BLACK HORSE-29

BLACK HORSE-29

Zorina call nghal a zawg fiah ka tum zeta,ka thulh leh ta zawk.Engatan nge min hman leh a tum ang tih ka rilruah a lo lang a,a thil neih te Mala hmingin awm eng ang mahse keimahah danglamna a thlen lo.A thil tum tenawm tak tak te kha a hlawhtlin nan min hmang tawh a,kei min hman theih loh hnuah a fapa hman leh a tum lo tih engtin nge ka hriat ang??

“Zorina a lo kal em?” ka u in ka hnunglam atangin a rawn ti thut a,Room ka kalh vek khan ka hre sia,engtin nge a lo luh theih ka hre lo.

“Ka kalh emaw ka tia,engtin nge i lo luh theih a?” ka thil ken lai ka dah tha sawk sawk bawk.

“I kalh lo a,chuan ka lo luh a rem lo tihna mi?” a ner nak bawk,ka nui ve ringawt.Ka naupan lai atangin engkim ti thlap thlap chi ka ni a,ka u nen hi chuan kan in bat buai vak lo,Tetea nen erawh kan inhnial phah tum a tam,chu chu hrerengin min chhaih tih ka hai lo.

“ I lo lut thei lo ka ti hleinem,ka kalh emaw ka tih vang mai anih kha,engmaw i sawi?” ka ti a,Mala rawn tal chu a harh hlauin a samah ka chul sak pah bawk.

“Zorina a lo kal em ka ti mawle,i awm leh awm loh min zawt a” a ti a,Tukverh lam a pan a.

“Kal e,a rawn bia che maw?” mak ti zet hian ka ti a,ahma khan kan Inah hian a lo kal ngei a,mahse,ka u nen an inbiak ka hre hauh lo.

“Um,thil sawipui tur che a nei a,bakah Bawiha hi a en duh ati a” a ti leh mai.

“A lo kal zuai,a awmrei lo,mahse,U..ngatinge nangmah a lo call daih che?” ka ti a,min rawn en a,a hmel buai nak chuan ka chhungrilah engemaw ka hriatthiam si loh hian min thawng tlat.Zorina khan Simon-a thil tum te ka u pawn a hriat thu a sawi tak kha.

“Eng lo….” a ban a phar hluaia,a dah thla leh riai riai bawk,ka rinhlelhna a zual sauh thung.

“Eng nge eng lo chu?” ka ti hlak a,ka melh ngar bawk.Engpawh nise ka zawt chhuak khawp ang.

“Simon-a chungchang hi engkim chu ka ti lo,mahse a then chu ka hre ve a,i nat em em lai khan i tana tha tur zawk a nih avangin ka ngawi reng a,mahse...tunah chuan a fel vek tawh a,Simon-a erawh a ngaihtuahawm ta deuh anih hi” a thaw huai bawk.

“Simon-a thil tum i hre renga,mahse i zep a,ka natna pawh i hmuh hmaih lui ta vel a..’ ka nui lui hak mai..

“Chutiang zawng chuan ni lo e,i ngaihdan a dik lo” ka tho phat mai.Ka ngaihdan a dik leh dik loh lam ai chuan a farnu natna aia Simon-a bawk a lo ngaipawimawh hi ka hua.Ka tana tha tur engmah a ti hek lo.Ani pawh hi a lo bum leh hman anih pek hi..hahthlak hlawm hian a..

“Ka u...Simon-a hi i hrechiang em?” ka ti nghat a,Mala a harh ka hlauh avangin ka tawng ring ngam lo,kei hi harh vang tak ka ni lo a,ngurchuai lutuk pawh ka ni leh chuang lo.Mala hi chu hathlak khawpin a harhvang a,ri hlekah a harh nghal zel mai,A pa ang chiah..Apa..tenawm lutuk.

“Nang ang em chuan ka hrechiang lo maithei,mahse,i hriat dan ang lo hian ka hrechiang thung” a ti sup a,Tukverh lam ka pan  ve a,kan unau hian kan inkawmngeih viau,mahse kan puitling tawh a,a hna lamah a buai bawk nen han titi chiam na hun kan nei khat viau thung.

“U...i rin ang hi a ni lo..kan inthen chhan kha eng nge chhuanlamah a hman ka hre hek lo..mahse,i rilru hmin nan chuan a tawk em em tho anih hmel” ka ti a,min en lo in pawnlam a thir a,in ngaihtuah muk hmel fe hian a hmui a pet fun bawk.

“Emily nen khan vawitamtak kan Inah ngei khan ka phawk asin,chuan, Sawmtluangi pawh kha hun engemawti lai khan a lo khawsak pui tawh bawk...min neih chhan kha min hmangaih vang a ni miah lo bawk a” ka ti leh a,muangchang hian a rawn hawi a.Min khawngaihna a mitah ka hmu thei bawk.

“Ni e,in inthen chhan kha ka zawt ngai lo che,tul pawh ka ti hek lo..ka ngaihpawimawh ber chu i himna leh i naute himna kha animai” ati sup a,mahse,kan inthen avanga ka himna anih na tur ka hre miah lo.

Sawi zawm leh ka tum lai takin ka u nupui a lo lut ta hlauh,engmah kan sawi zawm leh ta lo.Ka u in a zui chhuak a,ka hriat theih chinah ka u ka huat ber tum a ni hial ta ve ang.Simon-a lam a tang tih a awmdanah hai rual a ni hek lo.

Chawei lai pawn ka tawng mang lo,Ka u in min melh leh zauh thin tih pawh ka hria,ka en duh lo lui ve tlat thung,Simon-a thil rawn tih dan vel hian min ti thinur hlur bawk,ka fa a ni lo a ti a,tunah lem a rawn ngaihsak leh ta hurh a,Ruatdika biak vat ka mamawh ta ber mai.

“Naktukah i hman angem?” phone a pick veleh ka ti nghal tawng mai,tun thlengin hmeichhe kawp a nei leh ta lo.Hriati hmun ruak hnawh khah hi a harsa ngang anih hmel.

“A pawimawh dan azirin hman e,Mala jection a hun leh tawh mi?” a rawn ti a,ka nui hak mai.Nitin vawikhat tal Mala ngaihvenin min rawn be ziah a,a dam that loh phei chuan a lo kal sek zel bawk.

“Aih,chulam a ni lo...a pawimawh animai,dar engzatah nge i hman ang?” ka ti a,a ngawi deuh vung vung a,a sumdawnna huang a zauh nasa a,a buai thei viau mai

“Ka va hre mai lo,Dar khat hnulamah nise a pawi em? Mala hruai chhuak ila,lunch ei chhuak ila” a rawn ti a,ka ngaihtuah a,a tha phian ang.Inah chuan tuemaw ber an awm ve reng a,ka chhungte mah nise an vaiin Simon-a hi an la haw tak tak thei tlat lo,hei vang tak hian ka titau rilru tlat bawk.

“Um,a tha ang,mahse tlai lutuk lo se,Mala kan hruai dawn bawk sia,a tha lo ang” ka ti a.

'Ok,Boss...i thu vek ani e..”a nui hawk hawk ri chu ka ngaithla a,Simon-a vanga ka natna te kha engmah a la reh hauh lo,mahse tunah chuan tuar dan ka thiam ve tan tawh a,heng zawng zawng ka tuar chhuah theihna hi ka chhungte leh Sangpuii anih rualin a bul ber leh pawimawh ber chu Ruatdika hi a ni tih ka chiang.Thian kan nih mai piah lamah ka unaupa ang maiin ka ngai,mahse,a chang chuan thian mai lo hian min en niin ka hre thin thung.Mahse tawngtam khat mahin ala sawi hauh lo a,ka ngaihpawimawh sak chiam lo bawk.

Bawihtea muthilh hnuah pawh ka mu meng kar mai,Simon-a thah tumtu chu tu nge ni ta ang? khatiang khawpa mipa sual leh rapthlak kha chuan hmelma a nei tun ang tih hriatawm tak a ni a,amah a inveng thei tawk bawk.Mahse,tuemaw lakah inveng zo lo in Thihna nen inhnaih takah a awm ve ta tlat.

Ruatdika lah khan FIR a theh lut ve sa teh a,hmel hriat a ngah viau chungin engruai a ang thei lo.Simon-a lah chuan a khinna zawng zawng te kha a tawk te in a khing thla zar zar bawk.

Tlansanga'n a sumdawnna Aizawla mi ho a enkawl sak vek a,Simon-a te chhungkua tumah an lo kal ngai lo.Mala ka neih hnuah pawh tuman min la rawn be ta chuang lo,mahse,tunah lem Mala tan a dah leh lawi a!!!,Min laksak a tum anih vaih chuan thih ngamin ka bei ngei ang.Hmeichhe mawl leh lak tlak loh zet kha ka ni tawh lo tih a hmu ngei bawk ang.

Mala muhil hmel chu ka en a,a kut tereuhte chuan a biang a dawm a, a hmui,a pa hmui ang zet chu a ang deuh phiau bawk.Engtikahmah Simon-a hi ka theihnghilh ngai dawn lo,a fapa hian rapthlak zawk hial khawpin a chhun fuh tlat.Apa mizia ang a hlauhawm,sual hlawm erawh anih loh nan a tha thei ang berin ka enkawl ngei ang.

Khawvar dawnah ka muhil ve ta chauh,ka harh leh chuan Mala a lo awm tawh lo.Ka nu in a la a ni ngei ang,ka mit ka nuai chat chat a,Tukverh niin a rawn chhun avangin Room chhung a eng iar bawk.

“Nizan ka mumang chu a...Simon-a ngawt ka lo hmu a” Ka nu tak hi chu aw.Ngaipawimawh duh lo in ka thingpui ka dawt hlak ringawt.Bawihtea erawh Ka pa nen pawnah an awm a,ka thutna atangin a lang thei bawk a,ka thlir vang vang mai.

“Vawiin chu ka chhuak dawn ania” biak bik pawh nei lo in ka ti a,kan monu in min rawn en zawk a,a thil tih lai a tihzawm leh mai,hei pawh hi ka ringhlel zo vek tawh.Ka u nen hian engemaw zep an nei niin ka hre tlat tawh.

“Khawiah maw?” ka nu zawkin a ti a.

“Ruatdika nen tihtur kan nei a..”

“In inzui nasa em mai,hmanni pawn i Pite’in in inkawp leh kawp loh min zawt ania” a lawm vak lo anih hmel.

“Awm lo em mai a, Ruatdika nen kan inkawm nasat zia te chu thil thar a ni miah si lo” ka ti hlak a,Pitei ka ngei lek lek zawk.

“Hriat te chu a hria ang,ani tan chuan i ngeiawm ve bawk ang,Hriati tan a lo na te pawh aniang chu..” ati leh talh,chhan ka tum zeta ka thulh leh ta zawk.Sawifiah chiam a tulna ka hre lem lo e.

Dar khat pelh hretah Ruatdika a lo thlenga,nidang ang bawkin a hmel hmuh a nuam leh viau,Hriati kha la dam se chuan an innei tawh ngei ang..Ka lu ka thing nawk mai..Hriati ka ngaihtuah chhuah apianga ka rilru nuam lo ziah hi engtikah nge a reh ang ka hre lo.Simon-a thil tih te hrereng chunga engmah ka tihsak thei lo khan rilru nuamin min awmtir thei lo.

“Khawiah nge kan ei ang?” kan tlanchhuah hnuah ka ti a.

“Floria ah kan kal dawnnia,ka book vek tawh..”a ti awlsam mai..

“Enteh,Nupui neih lam hi eng nge i ngaihdan?”

“Ka lo ngaihtuah miah lo,min ning deuh tan tihna mi?” a nui a.

“Aih,chutiang lamin ka sawi lo.Mahse,naupangchhia i ni tawh lo a,Hriati vanga hetianga i awm hi amah kha alawm ka ring miah lo” ka ti leh nghat a.

“Thildang sawi teh..eng nge min hmuh i duh chhan?” nelawm vak lo hian ti hluk a,ka inthiam chiah lo.

“Kan thlen hunah,tunah chuan ka bagah a awm daih’ ka ti a,min rawn en zawk a.

“I sawi tur i bagah a awm tihna maw?” a nui zui hawk hawk bawk,ka thaw huai mai, Ruatdika ngai kha a ni leh der tawh tih ka hria.

Kan thut fel veleh ka bag atangin Zorina Envelope min pek ka dah kha ka phawrh a,engmah sawi lo in ka pe a,a la ve mai bawk,a hawnga,a la chhuak a,a hmel uluk takin ka en ran thung.

“Hei hi engtik ami nge?”

“Niminah Zorina a lo kal a,min pe a...engtia han tih chi nge ka hre lo a,bakah Mala min laksak a tumna a ni thei ang tih te ka ngaihtuah a” ka ti a,ka thutna sira Mala awm chu ka en a,Naute nawrna bawm nen lam kan keng vek a,a toys nen a buaina tawk a hmu ve viau.

“Simon-a hian a rawn bia che em?” ati leh a, Envelope chhungah a thun lehnghal bawk.

“Be nang,bakah engmah sawi dun tur a awm lo a..Ka hnar mai ang chu ka ti a” ka ti sep a,kan eitur an rawn dah a,he lai hmunah hian tun chauh lo pawh ka kal fo,mahse ka kalpui tam ber chu Simon-a a ni thung.

“Hnar lo la a tha zawk ang,bakah i chunga a awmdan nen pawh khan hei hi chu thilpek ah i ngai thei ang..chuan,he mi hmang hian amah hi kan hmuh phah thei maithei bawk a” a ti a,ngaihtuah muk hmel fe hian a chal a chuar tap bawk.

Simon-a man tir a tumna te kha a thamral tawh emaw ka ti a,a lo la beidawg hauh lo.Man tir thei ta lo mahse mualpho na erawh a pumpelh ta lo anih kha,kha vang tak khan amah Simon-a pawh hmuh tur awm lo in a bo ta hmak reng bawk.

“I eitur kha i ei dawn em?” ka hmai bulah a kut a rawn hmet ri khap a,ka phu nasa kher bawk.

“Oh...ei dawn e,mahse,ka ei chakna a bo leh vek tawh in ka hria” ka ti a,ka nui lui sak bawk.

“I ho em mai,ei nghek zawk rawh,i cher mah mah tep ania” a ti a,a sawi dik.Engtiklai mahin cher tak ka ni ngai lo.Thau lian luah pawh ka ni chuang lo,cher lam aiin thau lam ka hnaih hret zawk thin a,mahse, Simon-a nen kan inthen khan ka rihna ka hloh nasa a,thil ka ei thei hek lo.Khata tang khan Nau ka neih hnu thleng pawn ngai ka awh leh ta rih lo.

“Hmingthan….” ka hming a min ko ri ka hriat rualin ka hawi chhuak a,ka beisei loh lutukin Emily a lo ni a,kan inmelh ta ran mai.

“I dam maw?” a kut a rawn phar chhuak a,hman ami ang tho khan a hmelthat dan a la ngai reng,Simon-a hmei leh a engkim kha…

“Dam alawm,nang zawk?” ka ti ve a.

“Ka tha e,khawnge naute?” a hawi kual a.Mala awmna lamah ka thle zauh ringawt.

A pan hnai a,a thu hniam a,ka thaw dep dep mai.Ka hua nge ka hamhaih ka hre lo zawk.Ani pawh helaiah a awm anih chuan Simon-a pawh a awm hla lo tawp ang,rei tak an inkalsan theih ka ring lo.Kan inneihna pawh zah zo lo in a kawp a,kan inthen phah ta hial reng a,mahse mak tak in a nei leh chuang miah si lo.

“A hmeltha hle mai,engtikniah emaw Naute enna tak tak nei turin In inah ka lo kal thei angem?”

“Oh...nia,i thu thu le” ka ti bah nawk mai.

“Tunlai khawi lamah nge Simon-a hi a awm a?” Ruatdika'n a ti hluk a,a awm ve tih ka hrechhuak leh chiah.Emily lo lang thut hian ka mood a thlak leh vek tawh.

“Ahh….chulam chu i hria ang chu,i zawng ani lawmni?” nelawm na tel miah lo hian a ti fak a,mahse a nui sang tho.

“Zawng lo hlauh,bakah ka zawn ngai lo in Police lamin an zawng alawm” a ti ve thung.Sawi ve mai tur pawh ka hre lo.

“An zawng nasa tawk lo aniang,Shillong a an Inah engtiklai pawn hmuh theih in a awm reng a,aaaa….Police ho chuan an bum che aniang” a tawngkam ngeiawm dan chu pui tak a ni ringawt.

“Khawngaihin kal tawh rawh,helaiah hian kan mamawh lo che ania” Ruatdika tawng leh hmain ka ti dam dap mai.

“Hmingthan…”

“Kal tawh rawh,nang emaw i bialpa pawh..ka mamawh lo che u” ka ti leh a,a hma ai chuan ka aw a chang ta zawk.

“Ok...min ngaidam rawh “ a ti a,a kalsawn chu ka thlir a,a lo kal tirh kha chuan a hmel hmuh a nuama,mahse,a kal meuh chuan phurrit tak phur ang maiin a zuai raih thung.

“Simon-a rawtna kha hnawl ang che” Ruatdika'n a ti hmuk a,ka melh ringawt.

“A hma khan pawm rawh i ti sia…”

“Hnawl rawh ka ti alawm,thil dangah hman tangkai leh che a tum anih kha..Emily pawh a lo lang leh tawh anih chuan ani pawh a awm hla lo ang” a ti a,a sawi sual in ka ring lem lo.

“Ka lo ngaihtuah ang”

“Ngaihtuah angai lo…” ka hma a envelope awm chu a rawn pawt thla a,a pawt thler a,kan thutna piah a Dustbin awmah chuan a va paih a,a chetdan chuan min ti hamhaih lutuk a,chet na chang pawh hre lo in ka en reng ringawt.

“A zo e...a tha em?” rawn thut pahin a ti a,chhan pawh ka chhang lo.Mala a te that a,ka en vat a,ka pawm chhuak a,a bang ve mai bawk.

“Kal tawh ila a tha in ka hria,Tlai lam boruak hi a ngeih vak lo ang” pangngai takin ka ti a.

“Um...nia,kei pawh Dawrah ka let leh angai tho a” ati ve mai,a ding chhuak a,Mala Stroller a la a,keiin Mala ka pawm thung.Hre ngai lo tan chuan chhungkua kan ang viau mahna.

Lift ah kan lut hman lo chiah,a inkhar tur tlem a la kauah chuan hmuh ka nei,Simon-a…

“Ngatinge a?” min rawn nghawk a.Sawi ka tum zeta ka thulh leh.Ka lu ka thing ta ngawt.Ka hmuhsual pawh a ni thei tho.

Inah min dropa,a lo lut zuai a,mahse a kal leh nghal mai,pawi ka ti hauh lo.A chetdan vang khan ka thin a rim ru deuh tlat.Ka phalna pawh ni hauh loin a pawt chhe ngawt a,Original vek a ni lehnghal.Simon-a ni a ka hriat kha a ni tak tak angem? Ni se ka tihna leh ni lo se ka tihna a inzat reng.

Kan chhuah atangin ni thum a liam leh tawh,thil engemaw dik lo thleng tura ka ngaih ruk tlat na pawh a zia ta deuh,ka hlauh angin engmah a thleng ta hek lo.Simon-a ni a ka hmuh pawh kha ka hmusualah ka ngai tawh bawk.Ni se chuan tuemaw tal in a lo haw tih an sawi ngei ang.

“Hmingthan...min lo nghak lawk teh” hmeichhe aw hian a rawn ti a,Sangpuii nen kan inhmu a,Mala ka chhuahsan avangin hmanhmawh zetin haw tumin ka motor dahna lam ka pan a,mahse…

“Eng nge ni ta?” ka hawi let a,Emily bawk..Teivet hian a..

“Oh...eng nge?” ka aw a nem lem lo.

“Biak tlang i har bawk sia,eng lo ania,Simon-a chungchang…” ka ban ka vai a.

“Hriat ka mamawh lem lo e..” ka inher hmak a,min koh leh pawh ngaipawimawh lo in ka kalsan zui nghal daih.

In ka thlen in Mala a lo muhil a,khaw lum upa churh khan min ti chau a,Emily hrep khan ka chauh a belhchhah bawk.Eng chungchangah nge min biak a duh kha? Simon-a a ti tak...Hrep tak hian…

Doorbell a ri a,rei vak loah ka nu leh ka u inbe thawm ka hria a,ka u hian engemaw tal hriat a nei ngei ngei ang.Vawiin hian ka zawh angai.

Dawhkanah ka nu in eisiam tur  a lo dah teuh a,kan Monu in a then a thian mawlh mawlh bawk.

“Ehe….nu eng nge i siam dawn? nge khual lian kan thleng zawk dawn?” ka nui a..

“Um...Simon-an chaw a rawn ei dawn a” ka ding khawng lah mai,ka hresual a ni ngei ang.

“Maw?!”

“Simon-a a lo haw a,Naute en pahin Chaw ei turin ka sawm a” ka u zawkin a rawn ti a,muangchang hian ka inher a,a mitah tak ka en a,min chhaih mai mai hauh lo tih a hmel thutak zetah chuan hai theih a ni lo.

“Mahse,U….engtin?” ka sawi zawh hmain ka banah a rawn chelh a,Inchung panna stepah min pawt chho a.Inchung zawlah min kai chhuak a,kawngkhar a kalh nghal hmak bawk.

“Eng nge maw i hriat le?” ka ti that mai.

“Tamtak...i hriat let fe hi….”

“Zak takin i farnu hi min chhuah tir a,Hmeichhe nep berah min chhuah bawk.chutichung chuan nangin chawei turin i lo sawm vel a….ka thinrim ai chuan ka nuih i ti za zawk” hetiang hian ka u ka la tawngkhum ngai lo.

“Ngawi rawh,nang a natna ai chuan Simon-a natna hi a na zawk” ka ang pham mai...Ka natna kha a lo hmu te awm hle mai,Misual lutuk khan eng natna mah a tuar lo.

“Kha Ramsa tenawm,Sakawr ang maia rilru nei lo khan engmah a tuar lo..

“ ka aw a khur hlawk hlawk mai.

“Tuar e...tuar tak a ni,i natna kha a nep ka ti lo a,Simon-a natna ai chuan a zia zawk ka ti mai ania” dam thlap hian a ti a.

“Eng nge a tuar chu?i sawi loh chuan ka hre hleinem…” ka ti ve thung.

“Ka pa hian Simon-a pa hi a that asin..” ka nui hawk mai...ka nuih chhan erawh ka hre lo,dik tak chuan ka hriatna te an chawl vek a,ka thi niberin ka hre zawk.