EVERGLOW-11

Chapter-11

Tawng mai ka tuma, ka hlawhchham hlauh thung.Moses-an min rawn en a,eng nge a ngaihtuah ka hrethiam lo,chumai bakah engvangin nge Moses-a bulah ka thawh avangin ani hian nuam a lo tih ve ngawt ang?

‘Um,nia. Nuam ka ti ngei ang tih ka chiang, chuti anih chuan a bul kan tan dawn bawka, uluk deuh zawkin kan start teh ang..” a nuia, awmze nei lo zet hian ka nui ve ringawt bawk.

“Ok,a tha ngawt ang,engkim a thiam ti ila i awih angem ka hre lo” Zorina zawkin a ti leh nghut a, ka haw hluah hluah thung.

“Shh, lo tawng tawh lo lawk teh,Nanun,Moses-a ka nia, he Elite Constructionah hian Moses-a ang bawkin neitu nihna ka nei ve a, mahse, ka thu lo hret thung” a mit a siai zauha, Zorina erawh a rum hawk thung.

“Oh, ka lo hre miah lo a. Mahse, i lo awm ve avang ngawt pawh hian ka tan a nuam sawt ang tih ka chiang,ka lawm tak tak..” ka ti let ve a, a hmel nelawm leh ngainatawm zet chu ka en a, a lo awm ve ziah dawn avanga ka lawmna hi han hrechiang ngat se chuan ani pawh hi a lawm phah lo bik hauh lo ang.

“Sorry, thu phawt teh, hei hi Remkimi dawhkan leh Chair ania, tah hian i hna thawh tur zawng zawng deuhthaw chu i thawk thei ang..” tih pahin min hnaih ber tu Dawhkan lian over lo chu min kawhhmuh a, file pahnih nge pathum ka hre lo,a in rem a, Laptop inhawngsa a awm bawk.Tim deuh dai hian ka kal huala, Chair vir theiah chuan ka thu a, ka thut zawngin a hniam deuh salh bawk.

“Ti kha chuan a zia ta deuh” a ti leh puata, ka thutna sira thutna dang awmah chuan a thu ve nghal a, kan pahnih thutna ep zawng titih hian mi pahnih hnathawhna tur kan thutna ang tho a awm bawk.

“Ti hian  nuam ka ti dawn e, Dude, i sawi aia nasain nuam ka ti ang tih ka chiang,i duh phawt chuan zanin Party kha i tan animai..” Zorina lam hawi pahin a ti a, muangchang hian Zorina lam ka hawia, a kekawr ipte zenin a dinga, a hmel thutak zetah chuan apa ang bawka Sumdawng mi,tawhkhirh leh luhlul, midang te neklui thiam em em anih zia a lo langa, a phirpui nen an rilru tenawmna a inzat reng ang tih ka chiang em em bawk.

“Yeap,a tha khawp ang chu, mahse, i Party apiang hi ka ta niawm zawk takin keimah zawk ka langsar ziah tho a, a hrana inpek kher pawh a tul miah lo tih i hria lawm,engpawh nise i Assistant thar lawmna kha a zawh tawh chuan hna lam kan sawi thei tawh em?” min rawn melh zawka, ka lo en reng bawk nen kan mit a intawng sak mai,ka lungphu a rang nghal zaih zaiha, mahse, ka insehruh a, ka hawi sawn duh lo lui tlat thung,a nui suka, a hawisawn hmasa ve ta nge nge.Ka thaw huai thung.

“Thei tehreng mai, mahse, thil pakhat,   Nanuni hi keima personal Assistant atan min pe phal tak tak anih loh chuan ka ta ang chuan sawi tawh lo la,chuti lo chu..thil thleng tur i hria alawm..” a ngaihna hre lo zet hian Moses-a ka en a, min en lo in a thutna sir lam banga Cupboard lam a hawi a,a hmel ka hmu thei lo.

“Nanuni...Ok, a tha lawm, he Office hi kan pahnih ta a ni a, engkim kan intawm tih ka pawm e, kawng engkimah..Chuan, i mail i check dawn nia..” a ding mar a.Ka thutna ep a kawngkhar inhawngsa chu a nem hawng a,a luta, na zet hian a rawn nem khar bur bawk, kei lah ka phu zawk bawk.

“I va phu nasa ve...” rang zet hian Moses-a lam ka hawia,uluk fe hian min lo en thung.

“Nia, a khar na teh dawt em a..”dik takin ka chhang mai.

“Khatiang kha chu i la tawng fo ang, mahse, a rei anga, ngaiah i la nei mai ang tih ka sawi tel hram ang.Tunah chuan hna kan nei a, tuna a luhna kha Meeting Room a nia, Dar 1ah meeting kan nei ang, engmah i lo sawi ve angai hauh lo a,mahse, i lo thut ve a, thil pawimawh awm apiang i lo chhinchhiah vek a tul thung ang” a ti leh duaha, ka bu nghat ringawt.Sana ka en a,hun ka la nei nual, engti zawnga lo inbuatsaih tur nge ka hre lo a, eng nge ka tih hmasak ber tur pawh ka hre chuang lo.

“Computer lamah chuan i mikhual lo turah ka ngai a..” amah bawkin a rawn ti leh a, rang fe hian ka bu leh a.

“Hei hi min lo ensak ta che,aaa, ngai leh lo, hei zawk hi en mai rawh.Chuan, hei hi Office ta ania, hnaah chuan hei bak i mimal Computer hman kan remti lo,chuvangin hei hi hmang la, Tally  kha Laptopah khan dahsa vek anih avangin a nih dan chu i hrethei mai ang, lawk..Tally i hmang thiam em?”a ti leh rih a.Ka thutna bula Tableah File kawm uk,chhah tha zet hi a rawn dah a.

“Um, thiam e, CAKEWALKERS lamah pawh khan Tally tho kan hmang a” ka ti a, min zawt hi mak ka ti hran lo a, ka haw hek lo.Office hnathawk tam tak hian Tally hi an hmang thiam lem lo tih ka hre ve tlat.

“A that hlauh chu,thil dang chu a tlachawpin aw..” a ti a.

“Ka la tibuai fo ang che tih ka chiang, i lo awm ve ka lawm zia hi i hrethiam lo zawk ang” ka ti let ve a, a tho a, ka thutna lam a rawn hnaiha, Dawhkan nemin a rawn kun hniama, a rawn chet dan teh thut chuan min ti hamhaih a, ka melh ran ringawt.

“Ka hria alawm, sawi buai duh suh,min mamawh phawt chuan i tan ka awm ang tih hre tawp mai teh,kawng engkimah.” Zorina luhna room lamah a thle baka, a mit a siai zauh bawk.

Enge sawi a tum tak ka hrethiam chiah lo nangin kei leh Zorina Boruak dik lo awm hi a hai lo tih min hrilh a tumna ah ka ngai deuh a, engmah ka sawi ve hmain a ding mara, a kal sawna, Zorina luhna Meeting Room lamah a lut zui a,ka thaw huai mai.

Moses-a hi ka hriatna la rei lo mahse Zorina anga nel harsa a ni lo tih ka hre tawha, a hmel chhe lem lo a, an harsa lo bawka, Nula lamah chuan Zorina ai mahin a tlaknat ka ring zawk hial, Zorina hi chu kan pahniha kan thil lo tih dun tawh te kha a vawrtawp thleng phak ni mahse a mizia ka la man eih lo a, ka ngaina hek lo.Ka hriat theih zawng chu a chapo hle a, midang khawngaihna leh hriatthiamna a nei mang lo tih te mai hi..Oh..thil pakhat a la awm, Hmeichhia a mamawh a, sex hmanpui tur a mamawh phawt chuan pawisa hmuh nana inzuar pawh a mutpui hreh lo..Nia, kei ang te pawh kha..Ka mit ka chhing sawk a, ngaihtuah zui ka duh lo.

Meeting hun hma in ka hna thawh tur min pek ka zo hman hram, Peon a lo kal tawh bawka, ka thlen tirh khan Zorina’n a lo tirh chhuah avangin Peon an nei tih pawh ka lo hre lo a,a lo thlen veleh min rawn be sawt sawta,Hlu-i a nih thu a sawia, kei pawn min koh dan ka hrilha,hun engemaw chen an hnenah ka thawk ve rih dawn tih leh CAKEWALKERS lam atanga phei ka ni tih ka sawi tel bawk.

Dawhkan lian leh sawl ut mai an kil  kual thapa, kan vaiin mi 7 kan ni a,kei erawh chu Zorina leh Moses-a inkar deuh an hnunglam hretah ka thu a, ka note bu ka keng bawk. Keimah lo hmeichhe pakhat a tel ve a, nu lian leh zahawm zet mai a ni a, tunge anih ka hre lo,a landanah chuan kum 50 a la tling lo anih pawn a tlin lohna a tam ka ring lo,a chang leh an inhniala,hnamdang pathum ngawt an tel ve a, an meeting pumpuiah vawikhatmah Mizo tawng an hmang miah lo,pawi ka ti chuang lo.Zorina leh Moses-an chhinchhiah tura min duh ka chhinchhiah zar zara,Paper engemaw zat dah that tur min pek ka keng khawm tun tawh bawk.Darkar khat aia tam mah kan thutkhawm hnuah an zo thei ta hram.

“Nanun, ka kalsan dawn che ania,i haw hun tur chu dar 5 animai aw..” Moses-an a baga thil khung mawlh mawlh pahin a ti a.Zorina erawh chu hmeichhe awmchhun nen khan Meeting Roomah an la awmduna, enge an sawi ang ka hrethiam lo a, rin dan pawh ka thiam eih lo.

“Ok,heng ho hi naktukah i awm hunah ka khawih thei mai angem? Khawi lai berah nge han dah that tur ka hre lo a” tih pahin an paper min pek ho chu ka kawka,a rawn melh zawka, a chal a ti chuar zauh bawk.A upat hun chuan a chal a la chuar nasa ngawt ang ka lo ti rilru a, kan inhriat ve tirh atang khan hetianga a chal vun a ti chuar hi ka hmu zauh zauh tlat a tin ni.

“Naktuk hian Zorina hi kha thil buaipui khan Delhiah a chhuk dawna, a enfel nghal duh ngei bawk anga..um..tihdan ka hria, ka va chhuak zuai anga, ka lo let leh ang,tah chuan ka tihpui thei ang che, a pawi em?” a ti a.

“Aih, pawi lo,ka lo nghak ang che,a ken tur anih chuan tihfel ngei angai dawn sia, i buai phah viau zawk angem?” ka ti a, a lu a thinga,a nui mai.Diktak chuan ka nikhatna lek nimahse hna ka khawih hnem hman viau a, mahse, ka la thawh ngai lohna hmun anih avangin ka mikhual lutuka, engkim enpui ka la ngai miau a.Inthlahrung ngawt thei pawh ka ni lo a mahse, ka inthlahrung lo chuang miah si lo.

A kal chhuah hnu lawkah Zorina leh hmeichhia kha an lo chhuak a, min be loin Peon hnenah a haw dawn tih a hrilha, min biak chu sawi loh vawikhat te pawh ka lam a hawi eih lo zawk.

“Meeting naah khan engmah i ei ve si lo a, i ril a tam lo a mi?” Zorina te chhuah veleh Hlui’n a ti a.

“Tam ve tho mai, mahse, tihtur ka ngah em a..” ka nui lui sak bawk.Diktak chuan a tam lutuk mah mah zawk.

“Naaah, khang te chu u Moses-an a lo let hunah kan ti dawn nia a tih kha,eitur ka’n chah ang, eng nge i ei duh ang?” a ti leh a,Zingah khan engmah mumalin ka ei lo a, mahse, Zorina huhang leh Meeting boruak vel khan min ti chau a, engmah ei lam ka rilruah a lo awm lo a, tunah tlema ka hahdam tak hnuah hian ka riltam zia ka hrechhuak ta chauh.

Ka ei duh zawng ka hrilha.A phone a phawrh nghala, a call tlang thei lo anih hmel,a phun nang nang mai.

“Ka zuk kal lawk mai ang,ka call tlang thei miah lo..” tih pahin min rawn en a.

“Aaa, ngai lo mai rawhse..i buai phah mai mai..”

“A ho lutuk, keipawh ka ril a tam alawm..Ka rawn keng chho nghal law law ang” a ti a, a chhuak zui chu a nimai.

CAKEWALKERS ah kha chuan kan Fooding hi engmah kan pawisa a kan pek angai lo a, hetah chuan a nih hmel si loh a, nitin thil ka ei duh ziah dawn anih chuan a hautak hle ang tih ka chiang, a pawi lo,hun a kal hret anga, ka tlangnel deuh hunah chuan helai hnaia an thilsiam ei peih loh chhuanlamin tiffin ka la pai mai ang chu.

Eitur ka nghah laiin Zomuan’in min rawn call ta hlauh.

“Enge a an awm?” zangkhai vah hian a rawn ti a, ka boruak nguai leh chau nghulh nen a aw ki zangkhai vah chu inhmeh lo tak a ni ringawt.

“A ziaawm e, enteh, Moses-a a lo awm ve a..” ka ti a.Zorina nen an inkawp tih hi a hre sa maithei.

“Yeap,ka hria lawm..” a nui zui kar kar bawk.

“I hria ang tih chu ka ring tho a,mahse, ka hawi buai lutuk loh nan tal min hrilh ve tur che ania”ka ti hlak a,zingah pawh min rawn call renga,Moses-an ka number a dil tih pawh a sawia, ELITE hi an pahnih ta a ni tih sawi ve mai awm tak.

“Aaaa, khatia han surprise che kha lawm ka chak,tak takin Moses-a khan engmah hrilh che a phal lo a,mahse, a lo nghak tho che nilawmni?”

“Nghak tih lemah Office kawtah kan inhmu a...a pawi lo,a lo awm ve vanga ka thlamuan zia a hrethiam lo hial ang” ka ti leh a.

“Ka ring e,khavang tak khan alawm vawiin pawh a lo kal, vawiin hi Moses-a Birth day a ni tih i hria em?” ka hre lo,tihtur duan lawk a nei ngei ang, kei lah hna thawhpui leh ka lo ngai tumhrang bawk.

“Aih, hre miah lo..mahse..” ka ti a, ka ngawi leh rih.

“Mahse...mahse chu enge a?”

“Engmah a ni lo e,bakah hetah a awm tawh lo a..” ka ti leh a, hna khawih tur ka dah chu ka en a, ka bei a dawng nghal titih,Moses-a lo kal lo tura ka hrilh anih chuan ka buai tihna animai dawna, Zorina lah koh chi a ni si lo.Moses-a pawh be dawn tehreng ila a number ka nei lo.

“Nanun..i la awm em?”                 Zomuani rawn au riah chuan ka ngaihtuahna tangin ka harh zawk mai.

“Aw,awm e...eng lo, thil ei ka lo tum mek a..” ka ti bah nak mai.Diktak chuan Hlui a lo la kir miah lo,sawitur ka hriat hmasak ber ka sawi ve tawp a ni zawk.

“Moses-a hian a be duh che a...”

“Maw?” ka tum aiin ka au ring hret,Moses-a nen an awmdun tih ka hre miah lo.

“Moses-a hian a be lawk duh che ka ti nih chu,enteh...hlauhthawnna deuh i nei em?” min ngaihtuah hmel deuh hian a rawn ti leh a.

“Aih, ka eitur chah a lo thlenga, chu zawng chu..Khawi Moses-a chu ka lo be dawn mi?”

“Lawk..” a ti a, rei vak lo hnuah Moses-a aw hian “Hello” a rawn ti a,eng nge min biak a duhna tur ka hre lo nangin hnaah a lo let thei tawh dawn lo tih sawi tum anih ka ring rilru tho.

“Enge ni ta?”

“Vawii hi ka tan chuan a pawimawh khawp maia, mahse, chu aia pawimawh hna a awm bawka.Eitur i chah tawh em?” teh daih chuan a..

“Chah a, a lo thleng chiah..” ka ti tha ve mai.

“Hmm, ka lo sawi theihnghilh a, ka lo hawnsak mai ang che ka ti a, i ei duh tur ka rawn zawt dawn che a” a rawn ti leh a.Ani kha chuan Meeting lai khan a ei tawha,mahse an thil ei kha a tam lem lo.

“Ka lawm lutuk,mahse, thil ka lo ngaihtuaha, naktuka ken tur hi kan tihfel angai a, i tan vawiin hi a pawimawh sia, tlem chuan ka lo buai deuha,amah hi ka be mai dawn nge?” a hming ka sawi hreh tlat.

“Amah...” a nui zui hawk bawk.”Lungngai suh, ka lo kal ang, mahse, thil pakaht erawh min tiam angai,zanah ka partyah i lo kal angai ang”

“Aih..” rang lutuk mah mah hian ka ti a.A nui leh hak hak tho.

“I eitur chu ei phawt la, ka lo thleng har lo ang..nih phawt le..”ka chhan let hmain a off zui nghal mai bawk.

Engtia han awm tur nge pawh ka hre lo, Moses-a hi chu Zorina anga midang te hriatthiamna nei lo anih ka ring lo a, ka kal duh lo anih chuan min nawr lui in ka ring lo ve tawp,chawhma lam khan Party chungchang kha an sawi ngeia, Moses-a Birth day party a ni ang tih ka lo hre lo a, ngaihtuah na chang pawh ka hre lo hrim hrim zawk.

Gate a ri raka, Hlui a lo lut zui nghal zat bawk, bawr fe hian a rawn kenga.

“Min rawn ko mai lo anih kha..” tih pahin ka lak saka,”Gate hawnna number i hre dawn si lo a, bakah engmah i thil pawimawh dawr lock hawnna chi i la dah lut lo tih ka hria lawm..” hah vanga thaw hlap hlap chung hian a ti a. A sawi dik,an Office awmna floor hi a chung ber a ni a, gate hran an nei a, Tala pangngaia lock theihin an siam mai bakah Electronic door lock an hmang tel a, Password ka la hre lo a, ka finger print ka la dah lut ve hek lo.

“Ni dawn tak, midang awmloh laiin ka lut duh anih chuan ka buai hle ang” nui chungin ka ti a, a thle baka, a eitur chu a fork kenin a hawlh a.

“Dik chiah, ka thu anih phawt chuan he lai atang hian Door bell a rik rualin ka hawng mai thin a, mahse, nangmah chauha kal angaih hun pawh a la awm thei a,u Moses-a a lo let leh veleh lo hrilh la..amah leh u Zorina bakin an ti thiam lo a” a ti a, min en loin a thil ei tur lam ringawt a en bawk.Nia, Moses-a lo let hunah ka ID ka lo pe mai ang chu.Tunah chuan eitur ka mamawh rih ber.Ka pumpui a ruak vek ni hialin ka hre tawh.

Dar li rik hma hretin Moses-a a rawn let a, a rawn nui lut var var nangin nuam ka ti phah der lo,vawiin a piancham a ni a, helaia tawmsen reng lo hian tihtur a ngah hlein ka ring rilru a, chumai bakah zan lam Party na tur velah tihfel tur neuh neuh a neih ka ring bawk,mahse..Hna hi...keimaha ka tihfel theih nise chuan ka tihbuai dawn loh tehlul nen..Ka thei miau si lo a tihngaihna dang a awm lo,Zorina lah chuan a hna kalpui tur ber pawh a enfel peih miah lo chu a ni sia,Hahthlak hlawm hian a..

“Ka tibuai hrep ang che tih ka hlau hle mai” nuam ti lo zet hian ka ti a,min rawn en zawka, a kamiz ban a thlep pah mawlh mawlh bawk.

“Tibuai nang, ka sawi kha, zan lam zawk kha a pawimawh alawm” a ti liam puat.Engmah hi a care lo niber hian ka hre mai,ka hriat ve tirh atangin hmel hlim lo leh nelawm loh tak a put pawh ka la hre lo.Zomuani nen han inkawp hlauh se...an lo inkawp zawk hial maithei bawk.

“Ka theih ka va ring lo tak..” ka ti leh hram,ngaipawimawh lo hmel fe hian a nui suk duh chauh.

“Engpawh nise hna chu han khawih tan ila..Zanah party na a kal hmain hunawl tlem ka neih theih chuan a tha hle ang” min bia pawh ni chiah lo hian a ti leh a.A chair a rawn pawt hnaia,dawhkana ka paper dahkhawm chu a la kang zui nghal zat bawk.

“Kan zo e..” tih pahin a chair hnung a ngheng a, a zi mar nghal ur ur bawk,sana ka en a, Dar 6 a ri tep tawh,Hlui khan haw hma a duh avangin Moses-a hnenah dar 5 rik hma khan haw a dil tawha, a kal dawnin Light a on vek a, kan hna ngawt kan lo ngaihtuah bawk nen a tlai leh hma lam reng reng ka lo ngaihtuah tawh lo.

“I khawtlai phah vek dawn anih hi a...” pendrive pawh phawi pahin ka ti a, Laptop ka shut down a, ka tho zui nghal a, mahse, che loin ka lo thu rei deuh tawh a, ka khup a na zawka, ka thutna ngaiah ka thu thla leh nghal hnawk a, ka tum loh tawpin ka te deuh that bawk.

“Ngatinge? I tha em?” Moses-an a rawn ti thuaia, ka lu ka thing ringawt,engmah that lohna ka nei lo.Ka thut ngaia ka thut rei lutuk vang a ni tih ka hria.

“Ka thut ngaiin ka thu rei lutuk deuh aniang,hei hi Zorina chu min lo peksak mai la..” ka ti a, a hnaih lamah Pendrive ka nawr phei a.

“Aih, zanah kan inhmu ang, tah chuan i pe dawn nia” a ti a, a phone lam a en daih bawk.Min kalpui ngei a tum tih a chiang ta, engtin nge ka hnial ang tih ka ngaihtuah a, sawi mai tur ka hre lo.

“Kan kal dawn mi niang?” amah bawkin a ti leh a, ka ngaihtuahna a vir zawk mai.Nia, kal ila a tha,in ka thlen tawh ber chuan kal turin min tilui thei lo ang,chhuanlam engpawh ka kal lohna tur anih phawt chuan ka siam mai ang,ka chhuanlam siam a dik reng em tih en turin an lo kal peih kher lo ang tih ka chiang.

“Naktukah hna kan kal hunah i ID min pe dawn nia,tunah chuan ka hmanhmawh deuh a” a ti a,ka lo hre leh tawh lo.

“Nia,vawiin khan Hlui pawn min lo hrilha, in awm loh chuan ka lut thei dawn si lo a” ka ti ve a.A chhuak mai dawn emaw ka ti a, Hlui dawhkan lamah a kal kual leh a,nidawn tak,Tala a rawn khai chhuaka,a kalh loh chuan tunge kalh chuang ang?Ka zui chhuaka,Gate a hawnga, ka kalna turin a tawlhsawna, a tawng pah mawlh mawlh bawk.

“Eng in nge i haw dawn? Scooty i nei em kha(h)?” step kan chhuk pahin a ti a.

“Aih,nei lo..mahse..” ka ti hman chauh,min rawn tawng hnana.

“Tha lutuk., hmeichhia mahnia in saseng nalh thei te hi ka ngaina lo nimiah lo in tlema han care deuh dawn pawh hian a harsa deuh talh zela..” a nui a.A sawi awmzia ka man chiah lo.

“Mahni ke a ding te tluka ngaihsanawm an awm hleinem..” ka ti tha ve mai.

“Nia, a dik..hmuhnawm pawh an hmuhnawm, mahse, tunah tak hi chuan i haw na tur ngaihtuah chawp i ngaia, ka tan chuan chance a tha ve chiah alawm” a nui leh huk a.,a sawi tum ka man ta chiah bawk.

“Ni lo, angai lo..kalna tur ka nei..”

“Tunah maw? A tlai tawh em hi..bakah zan lam kha dar 8 ania, i inpeih hman lo ange” min rawn en a.

“Aaaah, dik tak chuan kal loh dan a awm theih chuan ka lawm ngawt ang,. Ka nuam meuh lo a..” dawt ka sawi ta ngawt.

“Um,tilui che nih ka duh hauh lo, mahse,i nuam lo anih phei chuan i kalna turah chuan ka hruai ang che, chuan Inah ka dah ang che” hnial chi hauh lo khawpa khauh hian a ti a,Zorina ai chuan nawrluih leh nek a nuam deuh ang chu ka lo ti ngawta, ka ti fuh vak dawn lo a ang ta tlat.

Ka tibuai hle mai che”ka ti sapa,beidawng zet hian ka thaw hak bawk.

“Min ti buai fo la pawi ka ti hauh lo ang,bakah ka care deuh che hian thenkhat te an hmuhnawm ka ti tlat bawka” a nui leh hawk hawk mai.Engmah ka hrethiam lo,tu nge hmuhnawm lah ka hre hek lo,infiamnana min hman a tum anih chuan a tifuh hauh lo ang tih ka lo ngaihtuah daih, Zorina ang mai mai khan min chaih kual hlek lo ang.

Inah rawn lut ve loin a kal lehnghala, ka thaw huai thung,kan In a hria kha thil pawi ni miah lo mahse ka duh lem lo,inchhung ka luh hmain tuemaw tawng thawm ka hria a, ka nui sak mai.

“Joe...i lo leng alaw?”min rawn en a, kan inhnial deuh atang khan a lo kal leh hmasak ber a ni a,chumai bakah ka msg engmah a reply ngai lo.Tuna a lo kal hi lawm lo chi ka ni lo.

“Anih hi...” a ti a, Mama lam a hawi zui lehnghal mai,hei hi kan nun a ni fo,Joe-a nen hian kan inhau thina, na tak tak leh na lem lo te pawhin kan inhau a, kan inti taua, kan inbe duh lo fo bawk, mahse, rei a ni ngai lo.Ka tan ani hi a pawimawh tluk zetin kei pawh a tan ka pawimawh ve tho bawk.

“Chaw in la ei lo ang tiraw?”  a bula thut pahin ka ti a.

“Hei, Joe-a hian i duh deuh ang khan Bawngsa a siama, kan lo nghak char char che” Mama zawkin a lo ti a, Joe-a ka enthuaia, intithei tha duh lo zet hian a hawi sang a, min rawn ena, za zet hian a nui ta nge nge.

“I va han fel tak, ka ei chak tawh lutuk,ka intifai zuai ang aw, ka rei lo ang” ka ti a, Room lam ka pan a, nilenga ka boruak tawn ipik leh rit zet kha tunah tak hi chuan a tla fai vek.

Ka ei hnem zia chu pui tak a ni,nidang ang bawkin kan ti ti a. kan nui a,hetianga hlim taka titi chunga thil ka ei lohna chin pawh hi ka hre tawh lo.

“Zanin i kal dawn em?” min en lo in a ti a,a Pudding a chawk kual sek bawk.

“Khawiah maw?”

“Moses-a party ah mawle” a lo hre leh hman tawh.

“Ka hre lo,kal pawh ka tum chiah lo..”

“Kei chu ka kal dawn asin”mak ti deuh hian ka en a.

“I kal dawn maw?”

“Um, kan kal rual thei ang chu,Zomuani pawn i kal ang a tih kha..” min rawn en ta nge nge.

“Aaaaa, Mosesa hnenah ka pha vek tawh, i kal ve dawn tih hria ila chuan ka pha lo tur ania” ka ti halh a, Moses-a khan a buai chung chung hna min thawh pui hrama, Party na a kal turin a ngenin min ngen tluk hial bawk, mahse, keimah lam ka in ngaihtuah a, Zorina a tel ve ka rin tlat avangin kal lohna tur ngawt ka zawnga, ka chhuanlam siam khan a hneh ta nge nge kha ania.Tunah ka kal dawn va tih leh kha thil tih chi ah ka ngai tawh lo.

“A ho em mai, kal ang..Bakah, a lo nuam phian maithei a” a ti leh hlai a.Ka rilru buai zia hre lo zet hian a hmui a liak lak lap bawk.

“U, i Phone a ri ania” Mama’n living room atangin a rawn ti a.Ka kut ka hru fai nawk nawka,phone min pe tura kitchen a rawn pan nen kan in tawka.Min rawn call tu ka zuk hmuh rualin ka mengphar nghal vak bawk.

“Hello..”

“Nanun, thil ka ko theihnghilh pek a, Zorina ta tur Pendrive kha...” ni dawn tak..

“Oh...ni tak, engtin nge niang aw?”

“Ka kal pahin ka lo lam kual mai ang, chuti lo chu kan Boss hian min kap hlum duh mai ang..” a nui a.Ka nuih a za ve hauh lo.

“Angai lo ang, Joe-a hi i partyah khan a lo kal ve dawn tho a, ka zia leh ta deuh sia, ka lo kal ve zawk ang”

“Yeap,a tha ngawt ang..,ka rawn lam ang che” ka thaw hawk mai, chu em em zawng a ngai lo tawp.

“Aih., Joe-a nen kan lo kal rual mai ang”

“Ok,ka lo beisei ang che” zangkhai vah hian a rawn ti leh a.

“Moses-a mi a?”

“Um,ka kal leh si ang ka ti anih kha..insiam vat la, kal tlai lutuk chu a zahthlak ve reng ania”

“I  kal peih lo a, tunah lem i hmanhmawh leh hle sia..”

“A chhan i hre reng, i kal ve dawn miau a...haw vat rawh, inbual i duh leh awm si” ka nema, a nui hak hak mai.

Ka hmel darthlalanga lo lang chu ka en vang vanga, Make-up uar tak ka ni ngai miah lo nangin zanin chu ka hmang nasa ve deuh, kawr var ban arh laiha thui ka ha a, ka kekawr kawngah a tlang ka bilh lut vek bawk, ka kekawr hak chuan ka taksa a phuar deuh tanga,ka mawng er lam lek lek a tilang chiang leh zual,Office kal nan hian kekawr tight lam aiin thawl deuh hnak hi ka ha tam ber a,kawr nise zahawm lam ka thlang ziah bawk,zanin hian hetianga ka inchei hian tunge hip ka tum chiah ka hre bik lo.Mahse, keimah rau rauah ka lungawi tum tak a ni hial awm e.

“Wow...Nanuni..ka thiannu diktak kha ka hmu leh ta..” Joe-an min hmuh veleh phur fe hian a ti a,ka inrintawkna belhchhah nan chuan tawk tak a ni.Kan thlen chuan mi an lo awm nual tawha, a sawm tam viau em ka hre lo a, mahse, nawi lutuk kan nih ka ring lo sa nghal tawp thung.

“Hetah a ni maw i lo awm?” Zorina aw vawt leh nelawm lo zet ka hriat rualin ka insangmar nghal teuh a, hawi let vat lo turin ka insehruh nghal vak bawk.

Thawk ka la te te a, muangchang hian ka hawi leta, Joe-a lah khawiah nge a awm ka hre hek lo, helai hmunah hian tuma tihbuai loh turin boruak ka dawng ang chu ka tia,rei pawh ka awm hmain min rawn tibuai ta tho.Party naah khan ka thil kensak pek tum khan ka zawng a, ka hmu miah lo a, tunah ka zawn tawh loh hnuah ka hmu leh lawi.

“Mim mamawhna i nei em?” ka aw a dam thlap mai, hetah hi chuan ka engmah a ni lo.

“Huh.mamawh..ka hre lo le,,mahse, dik tak chuan Khumah kha chuan nang aia min ti lawm ka la tawng lo zel chu ania” a ner nawka, a thle buk bawk.A va han ngeiawm ngawih ngawih tak,kan khawsak dan kha ka tan a hlu a, mahse, ani ve hi chuan a sawi liam vel mai mai a niber e

“Eh..ka phu loh fakna ah ka ngai e” ka aw a la pangngai reng thei chu keipawn mak  ka ti zawk hial.Mahse,Min chhaih thinrim a tum tih ka hria, thinrima chhang let lo turin ka insum tang tang miau a.

“Nia, nang chauh ni loin  Hmeichhe tamtak karah hriatreng i hlawh miau a, fakna chu a ni thei ang chu..” ka zam zia ti lang lo turin ka huaisenna zawng zawng sawmkhawmin ulukzet hian ka en a,jeans dum a hak  chuan a tilang lian leh zual a, T-shirt nghawng kual,grey colour a ha bawk a, a taksa a phuar deuh lek lek nangin a inhmeh mah zawk, hnuai lam ka en a, Military boot a bunah chuan a kekawr tlang a thun a, a hrui pawh dul zetin suih loh aiah a suih mai mai bawk.

“Pawisa ka mamawh anih chuan engtik lai pawn ka tan hun i nei tihna a ni em?” ka nui lui hak bawk.

“Ouch, chuti zawng chuan maw? Ok, a tha lawm, mahse,thil pakhat, Moses-a luhna hnuah hian ka lut ngai lo a, ka luhna kawngkaah a lut zawk thina,ka sawi tum i hrethiam em?” ka hmai a sa vek thei, a sawi tum ka hai lo..