EVERGLOW-13

Chapter- 13

“Nu ka nei lo...” ka tawng chhuah dan teh tawp chuan a barakhaih ve deuh a ni ngei ang, a mengphar deuh awka, mahse, a in Control leh vat thung.

“Sorry...engtin nge a den ang che ka hre lo nangin i chanchin tlem chu ka lo hresa tawha,tunah chuan harsa mahse theihnghilh daih tum rawh..Chu ai chuan kan chawei na tur lam zawk ngaihtuah teh ang..” a ti a, ka bu nghat nangin awmzia ka nei meuh lo.Ka mitthlaah ka huat em em ka nu hmel a lo langa, engvangin nge Pathian pawh hian ka pa zawk la a he Mihring tenawm hi a zuah bik si ka hretiam lo, vawitamtak he zawhna hi ka inzawt tawh thina, tun thlengin a chhanna ka la hmu lo mai pawh ni loin a chanchin ka hriat apiang hian min ti na belhchhah zel zawk.

“Khawiah nge kan ei dawna?” harsa zet hian ka chil ka lem a,nun hi a va han harsa tak.

“Floria ah”

“Maw?”

“Hotel Floria ah,vawiin hi ka nu leh pa Inneih kum 40 na cham ania,kan unauin Surprise kan tuma”

“In unauah ka tel ve lo a, bakah kei chu i hnuaia thawk ka ni sia..”

“Shhh...i sawi ho leh dawn tlat,chu lam a ni lo..lo kal rawh ka tih chuan lo kal tawp mai rawh,engmah a chhan a awm lo” ani leh ni lo ang takin a aw a dam thlap lem lo.

“Um, Bossin i tih te chuan le..mahse, a hmain min hrilh lawk la tha tur ania”ka nui a, a nui ve hak hak bawk.

“Chi nang, i dam lo der leh palh ang..” a mit a siai zauh bawk, a sawi awmzia ka hria.

“Engpawhnise tunah hian kalna tur ka nei a, Zorina lah hi biak theih miah loh in a awm bawka..engpawh nise dar 4 ah ka rawn let leh ang, lo inpeih thlap ang che..Chawei tak kha hmanhmawh dawn lo mahila ka u hian hun vawn dik loh a haw teh ania” ka samah a rawn tuaia, ka danglam lo,mahse, vawikhat min khawihna a ni a, mak erawh ka ti ve deuh.

A chhuah hnuah Hlui a rawn let a, a rualin site lama hnathawk pakhat a rawn kal tel bawk a,a tawng luama, Hlui lah hmeichhe tawng duh tak a lo ni ve bawk nen ka rilru kal ding lutuk tur pawh a kal ding ta lem lo,mahse, hna ka thawk sawt thei miah lo thung.Ngaihtuah loh ka tum pawn ka thei hek lo, kha thil khan min deng na nge ka zak pawh ka hre hrang hek lo, Mama leh Nautei ka ngaihtuah na ah an lo langa, a lo ni tak tak anih chuan engmah zep theih a awm lo ang, mahse, an tan chuan engmah a danglam tam kher lo ang, Zorina ka thawhna ah ka Boss a ni a, a mimal taka inzawmna tenawm zet kan lo neih avang leh ka nu ka huat lutuk na hian kei erawh min ti danglam lo thei lo.

“I phone kha a ri char char ania” Hlui’n min rawn ti a, ka bulah a lo din lai pawh ka lo hre lo.Rang fe hian ka phone ka bana,number ringawt.

“Hello..” tuman min chhang lo, a reh hmak mai..Ka en a, a off miah si lo.’Hello’ ka ti nawn leh a,min chhang chuang lo.

Dawhkanah ka dahthla a, Hlui hmela zawhna lang chu ka haider hmak thung, ka rilru a kal ding lo emaw ka lo ti a, ka hresual, ka hnathawh lai ka en a, ka rum hak mai,a ni lo loah ka lo entry kual a, awmze nei miah lo a ka type a awm nawk bawk,a va han hahthlak tak..A bul atangin ka zawn chhuah leh vek angai ang,engmah entry pawlh chi a ni lo, chumai bakah helai hmunah ngat phei hi chuan thil tihsual palhin chance engmah a awm lo.

“I tha em?” ka melh chho a, ka nui lui sak bawk.

“Tha e, mahse, Moses-an tlaiah chawei turin min sawma, ka rilruah a lo awm deuh aniang” nakinah an lo hriat leh tho ai chuan tuna hrilh mai a tha zawk,Ngaihdan mak deuh an neih ka duh hek lo.

“Aaaa, ngatinge chutiang mai mai i ngaihtuah hah vak a?” a awah mak tihna a lang thei.

“Ka huphurh ve tawp,Moses-a hi chu Boss ai chuan thian angin ka en mah zawka...mahse,amah chiah ka la hmu a” ka pen ka seh a.

“Tumah ka la nel lo a, bakah hmelhriat loh bulah hian sawi tur ka hre lo thei tawp a” ka ti leh a, ka ti tak tak, ka thian leh hmelhriat sa te bulah chuan ka ngawichawi lem lo, mahse, ka hriat ngai loh te hi han biak mai dan tur ka hre lo tlat zel.

“Awi, a ho lutuk, keimah zawk min sawm se ka ti,ih a Pa hi IRS pension ania, a nu hi chu engmah a thawk lo, a u in Pasal a nei tawha, a fa upa ber Hmeichhia an awmpui a, chu zawng chu anni mai..an fel lutuk, kei tak ngial pawh pangngai deuhin min be vek a, pawimawh ber angin ka in ngai tawp zel”  a ti siam siam a, tlem chuan ka thawveng ta deuh.Mahse, hei vanga rilru hah ka ni chiah em? Ka thil hriat vang zawk kha a ni tih haider talh ka tum anih chuan ka a hle ang, kha thil in min den nat zia kha a rapthlak tih piah lam a ni miau a.

Dar 4 rik hma hretin Moses-a a lo leta, nidang ang bawkin a rawn tawng nghal bawrh bawrh a, Hlui a fiam a, hei hi thil thar a ni lo, tu te mai pawh hian kan nel a kan Boss ang a kan en ai chuan kan thian en vek nimaiin ka hria, ka mithlaah Zorina a lo lang zawka,Hlui nen an inbia ka la hmu tam lo, engangin nge Hlui hian a ngaih ka hre lo.Driver te leh vawiina lo kal Site a mi kha chuan an hlau chu ka ti lo, an sawi danah reng reng an zah hle tih ka lo hre thei mai thung.

“Kal ila...” a ti vut a, Hlui ka melh zawka, min rawn en ve chiah bawk.A hawi sawna,Moses-a a en a.

“Khawiah nge in kal dawna?” ka va han ngei reuh tak, kan kalna tur ka hrilh chian vei nen.

“Chawei na tur kan nei a..” Hlui ner sak chu ngei zet hian ka melh a, min en duh der lo lehnghal.

“Aw, anih chu..in kal dawn chuan ka haw hma ve thei ngem?” a ti leh a.

“Thei e, engmah tihtur a awm hleinem..” Moses-a pawn a ti tha ve mai.

Kan office atangin Hotel floria hi a hla lem lo a, Office hnuai Parkingah Motor a dah a,kein Muangchangin kan kal dun a,a chhungten engtin nge min lo dawn sawn ang tih ka ngaihtuaha, Hlui sawi ang kha annih tak tak chuan chhe tak leh zahthlak lutuk chuan min ti hauh lo ang.

“Mam,i lo thleng maw? Ehh,hei tu nge?” min rawn en a, Hmeichhe hmeltha leh simple zet nen kan inhmachhawn a, a mitmengah leh a hnarah Moses-a nen danglamna an nei mang lo.

“Nanuni anih hi, ka thian...” ka thaw hak mai, thian nih na ai chuan a hnuaia thawk ka nih angin min hmehriattir se ka duh zawk daih, nakin lawkah an la hre leh dawn tho.

“Eheu, ka nau hian Nula pakhat a rawn hruai a, a thian anih thu a sawi bawka, a va ropui em..Belinda-i ka nia,Moses-a hi ka nau neih chhun anih ang bawkin a u neihchhun ka ni bawk ania”a ha var rual nalh zet langin a nui var var bawk.A kut a rawn phar chhuaka,ka lo dawm ve vat bawk,dik tak chuan hetiang a min lo lawm hi ka beisei miah lo.

“Mam, helamah hian aw, an lo thleng tep ang..thil ka’n en kual leh lawk..” min rawn khawih leh zauha, a kalsawn chu ka en a, kekawr dum, smart zet mai a ha a,Blazer var,thui nalh zet nen, Fa a nei tawh tih rin harsa khawpin a la nalh.

Moses-a kalna lamah ka zui a,Hall lian lutuk lo leh fel fai thlap maiah kan lut a,he hotelah hian vawikhat chu kan thian hoin kan kal tawha, chubak chu ka kal nawn leh ta lo.Palian leh thau lam tep hian Mipa naupang a lo pawma, kan lut thawm a hriat rualin a rawn hawi a.

“In lo thleng thei maw?” a lo ti thuaia, Moses-a a en a, a naupang pawm lah chuan Moses-a a hmuh rualin lawm zet hian a khek raih bawk.

“Um, midang tumah an lo la kal na nge?”

“Kal lo chu anih hi, i u kha in rawn hmu em?”

“Aw, hmu e, Nanun,hei hi ka u pasal , U Malsawma anih hi..”

“Nula i rawn hruai ka ring reng a ni,engpawh nise hma kan sawn e..” a nui a, min rawn en a, a nupui ang tho khan a nelawm hmel viau, mahse, hriatthiam loh ka nei, ngatinge Moses-a ruala ka kal hi an lawm hmel viau ka hrethiam lo.Belinda-i lah khan ‘Ropui’ a ti a, tunah a pasal zawk lahin’ hma kan sawn’ a ti leh bawk a.

Dar nga pelh hretah a nu leh pa an lo thlenga,Surprise a ni bawka, an hmel a hlimna lo lang kha a hmuhnawm takzet.Kan thil ei lah a tui em em vek bawk,mi tlemte an sawma, an sawm te erawh an hraw viau thung, kei pawn ral atanga ka lo hriat ve te anni fur mai.

“Toiletah ka va kal lawk ang..” Moses-a hnenah ka ti a.

“Ka lo kal ve dawn em?” a nui a, ka ner nak thung.

“Ngeiawm lo mai teh a...”

“Ka ngeiawm hleinem, i thil min tihsak hi i hrethiam lo zawk ang” a thle zui bak bawk,Nia.Engmah ka hrethiam lo, heta ka kal ve vang hian engmah ka tihsak hek lo.

Washroom darthlalang lian zeta ka thla lo lang chu ka en a, ka hmai a dang deuh hret tih lohah chuan ka lan dan a tha lo hran lem lo.Ka bag ka haia, ka hmui hnawih reh then tawh hnawih that tumin ka lipstick ka zawnga, tuemaw a rawn lut ve a, ka thil tihlai ngawt ka ngaihtuah vangin tunge anih ka en lo.Ka lipstick ka la chhuaka, ka inhnawih tur ka hawi chhuak chiah erawh chu ka lungphu a chawl lo chauh thung.Ka nu tlanbo hnua ka hmuh vawikhatna turin  kan inhmachhawn ta ran mai..Atthlak zetin ka Lipstick ka thlauh daih bawk.

Engmah sawi loin a kun a, a rawn din mar leh pawn ka din ngaiin ka la ding khawng lah tho, a kut a rawn pharha, ka Lipstick tih tlak min chharsak chu a rawn ti lang a, lak tumna ka nei lo.Ka duh ber zawk chu ka nu ni lo se na thei ang bera ben pawp animai.Mahse, eng anga che tawp leh tenawm pawh nise min hringtu ka nu a ni tlata, ka kut hmawr pawn ka tawk thiang si lo.Chutak chuan ka na a belhchhah zual sauh bawk.

“I dam em?” chhang lo turin ka hmui ka pet fan fan thung,nidanga a tih thin fo angin a nui saka, a la ngai reng..Ka naupanlai khan ka thianten ka nu hmelthat thu leh a changkang an tih thu min hrilh thina, nuam ka ti a, ka chhuang thin kha ania.Mahse, tunah chuan a hmelah hian kha mi tenawm Hriata nen, ka pa nen an khum thina nuam an tawl lai bak kha ka hmu lo..

“Hei aw...” ka kutah a rawn vuana, Lipstick a rawn hmeh bel a,mahse, ka harhchhuak thut..Rang lutukin ka kut a vawnna ka thing thla a, ka lipstick pawh ka dinna bula Dustbinah ka vawm lut zui nghal zat bawk.

“Tu nge i nih?” ka aw a ring lo,mahse, a chiang kek kawk viau.A mit meng lian leh nalh zet, ka chhun an lo tih thin ngei chuan min melh a,na tuar tih hriattheih na tur a lang zawk bawk.Ni e, a fanu ka ni a, ani hian min hrechiang, ka naupanlai atangin ka thin a rim lutuk chuan ka tawng ring ngai lo a, ka aw a dam thlap thin tih a hria alawm.

“Mampui...” ka insum hman lo,ka uak zui nghal a...Ka mittui a rawn tla zui bawk.Hei pawh thil thar a tan a ni chuang lo.

“Min be suh...kal bo rawh” ka tawng chhuah theih ve leh ka ti a, beidawn hmel zet hian ka bulah a ding zum zat mai.Mahse, khawngaihna ka nei lo.

“I tha em?”

“Kal bo rawh ka tih che kha i hre lo mi?”

“Ni lo. Eng lo ..i tha em ka tih chu..”

“Ngatinge mi kut tuara i thih mai loh? Mawh?...ka kut hian that thei che ila ka ti lutuk..” ka mittui rawn tla chu natna vang a ni lo, thinrim lutuk vang zawk.A hmai dang lawp lawp chu ka en a, ka tawngkam chhuak te kha a na lutuk tih ka hria, tu nu mahin an fate ka atanga chhuak tur leh an mahni anchhe lawhna tur a ni ang tih an ring pha ngai lo ang.

“Ka dik lo tih ka hria asin..” zawi te hian a ti a, ka ngaipawimawh lo,ka bag ka la a, ka su sawka, ka chhuahsan zui nghal hmak bawk..

Moses-a lo kal mek ka hmuh rualin in control tumin ka bei a, a harsa lam mah a ni e, ka ke a khur nasa lutuka, ka kal tha hleithei lo zawk.

“I rei ta lutuk a,LALPA.. i tha em?” min rawn hnaih a, mahse, tuemaw kan inkarah a rawn tla zepa, min rawn pawt deuh nawka, ka ngheng rawk rawk bawk.

“Hahdam rawh, i tha vek ania” Zorina aw hian a ti sup a, ka beisei loh lam anih avangin ka hamhaih lutuk, ka melh chho a, Light eng hliah zawng deuha a din avangin a hmel ka hmu chiang thei lo.Ka kawngah a rawn kuaha, a taksa lian leh nghet charh ngheng turin min hnuk hnai leh a,tu nge midang awm ve lam ka ngaihtuah lo.Chumai bakah tunah hi chuan ka rinchhan theih tur ka mamawh lutuk.

“Bawiha..Nang maw?” Moses-a aw hian a rawn ti leh a, ka hawichhuak ngam lo.

“Vawiinah ka lo thleng,nakinah ka lo bia ang che, mahse, tunah chuan ka kalpui angai” hnial chi hauh lo khawpa khauh hian a ti a.

“Ok, tehreng mai..kal ru..” ka hnungah a rawn khawiha.

“I tha vek ania..” a rawn ti a ve a. Engmah that lohna ka nei lo, ka nu vang tehrep khan ka awmdan a dik lo mai zawk, hetianga buaipui luai luai ngai erawh ka ni lo.

“Lut rawh le..” dam thluam hian a ti a.Ka luhna turin a Car kawngkhar min hawnsaka, hnialna ka nei lo,a tih ang angin ka awm vel mai mai.

“Khawiah nge kan kal dawn?”

“Ka hruai haw ang che..” ni dawn tak, kan Inah bak khawiah nge min dah ang? A lo lang thut khan min tibuai leh zual anih ber hi a.Hreptak hlawm hian.

Pawnlam kan tlanpelh chu hmu miah lo hian ka thlir renga, thli thaw chuan ka sam chhawlleng a rawn chhem a.Ka ngaihtuahna buai nuaih nuaih mai chu tihfim ka tum a, ka thei der lo thung.Zorina lah chuan engmah sawi loin motor a khalh mawp mawp a. Ka nu nen kan inbiakna kha a rawn hre hman em ka hre lo,mahse, a lo lang thut a.Ka awmdan danglam kha a rawn hre mai zawk nge pawh ka hrethiam lo.

“I zia deuh em?” ka phu zawk bawk.Motor a din lai pawh ka lo hre lo.

“Aw...ka lawm e aw” Kawngkhar hawnna ka vuan a.Mahse, ka hawn hmain rang zetin ka banrekah a rawn vuan a.

“Min en teh...”thih hrehin ka hreh.Ka khabeah a rawn vuana,a lam hawi turin min kuai her a.

“Helaiah hian i chhuk ngawt anih chuan ke in i kal leh fe angai ang” ka hawikual a..A sawi dik,kan veng thenawm nen kan inpawhna lai,tlema fal deuh laiah kan lo ding chu niin..Kan in ka thleng emaw ka lo ti ve ngawt zawk.

“Kan In bulah emaw kan din ka ti a...”

“Khatiang chuan i nau i hmachhawn thei nang,Ramhuai hmu i ang asin,i hmai a dang vek a..i Make-up kha a pherh bawka...” zawi sup hian a ti leh a, ka khabe a khawih lohna lam a kut zungpuiin ka mit hnuai a rawn tuai a..Ka mit ka chhing ta ngawt.

Dimtein a rawn tuai leh a, ka nu vang hian ka la tap lo,ka na lutuk a ka tap thei lo niin ka hre tawh zawk,hmanzan khan ka tap chaka, mahse, khatah pawh khan ka tap leh thei chuang lo, ka mittui a rawn tla a, ka biang a lumthla pap a...Hetianga duatna hi ka dawn lohna a rei tawh.Zorina hnen atang bawk hian ka dawn hnuhnung ber pawh kha ka dawng a,ka thlamuang ngawih ngawih kha ania, tunah pawh khatiang chiah khan ka awm leh ta..A bulah hian naupangchhia ang maiin ka insum theihna ka hloh fo mai chu anih hi.

“Tap rawh..i duh phawt chuan min ring thei ka tih kha...” ka mittui ka bianga luangthla chu a rawn fawp a..Ka insum hman lo, ka tap chhuak hawk mai..ka lo up rei tawh lutuk a, a buak hian a baw hiau hiau a ni ber.Aawmha ka hmai ka phum ta nge nge.Nghet zetin min kuaha, ka hnungah a chul  hauh hauh bawk.Tawngkama min hnem angai miah lo.Tianga ngawirenga ka natna min tawmpui mai hi ka lawm zawk.

“A zia lo hle mai..” ka ti sep a, ka mittuiin a kawr hma a ti huh hlap bawk.

“A ho lutuk...le...Min en la..” a ti sup a,thuawih zet hian ka hawichhuak ve mai bawk.Ka mit a rawn tuai leh a..ka mit ka chhinga, dim leh dam zet hian ka mitah a rawn fawpa,nghet zet hian a kawngah ka kuah bet ve thung.

“Thil pakhat hrereng la ka duh.,Kan inzawmna hi a danglam a,ka bulah i hahdam ang bawk hian keipawh i bulah ka hahdam thei bawk a..Hmangaihna lam chu ka sawi lo,mahse, ka thlah tawh dawn lo che,min mamawh tih ka hria ania..Chuan,kal turin min tilui ngai suh ang che” a aw nghet charh chuan a ti mai mai lo ang tih min rin tir leh thlap tawh.

“Ka thei lo...Noel-i..” ka sawi zawh hmain ka hmuiah a kut a rawn daha..

“Hei vang tak hian alawm min mamawh, nangmah pawh i in enkawl thei tih ka hria, mahse, Noel-i em khing tur hi chuan i thei lo ang..chuvang takin ka ven che angai”

“Engtinmah min ti hleinem...”

“A la ti dawn che, nang aiin ka hrechiang zawk..Moses-a pawn chu chu a hria, ka awm loh chhung khan vawikhatmah a thlahthlam lo ang che” a ti leh hrawk a. Ka ngaihtuaha, a sawi dik ngei ang, min care lutuk mah mah zawk anih kha..

“Kan kal thei tawh em?”

“Min tiam phawt rawh.Mipa dang hrim hrim i melh lo ang, chuan, mi zawng zawng hriatah ka ta i ni tih i tilang bawk ang” ka awih thei lo zawk, engkim hi a thleng chak lu hrat..

“Chutiang ngawt kan thei lo..”

“Anih chuan min nei mai la..”

“Ngatinge a?” mak tih loh ngaihna pawh a awm lo.

“Ngatimah...nitin hmuh che a, khawih theih si loh che hrehawmzia i hrethiam lo zawk ang” harsa tih hmel zet hian a ti chhuak hrawih a,ka melh chho a, a hmel ka hmu chiang thei lo.

“Chutiang chuan i awm thin tihna mi?”

“Um, i induhtawk a, i luhlul bawk, mahse, i hrehawm tuar hi ka hmu lo a ni lo,hlimtaka i nuihna phena beidawnna hi ka hmu thiam vek..”

“Min duh em?”

“Ka duh chein i hria em?” a ti ve thung..Ka nui hak mai..

“Kal tawh ang” zik mar ar ar pahin ka ti a, min en reng tih ka hriatna chuan min ti zam lek lek bawk.

“Lawk, engpawh thleng se ka lamah i tang ang tih min tiam rawh” a va mak teh fo bawk em.

“I tawngkam ngeiawm zet zet kha i hman tawh dawn loh chuan?” ka nui a..A rum hawk thung.

“Nghal reuh lutuk..” zawi sup hian a ti a, mahse, a awah nuihzatna a lang tel miau a, a thinrim lo tih ka hre tho.

In ka thlen chuan a lo thim deuh thap tawh,ka kalna tur kha Mama ka hrilh sa hrim hrim bawka, a lo mu tawh a ni ngei ang.

Kawngkhar ka pawt a, a inhawng ve mai,ka thil hmuh erawh chuan min ti ding chawt thung.,Light on loin Tv a lo en pek,a muhil zawk pawh a ni maithei..Dimte hian ka pan hnaia,Tv ka Off tur chiah chu ka kutah a rawn man a, ka phu nasa kher bawk.

“I va tlai ve..” a aw a dik miah lo, zu a rui zawk emawni?

“Ka msg i hmu na nge?”

“Hmuh chu hmu e,mahse, ka ring miau lo che a..” ka kut a vawnna a thlah a, Light a on ri khap bawk.

“Enge i hriat a?” nui chung deuh hian ka ti a, kan infiam nasa thina, mahse, hetiang lam hi chuan kan la infiam ngai lo,min ringhlel awm hian awm pawh a awm ngai lo.

“Ka hriat maw? Ka lo en zo chiah zawk...” ka hrethiam lo tulh tulh.

“Eng chu maw?”

“Enge nise i tih a? i Boss Zorina nen nuam in chen lai kha mawle...” ka khawng vek...

“Mama...”

“Aw, ka damloh vangin i buai tih ka hria, mahse, khatianga inzuar tur khan tu in nge ti che? I zahawmna hralh tur khan ka ti che em? Nge ka nu ang bawk khan Mipa tel loin i awm thei lo zawk?”

Ka insum hman lo, ka kut a phe vuaia, a ri nghal thuai bawk.