BLACK HORSE-4

Chapter- 4

“Hre dawn lawmni?” ka nui lui sak a, ngaipawimawh lo hmel fe hian ka thil ei lai ka ei zawm lehnghal a, mahse, ka lem thei lo lam chu a ni.

“Ok, i lo hriat chuan a that hlauh chu, i hre si lo anga i la nat phah ka hlau mawle” a ti leh a, ka en a, ka ner khum zauh bawk.

“Ka lawm e, min lo ngaihtuah vang leh ka thian i nih anga i tihtur i lo tih avangin..” ka ti halh a, za lo zet hian a nui ve a, tih luihna a nui a ang takzet bawk.

Dar 9 leh tlemah In kan thleng a, mak takin Simon-a hnen atangin engmah call emaw Msg pawh ka la dawng ta chuang lo, ka pu a zual anih chuan min rawn hrilh ka ring a, mahse, tuman chutiang lam sawi tur pawn min rawn call lo a, bakah Emily kha a kal ve tih reng reng ka hre lo, eng hna nge an neih ka hre lo hrim hrim,Simon-a sumdawnna hi Mizoram chhungah vek a ni a, Shillongah hna chungchang buaipui tur a neih ka hre lo.

“Hello..’ Hmeichhia hian a rawn ti a, ka la sawn a, na zetin ka Phone ka melh nghek ringawt.

“Simon-a ka lo be thei angem? A Nupui ka nia..”  ka ti a, tu nge lo pick tu kha ka hre tlat lo.

“Ok, lo nghak lawk,kan pe lawk ang” a rawn ti leh a, Emily pawh a ni lo a, a farnu te pawh an ni chuang lo.

“Ka pi, an meeting mek a, nakin deuhah lo ti leh mai ta che” a rawn ti leh a, ka ang pham mai, tun ang hunah hian eng meeting nge awm ang?,Ka pu a damlo a, ani meeting na ah a awm thung a...

“Ole, i lo hrilh mai dawn nia..oh,tu nge ka biak le aw?” ka ti leh rih a,

“Hotel a thawk ka nia,a Phone hi a batery a low avangin kan charge sak a..”

“Um, min hrethiam dawn nia, engpawh nise ka lawm lutuk” ka ti a,lo hrilh min tiam a, ka dah veleh ka thaw nghal hawk thei hial mai, mahse, ka thawveng chuang miah lo.Hotelah meeting..a Phone a charge tir bawk a...a Phone lo pick tu lah mizo tho,engmah ka hrethiam hlawl lo e.

Dar 12 pelh thak thleng ka nghak a, mahse, min rawn be ta chuang lo.Hetiang hian vawikhatmah a la awm ngai lo,chuan, Emily lah a bialnu hlui a lo ni a, Ruatdika khan engtin nge a hriat ka hre lo,mahse, chu lam a pawimawh lo, amah ngei khan a sawi a, a hnathawh pui turin a sawm in a sawm a, chumai bakah min hrilh miah lo in tunah pawh Shillongah a chhuk ve leh a...ka mut a chhuak lo, ka mu meng kar a, ka mit pawh ka chhing buai peih ta lo law law.

Khawvar dawn lamah ka muhil ve ta hram,kan Room kawngka kik thawmah ka harh a, thawh phan pawh awm lo in ka harh chiang kawk mai, mahse, ka mit a thip a, ka lu a na ngut ngut thung.

“Eng nge ni ta?” kan nula lo ding ran chu ka en a.

“I thianpa a lo kal a, eng nge maw biak duhna che a nei a..” tu ka thian nge tun ang hunah lo kal ang ka hrethiam lo.Zinglam dar 7 chauh lehnghal.

“Tu ka thian nge?”

“U Ruatdika..” ka meng phawk vak ringawt,a ni leh ni lo ang takin zing dar 7 ah a tho tawh ania, chuti tak a pawimawh chu eng nge anih ang?

Living Roomah a lo thu a, ka thawm a hriat veleh min lo nuih var var bawk.

“Eng tizia nge?, i damlo nge i tho a zawk?”

“A ni lo ve ve.”

“Chuti anih chuan engthil nge?”

“Rawn thu phawt teh,a reng rengah i hna i kal dawn lo mi? I va mu rei ve” In neitu zawk niawm takin ati leh a.

“Dawn e, ve lutuk che hian, i thawh hma ve tum anih kha a”

“Ha..tak takin ka lo kal kual mai mai, chubakah Sangpuii khan a hrilh che em ka hre lo a..” a mah ep zawngin ka thu a.

“Eng maw min hrilh ang?”

“Aaaa, a hrilh loh che leh a pawi lo animai,Thingpui pawh min pe dawn na nge?” min en lo in phone a en a.

“I lo la in na nge?” ka ti a,a lu a thing mai.

Engmah thil pawimawh a awm lo, mahse zing karah lehnghal min rawn tlawh thut a, mak chu ka ti tho,kal pahin min rawn tlawh kawi tih sawi mahse ka awih chuang lo, ka hrechiang ve thawkhat, thudik nge dawt a sawi tih hre turin a mizia ka man tawk thawkhatin ka inhria.

College kal tura ka chhuah dawn lai takin ka Phone a rawn ri a, Simon-a..Ka titau rilru ringawt,nimin khan engmah a rawn sawi leh ta si lo.

“Hello..” ka ti sep a.

“Hon..Ka pu a chatthla chiah a..” ka ding khawng nghal lah mai..

“Ehe, a va pawi em aw...vawiinah vui tur ani em?”

“Um, ni ang,nimin khan chanchin ka rawn hrilh hman ngang lo che a” a thaw hawk ri ka hre thei..

“A pawi lo, chuan...” ka sawi zawh hmain min rawn tawng khalh leh a.

“Lo kal a ngai lo ania,anih tur ang a ni zo vek tawh a..” ka kut ka humruh ngat ngat mai.

“Ok, ka nu a tha em?” ka ti chhuak thei hram, chhungkaw zinga mi ka ni ve ngei a, mahse, chhungkaw zinga mi a boral pawh ka kal ve ngai an ti si lo.Kum hnih chhung khan lungawilohna tur ka hmu ngai lo tluk a ni a, mahse, tun ni hnih thum lek chhung hian ka lawmlohna tur hlir ka hmu ta thung.

“Um, a tha e,a tuar thiam khawp mai,anih ka dah phawt ang..lo in enkawl tha ang che..” ati leh nghut a,ka bu ringawt, min hmu thei lo tih ka ngaihtuah leh hnuhnawh a, mahse, ka chhan hmain a Off hman tawh.

Nilengin rilru mumal ka pu thei lo,eng nge dik lo hi ka hre lo, kan inneih hnu a Shillong a kan chhuk khan ka pu hi ka hmu a, Pa lian vak lo, sa nghet lam,mitmeng nelawm lo zet mai a ni a, a tawngkam chhuak pawh a bung tha viau,Simon-a te chhungkua khan an zah em em a, engkimah an rawn niberin ka hria, mahse, ka hmuh tirh a a nelawmloh ni a ka hriatna kha chu karkhat ka kawm tlin chuan a bo vek tawh,a tawngtam lo, mahse, fiamthu a duh viau thung.Simon-a nen rei tak tak Roomah an inkhung thin a, Simon-a nau te  chhuak reng rengin an lo haw a an lam hmasak ber chu ka Pu kha ani tlat bawk.

“Enteh, ka pu hi ka thiantha ber ania, ka thuruk zawng zawng deuhthaw a hria asin..” hei hi Simon-a chhang chiah Ruth-i min hrilh a ni a, ka pu bulah ka awm tam tual tual a, Ruth-i chang lo pawn an thuruk an kawl tir ang tih ka chiang.

“Mampui..” ka nu in a rawn ti vau vau a, ka tlawh khat zia ka ngaihtuah a, ka rilru a pik bawk nen va kal ila ka ziawm mahna.

“Aw, nu...eng nge ni ta?”

“I pu Boral pawh min rawn hrilh lo a,hna i kal nge kal lo?”

“Kal e, ka haw tep,ka rawn tlawh kawi ang che u”

“Ekhai,inleng te pawh in nei maithei sia, ngatinge hna te i kal reng reng a?” a aw ah mak a tih zia a lang thei.Nia, a mak alawm, chhungkua a kan chenpui ngei a Boral a, kal tur in min ti lo a, Simon-an min hrilh a an duhtawk mai.

“Aaa, Nu, tumah helamah hian Simon-a te hian chhungte tih tur an nei lo tih i hria lawm,lo leng tur an awm pawh ka ring lo” ka ti a, ka ngaihtuah let a, Simon-a chhungte tumah ka hre lo tak tak, thian chu a ngah mai, mahse, chhungte a nei lo anih ka ring.Kan inneih hnuah pawh tumah an chhungte kan tlawh ka hre lo, a thian tak tak pakhat a awm,anni chhungkua nen chuan kan inpawh thawkhat.

Hna ka ban veleh  Ka nu te in ka pan a, kan upa ber hian Nupui a nei tawh a,fa pakhat, hmeichhia an nei a, ka u chiah leh ka nau erawh an la tlangval thung.Chhungkaw inpawh leh inkawmngeih em em kan ni a, mahse, a chang chuan laizawn neih ve ka chak thin a, ka u in nupui a neih hnuah erawh chuan Laizawn ka mamawh ta lo,kan mo a fel em em a nau tak tak en in min en thlap mai.

“A ni...” tih pahin kan naute in min rawn pan a,A sam kir chiat chu a phe dar dar bawk.

“I lo kal tak rau rau ah chuan chawei ve nghal mai rawh, hei, chakai kan nei teuh ania” ka nu in a lo ti nghal sawk sawk a, Chakai ka duh zia ka nu hian a hre chiang khawp,Chakai sawi zawng ringawt pawn ka ril a tam nghal raih raih thei, zingah chaw ka ei mumal lo a, chhunah lah engmah ka ei hek lo.

“Um, ei nghal ang,ka ei chak tawp..” ka ti a, Naute ka pawm a, ka pa a lo la haw lo a, midang zawng an awm kim thung.

Tlansanga’n min rawn bia a, ka awmna min rawn zawt a, zan lamah lo len an duh a lo ni a, a awm tho mai, Simon-a thian tha ber a ni a, a pu tak tak ni lo mahse lo len chu an tih awm tak a nih na lai a awm.

In kan thlen hnu lawkah Tlansanga te an lo thleng a, ka beisei loh tawpin Sangpuii te nupa leh Ruatdika te an lo kal tel bawk,ka nu leh ka pa bakah ka nau mipa in min thlah a, ka khaw har ka hlauh tehlul nen kan ri ve ta laih laih mai.

“Engtik nge Simon-a chu a lo haw theih ang?” Tlansanga’n min zawt a.

“Ka hre mai lo le,karleh lam anih ka ring” ka ti a, ka hre tlat lo,Zinga min rawn biak bak kha kan la inbe leh lo.

“Lo haw hma thei deuh se ka ti.Kan inkhelh tur kha Saturday hi a ni tawh sia, a ni tiraw Ruatdik?” atih zawm leh a, an inhre pawh tlang vek tawh a, Badminton an khel ho fo bawk.

“Um, ni e mawle, mahse, Simon-a a awm loh chuan kan team kan kim dawn si lo a, tlemin a buaithlak ve deuh dawn anih chu..” ati a,Tournament an khelh tum a awm fo a,Tournament ni lem lo thian ho a in chawi a khelh tum an nei bawk a. Vawikhat chiah ka la en thung.

“Naktuk ah ka be chhin ang, vawiin a Emily ka biak kha chuan Fridayah kan lo haw ang kha a tia” ka thutna cushion ka hmer nghet salh mai.

“Um, Emy kha a kal ve tak e,an lo haw ka ring chutia Emy-in a tih chuan “ ati ve leh a, ka ka chhung a ro halh a, harsa ti zet hian ka chil ka lem thei hram.

“An lo haw leh a tha,kan kim dawn tihna animai” Ruatdika’n a ti thuai a.

Dar 11 velah an haw ta diak, kan In lian leh reh ruih maiah chuan kan nula leh kan Driver nen chauh kan awm leh ta ran mai, kan Nulain inchhung a kalh fel a, kan Driverin Gate a kalh thung,mu turin Room ka pan a, mahse ka mut a chhuak miah lo.Simon-a te an mut daih tawh ka ring a, engtin nge Shillong lamah khawhar in an kalpui dan ka hre lo a, engpawh chu nise dar 11 thleng thleng chuan tumah an len ka ring lo.Ka call ta nge nge.Reife a ring hnuah a la ta hram.

“Hello,Mate..” chauh hmel zet hian a rawn ti a, a muhil tawh ka kai tho a ang viau.

“I mu tawh mi?”

“Um, i la mu lo maw?”

“Mu dawn chiah, in leng kan nei ve neuh neuh a, an haw deuh chiah a..”

“Um, ka hria lawm, Tlansanga te khan len an tum tih min rawn hrilh a..” a hma ai chuan a aw pawh hriat a nuam ta deuh.

“Nia, an fel khawp mai, engtik nge i lo haw theih ang?”

“Fridayah ka lo haw ang”

“Ok, anih tak chu,mu leh tawh rawh, i chau lutuk ang..”ka ti sep a.

“Mangtha le..” ati sup a, ka mangtha hman awrh tih ah a dah zui nghal daih bawk.

Tlansanga thil sawi kha ka bengah a ri nawn sek mai, Emy-in kan lo haw ang a tih chuan an lo haw ang ati anih kha, chuti anih chuan kei ai hian Emily chuan Simon-a lakah thu a nei zawk tihna ani mai em? Vawikhat pawh ka la ngaihtuah ngai loh thil in min tibuai ta tlat,ka pasal, ka ta emaw ka tih hi hmeichhe dang nen kan lo intawm reng anih teh chuan ka kehchhe hneh dawn lutuk..

Class ka lak laiin Sangpui-in min rawn call a, naktuk hi Simon-a te lo haw hun a ni tawh a, engtia lo hmachhawn tur nge tih velah ka buai lutuk a, ka mu tha lo bawk nen ka mit hnuai a val kual raih mai,ni tlemte lekah hian ka nunah thilpui, chu pawh Thli chhia a lo thawk thut niin ka hre ber tawh.

“Hey...eng nge a?” ka ti nghal tawng.

“I buai em?”

“Buai tho e, class ah ka awm a, sawi la..”

“Lunch ei turin ka lo kal ang,ka hmu duh che a..” Ruatdika thilsawi kha ka hrechhuak zawk mai, engthil tak ni ang maw?

“Okhey, min treat dawn te chuan..” ka nui a, a nui ve tho bawk.

“Khawiah nge kan inhmuh ang?”

“Chopstick ah animai lawm, in College tang a hla chuang lo a” a rawn ti leh a, he Restaurant hi ka kal zauh zauh tawh a, an thilsiam a tui bakah staff te an polite em em bawk nen kal manhla tak a ni.

Dar 2 rik hma hretin a lo theng a, ke in kan thil ei na tur lam kan pan thla dun a, a tawng duh thin nen vawiin chu a thutak deuh ran hian ka hre mai, a pasal neih hnuah hna a la zawm leh ta lo, a nu a damlo  bawk nen a remchang phian zawk in ka lo hre ve ringawt bawk.

“Engthil nge chuti tak a pawimawh chu ni a?” kan thil eitur kan nghah chhungin ka ti a, a phone a bih leh rih a, a awmdan vel chuan ka awm a ti nuam miah lo.

“Awi, sawi dan tur pawh ka hre mai lo,englo ania, Simon- a hi...” a tawp leh rih a, thawk pawh thaw tha ngam mang lo in ka lo en thung.

“Hmanni ah msg ka dawng nawlh a, Simon-a hian a Pu kha a thah tir an ti asin,awi...ka hrethiam lo” nghet zetin ka bag hrui ka chelh a, ka khup a sai dar dar bawk.

“Khawi atangin maw i dawn?” ka aw a lawi rawt mai.

“A number chu hei hi nia,ka call nghal a, mahse, switch off a inti tlat a, bakah engtin nge chutiang thil Simon-an a tih tehlul ang..chuan Ruatdika kha ka hrilh a, ani pawh khan mak a ti lutuk a, bakah awih lo turin min ti a..” a  bul a tui inchhawp chu dangro hmel zet hian a in nghal khawlh khawlh mai.

“Simon-a hrilh ila a tha ang..bakah chutiang a inpuh hmingchhiat chu tupawn an tih tur ani lo hrim hrim” ka ti ro halh mai, mahse, Sangpuii te inneih ni a Simon-a tawng ka hriat kha ka bengah a lo ri nawn leh a, tu emaw chu that turin a ti ngei anih kha..Ni lo, ka lu ka thing nawk mai.

“Aih, hrilh lo ang, bakah min rawn thawn tu hi tunge anih pawh kan hre lo a, chu ai chuan ngawih mai a tha zawk, hrilh che pawh ka tum miah lo a, mahse, ....ka zep thei hlawl lo..Simon-a hi tu nge anih pawh kan hrechiang mang si lo..” ati leh duah a, mak ti zet hian ka melh reng thung.

“Thiannu, chutiang in engtin nge i sawi theih a?, ka pasal hi keiman ka hrechiang alawm,bakah midang tihnat duhna khawp a rilru sual a pu lo..”ka duh aiin ka tawng a chang hret.

“Sorry, ka hria lawm, tumah a that lo ang..aaaa, ka hrethiam bik lo, a chhan ka hre lo, ka ngaihtuah che a ni tawp mai” ati leh halh a, hetiang hian a awm ngai miah si lo,kan inneih hma kha chuan Simon-a sumdawnna chungchang kha a sawi ngei a, mahse, kan inkawp zui tak zelah kha chuan ka thiannu ber anih ang ngeiin a nel ta thuai a, kan inneih pawn best ah ka hmang bawk.Vawikhatmah engmah khatiang lam a sawi leh ngai ta lo.

Kan eitur chah a lo thlen takah chuan kan sawi zui ta lo, ka awih hauh lo nangin nuam ka ti chuang lo,mahni pu te ti hlum duh tur khawp a ni lo tih ka chiang ve tawk in ka hria, mahse,...mahse...tuemaw kha chu That turin a ti ngei lawi si,ka zawh khan Zawhte a ti a, mahse, ka awih miah lo.

“Ka sawi loh tawp tur ka sawi niin ka hria, mahse ka vei em a ni..” hrehawm tih hmel zet hian a ti a, ka nui lui sak thung.

“Chutiang in ngai reng reng suh, ka thiannu ber i ni a, kei emaw ka pasal chanchin tha lo i hria anih chuan min hrilh hi i tihtur a ni alawm, ka thinrim miah lo ania” ka ti a, a then ve tak nangin a rilru a nuam chuang miah lo tih ka hria.

Doctor a ni a, thil te tham ah a buai chung ngai hek lo, mahse, tun tum chu amah ang lo takin a phili a, a thil sawi lah kha a mak tehnuaih rualin a msg pawh ka hmu ve thlap a, engmah dik lo a awm miah si lo.A thiannu ka nih avangin nidang ang lo takin a lo phili ve anih pawn a mak lo,Simon-a lah hi tunlai chu a awmdan a mak em em bawk si.A hmain a sumdawnna chungchangah a lo ringhlel tawh a, hetiang boruak a awm leh takah phei chuan a lo phili chiam hi thil mak a ni hauh lo.

Ruatdika biak ka mamawh, hetiang lamah hi chuan a rintlak zawk ngei ang, Hmelhriat a ngah a, a duh phawt chuan kha number pawh kha a chhui chhuak thei ngei ang.

“Hriat, khawnge Ruatdika?” ka ti a, Hriati hi Ruatdika bialnu anih rualin ka Cousin a ni a, Ruatdika hnuaiah a thawk bawk.

“A awm, lo  nghak lawk..” ati a, a ri deuh rak rak a, Ruatdika a ko ri lang lang ka hre zui nghal zat bawk.

“Hello...” Ruatdika aw hian a rawn ti a..

“Ka hmu duh che,zanah i lo kal hman angem?” ka ti nghal tawng.

“A va hmanhmawhthlak awm rum rum thin, tihtur ka lo nei asin..” ati nuah nuah a, hetiang hian ka ti fo, kal duhna ka neih te hian ka va be thawr a, min hnial mahse ka ti lui ziah bawk.

“Hmanhmawhthlak, ka hmu duh che a ni tawp mai,i tihtur chu thulh mai teh..”

“Ok..nang berin min mamawh te chuan..mahse, in pa awm loh hlan a lo kal hi a pawi thei em?” a nui a..

“Hmela, chutiang sawi duah lo in lo kal mai mai teh,ka lo ring ang che” ka ti a, min rawn chhan leh hma in ka dah nghal daih bawk.

Eng nge ka zawh dawn pawh ka hre chuang lo, mahse, kha Msg kha ka entir ang, ka entir lo anih pawn ka hrilh tho ang, tih dan a hre tur a ni, he thil ah hi chuan ka nu pawh tihbuai ka duh lo, nidang ang chu nise Simon-a zawk in ka buaina hi a chingfel tur, mahse, tun tum chu amah ber hi ka buaina a ni ta tlat thung a, amah hrilh theih a ni hauh si lo..mahse...kei hi engthil nge ka tih tak? Ka Pasal ngei ringhlel in ka chhui ta tihna ania,ka thawh hawk mai..ngaihtuah zui ka duh lo, eng nge dik lo zawn chhuah ka tum mai zawk.

Ruatdika lo thlen veleh Simon-a Office ah ka luhpui a, kan nula a awm a, kan Driver erawh kan thenawm dawrah a leng thung.

“Le..han sawi la..” ati a, dawhkan chungah a thu a, kei erawh Simon-a chairah ka thu tlum kak thung.

“Vawiinah Sangpuii nen kan inhmu a..” sawi zo lo in ka chil ka lem khalh mai.

“Chuan..?”

“Englo,Msg a dawng a, Simon-a chungchang ania..nangpwn i hriat kha” sawi zawm leh mai dan tur ka hre lo..a kut zungtangin dawhkan tlang a tlir dar dar a, min rawn en a.Za vak lo in a nui hmasa te te a,a awmdan chuan ka awm a ti nuam miah lo.

“Thil han sawi tan dan tur ka hre miah lo,mahse, thil pakhat erawh i hriat tur a awm,  i lo hre tawh sa maithei bawk,I pu Boral ta hi Simon-a tan chuan a engmah a ni lo,a nu chhungte a ni hek lo..a sumdawnna bul tanna tur a sum pe tu mai a ni zawk..”

Ka taksa a vawt nghal raih raih mai.