EVERGLOW-23

Chapter- 23

“Hei, ka Driver chu nih hi” Hriata lamah a thle zauh a, harsa ti lutuk hian ka nui lui thei hram.

“Um,lo lut ula..” ka beisei aiin ka aw a pangngai.

Inchhungah ka lut a, min rawn zui lut ve a, ka awmdan a mawi lem lo tih ka hai hauh lo, tunge anih pawh ka zawt lo a,aman min hrilh hun lah ka nghak khawmawi eih bawk lo.

“Engtikah nge in pa a lo haw dawn?” Zomuani bawkin a ti leh a.

“Naktuk lamah niang, a ni lo thut thei tho bawka” ka ti a, Hriata lam en loh hram hram ka tum ngar ngar bawk,amah ka la duh vang lam a ni lo,huatna zawkin min ti chau hluah hluah.

“Anih chu, engtik nge i neih hun tak kha?” a ti leh a, ka hrilh tha ve mai.

“Eee, ka la sawi miah lo a, ka Driver thar hi Hriata nia,chuan ,Hriat, hei hi ka thiannu leh ka u nupui ni kawp bawk,Nanuni anih hi..Inchibai ve reng reng ula..” nui har har chung hian a ti a, ka lo ip deuh chawih thung, khawvelah hian ka thil duh loh te thlang dawn ila chuan he pa sik miah loh hi a pakhatna a nih em loh pawn pahnihna a ni chiang ang.

“Ka hresa alawm” Hriata’n a ti a, phawk deuh hra hian ka melh a, a hmelah engmah a ti lang lem lo, min chibai tuma a rawn tho chu ka en reng ringawt,a rawn kal hnaia,a kut a rawn phar chhuaka, ka che mai lo..

“Nanun,ngatinge a?” mak tih hmel deuh hian Zomuani’n a rawn ti a, ka harh deuh zawk, rang fe hian ka kut ka phar chhuaka, a kut ka vuan zawka, ka thlah leh vat bawk.

“Eng ni lo e, i Driver hian min lo hresa a ti a, ka hre ve em tih ka lo ngaihtuah mawle” nui chung hian ka ti a,Hriata hmel danglam deuh zawk chu ka hmuh hmaih hauh lo.

“Maw? I lo hre sa reng alaw?” mak tih hmel deuh hian a ti a, Hriata a thlek ha bawk.

“Hre sa dawn lawmni? Zorina nupui anih hma pawn ka hre daih tawh lawm” a nui a.

“Chutak reng chu lawm ka zawh che le?”

“Ha,tak takin ka ralkhat hriat ve mai mai zawk, i lo lang upa ve ta deuh a,ka hre lo tep che” pangngai tak hian a ti ta zawk, mahse, dawtsawi heh ka lo ti ve thung,Kan inneih hma lawk pawn kan inhmu a, tunah lan upat sawtna hun a ni lo,engpawh nise Zomuani lakah chuan ka him ta phawt e.

Kan chawei boruak a hrehawm hran lo, Zomuani a ti ti siam siam renga, kei erawh ka tang ru teuh thung, Hmana ka hriat thin Hriata kha a lo danglam ta viau anih hmel, tawng duh leh nui duh tak kha a ni thin a, tunah chuan a mizia a thup nge ka hre lo, a tawng mang lo,mahse, Sihal hian a zia thupin a rawng thlak engang mahse a chhungril chu sihal a ni tho tho.

Ka mu meng kar mai, an haw veleh mu turin khum ka pan nghala,Zorina nen rei vak lo kan inbe leh bawk,Zomuani khan engmah a hre miah lo tih a chiang, kan lo inzui tawh thin tih hria se chuan a bialpa pawh nise kan inah a lo hruai hauh lo ang, Hriata thung kha chuan a hriat ka ring sa thlap, kan inneih khan a lo kal ve em ka hre lo, mahse, a duh anih phawt chuan tu nge ka Best chu hriat a harsa dawn lo,a hmeichhe duhzawng a lo ni ve reng anih pawhin Zomuani a ni tlata, ka tan chuan rin theih a ni miah lo,Zorina kha ka hrilh ang nge hrilh lo ang tih kan inbiak chhung khan ka ngaihtuah reng a, mahse, ka hrilh ta lo, hrilh ka duhna leh duh lohna a inchen reng lawi.

Ka Phone riin min ti harh a,ka lo muhil sek hman,meng mang lo hian lukham bula ka dah ka la a, tun ang hunah tu tak ni ang maw?

“Hello..”

“Nanun,i nu ka nia” ka harh deuh kawk mai, tun ang hunah ngatinge ka nu in min lo call ang? A awah khan keima nu ni loin Zorina nu aw zawk a ni tih pawh ka hria.

“Aw, nu..enge ni ta?”

“Mama te kha...” rang lutuk hian ka thuchhuak nghal a, ka chhungrilah hlauhna in min rawn man a, ka khur nghal dar dar bawk.

“Ngatinge? Engtin nge a awm a?” ka mangang tih ka thup hleithei lo.

“Aaaa, lo hlauthawng vak lo phawt la, i pa nen kan lo kal mek a” a ti leh a,.

“Chutiang ngawt ..?’ ka tum aiin ka au ring hret.

“Kan lo thleng animai e,kawngka lo hawng ula” a rawn ti leh a, ka tha a khur nasa lutuk.

Sana ka en a, dar 12 a lo la ri lo deuh, tun ang hunah an lo kal anih chuan thil tha lam a ni dawn lo tawp,ka phone ka en leh a,number ka hriat ngai loh atangin min rawn call na a lo awm nual, Moses-a min lo call na a lo awm bawka, ka harhvan tehlul nen engtin nge hei zat min lo call si a ka harh miah loh theih?!

Stepah ka chhuk thla a, ka nu te Motor light rawn eng pap pap chu ka va hmu nghal a, kan Driver tharin Gate a lo hawnsak mek bawk.Ka tha a khur nasa lutuk a, ka che hleithei lo.

“Awi, Bawihte..” ka nu in min hmuh veleh a rawn ti a, min rawn kuah nghal bawk,engmah thil awmzia ka hre lo,mahse, thil tha lam a ni dawn lo tih a chiang sa reng, Hmeichhe in control thei tak mai a ni a, hetiang khawpa a thlaphang anih chuan Zorina chungah thil tha lo lutuk a thleng a ni tih a chiang reng,ka mawl huih mai.

“Akhai, khatiang tur a ni lo,a thi em pawh a ni hleinem,Nanuni pawh i ti mangang alawm” Ka pa in dam thluam hian a ti a, chung te hlei hlei chuan minti mangang zual sauh zawk.

Ka bulah ka nu a thu a, ka kut a chelh tlat bawk, ka pa erawh min ep zawngin a thu thung, Zoi leh kan Driver Kitchen lamah Thingpui vel siamin an awm bawk.

“Dar 8 vel khan Mama Bairabi atangin Kolasibah a let a, Driver a nawmsam loh vangin amah in a kal a,enge thleng chiah chu keini pawn kan la hrethei mai lo a, Motor dangin an han hmu a, kawngah a lo mu an ti a,mi kut a tuar anih hmel..” ka khawng vek,sawi awlsam a tum hle nangin ani pawh a hlauthawng ve tho niin ka hre tlat.

“Tunah Kolasib Hospital atangin an rawn phur chho dawn mek a,ngaihtuah awm a ni lo, Mala leh Moses-a an kal thla tawh a, kawng lakah an intawk maiin ka ring” a ti leh a,sawi tur ka la hre ta chuang lo.

“A tha leh mai ang,an call che a, i la thei si lo a, chuvang ania kan lo kal” ka nu zawkin a ti a, a lo thlen hlim ai kha chuan a aw a pangngai ta deuh.

“A na viau em?’ ka tawngchhuah theih veleh ka ti sep a, ka aw a lawi rat mai.

“Na viau lo ang, thisen a hloh hnem deuh a thisen an pe mek an rawn ti a” Ka pa zawkin a ti leh a,ka bu ringawt.

“Mala te kha bia la, an lo inhmu reng tawh thei a” Ka pa in ka nu hnenah a ti a, ka hawi mawl vel mai mai,min rawn biak khan Bairabiah a la awm tih a sawia, amahin a kal tih a sawi lo,ka that leh that loh min rawn zawt a, naktukah lo haw a tum tih a sawi bawk a,ka rilruah Hriata te lam ngawt ka lo ngaihtuah avang khan ka be liam vel mai mai kha ania, tunah na tuarin a let reng chu a ni sia.

“An inhmu tawh anih chu,darkar chanve velah kan lo thleng ang a ti a..Zoi, gate ah sawn awm an awm ania” a tih zawm zat.

Mama leh Patea an rawn inzui lut a, Mama hmel ka hmuh rualin ka tah a chhuak ta tlat, mahse, tah ngawt ka duh lo, ka hmui ka pet fan fan mai, ka bulah a rawn thu a, ka kut a rawn vuan a,Patea leh Ka pa an inbia a, Moses-an Mama a lo va hrilh a lo ni a, an awmdan engkimah hian ngaihthat na tur a ni miah lo.

“I thawmhnaw han thlak ila, ka lo kalpui ang che” ka nuin a ti a, ka lu ka thing ringawt, mahni a awm ka duh rih tlat.

“Angai lo ang, ka han inthlak ang..mahse, enge ken tur tul ni ang? ‘ka nu ka en a.

“Ngaihtuah suh,Zoi nen kan lo ti vek mai ang.Han inthlak phawt rawh, bakah i rilru tihah miah suh aw” a ti leh a, ka bu leh nghat ringawt.

Khawvar dawn hnaihah an lo thleng ta chauh, Zomuani a lo thleng ve tawh bawka,ka bulah a thu a, min kalsan eih lo, ka pa leh Mama bakah Patea ten Damdawiin lam an lo dawr fel a,Phillipa thawhna hmun a ni bawka engmah harsa a awm lo.Hmanhmawh zetin an zai nghal rum rum a, mumal a hmuh na hun pawh a awm ta rih lo.

Darkar thum lai an zai hnuah an zo ta hram,ICU ah an dah zui nghal a,Thisen an pe zawm zat bawk.

“Nanun, lo lut la,midang kha chu lo lut rih lo mai teh u” Phillipa’n a rawn ti a.Ka zui lut a, an zai hlawhtling ti mahse ka zamna a la reh thei chuang lo.

Engmah hre lo tih hriat zet hian  mu a,a dang lap  bawk,a lu an tuam chhah luk a, Oxygen an hip tir a,khawl chi hrang hrang a taksa nen a inthlunzawm tuak bawk, eng khawl ber emaw atangin a tut zauh zauha,chu bak engmah thawm dang a awm lo.Khum bula chairah ka thu thla a, a puan sin in a khuh loh a kut ah ka zuk vuana, nunna nei lo niawm tak hian a vawt vek,nidang ang bawkin min rawn vuan let ve se ka ti ngawih ngawih,mahse, tunah chuan engmah hre lo in a mu a, engtikah nge a harhchhuah ang hriat a ni hek lo.

“Tikhan i duh duh chen i thu thei ania aw” zawi deuh hian Phillipa’n a rawn ti leh a.

“Ka lawm e,thil ka zawh thei che ngem?”

“Tehreng mai”

‘Engtikah nge a harh chhuah i beisei?”

“Ka va hrethiam mai lo em, mahse, vawiin chu anih ka beisei e” a ti a, min thlamuan tumin a nui var var bawk.

“Dik takin min chhang la ka lawm ngawt ang,a beiseiawm nge beisei awm lo?”

“Ka chiang lo, mahse, beiseina erawh ka nei”

“Engtiang takin nge a hliam nasat le?” ka ti leh talh,avaiin hriat vek ka duh, atir lam khan ka mumal lo lutuk a engmah pawh zawhna chang ka hre lo a, bakah tuman an sawi tha duh hlawm lo hrim hrim bawk.

“A luah khan an vua anih ka ring a, kha chu a nasa vak lo, a pumah an vit a, kha khan a thisen a hloh hnem tir deuha, a ke  pahnih hi a khup hnuai lam hi a ruh a khawih bawk a...” ka kut ka hum ruh a, ka hmui ka pet fan fan mai,tumah puitu a nei dawn si lo,amah chauh lehnghal in a ni a, ka khawngaih hluah hluah.

Khum che deuh datah ka harh a, ka thu mar nghal vat bawk,Zorina ka en nghal thuai a, chunglam melhin fiah zetin a lo meng a, ka hnuk a ulh titih.

“I harh tawh maw?” ka ti a, ka kun hniam a,min rawn melh zawka,a mit a chhing leh mai.Dimtein a luah ka chul a, a rawn meng leh a, a hmui a phun sepa, Oxygen an hip tir avangin enge a sawi ka hre thei lo,duty te koh tuma ka pen chiah chu Nurse a rawn lut ve chiah thung.

“Enteh, a harh tawh..”

“A va lawmawm,ka lo en ang, midang i duh chuan lo va hrilh la” a ti a, pawn lam ka pan a, nizan ti ila zinglama an zai zawha ka luh atang khan ka chhuak leh tawh miah lo a, tunge awm pawh ka hre tawh lo.

An lo thu deuh thap,lawm luat avangin ka haihchham a,sawi mai tur ka hre lo,min lo en nghal thap bawk.

“Nu, a harh tawh” Ka nu hlauthawng hmel chu ka en a, a hahdam nghal huai tih a hmelah a lang thei mai bawk.

“Aw, a va lawmawm em,lo luh an phal em?” a ti a, a rawn ding chhuak a.”Ka hre lo,Nurse a awma, khawiah nge Phillipa hi a awm ang?” ka ti a.

“Ka awm,ka lo kal e” amah a rawn lang zui nghala, ka thlamuang nghal huai mai.

Karkhat lai ICU ah a awm hnuin Cabin lamah min sawn chhuak ve ta hram,ka beisei angin hma a sawn chak lo,a damdawiin awm zan atangin khan ka la hawsan leh ta miah lo a, midangin min chhawk an inhuam em em a, mahse, ka kalsan duh lo.Moses-a leh Zomuani an tangkai takzet,an Inpui lam atangin min rawn buaipui vek bawk.

“I chau tawh em?” a ti sup a,hnung lama lukham nghengin  Damdawiin khumah kan pahnihin kan thu dun a.

“Aih,mahse, dam tawh la ka ti”

“Nia, keipawh dam ka duh tawh” a nui a, ka nui ve hak tho, Dam leh dam loh chungchangah kan thu hmel lutuk chu kan nuih a za a ni ber.

“Ka nu khan zanin chu ka rawn chhawk ang che min ti a” ka ti leh sep a, a darah ka lu ka nghat a, a kutzungtang sei thlurhin ka kut a hum a, a hmer vang vang bawk.

“Um,zuk chawl hahdam la chu ka ti,mahse, ka ngai ngawt ang che” a tihfo thin danin ka samah a rawn fawp vang vang bawk.

“Keimah lam hi chu ngaihtuah ka ngai miah lo a, mahse, Naute zawk hi..bakah In kan awm loh san rei tawh lutuk a” ka ti a.

“Ka lu a an rawn vuak khan ka thi dawn anih hi ka ti hman tawha, nangmah ka ngaihtuah luat che avangin ka tawngtai ve hial asin” harsa tih hmel zet hian a ti sup a, ka chhungrila engemaw rawn awm chuan min fan rawih rawih a, ka khur zui nghal dar dar mai,a Accident zan khan a thi ang tih lam ka rilruah a awm eih lo, mahse, tunah chuan a lo thih teuh zia ka ngaihtuah chhuak thiam tawha, hlauhna in ka khat leh lawi.

“I thi ngawt thei lo tih i hre lo ami? Engtin nge awm se min tih a?”ka mittui a hnai kuar mai.

“Chutiang ngaihtuah suh, tunah chuan hei ka dam tan mek anih hi..A hma khan Nupui tha ber i ni tawh sa reng a, mahse, tunah phei hi chuan ka tan nang aia tha hi an awm leh tawh ngai lo ang tih ka chiang tawh asin” ka dulah a rawn chul a, ka mit ka chhing a, nun kawng hi ka lo zawh sual tawha, Pathian mithmuh ah thil tenawm tak tak ka lo ti tawh, mahse, chuti chung chung chuan a kutin min lo chelh tlat thin a,ka mangan lai in amah hnaih thei turin ka tan a lo inhawng reng zel zawk a lo ni.

Thla khat dawn Damdawiin kan awm hnuah kan chhuak ve ta nge nge, a ke a la hmang thei ta lo cheu.A rap tha ngam tlat lo,Ka beidawng ru hle nangin amah pawh a beidawng ve ang tih ka hlau a, engmah ka tih lan loh nan ka fimkhur viau bawk.

“Engtia rei nge wheel chair hi a hman la ngai ang?” Phillipa hnenah ka ti a.

“Ka chiang chiah lo nangin ka beisei dan chuan karhnih khat bak angai tawh lo ang”

“Ok, kan la rawn tibuai fo dawn che ania” ka ti a, a thle baka, a Damdawiin awm chhung khan kan tibuai nasa takzet,mahse, thil pakhat tha tak erawh a awm, Zorina chhungte nen kan inpawh phah ta tlat.Rilru hmunkhat puin kan enkawl vek a, kan tangrual a, kha khan inzawmna thuk tak min pe ka ti lo thei lo.

Ka nau neih hun a hnai tial tial a, ka hlauthawng ve tual tual thung,zep hauh loh ah chuan ka nu ka ngaihtuah ru ta zauh zauh bawk.Ka pi a tar tawha, Zorina nu nen inzawm tha hle mahila min hringtu ka nu ang em chuan ka la pawh lo.Ka nu hian min kalsan atangin kum liam fe tawh mahse a angchhung a ka himzia erawh ka la theihnghilh thei ta lo fo.Ka huat em em lai pawh khan hei hi chu ka theihnghilh chuang lo.

 Zorina a kal thei tawha,rin lutuk chi erawh a la ni lo, a kal chhuah dawn pawn tiang nen kal zel a la ngai,a lu na tih chang a nei ta tlat bawk, a lu a nat tawh chuan a thinchhe em em thin a,Phillipa kha ka zawt vek tawha, a lu an vuakna lam chuan  engmah effect tha lo a nei lo a ti a, mahse, a hma khan Lu na a nei ngai si lo a, tunah chuan a lu na a tih em em tum a tam ta viau,Moses-a a lo kal chamchi a,  Zorina a that chian hma, In lama a Officeah Ruata a rawn insawnthla a,an Office luah lai lamah Hlui leh Staff thar pahnih an awm thung.Zorina khawihtu te kha amah Zorina hian an hmel a hmu lo a, an hmai an tuam vek a, mi pahnih tih zawng bak sawi theih a nei tlat lo.Tun thlengin Police lamin an la bawhzui reng a,chanchin lawmawm lam erawh engmah kan la hre ta lo cheu, Zorina leh Moses-a hian a ruka sawi an nei thin a, ka hriat an duh lo ni a ka rin avangin hriat kher ka tum lem lo.

“Kha kha lo la lawk teh..” Nau neihna a ka mamawh tur ho ka pack fel laiin a rawn ti a.

“Khawi hi?” a tih ber ka hre lo.

“I bula File awm kha..Ka lu a na hle mai, ka mit a vai deuh tlat bawka” a tih zawm zat.A file rawn kawh chu ka laksak a, ka pe a, a chalah ka dek a, a lum hran lo.

“Phillipa ka lo bia anga tlaiah in check-up turin kal ang hmiang” zawi tein a lu ka hmeh kual sak a.Min rawn ngheng a.

“A pawi miah lo,ka lu hi a na zing tial tial in ka hria,bakah i Nau neih laiin keimah zawk bawk hi buaipui ka ngai  ang tih ka hlau ta riau ania” a ti a, ka lo ngaihtuah lawk daih tawh, ka sawi chhuak ngai lo mai zawk.

“Chutiang ngaihtuah suh, i tha chak lutuk alawm”a samah ka chul a,ka kut a rawn man a,a malchungah min pawt thu a, ka dul puar kawh luah bawk nen min lo hmu tu awm se  chuan kan nuihzatthlak ngawt ang.

“Min en teh..” ka khabeah a rawn dawma, ka chalah a chalin a rawn nawr zui zat bawk.

“Ka chungah engpawh lo thleng se keimah vangin i tap lo ang tih min tiam rawh” a aw a zawi a, a thawp sut bawk.

“Ngatinge chutiang i sawi a?”

“Ka hre bik lo,mahse, keimah vang a i tap anih chuan ka damchhungin ka in ngaidam thei tawh ngai lo ang” a ti leh hrawih a, ka Hmangaih hluah hluah.

“Ka tap lo ang tih ka tiam thei lo che, mahse, ka tan chuan ka pasal mai i ni lo a, ka engkim i ni zawk,,chuan..” ka sawi zawm leh hmain ka hmui  a hmuiin a rawn bawhthuah a, a rawn khar zui nghal hmiah bawk.

“Kan ti thei em?” a ti tham tuak,ka tukhum samah a rawn tham a,ka irah a rawn fawp zui nghal zat bawk.

“Aih, aw..thei lo..mahse, i duh chuan...?” ka ti bah nawk nawk mai.

“Duh thu ah chuan duh tehreng mai,mahse, a hun tawh lo in ka hria...” ka hnute a rawn khawiha,a Damloh atang khan vawikhatmah Sex kan la hmang leh lo, ka rai lian tawh a,insawiselna em em nei lo mah ila amah a dam lo zui leh bawk nen,hetia a zia tak hnu pawh hian Sex lamin kan rilru a la luah lo.

“Ka hre bik lo,tun thlaah nau ka nei tawh dawn a...” ka hnute a khawihna kut ka man beh saka, a rum hak mai..

“Kum 10 vel a ni tawh hialin ka hria,zantin i bulah ka mu a,a hun tawh loin ka hre bawk si,a harsat zia min hriatthiam pui pha lo ang...” a thaw deuh huai bawk.

“Sorry...”a nui nghawr dat mai, a awmah ka hmai ka phum a,a lungphu ri dat dat chu thlamuang zetin ka ngaithla a, nun hi a famkim ngawih ngawih.

“I thiam loh a ni hleinem,kan naute hian min hrem anih hi a..” ka dulah a rawn khawih leh a.

“Le, min thlah la, ka rit bawk si,i ke kha a na zual hlauh ang..Moses-an min chhaih nasa leh dawn em mai” ka ti a, za zet hian a nui a, kei pawh ka nui ve hak hak tho.

Phillipa ka bia a,Doctor tha deuh hlek min biak sak mai tur a hriat leh hriat loh ka zawt a, nghak turin min ti a,a hnu lawkah Medicine Doctor senior leh lar zet mai min lo biaksak thei tih a rawn sawi a, Hming ziak an lo tam a, a hun a tawt viau nangin kan hmu thei hram dawn tih a rawn sawia, ka thaw huai mai,lawmthu ka hrilh leh rih,thian nih a tlin takzet.Zorina ka hrilh ve nghal a,hna lamah a buai deuh bawk nen a bu liam ringawt,Lunch ei turin a rawn chhuak tih mai loh chu Officeah an tawm deuh char char.

“Ka lo kal ve dawn em?” a thawmhnaw a thlak mawlh mawlh chu en pahin ka ti a.A buai deuh vangin a chau nge a mood a fuh chiam lo.

“Aih, ngai lo ang..lo hahdam rawh”

“Ka hahdam sa reng alawm” nui chung hian ka ti a, a bu ringawt.

“Thil dik lo a awm em?”

“Aih” min chhang tawi tek tawk viau.

“Ok, a that chu..eee,Zomuani khan min lo call a..” ka ti a, Naktuk hi Zomuani nu leh Pa te Inneih kum 40 na a ni a, an lawm sak dawna, kal turin min rawn phut na viau mai.

“Enge a rawn sawi a?” a ti leh hmuk a,ka chhan hmain ka zi mar leh te te.

“Naktuk hi a nu leh pa inneih cham ania, kal turin min rawn vau a ni ber, mahse, kan theih ka rin loh thu ka lo sawi ve ngawt a” ka ti a, min rawn en a, a hmel hriatthiam har zet chu ka en ve kar bawk, hetiang hmel nelawm lo leh hriatthiam har lutuk hi kan inzawm tak tak hma khan a pu fo thin a, kan inzui tak hnu khan hetiang hian a awm leh ngai ta meuh lo, tun tumah hian eng thil dik lo emaw tak a awm ngei ang, engthil nge anih ka hre lo mai  pawh a.

“Ngatinge kan kal theih loh ang?” a mit a ti zim sun bawk.

“I buai a, bakah i damtha lo bawk,chuan kei pawh hetiang a puar kawh luah chunga mi zinga awm ka peih vak lo” ka ti a, a ner nawk thung.

“A dik ang, ka dam lo a, nang i rai puar kawh hle tak alawm” ka sawi ngai chiah a sawi nawn ve  leh a,ngeiawm zet hian a nui hawk bawk.

“Thil dik lo enge awm a? kal i duh chuan kan kal thei alawm, Zomuani hnenah pawh... “ a ban a vai thuak a, ka sawi zo hman lo.

“Aahh,ka kal duh leh duh loh lam ai chuan i thian nu Bialpa ni mek hi i tana Mipa hmasaber kha a ni tih ka hriat loh i ring  tak tak em?” a aw a ring lo, mahse,a chiang kek kawk viau thung.

“Zorin...” engmah dang ka sawi thei lo.Ngaihtuah pawh ka lo ngaihtuah leh tawh lo zawk.

“Engtianga nasa in nge min Hmangaih ang tih hi ka ngaihtuah fo thin a, a hmasaber ka nih loh vang hian ka na hek lo,mahse,kha Mihring..natna tamtak thlentu che khan a lo hnaih leh che hi ka duh lo..” thinrim beidawng niawm tak hian a hmai a tuai pawk bawk.

“Chutiang a ni lo...min hnaih lo a, ka hnaih hek lo..engtin nge chuti zawngin i lo ngaihtuah theih zawk?”

“Ka ngaihtuah lo,kan Inah Zomuani chhuanlama hmanga a rawn hmu che kha ka duh lo mai zawk..” ka melh reng ringawt.