CHRISTMAS CHIBAI,BAWIHTE.

Ka kawchhung let but but mai chuan min ti chau a, Control duh mah ila ka theilo a chha ani ber, muhil thei lo in ka let ka let a, ka mit ka chhin apiang in ka Fapa hmel ka hmu nghal zel bawk,tun ah vawt ti em em in Jail chhung ah a mu angem?, nge a thil tih sual engmah hre chhuak chuang lo in kei min huat na nen keimah ang bawk in muhil thei lo in a let kual ve zawk ang?.

               

Ka thu chhuak ta nge nge, ka nupui in nikum ah chhul Cancer vang in min boral san tawh a, kan in lian leh reh ruih mai ah hian kan Fapa neih chhun, luhlul leh min ti buai reng reng a nun hmang nen kan cheng dun a, kan cheng dun ti ila kan in hmu zeuh zeuh ani mah zawk, kar khat ah alo haw aiin alo haw loh tum a tam zawk hial ta ve ang,chuta kar ah alo haw chhun ah pawh kan inbia anih chuan kan in hau ani nghal zel bawk.

Dept pakhat ah Director in ka awm a, kohhran leh khawtlang ah ka inhmang hle bawk, ka nupui ringtu tha em em mai kha kan chhungkaw tan kar tin Zirtawp tlai apiang ah chaw nghei in a tawngtai thin a, vawikhatmah kan fapa tih mawh em em mai hi tawngkam vin a a biak ka hre lo, ani chang ni lo in kei pawh tawngkam vin in min biak ka hre lo a, ka ngaihtuah nasat poh leh engvang in nge kan fapa zawk hi Boral lo a ka nupui zawk a boral ka ti a, Pathian ka mawhchhiat lek lek tum pawh a tam ta.

Ruih hlo engmah ka ti lo a, mahse, zep thu cheng lo, lang lo lamah erawh ka hnathawh hlawh ni lem lo ka lak tum a tam ngiang mai,eiru ah ka in ngai lo a, ka hna in a ken tel ve pakhat ah ka ngai a, mi tu pawn an hna ka chinfel sak avang a Sum min pek in ka phu ve reng ah ka ngai hmak bawk,tun thleng in a dik loh na ka la hre lo, pension tur in kum tam ka mamawh tawh lo,kan inneih atanga kum 10 a liam hnu ah kan fapa hi a piang chauh a, Fa dang pawh kan neih belh leh ta chuang lo, kan beisei tawh loh hnu a lo piang ani a, Duat chi kim in kan duat a, a nu phei chuan a atchilh thawthang ani ber, Mipa Naupang ze zawi leh fel tak ani thin a, a kum a tam ang zel in a mizia a thlak tam tial tial a, kum 20 a tlin meuh chuan In ah aiin pawn lam ah hun a hmang hnem ta zawk, kal chhuak lo tur a nu in mittui nen a ngen pawh in a engahmah a thawk lo a, a kal chhuah a thulh phah chuang lo,

“Bawiha pa, Bawiha hi kawm tam ve deuh la, a nun hi a tui hal niin ka hria asin” ka nupui in a ti a, he thu a sawi hun lai hian riah chhuah a chin tan tirh ani a, kei pawn kawm chiang tur in ka in tiam bawk.

Zan khat a thiante in a a riak ni a a sawi hnu ah tlai chaw ei lai in a rawn haw a, a hmel ah rui hmel a hmuh theih a, zu rim erawh a nam lo.

“Bawiha, rawn ei ve nghal la aw” a nu in alo ti sawk sawk a, a thle bak a, a hmeltha tak thin kha alo cher ta deuh, a dang bai bawk.

“Aih, ka ei peih lo” a ti buh niaih a, ka ngaihdan a ni ta hauh lo,

“Lalthanpui, i duh leh duh loh i nu khan a zawt lo che, rawn ei nghal rawh” ka tum ai a aw ki sang in ka ti a, kan awmpui nula in min melh zak zak chu ka mit sir in ka hmu bawk a, mahse, kan hnen a rei tak awm tawh ani a, kan chhungkaw khawsak dan engkim a hre bawk a, a lak ah kan chhungkaw zia thup a ngai lo.

“Ka ei peih lo” a la ti ta fo,

“ I peih emaw peih lo emaw rawn ei rawh, he in chhung ah hian ka thu a awm duh lo chu awm lo mai rawh u, ka chawm seilen, ka fapa i nih hi” ka ti leh hmuk a. 

Min en lo in hnuailam a bih ngar a, rawn ei tum ang pawn a awm chuang lo,ka thin a thawk ta phut mai,ka tho a, mahse, ka Nupui mit meng a mangan na chiang tak a lang chuan ka thin thawk thut chu a ti reh leh ti tih a, han thinrim loh leh ngawt chu ka tlawmngai ru tlat lawi bawk.

“I Room ah chho nghal rawh, kei pawh ka lo chho ang” a hma aia nelawm in ka ti a, mahse, ka tawngkam a bung viau tho mai.

Tui lo zet in ka ei zawm a, ka nupui leh kan nula an ngawi ran mai a, an tawng ngam lo pawh ani mahna, ka ei kham ve leh ka fapa room ka pan nghal a,alo in hawng hiau bawk, ka lut tlang nghal a, tumah an lo awm lo, a Room hi Bath Room a awm nghal avangin Bath Room ah a awm anih tih ka hrethiam mai a, Khum ah ka thu a, a room chhung ka melh kual a, engkim a fel fai thlap mai, a naupan lai atangin engkim mai uluk tak a dah chi ani a, amah pawh a in uluk a, a thawmhnaw pawh felfai tak a rem loh a duh ngai lo,kan neih chhun ani a, kan sum neih in a tlin bawk a a duh a sawi apiang chu pek loh kan neih ka hre lo hial, a nu hian a ti lutuk ni in ka hre fo a, mahse, ka khap duh lem lo, kan neih in a tlin tho tho a, eng ang pawn pawisa lo hmang tam deuh mah se pawi tih na ka nei lo,he ti khawp a kan enkawl chung hian sual kawng a zawh ta mauh mai hi ka hrethiam lo hul hual, kei in engmah ruih hlo lam ka ti ngai lo a, khawtlang ah pawh mi zah kai ka ni ve a, a ruk tak chuan fel ka in ti hliah hliah, hei vang tak hian ka fapa hi sual tur ah ka lo ngai ngai lo.

A rawn chhuak a, a sam a huh chap a,a hma ai kha chuan a harh fim hmel ta deuh,min ep zawng in Computer table bul a chair ah chuan a thu thla hnak a, tunlai thangthar dang te ang bawk in a zawi ngawih ngawih ti ila ka sawi dik ber awm e.

“Bawiha, tun lai hi i awmdan avangin i nu a lungngai hle ania, kan lak ah lawm loh na i nei em?” zaidam thei ang ber in ka ti a, a kut tin a sik niap niap a, min en lo in a kut tin ah thil hmuhnawm a awm emaw tih mai tur in a kut a en ngar mai.

“Min chhang la, i pa ka ni a, i mamawh tih sak loh che ka nei a nih chuan sawi hreh reng reng suh” ka ti leh a.Muangchang in a rawn hawi chhuak a, ka mit ah tak min en a.

“Pa, engmah ka mamawh lo, Ka nu pawh lo lungngai tawh suh se” ati sap a, a hmel ngui raih mai chu ka en thin a, a nuapan lai atang a ze zawi chi anih avang in thil danglam lutuk ah ka ngai lem lo.

“Tha tak in awm la, College i zo tawh a, tun ah chuan nangman ei zawn na kawng ah i kalna tur i thlan angai tawh a,mahse, i thawk lo anih pawh in nang chawmna khawp che hi chu ka thawkchhuak ve a, pawi ka ti lo, ka duh ber zawk chu In ah awm la, i nu ngaihtuah la, fel tak in awm hram hram rawh” ka ti leh a, a kun leh lap a,

“ ka lo tum ang” ati leh sap a, engmah sawi tawh lo in ka chhuahsan a, ka fa pa ani a, reitak sual kawng a zawh ka ring lo ve tawp, a tan a nu a tawngtai reng a, Pathian hian kan fapa hi a bo hlen tir phal ka ring eih lo.

Mahse, kan pa fa kan inbiak atang a thla khat a liam leh meuh chuan a sual sim a hneh in a zual zawk tih alang leh ta nge nge,kan nupa in Sunday zan inkhawm tur in kan chhuak tawh a, kan thleng tep tih ah ka Phone a ri a, kan kawmchhakpa alo ni a, mak ti deuh in ka pick up a, ka thu hriat chuan min ti a lo chauh thung.

“Pu Sawm, Thanpuia te hi an in tibuai chiam mai a, rawn let leh mai ta che u” a rawn ti a, Mizo pa ve ngeng ngawng tak mai ani a, a nih na tak min hrilh hauh lo ang tih ka chiang.

“Awle, kan lo let ang” ka ti a, ka dah rual in ka nupui hnen ah thil awmdan ka hrilh a, a hmel dang lawp lawp ah chuan a rilru natzia alang chiang em em bawk.

In kan thlen chuan kan kawt ah mi an lo wm laih laih a, Bawiha chu rui tih hriat em em mai hian pawr fe fe in a tawng lawng lawng bawk, ava mak ta em, hetiang nungchang nei tur hian kan zir tir hauh si lo.

“Eng thil nge ni?” ka ti a, ka aw an hriat rual in an rawn hawi thap mai,Bawiha pawh a rawn hawi ve nghal a, a hnar a thi a, mahse, ngaipawimawh hmel a pu lo, ka nupui rum hak ka hriat rual in ka chhungril a zah na in lumlet vel chu thu nun tum in ka thaw ve hawk tho mai.

A pan hnai sawk sawk a, a shawl sin lai in a va hruk sak a, mahse, rang zet in alo vai kiang lawp thung,

“Hei, ka pa, mi hausa alo thleng e, in Pawisa ka ruk kha chu a let in a rul ang” Lalthanpuia tawng ri chuan ahma a ka zah na ai a nasa zawk in zah na min thlen leh ani ber.

“Tu emaw khan in buaina hi min hrilh fiah teh u”ka ti leh a, 

“Mi pawisa ka ru, chuan, i hausa tho a, a pung awm in i pe ang chu ka ti” amah bawk in min rawn chhang leh a, thenkhat an nui hak bawk.

“Nang kha lo tawng suh, in chhung ah lut rawh” ka ti hmuk a, mi fa te chu ni se ka hlap pawp tawh ngei ang, mahse, mi fa ni lo in ka fa ani a, chuti mai a kut thlak ngawt ka thei lo.

A lut hreh teh nang in a nu in a kai lut lui a, a pawisa ruk na te ka bia a, mi pangngai tak chhungkua an lo ni a, Police em pun ngai lo in ka chingfel thei ta bawk, mahse, keimah ka in chingfel tel lo, ka chhungril a sa hal a, mualpho ka in ti a, khawtlang a ka zahawmna, mi in min chung en na, kohhran a ka rawng bawlna, alo lang zut zut mai, in chhung ah ka lut a, Living room sofa ah alo mu a, a nu in alo thut chilh ran bawk,ka Bible ken ka thehthla thak a, ka thawm a hriat loh ka ring lo, mahse, min hlau emaw, thut chhuah tum awm pawn a awm eih lo,chung zawng zawng te chuan ka thinrim na a ti so sang zual deuh deuh mai.

“Lalthanpui, tho rawh, min va ti mualpho em em ve, zah pawh i zak em em lawm ni” ka ti khur khur a, thu lo in ka tei kual sek a, ka nupui erawh engmah sawi lo in a thu ngawi ran a, Bawiha lak atang in a mit a la sawn eih lo.

Ka sawi i hria em?”ka ti leh tuar a, muangchang in min rawn en a, chiang kel kawl in min melh a,

“Ka hua che” a thusawi tawi te chuan a den in min deng dawt mai, a fel theih nan eng nge tih loh ka neih?, amah ngaihsak lo in mi fa ka va ngaihsak ngai hek lo,mi neih ang a neih loh hlau in a mamawh ai a tam ka pe ani lawm ni?

“Sawi leh teh” ka ti nghut a, a bul ka thleng phei der tawh, min la en ran a,a thu chhuak tur chu a nu in alo pui a.

“Ka hua che” a hma aiin a sawi ring ta lo,mahse, ka tan chuan ring tak ani tho.

Ka beng chawrh a, chu mi rual deuh thaw chuan ka nupui a te thawt bawk, mahse, ka la duh tawk lo,ka beng leh sawk a, a hmai dang lap mai ah chuan ka kut thla chiang tak in a lang kalh bawk,

“Bawiha pa, duhtawk teh” khur hlak hlak chung hian ka nupui in a ti a, chu chuan tlem in min ti tim ta deuh.

“Duh tawk reng reng suh, i duh leh min that law law rawh, i fa pa a ka lo piang hi ka zak zawk” ka sawi zawh tir thei lo, ka thinrim in khua ka hmu tawh lo, ka duhtawk a ka khawih zawk meuh chuan a hmel hmuh tlak a lawi a awm tawh lo, thisen in a bual khat vek ani ber, mahse, vawikhatmah min tih let tum awm in a awm eih lo, ka khawih ang ang in a dawh ngat ngat ringawt, chhuatah a let bal a, ka fapa ani a, ka khawngaih lo anilo, siam that ka duh anih chuan hetiang hian ka tih angai, ahma atang in lo ti tawh ila tha tur ania, ka lo khawih har mah mah ani.

Kan in chhung chu hremhmun pa te ah kan thlak ani ta ber, Bawiha lah ka khawihna a hmai a pem leh hliam pawh a dam fel hma in a leng chhuak leh nghal a, alo haw khat tial tial a, a nu in a zawng a, a thian te a bia a, mahse, kei erawh in ka ngaihsak duh lo tlat thung, kohhran leh khawtlang a ka tih tur engmah ka thulh eih lo,ka fapa sual na mai mai in min ti zak lo a, min ti tim ta hek lo,ngaiah ka nei pawh ani mahna, mahse, vanneihthlak ka ti dawn nge vanduaithlak pawh ka hre chiah lo, a sual teh chung hian vawikhatmah Police man a la tawk lo.

In a rawn haw khat tial tial a, alo haw chhun pawh ka awm loh lai ani deuh zel, min lo haw viau tak tak chu ani phawt ang, ka fa pa ani a, ka haw hauh lo a, mahse, tha tak a biak a, zaidawh tak a awm ka tum lo, tlawm ah ka la tlat thung,a nu nen chuan an in be fo tih ka hria, a nu in ka bul ah a sawi tum in “a duh duh in tlan rawh se, a nin hun ah alo haw mai ang, fa pa sual zawng zawng tur ka ni lo” tiin ka chhang a, khata tang khan anu pawn a chanchin min hrilh ngai ta lo, zan ka mu ka harh hian ka nupui alo awm lo fo, a awm loh hmasak ber chuan mangang ru deuh tak in ka zawng a, mahse, Bawiha Room ah tap chung a a tawngtai lai ka va hmu a, a vawihnihna ah pawh chuti tho, kum a vei meuh chuan anu tawngtai pawh ngai ah ka nei leh ta, dik tak chuan ka tawngtai sak ve ngei a, mahse, ka rilru zawng zawng in ka tawngtai em ka hre lo, min ti mualpho a, ka zahawmna min tih chhiat sak a, ka hmangaih lo ni lo in eng nge maw chang chuan THI law law se tih tum ka nei tih ka zep lo.

Ka nupui a dam lo a, Cancer ani tih kan hriat hnu ah erawh alo haw a, chhuak miah lo in kar khat ngawt mai in ah a nu bul ah a tawlh a, a nu lah a hlim em em bawk, kei erawh chuan a tul chin bak ah ti ti pui tur tak ngail pawn ka be ngai lo, Drug addict ani a, a nih na hi ka hua a, dawhkan khat a chaw ei ho pawh a ruk tak chuan ka duh meuh lo, tih lan erawh ka ti lang lo.

Rei pawh kan en kawl hma in ka nupui a boral a, kha thihna avang khan kei ka keh chhia a, ka lungawi lo, a nu thihna hi ka fapa vang ani, a mah vang in rilru hah reng reng in a nun a hmang a, mut a hmu tha lo a, thil a ei mumal hek lo, kha khan a taksa hmuh theih khawp in ati tla rawk rawk a,a rilru in a fapa chiah a ngaihtuah a, a nun a tawi phah ka ti lo thei lo, engvang in nge Ka fapa zawk thi lo a ka nupui zawk a thih mai?, he zawh na hian tun thleng in min la ti buai a, ka fapa ka hmuh apiang in ka thinrimna alo tho thar leh ziah a, alo haw khat em em chung in alo haw chhun ah pawh tawngkam tha chu sawi loh tawngkam chhia pawn ka be meuh lo, ka hau a, ka hnawt chhuak awl lo bawk.

Nimin mai khan alo haw a, ka office ban hnu lawk ah alo lut ve a, nidang ang lo tak in a rui hauh lo bawk,ka be lo a, min be hek lo, christmas thlen nan kar hnih chiah in min dang tawh a, kum dang ang chu ni se ka nupui in kan veng chhung a mi harsa zawk te tan thilpek pek tum in a buai leh ang a, kei in phur em em in ka pui bawk ang,mahse, tunah chuan chutiang engmah a awm ta lo, a tello a christmaska vawi hnih hman na tur ni mahse ka rilru leh ngaihtuahna erawh chuan a thih ni kha nimin ang maiin ala hrechiag a, ka tuar nat dan ala ngai reng bawk.

“Ka be lawk thei che em?” ka fapa inthlahrung tak a ding chu ka melh a, pa fa kan ni a min biak theih leh theih loh min dil angaih loh tehreng nen, mahse, ka huat na lo zual zel hian ka fa pa ka hmangaihna kha a hliah vek tawh a , a ni pawh kei ang tho rilru a pu ang tih ka chiang, a nu boral hma atang a min haw tawh ani a, a nu Boral hnu phei hi chuan pa fa ni lo in hmelma kan ni daih tawh.

“Sawi rawh” ka Lehkhabu chhiar ka en san a, a ngawi deuh vang vang a.

“Ih, Pawisa min lo pe teh” ati zawi sat mai, ka phone atang in ka hawisawn a, amah ka en a,mahse, min en lo in Tv lam a en daih thung, a ruih awm reng reng ka hre lo, kar khat aia tam alo haw tawh lo a, pawisa a nei tawh lo ani ngei ang, khawi ami in nge a ruih reng hi ka hrethiam lo zawk, a nu kha chuan pawisa a pe thin tih ka hria, kei hi chuan ka pe ngai lo hul hual, min dil ngai hek lo, dil en ah min en lo hrim hrim zawk in ka hria.

“Eng lei na tur nge?” ka ti hluk a.

“Ka mamawh” teh tawp a,

“I mamawh na ka zawt che a lawm mawle, eng zat nge i duh ?” ka ti leh a.

“Sing nga ka duh a, mahse, tun ah pawisa lak chhuak a harsat vang lai ani sia, sing li pawh a pawi lo” a zak lo ka ti lutuk a, ka melh reng mai, sawrkar lai pui in pawisa an thlak kual avang in pawisa lak chhuah a harsa ngei a, mahse, hmelhriat ka nei tha a, eng tin tin emaw mamawh zualpui chu ka la thei zel a, in ring reng reng a nun hmang thang ka nih avangin mamawh dawn leh dawn loh pawh ngaihtuah lem lo in kar tin ka lak chhuah theih hun apiang ah ka la ziah thin a,nuaih khat ka lak hnu ah ka duh tawk a, eng nge maw palh pawh thleng se ka buai loh nan kawl ka duh a, tun a min dil hi a chanve thawk ani a, Bank ah chuan ka ngauh tehmeuh mai, mahse, a mamawh na a sawi anih loh chuan pek ka tum eih lo.

“Eng tur nge?” ka ti hlur a, ka zaidamna in a tlin lo tep tawh.

“Min pe tawp mai rawh, ka mamawhna ka hrilh thei rih lo che” ati leh a.

“Nang a ruih na tur leh nawm chenna tur in hna ka thawk lo,i mamawh na pawh i sawi thei lo anih chuan pek i duh lo tih na ani mai” ka thawh san ta daih,

“Pa, khawngaih tak in, min ring lo tih ka hria, mahse, tun ah ka mamawh em ani” kum eng zat nge ‘pa’ ti a min koh loh pawh ka hre ta lo,kum thum lai ani tawh maithei.mahse, chutiang thil mai mai in ka rilru a ti nem lo, min ko lo eng ang mahse mi in ka fapa ani tih an hre vek, a kal na apiang ah min ti mualpho tel zel tho.

A hnu rei vak lo ah khawtlang thil pawimawh ah min rawn ko a, ka insiam sawk sawk a, vak harh ila ka lungleng pawh a ziawm ka ring a, ka chhuah dawn ah Bawiha erawh Tv en in a thu a, a naupan lai ang mai khan thuawih hmel tak in a en dauh dauh bawk.

Zai rei tak thleng kan thukhawm a, in ka thlen leh meuh chuanBawiha Bike alo awm leh tawh lo,B.A a zawh hlim a ka leisak ani a, amah a sual viau hnu pawh hian a Bike a uluk erawh a thulh chuang lo, kan nula in Tv alo la en a,

“Khawnge a kal leh tak?” ka ti a, ka chhuah hnu lawk ah mi in an rawn call a, hmahmawh deuh in a chhuak tih min hrilh a,thil dang ka beisei chuang lo, a ruih na tur a pan ah ka ngai mai.

Room ka lut erawh ka mengphawk nasa ngang mai, ka khum a hnawk nuaih a, chhuat ah cabinet a ka thil dah a tla darh phung a, ka Pawisa dah na Safe a in kar hawng huau bawk.Ka pan hnai a, ka bih vat a, ka rin ang chiah,cheng za nga clip pakhat a awm lo, tun tum chu a ti em em ta, ka in ngaihtuah fim hman lo, tih tur pakhat chiah ka hria, Jail ah awm rawh se.

Police ten an va man lai hian a thianpa te In ah alo awm mek a,min rawn ko a, ka phei nghal a, mak tak in engmah alo la rui chuang lo,tan pawh tang buai lo in alo in pe thlap mai,min rawn en a,

“Ka pa, Christmas leh kumthar chibai aw, ka lo haw leh hun ah chuan nakum alo ni tawh dawn sia” a ti a, a nui var var bawk,engtinmah ka chhang lo.A pa ber in engmah ka tih duh miau loh avangin Jail ah na dah lut a, kal pawh ka kal eih lo.

Sual in min ti buai em em mah se Jail ah em a awm tak ah chuan ka ngaihtuah lo thei lo, nuam sa tak a khawsa thin, a nawmsak luat avanga sual ani ka ti lo thei lo,ka ngaithei lo em em thin a, mahse, ka fapa, ka thisen a a hrin ani tho, a nu kha la dam ni se engtin nge a ngaih ang?, a at phah thei hial ang, kei pawh khan eng vang in nge ka pek mai loh?,ka thu chhuak a, ka fapa hmel, dang diau mai, inthlahrung dek reng mai khan ka mitthla a luah a, eng vang a khawngaih em em nge ka nih ka hre lo.

“Pu sawm, hei thu pawimawh rawn hrilh tur che ka nei a” ka Phone ka lak rual in khawtlang ven himna lam a kan thawhpui, Pu Ruata’n a rawn ti nghal mawlh mawlh a,sana ka en a, dar 2 a kawk va tawh, ka lo muhil sek hman alo ni a,engthil tak nge buaina awm leh ta, ka fapa a awm lo a, ani chungchang anilo phawt.

“Aw, eng nge ni ta?” ka ti a, 

“ Thanpuia a boral tih min rawn hrilh a, in In ka rawn pan mek a, lo mangang lutuk lo la” a rawn ti leh a, ka khawng vek ani ber, ka tawng dawn a, ka tawng chhuak zo reng reng lo,a kal dawn khan na nei hmel a pu si lo, a mah hi a damdawi khawih avangi n a dang diau a, kha erawh thil thar ani si lo.

Mi an rawn pungkhawm a, kan chhungte veng dang ami a lo thleng tak tak bawk,tihtur ber ka hre lo a, tih loh tur pawh ka hre chuanglo, Bawiha, khum a mu zar mai chu ka en a, ka manganna mai ka lo tih thin, thi se ka lawm zawk hial na tur kha, a thih tak tak meuh chuan ka a mai dawn in ka hre leh lawi si, hahdam te chu khawi lamah, ka Nupui thi kha ka tuar tehmeuh mai, mahse, Bawiha thih na hian a let in min khawih na zawk.

Engkim mai mumang ang ruai ani, in ti pa chang tak in ka tap lo a, lungngai hmel ka pu hek lo, ka thinlung chhung erawh keh chhia tih hian a sawi fiah zo lo,a Boral atang in ni 5 a liam tawh, naktuk tuk leh mai hi Christmas ani der tawh bawk, Police ka man tir zan khan Christmas chibaimin buk anih kha, alo he tih dawn vang hi alo ni ngei ang.

Door Bell ri ah ka inthing harh a, tun ang hun ah tu nge lo leng tur awm pawh ka hre lo, kawngkhar ka pan a, ka nau fa nu in zan in ah min rawn riah pui a tum a,ao thleng der tawh ani ngei ang, ka hawng a, mahse, Hmeichhe tleirawl hmel fel tak mai hi alo ni a, a hnung ah Nu pakhat, pawr fap mai hi ading bawk, ka hmuh hnu ani tih ka hria, mahse, ka hmuh na ka hre chhuak zo lo thung.

“Lo lut rawh u”ka ti a, an rawn in zui lut a, en reng reng pawh in an khawsak a nuam zawk zawk lo tih a lang thei thei vek mai,thut na ka kawhhmuh a, ti dek in an thu dun a, an lo len chhan an sawi hma in ka zawt a, kan awmpui nula a haw tawh avangin a tul fe lo ah chuan thingpui lum sak ka tum lo.

“Masangi ka nia, hei hi ka nu, chuan, ka u hi i fapa Thanpuia thian tha ber ani bawk a” a chawl dat a, ka chil ka lem khawlh mai, a sawi takah chuan ka ngaihtuah chhuak a, Police ka man tir dawn zan pawh khan he mi te In ah hian anih kha ka va hmuh ni.

“Chuan engtin zel nge?” ka ti a.

“Ka u leh u Thanpuia kha school kal lai atang a inkawm, inthlah ta miah lo an ni a, College an kal dun leh bawk a, amah pawh i hria ang, In ah alo kal fo mai,mahse, U Thanpuia kha khawvel lamah a kal palh ta hlauh a, ka u khan a zilh fo thin a, mahse, a nui mai zel a, zan khat an leng chhuak kha U Thanpuia Bike atangin ka u kha a tla palh a, a zeng zui ta bawk a, a kal pahnih a chhe bawk a, in lo hriat tawh ang in u Thanpuia nen khan vanneihthlak lutuk in an lo in mil leh zel a, ani khan a pe ta a...” ka ban ka vai a, ka thaw hlei thei lo, chutiang engmah ka hre ve lo,ka khur hlawk hlawk mai,nghet lutuk in thutthleng ban ka hmer a,

“Engmah ka hriat pui hauh lo mai..” ka aw a tham tuak mai,a mengphar awk a, a nu zawk pawh chu mak ti hmel deuh in a ang phiau bawk.

“Ka pu, in remtihna thlap ah kan lo ngai asin, kan kal na tur senso zawng zawng amah khan min tum sak vek bawk a, chuan,innu Boral khan a tuar lutuk a, amah a in dem a, a ruih thin erawh a sim ta hmak thung,a khua a sik a, a dam tha lo fo mai, kan in ah a awm chawt a, ka u a kawm hlim a, mahse, a ngai thin che a, a khat tawk in alo haw fo kha, a rilru chhungril ipik chhan kha ka hre lo, mahse, a Hmangaih em em che tih ka hria,ih, i sum eiruk tamzia an sawi avang in a sawi tu te nen an insual phah ngun lutuk,chuan,vanduaithlak deuh in ka nu hi a Chhul ah Bawk alo awm a, paih angai a,mahse, pawisa kan nei si lo,civil ah min tihsak hmanhmawh thei lo a, private pan angai a, rawn dil che a tum a,kan zak chung chung a rawn kal a, i pe ang tih a sawi a, a rawn la ta reng a, kan lawm rual in kan zak ka tih kha, mahse, kan rin loh dan in Police kan hmu ta zawk a, chuan, heti hi alo ni zui ta mai a” a insut zui hraih mai, kei pawh eng ka ang chuang lo, ka mittui vang in ka khawhmuh a phe vek.

Vawiin hi Christmas ni tak ani a, Inkhawm ban ve leh thlanmual ka pan ding nghal a,Thanmual a thlan leh thlan in kar a step awm ah muang changin ka kal thla a, ngaihtuah mumal ka nei lo, ka inleng te thusawi avang khan ka mittui ala hul thei lo a, misual ka nih zia ka inhre chiang em em bawk,khawvel sualna, ruih theih thil l engmah ka tih loh avang leh kohhran leh khawtlang a ka inhman avang khan mifel ber emaw ka lo inti thin a, ka fapa kha misual ber hmuh in ka hmu bawk, mahse, kha mi sual kha ka tan chuan mi thianghlim alo ni, kei hi misual zawk ka lo ni.

Mit del khan ka fapa mit var kha kawng kawhhmuh ka lo tum a, ka sum eiruk zozai avang khan anun alo i pik a, sawi ngam si lo in ruihtheihthil ah a tlan a, kei in ngaithei lo in vawi tam ka lo hnawt chhuak bawk,engtik ah nge ka in chhir na hian min kiansan ang ka hre ngam tawh lo, Pathian hian mi fel te hi khawvel hrehawm a an awmreng phal lo in a hnen a awm tur in a hruai thin a, he thu hi vawitam tak kei ngei pawn ka sawi tawh, mahse, kei misual hrem nan leh ka sual te ka inhmuh chhuah theih nan a ka fapa leh ka nupui, kei aia sual ni a lo hriat te ,Pathian tan a mi thianghlim lo ni zawk, an mahni hmang a min khawng harh hi lawm tur ka ni ,mahse, ka lunglenna te hi zawng khua rei ah ala ziawm chauh ang.

Thlan in tlar zing a tawp ber, thar lam tak mai bul ah chuan ka ding a, Kross inphun ah chuan ti hian a inziak a,

“LALTHANPUIA,KUM- 23

THIH NI- 17.12.2016”

Ka thingthi thla rawp mai, ka insum theih na leh ka intih mi pa na zawng zawng a thlawk bo a, ka mittui a rawn baw hawk hawk a, ka rawl chhuah meuh in ka tap a, patling ka lo ni lo, in ti pa satliah mai ka lo ni, sum at in ka a a, fel intih na leh tha intih na te khan tumah a bum lo, keimah chauh hi, Pathian nen lengdun tak tak nun lo nei ila chuan ka fapa tui hal na kha ka hrethiam ang, ani pawn keimah ah Pathian hmel a hmu bawk ang,mahse, ka fel na te khan Pathian hmel alo hliah vek a, midang dip dal zawng in ka lo piangthar ani e.

Ka duhtawk ka tah hnu ah van lam hawiin ka mu a, chhum var thianghlim em em an leng delh delh a, ka mit ka chhing a,

“ BAWIHTE,van angel te nen kan tan a LAL ISUA lo pian ni hi lo lawm ula, i pa tan hian PATHIAN hnen ah hmun min lo dilsak ve la, ngaihdam min lo dil sak bawk ang che aw,CHRISTMAS CHIBAI BAWIHTE” ka hmui ka phun sep sep a, ka dar ah kut tereuh te in a rawn khawih a, a naupan lai a atih fo thin dan ang chiah khan ka biang ah a rawn fawp a,

“Nang pawh ka pa, CHRISTMAS CHIBAI LE” ka beng bulah a rawn ti hian ka hria a, ka pian tirh atang in,ka hriat theih chin ah hei aia CHRISTMAS hlu hi ka la hmang ngailo, ka fa pa ka chan ngei a, mahse, a Pa hian nun tak ka chhar si alawm le.