BLACK HORSE- 13

Chapter- 13

“I sawi awmzia ka hre miah lo ania” mawl hmel zet hian ka ti a, ka kut a rawn vuan a..

“I pasal ka ti thinrim ang tih ka hlau khawp mai, engmah a hrilh loh che chuan hrilh che tul a ti lo maithei a,engpawh nise i tana tha lo tak tih tum hi nangmah hnaih takah an awm tih hria la, tu nge anih keipawn ka hre lo.Mahse, fimkhur em em ang che” thutak lutuk hian a ti leh dap dap a, sawi ve tur hre lo in ka ngawi kar mai.

Engtin nge ka ei turah tur a lo tel ngawt theih? Englai khan nge ei pawh ka lo ei hman ka hre hek lo,Simon-a awmdan inthlak thleng thut te..engkim mai hian chhan a nei a, ka chungah Simon-a a tha ta thut a, hei ngawt pawh hi lawm ai chuan ngaihthat lohna tham niin ka hre ta zawk.

“Thil pakhat min tih sak ta che” ka ti sep a, sawi duh nei niawm tak hian min en kar nangin a bu ta nghat.

“Ruatdika Birth day party zan khan thil thleng a awm a, englo ....” thil thlen dan ka hriat ang zawng zawng ka hrilh zui ta vek, a changin a hmel a maktihna lang chungin min en a, a chang leh hlauthawng niawm tak hian a chal a ti chuar tap bawk.

“Chu chu  i ngawi ral ringawt tihna mi?”  mak tih hmel zet hian a ti chhuak hap mai.

“Aih, ka theih ang ang chuan chhui zui ka la tum reng, bakah kha zanah khan ka chungah eng nge thleng ka hriatloh dang a la awm cheu,Simon-a hian hriat a nei bawk a, eng nge anih ka hre lo thung..” dawt ka sawi ta zawk, tu emaw in ka taksa a khawih kual chiam tih kha hrilh ka tum zet nangin tul ka ti leh ta lo.

“Thil mak tih deuh ka neih chu maw..Ruatdika hi nang chuan sual turah i ngai maithei a, mahse, i nat thut zan khan In ah ka rawn kal a, englo...” sawi hreh niawm tak hian a ngawi leh daih..

“Eng nge eng lo chu?” ka nghak thei lo..

“Simon-an Roomah a lo awmpui che a, i tha lo hle tih a lang reng chung khan Damdawiin kalpui che a duh tlat lo.Chuan, i ziawm deuh thleng khan ka awmpui zui ta che a, Simon-a kha tu emawin a lo bia a, a kal chhuak a..ka tum loh deuhin ka hre palh a..ih..’vanneihthlak nge vanduaithlak takin a la dam e’ tiin i chungchang a sawi lai ka hria asin..engatinge a nupui thi chhawnga awm kha a dam leh a, vanduaithlak tih kha a sawi tel kher ka hrethiam lo..” ka ang pham mai..min  en lo in hnuai lam a melh ran bawk.

“Ka chungchang ni lo in midang pawh a sawi tel thei tho asin..” kei pawn ka awih lo..a thle bak a..

“Ni se ka ti keipawh..mahse, a hnu ah pawh i la dam a tul zia a sawi leh tho alawm” ati leh sap a, a sawi zawi hle na chungin ka bengah chuan tek ri tluk a ring a ni tho mai.

“Anih chuan ka thih duh tu emaw min tihnat duhtu chu amah hi a ni tih na a ni mai em?”

“Ka hre bik lo..mahse, tumah hi ring lo maiteh, kan hriat thin Simon-a kha a ni miah lo tih ka chiang ania..” ati leh sap a, Sangtei kan lam pana rawn kal mek chu a melh zauh a, thil dang a sawi zawm zat bawk.

“Chaw chu kan ei lo mai ang,kan kal mai loh chuan ka nu leh pa pawh an zahawm” vei nei lo hmel zet hian a ti a. A awmdan han thlak danglam vel hi chu hman atangin a tan thil har a ni lo.

“Ei ve ula, bakah Simon-a pawh a lo haw tep ka ring a” ka ti ve a, a nui mai..

“Mo ka ni ve sia, keimah hi ka inbuaipui tawk lutuk a, a nuam lo,bakah engmah kan hrilh lawk si lo a, nakinah kan lo ei zawk ang” ati awlsam leh mai.

Gate pawn thleng ka thlah a, a pasal a awm ve bawk avangin engmah kan sawi zui ta lo,mahse, a hmelah chuan min ngaihtuah tih a lang reng, Roomah ka lut nghal a, tukverh bulah ka dinga, pawn lam ni tla turin a chhun en phut mai chu ka thlir a, a hahdam thlak ngawih ngawih, mahse, ka hahdam chuang miah lo,hahdam a hnekin ka chhungril a buai em em zawk.

Nula harhvang leh lu zo veh vawh, mahni in enkawl thei tak thin kha engvangin nge ni reilote chhung hian ka chauh tak em em? Keimah leh keimah pawh ka in enkawl zo ta lo chu ani ber a, ka pasal in awm tura min tih ang angin ka awm kual ringawt a, ka buaina ber pawh chingfel si lo in ka nun ka hmang a, hetiang hi ka nih dan a ni ngai lo.Tuemaw laka phuba lak hi ka duh kher lo, mahse, mi in min tihnat chuan pek let ve ngei ngei ka duh thin a, ngaidamna thinlung ka nei lo ni loin min tih ang zat chiah pek ve hi ka duh fo.Mahse...tunah chuan pasal hlau em em, mahni duh dan pawh a nung ngam lo ka lo ni ta daih. Buaina ka nei anih chuan chhuahna leh chinfelna ka zawng tur a ni dawn lawmni..ka insehruh a, keimah ngei kha ka nih leh theih nan chuan engmah dang ka mamawh lo,huaisenna leh ka nihdan thin pangngai, luhlul tak kha ni leh ila a tawk mai.

Simon-a khan min ngaidam tih nizan khan min hrilh a, kan taksa nawmna inpe tawnin nuam ti em emin ka awm anih kha, ka a zo tawh ani ngei ang, engvang pawhin ngaihdam min dilin thiamthu sawi pawh nise thah tuma min rektu ka pasal kha a ni tih ka hrereng tur ani,bum nuam, ngaihtuahna tawi zet nei nih hi ka tum tur a ni lo.Ngaihdam ngai mihring ka ni reng em? Eng nge ka tihsual chiah? Engvangin nge ka la dam chu vanduaithlak a tih? Heng zawhna zawng zawng chhanna neitu chu amah Simon-a chiah..mahse, chhanna min pe dawn lo,a duh duh a tihkual theih ka nih zia nizan khan ka lantir zo chiah a, chhanna ka duh anih chuan keiman ka zawng ang, mawl deuh leh lerh deuh angai anih pawhin ka ti zel mai ang.

“Eng nge i ngaihtuah veng veng a?” ka kawngah a rawn kuah a, amah ka lo ngaihtuah lai tak a lo ni bawk nen ka insangmar nghal teuh mai.

“Eng lem mah..engtikah nge kan In ah kan haw ang tih ka lo ngaihtuah a?” ka ngaihtuahna nena in mil lo khawp a pangngai hian ka ti a.Ka darah a khabe a rawn nghat a..ka beng a thawk khum a, a lum ham ham mai.

“I duh hun hunah..tunah chuan i ziawm leh tawh tih i hmelah pawh alang a..”ati sup a, ka nui ru sak mai.Helai hmun fianrial atang hi chuan ka tan chet a harsa dawn tlat.

“Chuti chu naktukah haw ila, helai ai chuan kan in ka ngai tawh zawk” pangchang aw zet hian ka ti a,ka bengah a rawn fawp zauh a.”Tehreng mai,i duh dan dan le..” zawi sup hian a ti a, ka kawng a kuahna atangin a kut lehlam a ti sang a, ka hnute ah a tawp chat mai..

“Inthlak phawt la..” hetiang thil hian ka in thunun tir tur a ni lo.

“Um,mahse, chumi hma chuan..englo fa neih lam te hi..” a nui hawk mai.Ka ip chawih thung..rai ka tum rih ta tlat lo.Ka rai thei lo zawk pawh ani maithei,Kum hnih a ni tawh chung hian rai tur ang pawn ka la awm eih lo.

“Ka rai thei lo aniang, i duh phawt chuan midang lakah i neih ka phal ania” zawite hian ka nui hak bawk.A rum hawk thung..

“I ti tak tak em?”

“Tak tak..nakinah i thil neih zo zai te hi tu nge nei ta ang?”

“Shh...kan pahnih ta ani vek mai dawn lawm..tak takin theihnghilh rawh, engtikah emaw chuan kan la nei mai ang” ati leh a, Ka hnute bawk a rawn khawih leh a, mahse, a kut ka man beh sak ta tlat.
“A hun rih lo ania, bakah tlemin ka chau deuh a...”

“Um,chuti anih chuan inbual mai ka ngai dawn anih chu..” a aw thawp sut chuan a sawi tum a ti chiang ngang mai..

Ka mu meng kar mai, Simon-a hnar ri sak sak chu ka ngaithla kar a,saisir zawngin ka mu a, ka kawngah a kuah thung..ka buaina hi chinfel ka duh , mahse, khawi atangin nge ka tan ang ka hre si lo,tuemaw tal chuan min pui se ka ti takzet, Ruatdika ka mithla ah a lo lang a, Simon-a ai pawn ka ring lo zawk,eng nge ka rin loh chhan erawh ka hre miah lo thung.

Zing karah In lam kan pan a, Sangtei a hnungah a thu a, Security in kan motor pakhat zawk a khalh thung,In kan thlen veleh Sawmtluangi hmuh mai ka inbeisei tehlul nen a reh thiap mai.

“Sawmtluangi a awm na nge?” Simon-a hnenah ka ti a, a thle buk ringawt.

“Ka hre miah lo.Awm tur chu ania” a ti awlsam mai.Tlana a lo chhuak thuai a, kan bungrua te a rawn la chhuak a,inchhung lamah a khai lut a, kan nula in min hmuh chuan lawm zet hian min rawn kuah chang chang mai.

Room ka luh veleh ka mitthla ah Simon-an min reh vak kha a lo lang nghal iar iar mai, ka khur nghal dar dar bawk.khatih lai khan Inah Sawmtluangi leh Tlana an awm ve ve a, tuemaw zawk zawk chuan thil thlen zui dan kha an hre tur ani ringawt.Sawmtluangi chu ka ring lo nghal pang.Tlana zawkin engemaw chen chu min hrilh thei ngei ang.

“Vawiin lam Tlana hi i hruai chhuak dawn em?” a insiam mawlh mawlh lai in ka ti a.

“Hruai ka lo tum deuh a, eng nge?” a kamiz a kekawr kawngah a bilh lut pah a.

“Eng ni lo e, rem  i tih chuan bazarah hruai ka duh a, mahse, naktuk lamah animai” ka ti a,amah ngaipawimawh niawm taka lan ka duh.

“Vawiin chu meeting ania, bakah khulai a kan insak dan tur vel kha enfel angai bawk a...i duh chuan Taxi pawh i hmang thei a..” ka mengphar awk mai,keimah in ka kal a remti tihna anih chu..

“Aih, chutianga hmanhmawhthlak engmah a awm lo..naktuk lamah animai” thuawih hmel fahran hian ka ti leh a.Min rawn en a, a mit a ti zim sun bawk.

“Ka nupui i ni a, i lakah ka lo che mawi lo tih ka pha lo.mahse, engkim kha theihnghilhin hmalam kan pan ang ka tih kha..engpawh ti la ka duh loh dan leh ka phal loh thil ti lui zel duh tur khawpin i mawl lo a, mahni in enkawl thei khawpin i fing tawk bawk..” a ti ta duah..Sawi ve mai tur hre lo in ka ngawi kar mai.

“Ka sawi awmzia i hria tiraw? Vawikhat chance inpek hian tih nawn leh kher a tul miah lo tih i hriat kha..” ati leh nghut a, a hmel dam thlup kha mipa induhtawk lutukah a in let fel leh hmak tawh.

“Ok, ka hria lawm,mahse, thil pakhat..” ka ngawi leh rih a,engmah sawi lo in sawi zawm turin min ti tih hriat nan a bu nghut ringawt.

“Thian chungchangah,Ruatdika hi ka kawm zui zel thei em?” a hmel danglam nghal zawk chu reilote chhung chauh nimahse ka hmuh hmaih hauh lo.A kekawr ipte a zen a, engmah sawi lo in reitawk min en vung vung bawk.

“I remtih loh chuan kawm zel ka...” a ban a rawn vai zauh a,ka ngawi ta daih.

“Remti tehreng mai,tu pawh kawm la i tihtur chin i hre tawh alawm,zirtirna i dawng tha tawk tawhah ka ngai e” a tawng dan kher chuan min khei zak nangin chhang lo in ka bu ta nghauh zawk.

Simon-a chhuah hnuah ka insiam ve nghal a, Bazar ka mamawh tak tak hauh lo,mahse, a phalna thlapa kal tur pawh ni ila thil dik lo engmah tih ka tum lo.Min rinhlelh theihna tur chi engmah tih ka tum rih lo.

“Hey...kan inhmu khat hle mai..” ka hmazawnah tak Ruatdika a rawn ding a, ka rilruin anchhia ka lawh hmahmawh.Vawiin hian ka hmuh duh loh ber te zinga mi a ni tlat.

“Nia tiraw..i tha maw?’ pangngai takin ka ti let ta tho.

“Tha e, mahse, thil thleng a awm ania..” a nui vur vur bawk,Hriati nen an inthen tih min hrilh a tum ani mahna.

“Ka hre thawi deuh ania..mahse, nang chu Tlangval luck tih takah a dang i hung niin ka lo hria a” ka mit ka siai lui zauh, a hmel buai deuh nak chu ka en ngar bawk.

“Sangpuii a lo che leh hman a ni maw?”  min bia pawh ni lo hian a ti hmuk a, a lawm lo hmel phian bawk.

“Ni nang, ka pasal Cousin ania, hre tur ka ni dawn lawmni?” ka nui leh a, za lo zet hian a then ve ta nge nge.

“Chutiang engmah a awm hran lo,bakah Hriati te chu i hriat kha..a lungawilo laklawh mai mai..” awlsam fe hian a ti leh a, a sawi dik tlat thung.Hriati zawk hian a then thei lo niin ka hre fo, diktak chuan Ruatdika hian hmeichhe dang a kawp pawh ka hre zauh zauh, Hriati hian a hre lo a ni lo,hriat a tum lo a, a hriat pawn a hre lo der a,a pawm ngam lo bawk niin ka hre thin.

“Ka kalsan phawt ang che, tihtur ka la ngah deuh a” ka ti a, Simon-an tuemaw ka awmdan enthla turin a ti maithei, chuvangin a rinhlelhna tur engmah siam ka tum lo bur.

“Ok..mahse, thil engemaw ah biak che ka duh ania”

“Um, min lo call mai dawn nia..” ka ti a, ka kal pel tur chu ka banrekah a rawn vuan a, thil tha lo in min si niawm fahran hian rang lutukin ka thingthla nghal nawk bawk.

“Sorry...lo call ai che chuan naktukah inhmu zawk ang..a pawimawh ania” zawi deuh hlek hian a ti a, chhan pawh ka chhan hmain a kal zui daih bawk.Diktak chuan he mihring hi ka ring miah lo.Simon-a awmdan dik lo ni a a hriat te hi min hrilh fo a, thian anih angin min hrilh nge Simon-a hi a haw ve hrim hrim tih ka rilruah a awm tlat tawh.Ka tana tha tur duh niin ka hrethei tawh lo.

Ka mamawh ka lei zawh veleh In lam ka pan lehnghal a, Sawmtluangi a lo la awm lo ta fo,engemaw a hriat hrep ni??

“Khawnge Sawmi hi?” kan nula hnenah ka ti a,maktih hmel deuh hian min en a, a mengphar vak bawk.

“U Simon-an a haw tir tawh..” mak ka ti ve ta thung.Zingah khan a awmna ka zawh khan ‘awmtur’ anih thu kha a sawi ngei si.

“Oh..ka lo hre miah lo,ka awmloh lai khan maw?” ka ti leh a.

“Um, Farm a i awm lai khan zanah an inhau vak a, chuan ,Zingah a chhuak nghal alawm” a ti awlsam leh mai..Hriatthiam loh thil bawk.

“Anih chu mawle, unau an ni bawk a, an inbat ve mai mai anih chu..” ka ti a,mahse, ka chhungrila mak ka tihna erawh ka thup hleithei lo.

Engmah thil danglam thleng a awm hran lo,Tlaiah Simon-a te an lo haw a, a hma a kan nupa nun pangngai ang tak tak khan kan awm leh ta thut a ni ber.

“Sawmtluangi hi a lo va haw har ve” ka zawt ta nge nge.

“Ngaihtuah suh, a inenkawl thei ka tih kha..” min en lo in a malchunga Macbook a dah lam a en daih.

“Ka hre tho a, mahse, kan haw hnuah a lo la haw si lo a” ka ti leh talh.

“A lo haw ve mai ang, diktak chuan ka khak deuh a, chuvangin a lungawilo a chhuak tau anih kha” a sawi ta nge nge.

“Khawiah nge a kal ang?”

“Chhungte dang pawh kan nei alawm, a lo haw ve leh mai ang” ati awlsam leh mai.Ka zawt lui ta lo.

Zingah Ruatdika’n min rawn call a, Simon-a awm hnaih leh hnaih loh ka en kual hmasa te te,”Hello..” ka phur loh zia ka tihlan loh nan ka insum nasa viau.

“Vawiin chu..?”

“In ah hian lo kal mai la..”

“Aih, chutianga tih chi a ni lo..”

“Engthil nge a?” min tihkual vel a tum niin ka hria.

“A pawimawh tawp animai..Dawrah lo kal ngei ngei ang che” ati leh a, ka hnial dawn zet a mahse, ka ‘aw’ ta zawk. Engkim ka hre duh anih chuan hmaih nei lo in ka hriat angai.A dik leh dik loh chu hunin a la hril mai ang.

Chawhnu lamah Ruatdika te Dawr ka thleng a, an lo buai viau nangin amah ber erawh a cabin lamah a lo awm daih thung,a cabin ka pan ding nghal a,ka kal fo avangin an dawra thawk rei tawh te hi chuan min hre bel viau..

“Thu la, intur i duh em?” ati a, ka lu ka thing mai,a hnen atang hian engmah  ka duh hauh lo.Ka in hnunhnun ber a thil thleng kha ka mitthla ah a lo lang zut zut bawk.

“Ka rei hman lo a, i sawi tur zawk kha..” ka ti a, min en deuh vung vung reng chuan ka awm a ti nuam chiah lo.

“Um,Sawmtluangi awmna i hria em?” ka beisei loh lutuk zawhna a ni ta tlat.

“Hah..teh daih chuan..ngatinge a?” min zawhna chhang lo in ka zawt let ve thung.

“Amah hi tu nge anih i hria em?”

“Ka hriat loh in mawle..”

“I hriat dan kha a dik lo ang tih ka hlau khawp mai..” thupui fun zet hian a ti leh a..Ka chhang lo, a sawi tur ka nghak ta zawk.

“I pu thi ta khan fapa pakhat a nei a, chu a fapa chuan fanu pakhat a nei ve thung..chu chu tudang mah ni lo in Sawmtluangi hi..” ka melh reng mai,reife hnuah ka nui chhuak ta hawk hawk thung.Ka a ta emaw ti niawm takin min melh kul bawk.