sia, muthilh vat kha a tha lawm” a nui nghawr dat mai.

“Ka zin dawn vang takin alawm i muhil daih kha pawi ka tih,mahse, tunah kan ti ta tho a, a tha vek e,zin chhung a daih ang chu..”a nui leh hawk a, min chhaih dan fo a ni a, a zin dawn apiang hian hetiang fiamthu hi chu ka hre ngei ngei.

“Um,Shillong lam Nula khawhar deuh pawh an lo awm maithei a..” ka kut a man bet a,

“I kut tereuhte hi a vah kual reng chuan a bul atangin kan tan that leh angai ang”ati sup a, ka kut a man beh chu hnuailamah a nawr thla a, a mipatna rawn tho leh tan mek chungah chuan a nghat a, ka nui tawp chat mai.

Vanneihthlak nge vanduaithlak zawk pawh ka hre lo, kan tan leh hmain kawngkhar an rawn kik ta hlauh.

“Tho duh suh, Emily a lo thleng tawh anih ka ring ‘tih pahin a tho a, a taksa ruak vek chu a zahpui lo tih hriat zet hian a tho a,nia, a zahpui lo ang, a nupui ka ni miau a, chumai bakah a pian a la nalh em em zui bawk.

Khum sir a a Robe awm chu a ha a, kawngkhar lam a pan a, a chevel chu hmuhnawm ti zetin ka lo thlir vang vang thung, ka Hmangaih hluah hluah, mahse, fa kan la nei lo hi a chang chuan hrehawm ka ti thin,kan in entir ngun tawh a, kan tha ve ve bawk si.

“U Simon,an hmu duh che a” kan nula in a tih ri ka hrethei a, a ring dik khawp e ka lo ti rilru a.

“Ok, min lo nghak rawh se, ka rei lo ang” a khar zui lehnghal.

“I inbual phawt dawn lo mi?” kan chet dunna avang khan inbual loh ngawt chi niin ka hre lo.

“Um, ka intleuh zuai ang, tho la..”a mit de sawr sawr chu ka en a, ka tho hman thelh,mahse, ka thulh leh ta zawk, amah hmu duhin an nghak mek a, kan inbual dun anih chuan thil thleng tur ka hria,amah in inbual se a tha zawk.

“Aih, inbual la, ka la mu lawk dawn..” ka inkhuh a, a nui hawk hawk ri chuan ka chhungril a fan raih raih mai.

A inbual zawh veleh thawmhnaw ka dah chhuahsak chu a ha sawk sawk a, Khum ka lo ti fel chu ka samah a rawn fawp zauh a, engmah sawi lo in a chhuak zui nghal a, ka thil tih lai ka chawl a, Banga kan inneih thlalak intar chu ka en vang vang a,Nupa kan ni a, chu pawh kum hnih lai,mahse, kan pahnih hian vawikhatmah kan inhmangaih tih kan la sawi lo ve ve.Ka hmangaih tih hi hrilh kher ngai pawn ka hre lo, ka awmdanah a lang chiang tawk em em a, inhmangaih lo ila Nupa ah pawh kan insiam lo ang tih hi ka ngaihdan a ni a, Simon-a pawh hian vawikhatmah min la hrilh lo mahse min ‘Hmangaih’  tih hi ka ringhlel ngai lo.

Ka inbual a, Inhnuai ka thlen thlak chuan ka nu leh kan nula Kitchen lamah an lo inbe lawng lawng tawh,Simon-a te unau hi an tho tlai ngai lo reng reng, ka nu hian an naupan lai atangin a ti thang hle anih ka ring nghet thlap,a naute ho pawh an lo zin tum pawn an mu rei ngai lo, ka thawh khalh hman hlawm lo.In chhung a awm mai mai pawh nise thawmhnaw ho lam lutuk an inbel ngai hek lo.Puitling vek tawh anni chung hian ka nu in tih tur a hrilh hi an hnial awm pawh ka la hre hek lo, kan in chenchilh loh vangin ka hre tam lo zawk hial maithei.Hmeithai fa anni tih hi eng kawngah mah a lang ngai lo,an rilru a zau em em a, midang chanchin chhe zawng an sawi pawh ka hre ngai lo.

“Nu, i insiam tawh mi?” ka ti a, an pahnihin bai siam dan an lo inhrilh a,ka lut thawm pawh an hre lo.

“Aw, siam tawh e,enteh, ka lo let leh tawh rih dawn si lo a, i bai duh deuh kha siam dan ka lo hrilh a” a nui a,a Mo ang hian min en lo, a fanu te zinga pakhat angin min en zawk.

“Engang pawn zir mahila i siam a tluk thei ngai dawn lo alawm,kal ve thei ila ka ti em mai..”ka ti halh a, kan nulain Thingpui min rawn pe thuai a, thingpui hi ka ngaina lem lo, mahse, Zingah hi chuan ka in ve ziah thung.

“Nia, lo kal ve la ka tih nen, mahse, kum tawp lamah Mama nen in lo kal thei ang chu, tunah chuan chawlh i nei si lo a” ati ve a,ka duh chuan ka chawl thei tehmeuh mai, ka chawlh pawh ka la hmang zo lo.mahse,Simon-a berin kal ve turin min ti tlat si lo.

“Um,nang pawh i theih veleh lo chho leh la” ka ti a, ka pu chanchin ka zawt a, a zia deuh tih a sawi a, ka rinai takin a sawi awlsam lawi.

Emily leh Simon-a an rawn inzui chhuak a, Emily chuan Note bu leh Laptop  a keng a, a kal chhungin tihtur an inhrilh a ni ngei ang, min rawn hmu a, a nui var var mai, atthlak zetin Simon-a nen an inhmeh ka ti tlat pek,ka lu ka thing nawk a, ngaihtuah loh  tur ngaihtuah hi at na chi khat a ni ngei ang.

“I dam maw?” min rawn pan a,Pasal a ngaihsak miah lo tih an sawi ka hre tawh,mak ka lo ti ve ngawt.

“Um ka tha lawm, nang zawk le?”

“Ka tha e,ka kal mai ang, ka Boss hian hna min pe teuh a” a nui har har a, Simon-a lo nui ve suk chu ka en a, min rawn en ve chiah bawk.

“Emy, i kal dawn mi?” ka beisei loh lutukin ka nu zawkin a rawn ti ta tlat.Phawk zet hian ka en a.

“Um kal mai ang,tluang deuhin kal ru” ati a, a nui leh var var bawk.Makti lutuk hian Simon-a ka en a, ka nu ka en leh a, an pahnihin min en lo in Emily an en ve ve.Ka nu khan ‘Emily’ pawh ti lo in ‘Emy’ tiin a ko a, an inhre tha hle tihna a ni.

“Ni lo, chawei nghal rawh ka tih kha, i  duh zawng pawh kan siam vek tawh” ati leh a, sawi ve tur reng reng ka hre lo.

“Aaaaa, engmah ka chhungte ka hrilh si lo a” ati leh niah niah a,

“Kan be mai dawn lawm,kan inhmu khat a bakah ka lo kal hmasak tum pawn Mama hnenah lo hruai tur in ka ti che a, i lo kal lo a..” ka tawlh let hrat a, ka awm ve tih an hre lo niberin ka hria.

“Nia, ei rawh,i chhungte i hlau tak tak lo tih ka hria lawm” Simon-a aw a nuihzatna ri chu ka hriat hmaih lo.

“Ok,chutia Boss te berin eitur a min tih chuan ka ei mai ang chu,mahse ka nu i be thei” Simon-a a en a, a Boss anih angin a en hauh lo.

Kan chawei chhungin ka nu nen an inkawm a, kei erawh ngawi rengin ka ei mial mial,ka lo hriat dan kha chuan a hnuaia thawk satliah emaw ka lo ti a, tunah chuan an tawng danah a hma fe atangin an lo inhre tha em em tawh tih ka hre thei a, engvangin nge Simon-a hian min hrilh miah loh ka hre lo.Ka nu nen an inkawm danah pawh reitak lo inhre tawh tih alang reng mai.

“Min thlah duh lo mai rawh” ati a, a bag ah a thawmhnaw tam vak lo a khung a, Shillongah pawh a thawmhnaw a awm sa vek a, ken teuh a mamawh lo hrim hrim.

“Nia, eee,Emily kha engtik atangin nge i hriat?”

“A rei tawh mai”

“Anih tak chu..” ka ti nghat a, ka Dressing table Drawer chu ka nem khar a, ka tum aiin ka nem na mah mah,a ri  pawp bawk.

“Eng nge min zawh chhan?”

“Eng lem mah, ka nu pawn a hria  a, in family nen in inpawh em em tih ka lo hre lo a, tlemin ka hawi buai deuh a” ka tho a, Ka thawmhnaw dahna lam ka pan a, diktak chuan Airport thleng ka thlah ang chu ka ti a,mahse, thlah a duh loh chuan ka thlah lo ang, Exam a hnai tawh a, naupang in min mamawh nasat zual lai tak ani hrim hrim.

“Sorry,Shillongah kan inthenawm thin a”

“Sawi kher angai lo ania” ka ti leh nghat a, Ka thawmhnaw hak tur ka la chhuak a,

“Hon....min en teh..” ka hnung mai atangin a rawn ti a,ka hawi let chuang lo.

“Min en teh..” ka darah a rawn vuan a, a lam hawiin min kuai her a..

“Ka tihpalh ka tih kha,kan naupanlai atangin ka hre tawh a, kan inkawm nasa viau bawk a, ka hna min enkawlpui tur hian ka sawm leh a...”

“Insiam rawh, engmah tih dik loh i nei hleinem” kalsawn ka tum a, mahse, ka kawngah a rawn kuah a,amah si chetin min pawt bet zui nghal hmak bawk.

“Kan inhre sa tih ka lo hrilh lo che hi ka ti dik lo,bakah i lungawi lo tih hre chung chuan nuam takin ka kal thei lo ang” ka darah a khabe a rawn nghat a...

“Ka thinrim lo, min thawng deuh mai zawk” ka ti nghat a,dik tak chuan ka thinrim tawh lo, hetianga ngaihdam min dil tum hi a awm thin, ka thinrim rei ngai lo.

“Anih chuan min en la..” ka inher a..ka khabeah a rawn dawm a, a mitah ka en ran mai.

“Ka Nupui i ni a, ka neih zawng zawng hi i ta ani bawk a, i tello chuan nun hi hman pawh ka tum ngai tawh lo,mahse, ka tum loh tawpin ka ti thinrim che a,min ngaihdam dawn nia..um..” a kawngah ka kuah ta nge nge...keipawn lungawi lo chunga thlah ka duh lo, kan inhmu leh dawn em pawh kan hre lo a, thinrim chunga inthlah ka duh lo.

Simon-a te kal atangin ni hnih a liam tawh, hun a neih veleh min rawn be ziah a, ka pu erawh a ziawm thei meuh lo anih hmel, nidanga a zin aiin ka ngai zual zawk, kan boruak neuh neuh vang kha a ni mahna le.

“Hmingthan, i phone a rik char char kha mawle” kan thawhpui pa rawn tawng ri ah chuan ka harh zawk a, hmu miah lo in ka hma lam ka lo en veng veng.

Rang zet hian ka ban a,Ruatdika a lo ni a, nimin khan Sangpuii te chaweiah a sawm a, min sawm tel ve a, mahse, Sangpuii nu a that loh deuh thut avangin a thulh leh rum rum kha ania,engthilah nge min biak a duh ka hre lo.

“Um..” hello pawh ka ti lo..

“Khawnge  i awm?”

“Tun ang hunah chuan khawnge ka awm thin i hria lawm mawle” ka nui a, a nui ve huk huk tho.

“Ok.ngeiawm lutuk, Zaninah Dinner kha Bon Appetite lamah kan ti ta mai, tlemin huang ka zauh ta deuh a, Zasangi te nupa ka sawm tel a”a rawn ti a.Ka ner nak mai,ka chak hran lo, mahse, a hmun tur a rawn sawi kha Dawr thar ani a, a nawm zia an sawi ka hre ngun ta riau a, kal ve mah ila pawi ka ti leh lo.

“Ka lo tum dawn nia dar engzatah nge?”

“Dar 8,lam i ngai dawn em? Dawn chuan kan rawn lam kual ang che”

“Aih, Driver kan nei lawm..ka lo kal ang”

“A that chu..tlai lo la..” a nui kur kur a, thil kan tih khawm dawn apiang hian amah zawk hi a tlai ziah a, ka hau nasa thin.

Simon-a nen kan la inbe miah lo, vawiin chu an buai deuh a rin thu kha zing lamah min rawn hrilh a, an buai ta deuh a ni ngei ang ,Ka kalna tur Msg in ka hrilh a..’Bon Appetite’ ka thlen hnuah pawh min la rawn reply chuang lo.

Rin aiin nuam ka ti ta phian, thian ho a thil tih khawm hi chu a nuam ve hranpa hrim hrim.Thil chi hrang hrang kan sawi a, a chang leh kan inhnial bawk.

“Hming, Emily chu a chhuk ve ta mi?” ka thil ei lai ka chawl a, ka hak thelh bawk.

“Eng maw?”

“Nizan khan kan inhmu a, vawiin hian Shillongah a kal ve dawn a ti a.” ka chhungril a deng dawt mai..Simon-an engmah min hrilh hauh lo.

“Um, kal ve ta e,Emily hi chu family friend a ni sa hrim hrim a..” ka nui lui sak bawk, hre lo nih ka duh lo, chumai bakah ka chhungril hian a kal ve ang tih min hrilh tlat bawk.Kan chhungkaw chungchang midangin an lo sawi ve ka duh lo.Ka thiante pawh nise ka duh chuang lo.

“Ka hria lawm,bakah Simon-a ex a ni tih pawh i hre tel  ang chu tiraw?”

Zawi deuh hlekin Hriati’n Ruatdika a khak ri chu ka hre nangin ka ngaipawimawh lo, a thil sawi khan ka tan chuan buaina a thlen tawk em em..Ka lo hlauh ruk, eng nge anih ka hriat si loh kha he thil hi a ni ngei ang...