EVERGLOW-4

Chapter- 4

Zorinsanga kha..Amah chauh ni loin Family pic niawm zawk takah a tel ve a,Thutthleng nalh dangdai fahranah hian an nu leh pa niawm tak, Kum 60 atanga 70 inkar vel bawr hi an thu a.Mipa dang, amah ang em em nen Hmeichhe pahnih an kar cheh a,a bula ding zawk hi a nupui  a ni ngei ang.Engtin nge an hnuaiah ka thawh theih tehlul ang?Tunah zan a ni tawha, hna lah ka thawk thei ang tiin ka lo chhang vek tawha, ka thulh leh ngawt thei tawh der si lo.Ka rilruah Joe-a a lo langa, he mihring hrep hi..ka tana tha tur a duh tih ka hai lo nameuh mai, mahse a neitu te hi a hrechiang lutuk mah mah.Engtin nge an hnuaiah ka thawh theih arin ka hrethiam phak lo.Hei vang chiah hi a lo nih hi Interview pawh nei hauh loin min lo lak ngawt ni!!

Sana ka en a, a tlai tawh, thulh leh theih a ni tawh lo,chumai bakah tun dinhmunah hi chuan duhthlang thei ka ni pawn ka hre leh meuh lo.A pawi lo e,thla khat lek pawh thawk ila a ziawm tho ang,ka thawh chhungin ka theih ang angin hna ka zawng anga ka hmu leh mai ang,Duhthusam leh ka thiamna milpui hna ni loin ka thawh theih tur hna zawk erawh ka zawn angai ang tih ka hria.

Ka muhil mumal lo,ka thawh hnu lawkah Joe-a a lo kal a, lo hauh nghal mai ka duh rualin ka insum ta rih zawk, engpawh lo tise ka tana tha tur a ngaihtuah thin tih ka hre tho a, tun tumah a lo ti fuh lo palh a, ka lo hauh ngawt a fuh ber lo.Chumai bakah a fuh loh dan lah hi keimah leh Zorinsanga inkar a la ni ta cheu bawk a.Mahse, tu nge ka mutpui tih a hre tel tho a,  a tihluih leh khami hmang khan ka tan a lo nawrlui nge ka hre thiam lo,ngaihtuah lo law law ila a hahdamthlak zawk ang.

“Hey...Morning..i va hma ve”Zomuani’n min hmuh veleh a lo ti nghal chul a, ka awm a tinuam sawtin ka hre hial bawk.

“Tlai ka duh lo alawm, bakah i awm laiin a tlangpui zawr zawr min zirtir loh te chuan..” ka ti a, ka ti tak tak bawk.

“Okhey, lutuk,mahse, i experience ka hriat atang ngawt pawn engmah zirtir i ngai dawn lo chiang sa..engpawh nise hei hi min lo enpui lawk la..” Kawngkhar bula bang, Glass chhah leh nalh zet invuah lamah chuan a thle zauh bawk.

Midang an lo kal belh zela, introduction Zomuani’n a lo nei zel bawk, mahse, tumah han koh mai theih tur a hriatzui ka nei der lo,ka rilruah kam tu lianpui a awm run a, engtikah nge Zorina a lo kal ang? A nupui a lo hruai angem? Min hmusit awm fahranin min en leh angem? Zawhna chhan theih si loh chuan ka kawchhung a luh ngut ngut a ni ber.

Dar 11 velah a neitu lam an lo thleng a, mahse, hmuh ka duh loh leh beisei ruk ni lawi si, Zorina ber a lo tel miah lo.Thawven khat chuan ka thawveng ta phawt.Prog engkim a kal tluang tha a, Dawr hawn thar ni a nih angin eitur engkimah 20% discount vek a ni a, kan buai ta lutuk bawk nen rilruah engmah han vei renrun na hun a awm ta miah lo.

“Huizz...a va rapthlak em..” ka bula rawn thut thlak hnak pah hian Zomuani’n a ti a.A sawi dik,Dawr hawn atangin tun chiah hi thutna hun kan la nei,tlai lam dar 4 a kawk va tawh.

“Khatiang reng kha kan nih dawn chuan a lawmawm rualin a hahthlak dawn viau anih kha” ka ti ve a.Zomuani hi staff tho nimahse an Cousin a ni a, a bulah duh duh sawi ngawt chi a ni hauh lo.

“Ni reng lo ang, Dawr hawn tanni anih mai bakah Special Discount vang kha anih ka ring, bakah Christmas a hnai bawk a chuvang chu a ni bawk a.Mahse, he lai hi chu a Location hian a zir em mai a, Main lam tih lohah chuan a hahthlak ber tur lai chu a ni tho mai” a ti leh a, ka bu ringawt, an dawr dang te pawh hi a lun thei hlawm a, a sawi ang tak takin he lai hi chu a hmun hian a zir lehzual a, buai lai ber tur chu a ni tho mai.

“Mahse, vawiin kha chuan engkim i tihpui a, naktuk atang chuan a pangngaiin a kal thei tawh ang,i Cabin lamah i awm theiin ka ring” a ti leh a, Cabin lian lo te,Glass bawka hung hran lam chu ka va en a,Counter sir hretah, tlemin an hung hrang deuha, inchung thlenga hung hrang loin awm chen vela tihsan a ni a, midang tan inbiak pawh mai phak leh inhmuh theih vek a ni bawk.

“Ka beisei, mahse, khatia han puih a, intihpui kha thil hrehawm a ni miah lo,i lo kal leh ngem?”

“Aih, vawiin bak chu lo kal tawh rih lo ang, sawlam kan buai ve tho bawk sia,a tlangpui kha i hrethiam in ka hria” a ti a,ka bu leh ringawt.Diktak chuan thil harsa engmah a awm lo,mahse, ka fimkhur hle angai thung ang.

“Thil pakhat, Pawisa hi a hma pawn kan buaina a ni thin a, tin, Manager te kutah hian sales hi a in nghat nasa a, a chhiat viau chuan nangmah an push ang che, a that viau chuan hna thawk i nih angin i thawk tha an ti anga, lawmthu sawina lam chu engmah a awm chuang lo ania,mahse,an sual hauh lo thung” a ti leh duah a, ka ringhlel hauh lo,Hei hi chu mihring nuna bet tel tlat thil a ni ve a, kan thil tih that tam tak ai chuan tihsual pakhat lek hi kan damchhunga nun nuamlo a min siamtu leh mi min hriatreng dan a ni tawh tlat zel.

“I cousin te anni tiraw?” ka ti a, midang chanchin han zawh deuh pawp hi nuam ka ti lo viau thin nangin min kam tlat.

“Um, Cousin ti ila a hla tawh,Ka pu leh a neitupa ber Pa hi unau an nia..a hla asin” a nui a.

“Hlat loh chu,mahse, i lo awm hi ka lawm ngawt mai..eee, chuan vawiin khan an fapa kha pakhat chauh ka hmu a” ka ti leh a.

“Nia, U Zorina hi chuan a buaipui lo hrim hrim,hna a nei a,bakah helam ni lo hi a khawih a” mak ti deuh hian ka en a, hetianga sumdawnna lian leh hlun,an Family ta an nei a,engtin nge Private bankah lehnghal khan a thawh peih zawk ni? Mahse, a thawk satliah mai pawh ni loin an chhungkaw sumdawnna pawh hi a ngaihven miah lo a ti bawk a,mi mak tak a ni ngei ang.

“Anih chu, mahse, hetiang khawpa eizawnna tha leh rintlak annei a, an chhungkua pawn an enkawl zo awm tho sia,Mipa pahnih chiah anni tho sia..” ka ti leh a.

“Um, nia, mahse, buaipui lo tawp a ni hleinem,a thianpa nen Sumdawnna dang an nei a.Tuna Sairanga rel lo lut turah hian an thiandun ta Elite Construction  hian a chanve aia tam mah hi an thawk mek alawm..chuan,Cakewalkers ah  bik hi chuan an family hian share an nei hran vek a” a ti leh teuh a, a chanchin ka hriat apiang hian thil danglam a lo thleng zel chu a ni phawt mai a.Mi mak tak chu a ni phawt mai.Mahse, ka thawveng huai thung,a lo kal ngai dawn lo tihna a ni phawt mai.A nupui chungchang erawh ka zawt ngam ta lo.

In ka thlen meuh chuan khua a thim chiang viau tawh,Mama ka ngaihtuah deuh nangin Nutei a awm tih mi rawn hrilh avangin ka rilru a nuam ta deuh kha ania, ka thlen pawn a lo la awm a, Joe-a a lo awm bawk.

“Eng nge a an hmel a?” Mama’n a lo ti thuai a.

“Pangngai, a nuam lo a, a hrehawm lo bawk a” nui chungin ka ti a.

“Ha..i va sawi thiam ve,i inbual hmasa dawn nge chaw i ei dawn?”

‘Nakin deuhah le, ka intihfai phawt loh chuan ka thlan bawk nen ka ban deuh chuap mai” ka ti a, Nia, thlasik lai mahnise ka thlan nasa viau tho tlat.

Christmas kan hmang liam a, ka tan chuan Christmas tih hian awmzia a nei tam vak lo,Dawr lam kan buai em em reng a,mahse kan hawn ni ang em kha chuan kan buai ta lo.Ka hlauhthawnna te pawh an reh tial tial a, atir kha chuan Zorina lo lan mai ka hlau a, mahse, lo lan tih a awm lo.Kan la thawhho rei loh vang nge ka hre lo a, a thawk ho lah kan inpawh em em riha,ka cabina tawm reng loin an bulah ka awm a, kan nui ho bawk bawk a, ka rilru hahna leh ipik churh te pawh a kiang ve tial tial bawk.Hna hi tha taka ka thawk reng anih chuan tlem tlemin ka pawisa bat te ka rul thei anga,a ziawm viau mahna le.

“Zanin Party kha aw..” Zomuan’in min rawn call a,kan inkawmngeih ta phian.Keimah ang bawkin anihna ang angin a lang ve mai a, engmah han zep ren run a nei lo a.A duh loh zawng lah pai reng loin a tilang zel mai bawk,kan mizia lah a nu dim dem hek lo.Ka fel hauh lo,mahse, keimahah hian thil tha tak pakhat a awm ve a,ka rilru a tha emaw lam ni loin ka nih loh dan a min tih pawn ka ngawi mai a, eng ang pawn min bei se ka ngaipawimawh zui tawh lo.Ngaihdan fel tak pakhat ka nei bawk a, mitana kan that chhung chu an tan mitha leh fel kan ni a, an ngaihdan engemaw pela kan kal chiah hian kan thiltih hi a dik emaw dik lo emaw an ngaihdan a pelh miau chuan  misual leh rilru chhia kan ni mai.

“Aaaa...ka lo hre tawh miah lo.Kal loh mai ka lo tum asin” ka ti a, kan Boss te Familyin Staff zawng zawng tan Party an buatsaih a, hei hi chu Zomuani hnena ka hriat danin kumtin an tih dan ziah a lo ni a,kumhlui ni tawp ber zanah kumthar lo thleng tur pualin an siam thin a,an family te pawh an tel tha thin viau niin a sawi bawk.

“I ho lutuk,i naute ho kha i rawn ho an ngai alawm..”a rawn ti leh a.Ka thaw hak mai.Ka hmai zum lam lek lek Darthlalanga lo lang chu ka en a.

“Kal loh mai ka lo duh tak tak, Mama chauh kalsan ka hreh a..” ka ti leh a.

“Naaa.,zankhua in awm ang ka ti chuang hleinem,bakah Boss te pawn chutiang turin an ti lo a.A peih chu an awm tlai a, peih lo tan pawh haw hma theih tho.Mahse, kal loh ngawt kha a chi ber loh ania” a rawn ti leh zat zat a, a sawi dik hmel viau.

“Ok,i tih tlat te chuan “ ka ti a, lawm zet hian a khek raih bawk.

Zorina ka hmu mai angem? Midang hian an hre ve hauh lo nangin min ngaisang miah lo tih hriat taka min en reng chung khan darkar tam ka tuar thei angem? Zawhna hlir mai.

“An family an kal kim vek thin ami?” Zomuani bulah ka ti a, kan pahnihin Table pakhat kan kil a.

“Kal kim vek ti ila U Zorina a kal ka ring chiah lo,abak chu an lo kal ang, mahse, hunserh angreng deuh kan nei ve a, chumi zawh hnuah chuan an haw leh mai zel,kum khatah vawikhat an staff te hi nuamsa deuha awm turin min duh a,chu zawng chu nimai..” a ti a, Beer a hum ran bawk.Kei erawh Zorina a lo kal dawn lo tih ka hriat vang ringawt pawn ka thawveng hawk thung.

Boruak a sosang viau mai,kum tluana hah taka lo thawk te anni a, ei leh in tur, Drinks lam engkim mai lah chu kan hnianghnar a, duh leh duh loh a ni tawp mai.A then an lam a, a then muk fein an ti ti bawk.Branch danga mi te nen kan inchibai a, kan inhmelhriat zel bawk a, ka rin ai tak chuan nuam ka ti ta phian mai.

“Ehe...u Zorina chu a lo kal leh si anih saw” phur fe hian a ti hliai a, ka hawi chhuak rang ngang mai.

A hawina lam ka va hawi ve a, sir zawng deuhin a ding a, a hmel ka hmu chiang thei lo.Mahse, a ni ngei tih erawh ka chiang ngang mai.Kum dangah chuan a lo kal ngai lo kha a ti reng sia.

“Khawi ber saw maw?” hre lo niawm tak hian ka ti a.

“Saw, Zuala bula ding saw...lo kal rawh, ka hmelhriattir ang che” a tho zui nghal zat bawk.

“Aih, ni lo e...”mak tih hmel deuh hian min rawn en a.

“Ngatimaw? I la hmu lo a, ani pawn a la hmu lo che a, kan Boss anih angin ka hmelhriattir dawn che lawm”

“Aih,ngai lo,inhriat hun te chu a la awm mai ang,Toilet kal lawk ka duh zawk a” ka ti a,a ner nak mai.

“A mak thei,ok..pawi lo mai,mahse, ka va be lawk ang” ati a, chhan pawh ka chhan hmain a kal zui chu a ni der.

Rang zet hian ka tho a, Toilet lam pan loin Pawn lam ka pan a, ka haw mai a tha zawk ang tih ka chiang, inhmuh tir kher ka duh hauh lo.Diktak chuan an dawrah ka thawk tih pawh a hre lo anih hmel zawk,ka thawh dawn khan keimah ka nih vang leh Joe-an ka dinhmun a lo sawi chiam vangin interview loin min la emaw ka lo ti ngawt kha ania, mahse, chutiang lam a nih hmel ta hauh lo.An family sumdawnnaah hian a inrawlh miah lo a ang zawk a, an hnathawk te hi a senior deuh ho bak a hriat ka ring ta miah lo.

Taxi lo tlan hmasa ber ka phar a, Zomuani kha chu ka call leh mai ang, anih loh pawn Msgin ka haw angaih thut thu ka hrilh mai ang, kan kal rual chuang lo bawk a,lo haw san kha thil pawi tak niin ka hre lem lo.

Ka bulah Taxi a rawn ding a, ka pan hnai a, ka pawt hawng chiah tihin tueawm hian a rawn nem khar leh nghal hmak a, tu nge anih en tumin thinrim zet hian ka hawi chhuak a, ka beisei loh lutukin Zorina !!

“Engemaw i tih le?”

Min chhang loin Taxi Driver en tumin a kun hniam nghal a.

“Min hrethiam lawk, kan la haw hman leh lo a” a aw a dam thlap nangin hnial chi erawh a ni hauh lo thung.A rawn chet dan tehthut chuan min barakhaih lutuk a mi a ang maiin ka ding ngawi reng ringawt.

Ka banrekah a rawn chelh a, min kaih ang angin ka zui ve ringawt bawk.Khawiah nge min hruai dawn pawh ka hre lo a, duh lo a tan pawh ka tum chuang hek lo.

“Lut rawh...” XUV pencil colour kawngkhar hawn pahin a ti a.Ka harh zawk mai, ka muhil miah si lo.

“Teuh lo...” ka banrek a vawnna phelhsak tumin a kut ka zuk vawn sak a.

“Takzet..?” a then suk a,ka kawngah hneh zetin a rawn kuah a, ka te thawt mai, mahse, a tum a hlawhtling ta tho.

A rawn nem khar a, hawn tumin ka bei ve thung, awmzia a awm lo,a kal kual chu ka en a, a rawn thu lut a,ka haw hluah hluah.

“Eng thil nge i tih a?” min chhang lo in Motor a start a, a tlanchhuak zui chu a nimai.

“Khawiah nge kan kal dawn?”

“Angaiah khan...”

“Hmela..ding rawh..” ka beisei loh lutuka a din tak thutah chuan hmalam ka kang awk a, ka intauh hmain min rawn pawt let nawk a, hlauhna avangin ka lungphu a rang nghal dawt dawt bawk, min kuah ang angin chet pawh chesawn loin ka awm a, a lungphu ri dat dat ka hrethei hial bawk.

“Hmeichhe thawmna deuh hi ka lawm vak lo,an thawm nat hun tur chu Khumah te...” zawi sup hian a ti a, a nui nghawr dar bawk.

“Min thlah teh..” min kuahna tanga inlakhran tumin ka che a, min thlah ve mai bawk.Ka biang sa hat hat hmu thei lo tura Motor chhung light a on lo hlauh ka lawmzia chu pui tak a ni.Mahse pawn lam engin a rawn chhun a, thim over erawh a ni lo thung.

“Khawiah nge kal i duh?” Steering a bawh a, min rawn en a.Kawnglai takah kan ding emaw ka tih kha a lo ni lo,ka thinrim khaw hmu lo khan kan dinna lai pawh ka lo en lo.

“Haw ka tum lai min rawn pawtbuai kha ania, haw ka duh tihna animai alawm”

“Um, a dik maithei,mahse, haw i tum lai ka tibuai che nge min hmuh vanga  tlanchhia ka dang zawk che?” ka va han haw hluah hluah tak.

“I ngaihdan dan le” nelawm lo zet hian ka ti let nghat a, hetiang mipa chimawm lutuk hi chu tihlet dan tha ber Zomuani khan a sawi thin tak kha, an mahni ngaipawimawh lo tu te an ngaithei lo ati thin a, ngaipawimawh lo taka ka chhan theih chuan a tha nimai.

“Ok..ka ngaihdan anih dawn chuan i tlanchhia ah ka ngai e,mahse, zanin hian i nau ka be lawk tawh a,i duh phawt chuan i riak chhuak thei a ti a” ka en vat a, ka chil ka lem khawlh bawk.LALPA...chutiang thleng lul suh se.

“Khawiahmah ka riak dawn hauh lo..Kan Inah anih ngawt loh chuan..” hawisawn duh loin ka melh lui ngar bawk.

“A tha lawm,kei chu ka zin nasa khawpa, achanga Motora riah hi ka tan thil thar a ni lem lo..” seat hnunglam a ngheng a,a thu awn zui nghal hmak bawk.A va han beidawnthlak thin tak,a awmdan engkim mai hi han nek luih deuha danglam thei a ni hlawl lo.A hmel en hian midang aia luhlul em em na neiin a lang bik si lo,mahse, a awmdan engkim hian min ti zam chhia chu a ni lawi si.

“Enge keimah ah hian duh i neih?” reife ngawirenga kan thut tlawk tlawk hnuah ka ti ta nge nge.

“Enge i rin?” mutchhuak aw zet hian a ti sup a,hahdam hmel zet hian a thu awn a, a inkuangkuah fel thlup bawk.

“Ka hriat loh vang takin ka zawt che..” ka thinrimna ka control hman lo leh teuh kher bawk, ka ngaihdan a ni lo emaw ka thinrim pawh nise thup hram hram ka duh a, thinrima nawr chi niin ka hre tawh lo.

“Dar engzat nge?” ka beisei loh lutuk min zawh takah chuan ka nui hak mai.

“Ka hre miah lo..”nuihza insum chung hian ka ti a.

A rawn thu mar a, a Jacket ban a pawt hlim zauha,a rawn hawi a..

“Minute tlem a la awm..chumi hnuah chuan ka chhang ang che” a thut ngaiin a thu lehnghal a.Biak zui chakawm loh zet hian  a phone a en zui daih bawk.

Ka Phone ka phawrha,Mama ka call a, a pick thei lo.Ka tinawn leh a,hmeichhe aw hian min rawn chhang ta hram.

“Hello..”Nutei a lo ni a.A riak em lo ang chu maw?

“Mama khawnge ?”

“Kan lo muhil a, ka kaitho dawn mi?” a rawn ti a, a mut a chhuah hmel tak tak,ka riak bo dawn tih a lo hrilh tak tak tihna animai angem? Chuvangin anni pahnih pawn remchangah an lo la ve tihna zawk nge? Kan inhriatna la rei loh nen hian min va han chawk buai hneh tak.

“Aih, ngai lo e.Ka lo haw tlai ta deuh sia..”

“Eng lo,i lo haw dawn lo a ti a..” a tawp lam chu a riat nawi deuh a,a sawi ka hre thei lo.

“Ahhh...um..nia” ka kut ka humruh a, he Mihring hian a lo sawi ngei anih hmel ta.

Hnunglam ka ngheng a, ka mit ka chhing ta ngawt,Ka chhuak thei bawk si lo,ka muthilh theih leh a tha animai,Hotel emaw room hrim hrimah khawiahmah kal pui ka duh hauh bawk si lo, a chhan chu eng nge thleng tur ka hria,a hma ang bawk khan a thleng leh ang tih ka chiang, a khawsak dan engkim kha a vaiin ka la theihnghilh hauh lo.

“Happy new year...” ka chalah hmui lum deuh thur thur hian a rawn si a, ka mumang emaw ka ti a, men pawh ka meng chuang lo.

“Eng nge ka duh  kha min zawt a, ka duh chu i bulah kumthar lo thleng hi hmuh ka duh a,chuan, tun ang bawk hian i muhil lai thlir che ka duh bawk a...” ka awmah a hmai a rawn phum a...Ka mumang a ni hauh lo.

Muangchangin ka mengchhuak a,kuah let ve lo turin ka insum tang tang bawk,a NUPUI kha...ni e, Nupui nei lai ni lo se chuan ka inchhirna tur pawh thleng dawn se zanin hian engkim ka tihpui ngei ang.

“Khawngaihin hetiang hian ti suh,Nupui nei lai nena inzawm hi ka duh lo..” ka aw a zawi hle nangin kan inhnaih lutuk,a beng a ngawng anih loh chuan a hre tur a ni.

“Nupui...hreptak hian...”na tuar niawm tak hian a ti chhuak hrawih mai,mahse, ka chhungril a fan rawih rawih tho.Nupui a nei ngei tih a chiang tawk em atin ni.