EVERGLOW-21

Chapter- 21

“Ouch!!!” a nui hak nangin a hmela mak tihna lang chhuak kha ka hmu hman tho.

“A va hriat loh theih ngai ve” amah bawkin a ti leh a, min rawn en a, a hma ang bawk khan a hmelah engmah a ngaihtuah awm a hriat leh theih tawh loh,Hmeichhe satliah mai ni loin Doctor a ni miau a, a mak lo.Mahse, nichin kha chuan mak a tih zia a thup hman meuh lo ve tho tih ka hria.

“Engmah kan la tlangzarh lo a, a hre hmasa pawl chu i ni ta tho e,tu nge anih chu i lo hrechiang hman vek tawh ang tiraw?” a ti leh a.

“Um, hrechiang a ni tawh mai, engtik nge Inneih ni tur?” Zorina ka melh zawk a, hahdam hmel zet hian a chair hnunglam nghengin bawp khawkherh in a thu a, a hmelpa zet chu a lang dam thlup bawk.

“Chutak chu kan la tifel chiah lo,mahse, a fel thuai ang” awlsam fe hian a ti leh mai.Sawi ve mai tur hre loin ka thu ngawi kar thung.

‘Um, anih chu, engpawh nise Ultrasound tih tir ka lo tum mek a, in zuk ti lawk anga ka lo en lehnghal dawn nia” a ti a,ka lehkha ka keng a,ka tho tur chu tul lo zetin Zorina’n min rawn pui a, a chhan hriat si lohin ka tang tung a, ka thin a rim deuh hlur bawk nen a kut han thinthlak nawk ka chak zek zek, mahse, ka ti ta em lo hlauh.

“Engtikin nge i lo thlen a?” Ultrasound result nghaka kan thut laiin ka ti a, Doctor kan chhuahsan hnu khan mumal takin kan la inbe leh miah lo.

“Dar hnih vel khan” a ti hmuk a, a phone a en ngur bawk.Doctor bulah khan min duat hmel tehreng nen tunah chuan biak huphurhawm tak a ni ringawt.

Ka result an peih tih Counter atangin a rawn sawia, ka tho tur min thawh khalh a, a va la a, Pawisa a pe nghal vek bawk,a rawn let leh a,a hmelah chau hmel hmuh tur a awm a,a hma khan ka lo en uluk lem lo a, danglamna a neih pawh ka lo hmu lo mai mai zawk.

“Kal ila...” a ti sup a, ka ding a, ka chhuahna turin kawngka a nem hawng a, sik hlau zet hian hlat thei ang berin ka chhuak a,ka chetdan tul lo zet chu a hrethiam tih hriat zet hian a rum deuh hawk thung.

Doctor in ka result a en thuak thuaka,vanneihthlak takin engmah dik lohna ka nei lo,rilru hahdam taka awm tur leh taksa hriselna lam ngaipawimawh turin min chah ngun viau,Naupangchhia ka ni tawh lo a fimkhur ka ngai lehzual tih a sawi tel bawk.

“Hna i chawlh rih a tha ang” Motor a kan luh hnuah a ti nghut a, a tul na ka hre lo lutuk tih ngaihna hre si lo ka nui hak ringawt.

“Engvangin?” nuihza la insum deuh hian ka ti nghat a.

“In dim i mamawh a tih kha,i tel lo pawn hna a kal vek thei”hnial chi loh tawpa khauh hian a ti leh hluk a.

“Chawlh ka duh hleinem..”

“I duh leh duh loh ka zawt lo che, i chawl rih ang,bakah kan inneih hnuah phei chuan i thawk zawm dawn miah lo” a ti leh a, tlemin a aw a nem ta deuh.

“Inneih,engmah kan la sawi hleinem, Doctor kha i hriatsa a ni tih ka hria a, i mualpho loh nan i sawi mai tih pawh ka hria...” Motor a ti ding thut a, hmalamah ka bu dawrh bawk.

“Sorry...i tha em?” min rawn en a, a hmel thim deuh makah chuan hlauthawnna niawm tak a lang bawk.

“Aw,tha..mahse, ngatinge?” ka aw a khur deuh titih, ka nat leh nat loh lam ai chuan ka phu nasa lutuk khan min ti khur a ni mah zawk.

“Ui mawle” tih pahin Car kawngkhar a hawng a, a chhuk zui nghal zat, chhuk ve pawh tum loin ka lo en a,khua a la thim chiah lo nangin a hmuh chian theih vak tawh loh a, Motor head light in a chhun avangin a che vel erawh ka hmu thei vek thung.

“I hmu em?” ka lo ti vat a.

“Aih, ka su lo tihna nimai” tih pahin a rawn thu lut a,ka lo thaw ve huai ringawt.

“Zaninah Palai an lo kal dawna, in Inah nge an lo kal ang i Pu te Inah?”min rawn en a,kan dinna lai hi kan veng leh kan veng thenawmte nena kan inrinna lai a ni a, Motor lo kal an awm mai lo a, In a awm lo bawk.

“Ka..ka hre lo,i ti tak tak em?”

“Fiamthu na hun a ni lo tih i hria ang chu” a hmui a pet sawi zauh bawk.Ka thawk hak a, ka chil ka lem leh te te, tunah hian hnial tur ka ni lo tih kei aia hrechiang an awm lo,ka naute hi sawn nih tir ka duh hek lo, mahse,...keimah ah hian engemaw dik lo a awm tlat, amah hi ka ringngam tak tak em? Thil ho te teah a thinrim thin te hi In khatah kan chen dun chuan ka tuar chhuak zo lo mai angem? Noel-i nen sumdawnna thilah an thawh dun a la ngaih miau avangin ka hmuh fo angai dawn,chutih hunah chuan hlauthawng lo in ka Pasal anih angin ka ring zo angem? Zawhna hlir,mahse,Zorina hian min duh tih ka hrechiang tawh a, Naute vang a min nei tur a ni lo tih pawh ka hria, Naute ka pai hma pawn min neih a duh daih tawh zawka, tunah chuan Naute vang hian a tan chance a that phah ta sawt zawk tih mai chauh a ni, a hma kha chuan ka hnial thin miau a.

“Zanin chu a hma deuh em a..” ka ti sep a, Motor a start a,min rawn en zawk a,hmalam a en leh mai.

“Hma lo e, nizan khan ka Pa te ka be vek tawh a, tuman an hriat hmain neih che ka duh a, chu chu an remti thlap bawk” zawi sup hian a ti a, chhan mai ngaihna hre lo hian ka kut ka elh nauh nauh mai.Anu khan engtin nge a ngaih ang? Ka nu leh a pasal inzawmna kha a lo ringhlel tawha, a rin kha a dik lo tih Zorina’n hrilh leh tawh mahse lawm takin min pawm ka ring lo ve tawp.Thil pakhat ka rilruah a lo lut thut.

“Tu nge hrilh che?” hei hi ka zawh ngei ngei angai,Noel-i a ni tih ka chiang reng chungin dawt min hrilh leh hrilh loh ka hre duh tlat lawi.

“Tu bulah nge i sawi?” nelawm lo zet hian a ti hluk.

“Ka zawt hmasa che alawm le” a aw ki ang bawka nelawm lo in ka ti ve hmak.

‘Noel-i bulah khan i lo intithei kual vel a ni lawmni?” ka khawng nghal lah mai.Chu Ramhuai zet chu a.

“I ring em?”

“Noel-i hi ka nupui hlui a ni a, kan inneih chhung khan vawikhatmah dawt min hrilh ka hre ngai lo..”

“Aaah, a tha hle mai, ka nei dawn lo che”

“Maw?!”

“I beng a ngawng loh kha” amah en duh loin hmalam ka en lui tlat.

“A chhan i sawi angai ang chu”

“Noel-i nge kei i rin zawk?” ka thik zia leh ka huatzia tih lan loh tumin ka in control nasa viau, mahse, ka aw ki chang fak mai chuan a ti lang chiang ngang mai thung.

“Ani nen chuan compare pawh i in tum buai duh zawk e a” ka chhungril a na nghal vawng vawng mai.

“Ok,a tha.Mahse, thil pakhat ka hrilh ang che, a bulah khan ka rai tih sawiin ka intithei kual vel lo a, hrilh lah ka hrilh hek lo” ka lungawi lo satliah pawh a ni lo.Ka puakkeh dawn niin ka hre hial zawk.

“Amah in a lo hre ve tawp tihna maw? Huh..” ngeiawm zet hian a ti leh hluk a, sawifiah tuma ka ang zuau tawh ka chip leh hmak, enge sawifiah a tulna? Noel-i sawi a lo awih fel vek tawh anih si chuan ka sawifiah talh hian ka chil per a uihawm mai mai.

Kan kawtah a ding a,kawngkhar ka hawnga, ka chhuk tur chu ka ban rekah a rawn chelh leh thut a,ka hawi let a, pawnlam light eng chuan a hmai a rawn chhun a.

“Zanin chu a hma i tih chuan naktuk zan ni rawhse, engmah hi ka nghak khaw tlai tawh dawn lo ania” nghet churh hian a ti leh a, min hrilh nge thu min pe ka hre hrang nek lo e.

“Hnial thei che ka ni em?”

“Aih, bakah inhnial ka peih lo,ka chau lutuk mah mah” a ti leh a, ka kut a chelhna a thlah a,  ka inrin hmain ka biangah a rawn khawih a,a kut lum thur thur chuan min fan raih raih bawk.

“Thil pakhat hrereng la ka duh, Noel-i hi thik buai duh suh, ka nei dawn che tih ka sawi tawh chuan Naute vang a ni lo a, nangmah hi ka duh che tih i hre reng dawn nia” zawi fiah zet hian a ti sup a, mawl hmel zet hian ka bu nghauh ringawt.

Mama a lo haw tawha, ka rin loh deuhin ka pi leh ka pu an lo awm a, an lo kal chhan lam erawh rindan ka nei thiam nghal mai nangin eng rilru pu in nge an lo kal erawh ka hre lo.

“Ka rin aiin i lo haw har a” Ka pi in min lo ti vat a,hna lamah kan buai thu ka sawi liam puat, Mama engmah ka la hrilh lo a, ka pu erawh hi chu ka pi in a hrilh ka ring ve ngawt, Mama an lo hrilh tawh zawk maithei bawk.

“A pawi lo, I patea pawh a lo thleng chauha” a ti leh a, phawk deuh hra hian ka en a, engmah sawi loin a bu nghat ringawt.

“Inthlak fel phawt la,i inbual nghal dawn zawk em?” Mama zawkin a lo ti ve a.

“Aih, ka inthlak ringawt ang,ka rei lo ang” ka ti a, Room ka pan a, ka chau leh hluah hluah tawh,Zorinsanga khan min ti chau hluah hluah,Noel-i tan zawnga a tawngkam khan min ti na ngut ngut a, ka bengah a ri nawn tluk tluk bawk.Thik lo turin min ti eng ang mahse a thusawi a lo ring ngawt thei khan min ti na tawk viau.

Living room a ka let leh chuan Patea a lo awm ve tawh, rindan sa nei lo ila chuan hetia a ruala an lo lut hi thil mak leh rapthlak a ni hial zawk ang.Ka pi bula thutna awlah ka thu ve a,chaw an ei tawh leh tawh loh ka zawt a, a lu a thing mai.

“Mampui,i chanchin i pi in min hrilh a” hawi chhuak ngam loin ka kut tin ka kheuh a,hnuai lam ka en ran bawk.

“I lakah hian ka beisei sang em em a, engmah ka tihsak thei lo chung che hian ka tunu i ni hi ka chhuang thin che a,tun tum erawh han lawmna tur chi a ni ta hauh lo,mahse, chulam chu ka sawi tum a ni lo.Zorina pa khan min rawn bia a, zaninah lo len an duh a..” ka ip chawih a, ka chil ka lem khalh ringawt,Zorina hnenah khan a la hma ka ti a, mahse, engkim ka pu te bulah an lo va sawi vek tawh zawk.Ka pu te ka sawipui hmasa ang chu ka tih vang a pha ka ni pakhat a, mahse, an lo sawi vek tawh chuan engmah tih danglam theih a nih hmel loh.

“Engmah ka hrethiam rih lo..” Mama ka melh zawk a, min en lo in Tv lam a lo en daih.

“Hmeichhe lam kan ni a, tunah nau i keng tawh a, duhthlang thei kan ni lo,a rawn sawi dan kha chuan sawn man pe tur ni loin inneih lam law law sawi an duh a ti a,hetah ai chuan kan In lamah lo leng ta mai se ka lo ti a, han rawn hauh loh che chu ka duh lo a, i Patea ka rawn a, ani hi chuan i thu thu a ti a” a ti leh boh boh a,nia, duhthlang thei dinhmunah ka ding eih lo, kan In a ni emaw ni lo emaw ka tan chuan engmah danglam a awm lo.

“In tih dan dan animai” ka ti sep a, ka pa ka mitthlaah a lo lang a, la dam se engtin nge a tih ang? La dam se chuan hetiang dinhmunah hian ka ding kher lo ang,Zorina hnenah khan ka hmeichhiatna hralh turin ka kal hek lo ang.

“Nia, kan In lamah lo leng mai se, ka lo ngaihdan chuan zaninah an lo kal anih chuan a ni leh thla pawh lo ruat fel mai ila, midang innei tur ang kan ni ve dawn lo a” Patea zawkin a lo ti ve a.

“Midang innei tur nen danglamna an nei bik chuang pawn ka hre lo” Mama aw hian a ti a, a chang fak mai, ka melh vat a, min en loin Patea a melh ngar bawk.

“Aa,chuti zawngin ka sawi hleinem, Zorina te lam hian inneih vat an duh tih an rawn sawi vek tawha, palai lo kal nawn kher ngai loin engkim zanin hian inhawng takin lo sawifel pui mai ila ka tih na ania” tlawn titih hian a ti leh a, nui lui tih hriat zet hian a nui vur vur bawk.

Mama hian vawikhatmah Patea te nupa hi ka hriat laiin a chhe zawngin a la sawi ngai lo,mahse, min ngaihsak miah lohna te hi a lo theihnghilh bik reng reng lo tih erawh ka pawm ta thlap,keimah ber hian engmah ka sawi ngai loh avangin a lo ti lang ngam lo mai mai zawk a ni ngei ang.

Palai te haw hnuah ka Pu in Mama nen min rawn ko a, ka lo rin ang ngeiin ka pi khan ka pu leh Mama a lo hrilh vek tawha, min hau hauh lo turin a lo ti sa vek bawk,Common roomah an lo thu a, Nutei a lo awm ve bawk,nidang ang bawkin min lo lawm leh hliai mai.Kei erawh chuan nidang aiin a let tam takin ka haw ve thung.Inneih hun atan thla thar ni 21 an lo ruat fel a,ka thaw hak mai,min rawn a ngai lo tih sawi mah ila ka duh ai chuan a la hma ta fan.Pawisa khawl lawk ka nei mang lo a, kan ba ka la rul bawk nen inneih thuam ringawt pawh ka ngaihtuah ngam lo zawk.

“Engmah ngaihtuah hah duh suh, i duh duh i thlang pawp pawp dawn nia” Nutei nui hmel chu ben sawk ka chak,ka Pasal tur tunge anih a hriat rualin a nem nghal vek,mi hnenah ‘Boss te nawmchenna ‘ min tih loh leh a rinthu mai mai a lo sawi chamchi a, ka pi phei chuan Nutei chaw tui ber a ti hial kha ania,tunah chuan a danglam ta vek chu ania, hahthlak hlawm hian a.

“Nanun...lo ding lawk teh” mipa aw hian ka hnung lam atangin a rawn ti a, ka ding dat a,ka hawi let a, min ko tu ka hmuh takah chuan ka thaw hak mai.Ka hmuh chak loh ber a ni hial ta ve ang.

“Enge ni ta?” nelawm vak lo hian ka ti hmak a.

“Pasal i nei dawn tih ka lo hria a” a rawn kal hnaia,a hmel a la tha reng.

“Nia,i hre dik anih chu”

“Min sawm ve dawn em?” a nui a.

“Lo kal ngam tur ni a i inhriat a thu le” ka ti hmaka, ka nu nen an chesual lai ka hmuh tirh ang kha chuan ka na tawh lo, mahse, amah ka huatna erawh a la ngai reng.

“Ngam tur ka ni lo maithei, mahse, i nu in min sawm ve miau a...” ka kut ka hum ruh ngat ngat mai,ngeiawm zet hian a nui bawk.

“Mate,kal ila...” Zorina aw hian a rawn ti sup a,inti ta tu zet hian ka darah a rawn vuan zui nghal zat bawk.

“I lo kal ve dawn maw?” ka melh chho a, a khabe hmul kual raih chuan a hmai a ti lang tung deuh a, a bek sam kawng deuh leh a hnar ngul sang vah te nen chuan a lang tha takzet.

“Kal ve ang chu,  Zomuani pawh ka hrilh tawh kha..nang hi Nanuni bulah hmuh che ka duh tawh lo ka ti khan ka hria” nelawm lo zet hian a ti zui hmuk bawk.

“Oh, chutiang pawh ka lo hre tawh lo a...anih phawt u” a ti a, a kalsawn chu ka en a,ka nunah hian lo lang tawh ngai lo se ka duh hluah hluah.

Inneih inbuatsaihna a kal tluang thawkhat, mi hriat lem loha tih mai ka duh tehlul nen zorina  te mi pangngai chunglam an ni miau a hria an tam lo thei lo, ka rai tawh tih an hre tel zel lo thei bawk si lo,Office erawh ka kal ta lo, kal luih ka tum hle nangin Zorina mai bakah Moses-a leh Zomuani nen lam an tang ho a, tihngaihna a awm lo.Han inneih dawn tak tak meuh chuan tihtur a pui a lo tam em em a, ka mal zia ka hrechhuak zing tial tial bawk.

“Vawiin kha i nu kan sawm ve ania” Ka pi in a ti sep a, phawk zet hian ka en a, tawngkam mawi vak lo ka chhak chhuak hman thelh.

“Lo kal lo se ka duh zawk tih i hria tiraw?” a rilru tihnat hlau in ka in control nasa viau.

‘Hre lo, hriat pawh ka duh lo,bakah i nu a ni a, ani lo Nu dang i nei lo,amah pawn lo kal duh siin a hreh ve em em ang tih hria la.That lo chhuah hram hram ang che, nu i ni ve mai dawna, nu dinhmun ropui zia pawh i hre thuai ang” a ti leh a,Nia, Nu dinhmun zawng a ropui, mahse, tu nu mah hian Ka nu angin an fanu te Bialpa an mutpui ve lo tawp ang.

Man hlanna hun kan hmang a, zawn ka nei a, hmuh erawh ka hmu lo.Zorina leh Moses-a an awm ve a, Zomuani erawh a mimal thil buaipui tur a nei a,a  lo la thleng lo thung.

“I tha em?” ka beng bulah zawi sup hian a rawn ti a, kan inneihna tur buaipui in kan inzui tam a,nitin hian min care zia ka hre chiang tawlh tawlh bawk.Mahse,Noel-i ka ngaihtuah chhuah apiang hian ka thik lo turin min ti mahse ka chhungril a na ziah thung.

“Tha tho,mahse, ka chau” dik takin ka chhang mai.

“Um,Room lamah kan kal mai dawn mi niang” a ti leh a,ka hawi kual a, a thenin chaw an ei tan tawh.

“Chi nang...oh...a lo kal tak tak” ka tawng tawp lam a zuih ral titih,ka en na lam a en ve vat a.

“Shhh,hahdam rawh, i bulah ka awm ania” hnunglam atangin ka kawngah a rawn kuah a.Ka ngheng ta nge nge, mahse, ka inthlahdul thei hlawl lo thung.

Ka en leh ta nge nge, ala ngai reng, a hmelthatna pawh a la chuai chuang lo, a lang zahawm em em a, ka pa nen an inneih lai ang mai khan a lan dan a dik leh thlap tawh bawk.Mahse, a chhungril lam erawh a tawp em em tih ka hai si lo.Ka pa hmel ka mitthlaah a lo lang a,ka mittui a rawn hnai nghal kuar a, tap ngawt tur ka ni lo tih ka hria a, ka insehruh fan fan bawk.

“Eng nge i an?” boruak ri hulh hulh ka nin avangin ka pi te room Balconyah ka ding a.Tu nge min be tu ka hria.

Muangchang hian ka hawi let a,kan inhmachhawn ta ran mai.

“Ngatinge i lo kal?” a dang sawi tur ka hre hlawl lo,ka kut ka humruh ngat ngat bawk.

“Ka fanu i nia lawm” thinrimna a hmelah hmuh tur a awm lo,a aw a dam thlap bawk.

“Ka ni lo..”

“Min haw em em mai hi ka hrethiam lo,i pa lakah chuan ka tisual ngei mai,mahse,ka tan chuan ka fanu,ka hrin hmasak ber i ni a...”

“Sawi tawh suh” ka ti tuar a, ka beng ka hup tlat bawk.

“Ngatinge?” tueawm hian min rawn pawt a, a awmah min pawm bet zui nghal hmiah bawk.A lo luh lai ka hre hauh lo.

“Zorin,ka fanu hi i kutah chuan a him ang tih ka hria ania” Ka nu aw bawk hian a la ti ta fo.

“Ni e, ka enkawl ang,ka tan chuan ani aia hlu a awm lo”

“Ka tan pawh mawle” a va han zak lo tehlul em,Zorina awmah ka hmai ka phum tlat a, a hmel ka hmu peih hlawl lo.

“Nia, an pawimawh ang, mahse, tu nge mahni Fanu bialpa te mutpui sak chunga ka fa te ka hmangaih tih thu sawi chu awih duh ang?” a aw a ring lo, a chiang kek kawk hle thung.