EVERGLOW-27

Chapter- 27

Ka harh deuh zawka, ka che phat mai, mahse, ka din chhuah hmain Joe-an ka banrekah a rawn man bet a, min pawt bet tlat bawk.

“Thu rawh, kan thutna hi an rawn hmu dawn lo,chuvangin helai hi ka thlang reng bawk, khaw nge i phone?” a tih zawm zata, ka chhang lo, Zorina te lam bakin ka rilru a luah eih lo, ka bag a rawn zen a, a la chhuaka,finger lock anih avangin a hawng thei lo a, ka kut zungpui a rawn hmehbel nawk nawka,hnial pawh ka tum lo, ka mawl huih ringawt.

“Ka call a, be rawh, engtin nge a chhan chiah che ka hre duh”Ka bengah ka phone a rawn nawr bet a.

Ka phone ri lam engmah ka ngaihven lo, Zorina te ka en na atangin ka hawisawn eih lo,An pathumin an ding khawm laiha,engemaw pawimawh sawi nei an ang viau, kan awmna a inhlat deuha,enge an sawi erawh ka hre pha lo,Noel-in a bag a zena, ka beisei loh tawp dang ka hmu leh ta, Zorina phone a bag atangin a phawrh chhuaka, Zorina lamah a va lek hnaia, Zorina’n tawng paha a phone a en chu ka hmu a, engmah sawi loin a lu a thing a,Moses-a lam hawiin a tawng zawm leh nghal zat,thawk pawh ka thaw tha ngam lo,Noel-i nui deuh leh Zorina phone a bagah a thun leh lai chu che map loin ka en a, ka hmui a thip nghal zawk bawk.

“Khawi le” tih leh min rawn pawhthlaksak a ruala, a off zui nghal hmak bawk.

“Ehe!! Bawihte, i hmui i seh thi ania” ka nu in dam thlapin a rawn ti ve a, ka thisen kal tawp vek ni a ka hriat kha a rawn kal tan leh a, an awmna tur hmun theuh panin an luang leh a, ka lum tial tiala, a tawpah phei chuan ka sa chhuak vek niin ka hria.

“Kha....” tih pahin ka hmui bulah napkin a rawn lek hnaia, engmah sawi loin ka laksak a, ka hmui ah ka nem bei a,engmah dang fiahna ka mamawh lo,engpawh sawi se chhuanlam atana tha tawk engmah a awm thei lo ang.

“Haw ka duh’ ka tawngchhuakah engmah danglamna a lang lo,mak tih hmel deuh hian Joe-an min rawn en a,ka awmdan dam thlap mai chuan a barakhaih anih hmel.Nia, kei pawn mak ka inti zawk, ka na lutuk a helai hmunah hian mi a ang maia ka chet loh nan chunglamin min pui a ni mahna.

“Engtin nge i tih ang?” ka nu zawkin min ti leh a,muangchangin ka en a, a mitah tak ka en ngar bawk.

“Engtia tih ka tum ka la hre lo, nakin lawkah a fel duak mai ang” ka ti nghata,fel duak se ka ti hluah hluah.

An awmna lam ka va hawia,an dinna ngaiah an la ding a,Moses-a nen an inbia a, an bulah chuan pa upa lam deuh a ding ve tawha, ka hmuhawm ka la hre lo.An din lohna lam kawngkaah kan chhuaka, Ka nu engtin nge a kal ka hre lo, kei leh Joe-a kan inphur mai kha a ni a, an Hotel compound a zau tha a, a hmun a nuam em em bawk,a chhungah tlan lut loin Gate pawnah Scooty a daha.

“Engtin nge i haw ang?” ka nu ka en a,Ka nu ti a koh ka tum lem lo.Ka mawl biak tawp.

“Pawnah hian Taxi a tam alawm” a ti awlsam et.

“A that chu,keini chu kan kal mai ang, Naute ka kalsan sia” ka ti leh a, amah ka huatna lam in ka rilru a luah rih lo,Zorina te bak kha ka ngaihtuah thei lo.

“Nanun...i ni em?” ka pen leh tur chiah chu mipa aw hian a rawn ti a.Ka ding chata, ka hawi let a, Jordana a lo ni a, a hma khan ka hmu miah lo.

“Aw, ni e..i tha maw?” harsa ti zet hian ka nui lui hram.

“Um, tha e,enge i rawn tih a?” a ti leh a,hei pawh hi ka ring zo tawh chuang lo, a thianpa hi kei aiin an tan a hlu zawk daih tih ka hrethiam tawh, tunah chuan Moses-a pawh ka haw satliah lo, ka ten hluah hluah zawk.

“Ka lo kal lawk,ka kalsan mai ang che,ka hmanhmawh deuha” ka ti a,a thle bak a, Zorina aiin a lian anih pawn a lenna a tam lo ang,an intiat tawk vel viau maithei zawk, Zorina aiin a hang zawk a, hmelah chuan a tha zawk thung.

“Lawk, hei ka nupui..” hmeichhe rawn kal hnai mek lamah chuan a phar zauha, a rawn thleng chawpchilh nghal mai,ahma in a photo ka hmu tawha, a takah chuan a la tha zawk fe mai.Nui deuh chung hian min rawn en a, min chibai tumin a kut a rawn phar chhuak nghal bawk, a kut ka vawn saka, mahse,Jordana’n a nupui kawng ah a kuah a, a ta a ni tih a ti lang chuan min fan nasa zawk.

“Moses-an kan in ang hle a ti a, a sawi dik anih hi”a nui a,’Oh,a hmain ka hmu tawh che ti ila i photo ka hmu tawh lawm,chuvang ania ka hriat che” a ti leh hliai a, a ngainatawm takzet.

“Anih chu...kei pawh chutiang tho chu” ka ti a.

“Engtikah nge In naute kan lo en ang aw?” a ti leh vang vanga.

“Hun a la awm mai ang,chaw in lo la ei ang chu” ka ti a,a bu nghata,thil hriatchhuah thut ka nei a.

“Hei ka nu ania, chuan, hei ka best Joe-a” ka ti leh hnuhnawh,an inchibai a, mak deuhin ‘Ka nu’ tih ka sawi khan ka thawl hawk in ka hre tlat.

“Kan kal ang aw, Naute ka kalsan a..” ka ti leh a, a thle baka.

“Keini pawh mawle,mahse, keini chu kum 3 lai a ni tawha, a zia deuh e...inpa hi..oh,hei a lo kal alawm” a ti zui zat bawk.Kei erawh ka ding khawng nghal lah a, ka insangmar nghal teuh bawk.Hahdam turin ka infuih mawlh mawlh bawk.Awmzia a nei lem hlei lo a.

“Zorin, i nupui ka lo inhmelhriat tir mek a...” amah bawkin a ti a, a hawina lam muangchangin ka hawi ta nge nge,Zorina hmel rum ul chu ka en a, Moses-a  ka en leh a,ahmelah chuan pawitihna niawm tak a lang thung,Noel-i lam ka hawi lo law law, min hmuhsitna ka tuar theih ka ring lo.Mawl lutuka ka chet loh nan ka tawngtai ru mawlh mawlh a, mahse,ka tawngtai ti ila mumal nei pawn ka chham lawi lo.

“A that chu,enge hetah i rawn tih a?” nelawm na tel miah lo hian a ti hmuk a, a zin lo a, hetah ka hmu ta hi mak a ti anih pawhin makti hmel a pu eih lo,keipawn mak ti hmel ka pu bikin ka ring lo,min thawng a ka na bawk tih pawh tihlan ka tum chuang hek lo,a rawn kal hnaia.Ka lo ip chawih thung.

“Ka nu nen hian thil pawimawh kan sawi lawka,hei kan haw dawn chiah e’ ka beisei loh tawpin ka aw a dam raih bawk, a mithmul a ti sang awka, a hmui a pet sawi zauh bawk.

“Anih chu,Joe,i tha maw?” a ti leh nghut a, Joe-an a tha tih a sawia, ka hresual nge ka hre lo, a aw a khurin ka hria.

“I lo haw hma thei dawn em?” dam thlapin ka ti leh a, eng lemchanna nge ka tan tak kei pawn ka hrethiam lo.

“Ka lo tum ang,Driver i hruai em?” min ngaihtuah tak tak te pawh a ang e, mahse, helai hmunah hian a lo awmreng tih ka hrechhuaka, nakina kan boruak rih dan tur pawh ka ngaihtuah lawk thiam lo zawk.

“Aih, Joe-a nen kan kal a,ka nu hi chu amah a in ngaihtuah thei a” ka ti leh a, a bu nghut a,Moses-a a en a,’kan kal mai dawn mi?” a ti a, tawngka a chhang loin a bu ringawt, min rawn melh zawka, harsa tih hmel fe hian a then lui hram bawk.

In kan thlen hmain vawikhatmah ka tawng ta lo,sawi tur ka hre lo hrim hrim, ka rilru a na em pawh ka hre leh tawh lo, ka ruak vel vek,Joe-a tawng siam siam chu enge a sawi pawh hre loin ka ngaithla liam mai mai a ni ber.Kan Inah min daha, lo luh erawh a tum tawh lo, Inneihna lamah kal leh angai tih a sawia, nimin khan hall cheiin a buai hle tak e.

“I tha tak tak em?” kal mai loin a ti leh rih.

“Lutuk..” ka nui a.

“Ka awih lo e a, i daw peih lutuk” bak fe hian a ti hlak a.

“Tak takin khatiangah khan ka that theih i ring tak tak zawk em?”

“Ka rin loh avangin ka zawt che alawm le”

“Min zawt lo la a lawmawm zawk, dawta ka chhan che angai tlata, kal tawh rawh, i tlai ang” ka ti a,Kan nula pakhatin verandaah Zohlima a awi lauh lauh chu ka va en a.

“Dawt min hrilh kher a tul hleinem, mahse, engtin nge i tih ang?” a ti leh hram.

“Ka la hre bik lo, tunah chuan inngaihtuah fim ka mamawh hmasa phawt” ka ti ta nge nge.

“Ka hrethiam che,engpawh nise thil atthlak ti suh ang che, i pasal hian a hmangaih che ka tih kha..” a a emaw tiin ka melh reng ringawt, khatiang a ka pasalin min bum lai hmu tura min hruai chung khan min Hmangaih tih a la sawi anih chu mawle!!

“I a chu a ni si lo maw?” A kut a elh ri khauh a.

“A lo e, i Pasal hian a Hmangaih che tih ka hriat tlat avangin he thu thang pawh hi ka hriattirh atangin ka hrilh lo zawk che,chuti ni lo se ka hriattirh khan ka hrilh tawh ang che” a ti leh a, engmah ka hrethiam teh nuaih lo e.

“Aaa, enge i hriat pawh ka hre nek lo, hriat pawh ka duh chuang lo, kal phawt rawh, in ngaihtuah fim ka mamawh lutuk”

“Vawiin kha chu vawiin a ni a, a zin niawm takin a rin tir che a, mahse, a zin lo a, i phone a pick lo a, a phone nise Noel-i zawkin a keng tih i hmu bawk,kha chu engpawh nise ka hriat hi chu Noel-i nen hian an sawi anga inkawp leh anni lo” thu tak zet hian a ti leh a,sawi ve tur ka hre hlawl lo.Ka lamah a tang dawn maw ka tih laiin Zorina lamah a tang ta tlat chu anih hi a.

“Tu lamah nge i tan? Ka best nge i nih Zorina best zawk?” ka ti ta thlawt.

“Ka ni ve ve, mahse, tu nge kei hian ka tan zawk ang tih chu hrilh ngai loin i hria alawm, ka duh ber chu in nupa kar a khi awm tur ven him a i hlimna tur zawn hi a nimai,chubakah i nu hi nu angin en leh tawh la ka duh bawk” a ti leh duah.Engemaw a hriat hrep ni?

“Kal rawh, i tlai ang,zanah ka lo be dawn che nia’ ka ti ta ngawt.

“Ok, nia, min lo be dawn nia, i tan ka awmreng ka tih kha” a ti leh a, a scooty a start a, a tlan liam thlengin ka thlir a, ka tan a hlutzia ka ngaihtuah a, hetiang thian tha lutuk neih hi ka phu reng em ka hre lo.

Naute ka laksak a, a khumah ka mut a, khumah a vang zawngin ka mu ve a, chunglam ka melh reng bawk.Ka rilru a ruak vek,engmah ka ngaihtuah miah lo ti ila ka ngaihtuah thei lo zawk,kum khat lek kan la innei a, hetiang engtin nge a thlen ngawt theih? Noel-i khan ngatinge a phone a ken? Zawhna a rawn lut tan a, mahse, zawhna lo lut apiang chhanna ka nei lo miau a, ka buai zual sauh zel zawk.Joe-a lah khan Zorina a tan hlur mai bawka, engkim min hmuh tir lawi bawk si..

Room kawngkhar inhawng thawm ka hriat rualin ka mit ka chhing nghal hmak,kik lo a lo lut tur chu tunge anih en ka ngai lo.Ka mut rei leh rei loh ka hre hek lo,mahse, tunah mai a lo haw ka beisei lo chiang,Thawk pawh ka thaw tha ngam lo,enge lo thleng tur hmachhawn dan tur ka hre tlat lo.

Room chhungah a rawn lut a, khum lam a rawn pana, ka bulah a ke pen a tawp chat bawk,ka insehruh nasa lutuk a ka taksa a kham nghal ut ut bawk.A kalsawn ta nge nge,Zohlima khum lam a pan niin ka hria, ka la che ngam chuang lo cheu.Thawm dim zetin a tei kuala, rei vak lo hnuah Bathroom kawngkhar a hawng ri ka hre zui leh a, ka thaw huai mai.

Ka mengchhuak nghala,mahse, khum bul Sofa ah thu chungin min lo en reng tih ka hmuh rualin ka rak chhuak thawt mai,Bathroomah khan a lut thawm ka hre ngeia, a lo let leh lai ka hre lo,let leh tur pawn a rei lo lulai lutuk.

“Engchen nge i muthilh der ang ka lo ti a?” dam thlup hian a ti sup a,tih elna lam engmah a lang lo.

“Ka muhil der lo..” a nui hawk ri ka hre zui zat bawk.

“Anih chuan ka inbual dawn emaw i tih veleh i harh ta thut tihna mi?” ring vak lo hian a nui leh a.Sawi mai tur ka hre lo.

“Pasal te lo haw lawmnan chuan lo muthilh der kha a hlimawm dangdai ve riau ania” amah bawkin a ti leh a, ka sa zak mai.

“I zin amaw?”

“Aih,vawiinah i hmuh reng kha...”

“Mi tenawm..” ka mutna bula AC remote a thlawk phei nghal fua bawk.Mahse, a lo thle zauha, bang a va fuh a, a phel nghal phawk bawk.

“I duh duh in min ko thei ang” rawn thawh pahin a ti a, a aw ri ah thinrimna lam emaw a la lang chuang lo cheu.

“Ka ko che a ni lo, mahse, ka ten che..min sik pawh i tum anih vaih chuan...?’

‘Enge i tih ang?” ka sawi zawh hmain a ti sup a, chhan mai na tur ka hre lo.

“I duh duhin min puh la, engpawh ka pawm vek,mahse, kut min thlak suh ang che, Hmeichhe kutthlak hi ka duh zawng a ni hauh lo nangin ka duh loh dan a che turin min nawr palh ange” min rawn en pahin a ti hmuk a, a hma ang lo tak in a aw ah thinrimna niawm tak a hriattheih ta bawk.

“Ngatinge hetianga dawt min hrilh a?”

“A tul a,bakah i hrechhuak vat tho ang tih ka hria’

“Inthiam lohna engmah i nei miah na nge??” mak tihna ka awah a lang thei.

“Sawifiah leh tur in thil ka ti ngai lo,ka tih chhan ka chiang tawk thin.” Mahni inringtawk zet hian a ti hmuk a.

“Chuti chu engatinge min neih? Dawt min hrilh a, min bum kuala, natna leh zahna min siam turin maw?” a mitah tak ka melh lui ngar bawk.

“Hei vang hian..” Zohlima lamah a thle buka, ka na nghal vawng vawng thung.

“Naute vang maw?!? Ka awah mak tihna leh awih lohna a lang chiang viau, Nia, mak ka ti ang chu, kan rai hma khan min neih a duh tih a sawi miaua,chu pawh vawikhat mai a ni hek lo.

“Chhan dang enge awm tura i lo beisei a?” tih elna ri a hriattheih ta.

“Zorin...ngatinge?”

“Enge, sawi sual ka nei nge?” a dar a ti chhing uk bawk.

“Ngatinge tihian i awm a? min Hmangaih i tih kha..”

“Oh, Hmangaih tehreng mai, ka nupui pawh i ni bawk alawm, mahse,...i hmaah pawh hmeichhe dang ka nunah a lo lut tawha..” Dressing table nghengin a ding a, a kekawr ipte a zen tut bawk.

“I danglam thut hi ka hrethiam lo ania”

“Ka danglam thut hleinem,kum chanve hma lamah khan ka danglam tawh zawk alawm,i hre lo mai zawk” a ti leh a, a hmel thutak run maiah chuan a ngaihtuahna awm engmah a hriattheih loh.Ka mit ka chhing ta ngawt, ka mumang anih leh nih loh hriat ka duh, nihnih khat lekah hian hetiang em em hian thil a inthlak ta vek hi ka la awih thei lo,thawnthu leh mumang lamah te chuan a lo awm mahna le.Mahse, Mumang a ni lo a, thawnthu a ni hek lo.

“I sawi tum ka hria,i sawi hmain ka chhang ang che Insawifiahna lamah i ngai duh anih chuan i ngai thei ang,ka zin hauh lo,vawiin khan i nu leh kha tuai khan min phawk turin Hotelah khan an rawn hruai dawn che tih ka hre lawk vek a, min rawn call pawh khan ka pick ta lo anih kha, khatah pawh khan kan hnung lam Lobbyah khan in awm tih Moses-a khan min hrilh a, kei chauh ni lo Noel-i pawh khan a hria,shhh..lo ngawi la,ka sawi zo phawt ang,ka Hmangaih lo che emaw ka duh lo che tih lam sawi ka tum lo,mahse, fa ka duh tih erawh ka sawi thung ang, Noel-i nen hian fa kan nei thei lo a, kan inthen hnuah pawh kan inzawmna danglam bik hi kan chhu chat hek lo.Engtikah emaw chuan i la hrechhuak leh ngei ang tih kan hre ve ve bawk,engpawh nise i duh chuan min then thei a, i duh chuan  i la awm thei,mahse,ka nupui leh ka fa min hrinsaktu i nih angin ka thil neih chanve hi i ta a ni ang”

Ka melh ngawt ngawt ringawt, a sawi zawng zawng kha engkim hre sa vek leh ruahman lawkna felfai tak an neih hnu a sawi a ni tih hriat lutukin a sawi mar vek,Hmeichhe fing uchuak ka ni lo, mahse, ka mawl hran lo a, keimah leh keimah ka in enkawl thei thin bawk,pasal atan kum khat ka lo nei tawha, kan inneih hmain kum khat dawn On/off in kan kal bawk,mahse, engtin nge he thil inthup hi ka lo hmuh hmaih theih?!

“Engpawh sawi rawh, ahmain ka bulah Sumdawnna vanga inzawm inni a, thik chi a ni lo tih i sawi kha?” induhtawkna lam a lang rih lo.

“Um, ka sawi ngei e,mahse, han ngaihtuah la, khatiang khan sawi lo ila fa min neih pui angem?” a tawng danah mahni inrawngtawk hluah hluah hmel a pu a, kei erawh tha leh chuang tur awm lo khawpin ka kehchhe mek thung.

“Aih, ka then ngawt dawn lo che, i thiltih hian chhan a nei tur a ni,chu chu ka hriat phawt angai”

“Nia, chhan a nei, dik tak chuan Nupui neia inbah hnawk hi ka peih zawng a lo ni lo tawp tih ka hre chiang tawh a, chumai bakah i nu in ka nu laka a tih rulh let nan che ka hmang bawk” ka hmui ka hup chawt ringawt.

“Kha kha...ih..eng lo..” sawi pawh ka sawi hleithei lo, amah ngei hian an Inngaizawng lo tih a sawi vek.Ngatinge tunah a sawi leh si?

“Ka lo sawi tawh kha i ngaihtuah tiraw? I tan chuan nu ni loin i Bialpa chhuhsaktu che a ni a,ka tan chuan ka nu rilru natna thlen tu Hmeichhe tenawm tak a ni thung,Phuba ka lak letna tha ber chu a fa nu neiha, mualpho taka then leh hi animai’ a ti leh nghut a, a bawp sei thlurh chuan chak zetin a vei kual sek bawk.Rapthlak ti lutuk hian ka en a, Mihring pawh ni loin Ramhuai niberin ka hre zawk.

“Mi tenawm, mi sual....” ka tum loh tawpin ka mittui a rawn hnama, thinrim zetin ka hru tawk bawk.Ka bialpa min chhuhsaktu hmeichhia pawh nise ka nu a ni tlat,ka lo haw rei lutuk kha keimah leh keimah ka lo inti zahawm lo mai mai zawk.

“Nia, ka suala ka tenawm bawk,tunah chuan duhtawk rih ang,kan fapa hian a nu leh pa inhau buai thawm hi a lo hrethiam hlauh palh ang,chuan,ka chhuak dawna, inthen i inpeih hunah min lo call mai dawn nia” a ti leh a, min rawn en a, che miah lo in ka thu mar at thung.

Zohlima khum lam a pana, a kun a a zuk fawpa, a en deuh vang vang bawk,min en loin a chhuaka, kawngka dimtein a rawn nem khar a, a pen ri zawi tial tial chu ka ngaithla kar a, a reh chiah tihin ka bawk thlawpa, lukhamah ka hmai ka phuma ka tap khur nghal dar dar mai.

Karkhat lai a lo haw ta lo, engtia awm tur nge ka la ngaihtuah fel thei ta lo fo, chhuahsan vang vang ka duh em em laiin kan inneih thutiam ka hrechhuak ziah a, ka kal thei thin lo,mahse,Nupa kar kehchhia, chhawm nun hram hram tuma ka beihna kara ka fapa hi thanlen tir ka duh hauh lo thung.

“Hello..” Zomuani min rawn call ka pick rualin ka ti nghal a, kan boruak hi a hre miah lo nge engmah min la zawt ngai lo.

“Nanun,khawnge i awm?” a awah hlauhthawnna a lang chiang viau.

‘Inah, Nau bual ka lo tum mek a, enge ni ta?”

“Tunah lo kal nghal rawh, Jordana Hotelah...”

“Ngatinge?’

“I pasal hi...”

“Maw?!” ka tum aiin ka au ring hret.

“Nkhaw hreloin a tlu a, tunah Doctor in a en mek, an la phur che ngam lo..” ka phone ka thlauh tawp.