EVERGLOW

Chapter- 3

“Nangmah maw?” mak tihna vangin ka aw a lawi vek.

“Um, ka nih hi..thu la.” A hmaa chair awm lam chu a kawk zauh a, kei erawh ka dinna ngaiah ka ding ngar thung.

“Hetah hian ka lo kal ngei ngei angai dawn tih i hria a..mahse, Chequeah hian Zorinsanga a inti a” ka aw a khur dar dar mai.Hetiang em em a min hmusit a min hnuk kawi tu hi ka haw hluah hluah.

“Nia, i lo kal ngei ang tih ka chiang,mahse, eng nge dik lo awm?” ngaipawimawh lo hmel zet hian a ti awlsam mai.

“Ka haw lutuk che..”ka tum loh tawpin ka ti ta thlawt.

“Ok, khalam kha chu mimal thil ania, tunah chuan i cheque ken kha ka pass angai anih ka ring ve ngawta” a hmela engmah danglam chuang lo hian a ti leh a, ka chungrilah nuam lo tihna a rawn awm zawk a, helaiah hian mimal thila dawr tura kal ka ni lo.Pawisa lakchhuah tum mai ka ni a, he cheque hi tu ta pawh nise ka pawisa lak chhuahna turin ka kutah a awm tawh a, abak engmah tihtur ka nei lo,bakah, he Mihring huatthla la zet hian a staff te hnenah kan khawsak dan kha sawi lan a duh ka ring lo.Ani aia nasa fe hian an hriat ka duh lo bawk.

Tim dai hian ka pe ta nge nge, mahse, ka zam zia lang lo thei ang ber turin ngil auhin ka ding a, ka dak deuh vah bawk.

“Kha le..”a rawn nawr phei leh a,rang fe hian ka la a, lawmthu pawh sawi loin ka inhera,Kawngkhar lam ka pan zui nghal zat bawk,He mihring ngeiawm zet bulah hian ka awm tam loh a him ber,tu nge ka nih a eng nge ka tih thin engmah a hre lo,angaihdanah chuan Ks ka nimai,a pawi chai lo,keiin ka duh aia tam a chanchin ka hre tawh thung.

“Lawk..awm i tih zat i la meuh em?” a rawn tawng riah ka pen lai ka tawp chawt a, muangchang hian ka hawi let a.

“Aih,ka duh zat ni loin ka mamawh zat ka la, awm ka tih zat ka la dawn anih chuan i neih zawng zawng ka lak angai ang” chang fak hian ka ti a, ka beisei loh zetin  a mithmul a ti sang awk duh chauh.

“Ok..engpawh a tha...chuan, Zorina ka nia..” a kut a rawn phar chhuak a, a cheque min pekah khan Zorinsanga a inti chiah renga, nizan khan ka en lova, vawiina ka en khan nizana a hming sawi leh cheque a mi hi a inmil miah lo tih hriat ve awm tak.

“Chuan...?” ka ti ringawt.Sawitur dang ka hre lo.

“Nizan khan cheque kha i check miah lo a, i la a, i duhtawk mai, kha khan i mamawh zia a tilang chiang a, i mamawh zat ka pe thei lo che anih pawn a chanve tal pawh ka lo tih sak che chuan a tha..”a ti leh a, a sawi dik leh ta..nia, ka check hauh lo, ka fimkhur thin tehreng nen ka mamawhna khan min nawr hneh lutuk a ka fimkhurna te pawh ka thlahdah ta tial tial tih ka hrechiang lehzual.Tun tumah chauh hian a ni hauh lo lehnghal.

“Engpawh nise ka lawm ka ti mai ang..” engvanga lawmthu sawi ngawt nge ka nih ka hre lo ,mahse amitah tak ka en lui ngar thung..Chiang taka a mita en bak hi tih theih dang nei mawlh hek lo le.

“I hming chu?”

“Ni lo...a tul hran lo, tunbak hi kan inhmu leh tawh dawn chuang hleinem”

“I hming pum khan ka ko dawn che nge?”ka ip chawih mai.Engtin nge ka mawl em em theih? Chequeah khan ka hmingpum ka ziak kuau tak alawm le.

“Oh...i duh duh sawi lo teh, hetah hian mimal thilah ka lo kal lo ania” a tawngkam hman tawh ang chiaha ngeiawmin ka ti let ve kher.

“Sorry....a dik alawm, engpawhnise hming nalh lo zawk zawk ani hauh lo.LALNUNPARI...” a nui suk bawk,ka hming alam rik dan chuan mak deuh hian min fan raih raih mai.

LALNUNPARI ka ni a,ka hmingpum hi hria an tlem viau,min hria apiangin ‘Nanun’ tiin min ko vek thin miau a.Ka rilruah thil a lo lang zawk mai.

“Hming engzat nge i neih?”

“Pakhat...” kan inchhang tawk veng vawng khawp mai.

“Nizanah ZODUHA,tunah ZORINA...” ngeiawm zet hian ka nui lui hak bawk.

“Nizana ka hming ni lo ka hrilh pa kha i tan mi hlu tak aiin hmelma a ni tih ka lo hmu thei a,ka hming dik tak hrilh lo  pawh khan ka chhan him thei tho che tih ka lo ngaihtuah a” a nui leh suk a,chhan leh mai na tur ka hre lo..

“Engpawhnise ka lawm e” ka ti leh hmak a,misual tak a lo ni emaw mi fel tak pawh lo nise ka tan engmah a danglam chuang lo.A sawi ang ngei khan vawihnih lai chu min chhan ta tho alawm,ka mamawh Pawisa min pe tu a ni ringawt,chumai bakah a thlawna ka neih ni loin ka hlawh chhuah ngei a ni ve tho bawk.Ka hlawh chhuah dan ka ngaihtuah chhuah zawng ringawt pawn ka hrawk a ro nghal halh mai,ka bula ding mek hi engmah awlsam taka theihnghilh zung zung chi anih hmel si loh.Engpawh nise kei lo pawh tamtak a mutpui ngei ang tih ka chiang,midang aia min hriat fal nalhna tur engmah tih ka neih ka ring lo a,tun hi kan inhmuh tawpna leh kan inbiak tawpna anih ka beisei takzet.

Pawisa kan la chhuak a, Joe-a tawng mawlh mawlh chu engmah hre mumal loin ka aw liam vel mai mai,ka kalsan tak Mipa kha theihnghilh nghal ka duh em em rualin ka theihnghilh mai mai dawn lo tih ka hrethiam ta chiah bawk.Mahse, ka hrereng emaw ka theihngilh pawh nise engmah danglam a awm lo ang tih pawh ka chiang.Zankhat hmeichhia a kawp leh Pawisa hmanga a lei theih ka ni ve satliah mai a ,min hriat zui rengna tur a nei lo tawp.

Ka nau enkawlna tur ka nei leh ta phawt, Pawisa ka deposited a, tunah chuan tlemin ka hahdam ta,khawi atangin nge Pawisa ka neih tih lam ai chuan pawisa neih ka mamawhna zawk chiah ngaihtuah ka duh a, ka thei viau bawk.

“Naktukah kan chhuak maithei a..” kan teber hnenah ka ti a.Kan chhuah dawn vanga ka lawmna leh bill vanga ka rilru hahna a inchen reng.

“A va lawmawm ve, nih chuan,u..Bill engtin nge?”

“Ka tifel mai ang, lo lungngai suh. I lo haw thei lo tur hi pawi ka ti zawk daih ania” ka ti a, Christmas rawn hmang turin lo haw a tum zet tawh a, mahse, Exam tur a nei leh laklawh ta tlat a, kan unaua hman ho ka duh tehreng nen tihngaihna a awm lo.

“Ka exam tur hi duh chuan ka exam lo thei tho a,mahse, ka ui ve bawk sia’ a rawn ti leh halh a.Ka hrethiam.Ka zirlai ka zir chhung khan ka pa a la dam a,Ka nu a la awm bawk,engmah harsatna kan tawk ngai lo,Hausa uchuak a sawi tur kanni hauh lo nangin ka pa khan Hardware dawr a nei a, kha kha kan eizawnna a ni a, kan dawr a muk thawkhat bawka kan harsa ngai lo.Ka pa enkawlna tur khan kan in seng hnem viau tih ka hria,Private Companyah ka thawk a,keimah leh keimah ka inenkawl thei thung a, hlawh ka neih hnuah engmah ka chhungte ka dil ngai tawh lo.

“U...i la awm em?” ka ngaihtuahna ka lo kawm tui lutuk a, Phoneah midang ka bia tih pawh ka lo hre leh tawh lo.

“Oh...awm e, lawk..ka buai deuha nakinah ka lo bia ang che” ka ti ta ngawt.Ka buai hauh lo,mahse, keimaha beidawnna rawn awm leh mek chuan min ti chau hluah hluah a ni zawk.

Ka khum bula Dressing Table lian vak lo chunga ka thil neih hlu neih ve,ka pa kut atanga ka dawn,engtikahmah ka tiral lo ang tia ka lo ngaihtuah thin chu ka en a, duhthlanna hmang tur pawn Duhthlan tur nei lo khawpin ka beidawng zawk.Heng ka tlereuh te hi tihral ai chuan tiin midang pawisa ka theih ang angin ka puk kual a, keimah ka inhralh hial bawk,mahse, tunah chuan awmzia a awm tawh lo.Damdawiin Bill a sang a, heng ka thil neihte hi ka tiral mai anih loh chuan engmah tihtur dang ka nei lo.Joe-a bawkin a hralhna tur lam min lo biaksak leh a, Thi 2 leh bengbeh,ngun te anni a, aman lam chu ka tlereuh te an hmuh hunah lo chuan sawifel theih a ni lo.A hlui nimahse tlawm uchuak lutuk chuan min leisak ka ring lo a.Kan damdawiin Bill tal chu daih se ka ti takzet.

Ka inngaihtuah kual leh chiam hmain ka lakhawm a, ka bagah ka thun zui nghal hmak,ka Room banga ka pa thlalak ka tar chu en pawh ka en tha ngam lo.Min khawngaih dan tur pawh ka suangtuah duh lo zawk,tunah chuan a pawimawh ber chu Mama inah ka hruai haw hi a ni rih mai.A bak chu a tlachawpin kan la ngaihtuah mai ang, Inah ber a awm tawh chuan ka phak tawk hnathawh tur ka zawng leh anga, kan nghei hauh lo ang.Chumai bakah kan ‘In’ tih tur tal kan la nei tho alawm le.

“Khawiah nge an dawr a awm a?” a Scooty hnunga chuankai pahin ka ti a.

“Kan kal anga i hre mai ang,eee...thil pakhat.Nizanah ka thiannuin min rawn call a,chuan...” a ti a, a ngawi leh daih lawi.

“Chuan eng nge?”

“Nakinah nimai tehse, tunah chuan kal phawt ang..kan tihfel hma leh In lam kan pan hma dawn a, hahdam der der hnuah kan sawi dawnnia” a ti leh lawi a.Ka nui ringawt, hei tak hi Mipa nisi a Mipa nen an danglamna ka ti lo thei lo.Hmeichhe tawng dan tur niawm tak hian a tawnga, thil pawimawh vak lo pawh pawimawh hmel deuhin a sawi a, pawimawh deuh pawh lap deuhin a sawi leh mai zel.

A hmelhriat te dawrah min hruai a, kan buk a..ka beisei ai tak chuan ka la hralh to thei,Ka pa khan Pawlsawm ka pass in Rangkachak thi min leisak a, College ka chhuah hnuah adang min leisak leh bawk, Ka pa ka ti ngawt nangin Ka nu pawh a tel tho mai.

Mama kan hruaichhuak a, kan chhungte an lo kal laih laih a, mahse, ka tan chuan chhungte tih hian inzawmna a nei tam lo, Ka nutei tawng ri te chuan ka luak a tichhuak zawk,mahse, Ka pi mittui hru kauh kauh mai erawh chuan min fan lo thei lo.Tunah chuan tar anni tawha,Inchhungah engmah thu annei ngam tawh hek lo.Min hmangaih loh vang nisi loin an tan chuan chet chhuah dan a vang ta em a ni tih ka hrethiam uar uar bawk.

“Nizan chuan ka thiannu chuan hmanzana mi bawk kha kan duh a ti a” ati a, min en loin tukverh lam a hawi daih bawk.

“Engtia hmanzan maw?” hrethiam lo fe hian ka ti let ve thung.

“Kha, i kalna kha..nangmah bawk a duh che an ti a..” ka thu khawng lah mai,Mama room kawngkhar lam ka hawi nghal vat bawk,engmah an hriat ka duh ngai lo ang.

“Ni lo e, kha chu mangchhia, engkim tawpna nirawhse...tunah chuan ka mumang tha lo kha ka thanharhsan tawh zawk” ka ti a, ka thawh hak mai.Ka sawi ang ngei hian thleng se ka ti takzet, a hmel kha vawitamtak ka mitthlaah a lang thin a, kan awmdan zawng zawng te kha avaiin ka la hre vek,ka ngaihtuah zawng ringawt pawn ka awmdan a thlak danglam a, ka thawk a ti sak talh zel bawk.

“Um, nia,chutiang chuan ka lo chhang a...mahse, amah kha ka hria ti ta ila..” min rawn en a, a hmai ngo fai vang mai chu a sen ap ap bawk.

“Hria pawh nila eng nge pawi?”

“Chutianga i ngai thei anih chuan ka lawm hle ang, mahse, i hriat loh thil pakhat a la awm ania,Nupui nei lai anih kha...” ka tui inlai ka hak a ka khuh nghal bawrh bawrh mai.

“Khawngaihin thildang i sawi thei angem?” ka tawngchhuah theih veleh ka ti a, a hmel a inthiamlohna leh pawitihna inlan chhawk sek mai chu ka hmu thei a,tawng tum hian a ang ziau a, mahse, a chip leh daih lawi.

“Ka va haw ange,naktukah kan inhmu dawn nia” a ti a,ka bu ringawt, a tir kha chuan lo riah kha a tum ania, mahse, dan buai vel ka tum lo.Mahni a hahdam taka awm ka mamawh lutuk.

Muhil thei loin ka mu meng kar mai,sual tih hi a chhan tha tawk pawh lo nise kan duh a kalsan ngawt theih a lo nih loh zia ka ngaihtuah a,Mama nun chhan nan ka tih nimahse zankhat lek buaina khan min kiansan mai dawn in a lang ta lo.Ka mit ka chhinga, Hmangaihna kan chen laia a hmel sexy zet kha ka mitthlaah a lo lang a, a hmui pan lam lek lek,hnawng deuh chap a ka nghawng a rawn nawr te,a kut zungtang sei thlurh maiin ka hnute hmur a rawn khalh paha hnuailam a chet dan te, a khabe hmul to tan siar siar leh a mitmeng chakna avanga danglam vek te kha...Ka thuchhuak ta nge nge..Khatiang khawpa hmeichhe tana nawmna thlen theitu kha chuan experience a nei tha tawk ang tih hre tur ka ni asin..Ka duh ber kha pawisa nimahse Mi pasal pawmlai ber kher chu....Nupui nei lai a ni tih hriatna turin eng zungbun mah a bun hauh lo tih erawh ka chiang.

Reife ka tal kual hnuah ka muhil ta hram, ka phone riin min tiharh a, peih lo zetin ka ban a, ka mit a kham thum mai.

“Hello..” meng mang lo hian ka ti a.

“Na-nun..i dam maw?” Hmeichhe aw hian a rawn ti a, ka hriat hnu a ang hle nangin tu nge anih ka hre mai lo thung.

“Aw, kan tha..mahse, min hrethiam la,ka hre mai lo che a” ka ti a, ka puansin laiin ka inkhuh tha leh rih a.

“Zomuani ka nia, min hmu la chuan min hriat ka ring a,i hna dil kha naktuk hian i rawn zawm thei angem ka rawn ti a?” ka meng nghal zawk mai.Eng hna mah ka dil hauh lo.

“Sorry...Zomuani..CAKEWALKERS ami kha..” chiang ngam lo deuh hian ka ti a..

“Um, nichiang e...” nui har har chung hian a rawn ti a, tu nge anih hre mahila ka la hrethiam lo tulh tulh thung.

“Englo ania, kan Dawr thar, Dawrpui Branch tur kha,naktuk hian kan Open tawh dawn a, tah khan Manager turin an la che a,naktukah i lo zawm thei angem ka ti anih ber chu..” nui chung bawk hian a rawn ti leh a, ka mit ka nuai nawk nawk mai.Kei hian eng hna mah ka dil lo,ka thawh lai atangin hna ka kal mumal loh vangin min chawlh tir a, Mama bak engmah ngaihtuah ka nei lo.

“Ka lawm lutuk, mahse, midang biak lawk ka duh a, ka lo call leh mai zawk ang che, pawi i tih loh chuan?” ka ti a, Joe-a ka biak angai.

“Pawi ti hauh lo mai, mahse, lo kal ngei thei la ka ti viau,ka tan chuan Hmelhriat sa thawhpui tluk a awm dawn si lo a” a rawn ti leh a.

“Joe, ka hna tur dil i nei em?” phone a pick rualin ka ti nghal a, Hello han tih khawmawi pawh a awm lo.

“Aih..nei miah lo..” ati a, mahse, a aw a dik lo.

“Cakewalkers atangin min rawn call a, an Branch thar turah khan Manager hna ka dilah ka tling tih min rawn hrilh a...”

“Oh..anih chu..” makti tak tak a ang lo.

“Inah i awm chuan lo chho lawk teh..” ka ti a.

“In Living Roomah hian ka awm sa reng zawk a...” hreptak hian..

Ka mutkawr pawh thlak lo in ka chhuak a, Living Roomah Mama nen an lo thu dun a, min hmuh veleh a lo nui hawk hawk bawk.

“I chau tawngkhawng anih ka ring a, ka tiharh duh lo che nih kha..” Mama zawkin a lo ti vat a, ka bu ringawt.

“Joe, ka be duh che nia..”

“Min bia la...” ati awlsam et.

“Hna chu min lo dil sak nge dil sak lo?’ Mama hawi buai hmel chu ka hmu lo der a.

“Dilsak ta che ila, a pawi viau em?”

“A pawi lo lam a ni ang, ka tling tih an rawn sawi bawk a, ka tan chuan hna ka nei lo bawk nen lawmawm tak a ni ang” ka ti nghat a, an pahnih ep zawngin ka thu thla hnak bawk.

“I hna kha..?” Mama zawk bawkin a rawn ti leh a, nidawn tak..ka hna atangin min ban tih ka la hrilh miah lo,ka chil ka lem khalh mai.A rilru tih hah ka duhloh vangin chawlh ka la ka ti ringawt zawk anih kha.

“Ka kal mumal lo bawk nen ka bansan ta law law a,mahse, tunah adang ka hmu leh nghal anih chu..” hlim hmel fe hian ka ti a, a chal chuar tap maiah chuan angaihtuah ka hrethei lo, mahse, amah vanga ngaiin a indem ngei ang tih ka chiang thung.

“Ka dilsak chiah che chu a ni lo a, ka thiante thian lehchhawng annia, private mah nise hlawh a chhe lem lo a, chubakah  i mamawh tho khan ka hria a, i Bio-data ka thawn alawm,i dinhmun ka sawi bawk a..” ka ban ka phar a,Mama awmlaia sawi ka duh lo,hna ka hmuh vang chuan a thinrim dawn lo, mahse, Mipa a ni a, kan than lennaah khan mi aia chungnung ni lo mahila kan harsa ngai lo a, hetiang khawpa dinhmun chhia kan nih tawh hnu pawh hian Mipa anih ang ngeiin ‘Chapo’ na a la nei ve tih ka hria a,mi hnuaia kun tlawk tlawk turah a indah ngai hauh lo tih ka hre bawk.

“Ok, ka lawm e, ka thawh chak zawng tak a ni hrim hrim.Chaw i ei tawh em?” kan boruak tih zangkhai tumin ka ti a.

“Ei nang, i siam ang chu ka ti..” ati leh a, Mama lam ka hawi a, a hmai dang lap leh a inpetruh fan maiah chuan a rilru a buai tih ka hai lo.

Kitchen lam ka pan a, hna ka nei leh dawn ta chu ania, lawm tur ka ni ngei, mahse, ka dil hauh loh leh ka buaipui hauh loh anih vang nge ka hre lo, ka lawm em em pawh ka hre chuang miah lo.

“I tan a buaithlak em a ka hriat vang ania ka lo tih..” Joe-a aw nem deuh hlai leh inthlahrung aw zet hian a rawn ti a.

“Ka hrethiam alawm, i chungah ka lawm tak tak, mahse, ka unaute bulah kan dinhmun chhiatzia sawi fo hi ka duh lem lo a,hrehawm an tih ka duh lo..” ka nui lui sak bawk.

“Nichin kha chu ka tihpalh anih kha,Zomuani ami lo bia che?” ati a, Dinning chair a pawtchhuak a.

“Um, ka lo hai deuh lehnghal a..” ka ti a.

“Zomuani Cousin te ta kha ania,hmundangah hna i lo thawk tawh tho a, chumai bakah i Bio-data kha an en a, an duhzawng tak i ni aniang, nangmah hmu kher loin an la nghal tawp che anih hmel..vannei ka ti tho mai che” ati leh zat zat a, a sawi dik..Ka vannei takzet,ka vanneihna ka la hrethiam lo mai zawk.

‘CAKEWALKERS’ hi Mizo te tan dawr thar a ni lo, kum 30 chuang an kalpui tawha,hetiang lamah chuan mizo te zingah a sulsutu an ni atih theih,Aizawlah Branch lian an nei nual a, tuna an hawn thar leh nen hian 6 an neihna niin ka hria,District dangah pawh an nei nual bawk.Bakery thar dang awm belh zel mahse an thil siam a tui a, an lan tak tak thei tawh lo.

“Naktuk chuan i kal dawn em?” kan unau chauha kan awm hnuah Mama’n a ti a.

“Kal ang chu, i lo in enkawl theih chuan..?” ka chhaih a, kum 2 lai a lo kawp tawh, a bialnu,Nutei a lo haw tawh a, ka awm loh pawn a ngaihtuahawm ka ring lo, vawiin pawn a lo leng nileng a, ka inchhung tifai min pui a, a chhungte leh kan chhungte pawn an inkawp kan hre deuh vek a, keini lah unau chauha awm kan lo ni bawk nen kan inah  hian a mikhual tawh lo.

“Thei e, mahse, nuam ka ti lo deuh chu nih hi..” a ti leh a, entur hre loin Tv channel a thlak kual sek bawk.

“Engvangin maw?” ka ti a.

“Ka hre chiah lo,i nun hi keimahni vang hian a nuam lo ni hian ka hre thin a..”

“Aaaahh...chutiang i sawi leh chuan Pasal ka nei mai ang..” ka nui a,za vak lo hian a nui ve a.

‘Ka phal dawn em ka hre lo leh si,mahse,thil pakhat, hospitalah khan i awm loh laiin Ka nu a lo kal a..” ka thu khawng lah mai.

“Maw?’ ka aw a lawi vek.

“Ka nu,mahse, ka be miah lo..”sawi tur hre loin ka ngawi rauh rauh mai.

Reife chu inbe loin kan thu dun a, kan ngaihtuah inhriatsak tawn lo mahila kan ngaituahna a inhlat lo ang tih ka chiang,kei ai hian ani hi a na zawk hial maithei,Khum ka pan hnuah Zomuani nen kan inbe leh a, tan hun tur leh thil tul dang min rawn hrilh nghal a, kan awmna tur in ang chiah lo mahse ka tan a tangkai nghal takzet.

“Thil ka lo dil lawk che, kan Boss tur te hi ka la hrechiang miah lo a..” ka ti a.

“Lo nghak lawk, Photo ka lo thawn ang che.” a rawn ti a.

An dawr hi rei tawhin an dawr hming leh an thilsiam te ei nasa tawh viau mahila a neitu te ka hre miah lo, diktak chuan hriat ka mamawh ngai lo ve hrim hrim zawk.A msg lo luh veleh phur fe hian ka hawng a,mahse, ka phurna te erawh mumang ang maiin an ral nghal riai riai thung.