BLACK HORSE-5

Chapter- 5

Ka taksa vawt vek kha a rawn lum chhuak leh nghal riai riai ni ber hian ka hria,ka awmdan chiah ka sawithiam lo.A tu pawh chu lo nise mak ka tih zawk chu engmah min hrilh lo hi mak ka ti.

“Chuan..?” ka ti thei hram, min thawng lutuk tih a hriat loh hram ka beisei takzet, ka pasal chanchin leh thuruk hriat chhuah tumin buai mahila a chanchin engmah hre lo nih erawh ka duh bau lo.

“I lo hre sa ang tih chu ka ring tho, mahse, tunah hian kha msg ang kha chu engmah a thleng lo ang tih ka chiang, i pasal emaw kei pawh..mi fel tak kan lo ni lo anih pawhin min siam liantu ti na duh khawp a tenawm kan ni lo ve ve” nghet deuh charh hian a ti a, ka pawm thlap.

A pu tak tak a lo ni lo anih pawhin eng vang mahin a that lo tawp ang,thil theih loh bur a ni tawp mai.

“Um, nia, ka hria lawm,ka thian i ni a, ka lawm e aw” ka ti sep a, a nui a, a rawn kal hnai a, a rawn kun a ka inrin hmain ka chalah a rawn fawp a, mak tihna hun pawh ka neih hmain a kalsawn lehnghal daih bawk.

“Engthil nge maw i tih le?” ka ti hlak a, a rawn hawi let a, a nui a..

“Ka thian hi ka ngai tawh a, a pasal awm loh lai tal a ka tih loh te chuan..”

“Ha..khatiang kha chu pasal neih hma a tih chi anih kha, tunah chuan thil ho te hi mualpho na a tling zel tawh ania” nur nang hian ka ti a, ka thinrim em em lo nangin ka duh lo tih tihlan ka duh hrim hrim.

“Okhey, ka lo hrereng dawn nia, chuan,naktukah maw a lo haw dawn?”

“Um, dar 11 ah chuan a lo thlen hman ka ring,in inkhelh tur kha Saturday ti raw?”

“Aw, a lo haw hman dawn hlauh a a tihzia khawp mai” ati leh mai..thil eng emaw kan sawi leh teuh a, mahse, ka rilru ipik lutuk vangin engmah kan sawi kha mumal in ka hre zui lo,a haw veleh Roomah mu turin ka chho nghal a, ka Phone lo let bal chu ka ban a, Miss Called a lo awm nual, Simon-a min lo call na pali lai a awm a, Pakhat erawh a number ka hriat ngai loh a ni thung.

Simon-a ka call let nghal a, lo haw vat vat se la, ka buai rukna zawng zawng hi chinfel pui ka duh takzet,hetiang ringawt chuan ka tuar thei hauh lo ang.

“Hello..” zawi sup hian a rawn ti a.

“Ka Phone ka lo keng lo pek a, eng nge nita?”

“Ka nupui be tur hian a chhan awm kher angai tih ka lo hre hleinem” chang zet hian a ti hluk a, makti zet hian ka Phone ka melh vak ringawt..

“Sorry,i buai thei bawk sia thil pawimawh deuh a awm em ka tihna zawk a nih kha..” dam thlap hian ka ti let a,min chhang dawn ta lo emaw ka tih hnuah a rawn tawng leh ta hram.

“Nia, buai thei..nang pawh i buai alawm” ati leh hmuk a,vawi tam tak kan inneih hnuah a zin tawh, mahse, hetiang hian kan buai ngai si lo.

“Natuk chu Airport ah ka lo lam ang che,eee,chuan Emily a lo haw ve nghal dawn em?” ka insum hman lo.

“Lo haw ang, kan lo haw rual ang” engmah thil tha lo thleng miah lo ang chiah a awlsam hian a rawn ti liam puat.

“A that hlauh chu..Midang an tha em?” ka ti leh a,an that thu a sawi a, ka mit ka chhing a a tawng ka ngaithla a, a hmelpa leh nelawm loh tak thin kha ka mitthla ah a lo lang a, ka ngai tawh..Ni e, ka ngai tawh takzet.

Ka beisei loh zetin ka mutui ta phian, Simon-a te lo thlen hma in Airport ah kan Driver nen kan awm vang tawh,rinhlelhna nen en loh hram ka tum a ngai, tun hnaiah hetiang boruak tha lo pui pui hi lo thleng mahse ka pasal kha a la ni reng tho a, ka Hmangaih dan pawh a la ngai reng.Ka ring tur a ni tawp mai, ani ka rin loh chuan tumah hi rin tur chuang an awm lo ang, a pu chungchang min hrilh loh te kha chu ka zawt mai ang chu.

“In tluang em?” ka inhmuh veleh ka ti nghal thuai a, a hmel a ngai reng, chau hmel pawh a pu chuang lo, Emily lam ka hawi a, kekawr tight mar tang mai a ha a, Boot a bun a, Jacket chhing tei tawi a ha bawk..kei lah Kekawr thawl deuh hnek hnawk leh Top mawlmang tak ka ha a, Sleeper ka bun bawk..ka sam lah ka chhipah ka zial tawm tawp bawk.

“Kan tluang e,in lo thu rei tawh em?” ati nghut a, ka lu ka thing mai ..kan thu rei thawkhat..

Emily a tawng siam siam a, Simon-an a chhang leh zauh thin a, kan Pahnihin a hnung Seatah kan chuang a, mak takin mal riauin ka inhria a, min mamawh lo ni a hriatna ka nei bawk.

“Hon..eng nge i ngaihtuah a?” Simon-a rawn tih ri ah chuan ka phu deh zawk a, ka thu mar a, min bia tih ka lo hre miah lo,kan tlan pelh lam zawk thlirin Motor turverh lam ka hawi vauh vauh bawk.

“Sorry..pawn lam ngawt ka lo en a,eng nge i sawi?” ka nui a.Min rawn en zawk a, hmalam a en leh mai.

“Tlaiah Tlansanga te khan chaw an lo ei dawn a, chuan,Emy pawh..” a tihtur duan fel sa min hrilh mai chauh tih a chiang,min rawn derna eih a awm lo.

“Ok, a tha lawm..chuti chu ka bazar chho lawk dawn mi?” pangngai takin ka ti a, ka chhungril na vawng vawng chu a chhan hre lo mah ila dik lo a awm tih min hrilh tu ah ka ngai hmak.

Kal kawng a chawhmeh an zawrh ho ka lei chho nual a, In ah hian ka hman phawt chuan keiman eirawng ka bawl thin a, Nula nei tho mahila eisiam hi nuam ka ti a, ka theih phawt chuan ka ti hram hram zel.Emily kan thlah kual hmasa a, Emily te in kawng pawh Emily sawi ngai lo in Simon-a zawkin kan Driver a hrilh a, a hrechiang tih a lang reng bawk.

“Inbual la..” in kan thlen veleh ka ti a, Chhuata a Bag dah chu ka pan a, a thawmhnaw ho ka la chhuak nghal mawlh mawlh bawk.

“Ka lo chhuah hmain ka inbual alawm,tunah chuan mut ka duh rih zawk..’ ati a, a kawr hak lai a phelh a, Boxer nen khumah a lawn nghal zat bawk.

“Thil i ei hmasa dawn lo mi?”

“Aih..nakinah ,tunah chuan chaw lo lam in ka ril a ti tam..” a nui hawk bawk..

“Muhil mai mai teh..” ka tum aia chang hretin ka ti hmak thung, ka ngai takzet, mahse tunah chuan engmah tih chakna ka nei miah lo.

Vanneihthlak takin min chhan let hmain ka Phone a ri ta hlauh,ka en thuai a, Ruatdika a lo ni a, rang fe hian ka pick nghal zat bawk.

“Hey...eng nge ni ta?” ka ti zang vah mai,engvangin nge Simon-a hian tu emaw Mipa thik se tih ka rilruah a awm tlat ka hrethiam lo,mahse, tih ngei ka duh.

“Simon-a te an lo thleng tawh em?”

“Um, thleng tawh e,ka lo bia ang che ka ti a, ka la hman lo a..Tlaiah chaw lo ei ula” keima thu in thu tlukna ka siam ve hmak mai,Simon-an min en reng tih lah ka hai hauh lo bawk,mahse, ngaipawimawh awm lo fahranin ka thil tih lai ka tih zawm lui tlat thung.

“Tak tak em?” a aw a phurna ri chu ka hriat hmaih lo..A phur chhan erawh ka hre hauh lo thung.

“Tak tak e, Sangpuii te pawh ka la hrilh lo a,bakah zanah lo kal in tum tho ka ring a...” ka ti leh a, ka ring hran hauh lo.

“Um, tum chiang e, chuvang ania ka rawn biak zawk che,mahse, chawei a sawm kal ka awlzia i hriat kha maw..” a nui hawk hawk mai.

“Ok, ka hriat chian loh che chuan tuman an hrechiang lo ang che” ka ti lui leh salh a, Simon-a tihnat ka duhna chuan a turin min tur a ni ber. Emily nen engtin nge an khawsak ka hre lo,mahse, vawiin a kan haw kawngah ringawt pawh khan kei aia a hnaih zawk zia a ti lang chiang em mai.

Ka biak zawh hnu fe ah Simon-a ka en ta chauh,a hmel tak ngul maiah chuan engmah a ngaihtuah ka hre thei lo, min en tawh lo in Banga Tv lam a en a, ngaituah muk tak nei a ang viau.

“Tu nge a?” nelawm vak lo hian a ti nghut a, a thawmhnaw suk tur ka ken chu Machine ah ka dah dawn mek bawk.

“Tu?” ka hre lo lui ve tlat.

“I biak kha, Tlansanga ten chaw an lo ei dawn a, midang ka mamawh belh vak lo ania..” a tawng dan kher kher chuan min khei zak mai.

“Ruatdika a nih kha, chuan Sangpuii pawh ka sawm ang chu ka lo tia,mahse, chutia i mamawh belh loh leh lo kal leh lo turin ka lo hrilh leh mai ang” ka ti nghauh a, ka thinrim lo hauh lo, mahse, ka thinrim hian ka ri phut ngai lem lo.

“I sawm fel vek tawh a, thulh leh kher a ngai lo,mahse, nidangah chuan min rawn hmasa tawh la..”

“Tehreng mai, vawiin a Tlansanga leh Emily chaw lo ei tur i sawi tawp avang khan ka sawi ve pawp anih kha...” min chhan hmain Bathroom ka pan a, Machineah a thawmhnaw ka vawm lut a, amah pawh vawm luh tel law law ka chak,karkhat chhung lek a danglam dawrh thei mihring hi ka hua nge ka hlau zawk ka hrethiam tawh bik lo.

“Vawiin tlai bik ania ka sawi, i thin tihrim ka tum lo ania” ka let leh veleh a lo ti a, chhang lo in ka bu ringawt.

“Sorry ka tih kha...i hrilh tawh a, lo kal rawh se, a pawi lo” ka hnung atangin a rawn ti leh a, a lo kal hnaih lai ka hre lo bawk nen ka phu ru deuh zawk bawk.

“Angai lo, zanah lo kal se a tawk mai,ka lo hrilh leh ang..” ka ti nghat a, ka lungawi lohna inthuah tun chuan min ti chau vek in ka hrethei hial mai.

Ka darah a rawn vuan a, alam hawiin min kuai her a, ka khabeah a rawn dawm a,kan in en ta ran mai.

“Ka chau bawk nen ka tawngkam a lo mawi lo a tihpalh tak tak, thinrim tawh lo teh..reilote min mutpui zawk la..” ati sup a, ka chalah a chalin a rawn ti si a, mahse, ka la che chuang lo,nidang ang chu nise ka kuah let anga ihe lo in a thusawi ka pawm ngei ang.Mahse, tun tum chu a danglam tlat atin ni.

“Mawh, ka ngai che ania..’ ati leh sup a, tuntum chu thupek ni lo in ngenna aw a ni ta thung.

A muthilh veleh ka chhuksan a, tlaiah chawei tur kan neih avangin eirawngbawl keiman tih ka duh a, kan nula nen kan buai ta char char,Tlansanga a lo thleng hmasa ber a, Simon-a kaihthawh ka tum a, mahse, ngai a ti lo,”Mu rih rawhse, kan haw lehnghal dawn pawh a ni hleinem” ati awlsam mai.A hnu lawkah Sangpuii te leh Ruatdika te an lo thleng rual a, Ruatdika hmuh apianga tel ve ngei ngei Hriati a lo kal ve bawk,ka beisei sa a ni hrim hrim, an inzui nasa a, engtikah emaw chuan neih pawh an la inneih ngei ka beisei.Emily lo thlen chuan Simon-a pawh a rawn tho tawh a, Ka pu natdan chungchang vel leh tawrhpuina thu te an sawi a, kan ri mam mam mai.

“Hon...Kan ei mai dawn mi? Chawei kham lamah tih lawk tur ka nei a” ati a, “Um, ei ila, kan peih vek tawh lawm..” ka ti a, kan nula chawei siam ka pui a, Sangpuii’n min rawn tihpui a, vawiin tlai chu Sangpuii pangngai kha a ni leh tawh, a tawng siam siam a, Simon-a chungchang kan sawi dun kha chu hria ang pawn a awm leh tawh lo.Kan pahnihin sawi chhuak tu nih kan duh lo ve ve in ka hria.

Kan eikham hnu rei vak lo ah Sangpuii te an haw a, Ruatdika te pawh an kal zui chu a ni mai,Gate theng ka thlah a, Simona-a erawh chu inchhungah Emily leh Tlansanga te nen an awm a, la haw an tum ve lo anih hmel e.

“Thil sawi khawm lawk tur kan nei a, i duh leh min lo mutsan mai dawn nia, kan rei phian maithei “ ati a, hnial enah pawh ka en lo.An duh duh chu han ti vel mai mai tehse.

Roomah Tv ka en a,mahse, ka rilruah a lut miah lo,engthil nge an sawi ang ka hre lo,Ka pu kha an chhungkaw zing a mi a lo ni miah lo tih kha a tak tak anih leh nih loh zawh ka duh em em a, mahse tunah chuan a hun rih lo pawh animaithei.Emily nen chauh a inhmu chu nise ka thinrim ngei ang, mahse,Tlansanga a awm ve tho a, engmah ngaihthat lohna tur a awm in ka ring lo.

Motor tlan chhuak thawm ka hriat takah phei chuan ka thawl ta huai,ka lo insehruh teuh tih ka hrechhuak chiah bawk,Emily kha Taxi in a lo kal a, Tlansanga’n a thlah haw nghal mai ang chu.Tlansanga haw kawng a nih tho avangin harsa a awm lo.Mahse, Reife hnuah pawh Simon-a a lo la chho ta lo fo,a rawn haw chauh a chuti taka han buai nghal chu thil mak tak a ni, tuntum chu hna pawh ni raw sek sek mu turin ka tih ngei angai, anih loh chuan a buai chhung chu a Officeah ka awm ve mai ang.

A Office a la eng kalh mai, ka pan phei a, Kawngkhar a kharphui chiah lo bawk,mahse tawngthawm ka hre ta tlat,an haw daih tawh si a tu nge a biak ang?, Phone a ni zawk ang..Kik pawh kik lo in ka pawt hawng zau a, mahse, ka luh hmain Tlansanga tawng ri chuan min ti ding leh chawt mai,a kal daih tawh emaw ka ti a, tu nge Motor a tlanchhuak kha ni ang le??

“Hmingthani hian hre ve se a tha lo maw?” kawngka bulah ka ding a, mi tawng ngaihthlak hi a mawi hauh lo,mahse, tun tum chu ka hre duh tlat, ka hming an sawi ri bawk.

“Aih, kan buaina ah hian a tel ve ka duh ngai lo ang, eng buaina mah a tawh ve ka phal lo” Simon-a tawngri nghet charh mai chuan min ti khur titih.Eng buaina nge a lo neih ka va han hrethiam lo tak.

“Nakinah a la hriatchhuah tho ka hlauh vang mai ania, ka hrethiam che” Tlansanga’n a ti leh a.

“Ka hre lo, mahse, hei kum hnih kan innei tawh a, tun thleng in engmah a la hre chhuak lo chu ania”Simon-an a ti leh nghut a,Ka Pasal hi ka ringtawk thin, ka engkim a engkim a ni bawk.Mahse, a sawi hmangin kum hnih lai engmah ka hriat loh thil inthup a lo awm tawh a, chupawh thil te tham a ni miah lo tih a chiang.

“I pu khan thil hriat theih a hnutchhiah em?”

“Aih,engmah a hnutchhiah lo, bakah atan a hlauhawm ka tih hnu pawh khan thu a awih tlat lo a..” ka khup a sai nghal dar dar mai.Ka pu kha damlohna vanga thi emaw ka ti a a ni lo tawp ani ngei ang.

“Um, Emily hi kei chuan ka ring ngam lo ania..”

“Ring rawh, engkim hi chu a hre lo,mahse ka hrechiang a ti tur a ka tih apiang chu a ti vek ang..” a rintawk zia a aw ah pawh a lang thei..

“Ka hria e..Khumah eng nge a an ang aw..?” Tlansanga nui ri hak hak chuan ka nuih a ti za ve lo chiang ngang mai.Simon-a chhanna ka hre ngam lo,kalsawn ka tum zet a mahse ngaithla law law ila a tha zawk.

“Duhthusam...i duh phawt chuan ka hrilh thei ania..” ka luak chhuakin min hnawh nghal up up mai,Room lamah ka pai chho nawk nawk a, Toiletah ka tlang nghal a, ka luak chhuak lutuk chu ka insum zo lo...

Simon-a lo chho thawm ka hriat veleh ka mit ka chhing a, khum kil lehlamah ka mu tawm tak bawk,thawm dim zetin Bathroomah a lut a, a rawn chhuak leh a, khum bul a Lamp a off a, khumah a rawn lawn tih hriat zet hian a hniam sat bawk ,mahse, ka la che chuang lo.Min rawn hnaih a, ka kawngah a rawn kuah a, ka biangah a rawn fawp zauh bawk,min fawhna tuaifai  lo turin ka insum tang tang a ni ber.

Ka hnute a rawn khawih a, mahse, a che zui lo, rei vakloah a hnar zui mai bawk,a chau takzet anih hmel, nia, a chau ang, ka pu lah damlohna vanga thi a ni lo a, thuruk inthup a awm a, ka pu tana hlauhawm chu engthil nge?, keipawh min hnuk lut tel duh lo tih a sawi a engtiang taka hlauhawmah nge kei hi ka intah luh ka hrethiam lo,kum hnih tehmeuh ka hriatchhuah loh thuruk chu eng nge ni ang?? Zawhna hlirin ka khat vek.

Simon-a lo haw hnuah kar a liam leh tawh, engmah hriat belh ka nei lo a, dik lo tlat ni a ka hriat lah khan min kiansan thei hek lo,Simon-a awmdanah engmah danglamna hmuh tur pawh a awm zui leh tawh lo.Ahma ang bawk khan min duat a, min ngaihven em em bawk.Mahse, keimah zawk hi dik lo awm ni a ka hriat tlat tawh avangin kan nupa a kan awm pawn ka thla a muang thei lo.Ka tang teuh reng ani ber.Hmangaihna kan chen dun pawn nuam ti lo ka ni lo,mahse Emily nen an mu dun ni a ka hriatna chuan natna min siam sak ta ziah thung.

“Tunlai hi i damlo ni in ka hria..” Khumah rawn thut  ve pahin a ti a, ka chal a rawn dek a, min en run bawk.

“Aih, dam e..thil hriatthiam loh ka nei a..”

“Um, engthil nge ni ta?” ati nghut a, Lukham nghengin a thu mu zui zat bawk.

“Zawt che ila min chhang angem?”

“Tehreng mai..ka chhan theih chi anih phawt chuan..” ati awlsam mai, Tv lam a en a, en turin zawngin a hmet kual dun dun bawk.

“Ka pu chungchang kha,ka pu kha engtia kan chhung nge?”

“I hria emaw ka ti a..’ ngaipawimawh lo hmel fe hian a ti liam puat.A awmdan pawisak nei lo lutuk chuan in ti thinrim ta phat mai.

“Ka hria emaw ka ti a, ka lo hre lo alawm, ka pu kha kan chhungte a ni reng reng lo.I sumdawnna tur a tanpuitu che a ni tih ka hria alawm..” muangchangin min rawn en a, a mitmeng thim raih mai chuan min ti khur ru dar dar mai.

“TU nge chu chu hrilh che?”

“Min hrilh tu a pawimawh lo,mahse, i nupui ka nih angin thudik ka hriat hi a tul a ka chanvo a ni bawk.” Ka aw a chang fak mai,Hetianga nelawm lo leh tawngkam hriat nuam lo hian ka la be ngai lo.

“I chanvo maw?” ngeiawm zet hian a nui hawk a, a mutdan ngaiin a mu zui leh mai.Engmah ka zawt chhuak dawn chuang lo anih hmel e.

“Aw, ka chanvo, nge i nupui lem  ka ni zawk?”

“Nupui lem a awm ngai ami?” a ti duh lek..

“Ka ni ani ang, engmah ka hriat ve hi dik a awm miah lo,i chungchang ngei pawh hi dik a awm Lo,ka nu nen chiah in kal a, mahse, a hnuah Emily-in a rawn zawm leh che a.” ka aw a ring lo,mahse, ka thinrim chuan ti hian ka awm thin tih a hrechiang khawp ang.

“Dik lo a i lo ngai anih chuan i thu le..Emily lo kal chhan chu ka koh vang a ni a chupawh hna vangin mahse, i hriat tur chin chu ka hrilh che, ka hrilh loh che a awm anih chuan i hriat a tul lo animai..” a thusawi mal tin chuan a den in min deng dawt dawt a ni ber.

“I nu hi i nu tak nge a lem?”

“I sawi zo tawh em?” min rawn en a, min thah mai duh hmel a pu bawk,ka ip chawih thei hial mai.

“Thil pakhat ka hrilh ang che, i buai lohna turah lo buai suh..Min ti thinrim lo la a that ka ring”ati leh a, a tho a, a lukham a keng a, a chhuak zui chu a ni der, na zetin Room kawngkhar a rawn nam khar thuai bawk.

A vawikhatnan ka Pasal bulah ka mu ta lo,a zin lo anih chuan kan mu hrang ngai lo,kan inhnial thinrim anih pawn kan mu hrang ngai lo,chubakah eng khan nge khati tak a ti thinrim ka hre hek lo.Min hrilh ai chuan thinrim a min chhuahsan a thlang ta tlat pawh khan min thawng a min ti na bawk.

Kan nupa nun a inthlak danglam ta vek, midang hmuh danah chuan danglam vak a awm ka ring lem lo, mahse, kan inkar chu lei kak thuk tak, zawm ngaihna awm lo nen ka tehkhin ber, In ah a awm tlem em em a, zanah rei tak tak a office ah a awm a,ka bulah a mu ngai ta hek lo.Inchunglam hi kan Room leh mikhual Room anih avangin kan nula a lo chho ngai mang lo a, kan mu hrang tih pawh a hriat ka ring lo.

“Zanin chu Sangpuii nu kan va kan ve dawn mi?” chaw kan ei lai in ka ti a.

“Um, dar engzatah nge?”

“Ka hre lo , i lo haw hma theih chuan i lo haw hun hun kha a tha nimai a” ka ti a,a bu nghut a, a thil ei lai a ei zawm mawlh mawlh bawk.

“Meeting kan nei dawn a, ka buai deuh maithei, mahse lo haw hma ka lo tum ang..” a chair nawrsawn pahin a ti a,mak takin a lo haw hma ka ring miah lo.

Ka rin ang ngeiin dar 7 ah pawh a lo la haw ta lo fo,Meeting an nei dawn tih kha a sawi ngei a, a hun tur kha zawhna chang lah ka hre der lo,ka call ta nge nge,rei pawh a ring hmain a rawn pick ve mial.

“Hello..Mate..” zawi sup hian a rawn ti a..”Honey ‘ tih leh ‘Mate’ tih hi chu kan in kawp tantirh atang khan min kohna a ni ta reng, ka hmingin min ko ngai lo tluk a ni.

“I lo haw hma thei dawn ta em?”

“Sorry, kan meeting tur hi kan tan thei dawn chauh a, naktuk zanah kan kal mai dawn mi?” a rawn ti a, inthiam lo ve tak tak te pawh a ang viau.

“Apawi lo,naktuk zanah animai” ka ti a, kan Boruak tha lo hi midang hriatah tihlan kher ka duh lo a, diktak chuan kan inhau nawn leh pawh a ni lo a, kan inpawh lo tawp animah zawk.

“Ok...Chaw pawh min lo eisan mai dawn nia” a rawn ti leh a.

Hnathawh tur tlem ka hawn a, Roomah ka inchhawp hnawk ram mai.Ka thawk tui tan dawn chiah tihin ka Phone a rawn ri a, en mang lo hian ka pick a, ka beisei loh zetin Hriati a lo ni a.

‘Hello..”

“Sangpuii te In ah lo phei la..” zawi deuh hian a rawn ti a,a aw lah chu a ralkhel hmel phian bawk.

“Tunah maw? A zual ami?”

“Aw, a kal mai dawn mawni te an ti a..” a rawn ti leh a, Ka nu te hian an hre lo nge mawni engmah min rawn hrilh lo..

“Ok, ka lo phei nghal ang” ka ti a, ka paper chap hnawk nuaih chu ka remkhawm nawk nawk a, ka thawmhnaw haklai pawh thlak lo in ka chhuak zui chu a ni der.

Hotel lian leh changkang zet kawt a Simon-a car ka hmuh rualin na zetin ka brake a, a ri deuh tuar thei hial bawk, ka back leh a, Motorah tu nge awm ka hre lo,engthil nge hmuh ka tum chiah pawh ka hre chuang lo.

Ka beisei loh zet hian Car kawngkhar a rawn inhawng a, hmeichhe nalh fahran hi a rawn chhuak a, Driver thutna lam a inhawng leh a Simon-a a rawn lang ve nghal zat bawk.An pahnihin Hotel chhunglam an pan a, a hmeichhia zawk chuan a banah a kuah chial bawk..

Chhuah mai ka tum a, mahse, ka thulh leh,Simon-a ka call ta zawk,reife a ring hnuah a pick ta hram.

“Hello..” zawi deuh sup hian a rawn ti a.

“In meeting in zo tawh em?” ka chil ka lem khawlh mai.

“Aih,zo lo deuh.Eng nge ni ta?” ka chhungril na lutuk chu ka mit ka chhing a, ka kut ka humruh ngawt ngawt bawk.

Dawt min hrilh ngai a ka rin loh ka pasal hian chiang lutukin Dawt min hrilh a, ka rin em em lai khan vawi engzat nge Dawt in min lo tih lungawi ang le???