BLACK HORSE-16

BLACK HORSE-16


Phawk zet hian ka melh a,a chhan zawh ka tum a,mahse min signal ka hmuh takah chuan ka chip leh hmak.Ka bulah Simon-a a rawn thu a,min signal chhan zawh kher ngai lo in ka hrethiam nghal mai bawk.

Khawvar hnu feah pawh an lo la let ta lo,ka nu mutthlu bar bar chu ka en reng a,a vahnu a ni a,a duat thin bawk nen a tuar viauin ka ring.Ka u kha post mortem naah a kal ve a,an chanchin zawt hrim hrim ila a that ka ring a,Simon-a kha Tlansanga nen an chhuak a,pawn lamah an a turah ka ngai mai bawk.

Mi engemaw zat an lo thu thup mai,ka beisei aiin an tam daih bawk.Mi tlemna lai ka pan a,ka hawi kual a Simon-a emaw Tlansanga pawh ka hmu chuang lo.Ka u ka call a,a pick lo,ka ti nawn leh ang nge tinawn lo ang tih ka ngaihtuah laiin a rawn call ta hlauh.

"Eng nge ni ta?" a rawn ti a.
"In lo haw thei dawn tawh em?"
"Kan lo chhuak dawn chiah e,kan hmelhriat Doctor a lo awm hlauh a tih kual chiam ngai lo in min lo tihsak thei hlauh a" a rawn ti a.Ka thaw hak mai.

"Anih tak chu,report ka hre chak deuh a" inthlahrung deuh takin ka ti a.

"Khalam kha chu nakinah le,engmah ka la hre bik lo" a rawn ti leh a,a chhan hriat ka duh,ka thawpik hluah hluah,Sangpuii khan in awkhlum ni a a hriat loh thu a sawi a,Doctor a ni a,vawitamtak mithi a hmu tawh a,an nih dan tur pawh a hrechiang ang.Inawkhlum ni lo a a hria anih chuan thil inthup a awm ngei ngei ang.

In an rawn thlen pui hnuah ka tap thei ta chauh,ka awrawl erawh ka chhuah eih lo thung,ka mittui a far zung zung a.A hmeltha tak thin kha ala tha reng a,a hmui sen siah thin pawh kha tlemin a dal ta deuh tih loh ah chuan danglamna a awm lo.

"Hriat,tho teh,eng ngemaw tal min hrilh angai alawm" ka rilruin ka bia a,chhanna a awm si lo.Ring taka tah chiam chiam ka chaka,mahse ka thei si lo.Ka chhungril ipik lutuk hi a puakkeh dawn ni berin ka hria.

Chawei tur leh inthlak turin kan haw a,vawikhatmah ka tawng lo.Simon-a pawn ka mood hrethiamin min be buai hauh lo bawk.

" I chaw kha ei teh" a tawng ri la hriat rualin ka phu zawk a ka fork ken lai ka thlauh daih bawk.

"Sorry...eng nge i ngaihtuah ka hria,mahse chaw i ei angai ania" ka thleng ka en a,ei lo in ka lo thai kual vel mai mai.Ka chawhmeh duh ber an lo siam a,mahse ei chakna pakhatmah ka nei lo.

"Hriati hi amah a inthat tak tak anih i ring em?"

"Shhh....nakinah,i chaw kha ei phawt la" dam thlap hian a ti a.

Ka chaw lam ka en ran a,ka tum loh tawpin ka mittui a rawn tla leh a,mittui hi chaklohna entirna ni a ka hriat avangin ka tap mai mai ngai lo.Mahse tunah hi chuan chaklohna lamah ka ngai lo..Hriati tana tap ka ni a,ka chhungril ipik lutuk ka puan chhuahna a ni bawk.

Ka kut hnunglamah ka hru tawk a,Simon-a thah anih ka ring lo na chungin a bulah tah kher ka duh lo.

"Ok,ei lo mai rawh,lo kal rawh le" a chair a nawrsawn a,ka kutah a rawn chelh zui nghal zat bawk.

Tho mai lo in ka thu leh renrawn a,mahse ka kut a hmer na a nat tak salh ah chuan min la nghak reng tih la ngaihtuah a,ka tho ta nge nge.

"Sangte,Bawnghnute kha ti lum la,khawizu tlem telin Roomah rawn dah ang che" ati leh sup a,a hma khan Pasal tha ber niin ka hre thin a,a hnuah erawh Ramhuai leh Ramsa kawlh niin ka hre leh a,tunah hi chuan ka pasal diktak angin min care a min duatna a ti lang nasa viau bawk.


Sofa ah ka thu tawm kak mai,Simon-a erawh inbual turin a lut a,ka melh ngai ka melh reng ringawt.Ka phone a rawn ri thut a,ka thu mar nghal zawt bawk.

"Hello"

"U Hmingthan,Sawmtluangi ka nia, Inah in awm em?"

Sawmtluangi aw zangkhai vahin a rawn ti a,ka thinlungah huatna a in tuh a,a tiak chauh emaw ka tih kha Hriati thihna ah hian he nu ngei hian mawhphur ni a ka hriat avangin ka huatna tiak tan chauh kha a puitling nghal titih der.

"Awm,eng nge ni ta?" Ka tum aiin ka aw a chang hret.

" Ka lo haw mek a,Mama a awm em?"
"A inbual.." sawi zawm tur ka hre lo.

"Khawngaihin ka lo haw tih min lo hrilh sak mai aw" a hma ai chuan a aw a zawi ta,a lo awm tirh atangin hetianga biak nuam lo hian ka la awm ngai lo a ka mood a hrethiam a ni ngei ang.

"Ka lo hrilh dawn nia" a hma aia aw nem zawkin ka ti a,a rawn tawng leh hmain ka off ta daih.

"Eng ngemaw tal ei teh" Simon-an a rawn ti leh a,a sam a hru hul mawlh mawlh a.Boxer chauh a ha bawk.

"Ka ei chak lo,kan inbual ve lawk ang" ka tho a,ka thut rei vang nge ka hre lo,ka lu a hai a ka pai nawk bawk.

"Ehe!!" Simon-an a ti tuar a,ka kutah a rawn vuan a,nghet zet hian min pawm bet nghal hmak bawk.


"Hahdam teh,hetiang chuan engtin nge i unaunu tan i beih theih ang?" Ka samah a hmai a rawn phum a thil hriatchhuah ka nei..Ka tal phat mai.

"Khatiang khan min ti leh tawh suh" a mitah tak ka en a,ka inhmu thei lo,inhmu thei ila chuan ka awmdan a nalh fahran lo khawp ang.Ka khup sai dar dar chuan ka chauh zia min hriattir a,mahse ka ding khawng lui tlat.

"Eng maw?" A awah mak tihna a lang chiang viau.

"Ka samah min fawp tawh suh"

"Hon...engthil nge a?"

"Khati pawh khan min ko chuang suh,ka duh hauh lo" ka kut ka humruh a,thei ila chuan a ringah ka thuai ang,min thah tuma min rek bet ang chiah khan thawk theih loh hrehawm zia ka la hriattir ang.

"I chau anih kha,inbual la..reilote chawl hahdam la kan kal dawn nia"a thle buk a,min khawih emaw tumna nei hmel a pu ta lo.Thawveng hawk awm tak ka thawveng  chuang lo a,ka lawm phah chuang huah lo bawk.

Ka thawmhnaw ka hlip vek a,min enzui reng tih hre mahila pawi ka ti eih lo.Bath robe ka la a,Bathroomah ka luhsan a,kawngkhar ka kalh a,ka ngheng rawk mai.Ka lo insehruh nasat zia ka hrechhuak chiah bawk.

Tuilumah ka inchiah a,ka harh sawng sawng mai.Hriati hmel dang diau mai ka mitthla ah a lo lang a,ka mit ka chhinga,kan naupan lai hun te ka chhuikir a,naupang harhvang tak,a ha hmai bal seu maite....A vai maiin ka tahna thlen tu mai anni.Kan inpawh em em nachhan pakhat chu Ruatdika nen an inkawp vang hi a ni pakhat bawk.

Sawmtluangi khan a lo haw thu kha Simon-a hrilh turin min ti a,ka hrilh theihnghilh hmak thung,a hmu dawn tho a lo hrilh lawk pawh ngaiin la hre leh lem lo,Emily...Sawmtluangi.. ka hne hluah hluah.

Ka inbual zawh meuh chuan ka zia ta viau.Simon-a a lo insiam peih vek tawh.Bawnghnute chu ka en vang vang a,engmah ka ei si lo a in ngei ka ngai.

Ka thawmhnaw hak tur ka la chhuak a,veng dang a ni emaw khawi hmun pawh nise ka theih phawt chuan Puan ka bih ziah thin a,ka intih mizo viau lam ai chuan keiman nuam ka tih vang a ni zawk.

" Sawmtluangi a lo thleng a" a phone en chungin a ti sup a,a lo haw vanga lawm hmel emaw lawm lo hmel pawh a pu hran lo.

"Ka hria "

"A that chu,a tleirawl rilru hi a la paih hleithei lo a,en mai mai rawh.Chuti lo chu i thinrim na tur i hmu tam mai mai ang" a ti leh a,keimah vanga chhuak a ni der si lo.Hahthlak hian..

"Keimah nen kan inhau tih ka lo hre lo a" ka kawrh hak pahin ka ti a,ngeiawm zetin ka nui lui hak bawk.

"Ka thil sawi apiang i la kawi zel mai a" beidawn hmel zet hian a ti hluk a.

"Ngai kawi nang,i sawi dan a kawi zawk anih kha" ka ti leh hmak a,min chhang ta lo.

Ka insiam zawh hmain a chhuak ta daih bawk,Hriati thihna hi a thiam loh a ni ka ti hauh lo,mahse thil kal tawh tamtak min ngaihtuah tir a,ka lo tuar tang tang na te kha a vaiin a lo thar leh a,tih let chakna in ka khat vek a ni ber.


Inhnuai lamah ka chhuk thla a,living Roomah Sawmtluangi a lo thu a,inthlahrung hmel a pu hauh lo.Ka beisei lawk dan tho anih avangin mak ka ti chuang lo.

"U Hming,pawi ka ti lutuk...engmah ka lo hre lo a" min hmuh veleh a lo ti nghal a.

"Nia,pawi khawp mai,mahse Ruatdika i nei fel hmak thei tihna nimai lawm"

"Hon...kal teh ang" Simon-an ka banah a rawn chelh a,rang zetin ka thingthla a,Sawmtluangi ang phuau chunga thu chu ka melh leh kawk a,hawi let hauh lo in ka kal zui nal nal.

Hriati an vui liam atangin kar a liam tawh,nitin ka kal ziah a,diktak chuan In ah awm ka nin lutuk vangin chhuah na chance ah ka hmang a ni mah zawk.Engmah chanchin sawi a awm leh ta miah lo chuan min ti thinrim hlur bawk.Tih ngaihna vak ka hre lo hian min ti chau in ka hre bawk.

"Hi.." Zorina nen kan inhmachhawn chiah,ka buai ta nuaih khan a hotel a kal leh tura min tihna kha ka lo hre leh tawh miah lo.

"Ehe!!! I tha em?" Chhungrila phur na nei miah lo hian ka ti hliai a,nidanga ka hmuh ang tho in a nui var var mai.

"In chhiat tawh te ka lo hria a.." a thle bak a,a nui sang tho.

"Nia,engtin nge i lo hriat zawk a?"

"Hei,ka thianpa hian min hrilh a,Hriati te nen khan chennai lamah kan inkawm ve zauh zauh alawm"

"Aw,a lo nih chu..eng nge in tih a?" ka ti leh a.A bula mipa ding chu a kawk zauh a."ka kal kualpui zuai a,thla tharah nupui a nei dawn a" ati a min hmelhriat tir leh rih a.Doctor a ni a,Hriati postmortem zan khan a duty tih a sawi zauh chuan ka beng a verh zar mai.

"Aw,anih chu,ka kalsan ang che u,ka la kal kual dawn a" ka ti a,a bu zauh a.Ka kalsan a,a hmel ah ringawt hi chuan mak khawpin Ruatdika nen an in ang a,mahse an nui hmel te a mizia te hi chu lei leh van ang chiah.Simon-a pawh khan a sawi chiah bawk.

In ka thlen veleh ka inthlak sawk sawk a,libraryah thil en fel tur ka nei a,Simon-a a lo la haw har dawn tih ka hria,Sawmtluangi Showroom lamah a kal ve bawk a,a lo haw mai ka ring lo.Midang chimbuai lohin rei vak lo chu ka awm thei ang.


Chhunglamah ka kalh a,CCTV bawk ka bel leh ta chat,Simon-a pendrive bo ni khan tu nge In ah lo kal ka en duh tlat,ka ti let zawr zawr a.Ka duh lai tak ka hmuh fuh takah chuan ka thaw huai mai.Zing atangin ka en a,ka chhuah hnu leh la let leh hnu thlegin..Midang tumah lo kal an awm lo.Midang tumah rinhlelh tur an awm lo.Sawmtluangi chauh khami ni khan kan chhungkaw zinga mi Inah a awm a,chahbi a nei lo tih ka hria,mahse a lut tho tih erawh ka chiang tlat thung.Eng nge  rawn tih a tum chiah ni ang? Ka pu chungchangah buaina a nei nge ni anga a ro zawng zawng Simon-an a chan vanga lungawilo zawk anih ka hrethiam lo.Engpawhnise rei tak ka nghak lo tawp ang.

Sawmtluangi roomah ka lut ta nge nge,thil mawi lo tak a ni tih hre mahila ka tih ngei ngei angai.

Ka hawng kual dan dan a,engmah rinhlelh tur eih a awm lo.A thawmhnaw dahna ka hawng a ka keu kual dan dan a,a thawmhnaw thleh karah chuan thil hmuh ka nei,mahse ka lak chhuah hmain pawn lama Sawmtluangi tawng ri ka hre ta tlat,rang lutukin ka khar lehnghal a,ka chhuak min hmuh rualin min ring dik lo nghal dawn tih ka hai lo,keipawh ni ila kan roomah min hrilh lo a lo lut hmu ila ka ringhlel ngei ang.

Ka hawikual a,suktur dahkhawmna chuan ka mit a la ta chat.Ka chawi nawlh a,kawngkhar lam ka pana ka hawn hmain Sawmtluangi'n a rawn hawng hmasa ta zawk.

"Oh...hetah i lo awm amaw?"

"Um,i thawmhnaw suk tur ka la a" suk tur bawm ka melh zauh a,ka nui lui sak bawk.

"Aaa, lo ti suh,ka lo ti mai ang.." mak tih hmel zet hian a ti leh a,nuam ti lo hmel a pu ve tlat bawk.

"A ho em mai,ka ti thei alawm" ka ti a, min rawn chhuh a tuma mahse ka kut lehlamah in ka khai a.Ngaipawimawh lo fe in ka chhuahsan zui daih bawk.

Suk tak tak ka tum lo,Bathroom kan hman tlang lawn berah ka luhpui a,Washing machine lian tha hem hawmah chuan avaiin ka chhung lut vek.

Simon-a nen kan awmdanah engmah hmasawnna a awm lo,kan inhau ngai lo a,hmelhriat satliah biakin kan inbia niberin ka hria.A hna lamah a buai nileng zak zak a,a chang chuan zan tlai tawh takah a lo haw zauh zauh bawk.Emily chungchang vawikhatmah kan sawi leh ta lo.A tha zel em ka hre lo a,a kal fo tho ang tih ka rin avangin a hria ang tih ka hria.

"Vawiinah Sawmtluangi roomah i lut a" min zawt pawh ni lo in ka thil tih  a hre vek tih min hrilh a ang zawk mah.

"Chuan..." ka ti ringawt.

"Eng nge i zawn chu ka hre lo a,mahse i awmdan mawi loh zia chu i hriat ka ring" muangchangin ka hawi chhuak a,ka en ta nge nge.Min en ve lo in a phone a bih daih thung.

"He Inah hian camera hi a awm vek tih chu ka hria a,mahse mimal room lehzel ah chuan dah angai lem lo in ka hria"

"Ka in ania,ka thu thu"

"Keipawh ka pasal In ania ka duh duh na ah ka kal kual thei ve ang chu ka lo ti a"

Camera a awm vek tih hre mahila a phone nen a thlunzawm tih erawh ka hriat vawikhatna a ni a,Bed Roomah lehzel a dah tih ka hriat vawikhatna a ni bawk.

" I kal thei lo ka ti hleinem,a thawmhnaw bawm vel khawih kual kha thil tul tak a ni lo ka tihna nih chu" ati leh hmuk a,ka haw hluah hluah.

"Kan roomah hian khawi laiah nge i dah?"

"Ka dah lo hlauh" a nui suk a,ben chak em emin ka en ve thung.

"A that chu...Emily hi eng nge a an?"

"A tha tawh,karleh atang chuan hna pawh a lo zawm thei in ka ring"

"A va lawmawm ve" ka ner nak mai.

"I lawm hmel lem loh khawp mai" ati sup a,min en reng tih ka hriat avangin ka hmazawna Tv lam ka melh lui ngar mai.

"Lawm e,i tan a pawimawh alawm"

"Eng nge sawi i tum chiah?" Nelawm lo zet hian a ti ve thung.

"Ka sawi dik lo ami?" Ka ti ve thung.

"I sawi dik leh dik loh ai chuan i sawi tum ania ka zawh che"

"I hnathawhpui ania,i tan a pawimawh tih ka sawi alawm"

"Ka lo hriat dan chuan thildang a kawk zawkin ka lo hria a" ati leh talh.

"I ngaihdan mai mai anih chu,mahse a accident zana i nupui ti a an sawi khan i haw lem lo tih ka lo hmu a,tlem chuan ka confused ta deuh a" ka nui hak mai.

"I mizia hi a danglam ta hle mai" ka thusawi a haider hmak.

"Danglam na chhan te pawh a awm ang chu" ka ti ve thung,min chhang ta lo,a phone a dah a.Min hnungchhawn zui hmak bawk.

Muhil thei lo in ka mu meng kar mai.Ka rilru ah Zorina thusawi bawk kha a lo lang a,Hriati postmortem zan khan a thianpa kha a duty a ti a,hmuh dan ka zawn angai.

Simon-a a rawn inlet a,ka kawngah a rawn kuah a,ka tang teuh mai,nupa nun kan hman lohna pawh a rei tawh.Zantin kan mu dun a,a harh lai chuan min khawih tum hmel a pu ngai lo,mahse zanlai a ka harh hian min lo kuah ngei ngei thung.Diktak chuan haw em em mahila ka chhungrila ka Hmangaihna hi a reh ngawt thei lo a,amah si chung leh a lungphu ri ngaithla chunga muthilh hi nuam ka ti a ka num a famkim niin ka la hre zel tho mai.


Ka harh leh chuan a lo tho daih tawh,tho mai lo in ka mu deuh vang vanga,engtia hmalak tur nge ka ngaihtuah a,nitin engmah ti lo a ka thut mai mai chuan ka tlai vek ngei ang.Zorina Card min pek kha ka hrechhuak a,ka tho sawk sawk a,ka purse ah ka dah tih ka hria.Ka besei ang ngeiin a lo awm ngei bawk.

A la hma deuh nangin ka call ta tho,a la tho lo anih leh a pick lo mai ang chu.Ka beisei loh zetin a pick ta hlauh.

"Hello" zangkhai fe hian a rawn ti a,thophang aw a awm lo.

"Hmingthani ka nia,i mu ka rawn kai tho che em?" Inthlahrung fe hian ka ti a,a rawn nui hawk hawk mai.

"Tlangval fel tak ngang ka nia,ka nu ka bazar pui mek e."ka nui sak mai.Ka hriatna a la rei loh nen a der ni hauh lo in a bulah ka nui tam ta!!!

"A that hlauh chu,vawiin chu ka rawn hmu dawn che mawni ka ti a"

"Ok,tehreng mai..ka lo welcome tha viau ang che" a nui leh hawk hawk a.

"I ti lawmawm thin,ka lo kal dawnah ka lo call leh dawn che nia" ka ti a,ka off zui a.

Ka hawi chhuak chiah chu Simon-a kawngkhar bula lo ding ka hmu nghal chiah bawk,engchen nge kan inbiakna kha a hriat hman ang ka hre lo.Mahse hria pawh nise huat tur thil pawi ka sawi lo hrim hrim.

"Tu nge a?" Nelawm lo zet hian a ti hmuk a,lo luh tum lo niawm tak hian a dinna ngaiah a ding ngur bawk.

"Zorina mawle,Pi Zauvi fapa saw" ka ti tha ve mai.

"Um,in lo va innel hman ve"

"Nia,a fel khawp mai,Hriati postmortem ti tu kha min hmuhpui dawn a" ka ti leh a,kha Doctor lakah khan engemaw a thleng anih chuan phat rual lohin Simon-a hi pawikhawihtu a ni tihna animai.

"Eng nge hmuh i tum chiah?"
"Ka hre lo,thil fel lo zawn ka tum"
"Police te kutah dah mai la" a nui hmel chuan min khei zak mai.

"Kei aia mi hausa zawkin an control tlat chuan awmzia a awm lo"

"Ok,nia ..ka ring tawk che,kalpui i ngai em?" Thutak zet hian a ti leh a,ka lu la thing mai.


Simona chhuah hnuah ka chhuak a,Zorina te Hotel ka pan ding nghal nalh bawk.Pawn atangin ka call a,a rawn chhuak ve mai.

Intur ka duh leh duh loh min zawt leh a.Ka duh loh thu in ka chhang a,CCTV room lam bawk kan pan dun leh a,Simon-a awm leh awm loh min zawt leh bawk.An in nel hmel tho sia,mahse mak takin kan inhnaih tehreng nen a lo kal ngai chuang miah si lo.

"Hei hi...i hriat zawng a ni em?" Monitor a kawk a,ka phu zawk mai.

Sawmtluangi ngei a ni.