BLACK HORSE

Chapter- 8

“Bawihi, Mama hi ka be thei miah lo a,a awm em?” Ka nu in a rawn ti a, kan chawei kham hnu khan ka mutsan a, Tlansanga nen khan hna pawimawh khawih tur an la neih avangin a Office ah an la awm dun turah ka ngai mai.

“Awm e, lo nghak lawk aw..Tlansanga nen thil pawimawh an sawi dun lawk a” ka ti a, Room atangin a Officeah ka chhuk thla a, anni an lo chhuak chiah bawk.

“Ka nu in a be duh che a” ka ti a, Phone ka pe a, Tlansanga erawh chuan min mangtha a, a chhuak zui chu animai.

“Aw, Nu...Ka lo call ang che” ati a, a Off nghal a, min rawnpe let lehnghal mai.

Kawngkhar ka khar fel a, Room ka pansan leh dawn zet a, maktakin an thusawi hriatchakna in min tur leh ta tlat.Dimtein ka pen them them a, a Office kawngka bulah ka ding leh ta than..Mahse,engmah ka hrethei tlat lo..

“Eng nge khatah khan i tih a?” ka hnunglam atanga Simon-an a rawn tih chuan ka phu nasa lutuk a ka zuang deuh zawk thei.

“Aih...ih..englo..” sawi mai tur pawh ka hre lo..

“I damlo niin ka hria, tunlai i mizia hi a hniam em mai..” nelawmna tel miah lo hian a ti hmuk a, ka ding ngawi ngar thung.Ka damlo pawh chu a lo ni mahna,ka taksa dam mahse ka chhungril hi a dam lo.

“Ka nu chuan engnge a rawn sawi a?” ka ti ta zawk.A thle buk a,

“Ka pu thil vel tihfel ngai a awm a, naktukah emaw tukleh ah kal ka ngai ang” ati tha ve mai.A kekawr ipte a zen tut a, a hmel tak ngulah chuan min ngaihtuahna niawm tak a lang thei bawk.

“Anih tak chu..mu ila..” ka ti a, ka kalsawn a, muangchang hian min rawn zui a,kan nupa inkar hla ta du mai hi eng ngemaw a awmzia ni ta ber ang le? Vawiin tlai khan a thinrim em em a, tunah chuan thinrim hmel pawh a pu leh tawh lo.A mizia a inthla rang em em reng hi chu thil thar a ni lo.Mahse, tunhnai chu a lutuk mah mah.

Simona a zin a,a kal hma chuan engmah thil tha lo thleng a awm leh ta lo hlauh,kan inpawh chuang lo a, kan inhau lo ve tawp.Khum khatah kan mu ziah nangin kan insi ngai chuang lo.a hma pawh khan pa nelawm tak anih ngai loh sa tawk naklaiin tunah phei chuan nelawm tih hian a sawifiah zo lo.Kan nula lah a hau ngun ngiang mai.

“I phone..” ka bul chiaha thu kan thawhpuinu chuan a rawn ti a, ka phu deuh zawk mai.Simon-a ngawt ka lo ngaihtuah vang a ni pakhat..

Ka table a ka dah chu ka lakang a, ka rin loh deuhin Ruatdika,an in ka kal hnu khan ka la hmu leh ta lo a, kan inbe hek lo.Kan nupa kar Boruak vangin kan thian ho Groupah pawh ka lut ngai meuh lo.

“Hello...” phur lo zet hian ka ti a.

“Hey...i va ti mak ve..”Ruatdika lungawilo ri ka hre nghal zat.

“Eng chu maw?” engmah tih dik loh ka neih ka hre miah lo.

“Vawiin hi eng ni nge i hria em?” a rawn ti leh vak a,ka ngaihtuah a, eng ni nge...Tuesday a ni satliah ve mai.Chuan, Simon-a zin atangin ni hnihna ani bawk a,abak chu ka tan ni danglam bik a ni lo.

“Tuesday..” ka ti a..a thinrim thaw hawk ri ka hre zui nghal zat bawk.

“A tha anih chu...” a off zui nghal hmak..eng chu a hria nimaw? Ka boruak rit sa belhchhah nan min rawn bia niin ka hre ber.Ka hrechhuak zo lo anih pawhin min hrilh mai awm tak ania.Mipa ho tak hi chu a..

“Hmingthan,vawiin hi kan naute Birth Day ania,tlai lam chu chaw i rawn ei angai ania..” ka bula thu kan thawpuinu bawkin a rawn ti leh a, ka thle bak mai..Khawiah emaw chuan vak chhuak ila, midang nen Boruak dang tawng ila ka ipik chuk pawh hi a zia maithei..LALPA leh.. vawiin hi ni 22 ani a, engvangin nge Ruatdika kha a thinrim loh tehlul ang...

“Hmela...sawi ve mai ta che,Tlangval senior pui tawh tihtauh nan a nep em mai..” Phone a pick veleh ka ti nghal bawrh bawrh..

“Vawikhat i theihnghilh na ani hial em?” engmah thildang sawi lo in a rawn ti ve thung..Nih te pawh ani mahna, ka theih phawt chuan ka wish ziah thin a, kan naupan lai chuan kei leh Sangpuii te nen kan pathumin an In ah chaw kan ei thin a, ka piancham anih chuan kan In ah,Sangpuii piancham anih chuan Sangpuii te In ah...High School thleng khan kan kal ho zel a, mahse, Higher ah khan a ni a kal hrang a, Mipa leh Hmeichhia kan lo ni bawk nen kan inthlah ve tial tial a, kan piancham lo thleng pawh kan in wish a, kan duhtawk ta mai zel kha ania.Mahse, vawiin hi chuan chiang takin ka theihnghilh hmin hmak.Ka hriatchhuah theih nan min rawn call a,mahse, ka la hrechhuak zo chuang lo.

“Vawikhat na pawh lo ni se ka hriat leh tho hi..zan lam Prog eng nge?” ka tih zawm nghal a..

“Party...Party...kum 31 lawih ka ni tawh ania,lawm a phu ve chiang em mai..” nui huk huk chung hian a rawn ti a, ka nui ve hak hak  bawk.Kum 31 lai a lo ni ve ta reng,kei pawh kum 30 ka hnaih ve ta..mahse, rilru hi a la puitling thei si lo..Pasal nei in keimah ngeiin eizawnna nei hrang tawh mah ila ka lawm zawng a ho a, chutiang bawkin ka thinrimna a ho em em bawk.

“A va nuam dawn ve, mahse, Simon-a awm lo a.” ka ti a, Simon-a tel lo a kal pawi ka ti hauh lo.

“A va pawi ve,mahse,kan mamawh chuang hleinem,dar 8 ah aw..” a rawn ti leh a..

“Um ka lo hrilh leh ang che, mahse, kan thahnem dawn em?”

“Aih, thian tak tak te..i duhdan a ni thinin ka hria” a rawn ti leh a, ka nui hawk hawk mai..Tun hnaiah tih derna tel lo a ka nuihna hmasa ber a ni hial maithei.

A chang hi chuan Simon-a ai hian Ruatdika hian min hrechiang zawkin ka hre thin, ka duhzawng leh ka ngainat zawng a hre em em a, tunah ngei pawh midang tam tak nena awmkhawm luih luih ka ngainat loh zia a la hrereng tih min rawn hrilh leh ta ngei.A chang chuan min endan hi ka hrethiam lo thin a, mahse, ka tan chuan thian leh unaupa a ni a, abak a awm lo.

Simon-a khan a thlenin min rawn bia a, abak chu kan la inbe leh ta lo,a buai a rin thu leh a lo haw hun tur pawh a hriattheih rih loh thu kha a sawi sa hrim hrim bawk.

Ruatdika sawi ang ngeiin kan tam lem lo,ka Hotel ngainat zetah ani lehnghal a, Sangpuii a lo kal a, a pasal erawh a zin thung.Kan thian hnai tak tak vek kan ni a, kan hlim tlang dar dar viau mai.Engmah Present ka ken sak ta lo erawh nuam ka ti chiah lo.

“Hei hi In ve chhin teh..” tih pahin Beer bur niawm tak,Darthlalang a siam, tung it et, te fel thlap mai hi ka bulah a rawn dah a.Zu lam hrim hrim hi ka in ngai lo a ka ngaina hek lo.

“Ka duh lo mai teh ang” ka ti a, a bur a mawi reuh em avangin ka thlek vang vang thung.

“In mai mai teh, In pa pawh a awm lo a, bakah i rui teuh lo mai..” ati leh talh a, Hriati a rawn thu hnai ve a,ani pawn in mai turin min rawn ti veleh a, ka tang viau nangin Ruatdika’n a Birth day present atan a pawm thu a sawi tak hialah chuan ka ban ta nge nge.

A kha deuh fak a, a hiar deuh mem mem in ka hre bawk. Tui lo ti a sawitur a ni lo a, tui tih tur pawh niin ka hrechuang lo.Ka pum a sa thla ram ram a, a kalna chin hriat tak a ni.

“Eng nge a an?” nui chung hian Ruatdika’n a ti thuai a.Pek ka tum chu la duh lo in ka kutah bawk a hmehbel leh a..

“Ka hrethiam lo,tui pawh ka ti lo,tui lo pawh ka ti chuanglo” an nui dun hawk hawk mai.

“A tlem em mai, in zo rawh, engtinmah i awm lo ang..”

“Aih, ka duhtawk e..Pasal te awmloh laia lo ruih chiam chu chi nang..” ka fiam let ve a,mahse, tihtakzetin in zo turin min nawr lui dun ta ngat ngat..in zo vek pawh ni ila tam a ni lo hrim hrim.

Thil chi hrang hrang kan sawi a,hun kal tawh leh kan chetchhiatna te,ka hriat loh karin ka lo inzo ve ta mai,an sawi ang ngeiin ka ruih tak viau pawh ka hre chuang lo.Thil pakhat ka hria.Ka thawpikna kha a kiang hawk a,ka thawveng halh mai. Sangpuii a haw hmasa a, haw ve mai tum a ka awm laiin ka awmdan a dik lo..ka zawi a, chutih rualin lum ka ti a, ka taksa zang huih leh engemaw tih chakna in ka khat tlat.

“Haw ka duh..” Ruatdika hnenah ka ti a, min rawn thut hnaih a..

“Engmaw?” a rawn ti a, Music thawm bengchheng lutukah chuan engmah ka sawi a hre lo tawp ani ngei ang.

“Ka haw duh ..mahse, ka thil in kha niang, ka inkhalh haw theih pawh ka ring lo..” mangang ru zet hian ka ti a..

“Ok, lungngai suh, ka thlah mai ang che..”nui chung hian a ti a, a in nual khan ka hre sia, rui hmel pawh a pu chuang lo.

“Angailo ang, kan Driver ka ko mai ang..mahse, min lo dawm ding lawk teh...” keimah pawn ka ding chhuak zo in ka ring lo..ka khup a zawi vek..

Ka zakah a kut a rawn rawlh a, min pawt tho a, ka rin ang chiahin ka ding thei lo,amah ka ngheng a..ka kawngah a rawn kuah a, Hriati lo kal hnai ve nghal chu a lo bia a, ka thle lawk lawk mai..Engmah pawisak pawh ka nei lo a, nuam ka ti veng veng a ni tawp mai.

Peih lo zet hian ka meng siar siar a, mahse rang lutukin ka mit ka chhing lehnghal hmiah, ka lu a na lutuk, a puak keh mai dawnin ka hre bawk.Nizan thil thleng kha ka rilruah a lo langa, engmah ngaihtuah chhuah theih ka nei lo.Ruatdika khan Motorah min hruai lut tih ka hre rei ruai a, abak chu mumang nuam leh hlimawm tak a nimai..Khatiang taka mumang a taksa nawmna kha ka la tawng ngai lo.Engpawh nise Simon-an ka rui tih a hriat teh chuan ka chan a chau hle ang..pawi tawp lo,Ani pawh a duh duh a ti alawm, engvangin nge zankhat chauh, chupawh  ka thiantha ber piancham lawmna ah lehnghal ka lo ruih ve chu thil dik lo leh hremhmun kal phah hialna tur anihna ka hre lo e.

Ka Phone nghawr dar darah ka harh leh a, ka lo muhil leh hman ani ngei ang, mumang ang deuh ruai nimai hian ka hria,ka phone ka dap a, ka dap fu mai thei lo..Peih lo zet hian ka meng a, ka thuchhuak ta nge nge..

Engthil nge thleng hi??!! Kan roomah ka mu emaw ka ti a, a ni hauh lo..Room awmdanah chuan Hotel room tih a chiang viau..Ka phone a rawn ri leh a, khumah ka bag a awm, ka ban a,ka bun chhuak vek a, ka Phone a awm lo..a la ri reng lawi bawk si..khum sir ka zuk en a,chhuatah a lo tla bal mai..min rawn call tu pawh chiang takin ka hmuthei nghal...Simon-a..

“Hello...”

“Khawiah nge i awm tehhrep a?” a rawn au ani ber..Ka Phone ka la sawn a, ka melh vak ringawt, chuti fahran a thinrimna tur engemaw awm ni?

“Ka tho chiah..eng nge ni ta?” ka ti a,Khum atangin ka chhuk a, khum piah a Dawhkan lian vak lo chunga lehkha indelh bet chuan ka mit a la tlat. Ka pan hnai a..

“Tunah dar engzat nge i hria em?” a aw chu boruak a hrui hrual vai rik hi ka tehkhin ber.

“Oh..hre nang, enteh, nizan ka mu tha lo a...”

“I awmna sawi rawh,tunah” sawi pawh ka sawi zawh hmain a rawn ti leh tuar a,

“Ka lo haw mek..” min rawn chhan leh hmain ka off zui nghal hmak bawk.

Dawhkana lehkha awm chu ka lakang a, “i lukham hnuaiah i motor chahbi a awm a, i car chu pawnah a awm” tih zawng hi a lo inziak a...Engthil nge thleng ta ang? He Hotel hi khawi lai ami nge ni ang? Engvangin nge In ah ka riah loh?

Zawhna hlir...mahse, tumah ka zawhna chhangtu tur an awm lo, Ni lo. Mipakhat a awm..Ruatdika...

Ka call tlang thei der lo..Hriati ka call leh a, ani chu a tlang nghal mai..

“Hello..” zangkhai fe hian a rawn ti a..

“Hriat, khawnge Ruatdika?, a Phone ah ka be thei lo..” ka ti nghal tawng,a thaw deuh huai ri ka hre thei.

“A awm lo..a zin dawn tih nizanah pawh a sawi vek kha..” a rawn ti ta mai..huizz, a zin dawn tih a sawi lai ka hre miah lo.

“Ok, ka lo theihnghilh leh hman a...”beidawng zet hian ka ti sep a.A sawi lai ka hre lo hrim hrim.Engvang tehlulin nge zu kha ka in ve reng reng ni??

Lukham ka lasawn a, lehkha a inziak ang ngei khan chahbi a lo awm ngat mai, ka thawmhnaw engmah a inphelh lo a, mahse, engtin nge helai hmunah hian ka lo awm ngawt ka la hrethiam eih lo.Haw vat ka ngai, chuti anih loh chuan Simon-a khan min rawn that turin mi a rawn tir duh mai ang.

Sana ka en zauh a, tlailam dar 4 a kawk vung tawh, engtin nge chu chen chen harh miah lo a ka mut theih pawh ka hre lo,engkim chhanna neitu chu Ruatdika chiah..a lo haw vat loh pawn ka biak ngei ngei angai.

In ka thlen chuan ka besei loh lutukin Simon-a a lo awm,Veranda ah a lo thu a, ngaihtuah muk hmel zet hian a hma a pot awm tlar thut chu a melh vung vung a, ka Motor thawm pawh hreawm in a awm lo a, a lo hawi phah chuang hek lo.

“I lo va let hma leh si ve..” a bula thut pahin ka ti a, kan Driver Tlana a rawn chhuak ve chiah bawk.

“Tlana,i kal duh chuan tunah i kal thei ania” ka zawhna chhang lo in Tlana hnenah zawk a ti a, ka awm ve tih hreawm pawn a awm ala awm chuang lo.

“Ava lawmawm ve,chuti anih chuan ka insiam tawh tho a, ka kal nghal mai ang..naktuk anih loh chuan a tukleh ah zawk lo let ila a pawi angem?” ati leh a.

“Aih,pawi lo mai..hmanhmawh suh” ati leh nghut a, a tho a, min en lo in inchhung lam a pan zui daih bawk.

“I haw dawn mi?” Tlana hnenah ka ti a, a bu nghat a, a pa a lo damtha vak lo a, Aizawl lamah hruai thlak theih anih beiseiin haw a lo tum a, Motor pakhat Simon-an keng turin a lo ti bawk a.

“Tluang deuhin i kal dawn nia” ka ti a, Simon-a kha office ah nge roomah a awm ka hre lo,inchhung lah a reh thiap a, kan nula thawm pawh a awm lo.

Room ka pan chho a, ka rit luk lah chuan ziawm lam aiin zual lam a pan emawni tih tur hian ka pen zawng ringawt pawn ka lu a na thei hial mai.Inbual ila, Damdawi ei a mut nghal mai a chi zawk ang..Mahse, Simon-a hmelah khan thlipui thawk tur intham niawm tak kha a lang a,mut na hun ka nei angem ka hre lo.

Ka inbual sawk sawk a, ka lu na chuan duh ang pawn min chet hmanhmawhtir thei lo,ka inbual zawh a Room a ka let leh pawn Simon-a ka la hmu ta chuang lo,ka inthlak sawk sawk a, ka pum rawn ri raih raih ah chuan ka riltam zia ka hrechhuak chiah bawk.Inhnuai lamah eitur zuk zawn angai, tlai chawei a la hun der bawk si lo.

“Khawiah nge car chahbi?” Kitchen atang a ka chhuak leh a Office atanga a rawn chhuah a inrual deuh thaw..

“Chahbi dahna ah..” angaihna hrelo zet hian ka ti tha ve mai.Ka haw tirh atangin vawikhat min biakna a ni a, ka awm ve tih a hria tih a tihlanna hmasa ber a ni bawk.

“A spare zawk ania ka tih..” chang zet hian a ti leh hluk a..ka dahna ka hrilh ve mai,ka sawi zawh rualin a inher a Room lam a pan chho a, a bawp sei zet chuan inthazo zet hian step chu a mal mal ni lo in a kan chho pawk pawk bawk.

Reivaklo hnuah a rawn let leh a, kei erawh chu Sofa ah ka thu a, ka ke ka hlangkang at bawk,”khawnge midang hi?” ka ti leh a,min rawn melh zawk a.

“Ka haw tir ve ve..” ka ang pham mai..

“Ngatinge?”

“Nizan i riah bo chhan te, i awmdan zawng zawng avang ta khen zanin chuan he In ah hian tumah ka mamawh lo..i insawifiah angai nasa dawn a..” khauh zet hian a ti leh hmuk a..Ka chil ka lem khawlh mai..Sawifiah duh em em mahila engmah sawitur ka hre lo.

“Kan nula a awm si loh chuan eitur ka va siam ang..” ka ti ta zawk,ka rilru tihfim ka tum angai, chumai bakah ka hrechhuak thei lo anih pawhin Ruatdika tal ka biak angai..

“Thu rawh..eitur chuan min la nghak thei..i sawi tur kha ka nghak thei tawh lo thung..” a sehchilh rawp rawp mai..

Chesawn ngam tawh lo in ka thu leh ta zal zal, ka riltam na te kha chu khawiah nge an awm tak pawh ka hre lo, an thlawkbo hneh tawh lutuk.

“Engmah sawi tur ka nei lo alawm..” ngam leh ngam lo hian ka ti ta nge nge.

“Oh...i nei chiang khawp ang..zan hnih lek ka awm lo a, ka awmloh zan pawh chu i lo hmang tangkai a, i riak bo nghal a...sawitur i ngah ang..” ngeiawm lutuk hian a nui a, a ner zui nawk bawk.

“Ka thiante In ah ka riak ti ta ila...”

“Oh..i duh duh  i sawi thei..”min ten ngawih ngawih niawm tak hian a ti leh a..

“Engemaw i hriat le?” ka ti let ve ta thung,a nui hawk a..a khup chungah a kiu a nghat a,a hmai a hup leh vang vang bawk..Muangchang hian a rawn hawi chhuak a..

“Ka hriat zawng zawng avang pawh hian nang hi then tlak i ni, chumai pawh ni lo a aia nasa zawk i phu...” harsa tih hmel zet hian a ti hrawk a, ka meng phar awk thung.

“Eng nge i hriat ka hre lo, mahse, engmah thil pawi ka ti lo...chuan..”

“Ngawi hmak rawh,ka then dawn lo che a, ka that dawn hek lo che, mahse, ka natna chanve tal hi chu hremna i hmu ang...’ a ti tuar a , a rawn tho a, min rawn hnaih nghal ruak bawk..Tawlhsawn ka tum chu min rawn man bet a, ka khabe ah na zet hian a rawn hmet a..

“Ka tel lo chuan he In atang hian pawnah chhuah leh inbeisei tawh suh ang che, Thih i chak anga, i thi thei chuang lo ang...That tur che a min ngen thleng rawk a hrehawmin ka siam ang che...” ati leh a, a aw a ring ta lo..mahse, a hmel duh khup leh a aw zawi fiah tak, nelawm na tel reng reng lo te chuan mihring ni lo in Hremhmun atanga lo chhuak ‘Sakawlh’ a ti ang zawk.