EVERGLOW-12

Chapter- 12

Ka kut ka humruha, a hmela min hmuhsitna lang chu hawi sawn san duh loin ka en lui ngar bawk.

“Chuan...?” ka aw a dam hle nangin a khur deuh tih a hriat theih.

“Moses-a luh hma chuan ka lut thei anga, a luh hnuah chuan a theih loh tihna nih chu” a ti leh hluk a.

“Aaaah,anih chu mawle, ka lo hre reng dawn nia, mahse, i lawmna siamtu ber i chan dawn tihna anih hmel hle mai” ka nui lui sak bawk.

“Um, ka rin aiin ka thianpa hi a che rang daih tihna nih chu,ka pawm thlap e..a ni leh lo,Moses-a kher chu ka la ring lo,bakah pawisa chawi phei chuan a phal dawn lo tlat”

Ngei lutuk hian ka melh a, min hmuhsit na hi ka tan thil thar a ni miah lo, mahse,sex chungchanga hetiang taka ngaihnepna hi chu tun hi a ma hnen atanga ka dawn hmasak ber a ni thung.Midang lak atang phei chuan ka la tawng eih lo zawk.

“Ka khawngaih che..” ka ti chhuak hlawl mai, engvanga sawi nge ka nih ka hre thiam lo.

“Maw?”

“Ka khawngaih che..” a hma aia chiangin ka ti leh a.

“Huh..i khawngaihna ka mamawh chiah em ka hre lo a,engtia han dawnsawn tur nge ka hrethiam chiah lo”

“I mamawh lo tih ka hria lawm, a chhan chu maw i induhtawkna hian nangmah hi mi zawng zawng chunga leng leh duh duh sawi thei niin a in ngaih tir che a, chu tak chu nia ka khawngaih chhan che” ka melh lui ngar mai, thli fim a rawn thaw heuh heuh a, ka sam a chhem len chu ka bengah ka zep a.

“Eh, ka in ngai ni loin ka nihna ania lawm,mahse, khawngaih chi ni loin nuam ka ti tlat bawk”

“Chu vang tak chuan ania ka khawngaih che, kha i mize chapo leh chhe zet avang khan i bulah tuman awm nuam an ti ngai lo ang tih ka chiang, chumai bakah i hausakna i chhuan vang khan i aia hniam te pawisa a lei vek i tum ziah bawk in ka ring a, thil tisual ve ngai lo niawm takin mi in i lakah thil an tihsual hlek i hrereng a,chuan, i nupui nen pawh induh reng chungin in awm hran angai ta hial a..Nei hlei lo nghei hlei lo...” ka sawi zawh hmain ka bulah a rawn thleng hman der.

“I duh duh sawi miah suh ang che..” min hnaih lutuk a a purfume rim pa zet, amah nena inhmeh ngawih ngawih pawh ka hrethei a, ka hnar a ver nghal zar mai.

“Tehreng mai,mahse, kha tak kha nia sawi ka lo tum mek chu..ka chungchangah na tak takin i tawnga,i nun tlem ka hmuh dan ka sawi ve tan chauh a, i haw em em chu ania” ka nui lui hak bawk.

“Oh, ka hmuh ngei kei chuan ka sawi thin, chumai bakah ka tana pawimawhna nei te nun chauh ka sawi sak thin, chu pawh a tam lo hle ang” a tawng ring lo.

“Chuti chu i tan ka lo pawimawh tihna ni maw?”

“Pawimawh hauh lo ka tih chuan dawt ka sawi ang, a chhan erawh thil pakhat chauh a ni tih i hria” min melh chhuk run bawk.Nia, hrechiang tak ka ni.A sawi dan kha chuan kei aia nawmna pe nasa thei tumah an awm lo a ti miau a.Lawmna tur erawh a ni miah lo tih pawh ka chiang.

“Nangmah chauh i in en leh tawh anih chu, sexah kei aia tilawm che i la tawng lo ni a i hriat na khan min ti lawm miah lo ania, kei chuan ka tan mipa tha ber i ni lo tih ka chiang ve thung a, chumai bakah ka Customer pakhat ve mai  i ni bawk” ka nihna leh ka nun danah a duh duh a sawi a, kei pawn ka sawi ve thei a, tawngkam ngeiawm te hi amah chauh in a nei bik lo a, kei emaw midang te pawh hian kan nei vek a,kan hmang ve duh lo mai zawk.

“I nihna lo tawp hian lan tum thin lo teh, i customer chu ka ni ngei tih ka pawm, mahse, a hmasa ber ka nih rualin a tawpna pawh ka ni tih ka hai lo ania” a ti leh sup a,thinrim awm pawn a awm leh tawh lo.

“Ni lo e, tunge ka hna ania ti duh ang? Chutiang chiah chu kei pawh ka nih dan a nimai.Pawisa ka duh bera, a dang a awm lo.Chumai bakah i hnuaiah ka thawk tih hria, mahse, chu chu officeah chauh,hetah chuan ni lo in”a mit thim khup mai chu ka melh lui ngar bawk.

“Nia, i sawi dik..a vai khan i sawi dik in ka hria,tu nge ka hna ti duh tehlul ang? Pawisa erawh kha chu chhuanlam anih kha..i nu ang maia Mipa mamawh i ni tlat a...” ka tawng thei lo.Ka mawl vek zawk.

“Enge i tih a?” thinrim leh makti zet hian a ti tuar a,ka kutah a rawn man a,engmah ka ngaihtuah thei lo,thi se ka duh ber.Ka kut a man beh loh lam ka lek kang lehnghal a, a thle zauh nangin ka tum ka thelh chuang lo,a rum hawka,a biangah ka kut tin hnu a lang nghal ruaka, a thi nghal ser ser bawk.

Ka kut lehlam a rawn man leh a, hneh zet hian min hnuk hnai lawpa, min kuai her nawka, a awmah ka ngheng dawt mai,ka kut pahnih hmalamah a vuan bet a,nghet zet hian min kuah bet zui nghal hmiah bawk.Ka tal ve laih laih nangin awmzia a awm der lo thung.

“Nasa reuh lutuk mai” zawi sup hian a ti a, thinrimna lam engmah a lang miah lo. Reilote ka inthlahdul zawka, rei lo te tak tak,ka tal leh phat a,a lo inthlah dul ve tho a ni ngei ang, min kuahna ka tal pit zawka,ka inher tur chiah chu rang zet hian ka awm dan ngai bawkin min kuai her leh a, a hma aia nghet zawk in min kuah leh a, ka ban rek a hmerna a na nghal vang vang mai.

“Min thlah rawh..” ka aw khur tehrep pawh chu a.

“Aih, engmah i ti dawn lo tih ka chian hma chuan ni lul lo e”  ka tal leh laiha,awmzia a nei lo,ka darah a khabe in a rawn nawr a, a hmui lum ham ham chuan ka beng a fawp thawi thuak bawk, mahse, ka danglam lo..Danglam tur ka ni hek lo.Hetiang Mipa induhtawk leh midang hrethiam thei ngai reng reng lo hi engmah inzawmna siam pui leh tur ka ni tawh lo.Mahse, engtin nge Ka nu chanchin kha a lo hriat? Ka khur ta dar dar mai, ka biang a rawn lum thla pap a, atthlak zetin ka insut zui hraih bawk.

“Ka kut a na ania” ka ti leh a.Ka inthlahdul tawh a, tunah chuan ka zawi ngawih ngawih tawh, kha thumal tlemte khan min ti chau a, min ti thinrim a, ka thil lo pal tlang tawh zawng zawng te kha a mal malin a lo lang leh a, nimin ang maiin ka natna a thar leh a,a hunlai khan tah pawh ka tap thei lo a, tunah hi chuan tah ka chak ve ta.Mahse, Zorina bulah hi chuan ni lul lo e.

Ka beisei loh zetin min thlah ve mai,a kalsawn tur chu ka lo zawi ngang aniang, ka pai nak mai, rang fe hian min rawn vuan leh a, duh lo in ka ban a rawn vawnna ka thingthla ve thung,muangchangin ka inhera, light eng chuan a hmai thi ser ser leh ka kut tin thla lang kuau chu a chhun a,a lang hlauhawm zual sauh bawk.Ka ngaihtuah let a, ka thil tih kha ka inchhir hauhlo nangin ka tih ka lo la rin ngai miah loh danin mi kut ka thlak a, thisen a chhuak hial mai, ka kawchhung a let but a, luak chhuakin min rawn hnawh nghal a, ka luak mai loh nan ka ka ka hup vat bawk.

“I tha em?” min rawn hnaih leh a. ka tawlh hnung ve thung.

“Nanun...hetah maw i awm?” Joe-a a lo lang ta hlauh, mahse, tu nge ka lo din pui tih a hmuh rualin a tim leh deuh tih a hmelah a lang thei a, he pa hi engvangin nge maw tuman an ngainat miah lo ni?

“Joe...i ni em kha(h)?” Zorina zawkin a ti a, Joe-a hmel tim deuh chu ka en a, ka lo khawngaih ve ngawt, a hnenah hian min hralh a,chumai bakah ka hna tur dilin zah pawh dawn loin a va hmu anih kha.Keimah vangin a tih miah loh tur hi a va han ti hnem tawh tak.

“Aw, min la hria chu a lawmawm hle mai” nem deuh tak hian a ti a, a rawn kal phei a, ka bulah a rawn ding a.A mitmeiin thil awmzia min zawt a, engmah sawi loin ka lu ka thing ringawt.

“Ka hriatna a tha lawm, thil hi ka theihnghilh khat khawp..i tha maw?” a ti leh a, a aw a zangkhai leh vuh tawh.

“Tha lawm,nang zawk?” a ti let ve a,a banah ka va vuan a.Tu emaw rinchhan tur ka mamawh ngawih ngawih.

“Um, min lo pe dawn mi niang?” min rawn en a, engmah a sawi tum ka hre lo, a tawng sual emaw tiin ka en a, a hmelah engmah a lang lo.

“Eng...keimah maw?” a then suk mai.Ka awmdan mawl hmel zet chuan a nuih a ti za pawh a ni mahna le.

“Aw, naktuk a ka ken tur thil pawimawh kha Pendrive a dah turin Moses-a kha ka hrilh a,Moses-a khan i ken thu a sawi a..”

“Oh...ni tak” ka ti chhuak halh mai,a lo kal tirh khan ka hrereng sia, rei la ni lo mahse thil thleng a tam hman lutuk a,ka lo theihnghilh daih pek.Bakah thil dang vanga min hmu tura ka lo ngai hi ka mawl ka inti lehzual.

“Joe...khawiah nge ka bag kha i dah?” ka ti leh rih, ka hand bag ken kha a te tham deuh a, Joe-an ka haihawt zia hriain min dahthat sak a.

“Khutah ka dah, ka zuk la dawn mi?”

“Angai lo ang,naktukah Officeah Document pawimawh, ken tel ngei ngei ngai a awm a, ka lo kal leh dawn tho a, tah chuan nimai teh se” Zorina ka en a,ka hrethiam lo.Mahse,ka bu ta tho.

Hall kan luh thlak leh chuan an lo la awm deuh vek, a hma ang kha ni tawh loin Music dam leh ngaihthlak nuam zet an lo play a, light eng dul ruih mai chuan a ti lang Romantic leh zual.Ka hawi kual a, Moses-a emaw Zorina pawh ka hmu lo,Zomuani lah a lo kal ang ti chung siin ka la hmu hauh lo bawk, kan thlen tirh khan Moses-a chu ka hmu ngeia, mahse, tunah chuan khawiah nge a awm pawh ka hre tawh lo.

“Lam ve ila..” mak ti zet hian Joe-a ka en a, a hmeltha zetah chuan amah ang lo takin a thu tak hmel phian bawk.

“Akhai, lam ka ngaina lo tih i hria lawm”

“Ho lutuk,lam hian nun nguai lutuk a tireh ve lawm.,”

“Ka nguai lo, mahse, haw ka chak zawk”

“Chuti chu kan haw mai dawn mi?kei pawh ka lo ning ve tawh tho a..” leh lawi si chuan..

Moses-a hmuh leh ka duh viau rualin zanin chu a neitupa a ni bawka a buai hle ang tih ka chiang,kan thlen hlima kan inbiak bak kha inbiak mumal na hun pawh kan nei lo.

“Nanun,i tha maw?” hmeichhe aw hian a rawn ti a, rang fe hian ka inher a,Joe-a ban ka vawnna ka thlah chuang lo.Min be tu ka hmuh rualin ka ip chawih mai.Noel-i..

“Aw, tha e, nang zawk?” ka ti a, ka aw a pangngai phian bawk.

“Um,tha lawm, hmuh che ka lo inbeisei miah lo a..” a mit lian kel kawl chu a meng phar deuh a, a hmel that ngai rengin a hmeltha a. Kawr dum,a kawng chin chunglam tight tang leh nghawng zau lam hret a ha a, hnuai lam erawh chu amah ang lo takin a khuh thui lem lo, a mal chanve vel a khuh a,a mal nalh zet chu a lang chiang viau.Hetiang hian ka la hmu ngai miah lo.

“Nia, Moses-an min sawm ve a..”

“Moses-a...nia, in in nel viau ang chu,an Office lamah khan Zorina khan a dah chein ka lo hria a..” engmah tih el na lam a lang lo.

“Nia, i hre dik, vawiin atangin ka zawm” ka tum aiin ka aw ri a chang hret,a dawrah khan buaina ka thlen miah lo ka tih chuan ka ti sual ang, Manager ka ni miau a, mahse,kha video tenawm lutuk kha ama siam hi a ni ngei ang tih ka ring thlap tawh.

“Hria e,Zorina control phak anih chuan engmah hriat loh ka nei ngai lo..” a nui var var mai, tawngkam ngeiawm leh dengkhawng a hmang hauh lo, mahse, ka tan chuan ben pawp nen a nat dan a in ang reng, Zorina tan hian a pawimawh lutuk a, kan pahnih khawsak dan zawng zawng pawh kha a hriatpuia thleng vek a ni tih a sawi danah khan a lang chiang em em tlat.

“Kan kal phawt ang,anih le..” ka nui lui saka, kalsan vat vat a, mahni chauha awm ka mamawh rih ber.

Inah Joe-a a lo lut ve leh rih a, Mama a lo la meng bawk,Joe-a titi barh barh chu engmah hre lo in ka ngaithla a, ka ‘aw’ liam vel mai mai.

“Nanun...” ka hminga min rawn koh takah chuan ka phu zawka, ka thu ngil zawt bawk.

“Ngatinge a? thil sual ti man chhuah ang mai” Mama ka en a, a nui nangin a hmelah ngaihthat lohna lang tel tho.

“Teuh lo,thil dang ka lo ngaihtuah a, min ko thut anih kha”

“A ko thut hleinem che, vawi hnih a ko che a, a vawithumnaah khan a ring ta vak mai zawk,i nuam vak lo zawk ami?”

“Nuam e...”

“Anih chuan ngatinge Zorina hmai kha?” Joe-a ka en a,a hma khan engmah a sawi loh avangin a ngaipawimawh lem lo emaw ka lo ti a.

“Ka hre bik nang..”

“Ka awih lo tawp, i ham a ni chiang lutuk” min ring lo tih hriat zet hian min en a.

“Enge i awih loh ngawt a?, ka Boss ania, engtin nge ka ham ngawt ngam ang?”

“Ni ve tho bawk sia, mahse, khatiang kha chu kan naupan lai khan i ching zeuh zeuh tlat a” a sawi dik, naupanlai a kan insual chang khan ka ham ve ziah.Mahse, khang te chu naupanlai a ni miau a.Ka puitlin hun hian midang kut ka thlak leh awm ka hre lo a, ka thlak pawh ka ring ngai lo zawk.Mahse, Zorina ka nunna a lo tel ve hnu hian thil mak leh danglam a thleng ta reng mai chu ania.

Joe-a haw veleh room ka pan a, ka thawmhnaw ka thlak sawk sawka,ka mu nghal hmak, ka rilru a buai vel vek, Noel-i emaw Zorina lam khan min tibuai hran lo, ka buaina zawk chu engtin nge Zorina khan ka nu a hriat theih? Amah chhun ah min la ngai zui bawk, rapthlak hian a..Kei chuan ka duh vang reng ni loin ka hmeichhiatna hmangin pawisa ka la a, Ka nu ve kha chuan a hur vangin Mipa a kawp a, ka pa thlarau pawh zah zo loin a tlan chhuak a, chu pawh a fanu Bialpa lakah lehnghal..Ka chanchin hi a lo chhui ang tih ka la ngaihtuah ngai lo, ka hming kha chu a lo hre ngei a, mahse, thil dang zel a lo ngaihven erawh mak ka ti lo thei lo.Kan chhungkaw chanchin chhuanawm loh em em te, midang ten hre ve lo se ka tih ngawih ngawih, kan vengah ngei pawh nuam lo ti a kan unau kan kimkit na chhan te kha avaiin a hre vek tihna a ni mai angem? Zawhna chhan sen loh in min hual vel a, a chhangtu tur ber erawh ka bulah a awm der si lo.

Ka alarm riin min tiharh a, peih lo zet hian ka meng chhuak a, nizan khan ka mu mumal lo, ka let tawn sek anih kha, zing lamah ka lo muhil ta hram anih hmel e, thawh hai ka hlauh lutuk avangin ka tih ngai loh danin Alarm ka set ta hial a, ka tisual lo viau mai.

Ka inphih sawk sawka, Kitchen lam ka pan a,ka beisei loh zetin Mama a lo tho tawha, Dinning Tableah chawhmeh siam tur a lo dah chhuak ram bawk,ka mittui rawn hnai kuar chu duh loin ka mit ka khap sawk sawka, ka pa damlai kha chuan kan mipa neih chhun leh kan duat rawn kha a ni thin a, tunah chuan Duat duh mahila kan thei tawh si lo...Ka pa khan ngaihdan nghet tak a nei thin a, kan unau kan tet lai chuan awmpui kan nei thina, mahse, kan len deuh hnu kha chuan kan nei ngai ta lo, ka nu khan kan mamawh zawng zawng min tihsak vek thina, Pawisa thawh chhuah lam kha chu ka pa kutah a awm vek thung,mahse, kan unau khan kan tih theih tawk ang apiang kan ti vek, kan School form suk leh nawh te, kan tiffin siam te kha kum sawm kan pelh kha chuan keimahni in kan  ti vek, Mama pawh a duat em em chungin a awm engmah tih a awl chuang lo,College kala kan awm bo hnuah pawh kan haw changin engahmah kan awl bik ngai lo.Tunah hian a that zia ka hmu chiang ta chauh.Nu leh pa tamtak, fa te pawh enkawl hman lo khawpa sum a buai ni lo a khawng leh khauh taka min enkawltu kan lo nei kan vanneihna hi Ka pa boral hnuah leh ka nu chet hoh takah hian a chiang tial tial mai.

“I lo tho tawh law?” min rawn en zawka, a thil tih lai a tih zawm leh mai, ka lut phei a, Electric Kettle ka on a, thawh ve leh hian a theih phawt chuan tuilum ka in ziah a, a thatna lam ai chuan tih thanah ka nei ve hrim hrim.

“Vawiin chu Nutei Cousin pasal nei tur kha man hlanna an nei dawna, chaw ka ei ang chu ka lo tia” a ti leh a.A hmain min hrilh lawk tawha, a hun ka lo hre leh tawh lo zawk.

“Um, a tha lawm, Makpa hual chet a hun alawm” ka nui a.

“Nghal lo mai teh a,eee. U...thil ka lo ngaihtuah a..” sawi zawm loin a thil tih lai a tih zawm leh a.

“Sawi la...”

“Zemabawka kan ram hian loan la ila te ka lo tia..” ka tui in lai ka hak thawt mai,ram kan nei tawh miah lo..A dam loh lai khan ka ni te hnenah ka hralh daih tawh.

“Tinge a?” min rawn en a.

“Eng lo, nakinah kan sawi thei angem? Kan Boss a zin dawna, tih fel ngei ngei ngai ka nei a, a flight kha chawhma lam a ni bawk sia” min hnial lo hram se ka tih luatah ka tawngtai lo chauh.

“Um, nia..chuti anih chuan inbual la, chawei ka peih animai..” ka thaw huai mai.

“Ka ei phawt zawk mai ang,Inbual chu a rei lo..” min en rana, a nui a..

“Eng nge?”

“I lan dan kha...i sam kha i tawn hnawk si, i t-shirt lah kha a chhing si, i kekawr kawng suihna a phelh bawk...i chhe viau nangin i cute reuh..”  ben ka tum a, a thle zauh a, a nui nasa zual sauh bawk.

Office ka thlen chuan Hlui a lo thleng tawha, Moses-a emaw Zorina pawh an lo la kal lo ve ve,Hlui’n min lo be sawk sawka,eng ber nge a ken tur ka hre si lo, lo khawih mai tur ka hrethiam lo.

Hlui thutna a Landline a ri ral ral a, ka ngaihven lem lo.

“Nanun,i phone..” ka hawi chhuak vat a, thawh ka tum chu a kutin ka ep zawnga Table awm lam chu a kawka, nimin khan ka lo hmu miah lo, Landline a lo awm ve tho a,Hlui thutna pan ai chuan a hnai zawk.

Ka pan chho a, tu nge ni ang ka hrethiam lo,” Hello..” zangkhai thei ang ber hian ka ti a.

“Good Morning...” Zorina aw hian a rawn ti sup a,ka tang nghal teuh mai.

“Morning, eng nge ni ta?”

“Nizan a ka sawi kha, Meeting Roomah khan ka dah a, ka thutna bulah khan file Pawl a awm a, kha tah khan khawih danglam ngai loin a awm vek ang,chuan,Pendrive nen khan min rawn pe mai dawn mi?” Boss in a staff hnena a tawng dan tur dik takin min bia ka ti mai.

“Ok, ka lo en nghal ang, mahse, khawiah nge ka rawn pek ang che?”

“Kan dawrah,i Office hluiah khan ka awm mek ..a hla lo bawka,tlemin i hmanhmawh deuh dawn nia” a rawn ti leh a, a lo awmna ber kher chu ka kal peih lohna hmun ber a ni hial ang.

A sawi ang ngeiin File pawl chu ka va hmu nghal mai,pendrive ka purseah ka dah a,kan awmna atangin ka thawhna hlui kha ke pawn kal ila minute 20 vel bak ka kal kher lo ang, phei vek a ni bawk.Hlui hnenah ka kalna tur ka hrilh a, ka kalna tur lamah ka hmanhmawh angai,hnai te pawh nise ka tlai chuan Zorina tan a buaithlak vek ang,bakah hauh tuar leh ka peih tawh rih lo.

Karkhat lai ka thawk ve ta reng, Moses-a a lo kal nitin a, mahse, nileng a awm erawh a nei ngai miah lo thung, Zorina a lo la haw lo a, vawikhatmah min rawn be lo,min be tur anga ka lo in ngai hi mawl ka inti zawk,a kal dawn a kan inbiak hnuhnung ber pawh khan hnathawk biak dan tur dik takin min bia a, hmuhsitna lam emaw pawh a lang hek lo.

“Nanun...tlaiah kalna tur kan nei ania” Moses-an rawn luh pahin a rawn ti nghal lawng lawng a,kan inhmu ngun tial tiala,ka ngaina tial tial bawk,Ngaihzawng ang zawng erawh chuan a ni lo.

“Khawiah?” ka thil tih lai ka ti pah a.

“Chawei na tur kan nei alawm..” ka melh zawka, a Dawhkan tlangah a thu a.

“Kan pahnihin maw?”

“Kan pahnih chauhin kan awm a, midang chu an tel ve lo turah ngai ang” a nui a, keipawh ka nui hak hak mai.

“Ngeiawm lutuk, Zomuani a kal ve dawn em?”

“Ka hre miah lo mai..Ngatinge?”

“Ka zawt mai mai che,dik tak chuan, in inhmeh ka lo ti a” a tho a,a che vel chu ka mitsirin ka hmu thei tho.Ani hi chu Zorina anga Boss ni loin thian angin ka en thei tlat.

“Ho lutuk, ka thiannu hi ka hrechiang alawm, eee.Noel-in nizanah min rawn call a.Mak takin hlauhthawnna ka chhungrilah a lo lut nghal ringawt.A thianpa nupui ania, a duh chuan a call ang chu.

“Ngatinge chu chu min hrilh a? ka tan pawimawh a awm em?”

“Awm ti ila awm chiah lo...mahse, thil pakhat, i mimal nunah hian inrawlh ka duh hauh lo a, chumai bakah ka sawi tur a awm lo..” ka thil tih lai ka chawl a.

“I sawi tum sawi mai la...” ka nui lui a.

“Sawi tur ka ni em ka hre chiah lo a, englo ania,I nu hi i be ngai em?” ka pen ka thlauh tap mai,rang fe hian ka chhar lehnghal a,mahse, a awm danah min lo hmu hman tho tih ka hria.

“Aih...” a aia thui sawi tur ka hre lo,sawi dawn pawh ni ila ka thei kher lo ang.

“Noel-i sawi dan chuan i nu leh Zorina pa hi hun engemaw chen chu an lo inkawp tawh a ti a, i hria em ka hre lo a, dik tak chuan i hriat ka ring lo zawka” ka melh reng ringawt...Thil awihawm loh tamtak hi Filmah te a thleng thin a, nun tak takah hi chuan a ni ngai lo,mahse, ka nunah hian a thleng tlat lawi si anih hi..

“Moses,khawngaihin...” ka ti chhuak thei hram.

“Ka hrethiam alawm,sawi ka duh lo tawp tih Noel-i pawh ka hrilh a, mahse, Zorina hian a hrechhuak ve tawha, a ngawi mai dawn lo niin a hria a, i tan a hlauthawng a” ta deuh deuh chuan a...Nizan khan engvangin nge Ka nu chungchang a sawi kha ka hre lo a, Noel-i pawh khan a sawi kha..Zorina Control phak anih chuan engmah hriat loh a nei lo a tih kha.