EVERGLOW-20

Chapter- 20

“Maw? Eng eng..” sawi pawh ka sawi zo hleithei lo.

“Ka fa i pai anih chuan kei hian hriat hmasak ber ka phu lo ami?” a aw a ring lo nangin a thinrim tih ka hai chuang lo.Ka dem lo,keiman ka hrilh hma in a hre miau a, a lo hrilhtu hian engtiangin nge a sawi ka hre hek lo.

‘Aaaa,chutiang lam a ni lo..tu nge hrilh che?”

“Min hrilh tu lam a pawimawh ami? LALPA!!..Anih chuan a ni a, min hrilh mai lo in tu nge sawi ilo ngaipawimawh amaw?” tun tum chu a rawn au nghek,ka beng bul atangin ka phone ka la sawna, ka melh vak ringawt, Mama hnenah pawh engmah ka la hrilh lo a, a ringhlel mai chauh kha a ni sia, kei pawn ka test a, Doctor hnenah pawh confirm turin ka la kal hek lo.

“Ka tihpalh, engmah ka la confirm loh vang ania” thupha chawi aw deuh dai hian ka ti a, ka dik lohna awm hauh lo mahse a lo hrilh tu lamin an hrilh thiam viau chuan a thinrim pawh dem theih a ni lo.

“A va tha ve, a tawk” a ti leh nghek a, a off zui nghal hmak bawk.

Ka let thla leh tawp,tu nge lo hrilh ang? Ka ipte ka dap vat a, a awm lo,rang lutukin ka tho lehnghal a,ka bag ka hai a, ka bun chhuak vek, a awm lo, khawiah nge ka test na kha ni ta ang?  Office Toiletah khan ka check ngei a, mahse, ka ak chhuak chiang, ka bagah ka dah ang ka tih kha ka kekawr ipte ah ka thun a, Bag a dahna chance a awm mai loh avang khan ka ak ta reng,ka hna lam ka buai zui tak viau khan ka lo  theihnghilh zui ta daih. Noel-i purfume rim vanga luak tura Toilet ka luh leh khan ka thlauh a ni mai angem? Ka luh hnuah tu nge lut leh hmasa ber? NOEL-I..

Ka phoneah Msg tone a ri a, rang fe hian ka la kanga, Zorina bawk, Photo a rawn thawn chu niin,ka open vata, ka meng kawk mai, ka ring sual lo tawp.Pregnancy test kit,ka hman ngei kha a ni chiang lutuk, line hnih  sen kalh lai kher a la bawk.

“Hei hian a ti chiang tawk” tih a rawn thawn leh a, reply nachang pawh hre lo in ka en reng ringawt.

Ka call ve ta thung, a pick duh der lo, a lo hria anih pawhin enge a thinrim viau ka hre lo, bakah vawiinah keipawn ka hre ve chauh a, hrilhna hun pawh a la awm lo zawka, Noel-i hmel ka mitthlaah a lo langa, Zorina nen kan inzui tirh atang khan hmeichhe fel leh ngainatawm tak ni khan ka hre thin a, tun tum zet chu ka haw hluah hluah.

“I inbual maw ka tia” Mama awin a rawn tih veleh ka phone a khup zawngin ka dahthla thak a, dik tak chuan ani leh Nautei hi ka chhungkaw neih chhun annih tlat avangin thuhruk kher angai miah lo.Mahse, hrilh turin ka confi rih hlawl lo.

“Inbual lo, ka chau lutuk a ka mu lawk mawle” ka ti a, a rawn kal hnai a,khumah thu lo in khum bula ka pa thlalak ka tarna frame zawk chu a la kanga.

‘Chaw kan ei thei ania, Nutei haw hma a duh dawna” a ti a, a thil ken a dahthla leh a, ka room chhung chu la hmu ngai lo niawm tak hian a en kual a.

“Lo ei mai ula, a pawi em?”

“Ngatinge?”

“Ka lo haw dawnah thil ka ei a, ka puar rih lutuk a, bakah Inbuala mut ka duh ber” ka ti a, ka awah ka rilru a nuam lo tih a hriat loh nan pangngai thei ang berin ka tawng lui hram hram bawk.

“Pawi lo,chuti chu kan lo ei mai ang” a ti a, a chhuak chu ka thlir a, ka awmdan zahthlak tak vang khan engtiang chiahin nge a tuar ang ka hrethiam pha lo, kan unau zahawmna humhim tu tur ber tunah ka rai a,ka rai kha duh angin insawi mahse mi min hmuhsitna tur ka ngaihtuah zawng ngawt pawn ka awm a nuam lo a, ka ni nghal nghulh thei,Ka pi emaw ka pu pawh ka hrilh hmasak phawt angai ang, an tar tawha, kan unau min hmangaih em em mahse Inchhungah ka patea te nupa a enkawltu an nih miau avangin ka Nutei min lawmlohna te an haider mai angai tawh.Dem theih anni hek lo.

Ka inbual zawh veleh ka sam ka su lo bawka khumah ka lawn lehnghal a, Zomuani biak ka duh, Joe-a awm bawk si lo hi tu emaw tal chu ka rinchhan an ngai,Zomuani hian Zorina nen kan inkawp tih a hriattirh khan thinrim in min rawn chhuah chhala, chu pawh a unaupa tan min duh lo ni lo in ka zep vang zawka lungawi lo a ni bawk.Nge, Zorina lo haw hunah law law Doctor ka pan zawk ang ka hre thiam lo,Naktukah mai a lo haw tawh dawna, a tir atangin engkim hre zawk se a tha mahna.

“I mu tawh em?” Phone a pick veleh ka ti nghal a.

“Aih, a la hma em hi” nui ar ar chung hian a rawn ti a.

“Naktukah inbuai angem?”

“Ka hre lo le, ngatinge?”

“Lunch ei dun ang ka lo ti dawna, i ngaihawm em a” ka ti a, a nui leh hak hak mai.

“Hman ka lo tum dawn nia,mahse, naktukah nilawmni Zorina a lo haw dawn?” a rawn ti a.

“Um,lo haw pawh nise lunch ei na a dal hleinem”

“Dik reng,khawiah nge kan ei ang?” a rawn ti leh a.

“A rem remah animai lawm,nge Moses-a dawr lamah zawk kan kal ang?” ka ti a.Moses-a hi vawiin khan a lo haw tawh thung.

“I tih na na animai” a ti awlsam ve mai.

Ka muhil thei hlawl lo, ka thlen hlim khan ka muhil mai sia, tunah lem muthilh ka tumna lamah ka mit a kham vek tawh zawk,sana ka en a, dar 11 a la ri lo deuh, Zorina lah engmah rawn sawi tawh loin a ngawi hmak a, zuk biak hmasak ka hreh ru tlat lawi bawk.Tihdik loh ka nei miah lo tih hre mahila biak ka chak miah lo.

Khawvar dawn hnaihah ka muhil ta chauh, chu pawh rei lo te,ka harh leh chuan dar 6 a la ri lo deuh, ka mu lui dawn zeta nizan ka leh kual sekna khan min ti na vel thum a, ka tho ta zawk, Nidang ang anih chuan ka pi leh ka pu an tho ve ve tawh ang, Ka pu phei chu Biakinah a kal tawh zawk ang, Ka pi leh an nula tu emaw zawk zawk an tho anga, ka nutei leh Ka patea bakah an fa te tumah an la tho lo ang.Tunah hmu ila a tha ber ang.

Kan in hi Building khat vek a ni a, kan awmna leh ka Pi te awmna hi Floor khat ni siin ka pi te in hi Step chhe te chhoh ngai a ni a, kan in nen a inkarah Gate lian vak lo a awm bawk,kan inhnaih hle chung hian ka kal khat angreng a, tul te anih loh chuan ka kal ngai mang lo, a khat tawkin ka pi a lo chhuk thin a, ka pu phei chu a lo kal ngai mang lo.

Kawngkhar an lo hawng tawha, ka rin dan ang ngeiin ka pi in thingpui in chungin Vanglaini a lo chhiar a,a kum a tam ve tawh tehlul nen hian Tarmit vuah lo in lehkha a la chhiar thei vek.Ka pu erawh chuan ka hriat theih tirh atangin Tarmit a vuah thung.

“Pi, nangmah chauh mi la tho a?” ka ti a, Dinning table kila thu a ni a, ka thu ve nghal a.

“I pu a chhuak tawh a, i va tho hma ve” tih pahin min rawn en a, a chanchinbu ken lai a dah thla a.

“Nia, tho hma mai mai,ti ila ka tho hma ziah lawm” ka nui a, uluk zet hian min en a, ka thuruk sawi tur hi ka hmelah a hriat mai ka hlau zek zek.

“Nia, nang hi chuan min chhun ber alawm,hna i kal dawn em?” a ti leh a, Kettle a bana, thingpui min thlitsak a tum tih ka hria,ka ban thuaia, keiman ka inthlit ta zawk.

“Kal ang,eng lo, Pi..” sawi lo in ka ngawi leh daih,han sawi tan mai dan tur ka hre lo.

“Tukin chu i pa ka ngai hle mai, a piancham a hnaih vang a ni tih hre tho mahila a bulah hian kal ve mai hi ka chak thin” a insut hraih a, ka mittui a rawn hnai kuar mai.

“Aaaa, chutiang sawi lo la, Ka pu nen in lo la dam ve tek tek hi kan unau tan hian ah hlu ania” ka ti a, min ngaihsak hluah lo mahse an ni pahnih hi awm lo ngat se chuan In atanga min thehchhuah dan hi an ngaihtuah nasa hle ang.

“Ka hria asin, hetiang tur anih rau rau chuan kan la that deuh lai te khan lo kal law law zawk se ka ti thin, Nautei a lo haw hnai em?” a ti leh daih a.

“Hnai rih lo ang, kum tawp lamah a lo haw anga, a pass chuan a zo chu animai” ka ti a, thingpui ka dawt hlak a, a tui leh tui loh pawh ka hre lo.

“Zo ve tawh sela, hna neiin amah in enkawl ve thei tawh se ka ti mang e, i tan phurrit lutuk pawh a zia anga, Ka men lai ngei hian Pasal tha tak nei la ka duh” a ti leh a, ‘Pasal’ tih ri chuan ka chhungril a deng deuh dawt bawk.

“Pi...” engmah sawi zawm thei loin ka ngawi leh rih,a mitmeng fim leh fing zet chuan min en a.

“Sawi ta che,  i lo kal tirh atang khan sawi duh i nei tih ka hria lawm” lainatna nen min en a. Ka hawi kual leh rih.

“Tumah an awm rih lo,i patea te nupa leh naupang ho chu dar 7 hnu lamah bak an tho lo ang tih i hria a,kan nula pakhat lah an khuaah a haw a, pakhat zawk lah a la hma deuh nangin Bazar lamah thil lei turin ka tir bawk si” a ti a.Ka hlauthawng tih a lo man thiam vek.Mahse, a mak lo, tar fing leh thil man thiam em em a ni tlat.

“Ih...ka..ka rai in ka hria..” a tawp lam chu a zuih ral vek..

“Eng a?” a awah mak tihna a lang miah lo,ka melh zawk a,ka thingpui no lam bawk ka en leh daih.

“Ka la confirm lo a,mahse, ka test naah chuan rai angin ka lang a” ka ti leh sep a.

“Tu fa nge? Amah kha mi?” a rawn kun hnai a.

“Tu?” ka ti leh rih, Zorina nen kan inzui hi a lo hre ve tih ka hre lo.

“Amah kha, kha..Zorina kha..i Nutei chaw tui ber alawm,nge midang an awm zawk?” zawi te bawk hian a ti leh sap a,tawngka a chhang loin ka bu nghat ringawt.

‘A that hlauh chu, Bawihte,Mipa tha tak ani ngei in ka ring asin, a pi te nen hian kan inhre ve a, thian tha tih tur zawng kan ni lo,mitha leh ziktluak tak mai anni a,i tisual in ka ring lo..” a ti ta duah, a hmel hlim deuh sawt chu mak ti zet hian ka en a, a tunu in sawn ka pai a, thinrim hle awm tak, ka dinhmun atang phei hi chuan sawn pai tur ka nih loh zia kei aiin a hrechiang fe zawk lehnghal.Mahse, a hmelah hlimna a lang tlat lawi!!

“Engtin nge ka tih ang ka hrethiam lo..” ka ti sep a,’Amah i hrilh tawh em?” a ti leh a.

“Aih, vawiinah a lo haw dawna tah chuan ka hrilh ang”

“A that chu,Pasal nei la ka lo ti ru thin a, tunah chuan i nei thei dawn ta ania, chu pawh mi mai mai ni lo mi chung lam hret a ni lehzel a, ka dam rei avanga ka lo lungawi lo thin hi tunah chuan ka dam rei a lo tul tih ka hrethiam ta” a ti leh a.A awmdan engkim mai chu ka rin loh lam vek.

“Min hau dawn lo mi?” ka ti ta thlawt.

“Aih, hau dawn lo, ka tu te zingah nang hi hauh ngai lo ber i ni,i sawn pai hi i tidik ka ti lo,mahse, i Nutei hmuhsitna che leh a tawngkamchhe lutuk a i chanchin a sawi ka hre tawh lo tur hi ka hlim a, chuvangin hauh che tul ka ti lo” a sawi dik, ka hmaichhanah chuan min hmuhsitna lam engmah a la chhakchhuak ngai lo, mahse, midang hnenah erawh a sawi chamchi a, min hrilh leh tum a tam ngiang reng bawk.

“Kan innei dawn tihna a ni lo a,bakah  tunah phei chuan ka rai ania..Nutei Min hmuhsit dan tur” sawi zawm loin ka hmui ka pet a,Zorina hian min neih kha a duh thin a, a rilru a thlak ta thut anih loh chuan min nei ngei in ka ring bawk.

“Hlau suh, a hriat hmain inneihna tifel ila atha animai” a ti leh a,ka lu ka thing ringawt.

“A neih loh che i hlau ami? I nutei hian a sawi reng mai a, nawmchenna a ti  che a, Boss te laka inzuar ang tlukin a sawi tum che lah a tam,i Patea hnenah zilh tur chein a ti chamchi bawk,chuvangin i nei tur a ni” nghet charh hian a ti hmak a, a rilru tak hre chiah lo mahila a duh dan zawn ka hai hauh lo thung.

“Hlau lem lo, a hma pawn Mama hnenah min neih a duh tih a lo sawi tawha, ka bulah pawh a sawi fo a...Mahse, Mama leh Nautei..” An nula a rawn lut ka hmuh rualin ka tawp ta daih,Ka pi pawn engmah a sawi zawm lo, an nula in thil a lei vel Dawnkana a rawn dah chu a en a, thil dang a sawi zawm daih bawk.

Phurna nei miah loin hna kal turin ka insiama, ka chhuah hmain Joe-a ka call leh rih,a pick lo thung, Sana ka en a, a pick lo pawh a awm ve tho mai, zing thawh hi a harsat em em tih ka hai tlat lo a, chumai bakah tunah phei chuan an Inah ni loin ama thu thu a awm theiin a awm zui bawka, a mu nasa hle ang tih ka chiang,msg erawh ka hnutchhiah ta tho.

Office ka thlen hnu lawkah Bill eng eng emaw ka buaipui lehnghal a, zan lam ka mu tha bawk si lo nen ka rit luk a, ka awm a nuam hlawl lo.Zorina lah dar engzatah nge a rawn thlen dawn ka hre hek lo, zingah khan msg in ka zawt ngei a, min reply lo,ka phone a rawn ri a, ka en vat a, Joe-a a lo ni a, ka then sak mai, ka Msg kha a hmuh rual rualin min lo call ang tih ka chiang.

“Hello..” pangngai tak hian ka ti a,

“I msg hi?!” ka rin dan chiah..

“Engmah min zawt suh, i hriat chuan min hrilh la, midang zawh kual ka duh lo ania” ka ti nghat a, Hmeichhe Doctor hmuh tur tu nge ni ang tih ka zuk zawt miau a,ka thawhpuite awm laia sawi lan kher ka duh lo.

“I ti tak tak em?”

“Yes, dawt ka hrilh ngai che mi?”

“Wow, a hria em?”

“Nope..”

“A va tha ve, chuti chu a pa ka lo ni ang” hlim zet hian a rawn ti hlawi,ka nui hak mai.

“I duh phawt chuan le, chuan, ka thil sawi kha..Details deuhin msg in min lo thawn la..”

“Hmeichia pawh ka ni lo a..I hre zawk ang chu” a rawn ti leh a, nia, hre tur chu ka ni, mahse, tumah han pan mai tur chi ka hre lo a, ka zawt ngam hek lo.Ka pi kha zawhna hun nei ila chuan ka zawt ngei ngei ang ka ti a, mahse, an nula a lo haw a, midang an lo thawh ve tak bawk avangin sawi zawmna hun a awm lo.

“I hria ka ti lo a, min lo ngaihven sak ka ti lawm..Tlaiah kal ka duh dawn ania”

“Um, i tih tlat chuan, ka thiannu ka’n bia ang, chuan ka lo hrilh leh ang che” a ti ta nge nge, Hmelhriat a ngah em em a, Doctor pawh hriat a ngah, nel taka biak theih pawh a nei zul.

Ka rin ang ngeiin darkar chanve hnuah a msg a lo thleng a, Hmeichhe lam Doctor tha zet mai hnenah min lo ziak fel vek tawh,a hmelhriat tha tak anih thu leh midang hriattir ka duh loh zia pawh a lo hrilh tawh tih a rawn sawi leh ta thlap,rintlak hi zawng a rintlak teh ngai e,Zomuani nen Lunch ei kan tum kha thulh leh mai a that ka ring ta zawk mah,tunah chuan Doctor hmu phawt ila engkim a chian hunah Zorina hnenah ka hrilh anga,chumi hnuah hrilh ila a tha zawkin ka hre leh hnuhnawh.Mahse, keiman ka va sawm zawk a ni sia cancel leh ka huphurh viau lawi.Vanneihthlak zetin call ka tum lai takin amah zawkin a rawn call ta hlauh,Sana ka en zauh a,Dar 12 pawh a la ri lo a, lunch lam ai chuan thil dang vang anih ka ring zawk,atlang puiin lunch hi dar 2 hmain kan ei ngai meuh lo tlat.

“Hello.”

“Thiannu, vawiin kha..” ka beisei loh deuhin Lunch lam zawk a rawn sawi ta tlat.

“Biak che ka lo tum mek a,englo ania, cancel leh ila a pawi angem?”

“Aih, pawi lo lutuk zawk, Cancel ang tih ka lo tum chiah a,hna lamah ni lo Family lamah zawk pawimawh a awm thut a” a rawn ti a,ka thaw hawk mai.

“Ok, that hlauh chu, kei hi tihtur ka nei pek a..Naktuk lamah timai ang aw” ka ti a.

“Nia, nitawh mai,Zorina a lo thleng tawh em?” a rawn ti leh a.”Aih,thleng lo..lawk,inleng ka nei a” kawngka a lo lut mek chu tu nge anih ka hre lo nangin chhuanlam atan ka hmang ve hmak, Zorina chanchin min zawt leh ang tih ka hlau miau a, off vat ka duh.

“Ok, bye phawt le..” a ti a,rang fe hian ka off a, lo lut thar pain kei ni loin Ruata a pan chu ka melh zauh a, Ruata hian kei aiin hriat angah zawk a,a pan chat pawh thil mak a ni lem lo.

Site lam mi a lo ni a, Training kan pek lai khan Damlohna vangin a lo kal ve lo a, vawiinah thil ken thlak tur lak pahin a lo kal a lo ni a, hnathawk an thahnem tham a,office hna lam Ruata nen kan thawk a, hnathawk te control leh  plan siam te hi chu Zorina leh Moses-a hian an khawih vek, an mahni in an ti ni loin a hranin Siteah Manager 3 lai an nei a,report lo en hi an hna chu a ni a, chunglam te dawr hi an ti vek bawk,mahse, Moses-a ai hian Zorina hian a khawih hnem mah zawk a, a neitu nihna pawh hi a nei nasa zawk hle tih tunah chuan ka hre tawh.

Dar thumah Office ka chhuahsan a, Zorina hnen atangin call emaw msg pawh engmah ka dawng lo,atthlak zetin ka be hreh tlat bawk,ka msg a read vek a, a reply miah lo khan min ti thinrim ru deuh tlat bawk nen biak ka tum lo ve tawp,Hlui’n ka kalna tur min zawt a, haw hma ka ngaih thu leh hna lamah pawimawh a awm chuan min call mai turin ka ti bawk.

Joe-a Doctor min rawn hrilh kha a clinic awmna nen engkim a rawn sawi vek avangin ka pan ding nghal a, kan Office atangin Taxi ka la a,ke a kalna atan chuan a a hla ve deuh,hla tak erawh a ni lo,diktak chuan  ka chau deuh nghulh bawk nen ke a kal ka zuam chiah lo  hrim hrim zawk.

Ka thlen chuan a lo thu tawha, nghak tu pali vel an lo awm a, kei ang lo takin kalpui an pasal te niawm  tak an nei vek,thutna awlah ka thu ve a,ka hriatthiam chiah si loh hlauhna niawm tak hian ka chhungrilah min fan a, ka lungphu a rang dawt dawt bawk.

“Nanun-i i ni em?” hmeichhe pakhat hian a rawn ti a, ka phu zawk bawk.Rang fe hian min be tu ka en chho nghal a, ka hriat ngai a ni lo hlauh,ka thaw deuh huai bawk.

“Aw, ni e..Enge ni ta?”

“Eng ni lo e, i lo thlen hunah Doctor hian lut nghal turin a ti che a..”

“Oh..” ka ti ringawt.Joe-a chuan min lo sawi pawimawh hle a ni phawt ang.

“Tunah hian pakhat a lut mek a, a lo chhuah veleh i lut mai dawn nia..E, card lo fill up lawk ila” a ti leh a, ka tho a, ka hming leh veng vel mai bakah kum zat tih vel a ziak a,kan awmna Floor hi waiting room atan an hmang a, Doctor tak chu kan chung chiah floorah a thu thung,a building a lian lem lo a, a te fel at thung.Kawngpui hnai tak,mahse, thawm bengchhengin a tihbuai nasat miah loh a ni lawia, a remchang veng vawng khawp mai.

Ka thu leh rih a, ka khup a sai dar dar a, ka kut a thlan dap dap bawk,ka mitthlaah Ka nu a lo lang zawka,duh lo in ka mit ka chhing sawk mai, min mamawh lo a mipa dang pantu hmeichhia hi ka mamawh anih pawhin ka pan ngai lo ang.Hmeichhe pakhat a rawn chhuk a, Duty chuan ka lut nghal thei tih min rawn hrilh leh a, ka zam takzet, lut lo a haw leh mai ka duh rum rum.Mahse, tunah hian ka hrechiang vek anga Zorina pawh ka hmachhawn thei zawk ang.Ka insehruh a, tlanchhe tur ka ni lo tiin keimah leh keimah ka infuih a, dawih taka ka nun ka hman hian tu te emaw tan hlawhtlinna a ni thei a, ka thiltih engkimah tu te emaw min beihna vanga ka chawlhsan anih chuan an duhthusam ka tih hlawhtlin sak anga, kei erawh ka tho chhuak leh zo tawh ngai lo ang,ka tho leh anih pawn hlauhna nen ka nun ka hman angai fo tawh ang.

Kawngkhar ka kik a, hmeichhe aw puam lam lek lek hian lut turin min rawn ti a, thawk ka la leh rih,kei chang lo pawh hmeichhe naupai a en hnem lutuk tawh, ka case hi midang te aia a danglamna chu Pasal ka nei ve lo tih mai chauh, chu pawh kei chauh ni loin hmeichhe tamtak lo paltlang tawh a la ni cheu.

Kawngkhar ka nem hawnga, Hmeichhe samtawi,mitmeng lian kel kawl hian min lo en nghal vat bawk,a hmeltha ti a sawi tur ni lo mahse a zahawm a, a rintlak hmel hlein ka hre bawk.Kei ai chuan a upa ngei ang, mahse, a upatna a tam lua lo maithei,a lang naupang chi anih erawh chuan thuhran.

“Thu la,Nanuni maw?” a lo ti nghal a, ka mengphawk deuh vak nangin Joe-a khan ka Photo a lo send anih ka ring leh ta zawk.

“Um,hei hi ka in entirna card ania” tih pahin a dawhkanah ka dah a, ka thu zui nghal bawk.

A la kanga, a en deuh vang vang a, a hmelah engmah han hriattheih tur a awm lo.

“Joe-a khan a rawn ngaipawimawh che sia,min nghah rei ka duh lo tawp ania” a nui sak a.

“Ka lo thleng chauh alawm, ka lawm lutuk” ka ti a.

“I test tawh em?”

“Aw..”

“Tah chuan a chiang ang tiraw? ,mahse, test tha leh hrim hrim ang aw” a ti a, ka bu ringawt, ka test tha leh a, a chiang kek kawk ngang mai.Phat tur leh rinhlelh tur a awm eih lo.

“I Period tawp ber i hria em?”

“Um,hria e” ka ti a, ka hrilh a, Calendar a melh zauh a,”Thla khat leh nikhat vel chiah anih hi,Ultrasound a en hrim hrim ka duh a,ka ziak anga, i zuk tih tir zuai anga, i report ka lo en lehnghal ang” a ti a, a ziak mawlh mawlh a,Joe-an engtin chiah nge a lo sawi ka hre lo a, engmah min zawt miah lo chu ka lawm tawk viau.

“Tu emaw kalpui i nei em?” lehkha min pek pahin a ti leh a.

“Aih...”

Engemaw sawi tuma a ang zuau tawh chu kawngka kik ri avangin a tawp leh rih,lut turin a ti a, a chal chuar deuh tapah chuan a lawm vak lo a ang.

“Sorry, ka rawn tlai hret a, Rinky, i dam maw?” Zorina aw hian a rawn ti a, ka phu nasa lutuk,ka thlawk chhuak lo chauh a ni ber.

Muangchang hian ka hawi let a, a rawn kal hnai chu ngawirengin ka en ngawt ngawt ringawt,enge hetah lo tih ve a tum? Engtin nge ka awm tih a hriat? Zawhna hlirin ka khat vek. Ka thutna bula chair awmah chuan a rawn thu ve a,ka Doctor hmel danglam vekah chuan an inhre tha thawkhat tih a chiang reng bawk.

“Zorin, nang maw?,ka laklawh tih an hrilh lo che mi?” mak tih hmel fe hian a ti a, a nui deuh bawk.A hma kha chuan thinrim deuh kha a ang a,tunah chuan mak tihna leh hlimna inpawlh a ni tawh zawk.

“Hrilh e,mahse, Nanuni hi ka rawn kalpui a...” Doctor ang pham mai chu ka melh zawk a, Joe-a khan a pa a lo la hrilh lo phawt,bakah an inhre tha hle anih chuan Noel-i pawh a hria ang chu.

“Wow!!!,i thiannu a lo ni alaw?”

“Aaaahh,thiannu ni lo e, ka Nupui tur zawk” nghet churh hian a ti leh sup a.