BLACK HORSE - 7

Chapter- 7

Ka ngaihtuahna tihfim tumin reife che lo in ka thu vang vang a, hetianga ka chet buai vak hian thil tha a thlen dawn miah lo.Simon-a lo haw tawh leh tawh loh ka hre lo,ka tho chhuak a,Sana lah chuan zanlai a kawk vu tawh.

Dimtein Simon-a mutna room lam ka pan a, ke lawngin ka kal a, thawm pawh ka nei lo,tim dai hian kawngkhar herh hawnna ka vuan a, ka herh hman tep tihah chuan ka hnung lamah thawm a rawn awm a, ka thlah vat a ka inher nghal thuai bawk.

“Eng nge ni a?” Simon-a aw hian a rawn ti dam thluam a.

A sam a pawr deuh fap a, Pyjama tial a ha a, T-shirt hring duk,tlem a lian lam hret a ha bawk.A landanah chuan a mu tawh hnu a tho leh tih a chiang.

“Ih, englo ania, Ruatdika a accident an ti a..” sawi pawh ka sawi zawh hmain a ban vaiin min rawn ti tawp a.

“Maw?, engtikah maw?” ati nghut a, min rawn hnaih nghal ruak bawk.Engmah ti hmel a pu lo a, hre lo tak tak a ang bawk.

“Hriati’n tunah khan min rawn hrilh a..i lo hriat ve leh ve loh rawn zawh che ka tum a,chuan, kal nghal ka duh bawk a” ka ti leh duah a, a thle buk a.A hmel chang leh nelawm fahran lo chu Light hliah zawnga a awm avangin ka thilsawi engtin nge a dawnsawn ka hre thei lo.

“Ok, kan kal dawn nia, va inthlak la,midang ka lo be kual ang” pangngai tak hian a ti sup a, ka inher a room ka pan a, a khawih anih ka rin avanga ka hlauhna kha a kiang ta hawk.Ni e, a sual anih pawhin midang chu a ti na thei hauh lo ang.

Darkar chanve a liam leh meuh chuan Damdawiinah kan awm der tawh,kan tlan chhuahna kawngah khan Simon-a khan ama Car khalha Accident a ni tih a sawi a, ka bu ringawt, engmah ka sawi ve lo.Damdawiin kan thlen chuan a tlai tawh nen mi an lo awm teuh a, Simon-an chanchin a zawt nghal a, Sangpuii a rawn chhuak a, min lo thlen khalh a ni ngei ang,a Pasalin a rawn zui chhuak bawk a,ka pan thuai a,ani hi Doctor ani bawk a tlem chuan ka thlamuang ta deuh.

“Eng nge a an a?” ka bul a Sangpuii rawn thut veleh ka lo ti a,.

“A tha mai ang, tlemin a thawk dan a mumal lo deuh a, saw saw a ziawm veleh an zai mai ang” ati a.A sawi awlsam lutuk chu ka nui ringawt.

Simon-a leh Mipa pakhat hi an inbe mawlh mawlh a, ka en reng a, tu nge anih ka hre lo,lawmthu a hrilh thawm erawh ka hria, min rawn pan a, ka bula thutna awlah a rawn thu ve a, a hma a ka hriat thin Simon-a kha a ni leh ta a hriatna ka nei a, min Duat a min chelh reng thin tu zawk Simon-a kha ka hmu leh ta tlat.

“Hlauthawng suh, engtinmah a awm lo ang, a zia leh mai ang” ka kutah a rawn vuan a, rangfe hian ka kut laksawn tumin ka che nghal a, mahse, ka tlai hret, a rawn hum bet nghal hmak.

“Aw..engtin nge an tih a?”Sangpuii khan min hrilh tawh tho nangin ka zawt leh ta tho.

“Oxygen an pe mek a, a ziawm deuh hunah an zai nghal dawn a..” ati leh sup a,chhanna ngai tho. Engtin chiah nge a accident ka hre lo.Hriati lah zawh tur pawh a awm si lo.

“A na hle a ni maw?” beidawng fe hian ka ti halh a.

“Na ve deuh chu anih saw..mahse, Doctor ten an theihtwp an chhuah alawm,a tha leh vat ang “ati leh sup a, a nui suk bawk.

An chhungte an lo thlen belh leh nual a, zai theih anih veleh an zai nghal a, keini pawh kan haw ta lo law law,an zai zawh meuh chuan khua a eng tan tawh a, thutna mumal a awm si lo,ka mut a chhuak lo,mahse ka mit a thip a,a kham thum bawk.

“Engtin nge a Accident chiah  i hria em?” Sangpuii nen chauh kan awm veleh ka ti a, hmalam a thlir vang vang a.A hre bik lo anih ka lo ring nghal ringawt.

“Hriati sawi dan kha chuan Dawr atanga an haw hnuah Hriati pawh a thlah thlap a, chuan,zanah thil pawimawh tihtur a nei tih a sawi a, dar 11 vel khan Hriati chuan call a dawng a,Ruatdika accident thu an hrilh a,chubak chu engmah ka hre bik lo “ati a, a thaw halh bawk.Vei engemaw tak nei a ang viau.

“Amak teh thut e, a rui em?” ka ti leh a,kan dinna thlang Kawngpuiah chuan walk tur an awm tan zauh zauh tawh a.

“Ka hre lo le..englo..awi,sawi tur a ni em pawh ka hre lo” ati leh a.He Hospital hi Sangpuii thawhna a ni lo a, hmelhriat erawh a nei nual a,koh pawh an ko ngun ngiang mai.

“Sawi mai la, tihian ti thin lo teh” ka ti hlak a, ka hlauhthawnna bawk a lo thawk leh nghal zat bawk.

“Nizan khan Ruatdika chuan min rawn bia a, Simon-a nen an inhmu fuh lo anih ka ring” ati a, ka thawh hawk mai.

“Engtizawngin?”

“Ka hre bik nang, a sawi hleinem,tunhnai chu neuh neuh hi a tam ka ti, ka ning tlat” ati leh halh a, hei vang hi a ni ngei ang nimin khan Ruatdika kha a cool em em.Ka va hmu leh tih kha a hriat avangin Simon-a hian kut a thlak ani mai angem? Ka lu ka thing nawk mai..hetiang chu ngaihtuah pawh ka ngaihtuah duh lul lo e.

“Hon...kan kal mai dawn mi?” ka hnung lam atangin Simon-a aw hian a rawn ti a,ka insehruh nghal teuh mai.

“Nia, a pawi lo..”ka ti a, Sangpuii pasal nen an lo ni a, Coffee a ken chu ka kutah a rawn hmeh bel a.

“Keini pawh kan kal ang,vawiin hi ka zin tumni tak ani lehnghal a” nui chungin Sangpuii pasalin a ti a,an la inneih rei loh tehlul nen hian Damlohna vang hian an buai ngun lutuk a ka lainat ru zawk.

“Keipawh mawle, mahse, thulh mai angai dawn anih hi..” Simon-an a ti ve a..Zin a tum tih ka hre lo hrim hrim,Ni lo,engtiklai atang khan nge a tihtur engkim ka hriat reng reng ni? Hna anih phei chuan ka hre ngai miah lo zawk anih kha..

Motor ding datah ka harh a, ka lo muthlu hman pek,ka chauh vak pawh ka hriat loh nen.

“Kan thleng e..” Simon-an ati sup a, ka zi mar ar ar mai.Kan nula a lo tho tawh a, kan  pahnih a kan inzui lut chu phawk zet hian min lo en a, nizanah kan kal chhuah dawn khan kan hrilh ta miah lo bawk nen a demawm loh.Keilah hi nidangah zingkarah ka chhuak ngai miah lo tluk a lo ni bawk nen.

“Ehe..khawnge in kal a?” a lo ti chul bawk.Kan kalna ka hrilh a, mut rih ka duh tih ka hrilh nghal bawk,a bu nghat a, eitur ka duh leh duh loh min zawt a ka lu ka thing mai, Simon-a phei chu a chho tlang nghal daih tawh.Eitur lam reng rengin ka rilru a luah lo.

Ka rin ang chiahin Roomah Simon-a a awm lo,engvangin nge awm tura ka ngaih deuh tlat ka hre lo.Nizana kan chhuah dun avang mai khan kan boruak a tha leh tura ka beisei anih chuan ka mawl hle ang.Pasal anihna anga a tihtur ati mai zawk, chumai bakah a thiltih result en tura kal pawh a ni zawk maithei.

Ka thawmhnaw haklai ka hlip a, Bathrobe ka ha a,Shower nei zuai ila muhil vang vang ila a that ka ring, hna ka kal dawn lo tih erawh tuemaw ber msg in ka hrilh mai ang chu.Bathtub chu ka en vang vang a,Shower neih zuai ka tum zet kha ania, tuilumah ka inchiah ta zawk.Ka mit ka chhing a, ka taksa kham leh ni deuh thum pawh a zia deuh huai huai in ka hre bawk.

Zawitea tui rawn che ah chuan ka mengchhuak vat a, ka beisei loh lutukin Simon-a a lo ni a, thawmhnaw engmah a inbel lo.A pian nalh zet chu chiang takin a lang a, a zahpui hauh lo tih lah a chiang.Engmah ka sawi hmain a rawn lut zui ve nghal zat bawk.

“Eng...engthil nge i tih a?” ka ti bah nak mai.A nui suk a,min rawn hnaih a, min chhang lo in min pawt sawn a, amah ngheng turin min hnuk hnai zui salh bawk.

“Ka thil tih maw? Thil ho te,i bulah ka inbual duh mawle..”a ti sup a, hnial tuma ka ang zuau tawh chu ka hmuiah a kut zungtang a rawn dah a, ka beng a rawn fawp thawi thuak bawk.

Thuawih zetin ka thu ve ta hle hle,ka nghenga,a dar hlai hlapah chuan ka lu ka nghat a,a mal khauh tung chuan ka mal a rawn khan bet a, a kut erawh chuan ka dul nem leh ka hnute a chul kual zai zai thung.

“Hahdam rawh, engtinmah ka ti dawn hleinem che” ati leh sup a, ka beng a thawk khum a, a lum ham ham mai.

“Inbual zawh vat a muthilh ka duh “ ka mut a chhuak takzet, chumai bakah ka hetiang hian kan vawikhat awmna ni hauh lo mahse tuntum chu ka hahdam thei lo,Tumdangah kan inbual dun anih chuan thil thleng a awm ngei ngei bawk anih kha..Ka ngaihtuah zawng ringawt pawn ka tang lehnghal teuh mai.Hmangaihna min chenpui hnuhnung ber kha....ka rap lutuk..engtikah mah ka theihnghilh ka ring tawh lo.

“Okhey...keipawh chu chu ka duh ngei alawm..” ati leh sup a, Sahbawn phuan chuan ka taksa a rawn nuai kual leh a....ka mit ka chhing leh ta nge nge..

A thiltih lai dan tum a ka chet na hrelo ang hmakin a thil tih lai a tihzawm hmiah hmiah a, min pawm chhuak a, min tleuh fai a, ka Bathrobe hak tum a ka lak tawh chu min laksak a, Chhuatah a thehthla a,hnial pawh ka hnial peih tawh lo.Min khawih ang ang in ka awm ta zawk.Khumah min nghat a, a rawn lawn ve a, mut ve a tum tih hai rual a ni lo.Puan in min rawn khuh a,vawitamtak ka lo tih thin dan ang in a darah ka lu ka nghat a, a lungphu dat dat hrethei turin ka kut a awm zawnah ka nghat leh ta..Ni e,hei hi ka nun thin dan kha a ni a, nuam ka ti em em bawk.

Ruatdika a tha chak lo angreng viau mai.Ka tlawh ngun viau bawk, Simon-a pawn engmah a sawi sel lo.Ngaimawh awm pawn a awm leh tawh lo.Zantin ka bulah a mu ta ziah bawk.

“Vawiin min rawn tlawh dawn em?”a rawn ti a,karhnih zet a awm tawh.

“Ka lo tum chiah lo a, ngatinge?”

“Aaaah, eng ni lo e,vawiinah kan chhuak a, min rawn tlawh sual ka hlau a” a rawn ti leh a, an chhuah mai pawh a rin loh nen ka rin aiin an chhuak hma leh lawi.

“A va lawmawm ve, chuti chu In lamah ka rawn kal kual ang” ka ti a.Simon-a hna thilah a zin a, vawiin tlaiah lo haw tur anni a,Emily hruai lo in Tlansanga nen zawk an kal a,Tlansanga nen hian an dawr thar tur hi an ti dun dawn tih ka hria a.Chumi vel buaipui chuan an kal tih tun tum chu ka hre ve tlat bawk.

Ruatdika nu in min lo be chul a, kan naupan tet lai atanga min hria a ni bawk a,keipawn ka ngaina viau bawk.”Roomah an awm kha, han chho ve mai rawh” a lo ti thuai a,Room ka pan chho a,Hriati nen an lo awm a,Hriati nen an inkawp dan hi thuruk a ni tawh lo bawk a zah pawh hi a zak tawh lemlo niin ka hria.

“In pa a zin ami?” a lo ti a, ka bu nghat ringawt.

“Chuti chu i khua a va har dawn ve” nui chung hian a ti leh a, ka nui ve mai.Kan boruak hahthlak lutuk kha a kiang a, kan nupa kar lah sawisel tur em em a awm leh tawh bawk si lo nen diktak chuan ka khua a har chiang khawp e.

“Min thlah haw nghal mai teh a” Reife ka thut hnuah ka haw tur chu Hriat’in a ti a,ka bu ve mai.Hriati hi ka Cousin a ni a, kan inpawh em em rualin a chang chuan a mizia hi ka hrethiam chiahlo thin a,Ruatdika hi a duh tih kan tleirawl chhuah hlim atangin ka bulah a sawi thin a, Ruatdika lah Tlangval lerh ve tak anih avangin sawisak enah pawh ka en ngai lo.Mahse, tunah chuan mi zawng zawng hriatah an inkawp ani tawh ber a,Ruatdika lah in a care a,ani lah hian a atchilh hlum lo chauh bawk.

“Ruatdika Accident dawn zan khan In pa nen an inhmu a, mahse, Damdawiin kha in rawn kal rual leh lawi bawk sia, mak ka lo ti lutuk a” ati barh barh a, ka bu liam zet tawh nangin ka ngaihtuah let leh a, ka mengphawk ta hra mai.

“Engtin maw i tih?” ngaihven lutuk anga lan hlau tak si hian ka ti a.

“Ruatdika accident dawn zan khan Simon-a nen an inhmu a, engthilah nge chuan ka hre chuang lo a, mahse, nangmah nen khan Damdawiinah khan in lo kal dun leh sia mak ka lo ti tawp a” ati awlsam leh mai.

“Eeee, kha kha maw?,nia, Simon-a pawh khan a sawi tho a, mahse min rawn call kha chuan kan lo muhil hman tawh a” ka ti leh a,an inhmu tih Simon-an a sawi miah lo.Ruatdika pawn a sawi chuang lo a, a accident dan ka zawh lah khan a duh aiin a in tam tih zawng a sawi.Engpawh nise an lo inhmu anih pawn thil mak engmah a awm hleinem.

Dar 8 bawr velah Simon-a a lo thleng a,Driver a hruai bawk si lo,Tlansanga nen kal mahse amah zawkin Motor a khalh leh ngei dawn tih zawh kher ngai lo in ka chiang,Roomah ka zui chho a, a pheikhawk bal paw thur mai chu a thlawh thla tawp a, an kalna kawng a tha fahran lo tih a lang reng mai.

“Inbual la, chuan chaw kan ei dawn nia” ka ti a, min hnial lo in Bathroom a pan ve mai bawk,zan hnih chauh riak anni bawk a engmah thawmhnaw tih tham a keng lo.A phone a rawn ri a, pick tumin ka panhnai a,Emily a lo ni a, ka ner nawk mai..he nu hi engtikah mah ka mil tak tak pawn ka ring lo e.

“I phone hi ka lo pick dawn em?”

“Tu nge?”

“Emily..”

“Pick suh, nakinah ka be mai ang..” a ti hmuk...ka pick malek ang..

A inbual zawh hnu lawkah chaw kan ei a, ka ril a tam hlawl lo,tihtham ka ei hek lo.

“I nuam lo ami?” ati sup a, khumah thu mu chungin Tv a en a..

“Nuam e,ngatinge?” amah pawh en lo hian ka ti tha ve mai..

“Chaw kha i ei mumal lo lutuk a,bakah..ka kal dawn a dik kha ka lo haw hian a dik leh ta lo niin ka hria” ati leh nghut a, ka melh vat a, min lo en ve chiah bawk..

“Engmah dik lo a awm hran lo e...mahse, thil pakhat, Ruatdika accident dawn zan khan in inhmu ami?” ka ti ta nge nge.

“Um, hmu e,ngatinge?”

“Ngati lo e..ka zawt mai mai che..”

“A tha nih chu..ka mut a chhuak hle mai..” ati zui nghal zat bawk.

“Muhil daih rawh,i chau anih kha..” ka ti a, a Tv en lai a off a, a thawmhnaw hak lai pawh phelh lo in a bawk khup zui nghal daih bawk.

Hnathawh tur tlem ka hawn avangin mu mai lo in hna ka thawk leh rih a, ka thawh zawh meuh chuan dar 11 a pel va tawh,September kan chuangkai dawn tawh a, mahse ruah tui a tla tam a, khua a cheng deuh reng bawk nen a vawt ve deuh vur a,Light ka Off a khumah ka inthawlh a, Simon-a muhil hmel chu ka thlir a, sawiselna tur hlawl hi ka hre lo..ka tawn atang leh kan inneih hnu thleng khan nun hi perfect niin ka hre thin a, mahse tunah chuan engemaw hlekah ka hlauthawng a thil tha lo thleng tur ang maiin ka inring ta ran bawk...amah kha a la ni reng, mahse, a chang chuan mihring ni lo in Ramsa ang maiin a awm lawi bawk si...ka hrechiang emaw ka lo tih thin ka Pasal hi ka hrechiang hauh lo tih ka hre tawh a, a phal emaw phal lo emaw a sumdawnna chungchang hi chu hriat tumin ka bei ngei ngei ang..Ruatdika ka hmuh a phal lo a, a bulah pawh ka kal tha ngam hek lo...khawih mai pawi a ti lo tih a sawi phei kha chu tunthleng hian mak ka la ti cheu.Tunah lem chuan a ngai haw leh tawh miah lo niawm takin a awm leh lawi bawk si..

“Goodmorning..” ka harh veleh a lo ti a, a nui suk bawk...amah en lo zawngin ka in let thak a, khua a eng tawh nangin Curtain chhah zet kan zar chuan room a ti thim ruai thung.A rawn tawlh hnai a, ka hnute hnuaiah a rawn khawih a, amah si chetin min kuah bet bawk..

“Min va ngai lo ve..” zawi sup hian a ti a, a zin hma zan khan Hmangaihna min chenpui a, nizanah erawh engmah kan ti lo.

“Ngai e...” 

Ka kawr hak a rawn zen a, ka hnute a rawn tuai a, ka mur nghal ar ar mai, a mipatna ruh tung chuan min si run bawk.A duh ka hria, mahse, phurna ka nei miah lo thung.Dimtein a tuai a, a kutzungtang sei thlurh chuan a chep hrual a, phurna nei miah lo mahila nuam ka tihna erawh ka dang thei chuang lo.Ka bengah na lo te in a rawn seh a, a liak kual zui nghal zai zai bawk..ka tum loh tawpin ka thaw hawk bawk..

A lam hawiin min kuai her a, a thim deuh ruai nangin a hmel inpetruh teuh chu ka hmu thei tho,a mit a thim ruih a, a hmui chhap tap mai chu ka en a, a rawn kun hniam a, a hmui lum ham hamin ka hmui a rawn bawhthuah a, duhthawh zet hian a rawn pet a, ka chhang mai lo...Kha thil rapthlak zet kha...min sual ni a ka hriat tum kha ka mitthlaah a rawn lang lehnghal zut zut a..ka khawng nghal lah mai.

“Engthil nge ni leh ta?” tham tuak hian a ti a, ka awmdan danglam nghal chu a hriat hmaih hauh lo.

“Engmah...min hrethiam zawk mai teh” ka inlahrang a,a hmel thim mak maiah chuan thinrimna a lang chiang hle bawk.

“Atha lawm..” ati a, a inlet a, zangthal zawngin a mu a, chunglam a en nghal daih bawk.A chakna thunun tumin a buai vel pawh animahna le..

Ka thawh hnu feah a rawn tho chhuak a, biak a chakawm fahran lo,ka hnar ngawt kha tidik ka inti bik miah lo a, mahse, Pasal anih avang maiin ka duhlo chung min tihluih theih a ni lo.Min chhuah khalh a,khawiah nge a kal dawn pawh a sawi chuang lo,hna a kal nimaiah ka ngai ve tawp, College atangin ka chhuak hma a, inchhung mamawh lei ngai ka neih avangin Bazar lamah ka chhuk a..Tum loh tawpin kan monu nen kan inhmu hlawl bawk.

Kan In lamah kan monu ka va thlah kual hmasa a, rei pawh awm lo in ka hawsan leh mai,motor tawt lutuk chuan tlan a ti sawt hlawl lo,a tawn tawn in kan in line put a, tawite chu kan tawlh a, reitawk kan ding leh a, tiang ngawt chuan In ka thleng har khawp ang le.

Ka rin ang ngeiin In ka thlen meuh chuan khua a thim tawh a, Simon-a car bakah Car dang 2 an lo awm tel bawk, tuma hrilh ngai loin inleng kan nei tih a lang thei mai.Ka thil lei ho bawr zetin ka khai a,ka lut min hmuh rualin an lo nui dar dar chu an ngawi nghal thap mai.

“I awm loh laiin chawei turin kan lo kal ngawt asin..” Emily chuan a lo ti a, a harh chhuak hmasa ber anih hmel,a bula hmeichhe thu ka hmuh rualin ka thil ken ka thlauh thelh bawk,Kha hmeichhia kha...Hotel a Simon-a nen a kal dun kha..Engtin nge Inah hian a rawn hruai haw ngam ka hre eih lo.

“A pawi hleinem..in lo thlenna a rei tawh em?” ka ti ve a, kan nula in ka thil khai min rawn laksak thuai thuai a, Simon-a thu ngawi ngur chu melh loh hram hram ka tum a, an vaiin Beer Bottle an keng vek tih erawh chiang takin ka hmu.

“Aih, rei lo e..bakah In pa hian vawiin chu kan vaiin min treat vek a, inti lal zual ho in chaw rawn ei kan tum ta zel anih hi..” nui chungin Simon-a a en a, za vak lo hian ka then ve sak tho nangin ka duhdan tak chuan va keh nawk nawk ka chak zawk.

“Ka han inthlak lawk ange..’ tih pahin Room lam ka pan chho nghal a, ka hnungah kal thawm ka hria a, hawi let lo chung pawhin tu nge anih ka hria..

“Eng nge a?” ka ti hmak a, ka thawmhnaw hak lai ka phelh a, Balbawmah ka vawm lut zui nghal zat bawk.Dressing Table sirah a ding a, min en lo in ka make-up dah tlar thut chu a en daih bawk.

“Khawnge i kal?” ka beisei loh lutuk zawhna ka dawn takah chuan ka nui hawk mai.

“Khawnge ka kal ang?” ka ti let hmak.

“Ka zawt reng che a, min chhang ta che..” Dressing Table ah a Beer Bottle ken lai a nghat chawrh bawk,a la lungawi lo tluang zel anih hmel e.

“College ah bak khawiah nge kal se min tih?” ka ti leh hmak a, ka kekawrk hak lai ka hlip a, a dang ka ha leh tur chu min rawn din hnaih nghal ruak mai.

“Reilote ka thlah zalen che a, nuam i lo ti em em amaw?” a aw a ring hauh lo,mahse, hlauhawm tak a ni.

“I sawi awmzia ka hre lo,min thlah zalen leh len loh pawh ka hre hleinem” ngaipawimawh lo hmel fe hian ka ti leh mai.Na zet hian ka darah a rawn tham a,a kut lehlamin ka khabeah a rawn khawih a, amah en thei turin min kuai dak zui nghal bawk.

“Ka khawih chu i duh lo, mahse, kha Ramsa tenawm kha chuan a duh duh in a khawih thei che a..” a sehchilh rawp rawp mai..

“Simon, min ti na ania..” ka dar ruh a pelh dawn nimaiin ka hria..

“Nang hian na i hrethei meuh amaw?” hnai zetah a rawn kun a, ka dar a hmeh na lah a thlahdul chuang hek lo.

“I awmdan hi ka hrethiam lo,min thlah teh..” hlau lo niawm tak hian ka ti leh a, a mit sen rum leh a hmel dur khup chu ka hlau satliah pawh a ni lo, arap in min rap zawk.

“I la hre vat dawn alawm,chutih hunah chuan i hriatloh der angai tawh lo ang”  min thing nawk a, min thlah a, engmah sawi tawh lo in a chhuak zui nghal a, na zet hian a rawn nam khar pawp bawk.

Engmah ka hrethiam lo, tu nge sawi a tum lah ka hre hek lo,zinga ka hnar vang khan a la thinrim emaw ka ti a, mahse thildang daih a sawi bawk si,ka rilru a buai vel vek a ni ber,Roomah awm reng theih ni hek lo, phur lo fe hian ka chhuk thla veleh ta nge nge, an vaiin an lo ti ti lawng lawng a, kha hmeichhia leh Simon-a bawk an lo thu dun a, Emily thilsawi an lo nuihpui bawk bawk mai.

“Lo thu ve la..” a neitu zawk niawm hrim hian min lo ti a, mahse ka nui mai..

“In eitur vel ka lo enfel zawk ang, lo inkawm ru.” Ka ti a,Kitchen lam ka pansan ta zawk.

Ka beisei ai takin kan boruak a ziawm ta phian, Emily leh Tlansanga an tawng deuh reng a, an hmeichhe rawn hruai pakhat zawk chu Melody an ti a, Simon-a hnenah a thawk ve tho tih min hrilh bawk, kei erawh chuan thildang ka ngaihtuah thei lo,Hotelah khan darkar khat lai an inkhung dun a, kha bak khan ka rilru a luah thei lo.