BLACK HORSE -18

BLACK HORSE -18

Ka tawng dawn a,a ri chhuak zo lo..Simon-a hmel rum ul chu ngam leh ngam lo hian ka en a,a mit thim khup chuan na zet hian min melh ngur bawk.

“Tu fa nge?”

“Dawt i sawi? ka tum loh tawpin ka au chhuak thawt a ni ber.

“Nang ang lo takin dawt ka sawi lo hlauh,mahse chhanna ka duh.I pum chhunga mi kha tu fa nge?” min rawn pan hnai a,hlauhna pawh ka nei lo.Ka chawmawlh vek.

“Inah ka haw duh” Ka nu bulah awm ka duh ber rih.A beisei loh lam ka sawi a ni ngei ang,a lu a thing nawk ringawt.

“Hei hi i In a nih hi” tlemin a thinrimna a control ta deuh tih a tawngdan atangin ka hrethei.Mahse a in Control avang hian a hlauhawm nep ta tihna a ni lo tih leh a hma ai khan a hlauhawm sawt tih pawh kei aia hrechiang an awm lo ang.

“Khawngaihin…” abak sawi mai tur ka hre lo.

“Ni lah lo e.Tu fa nge anih chhanna min pek theih hun hunah le” a ner nawk bawk.

“I fa lo tu fa nge pai se min tih?”

“Oh..kha video tawi te kha i la hre reng em?”min rawn hnaih leh thut a,ka darah na zet hian a rawn tham zui bawk.

“Hre lo,hriat pawh ka duh lo,mahse engvangin nge fa i nei thei lo tih tunah i sawi chauh?” ka chhungrila huaisen riau na rawn awm thut chuan min ti danglam ta tlat lawi.

Hei hi ka hrechiang,kha Hotelah khan eng ang pawn ka taksa kha chul kual vek mahse ka pum chhunga thanglian mek hi chu midang fa ni lo in Simon-a fa ngei hi a ni tih ka hming ka hriatchian tlukin ka chiang.

“Tu fa nge?” a ti leh sup a,ka thle bak mai.

“Nangmah…”min ben tum niawm takin a kut a lek uaih a,mahse engmah a ti ta lo hlauh.

“Mi a ka ni lo..mahse hetiang hi chuan min chhaih kual suh..Ka sual zia i hriat kha...chuan,thil pakhat..Hriati ang khan mahni intihhlum i ngai ve hlauh ang e” za lo zet hian a nui chhuak huk bawk.

Ka khawng vek niberin ka hria,mahse ka khawng li.Engmah ka sawi hek lo,ba zet hian a samah ka tham a,a lo inring lawk vak lo nge a ngaipawimawh lo ka hre lo,min ti let lo in a indang ringawt.

“Thi rawh,ka haw lutuk che..” ka aw a khur hlawk hlawk mai..Ngaipawimawh lo hmel zet hian a then suk duh chauh,A sam ka thamna pawh ka thlah duh nik chuang lo..

Ka kut a rawn vuan a,hneh zet hian a la sawn a,ka te tuar a,ka ban lehlam a rawn herh leh a,na ka tih avangin ka te chhuak thawt bawk.

“Kut min thlak tawh suh,Hriati ang kha nih i duh loh chuan…”

Engmah ka sawi thei lo..Ka che leh phat a,LALPA ….engthil nge ka tih tak?!

Simon-a hmaia ka chil kai luai chu ka en a,a hma khan ka hlauhna a bo vek a,tunah chuan muangchangin hlauhna a lo let leh a,vawt tih vang ni hauh lo in ka khur leh ta..

“Mama,eng...engthil nge?! “ ka hnung lam atanga Ka nu rawn tawng ri ka hriat rualin ka mit ka chhing ta ngawt..Engpawh tiin kut pawh lo thlak hial mahila a zia..Mahse tuna ka chet dan kher kha chu thil mawi lo leh dik lo tawp a ni chiang.Mahse,engmah tihtur ka hre miau lo anih kha..Hriati a that miau alawm.

“Hmingthan...i pasal hi chil i chhak amaw?” ka bul atangin a rawn ti tha thung. A awah chuan maktihna,thinrimna...a awm ve ve.Ka dem hauh lo.Tu nu mahin an fate chil an chhak khum an duh lo ang.

“Nu,khawngaihin...keima thiamloh zawk anih kha” Simon-a aw dam thlup in a rawn tih takah chuan muangchangin ka meng chhuak a,ngam leh ngam lo hian Ka nu ka en a,a hmeltha tak mai chu ka la hmuh ngai hauh lo hian a dur khap a,a mit lian kel kawl chuan min melh zam a tum emaw tih mai turin min melh ngar bawk.

“Mama sawi kha a dik em?” nghet charh hian a ti a,an va han inchhun fuh tak.Chhan mai ka tum a,ka hrawkah min hnawh a ka tawng chhuak zo lo..

“Nu...Nupa chuan buaina kan nei ve ang chu..lo inrawlh duh suh,a fel leh mai ang..”eng nge a hriat hrep ni?? Ka lam tang leh ta zawk niawm hrimin a tawng bawk.

“Ka hria,mahse…’a ti leh hman chauh a,Simon-a bawkin a lo khap leh..

“A tawk e,Ka nu nimahla kan nupa karah chuan midang an lo tel ve ka duh lo ania,chuan,khatiang kha engmah a thleng nawn lo ang tih ka tiam che” hnial chi hauh lo a khauh hian a ti hmuk a,vawitam ka nu a zah zia ka hmu tawh a,a thusawi a hnial pawh ka la hre ngai hek lo..Mahse,zanin hian a nihna dik tak a lang ta chiah,tumah,a Nu emaw,a Pu pawh kha a duhdan a a chetna an dal dawn anih chuan a kawng dal turin a phal hauh lo tih a chiang reng.

“Ka fapa i ni alawm,ka hrechiang che..engmah hi chhan nei lo in i ti lo ang” a rilru a na nge a lungawilo satliah ka hre thiam lo,hei pawh hi a fapa ang chiah tho a in control thei a ni tlat.

An nufa in an inzui chhuak a,kei erawh tih leh tur hre lo in ka thu reng ringawt,Tukverh lam ka hawia,hmu miah lo hian ka melh reng bawk.Simon-an fa a nei thei lo.Mahse tunah ka hre chiah,chupawh ka rai hnuah lehnghal.Mahse,ka awih miah lo.Vawitamtak Naute chungchang kan sawi dun tawh a,fa a awh zia ka hre bawk.Doctor lah kan pan nasa.Fa a nei thei lo tih a hriat chuan in entir kan mamawh miah lo.

Ka Phone a rawn ri thut a,ka phu nasa kher bawk.Ka en a,Zorina...Phurna pakhatmah ka nei lo.Mahse ka pick ta tho.

“Hello…”

“Khawnge i awm?” zangkhai zet hian a rawn ti a.Ka mood nen a inmil hlawl lo.

“Inah ka awm,eng nge nita?”

“A that hlauh chu,ka lo leng ang ka tia..In Gate bulah ka awm” ka mit ka chhinga,tunah kher hi chuan tumah ka hmu chak lo a,mahnia awm ka duh ber.

“Hmingthan…”

Lineah a la awm tih ka hre chiah,”um,ka lo kal ang” ka phur loh zia tihlan loh hram tumin ka inthup nasa viau bawk.

Muangchangin Inhnuaiah ka chhukthla a,Sangte’in amahin Tv a lo en a,Ka nu leh Simon-a ka hmu lo thung.

“Gateah kan inleng tur a awm a,va hawnsak lawk mai ta che” ka ti a,a tho a,Simon-a ka nu Room atangin a rawn chhuak ve chiah thung.

“Tu maw lo kal?” a hma a ka inhauhpui kha a ang leh ta lo.

“Zorina” ka ti tawi tak ringawt.

“Eheu!!!...midang leh bawk..’ a sawi awmzia ka hre lo,hriat pawh ka duh hek lo.

Zorina leh Sangtei an rawn inzui lut a,ka mitthla ah Ruatdika a lo lang a,ka thian nimahse Simon-a chungchang vel avang khan ka rinna ka hloh tawh a,chumai bakah Hriati thih na khan min ti thinrim bawk.Ka hmuh lohna chin pawh ka hre mai tawh lo.

“Ehe...Simon-a pawh a lo awm a,a va tihzia ve” nidang ang bawkin a nui leh var var mai.

“Nia,ka haw hma deuh a,i tha maw?” pangngai tak hian a ti let ve mai.

Bet lo zet hian ka thu a,Simon-a leh Zorina titi mawlh mawlh chu an sawi hre miah lo in ka ngaithla mawl tawp.Thian inkawmngeih ti a sawi tur ni lo mahse an inhre tha thawkhat tih a chiang mai bawk.

“Hotel lam hi i kutah a awm ta chawt ami?” Simon-an a ti a

“Um,ni tawh mai,ka pa hi a fit tawh lo a.Bakah mahni hna enkawl chu a nuam alawm” ati a.Simon-a hian kha video kha Zorina te Hotel a siam a ni tih a hria em ka hre lo.Hre lo hram tehse.Kei ai hian a duh chuan a chhui chhuak hmasa dawn zawk miau a.Mahse,a chhui chhuak anih hlauh pawn ka tan lawmna tur a ni leh hauh si lo ang.

“A dik reng,nakinah ka lo la kal ang.Mamawhna che ka nei ania” a ti leh nghut a,Zorina’n min rawn melh zawk a.Mahse,Simon-a lam bawk a en lehnghal

mai.

“Tehreng mai.Hmingthani hi la rawn hruai la a tha ang’ ka thaw huai mai..Ka la kal ngai miah lo niawm tak hian arin tir duh anih ka ring.

“A lo kal fo emaw ka ti a” ka va han thawveng rei lo tak.Khawi atangin nge ka kal tih a lo hriat leh tak ni??

“Ka nu in min rawn bia a,Ka pa a nuam vak loa,ka va kal lawk mai dawn mi?” ka ti chhuak ta nge nge,diktak chuan min lo call hauh lo.He in lian zet hi ahma chuan ka Inah ka ngai thin,mahse tunah chuan Jail lianpui a ni ngawt tawh.Tlanbosan vang vang ka chak ber.

“A hmanhmawhthlak loh chuan naktukah kal mai ang,a tlai tawh em mai”

“Ka va kal lawk zawk ang..Ka ngaihtuah deuh a” Zorina a awm ve a,min hnial talh ka ring lem lo.

“A tha lawm,ka lo kal ve ang” a aw chang zet chuan min ti thinur hluah hluah.

“Ka kal teh ang,Hotel lam chu min rawn tlawh thuai dawn nia”a thingpui no Centre Tableah a dah a,a tho zui nghal mai bawk.

Zorina chhuah hnuah Simon-a nu a Room atangin a rawn chhuak ve ta chauh.A hmelah chuan a hma a thil thleng kha engmah a theihnghilh lo tih a lang reng bawk.

“Nu,Hmingthani te Inah kan kal lawk dawn ania”Simon-an Jacket hak pahin a ti a,ka thut ngaiin ka thu a,ka rilru buai nuaih nuaih chu tihfim tumin ka bei a,mahse ka hlawhchham let der.

“Eng nge a?”

“A pa a nuam vak lo a,i lo kal ve duh em?” ta deuh deuh hian..A chang hian hlau lo angin lang thin mahse Mama’s boy diktak..

“Duh lo” a ti nghat a,melh pawh min melh eih lo.

“Kan kal dawn mi?” min rawn en a,engmah sawi lo in ka tho ve mai.

“Mama,Sawmtluangi a lo haw dawn ania” a ti leh a,Simon-a chhuak tur chu a ding chut a,a rawn hawi let a.

“A that chu,i ngaihtuahawm em?”

“I nu ka nih hi…”a nui lui hak a,a Fapa ang chiah.A nuihna phena a chhungril hlauhawmna hi engtin nge ka lo hmuh hmaih theih thin ni??Engkimah hian a telve vek ang tih te chu lo rin thiam daih tawh awm.Tunah na ka siamsak hnuah ka hmu ta chauh,engpawh nise ka tlai lem lo e.

Motorah ngawirengin kan chuang dun a,min be lo a,ka be bik hek lo.Ka nu msg ka thawn ve ngei a,mahse a hmu em ka hre lo.A rawn reply tlat lo.

“Zorina Hotelah i kal fo tih ka hria” kawng chanve vel lai kan tlan hnuah a rawn ti chhuak thut a,ka phu ru zawk bawk.

“I hriat chuan a tha anih chu”

“Zorina hi i naute pa kha a ni lo tih engtin nge ka hriat ang?” thil tenawm lutuk sawi a ang ber.

“A ni lo hlauh..”

“Huh..ava lawmawm ve”

Chhan enah pawh ka en lo.Ka Phone ka phawrh a khawih tur ber hre lo mahila ka en lui tlat thung.

“Ipa a dam lo hauh lo bawk a” ati leh nghut a.

“Nia..”

“Haw i duh chhuanlam a ni tih ka hre bawk”

“I hriat vek chuan min chelh lui lo khan min kal tir mai ta che”

“Ni lah lo e,ka nupui i nih hi a tul tlat” ka en a,a hmel rum ul chu min tawk zawnga lo tlan Car Light engah chuan ka hmu thei a,a insehruh nasa hle bawk.

“Eng nge i sawi awmzia?”

“Ka nupui i nih hian ka tan engkim a awlsam ka tihna anih chu” a ti leh a,ka melh reng ringawt.

“Engkim chu eng nge?” ka ti leh talh a..Kawngsirah Motor a ti ding a,Light a on nghal bawk.

Min rawn hnaih a,kawngkhar lam ka ngheng ve thung.

“Aizawl ka lo kal tirh khan engkim tum mumal tak neiin ka lo kal,chuan,nang hi ka tawng lehzel che a,ka tan chuan ka thiltum ti hlawhtling tu mai i ni,i smart a,i fel a,khawiahmah i zahpuiawm lo bawk.Chu aia pawimawh zawk chu nang hian ka mi duh te hnenah min hruai thleng thei..mahse,ka nupui i nih tak law lawah chuan awm mai mai ka tum lo.Pasal ka nihna ka ti hlawhtling.Sex phei chu nang anga min ti lungawi an awm lo” a thaw hawk a,a khabe ruh kual nalh zet chu a tuai zauh bawk.Sawi ve tur reng reng ka hre lo.

“Chuan..?” adang sawi tur ka hre lo.

“I hre duh chiah em?”

Tawngka a chhang lo in ka bu ringawt.Ka na thei tawh lo emaw ka lo ti a,ka na nawn leh ta..Eng ang pawn tihdam tum mahila Bum ka nihna hi ka damchhungin ka natpui tawh ang.

“Fa ka nei thei lo ni lo in Fa neih pui che ka tum lo  mai zawk.I rai hmasak zawk chuan i taksaah tur an hmuh tawh kha..”

Na hi a natzia sawifiahna tha ber chu “Natna” tho ho a lo ni...