ERES BELLA

“ ERES BELLA

Ka hma lam chu hmu miah lo in ka melh reng a, vawiin hian ka Thian tha ber te pahnih  Inneihna kan hmang mek a, hlim ka duh em em a, mahse, mal ka intih na avangin ka hlim lo, ka hlimlohna ka tilang thei chuang hauh silo, an pahnih in ka en tawn a, an hlimzia hai rual loh in a lang a, kan naupanlai atangin kan inkawm tawh a, mahse, chung hun lai chuan pathum nilo in pali kan ni thin a, tunah chuan a kalbo tawh, vawiin hian alo lan thut beisei na nen ka thlir a,ka beisei ang chiah in  alo lang ta reng bawk ,mahse, ka beiseina zawng zawng tibo in ka nun nghawr nghin that in a awm leh a, engkim ti tawp a ka kalsan lai ang chiah khan natna sawithiam theih loh khawp a na in min rawn fan leh a, a bul atangin ka tuar tha leh anga, theinghilh tum in ka bei leh dawn tih ka hre chiang em em bawk.

“Hey, ngatinge a?,hlim tum teh” min rawn nghawk a, min ngaihtuah hmel zet a min melh tu ka thiannu lam ka hawi a, ka nui lui sang bawk,

“Ka hlim alawm, mahse, i tello a engkim ka ti tawh tur hi ka huphurh a, bakah Pasal i nei tawh a kan duh dan dan in kan awm thei tawh dwn silo” ka ti a, a nui hmel a reh riai riai, ka kut a rawn chelh a,

“Oh...Ben-a vang kha anilo tak tak tiraw?” ka nghing deuh lawih mai, a sawi chhuak dawn tih hre mah ila min den dan ala ngai reng, he pa hming leh a chanchin hi engtik ah nge nui chung a ka la ngaihthlak ang tih ka ngaihtuah fo a, kum 10 zet a liam hnu pawh hian ka la theilo tluang ta zel chu anih hi.

“Ni lah lo e, a rei tawh em mai, mahse, a Nupui tur kha a hmeltha ka ti, an inhmeh khawp mai” ka hrawk ah min hnawh a, ka kawchhung ah luak tur ang maiin a intham ut ut bawk.

“Um..nia, mahse, diktak chuan in inchibai lai khan i hmel awmdan a diklo lutuk a, Zampuia phei chu alo hlauthawng a” a ti leh a, ka nuih leh a, ka lu ka thing a,

“Hlauthawng suh se, kum vei nual tawh mahse khatiang tak a lo kawp tawh han hmuh leh thut chu Nervous a awl alawm” ka nui hak hak a, ani pawh a ngaihthalo hmel te awm tawh lo in a nui ve a, min rawn kuah a, tunah chuan ka hlawhtling ta rih, mahse, tunge bum ka tum chiah?,Mazawmi leh Zampuia te ka bum thei anih pawh in kei chu ka inbum tel hauh lo tih ka chiang.

 Mazawmi te Hotel a kan thlah zawh veleh In ah min dah nghal a, Ka nu alo la meng a, midang an mu tawh thung, ka hah leh hah loh min lo zawt luam a, ka tha tih ka hrilh a, ka chhungte pawh hian Ben-a ka hmu dawn tih an hre lawk vek a, ka awmdan tur an lo ngaituah lawk lo thei biklo tih ka hria,ka chhungte hian ka tuarna min hriatpui chiang em em bawk, ka mu meng kar a, ka mut a chhuaklo, ka tah a chhuak chuang bawk heklo,ka ruak vek ti ila a dik ber ang.

“Naupang te u, hei hi Ben-a ania, lo kawm ang che u..” Ka ni, Ka pa te unau zing a te ber in Zampuia leh Mazawmi te nen kan Inchung a kan inkawm laiin a rawn ti a, Mipa naupang ria thel thawl, keini aia kum 5 vel a upa zawk tur,lungawilo hmel deuh a ding kak ta mai chu ka en leh a,

Ben-a beng bulah a kun a, eng nge maw a hrilh ru a, a then sak a, Ka ni kalsawn tur chu ka en a, engvangin hetiang Naupang nelawm lo lutuk kawm tur in min tih ka hrelo,a Tuition pek thar ber a sawi kha anih ka ring ve ringawt,kum 7 ka ni tawh a, ka kum phulo in ka fing a, thil ka hrethiam chak em em bawk, Mazawmi nen hian ka hriattheih tirh atangin kan inkawm tawh a, kan inbul chiah ah an awm a, Zampuia hi chu Mazawmi te Inhnuaiah an Insak vangin an lo awm a, kum khat vel kan inkawm ve tawh, kei aiin Mazawmi a ngaina zawk a, ka luhlul a, ka thuhnuaia ka dah theih loh ka kawm duhlo a, ka tap ngai mang mang lo bawk a, ka U nen kan kar a hla a, min duat sua ti ila a di ber ang, mahse, a hun lai khan hetiang engmah ka ngaihtuah thleng pha lo, ka awmdan kha dik berah ka ngai ve tawp.

Ben-a lo lan hnu ah ka awmdan a danglam ta dawrh, kei aiin a luhlul zawk a, kan vaiin a thuhnuaiah kan kun vek, hnial chang ka neih avangin kan insual tum a awm bawk a, tap lo mah ila ka hneh ngai loh avangin a rei hnu ah chuan kei aiin thu a nei zawk tih ka pawm thiam ta hram, High School kan kal  tan kum in ani chuan a chhuahsan ve chiah thung, Tleirawl kan nih hnu ah an chhungkaw khawsak turu zia ka hrethiam ta chauh, a Pa pa kha Mizo zingah sumdawng hmasa ani a, tun thlengin an eizawnna pawh sumdawnna ani ta zel, Nau hmeichhia pakhat a nei a, mahse ka ngaina lo a, kan zingah a rawn awm ve ngai meuh lo, Ben-a nu leh pa in an sumdawnna zawng zawng an enkawl a, Benn-a Ni ten pasal an nei zo vek tawh bawk nen an chhungkua chauh in an awm a, awmpui an nei nual a, ka ni in kan In a a rawn hruai khan kan vengah an awmna alo la reilo a, kan In piah Building lianpui Compound zau tak nei leh inhung kual pup mai kha an mahni ta alo ni a, an In an sa zo tawh a, an rawn insawn hlim hlawt alo ni a,kan puitlin hnu a ka hriat leh dan in an awmna hmasa, a Pi leh Pu In kha a Pa in a Ni pakhat, tlem a Harsa ve deuh a pe tih ka hre leh chauh.

Pawlsawm ka Pass kan lawm tum in min Hmangaih tih min hrilh a, atthlak zet in ka lo nuih chiam pek a, a zah avang a hmai sen tawn tawn chungin min kalsan a, mahse, ka inngaihtuah harh thut a, Inhnuai Panna step a thlen thlak hma in a hnunglam atangin ka va kuah bet a,

“Ih...Ben, ka hmangaih ve loh vang che a nui ka ni miah lo, mak ka ti lutuk a, kan la naupang bawk si “ a hnungzang hlai hlap ah ka hmai phum chungin ka ti a, a ding khawng lah a, a Taksa insangmar tawlh tawlh pawh kha ka hrethei hial anih kha, ka kut min phelhsak a, a rawn inher a, amah en turin min kuai dak a , a vawikhatnan ka Hmuiah min Kiss ta vang vang a, ka chhanglet thiamlo, ka dawh mawl tawp.

“Kum 18 ka ni tawh a, nangpawh kum i tling tep tawh, kum i  tlin veleh innei ang” heizawng hi a sawi a, chhan let dan tur ka hriat loh avangin ka kuah ringawt anih kha...

Ka thuchhuak ta nge nge, ka muhil dawn teuh lo, tunah chuan kha tih lai a tleirawl a, ngaihtuah neilo kha ka ni tawhlo, Ben-a pawh a puitling tawh,

“Min kalsan theilo ang, ka Hmangaih che ka tih kha” Taxi chhungah ka thu a, ruah a sur buan buan a Ben-a erawh pawn ah a ding a, a huh zawr vek tawh,Motor darthlalang a rawn chum a, ka hawnsak duh loh avagin mangang lutuk in a tlankual chiam anih kha,

“Mate...hawng teh, mawh...i kal theilo, Insawifiah na tur i ngah lutuk, engmah ka hrethiam lo ania” ka thutna lam kawngkhar a rawn beng leh a, ka Mittui a far zung zung a, kalsan ka duh hleinem, mahse, kal lo theilo in a Nu in min siam alawm.

“Ka pu, khawngaih in kal rawh” tap chungin Taxi Driver hnenah ka ti a, Motor a tinung a, Ben-a ka en ngam loh avangin Seat hnung ah hmai hup chungin ka let tawp ringawt, Driver kha tunge anih ka hrelo, ka zah zo lo a, ka tap chhuak ta nge nge, engmah a sawilo a, ka tahchhan min zawt heklo.

Vawiin khan Ben-a nen kan inthen hnu ah a vawikhatnan kan inhmu leh ta chiah, mahse, ani chuan a kut lehlam ah inhualna zungbun bun tu hmeichhe hmeltha leh nalh em em kai chungin min chibai anih kha...Ka na lo ka tih chuan Dawt ka sawi chiang bal, ka na...Ni e, ka Na lutuk mah mah.

Dar nga ah khum ka thawhsan ta nge nge, chhinkhat te mah ka chhing lo,ka mit a kham urh bawk, Zampuia te In lamah phei leh ka ngaihdawn avangin ka Inbual hmasa a, Ka nu rawn thawh ve meuh chuan eirawng ka lo bawl zo hman tep tawh,

“Ekhai...i va han tho hma awm ve” chawhmeh bel a hawng kual dan dan a,

“Zampuia te In ah phei leh ka ngai dawn sia, ka hmanhmawh alawm” ka ti liam puat, Zampuia te hi tunah chuan kan veng bul chiah veng dangah an mahni In ah an insawn tawh a,Mazawmi te  nen kan la inthenawm ta zel, kan vengah hausa  pawl milo mahila mihlun kan ni thung,

“Nimin khan Ben-a ka hmu a, min chibai a, a Nupui tur kha a hmeltha hle mai” Thingpui dawt khalh pah in a ti a, nghet zet in Pot Holder ka hum a, keipawn ka hmu tih khum vak ka chak zek zek mai,

“Nia, kan inhmu alawm, kan inhmu lo rei tawh bawk a, a lang upa ve tawh khawp mai” ngaihsam hmel thei ang ber in ka ti liam puat a,

“A upa ve tawh ang chu, nangpawh kum 27 lai i ni ve tawh alawm” a nui hak hak a, min tihhlim a tum tih ka hailo.

Ka U a hna avangin a Nupui leh fapa nen hmundangah an awm a, a changin ka nu in a awmpui thin bawk, kan chhungte hla deuh Nula pakhat, College kal lai kan awm pui a, Ka pa lah hi pa tawngduh tak alo ni lo bawk nen ka Ni te an lo leng anih loh chuan kan thawm ana lo tLang ngang mai,tunah chuan ka nih chak ber ni turin ka tum ka hlen tawh a, Doctor thiam leh lar tak nilo mah ila nuam ka tihna ber hna anih avangin ka tum ka hlawhtling ka tilo theilo.

Mazawmi nen kan inhmuh veleh kan ri chul a, kan tih dan than ani ve hrim hrim, Zampuia nen hian tleirawl chhuah atang a inkawp tawh annih avangin Mo thar zah tet tet pawh kha a awm hran lo,

“Room ah ka thawmhnaw ho remfel ang” tih pah in min en a, ka bu nghat a, Zampuia Room ni thin, tun a an Nupa Room lo ni ta  lam kan pan dun a, mahse, Zampuia leh Ben-a  lo thu dun ka hmuh chuan ka pen a ti buai nghal nak  mai,

“Ben...i kal lehnghal dawn mi?” Mazawmi ka huat ber tum ani hial ang, a awm tih a hriat chuan kal tur a min sawm lo tur ani asin,

“Aw, kal lehnghal ang, kal hma in rawn hmuh leh lawk che u ka duh a” a nui suk a, hman ah kha chuan a malchungah ka thu thin a, tunah chuan banphak lek ah awm mah ila mel sangtam dan ah kan awm niin ka hre thung, a tleirawl lai atangin mipa tawng bawrh bawrh chi anilo hrim hrim a, tunah phei chuan a hmelah nelawmna pakhatmah hmuh tur a awm tawh lo.

“I fel reng reng e, tunge i Nupui hual kha a hming ?, ka hre leh tawh lo” ka tui in lai ka hak a, ka nun ah hrehawm ka tih lai hun tam tak a awm, khatiang hun ah khan tunah hian ka awm leh ta chiah, Mazawmi a rawn ding vat a, ka hnungah a rawn chum a, hak satliah nilo in ka hnar a na em em bawk,ka mitsir in Ben-a thu ngawi ngur chu ka hmu a, thi mah ila pawi ati reng reng lo tih tun a a awmdanah a chiang reng.

“I ziaawm em?” ka hnung ah na vak lo in a chum leh a, ka lu ka bu ringawt, ka tho a, ka mittui tla ka kawrban in ka hru a,

“Mazawm, tlaiah ka lo kal kawi leh mai ang, vawiin hian tihtur thulh theih miah loh ka neih kha i la hria em?” ka dawtsawi chu hrethiam se ti lutuk in ka melh a, a nur nang a, mahse, a hmelah a hrethiam tih ka hria,

“Pawi nang, chaw ilo ei nghal anga, ilo kal kawi a i fel reng reng” Zampuia zawk in alo ti a, Ben-a erawh ala ngawi ta reng,

“Naah..ka fel sa alawm, ka kal ang aw, Ben...tluang deuh in le” ka ban ka vai zauh a, a bu nghut a, min en lo in a Phone a bih leh daih bawk.

Pawn ka thlen meuh chuan ka khurh nasat zia ka hre chhuak chauh,Kan inthen hnu khan ka zirna avangin ka awmbo nghal a, Ben-a pawh a awmbo ve tho, kan haw hun a in ang ngailo a, kan inhmu ngailo, a zirna a zawh hnu ah pawh an sumdawnna ti lian turin a bei leh nghal a, an neihsa pawh an damchhung daih tur ani tawh a, mahse, ala duhtawk lo tih alang reng mai,kan inthen veleh ka number ka thlak a, min biak pawh dan tur a zawng nasa tih ka hria, ka number pawh alo nei leh mai, min rawn bia a, amah ani tih ka hriat veleh ka off a, ka sim ka paih a, adang ka hmang leh a, amah vang khan Sim Card pali lai ka paih a, kum a vei meuh chuan ani pawn min biak a tum ngai talo, a Msg engmah ah ka duh zual lai erawh ka save a, ka chhiar nawn fo thin a, ka nun a ka thil neih hlut zingah ka chhiar tello theilo.

Aizawl ah a awm ngai meuhlo, Delhi ah Flat nuam leh lian zet an nei a, tah chuan a khawsa thin tih pawh ka hre leh zel a, Aizawl alo haw chang pawh in an In ah awm lo in a Ni te bulah an In hlui lamah hlir a awm thin a, chuvangin kan inhmu ngailo.

Nileng in Hna ah kal lo in In ah ka awm ta vel mai mai, ka mu a, a Msg ka hai let a, ka chhiar chhiar a, ka mu leh a, kan inthen hnu khan kumkhat tawp kha mu leh mal neilo in ka khawsa kual vel a, thinrimna avangin ka lehkhazir ah ka rilru zawng zawng ka pe a,hlawhtlinna erawh ka chang ta, ka nun peng pakhat ka hlauh ta tih mailoh kha chu diklohna ka neilo.

Chunglam ka melh a, ka tihtur ka hria, heng Msg zawng zawng leh amah ka hriat chhuahna tur zawng zawng hi ka paih angai, Laptop ka hawng a, mail min rawn thawn ho ka dahthat te ka en leh a, DELETE...ka tin vang vang, ka thei hlawllo...nilo, ka thei tur ani, ka mit ka chhing a, ka  kut ka nghat ta...keypad a ri khap a...DONE... a zo ta, mahse....ka rilru chhungril luah tu hi ka Delete tel thei chuang silo...Ben..I Nu khan kalbo tur in min ti lo se chuan tunah hian i Nupui ka ni ang tiraw?, ka Mittui a rawn baw zawih a, tah ka duhlo, mahse, ka tap lo thei ngawt silo.

Tlai ah Zampuia te In ah ka phei leh a, ka awmdan an hriatthiam ka duh loh avangin hlim awm tak in ka tawng a, ka nui nasa viau bawk, Mazawmi nen a hma ang in kan inkawmthei tawh dawnlo tih ka hria a, thiandang ka neih loh avangin ka mal tlat angai tawh ang, ka thawhpuite nen kan inpawh viau chungin tumah thian tih em tur a kawm ka neilo thung,

“Ben-a khan an Inneih na tur kha Delhi ah a ti a, kal ve ka duh em mai” A pasal ngheng ar ar pah in a ti a, ka lungphu lo rang ve hman ziah chuan min ti thinrim hlur mai,

“Tehdaih a...kal ve a hlau aniang” nui chungin ka ti a, mahse, an nui ve miah lo,

“Zan in chu a hun lai ni in ka hria, Ben-a nen in inthen chhan hi kan la hre miahlo, Hon...nang i hria em?” Mazawmi a en a, mahse, a lu a thing nar nar thung,

“A ho em mai, a rei tawh a, ka hre tawh lo” palzam tum in ka ti liam puat a,

“Pui...sawi rawh, i thawl hawk zawk ang” Mazawmi zawk in a ti leh ta tlat, Zohlimpuii ka ni a, mi tupawn Hlimpui tih hi min koh dan ani a, mahse, Mazawmi leh Zampuia hi chuan ‘Apui”tiin min ko thin a, Ben-a pawh khan midang hriat lai chuan min ko ve tho, mahse, kan pahnih a kan awm lai chuan ‘Mate” tih hlir in min ko thung,” ka Naute i nih hi a ti fo thin reng a”, khatiang a min koh khan nuam ka ti thin a, min duatna tilang vut ngailo mahse min Hmangaih tih ka hriat avangin ka lawm tawk em em animai.

‘K duh tawhlo a, chuzawng chu” ka ti awlsam et, min melh dun reng a, an hmel landan in ang lo lutuk chuan ka nuih a ti za em em bawk,

“Dawheh..” Mazawm’in a ti hlak a, ka nuih a za takzet, ka nui duh silo,

“Ani alawm, chuzawng chu nimai, ka duhtawh loh miau chuan tihngaihna awm lo” ka nui a, ka tho nghal a, ka bag ka khai a,

“Ka va haw ange, min mamawh rei vak lo ang, in lo in control rei tawh sia” ka nui leh a, anni pahnih pawh insum zo lo in an nui dun ve leh ta nge nge.

Pawn theng min thlah a, Zampuia a lut lehnghal mai, Mazawmi erawh  lut lehnghal lo in Scooty ka dahna theng min zui a,

“I sawi duh dawnlo tih ka hria,ka zawt lui dawn lo che, mahse, hetiang em em a Ben-an a hua che hi ka hrethiam theilo” a ti sap a,

“Min hua se ka duh alawm, Nupui a nei anga, min huatna te chu a la reh mai ang” ka ti duh lek,lakzam ka tum lui ngar ngar ani ber,

“Ani ngawt lo, i chanchin a sawipui theih loh hulhual hi mak ka ti, mahse,  ka buaina anilo, chuan...Zampuia Ni Fapa khan a duh viau che anih chu” a nui sang a, tu nge anih pawh ka hre nek lo e.

“A that chu, ka single rei ta bawk a, midang han chhuahpui pawh a chakawm tawh alawm” ka ti a, ka fiamthu anih rual in ka ti tak tak bawk. Ka nun khawhar lutuk hi siamtha turin Mipa dang nen a nun hman ka mamawh maithei asin, kum 10 aliam tawh a, a Msg leh a sulhnu ka hmuh theih ang ang ka paih bo zo tawh bawk a, ka hriatrengna ami thaibo tur hian Mipa dang ka mamawh ani mahna.

Chapter – 11

Zampuia te Inneih atangin thla a liam leh tawh, ka rin lawk ang ngeiin Mazawmi nen kan inhmu khat ta viau, kan veng a in ang tawh lo a, ka hna kal pah a ka tlawh kawi leh amah alo kal zeuh zeuh chuah in kan inhmu ani ta mai,Zampuia Ni fapa Valpuia nen kan inhmuh hmasak ber niin an Nupa in an rawn kalpui a, ka hmuh phat atangin ka Hmangaih thei ngai dawnlo tih ka hria, mahse, ka Mipa ngainat chi a ni tih a mizia ah ka hrethiam nghal mai thung a,, chutih rual erawh chuan Ben-a min hriat chhuah tirtu ani leh ta tho, Ben-a nen an mizia a in ang em em a, a tawng tam lo a, mahse Ben-a ang a hmel nelawm lo leh tak run mai kha chu anilo, alian Lutuk lo a, mahse, Mizo ah chuan a te pawl anilo chiang,kan inthen hnu khan Mipa hrim hrim hi ka hnaih leh ta lo, ka phutawk chu ka hmu ve tehmeuh mai, mahse, keimah a Ben-a sulhnu kai hi a reh loh chuan tumah hnaih ka duh lo law law zawk, Nilo...atthlak zet in Ben-a nen engtik emaw ah kan inkawp leh ka beisei ru a, a Nu min tihdan te kha la hrechhuak in min la rawn zawn ka beisei vang ani tih ka chhungril hian a hrechiang lutuk, mahse, khang beiseina kha a Nupui hual ka hmuh rual khan a thlawkbo ve zo ta anih kha.

“I la buai em?” Ka U in min rawn bia a,

“Aih, eng nge nita?” ka ti a, haw tum in Hospital ka chhuahsan dawn mek lai ani a,

“Naktuk ah kan lo chhuk dawn a, ka Nu te ka be thei miah lo a, chuan, thildang ah biak duhna che ka nei bawk a” a ti leh a,pawn ka thleng a, Scooty dahna ka pan a, kalpah in ka bag ka zen a, chahbi ka zawng a, ka haihawt luat avangin Scooty ah ka kalsan tum a awm fo bawk,

“Um, ka lo hrilh ang, Bimbim-a lo hruai ngei ngei ang che” ka ti a, a fapa hi ka ngaina takzet a, ani pawn min ngaina a, an lo haw chuan ka bulah a riak ngei ngei bawk.

“Aw, kan chhungin kan lo haw ang, Sangtei hi a damtha theilo riau a” a ti leh a, ka chahbi ka hmuzo leh pek tawhlo,

“U...In ka thlen veleh ka lo bia ang che, tunah ka haw dawn mek a, ka..” ka sawi zo hman lo, tu emaw ni ka su chawrh a, ka sut zawk a nghing lawih a, keimah zawk ka thal tawp thung..ka Phone ka thlauh a,a Battery a chhuak nawlh mai.

“I kalna kawng en ta che” a kut rawn pharchhuah chu ka ban a, mahse, a hmel ka hmuh rual in rang lutuk in ka kut ka la let lehnghal a, nelawmna tel miah lo a min en tu Ben-a nen kan inmelh ta ran mai.

“Sorry” tih chauh in ka chhang a, kan bul hnai a awm te chuan min melh hrek hrek a, tuman min rawn kaihthawh tum hmel an pu lo, ka dem hran lo, ka bul mai ah Palian pui min kaihthawh tum a kut phar chhuak sa a awm miau alawm le,

“Ka kut hi vuan rawh” a ti sup a, a rawn kun hniam a,ka haider hmak thung, thawh tum in ka inbengkang a, ka kawng ruh a na zawk mai, mahse, ka ngaipawimawh lo, ka Phone ka chhar a, a battery ka chhar leh a, ani erawh a ding sawn a, min puih tum hmel a pu tawh eih lo,

“Ka tihpalh ka tih kha..” ka ti hlak a, a kekawr ipte a zen a, Kamiz, pawl tak leh kekawr grey colour nen a induang zuih a, nalh lo ti a sawi tu chu a mit a del ani hial ang,

“Ka hria, i kalna en tawh la a tha ang” a ti nghut a, a inher hmuk a, a kalsawn zui nghal daih chu ka en a, a bawp sei zet chuan  a pen pawk pawk a, a hma ai khan a pian alo nalh leh zual ta zawk, alang lian sawt in ka hre bawk,khang kum chhung zawng khan kan inhmu lo a, engvangin nge tun hnaiah ka hmuh leh tak mai??, ka nun atangin ka kalbo tir a, ka thlah tak tak erawh chu kum 10 liam hnu ah chuah, mahse, ka thlah  tak tak chiah em ka hre biklo.

Ka Phone ka vuah khawm a, vanneihthlak tak in a chhelo hlauh bawk,In ka thlen hnu ah ka U ka be leh a, a Nupui, U Sangtei awmdan vel ah a rilru a nawm loh vang a min rawn bia alo ni a,In Control a tum hle nang in  a hlauthawn hmel riau in ka hria a, Mipa luhlul tak ani a, a aw a thlaphanna lang chuan min ti hlauthawng tel ve tho mai.

Zanah mut pah in Lehkhabu ka chah thar ka chhiar a, mahse, ka tui thei ngang lo, Ben-a hmel ringawt ka mitthla ah ka hmu zel a, beidawng in ka dah ta thlawt, chunglam ka melh vang vang a, Aizawl ah a awm anih chuan kan inhmuh fo angai dawn tih te ka ngaihtuah a, ka tuar thei chiah angem ka hre biklo, ka thah fel tawh emaw ka tih apiangin ka chhungril ana vawng vawng zel tho si a, a Nu khan kalsan tur in min ti a, tun hnu a ka ngaihtuah let leh hian Ben-a tan nilo in keimah min duh loh vang niin ka hre tawh, ahma kha chuan kan inkawmngeih em em a, min duhlo tih min hrilh kha a harsa anih ka ring a, engvang a min duhlo em em nge anih ang le?

“Hlimpui, tunah hian Ben-a nen hian In innei theilo tih chu nangpawn i hre chiang ang, kan fapa neihchhun ani a, naupang lutuk a nupui neih kan remti dawnlo, tunah hian a zirna zawm turin Delhi  ah kan dah dawn a,engkim kan tifel vek tawh,nangmah vangin a Naupanlai atangin kan duhna hmun ah School pawh kan kaltir theilo a, tunah chuan a duh emaw duhlo emaw ka tir lui dawn tho tho tawh, ngaihtuah la nangpawn i hrethiam ang” a ti a, a mitmeng lian lui khan min melh kuau bawk,ka en let ngam lo, Ben-a nen kan inkawm tirh atangin a Nu leh a Nau hi ka nel tak tak theilo, a Pa erawh ka nel em em thung,

“Kal rawhse , engmah ka sawilo ang” ka ti sep a, kum 20 pawh ka la tlinglo a, hnial vak ngaihna ka hrelo hrim hrim,

“Nia, a kal dawn alawm, mahse, nang nen pawh inkawp ka phal tawh rih lo,alo haw hunah in duh leh inla inkawp leh dawnnia,” a ti leh a,ka kawchhung ah na deuh zawk a awm a, mahse ka tilang lo, ka kut ka bag hnuaiah ka hum ruh a,

“Mahse, chutiang ngawt chuan amah pawn..” ka sawi zawh hma in min rawn tawngkhalh leh a,

“Ka hria, chuvang tak in nangman i kalsan angai, i kalsan duh dawn lo anih chuan a hming a kan thil neih kan dah zawng zawng hi a nau  hming in kan dah ang, i Hmangaih anih chuan chutiang chu i thlentir duh ka ringlo” a ti leh hmawk hmawk a, a hmel nui sawng mai chu ka melh zawk a, hnuai lam ka melh leh vat a, ka Mittui a far zauh bawk, ka hru hul thuai a,

“Ka lo tum ang” ka tawng ri chang chang,

“Ka ring ang che, Ben-a chu ka lo hrilhfiah mai ang ,nangman kalsan phawt mai rawh” min ti leh a, Ni e, ka kalsan ta ngei alawm, hetiang em em a huat hlawh tur hian ka kalsan lo, Na tuar ve miahlo ang maiin min hua a, ani aia ka tawrhna tam zia chu kei hian ka hrechiang, ani chuan Hmeichhe dang ban a vuan leh tawh a, kum sawm zet a liam hnu pawh hian Mipa dang taksa reng reng ka la tawk leh lo, chumai nilo keimah ah Mipa dang ka lalut leh eih lo hrim hrim.

Ka Phone nghawr dar dar in min tiharh zawk a, ka lo muhil sek ani ngei ang, ka ban thuai a, Valpuia alo ni a, vawiin khan kan inbe mumal lo, ka chhan hma in bang a Sana intar ka melh zauh a, dar 11 a kawk va tawh, a pawimawh awm hle mai ka ti rilru a,

“Hello” mutchhuak aw thup hram hram in ka ti a,

“I muhil tawh em?” a ti a, a inthlahrun hmel lutuk chu ka khawngaih letling zawk,

“Ka harh leh chiah..” ka nui a ,a nui ve hawk bawk,

“A tlai tawh tho nangin, Mazawmi kha hei a pum a na thut a, Aizawl Hospital ah kan awm mek a, tuman an la hrilh lo che in ka hria, Zampuia hi a biak tlak mang siloh a” a ti a, ka thu chhuak hlawl mai, Nimin khan anu te In ah lo kal a tum tih min hrilh a, mahse, alo kal lo aniang, kan inhmu lo a, kan inbe miah lo bawk,

“Maw??!!!,tunah eng tin nge a awm?” ka tha a khur titih a,

“Hahdam rawh, a ziawm leh tawh, rawn hrilh loh ngawt che tha ka ti lo a” a ti leh a, ka chhungril hian a tha lo tih min hrilh tlat a, ka thlan fim a bawl tawk tawk mai, Unau hmeichhia ka nei lo a, Mazawmi hi ka thiantha ber anih mai bakah   ka Laizawn ang chiah a ka en ani a, anat hian ka na tel ve tlat zel,

“Ka lo kal ang” min chhan let hma in ka Phone ka Off a, a thawnhmaw hak lai chungah Poncho ka bat a, Uggs Boot ka bun leh sawk sawk a, Thlasik la na lutuk  lo mahse, November thla tawp lam anih tawh avangin Zan rei leh zinglamah chuan a vawt ve viau tawh.

Ka pa in inkhel alo la en a, ka kalna tur ka hrilh a, kalpui ka ngaih leh ngaihloh min zawt a, ka lu ka thing mai, a awmdan azir in ka tlaivar hial pawh angai maithei a, kalpui ka duh lemlo, Scooty ka la chhuak a, thli vawt var in ka hmai a chhem chuan min ti harh sawng sawng mai, engvang a hlauthawng em em nge ka nih ka hrelo, Nau a pai awm ka hrelo a, a rai anih chuan min hrilh loh ka ringlo,a hma in Pum lam ah harsatna a neih ka hre hek lo.

Ka thlen veleh Valpuia ka hmu nghal a, min lo nghak animaithei,

“Eng nge a an zel?” tih pah in a chhunglam ka pan nghal a, Duty in min lo tiding a,

“A tha chuanglo, a pangngai, ICU ah ala awm a..” a ti halh a,

Duty hnen ah luh dil ka tum lai tak in ka hnuglam atangin ka hmingin min rawn ko a,

“Hlimpui, helamah te eng nge i rawn tih?” ka hawilet thuai a, kan zirlai a kan zirpui thin,Rosanga alo ni a,  kan zirna hmun ah khan Mizo kan tam lo a, thian ti a sawi tur nilo mahse kan inhre tha tho thung,

“Ka thiannu ICU ah a awm a, ka lo thleng chiah, mahse, hei ka lut thei dawnlo anih hmel” tih pah in Duty  pa lam ah ka thle zauh a, a nui var var a, Duty hnen ah chuan Dotor tho ka nih thu leh Emergency case anih avagnin min luhtir turin a hrilh a, Duty pa lah chuan nuam lo a ti hmel em em bawk, ka dem hauh lo, Mizoram zimte ah hian Doctor chi hrang hrang kan thahnem ve tawh a, a thiam filawr lemlo leh junior tak tak te hre kim thlap thlap turin ka beisei lo hulhual.

Lawmthu ka hrilh a, ICU awmna lamah kan inzui thla a, tu ber nge ka thiannu tih te min zawt a, a Night zan alo ni a, ka thlamuang huai mai, la senior biklo mahse hna a uluk a, kan zirlai atang in fimkhur tak a engkim ti chi ani tih ka hria a, Doctor senior satliah  aiin ka ring mah zawk.

Zampuia te ho an lo awmthap a, an hmel hmuh a nuam lo vel vek, min hmuh veleh min rawn pan a, a kut ka vawnsak a,

“Engtin nge a awmchiah?” ka ti a, a natdan tlangpui a sawi a, an mut hnu lawk ah a pum na lutuk avagin Zampuia a kaitho a, a zia leh mai dawn emaw a tih laiin a biak mumal theih ta lo mai niin a sawi a, ka rilru ah zawhna lo lut a awm,

“A rai em?” midang hriat loh in ka ti a, mahse a lu a thing a, a hmai a hup zui vang vang bawk,

“A chikawng lam an en tawh em?” Rosanga ka en a, a nui a,

“Tunah chuan en ngaihna ala awmlo, amah hi harh deuh phawt se test tur ho kan test thei ang,tunah chuan a thaw pawh a pangngai tan a, hlauthawng suh” tih pah in ka hnung ah a rawn vuan zauh a, a sawi dik tih ka hria, midang daih damlo ni nise tumah zawt lo in ka zawhna kha a chhan na ka hria, mahse, tunah chuan midang nilo in Mazwmi ani miau a, ka khur chhe lo chuah,Duty ho awmna Room ah kal turin min sawm a, mahse, ka hnial a, lawmthu ka hrilh a, ani awmlo se chuan luh pawh ka lut thei kher lo ang.

Zinglamah a rawn harh ta hram, Rosang’an zau tak in min lo mikhual ti ila a dik ber ang, ICU ah ka lut a, a mit alo chhing a, a muhil emaw ka ti zawk, a khum bulah ka thu a, ka thawm hria in a rawn meng a,

“I harh maw?” ka ti a, ka nuih lui a,peih leh peih lo in a then sak a,

“Zampuia kan ko ang, pawn ah a awm a” ka ti a, ka tho nghal a.

 Test  tur kan ti thei ta hlauh,ka mut a chhuak em em bawk nen, ka vai deuh ruai mai,Result en tir tur in Doctor nghah leh  angai a, ka hna ah ka chawl ngawt thei silo,hreh zet in ka hawsan a, Valpuia erawh ala awm thung,ka inbual sawk sawk a, ka mu chak takzet, mahse, ka mu anih chuan ka harh leh mai mai dawn silo, phur lo zet in hna kal turin ka chhuak a,nilengin Mazawmi ngaihven lehna hun pawh ka nei ta lo.

Tlai ah haw pah in Aizawl Hospital ah ka kal leh a, tuman a test result min hrilh loh avagin ka thinrim ru teuh bawk,ICU ah ka chhukthla a,mahse tumah ka hmulo, Zampuia ka call a, a pick theilo,Valpuia zawk ka call leh a ,ani pawn a pick thei chuanglo, ka hlauthawn na avangin ka lungphu a rang zaih zaih mai,

“Apui...” ka phu nasa lutuk, hetiang hian mipakhat chauh in min ko thin,muangchangin ka inher a,

“BEN” ka ti sep a,

Tu zawk mah tawng lo in  kan inmelh  ran mai.

“Nangni pahnih chu inlo inhmu maw?” Step atangin Zampui’an a rawn ti a, ka harh deuh zawk in ka hria,Ben-a pawh  khan  reilote chhung khan a awmdan a hloh ve niin ka hre bawk,

“Aw, kan inhmu chiah, khawnge an awm vek a?” ka danglam tih tilang lo thei ang ber in ka ti zangkhai vah mai, keipawn mak ka inti hial,

“A chhungah khan ala awm reng alawm, mahse, naktukah kan insawn chhuak leh dawn a,tunah chuan ngaihtuahawm ani tawhlo” a ti zung zung a, Ben-a kalsawn chu ka mitsir in ka melh a, Step bul bang, Darthlang chhah chi a siam chu a pan a, a ding a, a kekawr ipte zen chugin pawnlam a thlir daih bawk,

“Aw, anih chu mawle, tuman result kha min hrilh leh ta silo a” ka ti leh a,

“Nidawn tak, a chi kawngah nau a pai a, a pumna khan a ti chau lutuk a asthma alo nei sa bawk nen khan a zo lo a” a ti leh a, ka thawveng hawk, ka rinlawk nimahse a tak a ka hriat takah phei chuan ka thawveng hawk animai,thil lawmawm nilo mahse Natna hi a chhan hriat chuan tihdam dan a awm thin a, hriat lawk loh natna an tuar hian a enkawl dan tur dik kan hriat chhuah meuh chuan kan tlai hman viau thin tlat.

“Chuti anh chuan amah ka hmu kher tawh lo mai ang aw, Rosanga kha a awm tawh in ka ring a, a duty leh dawn a, ka lo bia ang” ka ti a, a bu nghat nghat a, Nizan ka tlaivar avangin mutna hun ka la neilo tih a hrethiam ang, hna ka chawlh theih loh zia pawh min hriatpuitu anni bawk.

Ka kal tur chu Ben-a rawn tawng chuan min ti dingleh chat mai, muangchangin ka inher a,

“Engmaw?” ka ti hmak a, a sawi ka hrelo anilo, sawitur dang ka hriat loh vangin ka sawi mai zawk,

“Ka nu in a hmu duh che a” a ti nawn leh a, thil hlui ka hriatchhuah lehna chuan ka tiril a fan raih raih mai,

“Engthil ah?” Zampuia chu nuamlo tih hmel deuh hian phone a en a,

“Ka hrelo, i hmuh hunah i hre mai ang chu” a ti leh nghut a,

“Ka hrelo mai ang, I nu nen sawi dun tur kan neih awm reng reng ka hrelo” ka ti leh nghat a, ngeiawm zet hian ka nui zui hawk bawk, Kha Ramhuaisual kha hmuh chakna ka neilo, kan In leh an In inkar a hla lo, chumai bakah kan inhmu fuh fo, min be ngailo, Ben-a ka kalsan hnu a ka awmbo ka haw leh zauh thin lai  kha chuan min be luam thin a, mahse, engtik lai atang khan nge min biak ngai tak loh ka hre twh biklo.

“Ok...atha anih chu” a ti hmuk a, ka huaisenna zawng zawng sawmkhawm in a mit ah ka en a, ka chhungril a ka hriat thiam siloh hlauhna avanga khur hlawk hlawk awm chu a hmuh theih loh avangin ka lawm hluah hluah bawk,

“Nia, atha, chuan, i Nupui neih tur kha lo kal ka duh nen i neihna hmun tur a hla deuh hlek a,ka lo kal thei dawn silo a, tunah ka lawmpui che tih ka hrilh mai ang che,i hrethiam ang chu” ka hmui ka petsawi zauh a , ka nui lui sak bawk.

Chapter – 111

Scooty dahna ka thlen hnu ah ka khurh nasat zia ka hre chauh, ka tawnglai khan mit khap miah lo in min en a, min thah mai duh hmel a pu bawk anih kha, engvangin nge min huat em em ka hrethiam theilo,min lo haw thin tehreng pawh nise Hmeichhe dang a nun ah a lalut tawh a, kei chu nunhlui ka ni tawh a, min haw lo in min theinghilh emaw ka awm ve tih hrelo khawp in a nun a hmang tur ani asin.

In ka thlen in ka U te Motor alo awm vang tawh, tlem in ka thawpikna pawh a ziawm ka beisei, ka vahpa hmeltha leh min ngaina em em tu nen a hun hmandun tluk a nuam tih ka nei chuang lo thin miau a, ka scooty thawm a hriat rual in a rawn tlan chhuak ani ngei ang, Step ah a rawn dak dek dek a, Kan inchung hi kawngpui nen a inrual deuh thaw a, Motor dahna turin kan siam a, kan thenawmte Motor dahna nei lo in Manchawi in an rawn dah ve thin bawk a,

“A ni..” a rawn ti lawi rat mai, kan inhmuh khat deuh chuan a lai tlat zel,

“In lo thleng tawh maw?” tih leh pawmkan ka rual a, a hmeltha takzet, a biang chat avanga tai deuh hlar chu ka fawhsak zauh bawk,U Sangtei ka hmuh rual in a damtha lo takzet tih ka hrethei nghal mai a, ka U in a hlauthawng viau kha ka dem hran ta hauh lo, a cher deuh dak a, a mitmeng ah a chau tih a hriat theih hial bawk,

“In dam em?” ka ti chul a, a bu nghauh a, Ka u Room a tangin a rawn chho chiah bawk, U sangtei ka en a,

“Engtin nge i awm chiah le?, In pa lah hi a rawn tap deuh pur a” nui chungin ka ti a, Ka u in min rawn kuah a, kan in upat hleih avangin nau ang pawn min en meuh lo, kei pawn ka U anga en ai chuan ka Pa ang in ka en chang a tam mah zawk,

“Ka khua asik a, bakah ka pum a na deuh reng bawk a” a ti a, a chal ah ka dek a, tunah pawh khawsik sang vak lo a awm tih ka hrethei nghal mai,a pum khawi lai nge na tih ka zawt a, a sawi hmang in a kal lam Problem anih ka ring a, a bulah ka sawi nghal bawk a, mahse, chiang tak erawh chuan ka sawilo,

“Naktuk ah Test ngai ho kan en anga, chuan, kan hre mai ang, lugngailo phawt ang,mahse, tunah khan damdawi engemaw ber i mamawh ania, i khua a sik leh tan der anih kha” ka ti a, Ka nu in Damdawi bawm a rawn la a, ka en kual a, Damdawi sang vak lo pakhat ka la chhuak a, ka eitir nghal a, kan mo mah nise a fel em em a, kan chhungkua ah a intulut tawp a, Ka u an transfer hma pawh khan a chhungte In lam pawh a tlawh ngai meuh lo,In thlak turin Room lam ka pansan a, Bimbim-an min zui zel bawk, an awm chhung chu ka kalna apiangah min zui kual leh dawn tih ka hre kar bawk.

Chaw kan ei laiin Mazawmi chanchin min zawt a, ka hriat ang ang ka hrilh a, an zai theih nghal dawn leh dawn loh chu an la en leh dawn tih ka sawi a, mahse, rei tak nghah chi anilo tih ka hria a, ka rilru a nuam thei chiah chuanglo,

“Vawiin khan Ben-a ka hmu hlawl a” Ka chawei lai ka hak teuh kher mai, engvangin nge tun hnaiah kan hmuh tur a a rawn khawsak sek ka hrethiam lo,Ka nu melh loh hram ka tum a,

“Aizawl ah a awm tawh mi?” ka u in a lo ti thuai a, ngaipawimawh lo hmel zet in ka chawei lai ka ei mawlh mawlh thung,

“Awm tawh dawn atih kha, awmlo thei pawh ani lo ang, a Nu saw a tha lo lutuk a” Ka nu in a ti leh a, chu kher chuan min hawichhuah tir ta nge nge,

“Engtizawngin ?” ka ti sep a, vawiin khan Benn-a khan a nu in min hmu duh tih a sawi ngei tak kha le..

“A thin a cancer a, alo nasa tawh angreng a, a damrei a rinawm loh an ti a” midang sawi a hrechhawng tih hriat zet hian a ti a, ka nuih a za zawk, engvangin nge kan hmuh tur a inlan lui anga ka lo ngaih ngawt?, mawl pawh hi ka mawl zozai teh e.

“A va zialo ve, naktuk zingah va len ve tur anih chu “ ka pa in a tiboh a, kan chhungkua nen hian kan inpawh em em lo, mahse, Ben-a nen kan inzui nasat em avangin biak erawh kan inbe chhe hran lo,Ben- a nen boruak tha lo kan neih zui leh tak hnu phei kha chuan kan inpawh lo lehzual sawt bawk,

“Nia, va kal ve rawh” Ka nu in a ti leh mai a, ani hi chu tawng liam zung zung chi ani ve hrim hrim a, mi tan a ngaihthlak nuam lo leh mi dang chanchin chhe zawng a sawi ka hre ngailo thung.

Valpuia nen reilote kan inbia a, Bimbim-a pawh a zin chau ve deuh ani ang, ka nu malchungah a muhil bam tawh,mut tumin Room ka pan a, ka muhil theilo, ka let ka let a, ka rilru ah thil chi hrang hrang a awm teuh a, mahse engmah mumal in ka ngaihtuah chhuak thei chuanglo, ka tho leh ta nge nge, ka phone  ka la kang a, ka natpui leh anga, ka vei leh ngut ngut dawn tih hre mahila ka ti lo thei silo, Instagram ah ka lut a, vawi engemaw zat na atan Ben-a bawk ka en leh ta nge nge, ka Follow duh hauh lo a, mahse, ka Stalk erawh ka sim thei der silo,a hma kha chuan  a active lem lo a, mahse, tun hnai ah a active ta viau, Photo thar alo awm teuh a, amah leh kha hmeichhia kha, an pahnih photo hlir ani mai, ka mittui rawn luang chu hruk ka tum buai peih lo, he hmeichhia hi a HMANGAIH ngei ang tih ka chiang, Mipa rilru nghet tak ani thin a, mahse, ka kalsan atangin kum a vei teuh tawh a, neih duh hial khawp thinlung a pu anih chuan a HMANGAIH tawk em em ang tih ka chiang.

Engatinge kei hian kalsan tu zawk ni si in ka hriatreng si?,thlah fel tum in amah ka hriat chhuah na tur zawng zawng pawh ka paih vek kha ani si a, Mipa rilru hi a nghet a, vawikhat an hmangaih tawh chu kalsan mahse an theihnghilh ngailo tiin an sawi thin a, mahse, kei hi Mipa nilo in hmeichhia ka ni a, ka kalsan tawh chu Hmangaih mah ila theihnghilh a nun bul tan tha tur ka ni asin, a Mipa zawk pawn a theih lai hian engvangin nge ka theih siloh??!!!

“LALPA ,a tawk tawh em em lo em ni?,ka kalsan kha ka duh vang reng anilo tih i hria, amah ka tihnat avang a ka tawrh letna hi khawngaihin min lak kiansak tawh lul rawh”

 Vawi engzat nge he thu hian PATHIAN ka chhuahchhalh ka hre seng tawh lo,engmah chhanna ka hmuh loh avangin engtik ah emaw chuan ka tan alo let leh dawn aniang tiin beiseina mawlmang  tak nen  ka lo nghak a, a tawp a min hmuhtir hi a na mai anilo, ka kehchhe vek tawh,he zawhna zawt a PATHIAN  ka auh thin lai khan vawikhatmah min siamtu hi ka dem ngailo ,ka theihtawk in ka nun ka uluk a, alo let leh hun ah inchhirna ka neih loh nan Mipa tumah ka kawp heklo,mahse, min chhan letna hi a na ka ti lutuk,tunah chuan a vawikhat nan ka dem ve ta hial mai.

Khawvar dawn ah ka muhil ta chauh, ka muhil ti ila ka tap muhil animah zawk, nun bul tan that ka duh em em a, Mazawmi te Inneih ni a ka hmuh khan ka natna bo tawh emaw ka tih kha alo let leh a, mahse, ka ta ani ngai tawh dawnlo tih ka hriatchian na ni anih avagin a hma a ka natna ai khan a na zawk anih kha, Valpuia hi ka mipa ngainat zawng nilo mahse ani bulah hi chuan ka na ngai in ka ringlo, min turlui lo a, ka awmdan ang ang in min pawm vek niin ka hria, Thian aia thui kal tur a ka inpeih hun a nghak a,ka theihtawp in ka bei anga, ka inpeih veleh ka hrilh mai ang.

Ka bag ka dah a, ka thu hnawk mai, tunkar chhung chu buai tak ka ni, ka hna mai bakah U sangtei buaipui angai a, Mazawmi an zai bawk, Usangtei pawh ka rin ang ngeiin a kal lam problem alo ni a, a natna kan hriat chhuah takah chuan an enkawl nghal a, a ziawm ta viau, Mazawmi pawn vawiin khan damdawiin a chhuahsan a, an In ah ka kal a, In ka thlen hnu ah hian ka chauh zia ka hrechhuak ta chauh.

Ka phone ri in min ti harh a, ka lo muhil hman chu niin, Zampuia alo ni a, ka thu mar zawt mai, Mazawmi a thalo leh ani ngei ang,

“Aw..” Hello pawh ka ti mawi hman lo,

“I thleng tawh em?” a rawn ti a, a aw ah engmah danglamna a awmlo,mahse, ka thlamuang chuanglo,

“Aw, Mazawmi a na leh ami?” ka ti tham chal mai,

“Aih, a tha, thildang daih, englo ania, Ben-a nu hi a na viau aniang, tunah kal nghal ka tum a, ilo kal ve duh ka ring chiahlo a,mahse, ilo kal ve duh tak hlauh in ka ti mawle” a ti a, a nuam a ti chiahlo anih hmel,

“Ka hrelo, kal pawh ni ila min hmu duh in ka ringlo” ka ti sep a, kal ka duhna leh hrehna a inzat reng,vengkhat nimah ila an chanchin ka hre tamlo khawp, an chhungkua hi an mahni hian an tlei em em a, an Hausa bawk nen midang an mamawh vaklo,

“Hmanni khan  khan a Nu in a hmu duh che a tih kha” a rawn ti leh a, nia, a ti ngei alawm, mahse, ka hnial hnu khan vawikhatmah min be duh tih a sawi leh tawhlo, min hmu duh tak tak ni se a sawi leh ngei ngei ang.

“Aaaaa, aw, min lo sawm la” ka ti ta nge nge, ka haw em em thin a, mahse , Damlo na tak, kal mai thei tawh huat reng ai chuan ngaidamtu nih mai a tha zawk ngei ang.

Grace Nursing Home kan thlen chuan khua a thim tawh, vanneihthlak tak in Motor dahna tur alo awl hlauh bawk,ka huphurh ru takzet, ka khup a sai dar dar mai, ngaihdan diklo zet a neih ka hlau a, a Nupui hual alo awm ve chuan rilru nat vang in ka mualpho ka hlau tel bawk,

“I hreh viau tak tak ami?” Zampuia tawng ri ah chuan ka inti huai lui a, nui chungin ka Lu ka thing a,

“Aih , hreh viau vak nang” ka ti ve thei mai bawk a,

“ Hreh duh suh, tunah chuan thian kan lo ni tawh tih chauh ngaihtuah la” tih pah in ka kut a rawn vuan a, ka thlamuang sawt mai.,kan awmdan atir atanga min hriatpuitu anni a, ka natna tur engmah an tilo ang tih ka chiang.

An lo awm deuh laih laih a., an vaiin an hmel hmuh a nuam fahran lo, an rilru a hah hmel hlawm bawk nen tuman min lo biak pawh an tum lo,kei phei chu min beisei lo tawp tih a chiang.Thutna awl ah kan thu ve a, Zampuia Ben-a nau lo chhuak chu Zampuia chuan alo be vat a, a meng sen ram a, a mittui a seng nual tawh tih a hriat theih reng mai,

“ A la ngai reng ati a, rei a daih ka ring tawh lo tawp mai” ka beng bulah a rawn ti su su a, ka bu nghat a, ka rilru awm dan ka hrethiam chiah lo, ka khawngaih em ka hrelo a,mahse, thil pakhat chiang tak in ka hria, Ben-a ka khawngaih a, tun ang hun ah hian a bul ah awm theih ka chak em em bawk,hun kal tawh kha koh kir theih se chuan a Nu in kal tur a min tih lai khan ka kalsan lo tawp ang,engpawh huam in ka chelh lui tlat ang, mahse, a rei tawh, hun in a liampui vek tawh.

“In lo thlen na a rei tawh em?” Ben-a aw ka hriat rual in ka hawi chhuak vat a, a pawr fap mai, engtik atangin nge mut a hmuh tawh loh ang tih pawh ka hrethiam lo, khawiah nge a Nupui hual pawh kha a awm reng reng ni?, tun ang hun ah hian Ben-a bulah,amah hnem turin a awm tur ani asin,ka ngaihtuahna ringawt pawn min ti thinrim ru teuh mai,

“Kan lo thleng deuh chiah, lo thu la” tih pah in a kil lamah a tawlh phei a,kan inkar a ti awl a, a chetdan chu ka ngei kher bawk,

“Coffee ka lak tir a,bakah reilote han vei kual ka duh lawk a, Apui, i lo kal ve lawk dawn mi niang” ka phu nasa lutuk,engvangin nge kei nen kher kher?!, kan bula thu Ben-a Ni chuan min rawn en leh thin a, engmah phei chu a sawi lemlo,

“ Oh, keimah maw?” ham haih zet hian ka ti hu a, ka mawl hmel ngawt ang,

“Um, ka be lawk duh che a” a ti leh sup a, Zampuia ka en a, Nui chungin a bu nghat a, kal mailoh chu tih theih ka neilo,hreh zet in ka dingchhuak taih taih a, a vawh avangin Poncho lianpui ka bat a, Ka Poncho hnuaiah ka kut ka suih tlat bawk.

A kal sawn nghal chu ka zui a, a bawp a sei bawk nen,a pen khat pawh ka pen thum vel zel nimaiin ka hria, ka um deuh dat dat a, ani lah in min nghah pawh a tum chuanglo, mi awmlohna lai kan thlen in a ding a, hmalam a en ngur bawk.,, a sir ah ka ding ve a, han sawi mai tur ka hre hauh lo, kan tleirawl lai kha chu nise min kuah anga, tawng kan inchuh leh anga,a tawp ah ani angawi anga, ka thusawi a ngaithla  leh ngei ang.

“Engvangin nge i lo kal?” a aw a ringlo, mahse, a fiah tha kek kawk hle thung,

“Oh...ka lo kal ve tawp, ngatinge?” ka ti hmak a, a rawn inher a, a hmel hlauhawmzia chu mak tak ani, a chhan ka hre heklo,

“A hma khan a hmu duh che ka ti a, ilo kal duhlo a,mahse, tunah ilo kal leh lawi a, a na tuar i hmu chak ami?, kan chhungkua a na kan tuar hi i hmu chak tih na ani tiraw?” min rawn hnaih nghal ruak mai,.

Ka tawlh hnung dawrh a, mahse, ka tlai hman ta tho,min rawn man bet a, ka darah nghet zet in a rawn vuan a,min thing deuh nawk nawk bawk,

“Chutiang engmah a awmlo, Zampuia’n min rawn sawm a, kan inthian that tawhna avangin ka lo kal mai zawk” nemsawn ka tum a, mahse,min vuan nghet lutuk,a mitmeng hlauhawm zet chu thinrimna avangin a thim khup bawk,

“Ka hrechiang lutuk che,min tihnat kha ilo la duhtawk miah na nge?” amah si chet in min pawt hnai leh sauh a, ka tang ve nasa hle chungin awmzia a awm miahlo,

“Anilo, chutiang engmah a awmlo..” ka sawi zawh hma in a hmui lum thar thar leh chhah deuh tap mai , vawitam ka lo fawh tawh na chuan ka hmui a rawn khar a,ka hamhaih luat avangin ka dawh mawltawp, a thip zawk a, min nemsawn nghal dawrh bawk,

“Tenawm, midang ngaihtuahna neilo, i khawngiahna kan mamawhlo, ka hmuh tur in rawn inlan nawn tawh suh ang che” a inher a, a kal zui nghal nal nal bawk, ka pai deuh nawk a, ka khur sai dar dar chuan min ti zawi a,Bang ka ngheng , in ngaihtuah fim tum in ka mit ka chhing a, ka hmui thip vang vang pawh haider theih anilo.

Zampuia te bul ka thlen leh chuan midang nen an lo titi a, ka awm lo tih pawh a ngaihven vak hmel loh,Ben-a erawh a awmlo thung, min rawn hmuh veleh a tho nghal vut a,

“Kan kal mai dawn mi?” a rawn ti a, ka bu ringawt, ka tawng chaklo, ka hmui Ben-a seh kak lai chu a hmuh ka hlau a,zahzelah Ka Poncho hak  tlang ka pawt chho a,ka hmelah danglamna a lan ka hlau takzet bawk.

Motor kan thlen hma chu a tawng leh ta lo, keilah ka neilo ang hmak ka ni bawk, ka chhungril na ngut ngut chuan min tur a, mahni chauh a awm ka mamawh, In ah pawh nilo ring tak tak a ka au theihna hmun a awm ka mamawh a, ka duh bawk,

“Eng chungchang nge a?” a ti ta nge nge, pawnlam ka en lui tlat a, ka Mittui a hnai em em zui,

“Eng nilo e, a Nupui neih tur vel chungchang mawle” dawt ka sawi a,

“Um, mahse, ava mak ve, i bulah sawi tur a neih pawh ka lo ringlo a, bakah , a nupui neih tur te chu an thulh leh daih sia” a ti ta duah a, muangchangin ka en a,

“Engmaw?” ka ti a, mak ka tih zia tilang lo turin ka insum nasa hle bawk,

“An innei dawn rihlo, a Nu heti anih leh tak si ah chuan an thulh leh a, mahse, kan sawi dun i ti sia” ka hawisawn nghal vat a, ka dawtsawi min man chiang lutuk chu nuam ka ti lo..

Chapter- 4

Chhan mai dan tur hrelo in ka ngawi deuh vang vang a, an lo thulh leh vang ani ngei ang a Nupui tur kha a awm ve loh, mahse, thildang vang a thulh anni lo a, a awm ve tho tur ah ka la ngai fan,

“Sawi e, mahse, chutiang lam in kan sawilo alawm” ka ti a, pawn lam a kan tlan pelh  chu ka thlir a,diktak chuan a hmel ka en ngamlo ani mahzawk,

“Ok, ka hrethiam e” a ti a, min zawt thuilo chu ka lawm ru takzet, a hrethiam ti mahse kan awmdan kha chu tuman min hriatthiampui ngai dawnlo tih ka hria, a chhan chu keimah ber pawh hian ka hrethiam tlat lo.

Kan In ah min dah a., mahse, lut nghal lo in Inchung ah ka ding a, Motor hnung ah ka kal kual a, thla eng in kan piah lam mual a chhun en ut mai chu ka thlir a, Ben-a hmel ka mitthla ah alo lang a, engtin  nge hetiang em em a rilru chhia pu tur ah min ngai theih  ka hre thiam hlawllo, ama tan tha tur zawk vangin ka kalsan a, harsa ka tihzia kha engmah a hre miah silo, ka nawmna tur nilo in ama tan zawk ka kal tih a hre phak hlawllo,chumai pawh nilo in rilru chhe em em mai pu tur ah min la dah zui bawk, Inkawp tur a Pathian ruat hi kan lo ni hlawllo, ani pawh hi midang ang tho ani, Mihausa te hi chuan an zia an thup tak tak theilo, an mahni tan a tangkaina neilo te chu misual leh hnawksak ah an ngai zel mai dawn anih hi, Ben-a hi chu a danglam in a nun pawh a tluang a, midang hriatthiamna a ngah tiin ngaihdan ka lo nei thin a, mahse, tunah chuan khatiang nun kha a thlawk bo tawh, midang ang tho a, mahni induhtawk leh chapo tak tho alo ni e.

Ka Nu in chanchin min lo zawt thuai a, a daihrei an rin loh thu ka hrilh a, ka U te an awm leh tawh loh avangin kan reh leh ta viau, Bimbim-a a awm chuan kan ri chel chul thin a, ka ngai reuh kher bawk.

Ben-a Nu kan tlawh atangin ni 3 aliam tawh,duhlo mahila an chanchin ka ngaihven ru kar a, hmasawn aiin a nitel in a hniam zel tih pawh ka hria a, kal leh duh em em mah ila khatiang tehhrep a hmuhsit tuar tur kha chuan kal nawn leh chakna ka nei lo,anni chhungkaw ho pawh khan Ben-a rilru ang bak kha an pu in ka ring chuanglo a, lawm tak in tuman min lo dawngsawng hlek lo ang.

“ Apui, tunah khan Ben-a nu a chatthla chiah a, kan rawn sawm kual ang che, lo insiam la” Zampuia’n a rawn ti a,

Ben-a hmel ka mitthla ah alo lng uar uar a, ka khawngaih hluah hluah, a Nu a ngaihsan zia ka hria, kan Inkawm tantirh atang khan a Nu leh Pa a ngaihsanzia leh a Hmangaih zia ka hrethiam daih tawh a, Nu changkang leh Hmeltha, khawi hmunah pawh langsar larh zel ani a, ka nu ni zawkse tiin Naupan lai khan ka ngaihtuah ru fo thin reng a, mahse, tunah chuan a kal tawh, a mit ah pawh en ngam lo khawp a min hmusit tu, Nu chak leh hrohrang na, a Fapa hlimna tur atan a engmah tih hreh neilo kha a kalbo tawh,a Fapa hian engtik ah mah a Nu vang a kalsan ka ni tih a hre ngai dawn tawh lo.

Zampuia te lo thlen hnu ah muangchangin ke In kan kal phei a, kan In atangin a hla em em lo bawk a, ke a kal a awlsam zawk hrim hrim, Mi an lo tam hman viau tho, mi langsar chhungkua an lo ni bawk nen, thil mak ani lo tawp, Inchhungah kan inzui lut a, Ruang bul ah thu lo in kitchen lam hnaih ah kan thu a, kum sawm liam hnu a ka kal leh hmasak ber na ani a, inchhung awmdan la danglam lo mah se bang cheina leh Ceilling zawng zawng erawh chu an thlak danglam vek tawh thung, a nalh ti ila a dik ber ang.

Kawngka bul ah Ben-a leh a Patea an ding a, mi lo kal apiang an lo welcome zel a, Ruang bulah A pa leh a nau an thu a, midang ka hriat sa leh hriat lemloh an thu teuh bawk,

“ Khawnge maw Ben-a Nupui tur kha a awm le?” Mazawmi’n a rawn ti sa sa a, ka lu ka thing ringawt, ka rilru a zawhna awm ,ka sawi chhuah ngam loh ani miau a, chhan dan tur dang ka hrelo,

“ Nimin ah hna thil ah Delhi ah a chhuk niawm tak ani, mahse, naktuk ah vui hma in a rawn thlen leh hman an beisei a” Zampuia’n a rawn ti a, ka lo thaw ve huai ringawt, ka ta ni ngai dawn lo mahse midang hmuh ah mawilo in a lan ka la duh chuanglo,huiham...Hmangaihna hi chu alo hahthlak in a lo khirh kual vel em mai.

Chawei sa a kal kan ni bawk a, kan thu deuh ngar ngar a, Dar 2 rik dawn ah haw turin kan chhuak ta chauh, kan inkawp lohna rei tawh mahse kan veng ah hrelo an tlem a, min melh hrek hrek tu ka tawng nual tho mai,

“ In haw dawn ami?” Kan hnung lam atangin Ben-a aw in a rawn ti a, ka Lungphu rang nghal zaih zaih chu an hriat ka hlau kher bawk,

“ Ka’n thlah lawk ang, an pahnih hian haw se, kei chu ka rawn let leh ang” Zampuia’n a ti a,vawikhatmah min melh eih lo,

“Um, in fel hle mai” Mazawmi a en a, za lo zet hian a then suk a, a hmel pawr fap mai ah chuan mut a mamawh zia a lang thei a, Duat ka chak zek zek bawk, ka ngaithuahna avangin ka ner nak a, min be lo a, min en chuanglo bawk a, pawimawhna neilo niin ka inhria a, muangchangin ka inher a, ka kalsan ta zawk a, a Nu boral lai in kei ang a rilru diklo hi a pu ve dawnlo, a nu boral lai lo pawn kei anga rilru kawisawi a pu dawn lo tawp,a chezia engkim ah min haw ngawih ngawih tih alang reng zawk, ka nuihsawh ah a ngai leh ani mahna,mahse, ka dam phawt chuan naktuk pawh ka kal leh ngei ang,Nula tlangval rilru pu a kan inhmangaih hma khan Thian kan lo ni dun tawh a, kan inhmangaihna te kha lo tawp tawh mahse thian kan lo nih tawhna zawk avang khan kal hi ka tihtur ah kei chuan ka ngai lo thei lo.

Ka beisei loh zet in ka mutui ta phian, mumang bo thak in ka mu a, ka thawh veleh eirawng ka bawl nghal a, Ka nu leh Kapa erawh Ben-a te In ah an lo kal daih tawh, chaw kan ei kham hnu lawk ah Mazawmi a rawn thleng phei a, Kan veng chhung anih avangin kei chu Thingpui lumna lamah ka awm ta zawk a, Mi an tam a, indaih a ngai em em bawk nen, Ben-a lam ngaihtuahna hun ka nei lemlo.Inchhung ah midang in Thingpui an chawilut a, Pawnlam ah Nula dang nen kan sem a, pawnlam ngawt pawh sem hahthlak tak ani, vui Prog tan hma in sem zawh vek kan duh bawk nen, mahse, ka lawm zawk, rilru a thil vei ngut ngut ai chuan buaina tur alo awm hian rilru kawmna hun a awmlo a, a hlimwm letling in ka hre zawk.

Vui zawh hnu ah kuang an rawn zawn chhuak a, an kawtzawl ah thla an lakpui a, Ben-a sir a a Nupui hual ding chuan ka mit ala nghal chat bawk, Ben-a nen an inbe zauh zauh a, mahse, huatna tello, rilru dam tak in ka thlir thei ta tlat, tunah chuan Ben-a hnem tur in a bul ah a awm thei ta, Ben-a pawn a rilru natna te, a hahna te zawng zawng a Nupui hual bul ah a hrilh thei tawh ang a, a kut chelh in engtiklai pawn a bulah a Pasal hual tanpui  turin  a awm thei tawh bawk ang, chutih rual in keipawn nun thar bul tan turin ka ke ka pen thei tawh ngei ang, ka thlahfel ta zawng ka tilo, tunah chuan thil beisei sawt lo beisei a ka nun hmang turin ka naupang tawh lo a, ka nunhlui ka ui thin kha ka kalsan a hun ta tih ka hrechiang em em bawk.

Ben-a nu Boral atangin thla khat lai aliam lehtawh, kan thian ho a kan len zan in a Nupui hual nen min lo welcome a, a Pa leh a Nau an awm bawk a, hahdam tak in ka hmachhawn thei ta, ka na lo anilo, mahse, ka na hi vulh len a nun nawmlohna khawp a hmang turin in tihbuai tir ka tum tawhlo,ani pawn min kalsan theih chuan ka kal mai tur ani, Mipa kawp nghal tur ka mamawh anih pawh in ka zawng ve mai ang, mahse, Valpuia erawh ngaihzawnna rilru nen ka kawm thei ngang dawnlo tih ka chiang tawh,

“A Nupui hual kha tu nge a hming kha?” Zampuia kan haw veleh ka zawt leh rih a,

“ Chhanhimi ,amak e, i hre theilo” a ti hluk a, a sawi dik, ka hrethei hlawllo,ti lui te pawh ka ang mah mah zawk,

“An inhmeh ka ti” ka nui hak a, an nupa in phawk zet in min melh a,

“ I rilru a nat ka lo hlau asin, an awmdan engkim kha nangma tan ka lo natpui che a” Mazawmi’n a ti sep a, ka lu ka thing a,

“ Nun bul tan that ka mamawh alawm, chuti anih loh chuan in Faten ka Fate an vel nasa lutuk ang” ka nui leh a, an nupa in an nui ve hawk hawk bawk,min khawngaih a, min lainat tih ka hailo, ka tuar nat zia leh ka fight nasat zia min hriatpuitu te anni a, min lo natpui ve pawh ka dem hauh lo.

“Tun chiah ka zawt leh ang che, engvangin nge i kalsan?” Mazawmi mit ah tak ka en a, ni e, tun hi sawi hun ani tawh alawm, ka sawi anga, a vawikhatna leh a tawpna ani bawk ang chu,

“Ben-a nu in kal turin min ti a,Ben-a ka kalsan loh chuan engmah Ben-a hian achanglo ang ati bawk a, ka la naupang a, ka ngaihtuah a ka hlauthawng bawk, kan zirna kan zawh hunah kan inkawpleh ang tiin min hrilh bawk a, mahse, kum 10 tehmeuh a liam chuan a kut lehlam a a nupui hual kai chungin min chibai ta zawk anih kha...a tawk em?” za lo zet in ka nui lui a, sawi mai tur hrelo in an nupa in min meh reng ringawt,

“Hey..tikhan awm suh u , engkim a tawp vek tawh alawm” ka ban ka phar hliai a,

“LALPA, chu thu chu engvangin nge Ben-a i hrilh mai loh?” Zampuia aw ah min demna a ri tel a, ka thle bak a,

“ A hun lai kha chuan ka theilo, tun hnu hi chuan ka hrilh lo kha mawl  ka inti , amah khan engkim  alo sawifel ang tiin min tiam a, mahse, engtin tak nge a fapa bul ah a sawi erawh amah leh a fapa chauh in an hria ang chu..eee. PATHIAN pawn” ka ti nghat a,

“Tunah hrilh rawh, anih loh chuan keiman ka hrilh ang” ati leh a, ka tho phat mai,ka ngaihdan ani lo,hun kal tawh ka thlahliam mek hi thar thawh leh ka duhlo, amah ah beisei nei ang a nun hman leh pawh ka duh tawh lo,

“ Khawngaih in lo inrawlh suh, ka hrilh chhan che u pawh ka kalsan fel tak vang mai ani, tunah hian tawp rawhse, ka sawi hmasak ber leh a tawpna, nangni pawn khawiahmah in sawi chhuah ka remti lo, a hlimna hi kei a tihchhiat theih nilo mahse a nu aiin min ring dawn chuanglo a, buaina chawhchhuah tum ah min ngaih ka duhlo bur” ka ti ta duah a, Mazawmi a rawn tho a, min rawn kuah a,

“ Min ring rawh, a chhuak leh tawh lo ang, ni e, Nun bul i tan tha thei alawm, ani ai mipa tha tamtak hian an duh che tih ka chiang, i mittui zawng zawng te kha a phulo ka ti tawh zawk” min rawn kuah a, ka mittui rawn hnai leh ringawt chu duhlo in ka khap sak sak a, tahpui leh ka tum tawh eih lo.

“Apui, hei hi kan thawhpui thar tur, Doctor thiam em em, Zosangliana aw, inchibai ula” Kan Hospital a Doctor Senior ber Pu Thanga chuan a ti a, a nui vun vun bawk,

Ka chibai hun nghak a ka hma a Palian zet ding chu ka melh chho a, a ha var nalh zet lang in a nui sang bawk, a hmeltha lo tih sawi chu mi dawthei tak anni ngei ang,ka kut ka phar chhuak a, a rawn vuan a, nghet zet hian a hmer a, Pu Thanga’n ka hming leh ka nihna a hrilh mawlh mawlh bawk, midang rawn thleng te pawh in an chibai zel a, a nelawm hmel hle bawk.

Lunch eitur a Canteen ka luh ve chuan an lo thu khat deuh hmar a, mahse, ka thutna thin ala ruak hlauh, ka pan phei nghal a, ka ei duh an hria a, min zawt lemlo in min siamsak tawp thin a, thildang ka duh dawn tum chuan ka luh veleh ka hrilh nghal mai thin a, ka phone ah Bimbim-a video ka u min rawn thawn ka en a, ka nuih a ti za tawp, a zai nasa si, a zai thiam lo nasa bawk nen,

“Ka lo thu ve” ka hawichhuak vat a, Kha Doctor pasang zet kha, ka bu nghat a, a rawn thu ve nghal a, a perfume rim tehhrep chuan thil hlui min hriatchhuahtir a, ka thlahfel tawh emaw ka ti asin le,

“ Midang tumah i kawm ngai na nge?” a mit a ti zim a, a hmel ah nui hmel a lang bawk,

“ Aaah, kawm ngai e, ngatinge?” ka ti let a, Dawhkan tlang a kutzungtangin a kuk kauh kauh a,

“ Vawiin a ka rawn kal ve hnu khan ka enzui deuh reng che a, tumah han kawm bik i neih ka lo hmu lo a, chuan, midang ho hian ka lenchhuahpui theih leh theih loh ah che an in bet a...” a nui zui hawk bawk, ka ner ru nawk thung, hmelchheho zet chu...

“Oh...” abak engmah ka sawitheilo, ka thinrim ru et et ani ber, zaklo hlawm lutuk,kan infiam nasa thin a, mahse, hetiang zawng kher a infiam chu ka duh hauh lo,

“ I lawm meuh na nge?, kei chu ka lo hlimpui phian asin” a rawn kun hnai a,

“ Lawm vak na chi ni heklo” ka ti hmak a, a nui leh suk a,

“ A ho lutuk, min chhuahpui la, kan inbet na ah ka hneh animai, duh leh Falkland atangin Aizawl khawpui nalh ziak kan thlir mai mai anga, abak engmah kan ti dawn chuang hleinem” a ti leh sup a, a mit a nuizatna lang chuan min ti thinur zual sauh bawk,

“ Ka hriatchian loh mipa ka chhuahpui ngailo” ka ti leh nghat a, a thu ngil a, hnunglam a ngheng ur ur a,

“Chuti chu chona ah ka ngai thei angem?” ati leh a, kan eitur a rawn thlen avangin ka chhang ta lo, ngawirengin ka thil eitur ka ei mawlh mawlh a, ani pawh keimah ang tho,

“ Tak tak in ka sawi kha engahmah ngai suh, ka rawn kal ve chauh a, thian ka mamawh em ka hrelo a, mahse, ka kawm duh tur chi i ni tih ka chiang ania” a hmui hruk fai pah in a ti a, ka melh zawk a, keipawn ka kawm duh in ka ring, Mipa, ka hmuh hmasak ber a min hiptu chu amah chuah hi ka hria,

“ Okhey..kan la inkawm ngeih zek ang” ka nui ve ta nge nge.

Nitin kan inhmu a, ka Scooty a chhiat avangin In ah min rawn sawm fo a, min thlah leh ziah bawk, mahni tawk ah kan buai ve ve a,mahse, Lunch kan ei dun ziah thung,mipa tawng duh ti a sawi tur anilo, mahse, a bul a awm a nuam takzet thung, min Care em em a, vawitam kan In ah alo kal tawh bawk, Mazawmi te Nupa nen an inhmuh hmasak ber atangin an Nupa in an nel nghal mai thei tlat bawk,mahse kan inkarah eng nge awm tih min zawh erawh chhan na ka pe theilo, vawikhatmah min duh thu ala sawi lo a, keipawn ka sawi heklo,mahse, pangngai tak in min duh tih min hrilh hun awmse chuan ka hnial hauh lo ang, ka lo duh ru viau nge pawh ka hre chuang hlei lo a,

“Hey...Zosang” Ka hawichhuak vat a, ka beisei loh lutuk nen kan inmelh ta ran mai, mahse, a nui ta sak a, a bul a mi erawh a nui hauh lo,Chhanhimi nen kan inmelh renrawn a, mahse, Zosanga rawn tawng ah chuan Zosanga lam a hawi ta zawk a,

“Eheu...Aizawl a ka awm hnu a ka hmuh hmasak ber tur hi ka hmu har hle mai” nui chungin a ti a, dingchhuak nghal a,an awmdanah an innel hle tih alang vek bawk,Ben-a mitmeng tur zet chuan min kalsan eih lo, a Nu thih hnu a an in kan len hnu ah ka hmuh leh hmasak ber ani a, kan inhmu ngailo, thla hnih a liam daih tawh, an pahnih in an awmlo ah ka lo ngai a, Zosanga nen kan inzui nasat bakah hna ah ka buai a, ka ngaihven lo hrim hrim bawk,

“Cat...heihi ka Cousin, ka kid nibawk, Chhanhimi anih hi aw, chuan, hei hi Apuii...” ka bulah a rawn thu leh nghal a, ka ice cream ei lai chu a tui leh tui loh pawh hre miahlo in ka ei zawm leh a,chibai pawh ka tum buai peih lo,Zosanga te veng Basketball Team ten an khel dawn a,a nau a tel ve a, en turin min sawm a, peihlo mah ila min sawm thiam lutuk a ka zui leh ta nge nge, kan inkawm nel tak viau hnu khan ka Mit hi zawhte mit a an thu a sawi thin a, khata tang khan ‘Cat’ tiin min ko ta a,ala reilo nangin  min ko hlen ti ila adik zawk awm e, thla khat erh awrh kan inzui tak hnu hian kan inkawm nasa in kum tam tak lo inkawm tawh ang maiin kan inpawh tlat bawk.

“Ka hria alawm” ati a, ani pawn min chibai a tum bik lo, kan bul ah an thut loh nan ka tawngtai ru char char ani ber,

“ Maw??!!!, engtin nge i hriat a?” min entawn a, a hmel chu mipa naupang a ang hle bawk,

“ Ben-a naupan lai thian  alawm,Ben...Zosanga hi i hria tiraw?, Delhi ah khan vawikhat a rawn riah tawh kha” ati leh a, a bu nghut a, za lo zet hian a then suk bawk, min rawn kuah a,

“ Ok...a va tha em...lo thu ve ru” a ti leh a, mahse, vanneihthlak tak in an hnial ta hlauh,ka thaw huai mai.

Inkhel kan en chhung in hrehawm ka ti tluan chhuak zak ani ber, Zosanga a tang si, a chevel in ka nuih a ti za bawk a, mahse, Ben-a te an awm ve a, min rawn thlir reng ani tih ka hriatna chuan nuam tak in min awmtir thei hlawllo.

Zosanga’n kan in thleng min thlah a, mahse, a rawn lut ta lo, a tlai deuh tawh bawk nen,keipawn ka sawm lui ta lo, ka chhuk tur min pawt let leh a, ka inrin hma in a vawikhatnan a hmui lum ham ham in ka hmui a rawn si a, a tim deuh a, chhan let mai na chang hrelo in ka dawh mawltawp, Ben-a bak tumah ka la kiss leh lo, a rum hak a, a inla hrang zui nghal daih bawk,

“ Sorry..” a ti sup a, a hmel ka en ngam lo,

“ A pawilo” ka ti sep ringawt, adang sawitur ka hrelo, pawi ka tilo tih ka inhre ru kar bawk,

Min rawn kuah leh a, a lungphu ri dat dat chu ka ngaithla a,

“Cat..khawngaih in min nghah tir tawh suh, ka awmdanah engkim ka tilang a, mahse, i hrelo der niin ka hria” ka samah a fawp a, keimah ah engmah danglam a awm hran lo,

“ I sawi hun ka nghak alawm” ka ti sep a, a nui nghawr dat a, min kuai dak a,

“ Ka duh che, thian ang ringawt ka duh tawh lo” a mit ah chuan a ti mai mai lo tih a lang thei a,

“Ka rilru ka hrelo, mahse, ka ngaina che tih ka hria...” ka sawi zawh hma in min a hmui lum ham ham in ka tawng tur a rawn ti tawp leh ta zawk a..

Chapter – 5

Tunah chuan Zosanga nen kan inzui ta tak tak, a hma ang in thian ngawt kan ni ta lo bawk, min duat a, hmun khat ah hna kan thawk bawk nen kan inzui chawt ani ber,kan thawhpuite zing ah pawh hrelo an awm tawhlo, zak rual kan ni tawhlo ve ve a, nuam ti tak in hna ka thawk mai, ani pawh keimah ang tho, Lunch kan ei dun hram hram thin a,nitin inhmu mahila  zan ah a hman phawt chuan lo len a thulh chuanglo.

“ Pui, nimin ah Ben-a alo kal a” Mazawm’in a ti sep a, kalsan tak tak tum a rilru ka siam hnu hian ka ngaihven lo mai pawh nilo in a tello hian ka nun hi a hlim tih ka hrechiang a, keimah leh keimah ka lo in ti na vel mai mai niin ka hre tawh a, Hmangaihna hi huatna leh beidawnna a a inleh chuan kan Hmangaihna ai khan alo chak zawk daih tih ka hrechiang em em bawk, Inkhel en na a kan inhmuh bak kha ka hmu leh lo , khami tum kha chuan keimah ah chuan danglamna ala thlen ngei a, mahse, amah beiseina avanga natna ang kha chu ani tawh lo.

“ Aw, a rawn tlawh che mi?” ka ti liam puat a,

“ Um, sawi duh nei ang deuh hian min en leh thin a, Zosanga nen in chanchin hi min zawt chak anih ka ring a” ati leh a, ka melh zawk a, min en lo in hmundang a en daih thung,

“ Hah, ka ringlo, a ho em mai, nang hi engtik nge i neih dawn khah?” thildang sawi ka duh a, Ben-a nu boral hnu lawk ah a rai leh a, tun tum chu pangngai tak in a pai ta bawk a, mahse, a hmasa zawk an pai fuh loh avangin an hlauhthawnna ala reh tak tak theilo,

“ November ah, mahse, tak tak in Ben-a hi a hma khan zu a in ngai silo a, tunlai chu Zampuia nen an inkawm tam a, Zu a in ka hmu zeuh zeuh mai” a ti leh talh a,

“Khawngaihin....thildang sawi ang, a chanchin hriat ka mamawh lo” ka aw a chang fak mai,

“ Um, Sorry, mahse,...” ati leh mek chu ka melh ngek avangin a tawp leh chawt a,nidangah a sawi ngai pawh anilo a, tunah hlimna ka tawn mek lai hian engvangin nge a sawi talh ka man hlawllo,

“ Kal ila, kan tlai ang” a hma aia nem zawk in ka ti leh a, an In a kal turin min nghak a, a tho a, a dul kawh luah chu ka en a, engtik ah tak fa hi la nei ve ang i maw?

 Zosangliana nen kan inzui nasa em em tawh chung hian Mipat hmeichhiat zawng in vawikhatmah min la beisei lo a, a Pa loh vang anilo tih ka hria, min nawrlui eih lo,mahse, a ruk in vawitam hrehawm ka tih phah thung,kan in kiss apiangin keimah ah danglamna a thlen lo, Ben-a nen khan kan in kiss fo a, nuam ka ti thin a, kan in kiss leh hun tur ka dream nasa thin, mahse, kha kha chu tleirawl nun nawmlai anih vang anih ka ring ta zawk, Zosanga lak a ka awmdan hi thil diklo anilo, Mipa nen in Kiss a danglam viau tur a ngaihna hi chu Film leh Lehkhabu vel ah chauh a thleng thin tlat alawm, mahse, a ruk a ka inthlahrunna a bo chuanglo.

An In kan thlen hnu lawk ah Zampuia leh Ben-a an rawn thleng veleh nghal a, Mazawmi ka melh vat a, mahse, a thle bak a, a nui ringawt, an ni nupa hian engthil nge tih an tum ka man lo, Mazawmi’n chawei turin min sawm a, ka kal animai, mahse, Ben-a alo kal ve dawn tih a sawi hauh silo.

“ I dam maw?” min rawn ti a, ka ep zawng tak in a thu a, Zampuia nu leh pa an zin a, a farnu lah hmundangah chawei tur in a kal daih bawk,

“ Aw, nang zawk?” ka ti zang vah mai, a mithmul a ti sang zauh a, a then suk bawk,

“ Um, kan inhmukhat hle mai” a ti leh boh a,

“ Nia...ee, Khawnge Chhanhimi?, lo hruai ve tur che ania” ka ti leh a, engvanga thawveng em em ringawt nge ka nih ka hrethiam biklo,

“ Kan thian ho  pual liau liau ania, ani chu nakin ah le” ati leh mai, Mazawmi’n min rawn ko a, Ka Bai siam a ei duh tih a sawi lawk vek tawh a, thildang hi chu ka siam thiam lemlo, mahse, Bai kher hi chu ka thiam ve a, midang eitur siamsak pawh nuam ka ti viau bawk.,Kitchen lam ka pansan a, min thlir zui reng tih ka hriat avangin amah hnungchhawn zawng a kal a nuam ka ti chiam lo kher bawk.

“Eng nge thil awmzia hi?” an hriat hlau zet hian Mazawmi ka zawt a, a nui a,

“ Engmah, tunah chuan midang in kawp ve ve tawh a, in ngeih tlang deuh a awm leh a hun tawh kan ti a, Naupangchhia inni tawh lo a, inhuatreng kha a tul tawhlo bawk a, bakah i na dawn tawhlo tih ka hre bawk” a ti a, a nui var var bawk, Ni e, kan puitling tawh, inhuatna nen a nun hman ai chuan thian kan lo nih tawhna kha ti nung leh ila nun a nuam zawk ang, a hma ang khan kan inkawmngeih tawh lo anih pawh in kan inhaw tawh lo anga, engkim a hlimawm zawk tal ang chu, Mipa leh Hmeichhia hi thian kan ni thei a, best pawh kan ni thei, mahse, Kan in ngaizawng a, kan inthen leh anih chuan engtik ah mah thian tha kan ni leh tawh ngai lo ang.

“Nia, mahse, chuti anih chuan ngatinge Zosanga kan sawm mai loh a?, Chhanhimi pawh?” ka ti leh talh a, a nui hmel a tawp hmak a,

“Ni lah lo e, kan pali kan ni thin a, tunah pawh kan pali bawk lo tumah kan mamawh rihlo” a ti a, a sawi dik leh ta ka ti rilru a.

Ka beisei aiin kan chawei boruak a nuam ta phian, kan nui a, kan infiam a, hmanlai a kan nun ah khan kan let leh ta niber in ka hria, kan eikham hnu ah reilote kan thu khawmuang leh a, kan vaiin tawng kan inchuh a, kan pali lek nimah ila kan ri chelchul ani ber,

“ Ben...min thlah kual la” tim deuh hian ka ti a, hriatthiam har deuh hian min melh a,

“ Tehreng mai” a ti nghut a, Mazawmi hmel a hlauthawnna lo lang chu ka hmu ru a, mahse, ka haider hmak thung.

Kan tlanchhuah hnu ah rei vaklo chu sawi mai tur hrelo in kan ngawi dun kar a, Mazawmi te nupa awm lai ang ngawt kha chuan Boruak a nuam ta hauh lo,ngawirengin kan chuang dun mawp mawp a, kan rilru ve ve kan kawm a, kan inkawmngeih leh ta viau emaw ka ti kha ka tisua leh ta anih hmel khawp mai,ka hawi chhuak a,kan Inpeng kan tlan pel chiah bawk,phawk zet hian ka melh a,

“Hey, ka chhuk na tur ani tawh” ka ti a, engmah sawilo in a tlan zel tho,

“Ben...” ka ti hman chuah a,a rawn hawi zawk a,

“Ka hria, biak che ka duh a, bakah ilo leng khat tawh alawm” a ti hmuk a, min thlah tur a ka  sawm kha ka tisual takzet,

“Aih, In in ah ka kal duh lo” mangang zet hian ka ti a, mahse, kan thleng der tawh, Motor atang in a chhuk a, Gate a hawng a, a rawn lut leh a, atthlak zet in a chhuk hlan a lo kal sawn tumna  pawh ka nei chuanglo, Tumah an awmlo nge ka hrelo, tumah an rawn kal lo, Motor a hun fel thlengin engmah kan sawi lo , ka mawl huih ringawt, chhaw ka inti em em bawk, engvang a min thlah tur a sawm nge ka nih ka inhrethiam hlawllo,a hma ang kha kan ni tawh ngai dawnlo tih hrechiang em em tur ka n asin le.

“Chhuk la..” a ti leh nghut a, ahma a ka thian hlui nelawm em em kha chu a bo leh hmak tawh,

“ Ka duhlo...” ka ti hlar thung,

“Oh...Mate..Naupang i ni tawhlo, engmah thil thalo ka ti dawn lo” ati leh a, min koh dan chuan min ti tim zawk bawk,

“Khatiang khan min ko tawh suh, ka duhlo” ka ti leh hlak a, a chhuk a, chhuk duh lo in ka thu lui ngar a, mahse, eng ang pawn thu rei ila min kal tir dawn chuanglo tih ka hrechiang,Motor ngheng in a ding a, ka chhuah hun a nghak tih ka hria, chhuah mai loh chu tih theih ka nei chuanglo.

“In ah lut ang, tumah an awmlo” a ti a, ka chhan hma in a kal zui ngha daih bawk,Muangchangin ka zui lut a,he In ah ngei hian a Nu khan a fapa kalsan turin min tih khan min hrilh a, a hnu a ka kal leh hmasak ber chu a Nu Boral khan ani a, kum sawm lai aliam tawh, tunah ka kal leh a, a Nu boral atangin kum chanve aliam leh tawh,Living Room ah ka thu a, ka ep zawngin a thu a,thatchhe zet in a bawp sei zet chu a thluang duai bawk,

“ Khawnge midang?” ka ti ta nge nge,

“ An zin vek, tunkar chu keimah in ka awm ang” a ti sup a,

“Khawnge Chhanhimi a awm?” ka ti leh a, a lu a rawn tikang a,

“ An In ah a awm ang chu, Zosanga awmna ka zawt biklo che a, min zawt tawh lo teh” a ti leh nghut a, mahse, a aw ah nuihzatna a ri tel thung,

Sawitur hrelo in kan ngawi dun leh ta ran mai, zawhte ngam theilo ang sawi ang maiin ka bet lo,

“ Engtik ah nge min hrilh dawn?”  min en lo in a ti leh sup a, chunglam a en daih bawk,

“ Eng maw?” ka ti a, muangchangin mn rawn en a,

“Ka nu in kal tur a a tih che kha” ka phu nasa lutuk , thla chu nei ila ka thlawk chhuak chiang viau ang,

“Eng...eng....chutiang ka hrelo” ka ti bah nawk mai, ka mitthla ah Zampuia te nupa hmel a rawn lang a, kek nawk nawk mai ka chak ber, sawilo tur khan ka ngem lawm lawm si, engvangin nge an lo inrawlh talh???

“Zohlimpui, engvangin nge a tir khan min hrilh loh? Kan pahnih inkar hi khatiang vnag mai mai a tawp tur anilo tih i hria anilawmni?, engmah siamthat theihloh khawp a a pawi hma khan min hrilh tur i ni asin...” a tir ah zawi fiah tak in a sawi a, mahse, a tawp lam erawh chu a au in a au ani ber tawh, ka beng ka hup ta ngawt, ka ngaithla theilo, ama thiamlohna hmu lo in min dem na thu hlir a chhak chhuak a, ngaihthlak loh ka duh zawk...

Ka thutna a hniam sat a, a rawn thu ve tih hrilh ka ngailo,min rawn kuah a,

“ Mawh??, Mate, engvangin nge hetiang mai mai a kan pahnih inkar titawp nge i nih?” ka beng hup na kut a rawn dah sawn a, ka la chhang chuanglo,

“ Mawh??” a ti leh tuar a, ka phu zawk bawk,

“ Mai mai anilo, kal tur a min ngen tu kha midang nilo in i nu alawm, nilo, min ngen lo, thu min pe” ka mittui a rawn luang a, hruk pawh ka hru buai peih lo,

“ Shh.... tap suh, tunah chuan engkim ka hre tawh a,bul kan tan leh thei alawm” min rawn kuah a, a awm ah min pawm bet a, chhuak zet in ka Tap ta nge nge, a Nu in min hauh lai kha ka mitthla ah alang uar uar a, nimin ang mai niin ka hria a, a natdan pawn angai ang maiin ka feel leh thei hial bawk,

Engmah sawilo in min kuah bet a, ka sam ah a chul hauh hauh bawk, thilmak anilo, kan inzui lai pawh khan ka thinrim chuan heti hian min kuah bet a, engmah sawilo in ka thinrim min tihrehsak thin anih kha...

Ka Phone nghawr dar dar in min ti phu deuh dawrh a, ka inahrang nghal vat bawk, ka Bag atagin ka la chhuak a, Zosanga.....LALPA, ka theihnghilh chiang lutuk,

“ Hey...Cat...i tha em?” a rawn ti nghal a,

“ Um, khawnge i awm?” ka tho a, Ben-a pawn min dan a tum lo,

“ In in ah ka nghak che a, ka rawn lam dawn che mi?” ati leh a, hetiang mipa tha lutuk ka nei chung hian min ti na tu Mipa hi ka lo inuah tir thei ania!

“Aih,angailo, ka lo haw nghal animai” ka ti sep a,

“ Ok, ka lo nghak ang che” a ti leh a, hmuh chakna pakhatmah ka neilo, ka phurna zawng zawng a bo vek rih tlat,

 “ Ka kal angai” ka inher a,  mahse, ka hnung mai ah alo ding chu niin, ka su lo chauh,

“Ka hria, mahse, khapa kha thlah rawh” ka in control  hman lo,a hmai a ri thlawrh a, a biangah ka kut thla alang kalh bawk,

“Min beng maw?, Zohlimpui, vawikhatmah kut min thlak tawh suh, nang aia ka thinrim chatdan hrechiang an awm lo tih i hriat kha” a mit a thim khup bawk, ka tawlh hnung hrat a,

“ Ka hria e, midang ngaihtuahna neilo, mahni tha ber a in ngai, mi chapo i nih kha” ka ti leh salh a, a hmel a na tuar hmel lo lang chu hmu lo ila ka ti takzet, reitak min ti buai leh ngei dawn si a,

“ Ka thlah ang che” a ti leh nghut a, ka bag a la a, a kal chhuak chu vawm zui chawrh ka chak kher bawk, mahse, ka ti ta em lo, a tul ber lo bawk.

Kan in then hma hret in a ding a, ka chhuk tur min rawn man bet leh a, amah si chet in min pawt bet a, tal chhuah tum a ka che chu engahmah a ngai lo,

“ Lo in ngaihtuah ang che, ka thlah dawn lo che” a ti leh hmuk a, min nawr sawn a, ka chhukna turin kawngkhar min rawn hawn sak a, ka chhuk fel veleh a tlan zui nghal a, ka khur nasa lutuk a, pen pawh ka pen mai theilo, ka khur tihreh tum in ka ding deuh vang vang  a, amah vang a khur nge ka nih a,a thusawi vang zawk pawh ka hrethiam lo.

Zosanga hmel ka hmuh rual in inthiam lohna in min fan raih raih mai, min lo nghak reng tu mipa hi chuan min ti na ve ngai in ka ringlo, Ben-a ka hriat thin kha khatiang em em  a mipa zak theilo leh mahni hmasial a a inlet ta kha thilmak tawpkhawk ka ti lo theilo.

Muhil theilo in ka inlet sek a, Ben-a khan a thusawi kha a ti tak tak ang tih ka chiang, a tih loh tur thil sawi mai mai tur khawp a mipa tawng tam anilo,mahse....Chhanhimi engtin nge niang,?, min kawp a tum tihna mi???, Nilo...engvangin nge min kawp tum tur ang pawn ka lo ngaihtuah leh tak?, ka mawl hlumlo chuah anih hi a, khatiang min sawikhum ngam ringawt pawh kha keimah in en let ka ngai hial zawk ang..

Ben-a nen kan boruak khatiang anih atangin karkhat aliam leh tawh, engmah thawm a nei leh ta miahlo, lawm viau tur ka nih laiin ka lawm chuang derlo, ka lo beisei ru reng zawk nge mawni??, ka inten deuh hial mai...

“Hey...min ngaihsak deuh thei em?” Zosanga hmel nur nung chu ka en a, min bia tih ka lo hre leh pek tawh lo, mahni in ngaihtuah leh vak vak ka ching leh tan a, sim vat ka ngai,Ben-a ka hmuh leh avang mai a ka danglam ngawt mai hi ka inhaw hluah hluah bawk, ka in control theilo ani mahzawk, mahse, keimah chuah in ka la hre tal a, ama hriat ah ka in control theilo tih ka tilang hauh lo erawh ka lawm ve tumhrang bawk.

“Um, sawi la” a mal ah ka kut ka dah a, kut sei thlurh in a rawn hum a,

“I danglam riau, min ngailo” a ti sup a, hei tak hi Ben-a nen an in an lohna...Ben-a kha chuan kan inkawp lai pawh khan min ngai tih a sawi ngailo,

“ Ka ngai che a, i hria alawm” ka ngheng a,

“ Karleh hi  clinic ka hawn tan ni kha ani tawh a, ka bul ah awm turin ka duh che tih i hriat kha” ati sup a, ka chhip ah a fawp a,

“ Ka awm dawn alawm”

“ Um...ka ring che...” a ti leh sup a...

Inthiamlohna bawk in min fan leh nghal a, hetiang mipa tha lutuk ka bul a a awm lai hian mipa dang ngaihtuah tur ka ni lo chiang khawp, hetiang chiah hian Zosanga hian min ti ve se na ka tihdan tur ka hrechiang sa vek, rilru  hi duh ang ang a danglam thei ani silo hi Mihring kan ropui zia tilang tu leh engmah kan thu a thleng anih loh zia tilang tu ani leh lawi si..

Chapter – 6

Zosanga haw hnu ah Khum ka pan nghal a, Ben-a leh Chhanhimi chanchin hriat chakna in ka khat a, Instagram ah ka lut leh ta nge nge, ka la Follow ta chuanglo, ka en kual a, engmah Post thar a awm lemlo, an Pahnih Photo ka en kual leh a, an inhmeh tih loh rual anni lo, an hmeltha dun vut lo a, mahse, an nalh ve ve, hmeltha a sawi vak tur ni silo, mahse, nalh em em,chhelo tih sawifiahna atan a hman tur hi zawng ta ila an pahnih hian an ni ngei ang.

Kartluan in hna ah ka buai a, karleh Tuesday ah Zosanga’n clinic a hawng thar tawh dawn a, kan Hospital ah la kal zui tho dawn mahse a hma ang chuan kan inhmu tam thei tawh dawnlo tih ka hria, Aizawl ah alo awm na la reilo mahse a thawh hmasak na Phai lam ah a hming alo chher tan tawh a, a thiam zia kei ngei pawn ka mit ngeiin ka hmu tawh bawk, Phai lam a a thawh lai a mizo alo buaipui thin tawh te khan an rawn zawng zel a, tunah phei chuan ama line ah Doctor senior zawk te a tlan pel ani thawhthang tawh,

“ Lunch kan ei dun hman angem?” Cabin atanga a rawn chhuak chiah nen kan intawk a, midang hriat loh in ka zawt a, a thle buk a,

“ Sorry..ka hman leh dawn lo, vawiin chauh chu nangmah in lo ei leh mai la..” a ti a, a buai zia ka hria a, mahse, ka chhungril ah lawmlohna a awm tho, ka bu nghat a, vawiin chauh nilo in tunkar ah vawikhat chauh kan la ei dun a, a Clinic vel a buaipui na lamah zan ah pawh alo leng hman chuanglo,Monday zan alo kal bak kha alo la kal leh ta miahlo,

“Um, a pawihleinem” ka ti a, ka nuih lui sang bawk,

“ Cat...” ka kalsawn tur min rawn ko leh a,

“ I thinrim lo tak tak tiraw?” ati leh rih a, ka lu ka thing a,

“ Rimlo tak tak..” ka chhungril erawh ngaihsak lo ni a inhriatna avangin a rum thung,

“ Chuti anih chuan thildang ala awm, kal pah in sawi ang” ati a, Inhnuai lam panna step ah kan chhukthla dun a,

“ Um, sawi la..” ka ti tha mai bawk a,

“ Zan ah pawh ka rawn be hman che in ka ringlo, ka bungrua la thleng kimlo ho kha vawiin ah a rawn thleng kim dawn a, remkhawm leh tihfel vek angai dawn bawk nen, hun ka nei in ka ringlo a” a ti a, ka hrethiam zel mai ang chu, a buai hun lai ani miau alawm,

“ A pawilo ka tih kha, ka puih theihna che a awm chuan puih che ka hnial lo ania” ka ti a,

“ Aih, angailo, ka thawhpui tur, Nurse pakhat, Apollo atanga ka hmelhriat tawh kha alo thleng tawh a, amah nen kan chingfel thei mai ang, naktuk ah emaw ka hmelhriattir ang che” a ti leh sup a,

“ Ok...i tih dan dan le, ka kalsan ang che, ka ril a tam tawh” ka ti a, ka ban ka vai zauh a, Canteen panna Step ah ka chhuk thla a, ani pawh Doctor ho awmna Room pan in a kalzui nghal bawk a, a chhan hriat siloh in nuam tih lohna ka nei a, mahse, a awmdan ah engmah diklo a awm silo.

A sawi ang chiah in min rawn be lo, ka mut in dar 10 a pel tawh a, mut pah in Whatsapp a Group hran hran ka tlawhkual a, tihtur em em ka hriat loh avangin ka chhuak leh a, mahse, tum loh deuh in Zosanga ka en kher a, a Online va mai...a Online hman anih chuan min be hman tur ani asin le..Nilo, hna chungchangah midang nen an inbia pawh ani ang chu, ka tan a awm reng thin a, a buai hun lai hi chuan ka hrethiam tur ani..

Ka beisei loh zet in ka suangtuahna nen inpawlh nuaih in tui zet in ka muhil a, ka phone riin min tiharh a,harh chiang manglo in ka chhang a, mahse, a aw ka hriat rual in ka harh chiang nghal kawk mai,

“ Morning...” Ben-a aw in a rawn tih rual in Phone ka dah thla leh nghal a, Off erawh ka Off lo, ka awmdan naupangchhia lutuk duh lo in ka la kang leh a,

“ Morning, eng nge nita?” zangkhai thei ang ber in ka ti let ve a,

“ I tho har lutuk,kai tho tur che in  i Room a rawn luh kher a ngai dawn em?” a nui a, ka nu nui ri ka hre tel bawk, LALPA, He mihring hian engthil nge maw a tih hrep ni??!!

Rang lutuk in ka zuangtho nghal a, Bathroom ah ka tlan lut a, ka hmai ka phih sawk sawk a, ka kawr hak ka thlak leh a, mahse.....eng vang a phur em em nge ka nih ngawt?,ani lo kal vang mai a za kual chiam tur ka ni hleinem, ka thu leh rih a, a duh chuan min lo nghak mai tehse, rei tak phei chu ka thu thei chuang hlei lo a.

Ka nu nen Thingpui in chungin an lo inbia a, kan pahnih inkar a chhiat hnu khan ka chhungte pawh hian kan tawp  chhan an hrelo a, Ben-a mangang alo va kal fo tih ka hria, khavang khan ka nu leh pa hi chuan a haw hranlo, a chhungte nen erawh kan in mil lo hlen ti ila a dik ber ang, ka tuar na a, mahse, Ben-a thiamloh anilo tih ka hrilh thung.

“I  va hma ve” pangngai tak in ka ti a, Thingpui ka inthlit ve nghal bawk a, amah ep zawng in ka thu a, a sam awmdan a ti danglam chuan a hmel a tilang pa lehzual,

“ Eheu...kei aia hma tur hi a hma zo lo animaw?” a meng de sawr sawr ah chuan min ti el tih ka hai lo,mahse, ka hrelo der hmak thung,

“Tak tak in eng nge ilo tih dawn a?” ka ti leh a, alo kal lohna a rei tawh a, mak tih loh a har,

“I Birth Day ah chuan zing karah ka lo kal thin kha...” a mit a ti zim a, a kutzungpui in a No tlang a chul kual zai zai bawk,

“ Oh....ka Birth Day ka lo theinghilh daih..” adang sawi tur ka hrelo, ka theinghilh chiang em bawk a,a sawi ang chiah in kan tleirawl hnu khan ka birthday ah min wish hmasak ber a tum thin a, kan In ah zingah present nen alo kal ngei ngei bawk, thil hlui ka hriat chhuah lehna chuan ka awm a ti nuamlo ruih mai,

“Pawilo, mahse tun tum chu present ka rawn keng lo ania” a ti leh a, Ka nu in a Pa that leh that loh a lo zawh veleh takah chuan kan pahnih a inbiakna hun a awm ta lo hlauh, kan inthen hnu khan ka birth day apiangin amah ka beisei thin a, kum 10 tehmeuh ka nghak a,ka beidawng hial tawh zawk, mahse, tunah alo lang leh ta lawi si...kan thingpui inna no ka sil a,

“I Phone ah hian tu emaw in rawn biak che a tum anih hmel” Ben-a aw in a tih rual in ka hawi let vat a, dawhkanah ka kalsan a, ka phone hi a ri in ka dah ngai manglo,ka pan hnai a, Zosanga alo ni a, Ben-a hmel tak run ah chuan tunge min rawn call tih a hria tih hrilh ngailo in alang reng bawk, huizz,eng nge pawi?, duh duh be turin zalenna ka nei alawm..

“Hey...” Hello pawh tilo in ka ti a,

“Happy Birth day Cat...ka tlai em?” mutchhuak aw zet hian a rawn ti a, ka nui var var mai,Ben-a hi lo kal lo se chuan ka Birth day hi ka hrechhuak lawklo maithei, Zosanga hian buai chung chung in a rawn ngaipawimawh tih ka hria, lawm mai tur ka ni chiang,

“Tlailo chiang, ka lawm e aw...” ka ti let a, ka nu leh Ben-a awm ve mahse kalsawn ka tum chuanglo,

“Lunch kan ei dun thei angem?” a inthlahrung lutuk chu ka khawngaih letling zawk,

“ Um...lutuk...ka lo nghak ang che” ka ti leh a, thildang a rawn sawi leh nual a, be chungin ka No sil lai ka sil zawm a, amah ka ngaihpawimawh vang nge Ben-a tih el ka chak vang pawh ka hrechiang ngam chuanglo, engvang a Ben-a hi tihnat chak tlat nge ka nih ka hre heklo..

Damdawiin ka thlen veleh ka buai leh nghal a, nitin mai Damlo natna chi hrang hrang tuar ,mi hran hran an lo kal ziah a, Natna in mi hausa leh rethei a thliar lo a, kan vaiin ang khat vek in min run a, mi hausa te chuan damna duh in engpawh an ti thin a, mi rethei te erawh chuan damdawi mum khat lek lei tur pawh in sum an nei zo lo fo thin a, a chang chuan nun hi a fair lo ka ti thin a, engvangin nge Rethei tur hian Pathian hian mihring te min siam tiin ka ngaihtuah phah fo thin a, athen an hausa em em a, hmansen loh an nei a, an hmeltha a, an lian a, lehkha an thiam tel zui bawk a, an tan khawvel hi a famkim bik hliah hliah, chutiang zingah chuan Ben-a ngei pawh a tel ve a,midang harsatna a hrethiam ngai lo, kan tleirawl lai kha chuan kan khawsak in an mahni phalo mah se min hmuhsit awm ka hre ngailo a, mahse, tunah chuan a nihna diktak,mi hausa dangte ang bawk rilru pu anihna alo lang chhuak ta chiah a, ka kalsan chhan a hriat veleh ka bul a awm tum in min rawn hnaih a, keipawn amah hnaih nghal turin min beisei ngam bawk..Duh duh neithei, a duh a neih hma chuan umzui thin mipa anih na kha ala ngai reng a, mahse, chuti mai a awlsam chuan min hnaih ka remti dawn lo hulhual..

“Dar 3 ah Clinic ah lo kal mai la, i theih chuan?” Zosanga msg alo ni a, engthil nge ni leh ta???, zingah kha chuan Lunch ei dun kha min tiam asin le, a pawilo e, a buai animahna...

“Ok,ka lo kal ang” tiin ka reply a, Dar 2 thleng ka duty hun ani a, a bak chu ka free thin a, tihtur hranpa bik ka nei anih loh chuan In ah ka haw tlang mai thin a, mahse, vawiin chu Clinic lamah ka leng kual dawn anih hmel, kal pawh ka la kalsak lo a, thil eitur ken sak bawk ila a tha mah zawk in ka ring, a buai viau chuan engmah a ei hman dawn silo..

Dar 3 rik hma in a clinic bul ka tllng der tawh, Momo a ngaina a, Mushroom Soup a duh em em bawk, a pahnih in ka kensak a, midang hnathawk tu an lo awm tak in tih thu ah ka keng tam viau bawk,kawngpui an chung chiah a awm ani a, step tam vaklo ka zawh chho a, an lo ri deuh laih laih a, tuman min hmuh loh avangin kawngkhar inhawngsa chu ka kik a, an ngawi diak a, an rawi hawi thap bawk,

“ Lo lut rawh..” hmeichhe pakhat, sam eng lam lek lek ,hmeltha zet hian min lo ti a, Zosang-a chhungte hi ka la hre tam lo viau a, mahse,mak tak in  he hmeichhia hi a cousin te zing ami anih ka lo ringlo ve nghal ringawt,

“ Zo-a a awm em?” inthlahrung deuh hian ka ti a, a bu nghat a, midang 4 lo awm ve te chuan an thil tih lai an tihzawm leh vek tawh a,ka luh tirh ang bawk in  an tawng zui leh bawrh bawrh bawk,

“ Lo thu la, Toilet ah a lut lawk a, alo chhuak tep ang” a ti leh a, min mikhual chei lutuk a, ka ngei ru kher bawk, rei vak lo ka thut hnu ah Zosanga a rawn lut a, min hmu thut chu a phu deuh in ka hre hial bawk, amah ngei in kal turin min ti a, mahse, a hmelah min hmuh avanga lawmna emaw pawh alang eih lo,

“I lo thlenna a rei tawh em?” ka bul a thut pah in a ti nghal a, ka lu ka thing a,

“ Ka lo kal hun a timing lo deuh in ka hria, in buai lai tak anih hmel a” ka ti a, a then suk a,

“ Vawiin bak kan buai tawh lo ang, hei ,a fel tep e..eee, hei hi ka thawhpui tur ka hrilh che kha, Apollo a ka thawh lai atanga ka thawhpui thin, Rachel-i anih hi, chuan, hei hi Apuii” Rachel-i lam hawiin a bu zauh a, nui sang chungin min rawn chibai a, a kamiz tial hak chu a kekawr kawngah a bilh lut a, a pian nalh zet chu hmuh hmaih theih anilo, ka kut a vuan zawk a, a la let lehnghal a, mahse, chulam engmah ka ngaipawimawh lo, engvangin nge ka hming chauh a midang bulah min sawi nge anih?, a Bialnu emaw a thiannu ti pawn min sawi thei reng si a..ka chhungril a na vang vang thei hial bawk,

“Ka kal lehnghal mai teh ang, thil in ei hman ka ringlo a, eitur ka lo keng a, hun in neih hun ah lo ei mai ru..” tih leh thawh ka rual a, Ben-a vang nilo,mipa dang vang hian ka nat theih ka lo ring ngailo a, mahse, tunah ka na ta chiah, ngaihsak lo ni a inhriatna, hnawl niin ka inhre hial zawk,

“I va hmanhmawh ve, i ei tawh ami?” ka kut a rawn vuan a, ka lawmlo ani tih langlo thei ang ber in ka nui lui a,

“ Ei tawh e, lo ei ru, in  buai em mai” ka ti a, ka kut a vawnna ka kut lehlam in ka phelh sak a, min thlah tum a a rawn ding ve chu ka en a,

“ Min thlah duh suh, angailo,i hman hunah kan inbe zawk dawnnia” ka ti leh a, a hma aiin na ka ti zawk,Rachel-i lo nui sawng mai chu ka hua a, engvang a nui nge anih ka hrelo, mahse, ka haw hluah hluah thung.

In ah ka haw tlang nghal a,ka nu eirawngbawl ka pui a, Ben-a lo kal se ka ti kher bawk, a chhan chu a hma in Zosanga a hre tawh anih chuan Rachel-i pawh a hriat tel ka ring a, ka zawt mai ang chu, nilo, thil tih chi loh ber ani ngei ang, min hmusit hle zawk ang, ka bialpa chanchin ka hre duh anih chuan midang tibuai lo in ka chhui mai tur ani.

Sana ka en a, Dar 8 a pel hret a, tun thengin min la rawn be ta lo fo, a clinic kha a la hnawk nuaih a, mahse, midang ho khan tihfel hna an thawk tih ka hmu a, tun thleng thleng a buaina awm tur chu thil mak tak ani, ka lungawiloh miau avangin va biak hmasak ka tum bau lo,

“Damdawiin ah ilo kal lawk hman angem?” Damdawiin landline atangin min rawn bia a, thil mak ani lemlo, kan duty hun nilo mahse kan Damlo enkawl bik ten min mamawh hun a awm anih chuan kan tlan dawr dawr tum a awm fo,

“ Aw, engthil nge?” ka ti a, Room ka pan nghal a,

“ Zing a rawn lut kha a buai deuh a, nangmah kher a lam reng mai che a” a ti a, ka in ngaihtuah a, lut leh chhuak an awm reng avangin tumah ka chhin chhiah thei ngailo, mi bik tak an nih loh chuan hriatsen lah an ni heklo,

“ Ok, ka lo kal nghal animai” tih leh Phone Off ka rual a, Ka thawmhnaw hak chungah Jacket ka hak belh a, October thla chauh nimahse zan lam ah chuan in khalh chhuah in a vawt ve lek lek tawh,engchen nge hun ka hman dawn ka hriat loh avangin in thuam lum a pawimawh hrim hrim bawk.Ka nu hnenah ka kalna tur ka hrilh a, min ngaihtuah thin tih ka hria, mahse, ka hna hi nuam ka tih miau avangin min sawisel erawh a tum ngailo.

Damdawiin ka thlen veleh min lo ko thuai a, an hmel ka hmuh hnu ah tu ber nge anih ka hre ta chauh,an harsa tih an hmel ah alang thei a, kei engmah nilo chung a rinna anghat chuan min tihlawm rual in ka insit ru takzet,a thawk lak a harsat a, a changin a harh lo leh thin bawk a, mahse, ka kut a chelh erawh a thlah duh hauhlo, darkar chanve dawn kan buaipui hnu ah pangngai tak in a muhil thei ta hram, ka thawveng hawk bawk, tunah chuan Pathian zarah engemaw deuh a vanduaina kan tawk anih loh chuan a that chhuah beiseina ka nei sang hle bawk.

Duty rest Room ah kan thukhawm a, Thingpui kan in leh rih a, ala tlai lutuk lo bawk a, han awm khawmuan pawi ka ti hranlo, zanlam ah ka duty rih lo a, chhunah chuan mi an tam a, ka ri luih luih a, khawharna hun a awmlo, mahse, Zan lam ah chuan thawktu tam zawk kan haw a, mi veivah phal anih loh avangin a reh thuap thin a, a khawharthlak thei takzet,

“ Karleh ah maw Zosanga Clinic chu an hawn dawn?” Nurse Senior tawh zet chuan ati a,

“ Um, in telpui ve ang chu” ka ti a, kan Damdawiin a kan thawhpuite zingah kan inkawp tih hrelo an awmlo,

“ Nia, hman chuan telpui atha, a thiam bawk a, a lar chak khawp mai, amah hi alo fel ve bawk nen” a ti leh zel a, Nia, a thiam mai bakah a felna hian midang hriat a hlawh phah lehzual tih keipawn ka hailo,

“Ka kalsan dawn che u, a tlai mai dawn “ tih leh din chhuah ka rual a, min ui der viau a, mahse, ka mangtha a ka kalsan ta hlawm a,ka khawngaih reuh hlawm, keipawh Night a ka duty chuan ka khua a har ve thin miau a..

Muangchangin ka tlan a,kan veng panna ah ka tlan thla dawn zet a, mahse , ka thulh leh, Ramhlun lam ah ka tlan ta zawk a,Engvangin nge tunah Zosanga clinic en chak ka nih ka inhre biklo, mahse, ka chhungril in kal tur a min tur na lamah ka kal lo theilo, ka tlan zel a, Zosanga clinic awmna ka thlen dawn ah ka hawi chho a, mak tak in ala eng kalh mai,an la buai viau zawk tihna ani angem?, ka Scooty ka side tha a, ka kal ang nge kal lo ang tih ka ngaihtuah a,mahse, ka ngaihtuah reilo,Light a in Off ta hmak, rei lo te ah Zosanga alo lang a, mahse...a hnungah kha hmeichhia Rachel-i khan a rawn zui bawk.

 Midang an rawn lang leh dawn emaw ka tih laiin tumah an rawn lang ta lo, ka dinna lai a thim deuh avangin min rawn hmu lo hlauh bawk, Zosanga Car ah an pahnih in an lut dun a, kawngkawi a an Motor tlan liam chu ka thlir a, zui ve mai tum in ka Scooty ka Start a, mahse....thil tul anilo tawp, eng thil nge hmuh chhuah ka in beisei chiah??, puitling kan ni ve ve tawh a, a tul chuan naktukah ka zawt fiah thei reng, bakah engvang in nge ka rin chhiat ngawt?, an thawk dun tih min hrilh vek a, an pahnih chauh a chinfel ngai a awm pawh ani thei tho alawm.  

In ka thlen hnu ah reife ka nghak leh a, mahse, min la rawn be ta chuanglo fo, a chau lutuk ani mahna, Mangtha na Msg ka thawn a, ka men chhung chuan min reply lo, a online lo hrim hrim zawk.

Zing ka harh veleh ka Phone ka en nghal a, Zosanga Msg alo awm vang a, ka Open vat a, min mangtha na leh a buai vang a thupha chawina bawk, a rawn thawn hun ka en a,zinglam dar 2 daih, amak hle mai, clinic an chhuahsan khan  dar 10 a pel awrh chuah ani sia, a last seen ka en leh a, dar 3 hnu lam ani bawk, kan pahnih inkar tha em em kha ni tlemte lek liam hnu hian a danglam ta dawrh ani ber, eng nge diklo ka hriat siloh in ngaihthat lohna in min tuam a, amah ka rinna ka hloh mek hi thilmak tak ani bawk, hetiang rilru hi ka pu ngai silo, a buai em em lai hian hetiang a rilru kawi lo put hi a hun lo takzet bawk, a clinic a hawng fel anga, kan boruak a pangngai leh mai ang tiin ka inhnem a, mahse, ka thamuan phah chuang der lo.

Canteen atang a ka chhuak tur leh Zosanga rawn lut tur kan intawk a, ka kal tirh atangin kan la inhmu miahlo,

“ Hey, i ei tawh mi?” ka kalna dal in a ding a,

“ Ei zo chiah, i hman ve chuah alaw?” ka ti nghat a, ka lawm vaklo tih hre mahse pawi ka tilo, em em ka ti ve tlat tawh,

“ Um, hman chiah, i Phone i pick thei silo a, Canteen ah i awm anih ka ring a, kan ei dun ang chu ka tia” a ti a, midang lut tur kan dal avangin a tawlhsawn a, ka phone ka phawrh a, miss called alo awm nual, a rik lai ka hrelo hrim hrim,

“ Oh, a va zialo, tihtur ka nei a, nangmah in ei mai la, a pawi em?” thuphachawi aw deuh hian ka ti a,

“ A pawi chu ka ti a, mahse, tihtur i neih chuan a pawilo nimai tehse” a ti hmuk a, ka nuih a,

“ Ok...ka kal mai ang, ei teuh la” ka ban ka vai zauh a, hawilet miahlo in ka kalsan a, engmah tihtur ka nei miah lo, a bul a awm ka chak rihlo mai zawk.

Ka haw dawn ah Scooy dahna lam ka pan a, Zosanga Car tlanchuak tur ka va hmu hman chiah bawk, ahma kha chuan kan haw dun fo a, Scooty ka siam that hnu ah erawh chuan kan haw rual ngai ta vaklo, mahse, kan haw dawn ah kan inhmu a, kan chhuak rual thin a, a Clinic avanga a buai hnu ah erawh chuan haw rual ni kan nei ta meuh lo, mahse, a haw dawn emaw a kal chhuah dawn ah chuan min hrilh thin a, tunkar ah erawh min hrilh aiin hrilh loh atam ta zawk,

In ka thlen in Kawtah Ben-a Car alo awm a, Zosanga vang in nimin atangin ka lungawilo zual a, Ben-a lam ka lo hrechang leh tawh hauh lo,amak hle mai, ka duh ta lo nilo in ka lo thlahfel takzet ta anih hmel,

“ I lo leng alaw?” Zangkhai thei ang ber in ka ti a, a bu nghut ringawt,

“ Ka han inthlak lawk, Khawnge Midang?” ka chhungte ka hmu lo miau a,

“ I nu a inbual,I pa Dawrah a kal lawk aniang” ati a, mak ka ti thin, engtin nge an rin leh nghal tawp theih thin ni???

Ka kawr hak ka phelh a, Ka Room kawngkhar inhawng thawm hria a ka  hawilet chiah chu Ben-an min rawn kuah ve chiah bawk, kawr ha lo in Bra nen chauh ka ding bawk si, ka rak thawt a, mahse, ka hmui a rawn hup zui hmak thung.

Chapter- 7

Min pawm kang nawlh a, ka ka a hup na lasawn mahse ka hamhaih lutuk a tawng mai nachang pawh ka hrelo, Khumah min nghat a, min bawhbet zui nghal hmak bawk, rapthlak ti zet hian ka en a,

“ Eng thil nge i tih hi?” ka ti a, ka tawng ring thei chuanglo,

“ Ka thil tih ka hria, i Doctor pa hi kalsan tur a i intiam hma loh chuan ka thlah dawn lo che” a ti sup a, ka awmah a hmai a rawn nawr a, engmah ka inbel silo,

“ I zaklo lutuk, kalsawn nghal rawh” tun tum chu ka au ring thei ta,

“ Shh....te vak vak suh, I nu phalna la vek in ka lo kal aw, min chhan hma leh ka thlah hma che animai” hawi chuak chuanglo in a ti leh a, min delh bet hneh lutuk a tal chhuah tum sa teh mahila awmzia a awm miah lo, hetiang mipa ani ngai silo, a inthlak danglam tawh tih hre mahila hetiang em em a Mize mak ah hian a inleh ka lo la ring pha chuanglo, tun ah chuan a duh a neihna turin a vau in min vau ta hial mai,

“Tho phawt rawh, chuti anih loh chuan ka chhang theilo che” ka ti ve thung, a duh hmuh tir nghal ngawt ka tum biklo, a ta ka ni tawh lo a, kan inthen chhan kha engpawh nise hriatchhuah a tum tawk lo a,. Chu mai pawh nilo in a rinawm zolo ah ka ngai tlat bawk,

“ Aih..a pawilo, ti hian kan awm reng mai ang chu, kum engzat nge  i taksa nalh zet mangphan chung a ka muthilh ka hre hrep lo e” a ti leh sup a, rilru mumal ka pu theilo, ka ngei em em ani tawp mai,a sawi hi awih tur nge awih loh tur pawh ka hre thiam lo,

“ I zak lo lutuk, i bungrua ka nilo, i duh a i neih a i  duh loh a i huat tur ka nilo, ka haw hluah hluah che” ka sawi ring lo, mahse, kan awmna a inhnaih lutuk a sawi rin ka mamawh lo hrim hrim zawk,

A inlahrang ta nge nge, ka inkhuh vat a, kha leh chen kan tleirawl lai khan inzui mah ila Mipat hmeichhiat lam hawi zawng in vawikhatmah kan khawsa dun ngailo a,thawmhnaw ha mumal lo phei chuan Mipa in min hmuh hmasak berna ani ngei ang, aaa.....hepa hi chuan keimah ah Hmasaber nihna a hauh tam lutuk..

“Ok...atha e, chuti anih chuan thian pawh nih zui ka duh hran lo, Ka nu khan alo sawi dik chiah mai, nang hian i duh vang reng in min kalsan ngei anih hi..” a kekawr ipte zen in a ding khawng luh a, a mit meng lian leh mi melh na zet chuan min melh ngur bawk,

“ A sawi dik anih chu, kei pawn thian atan pawh ka duhlo che, chhuak rawh, lo let leh tawh ngai suh”  ka ti a, a rilru diktak lo lang chuan min ti na a, a Nu in engtin nge a hrilh chu a chiang ta, a nu vang a kal ka ni tih a hria a, min neih let a tum a, mahse, ka hnar takah chuan a Nu zawk alo rin zia a lang ta anih hi, ka kalsan chhan kha chu dawt ah angai tih a chiang reng bawk,mahse, ka dem hran lo, he khawvel ah hian tu nge mahni Nu te ringlo ngai???, kei ngei pawh hian Ka nu in dawt a sawi theih ka ring eih lo.

“Ka kal ang, mahse, thil pakhat, Zosangliana hi nang aiin ka hrechiang, natna tamtak nen min kalsan a,tunah i kalsan anih loh chuan nangpawh midang in Natna rehthei tawhlo nen an kalsan ve ang che” a inher hmuk a,chhan pawh ka chhan ve hma in a kal zui nghal daih bawk,

A chhuak chu ka thlir a, a vawihnihna atan a kal leh ta, ani chauh kha maw lo na?, keipawh ka na a, kei phei chuan kum 10 tehmeuh Mipa dang ka melh theih loh phah asin, ani na ve kha...eng Na nge ni ngai??, kan inhmuh leh hmasak ber ah Hmeichhe dang nen min hmachhawn a, chumai pawh nilo in an chengdun tawh tih a chiang bawk, an chen dun khan zan tin a awm mai mai dawn hauh lo tih ka chiang, ka ngaihtuah zawng pawn ka luak a chhuak nghulh thei hial mai..

Che lo in ka mu deuh reng a, a kal tak avang khan ka na nawn leh em ka hrelo, na leh chuang tur awmlo khawp khan min sawisa kual tawh a,tunah chuan Zosanga vang in rilru mumal ka pu theilo zawk a,              Ben-a lakah Beiseina ka nei chiah pawn ka hre tawhlo zawk, mahse, eng vang in nge Zosanga kha kalsan tur in min tih kher??!!!, a sawi dik maithei, Delhi ah daih an lo inhre tawh a, Chhanhimi Cousin alo ni lehzel bawk nen, kei ai chuan a hrechiang tak tak mahna, kei ve hian eng nge ka hriat chiah?.

 Kan thawk dun a, an chhungkaw chanchin tlem ka hria a, an harsa lo a,Farnu pakhat a nei a, Pasal neilo in Nau a pawm a, a nu leh pa in hna an nei ve ve bawk, kan inkawp khan hmeichhe dang a kalsan chiah nge kawp lai a nei pawh ka hre hauh lo, thian satliah atangin bul kan tan a, Induhna ah kan lut a, kar hmasa lam kha chuan ka tan Mipa tha ber nilo mahse mipa tha tak anih zia ala lantir a, mahse, tun ah chuan eng nge kan nih ka hre tawh lo, a hna vangin a buai a, mahse., chhungril hian hna chauh anilo tih min hriattir tlat thung.

“Ben-a kha a kal ta mi?” ka nu in alo ti a, ka bu nghat ringawt, ka nu hian a bik tak in Ben-a hi a ngaina em em a, ka nu tihlawm dan a hre hle reng a,kan inkar a tawp tak hnu pawh khan Ben-a nen an inhmuh chuan sawi loh har a ti fo thin  a, kan inthen chhan tak hrelo mahse Ben-a thiam loh anilo tih a hrechiang em em lawi bawk si a, tun hnai a kan In a rawn chuangkai leh pawh Fapa sual tlanbo, lo haw leh ang maiin alo lawm leh hiam hiam ti ila a dik ber awm e,

“ Nupui lah kha ka nei leh dawn lo ati a” a ti leh a, ka ner ru nawk mai, sawi tawh lo se ka ti,

“ A ho em mai, a duh leh nei se, a duh loh leh neilo se kan buaina ani hleinem” ka ti a, tunah  rih chuan ka ngaihdan  dik tak ani reng bawk,

Zanah ka beisei loh zet in Zosanga alo lang hlawl, ka hamhaih letling zawk, a hmelah thil tisual hmel engmah alang lo, Ka pa in a Clinic chungchang vel a zawt luam a, an buai zualpui a reh tawh tih leh a hawnna ah kal ve tur a a duh thu a sawi a, a tawnglai chu ka thlir a, Hmelah chuan Ben-a aiin a let in a tha zawk, mahse, Ben-a ang in mi hipna a nei lo, an san zawng chu a in ang thuak in ka ring a, Ben-a a sang zawk maithei bawk,Ben-a kha  chuan  min ti huam ngailo, ka lungawilo anih chuan tawngka a min thlem lo in a chetzia in min tih lungawi a tum thin a, a hlawhtling ziah bawk,Zosanga hi chu ani velo, ka lungawilohna tur in a hma in a awm ngailo a, tun kar chhung te chuah hi min ngaihsak loh aneih ka hre bawk, mahse, chu pawh hna ah a buai vang ani a,thildang vang ani chuanglo, Nilo..thildang vang anilo tih ka chiang chiah em ka hre bik tlat lo.

“Zawh duh che ka nei” a ti a, ka nu te mut hnu ah ka bulah a rawn thu hnai a,

“Eng?” ka ti mawl tawp ringawt, thil dang sawi tur ka van ta riau pawh hi thilmak tak ani,ahma kha chuan hrilh tur a pui ka nghah thin ania,

“ Ben-a hi i enge anih ?” ka rin loh lutuk lam min zawh tak ah chuan ka nghing deuh lawih mai,

“ Ka naupan lai thian, ka Best ti ila ka sawi sual in ka ringlo” ka ti a, ka melh ran bawk, min en lo in Tv lam a  en a,

“ Chutiang chiah chuan ani pawn a sawi” a ti leh hluk a,  Nilo, engtik lai in nge an lo inhmuh ang le?, hlauhna vang in ka lungphu a rang nghal dawt dawt bawk, eng nge ka hlauh erawh ka hre der thunglo,

“ Chuan...?” ka ti leh sep a,

“ Kei chu thian ah Hmeichhia ka kawm tam lo, Best ti a sawi tur pawh mipa chuah ka nei, in rilru tur ka hrethiam chiah lo bawk” a ti leh a, min la en chuanglo, Remote a keng a, en tur hrelo in a hmet kual sek bawk,

“ Nia, a hlimawm a, a chang chuan a hahthlak bawk” ka ti leh a, kan inkawp tawh thin tih a hria ani ngei ang,

“ Ka ring, Nizanah Chhanhimi nen an lo kal a, ka ti na dawn che anih chuan kalsan tur che in min ti a, ka hrethiam lo” a ti leh hulh a, hei tak hi Ben-a nen an danglamna, Ben-a kha chuan thil a hriat a sawi chhuak ziah lem lo, Zosanga hi chuan min hrilh deuh vek ti ila a dik maithei,mahse, engvang teh chai in nge chutiang thu atthlak lutuk alo sawi ngawt ka hrethiam lo..

“A sawi ve mai mai anih chu” ka ti thei hram,

“ Nilo, a sawi mai mai lo tawp” a ti leh hmuk a,

“ Aaaa, ka hre lo, a ho em mai, theihnghilh teh” ka ti leh a,

“ Ok, a tha alawm, mak ka ti a, ka zawt mai mai che” a ti a, ka kut a rawn vuan a,

“ Rachel-i kha engtik atangin nge i hriat?” ka zawt lo ang ka ti a, mahse, min kap tlat,

“ Kan thawk ho ka tih kha, ngatinge?” a ti a,

“ Aih, ka zawt mai mai che” ka zawt lui ta lo.

 Mu chungin ka in ngaihtuah a, Zosanga nen kan awmdan kha in ngaizawng nilo in thian kan ang mah zawk in ka hria, Ben-a...Oh, hepa hi ka  biak a ngai, ka phone ah a number ka zawng a,a number ka neih thin kha ka delete daih tawh a, hriat lah ka hre reng tawh hek lo, mahse, tun hnaiah kan han inkawm khawm leh deuh hnu hian Mazawmi te Nupa in Group an siam a,tah khan kan pali chuah kan ni a, loh theih loh in a number chu ka hre leh ta tho,

“ I mu tawh em?” a pick veleh ka ti nghal a, Polite deuh a biak ka tum bau lo,

“ Mu dawn mek, min ngai leh si ami?” a aw pa zet ah chuan nuihzatna ri a ri tel a, ka hmel hmu pha lo a a awm chu ka lawm takzet, ka biang sa hat hat ah chuan a sen nasa hle ang tih ka hria,

“ Chutiang anilo, engvangin nge Zosanga bulah khatiang in i tawng a?” ka ti leh hmak a, a thaw hawk ri ka hre zui zat bawk,

“ Eng maw ka sawi?” a ti nghut a,

“ I hria, khatiang kha vawikhatmah lo sawi tawh suh” tih leh Off ka rual nghal daih bawk, a rawn tawng leh tur ka hre chak lo, mahse, a rawn call back zui zat thung, ka pick lo, a rawn ti nawn leh tho,

“ I duh duh i sawi anga., kei in ka ngaithla ringawt dawn tihna mi?” a rawn ti a, thinrim aw a nilo, mahse, a nelawm chuang der lo,

“ Sawi la..” ngeiawm thei ang ber in ka ti hlak a,

“ Zosangliana hnen ah khan a tihnat che chuan a pawi ang tih ka sawi, chuan , Ka Hmangaih thin che a, ka rilru ala ngai reng bawk tih pawh ka sawi, adang ka sawi zel dawn em?” a tawp lamah chuan thinrim tih hriat zet in a aw a vawt raih mai,

“ Ben....” ka ti ringawt, engtin nge chutiang a sawi theih zawk?!!!

“ Sawi rawh, ka ngaithla, adang chu ka sawi zawm zawk dawn nge?” nelawmna pakhatmah tel lo hian a ti leh hluk a,

“ Aih, engtin nge chutiang i sawi theih zawk?” ka aw a lawi rat mai,

“ Oh, ngatinge ka sawi theih loh ang?, Dawt ani hleinem” a ti leh tuar a, ka phu zawk bawk,

“Ben, hetiang em em hian engtin nge i inthlak danglam theih zawk?” sawi tur dang ka hre thlawt lo,a nui hawk a,

“ Ka nun hi tu in nge thlak danglam tih chu nang aia hrechiang tu nge awm chuang ang?” ka mittui a rawn tla a, engvangin nge hetiang khawp a min Hmangaih anih si chuan Hmeichhe dang kut a vawn theih ka hrethiam lo,

“Tunah chutiang sawi na hun ani tawhlo, hun kal tawh chu kal liam tir mai rawh, khawngaihin ka nun ah lo inrawlh tawh suh” ka aw khur hrep chu a,

“Mate...” a ti hman chuah a,

“ Nilo, khatin min ko suh,i thian nih ka duh lo a,ka engmah a tan ka duh lo che, lo inrawlh suh” ka ti leh tawk a, a hma ai chuan ka aw khur pawh a ziawm ta, mahse, ka mittui avangin ka mit a huh vek thung,

“ I sawi ngun ta e, kal ang che, kal mawlh rawh” ka Off hma in a Off a, thawveng hawk tur ka nih laiin ka thawpik zual sauh zawk in ka hre hial thung, min kal tir se ka duh ani lawmni??, min thlah na tawngkam vawiin hian vawi hnih ngawt ka dawng ta, ka natna te kha engmah siam that theih ani tawh lo tih ka chiang a, Zosanga bul  aiin tun thleng hian Ben-a bulah awm nuam ka la ti zawk tih erawh ka pha theilo hul hual, mahse, nat nawn leh ka duh lo a, kawp nih ka duh hek lo, min neih let a tum na ah hian vawikhatmah Chhanhimi then a min neih a tum thu ala sawi hleinem, eng vang in nge midang thla veng ah ka inphal teh lul ang???

Ka muhil mang lo, Zosanga nen hian kan la inzui rei loh vang nge ka hrelo, mut theih loh phah nan vawikhatmah ka la hmang lo, mahse, Ben-a hi chu vawi engzat nge ka tah pui a amah vang a ka mut theih loh ka hre seng tawh lo,ka nun ah alo lan hian buaina hlir min thlen sak in ka tawh hial bawk, engvang pawn lo kalsan mah ila min lo nghak tur ani dawn lawmni?

Monday a thlen meuh chuan ka nui nguai lutuk pawh a ziawm leh ta deuh, Damdawiin ka thlen veleh Zosanga nen kan inhmu a, nui chungin min rawn pan a,

“ Ka lo nghak che a, Duty zawh veleh Clinic ah lo phei ve la, i hman angem?” a ti a, kan boruak hi sawi thiam chiah si loh hian a nuam lo ka ti tlat tawh a, Ben-a thusawi kha engvangin nge a vaiin min hrilh loh tih ngawt ka lo ngaihtuah daih thung,

“ Hey...ka sawi i hria em?” ka hmai bulah a rawn kun a,

“ Er...aw, hria e, hman ang” ka ti bah nawk mai, a chal a ti chuar tap a,

“ I dam tha meuh maw?” a ti leh rih a, midang tumah an awm lo a, ka kawngah a rawn kuah a,

“ Ka tha, thildang ka lo ngaihtuah daih a, min thlah rawh, midang an lo kal ang” ka ti a, a kut ka phelh sak a, a rum deuh hawk bawk,

“ Ok...a dik reng, kei nen a mualpho chiam chu a ho viau ang” rang zet hian ka en a, a hma ang in a nui ta hauh lo, Ben-a thilsawi bawk kha ka rilru ah alo lut a,

“ Engmaw?” ka ti a,

“ Ka sawi mai mai, Ka Round lawk dawn, tlaiah chuan aw..” a ti a,a kal chhuak zui chu ani der, kar kalta khan amah ah diklo awm khan ka hria a, ka rilru a nuam lo a, Rachel-i nen ka ringhlel ru bawk anih kha, mahse, ama thiam loh nilo in Ben-a tawngkam vang zawk khan alo lungawilo anih ka ring ta zawk, hreptak hian a...

Duty chhung zawng in ka rilru pawh ka pe hleitheilo, ka hna nuam ka tih tehlul nen, vawiin zet chu ka Mood a fuh hlawllo ani ber, Lunch ei na ah kan inhmu leh a,mahse, ani chu a pangngai thlap tho, keimah hi ka diklo kual vel vek,

“Scooty i keng em?” a ti a, a thil ei na Plate a nawr sawn a,

“Aih, Ka kut ruh hi a nuam vak lo a, ka khalh peih chiah lo” ka ti a,ruh seh ka nei a, thlasik ah chuan tawrh tham tak ani, Ben-a chuan a hria, kan tleirawl laiin na ka tih vangin a bul ah ka tap tawh miau a...

“A va zialo ,khawi ka lo en” ka kut a rawn ban a, mahse, a rawn khawih fuh hma in ka la sawn daih thung, mi dang awm ve teuh na hmun a kut lo in vawnsak ka duh lo,

“Kan kal rual mai ang chu, a remchang zawk alawm” ka chet dan ngaipawimawh lo hmel fahran hian a ti a,

“Um, nia, chho ila, tih fel ngei ngei ngai ka nei a” ka ti a, ka tho zui nghal a,min hnial lo in a tho ve nghal a, Hmeichhe dang awm ve ten an melh hrek hrek tih ka hria, a chhe hran lo a, a lian bawk si nen, Hmeichhe tan chuan hmuhnawm a tling pawh animahna, ka dem hran lo e.

Clinic kan panna kawng tluanin ka tawng manglo, a khat tawk in a tawng leh zauh thin a, thil a sawi mai thin emaw ka ti a, mahse, Ben-a thilsawi kha a sawi kim si lo, sawi chhuak se, in hau emaw in hnial law law ila ka thawveng hawk zawk ang, mahse, engmah a sawi der silo,a hria tih ka hriat miau avangin keimah ka inthlahrung a, a Bialnu hlui emaw, a thiante pawn khatiang khan min tawngkhum ve se engtin nge ka awm ang pawh ka hre ngam lo hial zawk.

Clinic kan thlen veleh Rachel-i leh hmeichhe dang pakhat in an lo be thuai a, kei pawh a mawi ah min be ve tho bawk, ka kal hmasak khan a bialnu ti in min hmelhriat tir tlat lo a, tun ah pawh chutiang ang in min en hauh lo,an infiam bawrh bawrh a, ka awmve tih pawh an hrelo in ka hre hial zawk, hmeichhe dang lo awm ve chu Zosanga Cousin alo ni a,Rachel-i nen an in nel dan ah Zosanga leh Rachel-i hi rei tak an inkawm tawh tih alang thei vek in ka hria, amah khan Apollo Hospital a an thawh dun vang a inhria ti mahse ka awi thei tlat lo.

Thlanglam Balcony lian lo te awm  ah ka chhuak a, an thil tih puih ka tum lah in an duh bawk silo, thut ngawi reng ka ning a, a khat tawk in min be ve bawk mahse an titi engkim in pawh tak kar ah chuan nuam ti tak a thut theih pawh anilo,

“ Apui...i ni ti raw?” ka hawi let a, Valpuia lo ding reng ka hmuh rual in mak tihna alo lut zat bawk,

“ Ni chiang, i dam em?” ka ti a, a rawn chhuak a, kan inhmuh lohna a rei tawh, thian ang bak in ka en thei tlat lo a, mahse, ani pawh khan thian bak engmah a sawi chuanglo,

“ Dam alawm, nang zawk?’ a ti a, a hmel hmuh a nuam reng mai,

“ Um, eng ti tih in nge ilo kal hlawl a?” ka ti leh a,Zosanga nen  an lo inkawm reng tawh zawk nge ka hrelo,

“ Zawh che ka tum mek min zawt, eee...Zosanga hi in Hospital ah khan alo kal tak tiraw?” a tileh a, Zosanga nen an lo inhria anih chiah chu..ka bu nghauh a,

“ An bungrua tlem ka rawn dah sak a, a thawh puitur Rachel-i hi ka thianpa nau ania, min ngen nasa ve bawk nen,hman lo chungin ka rawn kal sak mawle” a ti a, Huizzz, Aizawl hi alo zim teh e..

“ A nih chu mawle, Zosanga nen in inkawm tih ka lo hrelo a,kal lehnghal i tum ami?” ka ti leh a, a lu a thing a,

“ Kal nghal lo ang, adang kan nau te ho in an rawn dah leh dawn a, ka lo nghak ang, Zosanga nen chuan inkawm nang, Rachel-i nen hian an inzui rei tawh a, ka thianpa te In ah ka lo chuangkai hnem bawk nen, kan inhmu fo a” a ti leh a, ka chhungril a fan rawih rawih mai, mahse, Inzui tih khan in ngaizawng tih na ani chuang hleinem,

“ Nia, an inkawmngeih hmel khawp mai” ka ti sep a, midang chanchin sawi viau nuam ka tilo,

“ Inkawm a??, Aizawl ah a insawn tak vang alawm Rachel-i hi a rawn haw ve, khulamah Pay a tha zawk daih a, mahse, an Pahnih a awm dun an duh vang in a rawn bang alawm..”a sawi engmah ka hre zuilo, a hmui phun mawlh mawlh chu ka en reng a, mahse, engmah a sawi ka hre zui lo...

“An pahnih a awmdun an duh vang in a rawn bang” tih lai chu ka bengah a ri nawn awn awn ani ber...

Chapter – 8

“ Hlimpui, ka sawi i hria em?” ka darah a rawn sawi a,ka inthing deuh nawk a, awmze nei lo zet hian ka nui a.

“ Aw, hria e, kal ka ngai tih ka lo theinghilh a..” ka ti niah niah a.

“Aw, la awm la, kan inhmuh khat nen” ka rilru hrelo lutuk in a ti leh a,ka nui leh a,ka nuih chhan ka hrelo.

“ Lo la leng rawh, tunah chuan ka kal phawt zawk ang” ka ti a, Inchhung lam ka pan chu min rawn zui a, Zosanga leh Rachel-i an lo thu dun a, Zosanga Laptop hnai zet ah an  bih dun  bawk a,phawk  zet hian ka lut thawm hria in min rawn en a,

“ Ka kal teh ang, tih tur ka nei a” pangngai thei ang ber in ka ti a,ka Bag ka la a,

“Maw?, hetah Dinner kan ei ang chu ka ti a” Zosanga chuan tih leh din chhuah a rawn rual a,

“ Min hrethiam ru, ka lo hre lawk lo bawk nen tih ngei ngei ngai ka nei a, ka kal” hawi let lo in kawngka lam ka pan a,

“ Cat... Dingteh” ka hnung a Zosanga rawn pen ri ka hriat rual in tlan san vang vang duhna in a tur in min tur ut ut ani ber, mahse, ka ti ta lo, ka ding a, muangchangin ka inher a,

“ In ka thlen hunah ka rawn bia ang che, thlah ka ngailo, i buai em kha” ka ti dam dap mai, ka zaidam hauh lo a, mahse, ka thinrim lutuk chuan ka tawng a dam dap thin tlat a, Ben-a kha chuan hetiang a ka awm hi chuan ka lungawi loh chhan zawn chhuah a tum ngei ngei thin,mahse, tun a ka hma a ding hi Ben-a anilo a, Zosanga a ni miau a, engmah ka lungawi lohna chhan a zawng lo ang, ka lungawilo tih pawh a hre kher lo ang,

“ Mahse...a hma khan engmah i sawi si lo a” min rawn pan a, ka tawlh hnung hrat thung,

“ Nia, sawilo, ka lo theihnghilh a, ka lo bia ang che” ka then sak a, ka rin ang chiah in ka lungawilo tih engmah a hrelo,

“ Ok, mahse, ka lo thlah ang che” a ti leh a, kalsan ka duh na in min nawr na lutuk, ka ten a, ka haw bawk,

“ Ngai lo ka tih kha...” ka ti a, a hmeltha lutuk chu beng chawrh lo tur in ka insum nasa kher bawk.

Kawngpui ka thlen thlak meuh chuan ka  inseh ruh nasat zia ka hre ta chauh,engmah thil pawi ti lo leh tihsual nei miah lo ang mai khan engtin nge min hmachhawn ngam ka hre lo, he khawvel mipa te hi hetiang a mi tihnat chauh thiam hi em ni an nih?, Ben-a khan kalsan turin min ti ngei a, mahse, ka awih duh lo a, min hrilh atangin kum em pawh ala liam lo, kum chu sawi loh, thla tam ala liam lo, ka hre chhuak tawh a, Bum ka ni tih ka hriat avangin ka na ani tih hria se chuan kut bengin a lam duh ngei ang.

In ka thlen veleh Room ka pan nghal a, Ka nu in min biak na pawh ka nawm loh chhuanlam in ka chhang mumal lo, Khumah ka  thawmhnaw pawh thlak lo in ka let tawp a, rilru tihfim tum in ka mit ka chhing a, Valpuia khan a hre sual ve thei tho asin., Nilo, ngatinge a hriat sual ang?, Zosanga nen kan inzui tih pawh a hriat hmel loh a, hria ni se chuan a sawi hauh lo ang.

Ka Phone nghawr dar dar chu peih lo zet in ka en a, Zosanga..In ka thlen hunah ka lo bia ang che ka ti a, ka be ta miah lo,

“ I la thleng lo ami?” a rawn ti nghal a,

“ Thleng tawh e, ka buai deuh a, nakin ah kan inbe dawn nia” ka ti a, biak chakna pakhatmah ka nei rih lo a, ka rilru siam fel hma chuan biak rih loh ka duh ber bawk.,

“ Um, mahse, ka va hrethiam lo...” a ti hman chuah a, ka Off nghal daih,a hriat reng thil sawifiahna a mamawh lo.

Chawei tur a ka nu in min rawn koh pawn ka lu nat chhuanlam in ka lo hnar a,min ringhlel hran lo aniang, engmah sawi lo in a chho leh mai bawk a, Zosanga vang in ka rilru a na nge bum ka nih vangin ka rilru ana ka hrelo, ka nun ah Mipa pahnih chauh Nulat tlangval kawng in ka la kawm a, mahse, kalsan ka ni ve ve, Ben-a kha chu tap chungin, ka duh lo chung kal turin min nawr luihna avangin ka kal a, Zosanga hi chuan min bum a,amah ka rinna a ti chhe vek thung..

Ka Room kawngka kik thawm ah ka harh a, ka lo muhil sek anih hmel, ka Room light ka On loh vangin a thim thap bawk, ka Phone ah Dar zat ka en a, Dar 7:30 alo pel tawh a, Light ka On hmasa te te a, Ka nu chu nise a kik kher in ka ringlo, Mazawmi emaw Zampuia zawk pawh ani maithei,

“ Lo lut rawh “ ka ti a, Lukham ngheng in ka thu kang a,

Ka beisei loh zet in Zosanga a rawn lut a, ka luak mai dawn in ka hre hial, Khum ah a rawn thu a, tawng mai na chang pawh ka hrelo, sawi tur ka hre lo ani mah zawk,

“ I dam tha lo tih sawi mai tur che ania” min rawn ban a, mahse rang lutuk in ka thle sawn nghal a, a meng phar deuh awk bawk, nia, amak khawp ang, min khawih a tum in vawikhatmah ka hawisawn san ngai lo tlat a,

“ Ka tha..ilo kal duh kher anih kha” ka ti a, Naktuk ah a tan a ni pawimawh lutuk a thleng dawn a, chumi hma chu ka insum a tha zawk mahna, ka then anih pawn ana ve kher lo ang, a duh duh a bumkual tawk vel ka ni miau a, ka awm lo anih pawh in kei aia a mamawh zawk a bulah a awm dawn tho a, an awm dun duh vang a rawn haw anih ngei tak kha...

“ Ka rawn Call leh che a, i pick thei silo a, rawn kal ka tum sa hrim hrim a” a ti leh a, min melh run bawk, ka thle bak a,

“ Ka lo muhil a, naktuk ah i buai dawn si, ngaihtuah ka ngailo, va haw tawh rawh” ka ti  leh a, engtin nge pakhat pawh tih lawm ka harsat lai hian mi pahnih te min han tih lungawi theih bik ni??, chupawh meng reng chung ve ve, hmun khat a awm tawh ve ve lehnghal....

“Tunah i ziawm tawh mi?” ka chal khawih tum in a rawn ban leh a, mahse, ka thle sawn leh ta tho,a kut hmawr pawn min khawih ka duh eih lo,

“Aw, ka tha ka tih kha..kal tawh rawh” ka ham lui bai bai bawk, min en deuh vang vang a, hreh hmel zet in a tho ta nge nge,

“ Mangtha le, Naktuk ah dam hman hram rawh, ka tan bul tan na ani dawn a,min tel pui loh chuan awmzia a awm lo tih i hriat kha” ka ten lutuk, vawm pawp mai ka chak takzet bawk, mahse, ka nui lui sak a, tawngka a chhang lo in ka bu ta nghat zawk a,ka kal ngei ang, ka kal hnu atang chuan ka nun atangin ka theh chhuak tawh ngei bawk ang.

Thinrimna in min hnawh up up a, Ben-a nen a kan inthen khan mi a a chhuak lo tur khan a fight in ka fight takmeuh anih kha, mahse, Zosanga hi chu chutiang ani lo,   Min bum tih ka hriat tlat avangin thinrimna lo engmah ka rilru ah a awmlo, na lo tawp chu ka nilo, kum chanve dawn ka lo zui tawh a, nat loh tawp chu thil theih pawh ani lo, mahse, ka lo Hmangaih hauh lo tih ka chiang ta viau, lo hmangaih ni ila chuan tunah hian hahdam tak a mu chungin thil awmdan ka ngaihtuah kual vel miah lo ang, ka tap emaw mumal neilo tawp in ka khawsa zawk ngei ang, Ben-a nen kan inthen khan chutiang chiah chuan ka awm a,Nun awmzia ka hrelo tawp anih kha...

Damdawi in ka  kal hmasa a, kan thawhpuite thenkhat Zosanga Clinic hawn na lam a kal ve duh an awm avangin Taxi in kan kal rual hlawm a, Zosanga phei chu a rawn kal lo hrim hrim,hawn na han tih lem ah a hlan na Prog tawi te ani mah zawk, abak chu tlai dar  3 atanga dar 6 thleng clinic thar lawm nan a Free in a en dawn a, kan thlen chuan an lo awm teuh tawh mai, a free nilo pawh nise amah pan tu tur an tlem theilo hrim hrim,

“ I lo kal thei maw?” min rawn pan vat a,a hmel ah chau hmel a lang thei bawk, nizan lamah an riak dun anga, an muhil meuh lo ani mahna, huh...ho em mai, vawiin bak hi kei nen inzawmna kan nei tawh dawn hleinem,

“ Um, lo kal thei e, khawnge Rachel-i ?” ka ti a, a hawi kual a,

“ A awm kha, ngatinge?, i be duh mi?” ati a,

“ Duh hran lo e, ka zawt mai mai che” ka ti awlsam et, a mithmul  a ti sang awk a,

“ Lo kal ru..” ka hnung lam a en a, tu nge a biak en tum a ka hawi let chu Ben-a nen kan inmelh ta ran mai, mahse, vawiin kher ah hi chuan inhmuhkhawm pawi ka tih loh ni ber ani ang,Chhanhimi hmel thar sar mai chu ka en a, mi hi ngatinge an vanneih theih em em bik ni ka ti rilru hial, mahse, kei lo pawh hi nasa tak a bum tawk tawh ve tho anni, kan natna hi midang natna aiin nasa zawk in hre thin mah ila mi fing pangngai chuan kan nun ah vawikhat theuh kan duh tak te lakah natna kan  lo nei vek  mai,midang te hi han zawt ila keini ai pawh a na zawk tuar  a dam khawchhuak an lo ni deuh zel bawk.

An ri hlut a, mahse, Ben-a chuan min biak tum hmel a pu eih lo,                 min melh peih thlawt lo niin ka hre mah zawk, Rachel-i a rawn thu hnai ve a, Chhanhimi nen an inbiak danah an in nel thawkhat tih a hriat mai bawk,rei vaklo hnu ah hunser h hmangtu tur a rawn thleng a,Tawngtaina in a hlan a, eitur an buatsaih kan ei zui a, dar 3 ah free clinic neih zui tur anih avangin muangchan lutuk na hun pawh a awm lem lo,

“ Rachel.. khualam hna i rawn bansan fel ta mi?” Ben-a chuan a ti sup a,

“ Um,helam hi a pawimawh bawk sia” Zosanga a melh zauh a, reilote nimahse ka hmuh hmaih hauh lo, Ben-a te pahnih leh kei, Rachel-i, Zosanga, thil ei in kan thukhawm a,

“ Min pui thei dawn hlauh a, lawmawm tak ani” Zosanga chuan alo ti ve a,

“ Tunah chuan Inneih lam hi thawm a hnai mai lo maw?” Ben-a bawk in a ti leh zel a, a mizia hi eng vang a ngeiawm ta em em nge ka hrelo, mahse, tunah chuan a ngeiawm zoh poh leh ka tan a lawmawm ting animai, a rin loh ang tak in kalsan ka tum mek tlat,

“ Nia, ka ring deuh keipawh, mahse, Hmeichhia zawk in sawi hi a nuamlo” nui hak hak chung in Rachel-i zawk in a rawn ti leh a, ka tan chuan tah na tham zet nimahse ka thawl hawk zawk tlat thung, Zosanga chuan min rawn en vat a, Ben-a erawh in a chair hnung a ngheng a, min hmusit ngawih ngawih in min melh ka ti mai, nuam a tih hmel viau zui bawk a,

“ Ka nghakhlel hle mai, ka thian tha ber nilo mah se Zosanga hi hlimse ka duh “ ka rin aiin ka tawngkam a dam in a pangngai hle bawk,   

“ Cat...” Zosanga aw a manganna ri chu ka hriat hmaih lo, mahse, thinrim emaw, tawngkam mawilo tak a biak zui ka tum chuanglo, midang awmlai,chu pawh Ben-a awm lai lek phei chuan ennawm chhuahna nih ka tumlo bur,

“ Ka kal a hun in ka hria, duhsakna ka hlan che u, Clinic hi ala changtlung hle ang tih ka ring tak tak ania” tih pah in ka tho a, ka chair ka nawr sawn a, mahse, ka Bag ka la tur chu Zosanga’n min rawn lak khalh a,

“ Ka Drop ang che” in ringtawk lo zet hian a ti sup a, a awmdan chuan min tih thinrim ai in ka nuih a ti za zawk, Ui eiru man chhuah ang maiin a khup zul mai,sana ka en zauh a, Dar 3 a ri tep tawh, nui chungin ka en a,

“ A ngailo e, i Damlo en tur ten an nghak che a, dar 3 atang a tan tur anih kha” dam dap in ka ti leh a, midangte hmel landan in ang lo lutuk chu ka en kual a, Chhanhimi hmelah chuan pawi tihna alang a, Rachel-i erawh na tuar hmel a ang, Ben-a.....nuihza insum tih hriat zet in a No tlang a tuai hauh huah bawk, hrep tak a....a tan chuan ka che chhe vel chu khawvel a Film hmuhnawm leh Hit ber ang mai in a hmuhnawm ang chu le...

Ka free leh ta...Ni e, ka Free, Mipa hi ka hnaih leh tawh ngaiin ka ringlo, ka khua a har anih pawh in thil dang inhnemna tur ka zawng tawh mai ang, eng nge ka zawn dawn hrelo mah ila khawhar in ka Thi dwnlo tih ka chiang, Zosanga nun lem leh tenawm lutuk kha Ben-a lo hian min hmuh fiah tir lo tum se chuan ka hmu thiam ngei ang, mahse, Warning min pe tu kha midang nilo in Ben-a ani miau a, ka ring lo nilo in min hmuhsitna ah ka ngai tlat alawm.

“ Ding tawh teh” Ben-a aw ka hriat rual in ka phu zawk mai, ka hawi let a, ka hnungah kekawr ipte zen chungin alo ding a, min zui tih ka hre lo reng reng, motor ah chuang duh lo in ke in ka kal a, ka kal thui tawh viau bawk.   

“Eng nge?” ka ti hlak a,eng vangin nge min zui ka hre hek lo,

“ I phone hi..” a rawn lek chhuak a, thildang vang a min zui  tur a ka lo ngai ngawt kha mawl ka inti ru kher bawk,

“Eeeee , ka lawm e” tih leh ban ka rual a, mahse, a la let leh a, a kekawr ipte ah a thun zui daih bawk.

“Zanah ka rawn dah dawn nge tunah ka rual in ilo kal dawn?”  a mit a ti zim a.

“ Tun ah min pe rawh” tih leh ban ka rual leh a, mahse, a din ngai in a ding a, min pek tum hmel a pu eih lo.

“ A tha anih chu, zan ah ka lo dah ang” a in her a, a kal zui chu a ni der, thinrim zet hian ka thlir a, ka rilru buai zia  min dawnpui hauh lo, zan ah alo dah hun ka nghak anih loh chuan tun ah hian ka zui ngei angai, beidawng thinrim ru teuh bawk si in ka in sehruh a, ka zui ta nge nge.

Motor ngheng in alo ding a, Chhanhimi pawh ka hmu chuanglo, “ khawi le” tih leh  din hnaih ka rual a, mahse, a in her a, Motor lam ah a thle buk a, “ lut rawh” a ti hmuk bawk.

“Ka Phone...” ka ti leh a, mahse, na zet a min melh ka hmuh rual in tih theih ka neih loh zia ka hre chiang ani ber, ka lut ta nge nge, a rawn thu lut ve a, engmah sawilo in Motor a Start a, kan tlanchhuak chu ani der, kan veng lam pan in a tlan zel a, kawng chanve lai kan tlan hnu ah pawh tu mah mah kan la tawng lo ve ve, ka tawng chak hlawl lo,Zosanga vang khan na viau tur ah min ngai pawh ani mahna, mahse, ka na teh chiam lo tlat, ka rinhlelh na kha hun rei la liam lo mahse ka lo tuar lawk ani ngei ang, han nat belh vak na tur ka hre lo, Ben-a ang a min ti na tur Mipa hi an awm ngai dawn tawh lo tih ka chiang,mahse, nasa tak in Mipa ka rin na erawh min tih chhiatsak tho mai.

“ Engtik ah nge i hriat chhuah?” ati hmuk a, ka phu deuh zawk bawk, ka en thuai a, mahse, min en lo in hmalam a en a, a kutzungtang sei thlurh chuan hnehsawh zet in Steering a herh kual a,

“ Eng chu maw?” a thilsawi awm zia hre mah ila ka hrelo der a.

“ Zosanga leh Rachel-i kha” a ti leh nghut a.

“ Engmah ka hre chhuak hleinem, ka sawi ve mai a, ka sawi fuh anih dawn chu” ka ti nghat a, min nuihzat zawm zel tur chu ka duh bau lo.

“ Ka sawi lai khan min ringlo a,i hmuh hnu ah chuan i ring ta chu ania” a ti leh sup a, min rawn en a, kan mit a intawng a, rang lutuk in ka hawisawn nghal daih bawk,a nui hawk ri chuan ka awm a ti nuam fahran lo.

“ Tu thusawi mah ka ring mai mai ngailo, keimah ngeiin ka mit a ka hmuh hma chuan” ka ti leh a, mahse, ka sawi zawh rual in ka sawi loh tur ka sawi tih ka hre chhuak leh lawi a,awm zia a awm tawh der silo.

“ Nia, Ka nu leh keima chungchang kha chu i sawi telloh hram ka beisei” ka mit ka chhing a, ka sawi sual pawi zia ka hre chiang viau bawk.kan pahnih chungchang ah khan Ben-a sawi nghak lo in a nu sawi chuah awih in ka kal san a, tun a ka thil sawi nen khan a in per san chiang mah mah.

“ Chulam ka sawi lo e”ka ti leh hmak a, ngeiawm zet in a nui hak bawk.

In kan thlen thlengin kan inbe ta lo,

“ Khawi le?” chhuk lo in ka ti leh a, hriatthiam har zet hian min en a,

“ Leng tur pawn min sawm dawn na nge?” a ti a, a awmdan vel chuan ka nuih a ti za thut a, za zet in ka nui chhuak hawk bawk, a hmel a mak tihna lang chuan ka nuih a ti za tawlh tawlh bawk,

“ Eng nge i nuih a?” a hmui a pet sawi zauh a, chu thil chuan ka nuih za a ti tawp chiang viau bawk.. Sexy ka ti thin miau a.

“ Engmah..lo lut la” ka ti a, ka chhuk a, ka hnungah min rawn zui ve bawk, vanduaithlak zet in kan in alo in kalh thap mai, tun ang hunah chuan ka nu a awm ziah si, In chahbi ka kawl ve pawh Rom ah ka dah daih bawk,thil tha lo thleng a awm nge ni ang?

“Ka nu ka biak angai, ka phone kha” ka ti a, a kekawr ipte a zen a, min pe ve mai bawk, inhnial chiamna hun anilo tih kan in inkalh thap ah chuan a ti chiang viau,Ka nu ka call a, ala pick theilo zui,ka ti nawn leh a,

“ Mampui, i haw tawh mi?” Hello pawh ti lo in a rawn ti a,

“ Aw, khawnge i kal?”

“ I putea a tha lo thut a, tunah chuan hei a ziawm tan e, kan lo haw har lo ang” a rawn ti a, ka Putea hi zu a in nasat avangin a buai zauh zauh a, kan chhungkaw tan thil thar anilo,mahse, ka nu tan chuan a Nau neih chhun ani miau a, hmangaih tawp theilo in a hmangaih a, a hlauhthawnna a ngai reng niin ka hre thin.

“ Mahse, Nu... chahbi..” ka sawi zawh hma in Ka Phone chu Ben-an min rawn laksak a,a Off nghal daih bawk..

“ Engthil nge i tih ?” thinrim zet hian ka melh a, vawiin chu min ti buai tam mah mah tawh.

“ I nu kha i tello pawn tunah chuan rilru hah na tur a ngah tawk rih, kan In ah kan phei rih mai ang” a ti nghut a, a nupui ang mai a min chei vel chu ka thin a rim ru et et bawk.

Ka Phone a rawn ri leh chiah bawk, ka nu ani ngei ang, min pe a, ka rin ang chiah in ka nu alo ni a,

“ Engmaw i sawi kha?, i chahbi i ti bo em ni?” a rawn ti a,

“ Room ah ka dah a, mahse..” Ben-a mit meng a warning ka hmuh rual in a sawi dik tih ka ngaihtuah a, ka lut thei dawn lo tih a hriat chuan Putea ngaihtuah em em si in lo haw a duh ngei ang tih ka chiang.

“ Ben-a nen kan nia, Ben-a te In ah ka lo va leng phei mai ang, tih tur kan nei tho a” ka ti ta nge nge.

“ Ole, a that hlauh chu, chuti anih chuan i pa alo kal ve mek a, kan rawn haw hma vak lo maithei ania” a ti a, a dah zui a, ka nu leh pa hian hna an thawk ve ve a, mahse, ka nu hi a hrisel na a that tawk tawh loh avangin Medical pension in a chawl tawh a, In a chhuahsan ngai mangloh avangin ka chahbi kawl ve pawh ka keng chhuak ngai meuh lo, ka hriat chhuah changin ka keng zeuh zeuh chauh.

Ben-a te In kan thlen chuan a pa alo awm a, min hmu thut mak ati anih pawh in a hmelah engmah a tilang lo, tha tak in min lo bia a, ahma atangin an chhungkaw zingah chuan a Pa hi ka nel ber hrim hrim a, a nau phei chu ngaina lo tak ka ni. 

“ I hna lam i tluang em?” alo ti chuar chuar a,ka tluan thu leh a dam tha em tih ka zawt ve bawk a, a that thu in min chhang a, Mazawmi hnen atanga ka hriat leh dan in Ben-a Aizawl lam a a awm ngheh tak hnu hian engmah a pa hian a khawih pui tawh lo anih hmel,nia, a fapa hi a danglam tawh a, tunah chuan sumdawng mi tak tak ani tawh a,a duh loh zawng ah chuan tuman an nek lui hauh lo ang, a duh nei tur lah in engmah tih hreh a nei dawn hek lo.                                                                                                                                             

“ Pa, thil tih lawk tur kan nei a, Pui, chho ila” ati zui nghal zat bawk, engmah sawi dun tur kan nei maih silo, kal duh lo ngawt dawn ila thil dik ani der bawk silo, Step ah kan inzui chho a, vawi tam tak ka lo tlan kual tawhna hmun nimahse tun ah chuan ka ti dek mai, a Room ngai reng alo la hmang a, a nem hawng a, ka luh na turin a tawlh sawn a,

“ Room ah kher lo kan inbe theilo ami?” ka ti lui talh, thih hreh in ka hreh, mahse, ka inrin hma in min rawn pawt a, ka ke chheh a fuh lo, ka pai nawk a, amah ka bawh rawk rawk mai, nghet zet in ka kawngah a rawn kuah a,

“ Lut rawh, ka Room i kal lohna pawh a rei tawh alawm” zawi fiah zet hian ka beng bulah a ti sup a,min nawr lut a, kum eng nge maw zat liam hnu ah a Room chhung ah ka ding leh ta chu ania, mahse, tunah chuan neitu ni a ka inhriatna te kha a bo zo tawh a,mikhual la  hriat thar chauh Room a lut ang in ka in ngai ani ber, chutiang chiah chuan a Room ka hriat thin kha a ni tawhlo, a bo zo vek tawh, engkim a thar vek,a luahtu pawh ka tan chuan mi thar ani bawk.  

“ Thu la, i duh leh lo en kual la, kan inbual lawk” a ti a, a Jacket hak a phelh a, khumah a thehthla a, a kekawr kawng a khawih chu ranmg zet in ka hawisawn a, Sofa ka hnaih ber ah chuan ka thu nghal a, zah zel ah ka Phone ka khawih a, engmah ka hmu hleilo a, a thawm ka ngaithla kar  a, ka kun tlat avangin thawmhnaw a hak leh hak loh pawh ka hre lo, kan inkawp lai  thawmhnaw ha lo in a awm ka hmu ngailo, a zak zum ve tho thin a, tunah eng vangin nge ka awm lai a a inhlih ngawt ka hre lo, a danglam tih ka chiang, kan inhmuh apiangin a danglamna ka hmuh belh ti ila a dik ber.

Bath Room a luh veleh ka hawi chhuak a, room chhung chu ka thlir kual a, khum lian pui a laiah a inhung a, Wardrobe lian zet, bang chanve hmawk luah khat  vek in a awm bawk, Khum bul a Cabinet, hniam chenchawn nalh zet ah chuan Laptop  a awm bawk a, Mipa Room tih a chiang hliah hliah ani ber.

Ka in ngaihtuah a, Zosanga vang a rilru na a tap tur ka nih laiin ka Bialpa hlui Room ah ka awm daih lawi si, ka na em em bawk silo, ka rilru ah zawhna alo lut zut zut a, Ben-a hian min lo la hmangaih tak tak anih ka ring ta riau bawk, mahse, Nupui hual a nei a, Nupui hual....nidawn tak, kan kal dawn khan ka hmuh loh vangin ka ngaihtuah zawk a, kan kal tak hnu khan ka lo hre leh tawh miahlo.Mut chhuak in min zem chiai chiai a, ka ngaihtuahna ka mumang ah ka hmu zui ani ber.

Kut lum thur thur in ka biang a rawn sik rual in ka meng chhuak nghal a, hnai zet ah Ben-a nen kan inmelh ta ran mai, Towel a veng a, a hnuaiah engmah a hak ka ringlo.ka thu tha vat a, ani pawh a ding mar nghal a, 

“ Muhil leh rawh” tih pah in a kalsawn a, a thawmhnaw bawm a hawng a, thawmhnaw hak tur a la chhuak a, ka Phone ka en a, ka nu hnen atangin Call ka dawn ka ring tawh a, mahse, min lo la call lo, an lo la haw lo tih a chiang.

“ Putea te In ah chuan min va drop thei mai angem?” inthlhrung deuh in ka ti a, a hriatna a hloh anih loh chuan ka Putea te in a la hria ang, kan kal dun fo tlat a.

“ Hetah chaw ei rawh, chumi hnu ah kan kal dawn nia” awlsam deuh hian a ti liam puat a, ka en a, min hnungchhawn zawng in a ding a.

“ Ka duh lo tih hrechiangtu ber i ni emaw ka tia” ti el deuh hian ka ti hmak thung.

“ Ka hrelo aniang, ka zawt che alawm” ati leh hmuk a, a rawn in her a,

“ Zosanga vang khan eng zat in nge i nat ka hre duh” hrep tak hian a..

“ I lo buai na tur a awm lo, nangmah chiah in ngaihtuah rawh”ka thin in a tuar lo.

“ I na dawn lo, kei aia ti na tu che Mipa i tawng tawh lo ang, kei pawh chutiang chiah chu, nang aia tha ka hmu lo ni lo in nang aia Hmangaih erawh ka la nei lo cheu” engmah zep lo a sawi pawp mai te hi engtik lai atang khan nge a lo chin tak ka hre lo.Mahse, mak tak in a thusawi chuan  lawm na min siam sak tlat tho.

“ Ben..” a dang sawi mai tur ka hre lo.

“ Ka HMANGAIH che ka tih avang khan lo let leh ka tum tih na erawh ani kherlo, nang chu nangmah a awm tur a siam i ni” a thusawi mal tin chuan min chhun sawk sawk a, min deng dawt dawt bawk niin ka hre ber.      

Chapter – 9

Za lo zet hian ka nui sak a, lo hre lawk tur ka ni alawm, hetiang mipa luhlul leh in duh tawk lutuk hian engvangin nge amah kalsan tu Hmeichhia a pan leh ang?.

“ Ka hria alawm, engvangmah in ilo let leh tawh dawn lo tih te chu, mahse, atthlak zet in khang kum sawm chhung teh meuh kha ka lo nghak che anih chu” ka ti a, keimah leh keimah ka inkhawngaih luat avanga mittui rawn tla tur chu duh lo in ka khap sak sak bawk.   

Min rawn pan a, a hmelpa leh hriam hraih mai ah chuan a vawikhatnan na tuar hmel alang bawk, a rawn thu ve a,

“ Min nghak tih ka hrelo, min nghak anih si chuan min be pawp tur i ni asin” min demna aw ka hre leh ta, eng vang in nge engtik lai pawh hian thiam lo zawk ka nih reng mai le?.

Ka tho phat mai,a rilru ka hre chiang nawn leh ni in ka hria a, kalsan ila, tunah chuan keimah a awm ka duh rih ber mai,

“ Sawi tawh lo zawk ang, hun kal tawh sawi fo hian hlimna min thlen lo zawk, nang pawh Zosanga ang tho khan ka thlah ang che,nang pheichu ka thianpa, ka Best i ni thin a, i hlimna ka duhpui leh zual che, i sawi ang chiah khan kei chu mahni a awm tur a siam ka ni tih ka pawm e” ka nui lui sak a, ka inher a, kawngkhar ka pan a, tu ta mah ka ni lo, tumah neih lah ka nei hek lo.

Kawngkhar hawnna ka vuan a, mah se, engthil nge thleng leh ta, ka kawngah ban tha chak zet in a rawn man a, amah si chet in min pawt bet nghal bawk.

“Kal suh, i tello in  ka dam zo lo ang ka ti lo, mahse, angai ang bawk a nangmah theihnghilh tum a Fight leh kha ka peih tawh lo” ka beng bulah a ti sup a, ka darah a khabe a rawn nghat bawk.Ka biang a rawn lum thla pap a, ka mittui tlak lai pawh ka hre hman lo, ka kawng a kuahna a ti nghet sauh a, a lungphu ri dat dat pawh ka hrethei hial bawk, ava rei ta em, hetiang a inhnaih leh rilru inpawh em em a kan awm na kha kum a liam hnem tawh lutuk, mahse, tunah tak hi chuan khatih hun lai ah khan ka let leh ni in ka hre thung.

“ Ni lo e, min kal tir zawk rawh, kha leh chen ka tel lo in i khawsa tawh a, i nun ah kei aia Hmeichhe tha zawk i la lut tawh bawk a, kan pahnih a kan inkawp hi a rem tawh lo, kar ah thil dang tla zep a tam lutuk tawh” ka ti ta duah,ka tahna avangin ka aw a lawi rat bawk, a lam hawiin min kuai her a, a hmel pa leh tak ngul maiah chuan chiang  tak in na tuar hmel a lang bawk, ka khawngaih lo ani lo, ka hmangaih lo ani hek lo, keimah ang bawk a hmeichhe dang  tuar tir ka thei hlawl si lo, kal san,phat san, Bum ni a inhriatna zawng zawng te hi kei chuan ka tuar tawh a, a natzia ka hria, midang in an tawrh ve ka remti ngai lo ang, ka theih phawt chuan ka veng zel ang. 

“Min en rawh” a ti leh hrawk a, ka khabe ah a rawn dawm a, duh lo mah ila ka en lo thei lo, a mit lian leh mi melh na zet chuan min melh run a, thinrimna nge ka hrelo, a hmel awmdan tak ngul mai chu ka hrethiam leh tawh lo.

“Min kal san khan ka natzia i hre phak lo, Mipa ka ni a, ka tuar thei mai,tunah hei chiah hi ka zawt ang che,i kal dawn nge dawn lo?” ka chhan na nghak in engmah a sawi zawm tawh lo, ka ngaihtuahna ka hmang thei lo, vawiin hian ka Bialpa pangngai ka kalsan a, mahse, kum tam tak ka lo Hmangaih tawh vangin rilru buai in hun ka hmang lawi si,nun hi ava hahthlak tehhrep em.

“Ben...min la Hmangaih reng em?” ka zawt let lo theilo, tawngka a min chhanglo in a rawn kun hniam a, a tih tur ka hria, ka mit ka chhing a, a hmui lum ham ham in ka hmui a rawn sik rual in ka mittui a rawn luang a, heihi ani lawmni ka duhthusam thin nun kha, ka hmangaih ang bawk in min Hmangaih a, ata nih ka duh ang bawk in ata ka nih theih nan tunah hian min sawm mek bawk, dimte in ka mit ah a rawn fawp a, ka biang a ka Mittui luang a rawn fawp  hul leh a, kalsan lo turin ka rilru chanve in min ti a, mahse, ka rilru lehlam in kalsan vang vang tur in min tur thung.   

Ka in la hrang ta nge nge, a rum hawk bawk, a hmel landan buai ve nak chu ka en a, mahse, rei anilo..

“Ben, ka hmangaih che a, I nu khan kalsan tur che in min ti lo se chuan tunah hian kan pahnih in chhungkua din in hlim tak in kan awm dun ang tih ka chiang, mahse...mahse, kan duhthusam te kha engmah lo mai an ni zo tawh a, khang kum 10 chhung khan thudik i zawng chhuak ang a, min rawn bia ang tiin ka lo nghak reng thin che a, midang tumah ka ngaihven ngailo...” lo tawng a tum chu a kut ah ka hmui ka dah sak a, a ngawi ve mai bawk.

“Mazawmi te inneih ni khan ka hmu ang che tih beiseina nen ka lo thlir a, ka hmu ta ngei che a, mah se, nang chuan i kut a hmeichhe dang kai chungin , inhualna zung bun i pek ngei bun chung in ka hmu ta zawk che a....” ka insum hman lo, ka mittui a far zung zung ringawt. 

“Shhh...Mate, sawi tawh lo mai rawh” min pawm kang nawlh a, a darah ka hmai ka phum a, ka hriat reng na chuan thil thlen dan a chhui let a, ka tah chhuak ziawm a hnek in a zual tawlh tawlh zawk, Khumah min nghat a, amah a rawn mu ve nghal a, a dar ah ka lu ka nghat a, ani erawh chuan alo tih thin dan ngai bawk in nghet tak in min kuah a,ka hnungah a chul hauh hauh bawk.

Engchen nge ka tah ka hrelo, ka taksa khur nasa lutuk pawh a ziawm ta deuh, ka awmdan ka ngaihtuah let a, ka zak leh tlai khawnu ani ber, ka inla hrang tur chu min kuah bet a.

“ Ti khan awm rawh, vawitam tak ka mangphan tawh taksa hi sik reng ka duh” a ti sup a, a aw sexy lutuk chu ngaihthlak nuam ka ti lo.

“Aih, ka kal a hun tawh, ka nu a haw tawh ang” tih leh tal chhuah ka rual a, ani pawn min man beh a tum zui lem lo,

“Ok, a tha lawm, mahse, reitak min nghah tir lo la a tha ang” nuihza aw deuh hian a ti leh nghut a, phawk zet hian ka en a.

“Ben, ka la sawi zo hleinem,tun a ka awmdan avang khan ka lo let leh dawn tihna ani lo ania, ka Hmangaih ngei mai che, mahse, kalsan tur che in ka rilru ka siam fel tawh” a tawp lam chu a ri chang chang a ni ber.

“ Eng maw?!” mak tihna a aw a lang chu ka hriat hmaih lo. Min rawn ban leh a, mahse, rang zet in khum atangin ka let thla a, kut kuangkuah in khum sir ah ka ding fel at thung, Ni e, ka rilru ka siam fel tawh a, thulh leh hni hne ka tum tawh lo.

“Mate, engkim i hre tawh chung hian kal nawn leh i thlang ang maw?!” mak a tih zia chu haider  theih anilo, Mipa in Control thei em em ani thin a, tun ah phei chuan a tleirawl lai ai khan a In Control thei tawh zawk hial ta ve ang, a luhlul dan pawn a hma aiin a nasa tawh zawk tlat atin ni.

“Aw, ka kal ang, ka thlang nilo in Hmeichhe dang ka tihnat tel theih loh vang zawk in ka kal a tul, Min Hmangaih a, kei pawn ka Hmangaih che, mi zawng zawng hian Mipa vang a natna hi tuar lul suh se, kei ni chu kan na tawh a, tunah pawh na nawn leh mah ila kan tuar dam leh mai ang, chuvangin engkim hi tunah hian a tawp tih ka hrilh che” a bek pawng tawlh tawlh ah chuan a insehruh nasat tur zia ka hai lo, a kut a hum ruh tlat bawk, min that duh mai tur khawp a na in min melh run bawk.

“Aih, ka kal tir dawn lo che, ka bul ah ka rual in kalla, ka kut i vawn  tlat chuan tumah na lo in ka siam thei ang, min ring rawh” harsa ti zet hian a ti hrawk a, ni e, harsa a ti ang, mipa induhtawk em em hian a ngen in min ngen miau alawm.    

Ka lu ka thing nawk a, a sawi hi ka ringhlel lo,pakhatmah in ka ringhlel lo, mahse, kha Hmeichhia, hmeltha leh awmnem zet kha, ka mitthla ah alo lang a, kei ang in a chak tawk dawn lo tih ka chiang, kei chuan na ka tuar thar leh dawn animai a,nat belh leh chuang tur ka awm tawh hleinem.

“Mangtha le” ka pen tan nghal chu min ko ri avangin ka ding leh chat a, hreh lutuk in ka en a, mahse, ka theihtawp chhuah in nui hmel ka pu lui tlat thung.

“ Zohlimpui,i duhthlanna che hi dal ka tum ta lo, min lo Hmangaih tawk lo zawk alo ni ang, nge Hmeichhe dang lak a ka rinawmloh san che avanga min hremna zawk ka hre lo ,engpawh chu lo ni se, i duh ang ngei in vawiin hian kan inkar a tawp fel..ni lo, kan inkar ah engmah a awm lo hrim hrim zawk, kal ang che, mahse, hlim zel ang che “ a ti ta nge nge, ka na e, zep thu a awm lo, ka na...

Ben-a pa in min lo bia a,” chaw i ei dawn emaw ka tia?” alo ti a, pangngai thei ang ber in ka nuih a,

“ Ka ei lo mai ang, ka nu te an lo haw tawh a, ka va phei ang” ka ti a, nui vur vur chungin min en a.

“ Lo leng fo rawh, ka khua a har ania, Mama naaupanlai thian te hmuh hi nuam ka ti ber awm e,kan in chhung kha nui ri in a khat thin kha ania” a ti leh charh charh a, a sawi dik chiah, nui bawk bawk chungin kan in um kual a, engpawh ti ila Ben-a nen khan Tang dun tur ah kan in ngai nghal tawp zela, keini ang bawk in Mazawmi leh Zampuia pawh an ni tho, an ni chuan an duhthusam ang ngeiin Nupa an ni tawh ,kei ni ve chu a vawihnih na atan kan tawp nawn leh ta chu ani ber e.

“ Nia tiraw, ka va phei phawt ang, Mo nei ve vat ula, Naupang an awm chuan a khawharthlak nep deuh ang” nui chungin ka ti a, a khi suk a.

“Kumthar lamah chuan kan nei tawh maithei asin, in thianpa hi han nawr deuh ula, nangpawh nei vat rawh, Nula Senior chu an fing lutuk a pasal neih an harsat ania” a nui hak hak a, a ngainatnawm dan a la ngai reng mai.

Gate ka chhuak chiah chu Motor pakhat a rawn ding ve chiah bawk, Chhanhimi a rawn chhuak a, Zosanga Clinic a ka hmuh dan ang tho in a thawmhnaw ngai ala ha a,  ala haw lo ani ngei ang, min rawn hmu ve nghal a, engtia han biak tur nge pawh ka hrethiam chiahlo, Ben-a Bialnu anih ang in nge Zosanga Cousin anih ang in ka be dawn ka hre nek lo e, engzawk mah ka thlang lo ve ve bawk.

“ Ben-a khan a thlah ta che mi?” a rawn ti nghal a, ka bu nghat a.

“ A lo let leh ta mang silo a, i buai phah em?” ka ti a, nuam ka ti chiah lo, a nui mai.

“ Buai lo e, alo kal hman loh vang khan a Driver a rawn tir tho alawm, I putea a tha vak lo tih te ka lo hria a, a zia lo hle mai” a ti leh a, engtik lai in nge alo hrilh hman ka hre lo, mahse, hei erawh ka chiang, kei min Hmangaih a, Chhanhimi erawh a duh thung, an inneih hunah duhna hi Hmangaihna ah ala in let thuai in ka ring bawk.

“ I va lo thleng hma ve” ka hnung lam atangin Ben-a aw in a rawn ti a, Chhanhimi nui var var chu itsikna tel lo in ka en a, ka Na ru vawng vawng mai, mahse, keima duhthlan ngei anih avangin na ngam tur ka ni lo tih ka hai lo.

Chhanhimi chuan min rawn kal pel a, ka inher a, Ben-an a kut alo vawn saknghal chu ka hmuru kar bawk.

“ Ka kalsan dawn che u,nih phawt u” ka ti a, ka ban ka vai zauh bawk.

“Hlimpui, ih, Zosanga vang khan ngaihdam ka dil che” ka nui hmel a tawp a, a thutak hle bawk, Ben-a hmel tak ngul mai, hriatthiam har zet chu en loh hram ka duh, a hma lawk a min hmangaih tih sawi tu MIPA  kha chu khawnge a awm leh tak pawh ka hre lo.

“A ho lutuk, nun alawm, khatiang te chu tu pawn kan tawng fo a, hlim se ka duh tak tak, ka kal” Bena’n Chhanhimi sam a fawh sak chu ka en thei hlawl lo.

Kan in ka thlen in ka Nu te an lo la haw lo cheu, Inchung zawlah kan thenawm te Motor hnungah ka  kal kual a, Khua a thim tan tawh a, mahse hmuh theih loh khawp chu ala ni lo, ka hawi kual a, ka mittui rawn tla avangin ka khaw hmuh a phe vek, ka thu sawp ta nge nge, Ban lian vak lo kawng chen vel awm chu ka ngheng a, engtik ah nge Ben-a vang a ka tah hi a tawp dawn?, kum kal ta zawng zawng ah khan a tan ka nun ka hmang thin ,lo let leh tur a ka beisei tlat avangin ani a, tunah chuan beisei tur pawh neilo khawp in ka nun a ruak chiang ta,Zosanga vang a tap tur ka nih lai in angai ang bawk in Ben-a vang bawk in ka tap nawn leh ta..      

“Ka nun ah hian eng nge ka tih sual bik?, hetiang em em a na tuar tur hian engthil tha longe ka tih?” Pathian ka chhuah chhal leh ta,ka Hmangaih awm chhun hi eng vang in nge ka nei thei ngai dawn lo anih chuan min tawn tir? ,ka tan a tha tur in ro min relsak thin tih hre mah ila tunah hi chuan ka tan a that na tur ka man lo mai pawh ni lo in ka hrethiam phak lo hulhual.

Eng chen nge ka thut ka hrelo, Ka phone ri in ka rilru buai mup mup chu a la peng ta deuh, ka en a, Ka nu a lo ni a,” aw, nu...” ka ti a, ka awm ah ka tap tih a hriat loh hram ka beisei,

“Kan lo haw mek aw, kanlo thleng har lo ang’ a rawn ti a,

“Um ,keipawh ka haw mek” ka ti ve ngawt, a rilru tih hah belh ka duh lo.

A hnu rei vak lo ah an rawn thleng a,mahse, ka chhuak duhlo, In an luh thlak hnu ah chauh ka tho chhuak a, Ka pa Motor dah fel khan min hmu lo tih ka chiang bawk, min hmu mah se thil pawi ani lo,In ka luh rual in Ka nu in min lo hau nghal a, ka chahbi keng ziah tur in min ti a, chhan pawh ka chhang buai peih lo,Fridge ka hawng a, tui ka la chhuak a,

“ Ka mu dawn ania, ka Lu a nuam lo, ee, Putea chu eng nge a an?” ka ti leh a.

“A tha animai, mahse, a In belh leh chuan rei a daih lo tawp ang” ka pa zawk in alo ti thuai a, zu hi zawng a tui ani ang, nghei harsa an ti em mai.

“ I putea te In ah chaw kan ei ta daih sia, chaw i ei dawn lo mi?” ka nu in a rawn ti leh a.

“Aw, ei tawh,ka zu mu teh ang” tih leh ka Room pan ka rual a,ka lu a na lo,mahse, mahni a awm ka mamawh takzet.

Ka thawmhnaw ka thlak sawk sawk a, Khumah ka lawn nghal a,ka muhil dawn lo tih ka chiang, ka rilru a buai tawh hauh lo, ka rilru a fim kar tawh zawk, Ben-a khan ka kalsan  luih leh avangin eng nge a tih dawn hrilh ka ngailo,engtik ah nge Inneih sawmna kan hmuh ang tih zawng animai,, Zosanga zawk pawh chutiang tho  bak beisei ka neilo, Pathian kha ka chhuah chhal a, mahse, chhan na ka thinlung ah chiang em em in alo lang a, engvangin nge Pathian ka mawh chhiat?, vawikhat pawh Ben-a nen kan chungchang ah ka rawn em?, Zosanga nen kan in zui dawn khan vawikhatmah ka rawn eih lo bawk,ka nat hnu ah ,engkim keimah ngeiin ka tih pawi zawk vek tawh hnu ah ka mawhchhiat leh si a, tu thiam loh nge?, keimah ngei ka diklo hmasa, keima natna insiam chawp ah hian Pathian ka mawhpuh lui a, demna tur ka lo zawng anih chu..

Ka tih tur ka chiang ta kuar, khawiah mah ka kal bo angailo, engkim mai hi ka tuar chhuak tawh a, ka tuar chhuah na kha keima theihna emaw ka lo ti a, ani lo, chunglam zawk in min tanpui vang ani, tunah pawh min tanpuitu kha ala pangngai reng a, ka tan a kawng ruat pawh hmuh hmaih thin mahila min la nghak a, heileh chen min hruaitu hian   mal tak in min kalsan ngai lo ang tih ka chiang, ka natna te min tuar puitur in ka kiangah a awm zel ang tih ka chiang, ka hna nuam ka ti a, mahse, tun hnaiah ka kal santhui tawh, ka rilru chanve in ka thawk bawk, nun bul tan tha tur hian thil tam tak alo ngailo, natna hian min kai harh hma ber alo ni.

Ka na tawh dawn lo anilo, mahse, tuar dan tawk ka thiam theih nan chunglam hian min pui leh ngei ngei ang tih ka chiang, an mahni hma ah mualpho in min awmtir phal  in ka ring lo.   

Zosanga nen kan inthen leh Ben-a ka nun atanga ka thlah fel nawn leh atangin thla khat aliam tawh, Christmas pawh naktuk tuk leh mai ani ta, Mazawmi te Nup-a in Fapa duhawm zet mai an nei a, an fa pa ka pawm hmasak ber in ka mittui a tla a, tun ah chuan anni zawng nu leh pa an ni ta, mahni inkhawngaihna avangin ka tap lo theilo, mihring kan ni miau si alawm le.    

“Pui, Nimin ah Ben-a te an lo kal a” Naute thawmhnaw thlep fel mawlh mawlh chungin a ti a, Naute ka pawm a, a muhil thaw sek sek chu hmuhnawm ka ti tawp theilo,fa nei ve ta ila eng ang a nasa in nge ka hmangaih ang ka hrethiam phak lo.

“Um” ka ti ringawt, sawi tur dang ka hre chiam lo.

“ Zosanga te kha an innei dawn an ti a” a ti leh a, a sawi zawi hle bawk, ka nat a hlau ani mahna.mahse, na zeuh pawh keimah ah a awm lo.

“Anih chu mawle, Damdawiin ah khan an sawi tak asin” ka ti liam mai, vawiin khan Sangzuali khan a sawi zauh a,ka lo ngaihven lem lo.Zosanga ngaihdam dilna ka dawng hnem lutuk, tha tak in ka ngaihdam thu pawh ka hrilh a, mahse,kan in kawp chhunzawm dawn lo tih erawh chiang tak in ka hrilh thung.” Cat..khawngaih in vawikhat tal chance min pe rawh, ka ti na nawn leh tawh ngailo ang che” ati anih kha, mahse, ka na lo tih sawi lan kher ka duh lo a, chance pek ka duh tawh lo mai zawk.

“ Ka ngaidam che, mahse, nang nen a in zawmna danglam bik neih leh ka duh tawhlo, Rachel-i hian a hmangaih che a, kalsan lo la, nangmah vang a rawn haw anih ang ngei hian nei ngei ngei ang che, thil hlui hi a tha zawk fo, kei chu i nun ah mi thar ka ni a, ani chuan i chak loh na lai engkim a hria, kei aiin a ngaidam thei zawk ang che, ka duhsak che” tiin ka thlah anih kha.

“I tuar miah na nge??” Mazawmi aw ah chuan mak tihna alang tel a,a awm viau, kan inthen atangin thla khat vel chuah liam a, an innei zui mai dawn a, nat ve viau pawh a tur ani reng a, mahse, ka na miau si lo.

“Na lem lo, kan in zui reiloh em kha” ka ti leh a, a nui hak a.

“Nia, nang hi chu Robot i ni ringawt, na pawh i hre lo”a ti leh a, Robot em zawng khaikhin chi ka ni lo, ka thiannu, ka naupan lai atang a ka kawm pawh ni se ka chhungril nun min hriatpui kim thei lo, mi zawng zawng in thuruk kan nei vek a, kan thian tha ber te pawh ka hrechiang  ti mah ila kan hrechiang zo lo fo.

“Naah,ni em em lo e, i ti mah mah” ka ti leh a, a nui var var a, min rawn kuah a.

“ Nang ang Hmeichhe tha lutuk hnar tu Mipa hi kei chuan mawl ka ti let tawp, ka thiannu i ni a, Damlo ten nangmah fakna thu an sawi ringawt pawh hian ka lo chhuang thin che asin” a ti a, ka bek ah a rawn fawp zauh a, a awmdan teh thut chuan ka mittui a ti hnai kuar mai.

Christmas  alo thleng a ka hun tam zawk damdawiin ah ka hmang ral ani ber, Accident an tam em em mai a, kan chawl hman meuh lo ani ber,mahse,rilru a thildang ngaihtuah a lunglen na hun nei maih lo a ka buai avangin nuam ka ti mah zawk, ka chau ngang aniang, ka thu mai mai pawh ka mu thlu nghal titih zel bawk, chuti chung chuan ka thiante Duty ai ka duty sak tum ala awm fo bawk,

“Tun lai chu i thawk rim hle mai” min be tu en tum in ka hawi chhuak thuai a, ka beisei loh zet in Zosanga alo ni a, kan inhmu fo nang in a mawi tawk bak in kan in be lem lo, min rawn inbox fo a, ka  reply ngailo, ka number thlak phah nan a hman erawh ka tum chuanglo, tlan chhe nun kha ka ning tawh miau a.

Ka thil ei lai ka chawl a, ka en chho ha a,

“ Nia mawle, buai lai anih ber hi, inbuai em?” ka ti let ve a, a hah hle ang tih ka chiang, kan Damdawiin ah duty angai a, Clinic ah rei tak damlo en leh a ngai bawk, kei ai chuan hah hle tur ani, mahse, Rachel-i a awm a, Lab neih belh leh a tum tih thawm a awm bawk nen midang pawn an la thawhpui thuai ang.

“ Buai ve tho mai, kalo thu ve thei angem?” ati a, ka chhan hma in a rawn thu fel der, tul lo zet in kan in kawm hmasak ber ni ka hrechhuak zawk bawk.       

“Buai theih hi a tha ania” ka ti sepa, ka thil ei lai ka eizawm leh a, ani pawh rei vak lo ah a thil ei tur alo thleng a, inbe  zui lo in kan ei lai ve ve kan ei dun mial mial a, alo kal khan ka ei tan dawn chauh a,thil ei zung zung chi ka nilo bawk nen kan ei zo rual ani deuh thaw.

“Chho ila.” a chair a nawrsawn a, ka tho ve nghal a, kan inkawp lai khan kan thawhpuite hrelo an awmlo, kan inthen hnu ah pawh hrelo an awm leh tawh lo, tunah phei chuan ka chanchin an sawi tui hle ang tih ka chiang, ka la kalpui zui bawk nen.

Hall kan chhuak chho chiah chu Rachel-i leh Chhanhimi nen kan intawk khawm ta raih mai,kan hamhaih tlang niin ka hre ber zawk, mahse Chhanhimi a har chhuak ta hlauh,

“Zo, kan rawn zawng deuh che a, Hlimpui, i dam maw?” atih zawm zat bawk, Rachel-i erawh chuan mit khap miah lo in min melh ran mai.

“Um, dam alawm nang zawk?” ka ti let a, Rachel-i min en dan ah chuan min khawih a chak niin ka hre ber.

“Ka tha e” a ti leh a, sawi zui mai tur a van hmel ve tho mai.

“ Ka kal san ang che u, anih leh u” ka ti a, Rachel-i erawh ala tawng ve miah lo, ka dem lo, keipawh ni ila ka Bialpa leh a bialnu hlui kal dun hmu ila ka rilru a nuam hauh lo ang.

Ka duty hun a tawp meuh chuan duhthusam in ka chau, ka Bag ka khai a, muangchangin ka Scooty dahna ka pan a, Damlo na em em mai te hian ka taksa mai ni lo ka rilru an ti chau a,taksa hah luutk hi a hrehaw m tawh tehreng nen rilru nen anih phei chuan chauh dan a na bik in ka hre thin.

“ Lo ding teh” Hmeichhe aw hian a rawn ti a, ka hawilet thuai a, Ka Scooty dahna ka thleng tep tawh,Zosanga Car atang a Rachel-i rawn chhuak chu ka en a, ka kal pelh lai khan ka hmu hauh lo, ka en lo ani mah zawk.

“Aw, eng nge ni ta?” ka ti a, engmah sawi lo in min rawn pan a,a pen chawrh chawrh chuan a lungawilo tih min hriat tir a, tui Bottle in hawng sa in a keng bawk.

Ka hmai ah tui in a rawn theh thawt a, a chet dan chuan min barakhaih lutuk a chet mai na chang pawh ka hre lo, tui chu ka kawr hma ah a far a, ka kut in ka hmai ka tuai pawp a, ka meng chiah  tih ah a rawn theh nawn leh a,  ka rak thawt bawk. 

Chapter – 10

“Eng thil nge i tih?” ka ti chhuak thei hram, mahse, tawngka a min chhang lo in min rawn hnaih a,min rawn nem nghal  sawk bawk, ka pai dawrh a, ka tlu tur chu tu emaw hian min rawn dawm ding a,engkim mai chu a thleng chak lutuk a, ka chi ai ani ber, ka chhungril ah thinrimna ai in mak tihna a lian zawk, chuti ni lo se chuan ka naupan lai atanga Mipa pawh hlau ngai lo ka nih na kha ala ngai reng a, him dam in a chhuak hauh lo ang.   

Min dawm dingtu lam pawh en lo in ka in her leh nghal a, Rachel-i min rawn din hnaih leh chu ka melh a, eng vang a thinrim em em nge anih ka man hlawl lo, a kut a rawn vai leh a, mahse, ka man hma in ka hnung lam atangin mi dang in a kut a rawn chelh beh sak leh a, a chet dan mawl mang tak chuan ka thinrimna a kai tho zo tlat lo.

“Rachel, a tawk e, he lai hmun ah hian tumah an mualpho lo ania” Ben-a aw ka hriat rual in ka ding khawng nghal lah mai.

“A pawi lo, mi pasal nimai tur lo kawp ruk zahthlak zia ka hriat tir dawn alawm” ala ti ta cheu, a a zawk emawni..

“A tawk” Ben-a aw hlauhawm zia chu pui tak ani.Rachel-i pawh a tim deuh ani ngei ang, a tawlh hnung hrat bawk.

“Ben, awi, LALPA  engthil nge thleng a?” Chhanhimi chuan a rawn ti chul bawk,mahse, Ben-a bawk in alo khap thuai a..

“A tha vek e, Rachel, kal tawh rawh” ati nghut a, a tawi deuh hrat nangin a kal sawn ta tho, thil thleng engkim mai chuan min ti hamhaih vel vek, ka mawl huih ani ber, khatiang khan tuman min tih ka ring phak ngailo.

“I tha em?” Ben-an ka darah a rawn vuan a, hnai zet ah min rawn en bawk, ka nui ringawt, ka nuih chhan ka hre der lo lehnghal, ka mawl hmel khawp ang.

“Ka zawhna che chu..ka thlah haw dawn che mi?” a ti leh sup a, min ngaihtuah tak tak a ang viau bawk.

“Oh, ka tha, ka tha lutuk, kal ru,ngaihtuah ka ngai lo “ ka ti leh hmawk hmawk lawi a, a kut a la sawn a, a ding mar a,min ring chiah lo niawm tak in min en vung vung bawk.

“Ben, kal ila, kan tlai ang” Chhanhimi tawng ri ah chuan  ka rilru baui nuaih nuaih pawh a ziawm tan a, ka ngaihtuahna a fim tial tial bawk,

“Kan kal ang chu, lo nghak rawh” ati hmuk a,mahse, a hawi sawn chuang der lo, min en ngaiin min en ngur ringawt.

“Kal ru, ka tha” ka ti leh a, tah vak ka chak zek zek bawk,ka hawi kual a, midang awm ve te chuan min melh hrek hrek bawk, naktuk ah chuan Hospital pumpui in ka chanchin an sawi luih luih ang a, ka dik leh dik loh tuman hriat an tum buai lo ang tih ka chiang, keimah zawk ka kal sawn a, ka Scooty dah na pawh ka hre chhuak zo lo,ka hma lam pan in ka kal zel ani ber,ka ban ah tu emaw in min rawn chelh a, ka phu zawk bawk, ka en vat a, Ben –a bawk.

“Eng nge i duh?” ka ti hmak a, a thaw hawk bawk.

“Ka thlah ang che, i Scooty chahbi min pe la,ka Driver in a rawn dah mai ang” ati leh a, ka kun a vawn na thin thlak ka tum a, mahse, a hma aia na zawk in a hmer leh a, a na thei hial bawk.   

“Min ti na ania” ka ti sep a, tlem in a thlah dul hret a,mahse, a thlah duh chuanglo.

“Kal ang” ati nghut a, min pawt kal nghal dawt dawt bawk.

“Ben, mi in min en thup ania” ka ti leh sep a, a rawn hawi let a, amah si chet in min pawt bet a,

“Ti khan a tha em?, tu pawn min en se pawi ka ti hlein nem” ati leh nghut a, eng tia awm tur nge pawh ka hrelo, khawiah nge Chhanhimi pawh a awm ka hre tawh lo.

Motor ah min nawr lut a, hnial na chang pawh ka hre lo, ka hnial peih lo ti ila a dik ber ang, a rawn thu lut ve a,min rawn en a,ka kawr hma a huh tel avangin a vawt ka ti bawk.

“ Chahbi min pe rawh” ati dam thlup a, ka bag ka hai rawk rawk a, ka hmu lo, ka hai nawn leh tur chu min pawhthlaksak a, aman a zawng a, a hmu nghal mai bawk,a la a, a kekawr ip te ah a thun a,

“Ac ka On dawn em?” ati leh sup a, ka lu ka thing a, vawt ti mah ila Ac hi ka ngaithei der lo,ka rui dawn zel in ka hre thin tlat,Motor a start a, kan tlan chhuak zui chu a ni der,engmah sawi lo in a ngawi run a, a in pet ruh fun bawk,Steering chu ngheh  hmel zet in a vuan a, a lan dan ah chuan thinrim a ang viau bawk, ka hawi sawn a, mah ni a awm a, thil thlen dan kha muangchang a ngaihtuah ka duh ber.

“Khawnge Chhanhimi kha?” ka ti sep a, ka ngaihtuah chhuak leh thut a, Zosanga ka kalsan hmasak zawk ka ngaihtuah a, hetiang bawk hian Ben-a khan min thlah haw tawh a, hriat chhuah loh duh mah ila ka hre chhuak lo thei lo.

“Ngaihtuah suh, a in en kawl thei alawm” ati nghut a, pawn lam kan tlan pelh chu ka thlir a, mahse, engmah ka hmu chuang lo, ka thlir liam vel mai mai, ka  tum loh zet in ka na vawng vawng bawk, Chhanhimi a in enkawl zawh lai in kei erawh buaipui ngai, in enkawl zo lo ka lo ni anih hmel, ka nep em em tih inhre mah ila midang tawngka atang a hriat chu thil nuam anilo, Ben-a hnen atang lek phei chuan a nuam lo satliah pawh ani mai lo, a nat in a na vawng vawng zawk.

“Ka hria alawm, mahse, keimah vangin Motor dang in a haw angai dawn a” ka ti leh a,ka sawi zawh rual in ka rilru ah thil hlui bawk alo lang leh nghal zat bawk, a Driver tu emaw ber in an lam leh daih tawh ang chu.

“Ngaihtuah suh ka tih kha, nangmah kha in ngaihtuah i ngai ber zawk”ati leh nghut a, a sawi dik tih ka hria, keimah pawh ka in enkawl zawh loh lai in midang ngaihtuah thei ka ni lo tawp.

“Ka hria e, i thiannu hi ka nep ani e” ka ti leh sap a, tun tum chu ka rilru natna ka thup thei lo teuh kher bawk,ka hriat lai ngei in a Bialnu a fak na thu vawi hnih ngawt a sawi a, ka tuar theih chin a pel ve bawk hrim hrim,na tur ka ni lo tih hre mah ila ka na lo ngawt thei chuang der si lo.

“Chutiang zawng in ka sawi pawh ka hre lo” ati leh nghut a, ka melh zawk a, mahse, min en ve lo, a Motor khalh lai chauh a ngaihtuah tih hriat zet hian hmalam a en ngur ringawt.  

Chhan pawh ka chhang ta lo, chhang chiam pawh ni ila a hlawk na ka hre hek lo, In kan thlen hma chuan tu mah mah kan tawng tawh lo, Kan In bul ah a ding a, lo chhuk a tum in ka ring lo a, leng lut tur a sawm tum na ka nei hek lo.Motor kawngkhar ka nem hawng a, hnung lam hawi tawh miah lo in ka kal nghal nal nal bawk, Step ah ka chhuk thla hnak hnak a, ka hmel lan dan tur ka ngaihtuah ngam lo zawk, mahse, ka nu hmuh tur in ngui lutuk in ka lan a rem lo.

“I va pawr pheng phung ve” min hmuh ve leh alo ti nghal chat reng bawk, ka nui lui sak a.

“Tui in min buak pek anih hi, kan inbual nghal lawk teh ang, Scooty an rawn dah maithei ania, ka check tir a” ka ti nghal a, eng vang in nge Ka nu bulah Dawt ka sawi kher ka hre bik lo, mah se thudik ka hrilh ngam tlat lo,min chhan zen zen lo nang in ka nu hian min Duat tih ka hai lo, tun ah hian hre ngat se chuan a ngawi mai mai dawn lo tih ka hre chiang viau bawk.

Shower hnuaiah ka ding a, Tui lum in ka inphuh tir a, ka harh sawng sawng mai, ka mit thla ah Rachel-i hmel alo lang a, Zosanga, Chhanhimi, Ben-a...an lo lang zut zut bawk, khawiah nge Zosanga a awm ka hre lo, kan inkawp hauh lo tih hre chiang tu ber chu amah ani a, Rachel-i khan engtin nge kha tiang khan min tih theih ka hre lo hul hual.

Chaw ei kham hnu ah mu tur in khum ka pan nghal a, ka mut chhuah vang ni lo in ka Boruak tehhrep khan min la ti chau nghulh ani ber,ka lehkhabu lei  thar ka phawrh a, chhiar ka chak teh reng nen, ka chhiar tui thei hlawl lo, ka dah leh ta nge nge,Ka phone ka khal kual vel ta mai mai zawk, in ngaihtuah ngut ngut ka duh loh avangin eng nge maw tal rilru lak pen na tur ka duh a,Games ka khel a, mahse, chu pawh ka tui chuang lo, engmah in ka rilru an ti danglam pha lo ani ber zawk.   

Tu emaw in min lo call a, mahse, number ka hriat ngai loh anithung, thil thar ani lem lo, ka number hi ka pek lem loh ten an hre fo, atam ber chu Damlo te an ni thin a, ka hna piah lam ni mah se tumah ka be chhe ngai lo.

“Hello” ka aw ah mi ka be chak lo tih alan loh nan ka fimkhur viau bawk.

“Hlimpui, i buai em?, Chhanhimi ka nia” a rawn ti a, ka Phone ka beng bul atangin ka la sawn a, ka melh nghek phawt, sawi dun tur kan neih ka hre miah lo.

“Aih, buai lo e, eng nge ni ta?” ka ti a,

“Vawi in kha thil thlen dan chiah ka hre lo a, mahse, ngaihdam ka dil duh che a” a rawn ti a,a mak thin, Zosanga emaw Rachel-i zawk in ngaihdam min dil miah loh lai in he nu hi chuan a cousin anih ang in ngaihdam min dil leh thlap tawh.

“Aaaaa, kei pawn ka hre bik lo, ka hamhaih ani ber e” ka ti ve thlawt,. Tun thlengin khatiang a min tih chhan kha ka la hre chhuak zo thlawt lo.

“I hriatthiam hram angai, Rachel-i hi a dik lo tih ka hre tho a, mahse, dem theih pawh ani chiah lo, Zosanga hian a hma ang khan a care ta lo em a” a rawn ti leh a, chu zawng sawi tur ka nei lo, a Care emaw care lo emaw ka buaina ani tlat lo.

“Engpawh chu nise, an ni nen in zawmna kan nei lo a, khatiang kha thleng nawn tawh lo se a tha animai “ ka ti a.

“Nia, a thleng nawn tawh loh hram ka beisei” ati leh a, sawi duh nei, sawi hreh si a ang viau bawk.

“Eeee, vawiin kha Ben-a khan min thlah angai ta sia, a zia lo ka ti “ ka ti leh a,

“Nia, mahse, Ben-a lak ah hi chuan a hmasa ber i ni reng a, ka palzam thei viau ania” ati halh a, a sawi awmzia ka hre lo, kan inkawp tawh tih a hria nge kan inkawm thin vang in a sawi zawk ka hre lo.

“Min hrethiam dawn nia, ka dah phawt ang” ka ti a, tha tak in min mangtha a, keipawn ka mangtha a, kan dah hnu ah pawh a thusawi khan min ti buai zui zel, khatiang thu kha engtin nge a sawi theih ka hrethiam lo.Kan inkawp tawh tih chu hriat pawh a hre mahna, thil hi a kal  a kal a, ani lo zawng a a kal fuh phei chuan a dawngtu tan na tak anih tum a awm fo bawk.

Ben-a number ka tin vang vang a,ka call ngam ngang lo, zawh fiah ka duh tehmeuh mai, mahse, ka zawh kher a tul lo thei bawk, thlakhat zet liam tawh mahse, ka natna te ala reh hauh lo,tuar dan erawh ka thiam tawh viau tih mai chauh ani zawk, hna ah ka buai a, nilengin ngaihtuahna hun ka nei lo thin a, mahse, zan ah mahni chuah a ka awm ve leh a ngai te bawk in ka ngaihtuah leh lo thei lo.Ka duhthlan na anih miau avangin Ben-a demna tur reng reng ka hre hek lo.ka tuar chhuak dawn tih ah hian ka in nghat ve tawp zawk, ka nat apiang a min natpuitu nei mah ila a na a nep chuang lo.

Rilru na hi Taksa na aiin a mi nghawng a na zawk fo mai, a tuartu a zir in ani thei bawk a, tuar chhuah ka tum em mai a, ka mualpho lo mai zawk, tu pawh sual an tih te bansan a, Pathian hnen lam pan te pawh hian a tir ah an sual tih thin an theihnghilh nghal lo a, rei tak chhung chu tih nawn leh chakna in an khat ve tho bawk, chutiang chiah chuan rilru na pawh hi ani tho, Ben-a ka thlah tak avang khan ka na lo ani reng reng lo, ka na pawh a reh nghal hek lo, mahse, kal san kha ka duhthlan anih miau avangin tuar tur in ka inpeih angai a, ka tuar nasa reng bawk.

Ka phone nghawr dat dat in ka ngaihtuahna atangin ka rilru a la peng thuai bawk, ka beisei loh lutuk in Ben-a alo ni a, Chhanhimi nen buaina an neih loh hram ka beisei ru takzet.

“Hello” ka aw ah ka danglam tih lan tir ka duh lo.

“ I mu tawh mi?”

“Um, eng nge ni ta?” pangngai thei ang ber in ka ti leh a, lo phili ruai a tulna ka hre leh lo, ka phili anih pawn tih lan kher a tul hek lo.

“I that leh that loh ka hre duh a” ati leh sup a, engvangin nge ka nun ah hian alo lan leh thin aw? ka ta ni ngai reng reng lo tur hi chu kal bo se ka tawrhna te hi a chak in ka tuar thiam deuh ang, mahse , tih theih reng reng ka nei lo tih ti lang chiangtu ani leh lawi si..

“Ka tha e” ka ti sep a, zangkhai tak a biak ka duh em em lai in ka hlawhchham der.

“Khatiang thil kha engvanga thleng nge hrelo mah ila thleng nawn tawh lo turin ka duh takzet” ati leh a,keipawn ka duh alawm tih khum nghek ka chak zek zek mai.

“Kei pawn ka beisei e, anih phawt le” ka ti a, min chhan hma in ka Off ta zawk a, a khawngaihna emaw min ngaihsakna ka  dawng duh lo, ka rilru insiam tha mek hi tih chhiat anih leh chuan ka ding chhuak zo tawh dawn lo tih ka hming ka hriat tluk in ka hre chiang.

Ka beisei aiin ka mutui ta phian, ka tih dan panngai in zing karah walk turin ka chhuak a, khua a vawt vin tuk mai, mi veivak an tlem angreng viau bawk, ka Mood tha lo em em mai chu min hriatpui niawm tak in khua a dul ruih a, chhum a tam in ruah tla mai tur a ang viau bawk.

Zarkawt kawn ka thlen in Sumo an lo intlar dul a, kawngsir a thingpui dawr,zing kar ah chauh an siam thin chu mitam vak lo in an lo bawr laih laih bawk, ka in ve chak thut a, khaw nawm loh nen, thingpui sa ver vawr han in chu nuam dawn riau in ka hria,ka pan phei a, thut na pakhat ruak ah chuan ka in zep ve a, Paratha nawr mawlh mawlh pah in a neitu nu niawm tak chuan eng nge ka duh min lo zawt a, han duh tur dang tehchiam awm lo mah se a khawsa zia chu sumdawng mi dik tak niin ka hria.

Thingpui min rawn pe a, a khu vat vat mai, thingpui hi ka ngaina lo a, ka in ngai meuh lo zawk, tlem ka dawt hlak a, ka lem zawh rual in ka kawchhung a sa thla ram ram bawk,ka bul a thu a tho a, mahse midang an rawn thu ve leh nghal a, tu nge lo thu ka ngaihven lem lo, ka Jumper lukhum ka khum a, ka thingpui no ka hmui bulah ka keng bawk,ka bul a rawn thu thar chu Dawr neitu nu chuan a tih dan ngai te in a duh a zawt leh a,ka bul a thu pa in a chhan let rual chuan ka thingpui no ka thlauh teuh kher bawk, mahse, ka hawi chhuak duh chuanglo, hnuailam ka melh ran a, Addidas Neo running Shoe a bun a, Kekawr dum ,a tlang Elastic awm a ha bawk, ani ngei tih fiah tur in hawi chhuah a en kher ka mamawh hran lo.

“Min be dawn na nge?” ka beng bulah a rawn ti sup a, a aw a nuihzatna ri ka hriat hmaih lo, amah ani tih ka hria tih a awm dan ah alang vek bawk, hreptak hian...engtik ah tak tlanbo san ang i maw?

Ka hawi chhuak ta nge nge, eng vang in nge ka hlauh ngawt bik ang tih ka ngaihtuah a, ka in her a, a mit ah tak ka en a, ka chhungril khur ru dar dar chu a hriat loh ka beisei takzet bawk.

“I va hma ve” ka ti sap a, pangngai thei ang ber in ka nuih lui sak bawk.

“Thil ka thawn lawk a, ka rawn hmu che a, ka rawn thu ve lawk”ati a, a mit a siai zauh bawk.

“Anih chu mawle, ka kal mai teh ang, ka vawikhat chawlh na ania, mahse,a nuam reuh khawp mai” ka ti a, ka tho nghal a, Pawisa ka pe a, ka earphone ka vuah leh nghal a, a volume ka up nghal zat bawk.mahse, ani pawh a rawn tho ve nghal tho,eng thil nge maw tih a tum tehhrep ni?

Min rawn zui zel a, ka hre lo lui tlat bawk, ka kal chak tial tial a,January thla tawp lam ni mahse  thli a thaw vuk vuk bawk, kan In ka thlen hma in ruah a sur mai ka hlau a, nidang ang chu ni se  ni chhuah a hun daih tawh, ka tlan ta nge nge,mahse, reilote ah ka bul ah tlan an awm tih ka hre leh nghal thuai a, a duh leh tlan mai mai teh se, ka earphone vuah avangin ka hre lo der thei tho alawm le.

Ka hmai ah thli vawt zet in a rawn chhem a, a na thei hial in ka hria, kan in ka thlen hma in Ben-a te in tlan pelh angai a, an In kan thlen hun ah a pen mai ka beisei bawk, ka tlan zel a, ani pawh min ti buai chuanglo in ka sir ah a tlan ve zel bawk,reilote ah ruah fang sin te te a rawn tla a, ka tlan chak hle anih pawh in kan in ka thlen hma chuan ka huh hman tho ang tih ka chiang, mahse, chawlh ka tum lo, Ben-a nen reilote pawh hun hman ka duh lo bur, an in ka tlan pelh hun ah duh leh ka chawl zawk mai ang chu.

“Kan in ah lo chawl rawh” Ben-an ka ban ah min rawn pawt chung in a ti sup a, earphone vuah mah ila tawng hriat theih loh khawp a ring in ka ngaithla lo,ka earphone vuah a rawn pawt thla a,a awmdan teh phut chuan min ti phu nasa kher bawk.

“Aih., ahnai tawh a, ka tlang zawk ang”tih pah in ka ban rek a chelh na phelh sak tum in ka kut leh lam in ka vuan a, mahse, a hma aia nghet zawk in a hmer leh salh bawk.

“Min hnial thin lo teh, thian kan nih kha” ati leh a,a mitmeng dur khup mai chu khaw awm dan nen chuan a inhmeh hliah hliah bawk,ka hawi kual a, kan din na piah kawng kual lai ah chuan Hmeichhe pakhat hi a rawn lang a, a hlat deuh avangin tu nge anih ka hre mai lo, tu pawh ni se kan veng chhung mi anih chuan Ben-a nen kan lo ding dun min hmuh avangi ka lar leh laih ngei ang,chu thil chu thlen tir ka duh lo anih chuan Ben-a thu ka zawm angai.

“Mawh” ka en na lam en chung in a ti leh hmuk a, ka rilru chhungril a hmu tlang vek nimai in ka hre hial bawk, ka bu ta nge nge, Gate sir a mihring luh na awm chu a hawng a, min kai lut a, ka kut a vawnna tal chhuah ka tum chu hre lo ang hmak in a awm tlat bawk.

In chhungah min kai lut a, tumah an lo awm lo, a reh thuap mai, Curtain chhah zet zet an zar dulh mai chuan a ti lang thim khup bawk, Step ah min kai chho a, han hnial na hun pawh a awm lo, min kaih ang ang in ka zui zel a, ka hnial buai chuan kan tawng ri ah midang an lo thawh mai ka hlau ani mah zawk,a Pa pawh ka zah em em rual in ,a Nau, engtik lai mah a min ngaina ngai reng reng lo tu kha nimin ah ka hmu a, Aizawl ah a awm tih ka chiang a, a mitmeng thip lutuk a min melh leh tur kha ka ngai ngam ngang lo.

Room ah min kai lut a, ka kawr hnawng chuap mai chuan ka awm a ti nuam lo takzet, vawt tih vangin ka khur ru dar dar mai,ka kut a vawn na a thlah a, Room chhung thim ruai  mai tih en nan Light pakhat a On a, mahse, a en dan a dul ruih thung, min rawn en a.

“I kawr kha phelh la,a hnuai lam  kha chu a huh hman lo ang” ati sup a, a Jacket hak lai a phelh zui nghal a, mahse, ka din ngai in ka ding a, chet sawn ka tum chuanglo, ruah a sur zawh ve leh kal nghal ka ngai.

“Mate.. i kawr kha phelh rawh, kei aiin hritlang kai hlauhawm zia i hriat chian kha” ati leh sup a.Thlasik lai a hritlan hrehawm zia ka hai lo, rei tak khaw thal hnu a ruah tui tla hmasa in natna hrik a ken tel tam zia pawh ka hre chiang, ka lu ka ti hul vat anih loh chuan ka damlo palh ang tih hlauhawm tak ani.

Chhang lo in ka kalsawn a,tukverh bul ka pan a, Curtain chhah zet chu ka pawt kau a,pawn lam ka thlir a, inchhung atang chuan ruah sur thawm a hriat lem loh, mahse, pawn lam ah chuan do huphurhawm zet in a tla sung sung thung.

“A vawt i ti lo mi?” ka bul lawk atangin a rawn ti a, alo kal thawm ka hre hauh lo,ka chhan let hma in ka kawngah a rawn kuah a, a taksa lianpui si chet in min hnuk hnai zui nghal bawk.

“Hey, engthil nge i tih a?” chi ai ru zet hian ka ti a, ka lungphu rang nghal dawt dawt chu a hriat hial ka ring.

“Shhh, reilote...ka ngai che” ka dar ah a lu a rawn nghat a,chet sawn na chang ka hre lo nge ka che sawn phal lo ka hre bik lo..

“Min ngahtuah ngai miah lo tak tak ami?” ati leh a, hetiang khawp a a tlawm lai hi a hmel hmuh ka chak lutuk, ka insum thei lo, ka kawng a kuah na ka phelh sak a, ka in her a, a mitmeng thim raih chu Room chhung light dul ruih hnuai ah chuan alang  thim leh zual a,  zep rual loh in a hmel ah a na tawrh a lang thei bawk,kha leh chen ngawi reng a ka lo tawrh leh kalsan tum a ka beih na kha a keh chhe ta vek, a nghawng ah ka kuah a, a hmel rawn eng sawt chu ka hmuh hmaih lo, min pawm kang a, a kawngah ka kherh bet nghal chial bawk,Hmeichhe dang kan pahnih in karah a awm tih reng ka hre tawh lo.

Bangah min nawr bet a, a rawn hawi chhuak a, a hmui chhah tap mai, vawi tam tak ka lo fawh tawh thin ngei chuan ka hmui a rawn si a, a lum ham ham mai, a tir ah chuan nidang ang lo tak in a tim ve deuh a, mahse, ka chhan let tak ah chuan a rum hawk a, a lei a rawn rawlh lut a, zei lutuk in ka hmui hnuailam a rawn fawp leh a, kan pahnih chuah bak khawvel dang ka hre lo.

“Ben...” tawng thawm ka hriat rual in ka meng nghal kawk mai, Ben-a pawh a phu ve deuh in ka hria. Ka tal chhuak vat a, Ben-a pawn min dang lo in chhuat ah min dah thla a, mahse, ka khur nasa lutuk avangin ka kal sawn mai thei chuanglo, Bang ngheng in ka ding a, Ben-a taksa lian pui in min hliah avangin tu nge rawn kal ka hmu thei lo.

Ben-a pawh a awmdan a danglam ve tho mai, kan in kawp chhung khan kha tiang tak a inhnaih leh in pawh khan kan la awm dun ngai lo, reilo te mah ni se kan in duhtawnna chak lutuk kha alo la bo loh zia ka hre chiang hman tho mai.

Muangchangin Ben-a a inher a, mahse, ka kut a chelh na a thlah chuang lo, Ben-a kal sawn rual in Kawngka bul a Chhanhimi lo ding reng chu ka hmu nghal a, ka khup a khur nghal hlawk hlawk a, zah na sawi thiam loh khawp a nasa in min tuam hlup hlup bawk, a hmel a na ti lutuk hmel lo lang chu ka en ngam ngang lo, ka kun a, hnuai lam ka bih ran mai.

“Ben...ka thil hmuh kha...” a tap mai dawn in ka hria, ka la hawi chhuak ngam chuang lo.

“I hmuh ang kha anih dan ani e” phawk lutuk hian Ben-a ka en thuai a,min rawn en a,a bu nghut bawk.

A rawn kun hniam a,” min ring rawh” ati sup bawk, ka ring alawm, a hma atang tawh khan ka ring alawm, keimah leh keimah ka inring ngam lo zawk.

“Chhanhim, i rin ang ani lo ania, englo..” ka sawi lak lawh laiin ka chawl leh rih a,

“ Lo tawng suh, nang kha ka be duh lo che” ati tuar a, ka phu nasa kher bawk.

A rawn kal hnai a, hmeichhe dawihzep ni lo mah ila tun tum ah hi chuan ka tihsual anih miau avangin engtinmah ka ti let ngam in ka ringlo, a thinrim in kut min thlak pawh ni se ka dawh mai ang,a kut a rawn phe vuai a, ka mit ka ka chhing ta ngawt, mahse, min beng ta tlat lo, muangchangin ka meng a,Ben-a’n Chhanhimi kut a chelh chu ka hmu nghal a, a hmelpa zet chu a dur khup bawk.

“Ka tih palh ani, ka kal ang, Chhanhim, min ngaidam rawh” ka ti khur dar dar mai, ka nun ah hetiang em em a zah hi ka la nei ngai lo.

“Mate, kal suh, kal tur chu amah hi, chhuak rawh Chhanhim,nangni ho in in duh duh a kut in thlak atan ka phal hleinem” ati leh hrawk a, mi a nileng lo tan chuan hlauh loh chi ani lo.

Chapter – 11

Tumah kan tawng lo, khuavang kal lai an sawi ang mai in kan ngawi thap mai, Pawn lam thawm lah engmah a hriat theih bawk si loh,ka kal dawn chuan Ben-an ka kut a chelh tlat si, Chhanhimi lah kal tum hmel a pu si lo.

“Ben...” ka melh chho a, min rawn en a,

“Um” ati sup a, amah hnaih lehzual in min pawt hnai leh a.

“Chhanhim, kal tawh rawh, kan pahnih in engmah sawi tur kan nei lo tih i hriat chian kha” ati leh a, a aw dam thlap chu ring lo mah se a fiah kek kawk hle bawk.

“Ka hrethiam lo, in inkar a tawp tawh kha, engvang in nge khatiang a ilo awm pui leh si?” a tap ta tiau mai, a hma aia nasa zawk in ka zak leh niber in ka hria, khatiang khawp a zak khan ka la awm ngailo a, mahse, tunah hian kha ai pawh khan ka la zak zawk cheu mai.

“Chhanhim..” ka ti hman chauh a, Ben-an ka kawngah a rawn kuah a, ka nak ah a hmer zauh bawk, ka en chho leh vat a, min rawn en ve a, a hmui a ti sawi zauh bawk.

“I bulah in sawi fiah ka ngaih na ka hre lo, tawp tawh zawk chu ani ni lo nang leh kei zawk hi kan ni tih i hrechiang alawm” ati leh nghut a, ka mengphar awk mai, engtik lai in nge an inthen ka hre si lo.

“Mah se, Ben..” ati leh tiau a, rilru siam dan tur pawh ka hre lo, an inthen lai ka hre lo a, nimin ah mai pawh an la in zui a, nizan ah pawh chhanhimi khan tha tak in ngaihdam dil in min la rawn call a, Ben-a pawn a sawi chuang hek lo.

“Kal rawh, Khawngaih in, tunah chuan kan pahnih a awm kan duh e” ati leh hmuk a,Chhanhimi chuan eng nge maw sawi tum niawm tak in a ang ziau a,mahse, Ben-a hmel rum ul mai chu a en zawk a, a sawi leh ngam lo anih ka ring, muang chang in a in her a, a chhuak tur chu ka thlir a,khawngaihna leh lainat na in ka khat vek, keimah ang bawk in a keh chhia tih ka hre chiang em em atin ni.

“Mate..” a rawn kun hniam a, min rawn fawh leh a tum tih ka hria, mahse, ka hawi sawn san ta zawk, tun ang boruak ah kha chuan khatiang a awm leh chakna ka la nei rih lo, ka nei lo mai pawh ni lo in sawi tur pawh ka hre lo hial zawk.

“Va um zui teh” ka ti chhuak thei hram, a rum nghut a.

“Ka nun ah hian hmeichhia emaw thil dang pawh ka duh loh hnu leh min kalsan tu ka um zui ngailo tih i hria alawm, oh, nang tih loh chu” a then suk a, ka ke a zawi huai mai, a awmdan engkim chuan dawt a sawi loh chian zia a ti lang tlat bawk si.

“Mahse, khatiang ngawt in i kal tir thei lo ang, a kehchhia asin” ka ti leh a, beidawng zet hian ka ban ka phar hliai bawk, a ner nawk a, min rawn kuah a, a awmah min pawm bet a, kuah let ve lo in ka din ngaiin ka ding mawl tawp ringawt.

“A nih chuan ka keh chhe lai kha i hmuh hmaih lo ang ti raw?” ati tham thuak mai.

“Ben...kan pahnih chuan kan tuar thei zel alawm, ani kha chuan a tuar chhuak zo ve lo maithei asin” ka ti leh talh a, a thawk hawk ri ka hre zui zat bawk,

Min nemsawn a, ka biang ah a kut pahnih in a rawn dawm a, amah en turin min kuai dak a, a hmel pa leh chang zet chu ka en lo thei lo, hawi sawn pawh tum ila ka thei lo,

“ I kal leh anih chuan ka tuar chhuak zo tawh lo ang, Chhanhimi nen khan kan tawp na a rei tawh a, ngaihtuah duh suh ka tih kha, tunah chuan kan pahnih chiah in ngaihtuah ang..um..a tha em?” a nui suk a, ka mittui rawn hnai kuar chu a chhan ka hre lo mahse, tah hawk hawk ka chak takzet.

“A hmangaih che tih i hre reng si a, tih nat kher angai ami”? ka ti sep a, a kawng ah ka kuah a, a T-shirt tlang ah ka vuan  a.

“Nang pawn min hmangaih tho alawm, ani lo ami?” ati leh daih bawk, a mit meng de sar chu ka en a.

“Kei chuan ka tuar thei ang ka tih kha, chuvang in ka kalsan che alawm, keimah ang bawk a midang an nat loh nan ka tih kha” ka ti leh halh a, a hmui a liak zauh a.

“Kan pahnih hian na kan tuar lo bik hleinem, kan inhmangaih, engvangin nge kan tawrh kher ang?, min hrilh teh, ka tello khan i hlim bik lo tih sawi teh” ngengawl lutuk hian a ti leh a,ka insum thei lo, ka dingdihlip a, a hmui lum ham ham chu ka han si de de a, a mah ang lo tak in hamhaih ve deuh  ang mai hian engtinmah min ti lo, ka fawp lui leh a, a rum hawk mai, ka kawng ah a rawn kuah a, a mipatna in min nek run chu ka hriat hmaih hauh lo, eng nge thil dang ka la mamawh?, Ben-a ai a ka mamawh tumah an awm hleinem,Chhanhimi nen an inthen lah ka thiam loh ani hek lo, engmah inthiam lohna tur ka neih ka hre ta lo.

Min pawm kang a, Khum min panpui a, mahse, a hmui a phawi chuang lo, Khumah min nghat a, ka Jacket hak lai chu a hnawng chuap bawk nen, Zipper a a pawt phelh a, ka lo pui thuai bawk, min nem mu a, min rawn delh zui nghal zat bawk,

“Min dang hlek suh, ka ta i ni tih ka chian hma chuan i kal bo hlau in ka hun ka hmang leh dawn tih ka hria” a ti sup a, a aw a khur ve dur dur mai.

“Ben...” ka sawi tur ka sawi hma in ka hmui a rawn khar zui hmak bawk, ka kawr a rawn zen a, a kut zungtang sei thlurh mai chuan ka hnute a rawn tawk a, ka Bra chhan a khawih duhtawk lo in ka Bra a nawr chho a, a kut lawng in a rawn khawih tak ah chuan ka tum loh zet in ka rum hak mai.

Duhthawh zet in min fawp a, a zei dan leh engkim, amah ka feel thin dan ang thlap ala ni, engmah danglam ala awm lo, tlem in a duhthawh tih mai loh chu..A in la hrang a, ka kawr a hlim chhoh avangin ka Hnute khuhtu awm lo a lang chu hmuhnawm tih hmel zet hian a en a, zawi muang in a kun a, a lei lum ham ham in a sik rual in engmah sawi thei lo in a sam ah ka tham a, hetiang khawp in tisa chakna ka la nei ngailo, nawmna mak lutuk, sawithiam si loh in min fan chiai chiai bawk,a kut lemlam in ka kekawr kawng zen a tum a, ka man beh sak a, mahse, a ti lui leh tho, chhungril ah zawite in thu a rawn sawi a, kum kha leh chen nula Thianghlim ka nihna kha tun darkar tlem te ah hian ka hloh ngawt thiang lo.

“Ben...kan ti thei lo ania” ka aw a ri chang chang ani ber, mahse, a hre tho tih a thil tih lai a chawlh dat dan ah alang a,

“Oh, kan thei alawm,ka nghak rei lutuk” a rawn hawi chhuak a, a hmai a sen ve tan mai, a hmel a ti sa chakna lang chu thup a tum eih lo bawk.

“AIH, kan thei lo, nakin lawk ah i ta ka nih zia chu i la fiah thei, i tan kum kha leh chen ka invawng thianghlim a, tunah a hun hma a tih chhiat ka duh lo” ka ti leh a, a rum nghut a, a rawn tawlh chho a, ka hnute a khuh zui nghal bawk.

“Um, a dik alawm, reitak erawh ka nghak dawn lo ania, kan lo hrehawm dun tawhna zawng zawng kha min rul vek ang” ka beng bulah a ti sup a, a nui ri hak bawk.

Ka Phone ka kekawr ip te a ka ah a rawn nghawr dar dar rual in ka haw har tawh zia ka hre chhuak a, rang zet in ka thu chhuak zui nghal bawk, khaw nuam lo nen ka nu in min ngaihtuah hle ang, a hma te khan lo ngaihtuah tur ka nia sin le, kan Boruak vang vek kha ani.

Ka phawrh  chhuak a, ka rin ang chiah in ka nu alo ni a, ka pick rual in min rawn hau ti tih nghal a, ka dem hran lo, ka nu ani miau a,

“I va lo haw har ve” a rawn ti nghal a,

“Um, ruah a sur sia, Ben-a te in ah ka chawl a” ka ti a, ka Phone Ben-an a rawn pawt thla a,

“Ka rawn thlah haw ang, lo ngaihtuah suh” a ti a, tih ngaihna hrelo in ka melh reng a, min rawn en a, a mit a siai zauh bawk, ka nui ta nge nge, hman a Ben-a, mipa naupang ria thlel thawl, chimawm em em kha ani leh tlat tawh.

Phone a Off a, min rawn en leh a,ka ban ah a rawn pawt a, ka inring silo,ka delh thlu a, a nui hawk hawk bawk, a nui ri chuan min fan raih raih a, kan tleirawl lai nun ah khan kan let leh niber in ka hre hial mai,a dar hlai hlap ah chuan ka lu ka nghat a, a khabe hmul  to siar siar chu ka chul sak a,

“Kal ila, ka tlai ang, nakin ah titi na hun kan la nghah dawn eee” ka ti sep a. Ka kut a rawn man bet a,

“Kal tir che ka phal lo ti ila?” a then suk a,

“Kal ka ngai tih i hria alawm, eee, Chhanhimi kha ngati nge i then a?” ka ti tha leh a,

“ Min kalsan hnu khan kawp leh tum na ka nei tawh lo, tha tak in nangmah ka hmangaih tih ka hrilh alawm, kan in zui tawh tih a lo hre daih tawh a, alo thik ngam lo mai mai che anih hmel” a ti sup a, a zangthal a, inchunglam a melh vung vung bawk.

“Ka in thiam thei ngai in ka ring lo e” inring tawk leh ta lo zet hian ka ti sep a,

“I thiam loh a nilo, kan pahnih hian ka nu vang in kan inthen a, diktak chuan ka hua che,ka nu khan a boral hma in engkim kin hrilh vek a, ngaihdam dil che a duh em em bawk a” a rawn in let a,

“Oh..Ben..” ka ti sep ringawt, kha hmeichhe huaisen lutuk khan ngaihdam min dil alo duh anih chu,mahse, ngaihdam min dil hma in ka ngaidam daih tawh, a hnen atang phei chuan ka dam chhung in ka hre ngai tawh dawn lo tih a chiang a, kan thih hun ah van ah emaw hremhmun ah pawh kan la inhmu ang a, chutah chuan kan la sawi dun ang chu, ka mittui a rawn tla a, tun hma zawng a hmeichhe luhlul leh thu duh em em thin kha Doctor ka nih tak hnu hian ka tah belh a, tih nat ka awlsam em em bawk, Doctor ka nih vang anih rualin Ben-a nen kan inthen tak vang ani tih ka chiang em em bawk.

Ka mit ah a rawn fawp a, ka sam ah a chul hauh hauh bawk,

“Mate, ka nu kha i ngaidam tih ka hria alawm, i rilru thianghlim lutuk hian tumah i haw rei thei lo tih pawh ka hria , chuvang tak in ka hmangaih che a., ka nun pumpui hi nangmah nen a hman ka duh bawk, min kalsan nawn leh hnu khan hei hi ka hre chiang, kei hian Hmeichhe dang ka hmangaih leh thei tawh dawn lo a, i tel lo chuan khawvel hi nuam ka ti ngai dawn lo, midang rilru ka tih nat leh ai chuan i lo let hun nghah mai ka duh ta zawk a, nang pawn min hmangaih a, engtik ni ah emaw chuan ilo let leh ang tih ka chiang, Pasal nei a i then leh hnu pawh ni se lo nghah che ka tum tho, ka nghak chhuak ta lo che anih pawh in i hlim tih ka hria anga, ka lawm tho ang” harsa ti zet hian a ti ta duah a, ka inbeng kang a, he tiang em em hian min lo hmangaih tih ka lo hre si lo.

Fel leh tha ah ka lo in ngai thin a, ka nat apiangin Pathian ka au a, Ben-a ka dem thin bawk anih kha,kei aia nasa in min lo hmangaih reng si,

“Ben, engmah sawi tur ka hre tawh lo, ka Hmangaih che tih chiah animai” ka ti sep a, a mit hnawng chap ah chuan he mihring, Mipa ka hmuh tawh a mipa ber hi a tap ve anih loh pawn a mittui a tla tih ka hria,he nun hi anilawmni ka lo nghah kha..engtik ah mah ka kalsan leh ngai tawh lo ang, a Farnu emaw, Hmeichhe dang pawh, tu pawn min dodal leh dawn se ka kut a vawn na hi ka thing thla leh tawh ngai lo ang.

Haw tur a in hnuai kan pan thlak lai in Ben-a nau,Step a rawn chho nen kan in tawk a, nidang ang bawk in a meng ling hlar mai, ka tim sawk thei hial bawk, mahse, ka kut ah Ben-an a chelh tlat avangin hlauhna ka nei tawh lo.

“U chhanhimi kha khawnge?” kei min en tawh lo in a u hnenah a ti nghat a,

“A kal tawh aniang,ee, vawikhatmah ka Room ah min dil hmasa lo in rawn luh tir tawh suh” nelawmna tel miah lo in a ti hmuk a, ka lo ip chawih mai,Chhanhimi lo kal chhan awm ka lo ngaihtuah lai tak ani a, Ben-a nau nen an lo inkawm thin vang anih lek chu.

“Mahse, Mam..” ati hman chauh a,

“Apuii ka va drop lawk ang, ka rawn let har lo ang, chuan, ka pa kha ka be duh tih lo hrilh rawh’ ati leh a, a nau hi a duat em em thin a, a mizia a thlak danglam nasa tawh lutuk a, alan dan mai ah chuan unau inngeih lo tak an ang viau mai.

Khua ala hnim ruih a, ruah erawh a tla tawh lo, Motor lak chhuah a tum chu ka hnial a, ke a kal nan a hla lo bawk a, kal dun ka duh zawk, min hnial lo in ka sawi a zawm ve mai bawk, ka kut rawn vawn a tum erawh ka duh lo a, khawlai ah em nula leh tlangval puitling tawh in kai a kal hi mawilo ka ti ve tlat.

“Ngatinge i nau kha i hauh kher ? ka tan a nuam lo asin” ka ti a, min rawn melh zawk a, a kekawr ip te a zen a,

“Ka hau hleinem, ka warning anih kha, Chhanhimi hian kan inthen tawh hnu ah pawh ka nau chhuanlam a hmang in a rawn kal fo a, ka room ah rawn luh pawp a ching zui bawk a, ka duh lo “ ati nghut a, ka nui sak a, kan inkawp hmasak kha chuan a room ah ka duh hun ah ka lut mai thin a, min sawisel ngai lo, ka leng tam lo em zawk a, kan naupan lai chuan kan kal nasa a, mahse, kan in ngaihzawn chhoh tak hnu khan ahma ang in a nu leh a nau in min lawm ta vak lo bawk nen ka kal tlem ta viau anih kha.

Ben-a nen kan inkar a that leh tak ah chuan ahma ang bawk in kan inzui tam leh ta, nilengin a hna ah buai mahse hun awl a neih ve leh min rawn call ngei ngei thin, Mazawmi leh Zampuia kan hrilh tum a an nupa hmel a hlimna lo lang chhuak kha hmuh nuam ka ti a, Mazawmi phei kha chu a mittui a tling pam thei hial, ka tuar nasa tih a hria, chutiang bawk in Zampuia pawn Ben-a tawrhna a hriatpui ve tho bawk.

“Mate, i hman tawh em?” Ben-a call ka pick rual in a rawn ti a,Delhi a awm lai a a thianpa in Nupui a nei dawn a, ka kal hreh deuh avangin ka hnial a, mahse, ka hnial  thla zo lo,ka bengbeh beh tur ka keng a.

“Hman animai, lokal tawh la” ka ti a, a nui hawk a,

“Lo hawi let la” ka hawi let thuai a, Room kawngkhar biang ngheng in alo ding a, Suit thim lam a hak chuan a tilang lian zual a, a lang nalh takzet, ka thaw hak mai,a nui suk a, a Phone a lek kang zauh bawk, min rawn pan a,

Ka darah a hmui lum ham ham chuan a rawn tawk zauh a,ka awmdan damglam teivet ziah  hi ka ngei ru thin,hetiang khawp a mipa, mi hipna ngah ah hian a lo inthlak danglam tawh tlat a,kan pahnih chauh a kan awm chuan insum theih loh thelh  tum kan nei leh zauh thin..

“I nalh hle mai” ati sup a, ka bengbeh beh tur ka ken chu a rawn la a, min beh tir tum in a rawn kun hnaim leh nghal a, ka nui sak mai,

“Khawi, keimah in ka lo beh ang” ka ti a,mahse, min beh tir fel der, ka beng ah a fawp zauh bawk, rum deuhin ka en a,

“A mak, khati khan ti thin lo teh”ka ti hlak bawk, a nui suk duh chauh.

“Ka nghak rei tawh alawm,ka thianpa hian han nei fel se,next chu...” a then leh suk a, ngei zet in ka lei ka chhuah khum ri ngawt.

Biak in kan thlen hma in Motor dah na kan zawng leh te te a, Aizawl buaithlak na bawk, In leh Biak in ,Hall te kan nei tha tawh, mahse, Motor dah na lam hi kan hisap tel lo fo mai, Pheikhawk sang nen phei chuan kal chiam a hrehawm thin a, chumai bakah tam tak phei hi chuan kawngpui hnaih em em ah in kan sa lui duh tlat a, mipui tan kan hnawksak rual in kawngpui hnaih lutuk chu keimah ni tan tak pawh thil nuam anilo, kan duham luat ah vantlang kawng kan nek leh chiam thin hi sim a tha viau mai tih te ka ngaihtuah phah rum rum mai.

Inneih inkhawm ah mi an tam kher bawk, ban ve leh Biak in kawt ah kan ding khawm a, Ben-a te thian ho an inhmukhawm chu nuam an tih hmel kher bawk, mahse, vawikhatmah ka kut a chelh a thlah lo, in ti ta tu zet hian min vuan run a, kei in nuam ka ti bawk,

“Ben, hei hi mi kan Doctor chu?” Hmeichhe pakhat, hmel chhe lemlo hian nui sang in a rawn ti a, min chibai tum in a kut a rawn phar chhuak nghal bawk, ka lo vuan vat a,

“Um, anih hi, Mate, Delhi ka awm lai a ka Flat hnuai chiah a awm thin anih hi”ati a, a hming a sawi zui nghal bawk, engtin nge min hriat mai ka hre bik lo, keimah min lo hria pawh nise Doctor ka ni tih a hre tel lehzel chuan mak min tih tir viau,

“Thian ho Group  ah i lar ania aw, mahse, Lawmsanga sawi dan ai pawn i nalh zawk” a nui leh var var a, ka hmai a sa hat hat mai,kum 30 ka hnaih tawh a, thil ho mai mai a zak viau tur ka ni tawh lo asin le, ka nuih let sak a,

“Fak na ah ka ngai ang, ka lawm e aw” ka ti a, a nui hak hak chu ka en a, ka la ngaina ngei in ka ring, ka mit sir in tu emaw lo kal hnai ka hmu a, en chiang tur a ka hawi let chu Chhanhimi nen kan inhmachhawn ta siah mai,a hmelthat ngaiin ala tha reng, Ben-a Room a kalsan hnu atang a ka hmuh leh hmasak ber ani bawk.

“Ben, i tha maw?” tih pah in a hmui sen hlar mai chu a pet sawi zauh bawk, a che vel zei thlarh mai hi ani lawmni ka awh em em kha, tun tum ah chuan hmuhnawm ka ti ta huah lo.

“Kan tha e” a ti hmuk a, keimah min zawt tel hauh lo nang in min sawi tel lui tih ka hria, bakah hetiang mipui tam na ah buaina a siam duh ka ring lo, chutiang khawp a mawl ani lo.

Ben-a thiante dang nen an in be zui ta zawk a, tute pawh chu a hriat vek dan ah Ben-a nen an khawsa dun ngei tih alang a, tul lo zet in thik na a rawn lang a, duh lo mah ila ka thik lo ngawt thei lo.

“Toilet ah ka’n kal lawk ang aw” ka ti a, Ben-a rawn kal ve tum chu ka hnial a, min en deuh vung vung a, a bu ta nge nge.

In hnuai lam ah Toilet a awm avangin ka pan thla a, muangchangin ka kal a, ka make-up hman te pawh en fel ka duh bawk, hmeichhe 3 an lo awm sa a, anni pawh an lo in chei tha mek bawk, Ka kut ka sil a, ka hma a Darthlalang awm ah chuan ka in en a, ka hmai a sen tan mai, a sa hat hat bawk,

“In be lawk ang” Chhanhimi tawng ka hriat rual in ka hma a darthlalang awm ah chuan a rawn lang zui nghal a, a nui sawng bawk.

“Sawi dun tur kan nei ami?” ka ti hmak a, Lip gloss ka inhnawih pah a, ngeiawm zet hian a nui hak a,

“Ben-a hi khumah a zei asin,khi lai a awm ho khi chuan kan chen dun lai an hria a, Ben-an min at chilh theih zia an hre bawk nen, i kal hnu khan an nuih zui che a” ati ham ham mai, an hre chiang khawp ang chu, ka chhungril ah che a awm a, ,mahse, mawl tak a chet ka duh lo, kei aia naupang zawk bul ah lehnghal..

“A tha lawm, mahse, hei hi ka hrilh ang che, thil kal tawh ah buai suh, i hmalam hun tur chuah ngaihtuah rawh, chuti lo chu i lengtar mai ang” ka ti let nghat a, ka Lip Gloss ka Bag ah ka thun a, ka in her a ,ka hmachhawn a, min thah mai duh niawm tak in min melh ran mai,

“I lo buaina tur a awm lo,ka duh duh in ka nung ang” athinrim bawk aniang, a seh chilh rap rap mai, hmeichhe dang lo awm ve te chuan mak tih hmel zet hian kan pahnih in min rawn melh leh hrek hrek thin a,

“A tha, chutiang tur chu, ka kal san ang che, anih leh phawt” ka ti leh a, ka nuih lui sak bawk, a rum halh mai,

“Tenawm lutuk”min rawn nam a, ka pai dawrh mai,hmeichhe pathum lo awm ve te chu an au dial bawk, mahse,ka tlu lo hlauh. Muangchangin ka ding mar a,

“I chet dan mawlmang lutuk kha sim rawh, i mize chhungril tha lo kha alawm Ben-a pawn a duh loh “ ka ti ve ta nge nge, a thinrim lutuk chu a khur hial in ka hria, kei erawh pangngai thei ang ber in ka awm lui tlat bawk.

“I zak lo lutuk “ tih pah in min rawn pan leh a,

“Min rawn khawih leh chuan midang bul ah hian ka ti mualpho ang che, i mizia nen pawh a inhmeh lo, min rawn si suh ang che” thupe aw zet, dam thlap si in ka ti leh a, a pen lai a ding chat mai, a hawi kual a, min tilui ngam lo tih a awm danah alang thei.

Ka kalsan lai pawn a che map lo,a awmdan class lo lutuk vang a a mualpho zia a inhre thei ang chu, a inhre theilo anih phei chuan rilru Doctor a pan a tha zawk mai thei.Ben-a te awmna ka thlen chhoh leh chuan min ngaithuah hmel zet a Ben –an min en chu ka haider lui a, Joint reception ah an thian ho ai awh a thusawi turin Ben-a an sawm a, a Coat kilh na a phelh a, a kamiz var hak chuan a vun a tilang hang deuh bawk, mahse, alang tha zual mah in ka hre thung,mit khap miah lo in ka en a, ka hnung a mi te thusawi ka hriat phei chuan ka nui var var mai,

“Khi pa khi maw, Ben-a anih khi, a van chhe lo tak,mahse, a tleirawl lai atang a a bialnu, Doctor nen an inkawp char char a, an inthen a, tun ah chuan anni leh tawh an ti asin” hmeichhe pakhat in a ti sa sa a,

“Awi, a nuamawm, an inhmeh ngawt ang”pakhat zawk chuan a ti sa sa bawk, Mizo te hi a tul chin bak a mi dang chanchin sawi peih hnam kan ni a, hre ber nih chakna in kan khat a, kan ei zawnna niawm khawp a mawi in midang chanchin kan ngaihven peih bawk, mahse, tun tum a an thusawi erawh khawi atang a hria nge an nih ka hrelo, an hriat na a pawimawh lo, ka lawmna tawk a tling em em tho.

Falkland ah kan kal a, Aizawl khawpui pe un mai chu Motor atangin kan thlir dun a,ka kut a vuan a, nghet zet in a hmer a,

“Vawi in kha i hmeltha takzet, chuan, Chhanhimi lak a i insum theih avang pawh khan ka lawm e aw” a ti sup a, mak ti zet hian ka melh a,

“Maw?” ka ti hau mai, anui hak a,

“Toilet ah khan ka ngaihtuah che vang in ka lo chhuk alawm,mahse, ka duh em em thin ,i mize dam dap a Chhanhim i ilo be lai kha ka hmu a, ka let san leh che alawm” ati a, ka nui ve ta thung.

A rawn thle phei a, a darah ka lu ka nghat a,ka kut tang karah a kut zungtang a rawn rawlh lut a,

“Min nei vat teh, i tello chuan ka kim lo” a ti sup a, keipawh ka kim bik lo..

“Ben..”

“Um”ati leh sup a,

“Ka hmangaih che”

“Nang aia nasa in” ati a, kan nun lo hrehawm tawhna zawng zawng te kha chu mumang ang mai ani ta.

Tu te pawh hian Hmangaih kan nei vek a, kan hmangaih tak te nei theilo pawh tam tak an awm ang, mahse, eng mi pawh kan kawppui te ni se, kan hmangaih anih chuan an tan kan rinawm tur ani, kan nulat thianghlimna hi infiamna atan a kan hmang anih chuan a vuak let kan tuar angai, kan lo chesual tawh anih pawh in mah ni in sit nan a hmang lo in sim a nun thar a nun a pawimawh a, Chhanhimi pawh khan nun thar nen hmalam  pan se ka duh takzet,khawvelah tumah mi tha famkim kan awm silo, nun hi a hahthlak a,PATHIAN  nen lo phei chuan tahna mai ani e, ka nun ah PATHIAN  Lalber ah ka dah loh chang awm mahse ka theih tawk in ka in vawng a, ka bo chang in a nin min kai a, kawng dik min zawh tir thin, chung zawng zawng a ka lawmman chu  BENJAMIN MALSAWMTLUANGA  hi ani e.