STOP- 1

STOP - 1

Chapter-1

Ka u thu tuam buau mai chu ka en a, mak takin ka nuih a ti za tlat, nuih erawh ka nui chhuak em lo.Ka u mahnise kei aiin a upatna a tam a, a kum 10 na ka tawm ve chauh, chuvangin ka tan chuan u anih mai bakah Nu a ni tel bawk.Kum nga ka tlin hma hretin ka Nu a borala,ka pi leh pu an la dam thung,mahse kum 10 ka tlin hmain ka Pi a boral ve leha,Ka pu erawh ka tlangval chhuah hnuah a Boral ve thung.Tunah chuan Ka pa leh kei kan ni maia, ka u Pasal nei tawh, fa pawh pathum lai nei tawh lo tlan tum mek hi chhungkuaah ka lo chhiar leh dawn anih chuan pathum kan ni ang chu.

Ka pu hi Mizo pa lar leh mi te ngainat em em,Dikna tan mi anih avanga lar a ni a,ka pi erawh mi zinga inlar nuam ti lo,nu nun tlawm tak a ni thung,mahse, ka Pu zahawmna vawnghimtura pawimawh ber chu amah kha a ni tih ka hrechiang em em.Thlahtu in a zir bawka  Ka pa pawh mi hriat laih a ni veleh ta tho, ka nu kha ka hrechiang hman lo a, mahse, nu hmeltha tak leh pian nalh tak a ni tih a thlalak atangin ka hrethei tho a, tin,chhungkaw hung tak te fanu neihchhun a ni bawk a,ka u hian a chhun tih an sawi fo bawk,kei erawh ka hmeltha ve lo a, ka ngo ve vak lo.Mahse, thlahtu te chhun tur ka nei tha bawka, Mizoah chuan a lian pawl ka ni ve a, tin, ka pian hi a nalh hle tih ka hria a,chhuan pawh ka chhuang ru ve titih.Bialnu nghet taka kawp chawt hi ka nei khat hle nangin tuna mi hi chu kum chanve lai ka nihpui ve tawha,Biakin a inneih inkhawm buatsaih leh Zungbun pek tih loh chu nupa tihtur kan ti kim vek hial ang.Ka hmuhsit phah lem lo a, ka ngaihsan phah bawk hek lo.

“Mam,ka sawi i ngaithla miah lo ania” titau aw hian ka u in a ti hmaka, ka nui ringawt, a sawi dik.Amah ka en reng chungin a sawi engmah ka hre lo.

“Sorry, nizan kan tlaivar a ka mut a chhuak alawm”

“Saw hmeichhe nasa lutuk saw va tehchhuak la ka duh” a ti leh hmaka, a mitmeng a lian bawk nen a meng ling hlar mai.

“Ouch, va biak khan i zahawmna i chan thei tih i hria em?” ka ti sup a, ka ngaihdan chuan kan natna min thlen saktu hi biak tlawn emaw lam hi ka tum ngai lo.Vau lek phei chu a teuh lo lehzual,hna lamah pawh ka kawng dal tum tu te tumah ka vau ngai lo a, ngawirengin ka ti chhe vek zel zawk.

“I biak loh pawn ka pasal laka ka zahawmna ka hloh fel daih tawh tho”

“Anih chuan ngatinge nangmah ngeiin i biak mai loh ang?” ka ti leh hmuk a, ka nelawm lo leh ka tawngkam chhuak bung lutuk hi sim ka duh thin,mahse, ka pianpui,min thlahtu te atanga ka chhawm a ni a, ka sim ngawt thei lo.

“Aih, be dawn lo bur..” a lu a thing nawk nawk bawk.

“A tha e, i pasal ka lo be zawk dawn nia”

“Enge ani biak a tulna? a mihur khawi saw bia la,va thehchhuak la a tawk” a ti leh hlawk hlawka, a sawi hmeichhia hi ka hmu tawh ngei ang,an dawrah vawi duai lo ka kal tawh tlat, mahse,hmeichhia ka mit la chi a ni lo a ni ang.A hmelawm dan tur ka ngaihtuah chhuak zo lo.Chumai bakah ka u te hnathawk anih tlat avangin ka melh liam hlawm vel mai mai ve bawka,ka hmuhsit vang niloin  Hmeichhia angin ka en lo ang tih keimah ngei hian ka inhrechiang zawk.

“In dawr a nia, ka dawr a ni lo ania, chubakah i pasal hi i then hlen dawn anih loh chuan tiang hian awm lo la ka duh..” ka ti leh hluka, na zet hian min melha, ka a emaw a ti niberin ka hria.

“Ka pa, he pa hian enge a hriat a?” mangang bawk, thinrim bawk tih a aw ah a hriattheih.

“I nau khan a sawi dik, i nu nen kan inhau ve fo mai, vawikhatmah an In lamah thinrimin a kal ngai lo..Makima chu keiman ka lo bia ang..” Kapa in dam deuh in a rawn ti ve a.Ka u ner nawk chu ka hmuh hmaih lo, Hmeichhe lu zo veh vawh, mahni ke a ding thei, nalh leh thuduh em em a ni tlata,a dik lohna sawi kha a paidam dawn lo.Mahse, ani ai hian kei hi ka nasa zawka, sawisel ka duh hek lo.

“Ani biak a tul lo, nizanah kan sawi dun tawha, engmah a awm lo a ti tlata, mahse, kan nula ten an hmu veka...” a ban a vai..

“Eng chu maw an hmuh?” ka aw ki a sang lam hret.

“Dawr a Balcony ah khan an kut an lo insuih saka,kuah em chu an inkuah lo, chu pawh vawikhat mai an hmu lo, vawihnih emaw vawithum..a aia tam pawh a ni maithei, ka bulah chuan vawihnih an hmu tih an sawia, ka hriat an lo hlau ve anih hmel” a ti leh a.Tlem chuan ka ngaihdan a dang ta.

“Chu chu i sawi chhuak em?”

“Aw, mahse, a pha tlata, Balcony a CCTV a lo chhe kher bawk si..ka tuar theih chin a pel alawm, kei pawn ka hriat chuan miin an hre fur tawh ang” a ti leh hlawk hlawka, ka rilru a dang ta viau, Makima hi a hma pawn Hmeichhia vang bawkin a hmingchhe tawha, ka u hian chumi tum chuan a zepa, kan hre lo emaw a ti a, kan lo hria tih a hriat hnuah Ka pa bulah ngaihdam a dil a, engmah tiang a thleng tawh lo ang tiin a intiam thlap bawk.Mahse,tunah kum 50 a tling dawn tawh, a lo ti leh ta mai anih ka ring ta..Lerh hi sim ngawt a harsat zia ka hre ve miau a.

“A thawk rei tawh em?”

“Aih, thla hnih vel..” anih chuan ka kal lohna thlahnih a tling tawh maithei.

“U Makima chu ka lo bia anga, in nula pawh chu ka lo hmu dawnnia, mahse, lo va haw phawt rawh” a mitah tak ka en a, rilru buai niawm tak hian a hmel a danglam zauha,mahse, a rei lo.A bu ta nge nge.

Tunah kum 32 na ka hmang meka,ka pa in amaha sumdawnna a lo kalpui tawh, Dawr,Insakna Bungraw zawrhna lian tak pahnih  leh Motor lian siamtu Company lar tak pakhat nen thawh hona kan siam te nen pathum enkawl lai ka neia, mahse,Kan Hardware dawr hi chu ka pa hian Pakhat a thutchilh chawta, pakhat zawk erawh ka Pa nau fapa,kei aia kum khat chauha naupang zawkin a enkawl ve thunga,kei hi chuan Motor Zawrhchhuahna bak hi ka ngaihtuah hman meuh lo a, Office ka neih nghal avangin ka thutchilh tam ber bawk.Lehkha ka zir lai atangin kan eizawnna, Sumdawnna ngelnghet sa la enkawltu tur ka nih thu bak hrilh ka ni ngai lo a,Sawrkawr hna lam engmah ka ngaihven eih lo.

Ka u In pasal,kan chhungkaw milpui a neia, anni pawh sumdawng chhungkua tho anni ve bawka,tuna a rawn sawi, a pasal hmeichhe kawp lai atih pawh kha an Dawra Account lam khawih tura an lak a lo ni a,Hmeichhe ngeng leh induhtawk zet anih thu a sawi uar viau bawk.

A hreh chung chung ka pain a tir haw luia, engtiklai mahin ka pa hian Nupa inthenna hi a pawm tak tak ngai hek lo,chuti chung chuan Hmeichhe hrang hrang ka kawp kuala,Party hi ka nunah a bet tlat bawk,chhunlamah ka hna bak engmah intihbuai tir ka tum ngai lo a, khawi maw laia Inkhel leh hlimhlawp lam hi chu chhun lam anih chuan ka ngaihven  ngai eih lo,mahse, zan lamah chuan chhuah loh zan ka nei khat viau,Hmeichhia lah hi an lo mak khawpa, duh phawt chuan zan khat lek atana min hnial reng reng lo hi an lo tam viau, chu pawh engmah hlawkna tel lo,an hlawkna ber chu nuam an tihna kha a nimai bawk,ka tan Hmeichhia hi vang ngai lo mahse Sex hi ka hmang duhdah tehchiam lo.Ka kawp lai te erawh a rei emaw rei lo emaw himin ka chhuah ngai miah lo thung.

Tlaiah Makima ka va calla,Dintluanga te Hotelah inhmuh mai a rawn rawta, ani pawn ka sawi tum a man nghal anih hmel e.Sunday anih avangin mut mai mai ka chak tehreng nen,ka u tan a ni miaua, ka ti ang ka tih tawh thulh leh hni hne chi ka ni hek lo.

“Mama..” Phone ka pick rualin a rawn ti a, kan inbiak zawh veleh ka inbuala, ka inbual rei lo, mahse, ka chhuah leh chuan vawi li lai min lo call a tumna a lo awm hman.

“Um..”

“Tlai kha Cancel leh mai zawk teh ang..” ka rum hawk mai.

“Eng vangin maw?” ka aw a chang lam hret, ka u pasal hian a nau ang tak takin min en a, min duat bawk a, hlauh pawh ka hlau lem lo,mahse, ka u pasal anihna mai bakah ka aia upa anih avangin ka zah lo thei lo thung.

“Thil hmanhmawhthlak a awm leh thuta,naktukah kan inhmu mai dawn mi?” hah hmel deuh hian a thaw deuh huam huam bawk.

“I hman si loh chuan tihngaihna a awm lo anih chu.Dintluanga hnenah khan Room ka lo book vek a..Ook, ka lo cancel mai dawn nia” ka lungawi vak lo tih ka thup lui hram hram.

“Nia, naktukah nimai rawhse..nih phawt” hmanmawh zet hian a rawn ti leh a, engthil hmanhmawhthlak nge lo thleng thut ka hre lo,ngaihdan pawh ka siam thiam lo.

Mut hahdam vang vang ka chak laiin tih tur ka neia, tunah chuan thildang tih ka lo tum leh hman avangin mut chakna pawh ka nei leh tawh chuang lo,Remkimi bulah lah tihtur ka lo sawi hman avangin ani pawh a thiante nen an chhuak daih tawh ang.A pawi lo,ka chhuah loh ni a nimai ang chu.

Ka kawr hak tur ka en laiin ka phone a rawn ri leh a, ka u anih beisei chungin ka ena, mahse, ka best,Anggu-a a lo ni a, amah hi THE DOON SCHOOL, Dehradunah kan kal dun lai atanga inkawm kan ni a, Mizo pahnih chauh kan nih vang nge ka hre lo, keiin Unaupa ka nei lo a, Ani lah fapa mal ve bawk a lo ni a, Ka cousin te aiin ka unau tak tak en in ka en zawk.A hming hi ka phuahsak a ni a, a mizo hming hian koh a hlawh ta meuh lo, kei pawh hi a tam zawkin “Mal-a” ti a min koh laiin ani hi chuan ‘Jamie’ tiin min ko ve bawk.Ka thian hnamdang te pawn min ko hlawm.Ka hminga tel ve reng nimahse ka duh lem vak lo.

“J...khawnge i awm?” nidang ang bawkin a thawveng hah mai.

“Inah..”

“Ehe! Remi i bum tihna mi?” a nui kur kur bawk.

“Aih, bum na tur a awm hleinem”

“Aaaahhh,kan inbe zo chiah, tlaiah tihtur i nei a ti a” a rawn ti leh a.

“Ka nei a, ka cancel leh tawh”

“Wow, a va pui ve, anih chuan zaninah kal na tur ka hria ania”

“Khawiah maw?” ka ti hmuka, a chhan ka hriat chiah si lohin ka mood a fuh lo.

“Rinky te inah mawle,Party satliah,phuahchawp anih chu..”

“Zanin chu ka pha mai zawk ang” ka ti a, kal chakna ka nei lo.

“Aih, a theih loh,Rinky hnenah i kal ang tih ka tiam vek tawh” a rawn ti leh a, Rinky-i hi Nepali a ni a, mahse, Mizorama piang leh seilian a ni thung,kei,Mizo diktak ai hian kan tawng a thiam zawk hial ang tihturin kan hnam zia leh kan nih dan a chianga, amah hi Model niin a thlengsang thawkhat viau bawk.Min ngaizawng chu ka ti lo, mahse, ka duh chuan engmah harsatna ka nei lo tih erawh a awmdanah hai theih a ni lo.

“Min hrilh hmasa loin i lo yes ngawt a?” ka awah ka lungawi vak lo tih a lang thei.

“Hey,,,ngatinge a?” tlemin a muk ta deuh.

“Eng ni lo e, Rinky hi Remkimi duh zawng a ni lo tih i hriat kha..A duh loh tih talh hi ka tum lem lo a” ka ti ta ngawt, mahse, ka sawi sual tam lo.Remkimi nen hian an in nel hle tho nangin an inmil teh vak lo tlat.

“Oh, nidawn tak, anyway..amah pawh kal tel ve mai se..” a la rawn ti ta fo,eng chu a hria nimaw?

“Ka lo be dawn nia, dar engzatah nge?”

“Dar 8 ania, Dinner a awm nghal ang aw” a rawn ti leh a, a awah phurna a lang theia, Party hi kan nuna bet tlat nimahse zanin party tur a phur ang hian a phur surh ka la hre ngai lo.A demawm loh, Rinky thian te an tel ve lo thei lo a, ani ang Tlangval harhvang tak.Tumah kawp ngheh nei lo tan chuan thil hrehawm a ni tlat lo alawm le.

Ka Phone riin min tiharha, peih lo zetin ka bana,’Hello..” ka awah ka mut a la chhuak tih a hriattheih.

“Mam,i be ta em?” ka u a lo ni a, ka inleta,a pasal kalna chin pawh a hre lo hi tu thiam loh zawk nge tih ka rilruah a lo lang zawk bawk.

“Aih, be lo..”

“Eh,nangmah hmu turin a kal dawn a ti sia”mak tihna a awah a langa.

“Nia, keimah zawk thil pawimawh tihtur ka nei a..Engpawhnise naktukah In dawrah ka lo kal dawn nia,mahse, lo awm ve lo la ka duh ang” ka mit ka nuaia.Ka room Ceiling chei dan mumal leh nalh zet chu ka melh chho vang vang bawk.

“Ngatinge?”

“In hnuaia thawk hnenah i zahawmna hralh ka duh lo ka tih kha..”

‘Um, ka hrethiam..mahse, Makima chu tunah pawh a lo la haw si lo a..” ka phone sana ka en a.Dar 7 a pel tep.

“Call la, a chin chu i hriat a tha alawm..”

“A pick lo a,ee..hei a lo call chiah” a ti leh a, ka Off a, tunah dar 7 a pel titih tawha, chuti anih chuan dar 8 ah Rinky te Inah ka kal dawn anih chuan insiam a, chhuah a hun tawh,Kan veng leh an veng a inhlat thawkhat tlat.Remkimi ka call a, a pick lo..Ka ti nawn ta lo.Engkim kan ti vek a, mahse, Kristian ram kan nih angin inkhawm te pawh a thlahthlam ngawt bik lo.Kei erawh chuan ka ngaihven lo..

Party na tur ka thlenin dar 8 a pel hle tawh.Ka Speed hi a hniam lem lo hle nangin kawng lakah Truck full load a lo chhiaa,Jam a lo siam nasa a, ka tlai phah ta nge nge, chuti ni lo se chuan Darkar chanve vel bak ka tlan lo tawp ang tih ka chiang.

“Hey,J...”Anggu-an min rawn kuah a,Beer min rawn pe nghal zat bawk, ka hawi kuala, kan tam vak dawn lo a ang,Light pawh engmah down a la awm lo a, a lo awmsa ho pawh han rui chhe hmel tumah an la awm hek lo.

“I lo thlen chuan kan ei mai dawn mi?” Rinky-in min rawn pan hnaih pahin a rawn ti a.A nui var var bawk.A te chhe zawk zawk lo bawka ka beng a thleng thuak mai.

“Ehe,min lo nghak tihna law?”

“Um,a pawi lo..engtin nge niang?” nui sang hian min en a.

“Ei ila..a pawi miah lo..” ka ti a, a chhungte tumah ka hmu lo,An inah hian ka kal zauh zauh tawh a, a chhungte nen pawh kan in hre ve tawh viau bawk.

Ka mengchhuaka,ka lu na vangin ka mit ka chhing leh vat bawk, nizan kha..Ka ngaihtuah leta, chaw kan eikham hnu khan kan in leh nuala, Rinky ka bulah a awm chawt bawk,ka inkhalh haw lai pawh ka hre mumal lo..Rinky beisei ka hria, mahse, Rinawm tum lam niloin khawih chakna ka nei lo, ka hmeichhe it zawng a ni lo ti ila a dik ang, Hmeichhe lian lutuk hian ka mit an la ngai lo ve hrim hrim bawk.Ka rinlawk ang ngeiin Anggu-a ka hmu zui lo..Rinky thiannu,la naupan hmel ve deuh,Model tuai thar kha a kuah uluk em maia, rei tak Living roomah a thutpui ka ring lo sa ve tawp kha ania, ka ringsual lo tawp bawk.

Tuilum sa ver vawrin ka inbuala, ka taksa chau leh lu na bur a ziawm nghal huai huai mai,Pain clear sang vak lo pakhat ei ila a zia leh mai ang tih ka hai lo,Zu in hi nuam ka ti em ka hre lo a, mahse, hrehawm ka ti chuang lo.Ka in zen zen lo nangin ka in ve vek vek chuan ka in hnem thei viau lawi.Mahse, zing lam lu na hi ngaiah ka nei thei thak lo thung.

Hna lamah buaina em em neiloin nitin hna pangngai ka thawka, Lunch erawh mi hmuh tur ka neih avangin ka officeah ei loin ka u te dawr ka pan ta zawk.Ka Phone a rawn ri a, ka en a, Remkimi..Ka pick dawn lo tih ka chiang, nizan khan Rinky te in ka kal avangin a thinrim ta ngei,mahse, ka kal dawnah hrilh turin ka call a, a pick lo a, msg ka dah thlap, a rawn call lai ka hriat loh avangin ka call back a, a pick lo ,vawi hnih ngawt.Hmeichhe titau thlem hi ka thiam zawng a ni lo a, ka ti ngai hek lo.A tawpa, a rawn ti nawn leh a, ka reject ta nge nge.Ka thinrim vang niloin a awmdan ka duh loh vang zawkin ka pick lo,ka ngaihdan chuan kan thinrim anih pawn sawi dun ila, mahse, sawi dunna awm si lo a call pick loh te, tihtauh ngawt mai te hi ka ngaihdan a ni ngai lo.Bakah hmeichhia hi ka tan an tam thawkhat..Tumah ka duh loh dan anga min kai kual tur Hmeichhia  ka duh hek lo.

Nidang ang bawkin an lo buai leh viau mai,an dawr a liana, an thil zawrh lah a te tham te te atanga Inchhung bungrua thlengin a nih avangin an buai dan hi a na bik in ka hre thin.Uniform an nei vek a, mahse, hmeichhe pali lai zingah chuan tu ber nge ka hmuh tur ka hre mai lo.

“Lo leng rawh,Oh..nang i ni maw? I tha em?” Hmeichhe aw hian a rawn ti a.Ka hawi let a, Uniform ha ve lo hmeichhe pakhat hi ka hnungah a lo ding a,ka hmuhawm ka la hre lo, uluk fe hian ka thlek a,ani chuan min hre lawi si,ka hrechhuak zo chuang lo.

 Kamiz hring dal,hmun nuam zet a ha a,a hnute kawh lah erawh a khuh bo zo chuang lo anih hmel,a tlang a kekawr kawngah a bilh luta, kawnghren sin te a dum a hreng a, kekawr arh lam lek lek a hak chuan a kerek a thleng thla lo thung.A nui senga, a hmui sir tawn tawn a khuar  kek bawk.Biangsum a ni chiah bawk si lo a, enge a hmingah phuah tur ka hre lo.Mak takin a dress langthei chin reilote chhungin ka hmu kim vek hman.Hetiang tak hian hmeichhia ka la en uluk ngai lo.A kut lam ka en zauha, Tarmit nghet hmel zetin a hum ta mai.

“Aw,keimah..” awmze nei lo zet hian ka ti a ka aw a bul lam lek lek bawk.

“Lo thu la, thil mamawh i nei zawk nge?” a ti leh a, a dinna piaha chair awl awm chu a kawk zauh bawk.

“Aih, hmuh tur ka nei a, tu ber hi nge Ruby le?” ka ti a, a mengphar deuh awk chu ka hmuh hmaih hauh lo.

“Keimah hi ka nia” a khuh khauh bawk.

“Ok, a that chu..Hun i neih chuan Balcony lamah khuan ka be lawk duh che a..” ka thle buka, a hmelah mak tihna niawm tak a lang zauha, mahse, a reh leh vat thung.

“Um..nia,kal ila..” a ti a, a tawlhsawna, ka kalna tur min kian tih a awm danah a lang thei.

Ka kal pela, a perfume rim dam raih mai chuan ka hnar a rawn verh a, amah nen a inhmeh phian,Dawra thawk ve dang ten min en hrek hrek kha ka hmuh hmaih hauh lo.”Mi-te, hei hi lo dah fel lawk mai aw, thil pawimawh tih lawk tur ka neia’ a tih ri ka hrethei a, a hna a tlin hmel viau mai.Mahse, ka tana pawimawh ber chu ka u pasal lo ngaizawng kual lo mai se tih mai hi a ni,abak chu ka buaina tur a awm miah lo.

Kakekawr ipte ka zena,ani erawh chuan min en lo in Thlanglam kawnga motor tlan zut zut lam chu hmuhnawm tih hmel zet hian a en vang vang thung.

“Min hria tih nichin khan i sawi chiang lo nangin ka lo hria a,Mala..In dawr neitu Mamawiin nau ka ni a..” min rawn en a.A bu ringawt.

“Ka sawi tur i hriatsa ka ring tho nangin ka sawi nawn leh ang..Ka u Pasal i lo kawp hi ka duh lo a, bakah hetiang thil thleng hi ka ngaizam mai mai dawn hek lo..” a mitmeng lian kel kawl chuan min en a.Ka zam ve lek lek mai.

“Khawngaihin i sawi awmzia ka hre lo a, min hriljfiah thei em?” a hmui nalh zet a pet zauh bawk.

“Ka sawi tum chu Ka u pasal nen mimal taka inzawmna inneih hi tawp turin ka duh che,a chiang em?”

“Aih, chutiang lam engmah a awm lo..” a awah zamna a lang lo a, mak ti hmel a pu hek lo.A awmdan chuan keimah min barakhaih zawk lek lek mai.

“Ok, i duh chuan i pha thei ang, engpawh nise kei chuan kan chhungkaw zahawmna hi ka ngaipawimawh ber,tunah hrechhuak duh rih lo mahla i lo ngaihtuah dawn nia,Pawisa i duh anih chuan i duh zat i sawi thei ang” ka ti leh hmuk a, mit khap loin ka mitah min en a, a kekawr ipte a zen tak daih avangin a kut a humruh leh ruh loh ka hmu thei lo.

“Ka beisei loh tawp lam anih avangin ngaihtuah dan ka thiam lo a pawi ka ti,mahse, min hrethiam la..hetiang lam hi chuan min biak tawh loh ka beisei ang” a ti sapa, a aw a ring vak lo nangin a chiang reuh viau, a biang tai sen deuh chu a sam uk eng lam,kawi deuh chuan a hual papa, a inhmeh...

“I hriat duh loh tlat chuan i thu, mahse, Hmeichhe satliah leh naran lutuk nena inzawmna neih ka duh ngai lo,chutah pawh nang ang Hmeichhia, mahni aia upa fe zawk rosum vanga nei mai duh lehnghal hi ka huat zawng tak a ni bawk”ka tawngkam hi a mawi lo tih ka hai lo, mahse, a awmdan ngeng lutuk chuan min ti thinrim miaua, keimah lam ka sawi kai ta ngawt, ka tum reng vang erawh a ni lo.

Ka tawngkam kha a na tawk hle tih ka hre reng nangin ngaipawimawh lo hmel fe hian a dar a ti chhing ak duh chauh,min ti thinrim zual sauh bawk,mak takin a hmelah nui hmel a lang lek lek bawk.Hreptak hian a..Hmeichhia, engahmah min ngai lo tu te hi ka hua, ka Naupanlai atangin tuman min hnuaichhiah hi ka ngaithei ngai lo,Ka pu nihna zahawm tak leh Ka pa hausakna avangin kei hi engtiklai pawn kan thian ho leh chhungkaw zingah a ber ka ni reng thin a.Tumah kei aia langsar an awm ka duh ngai lo.Mahse, Khawvel zawng zawng hian min hria tihna a ni chuang hauh lo thung.

“Eng inzawmna nge i sawi kha i sawi hmasak ai khan ka hrethiam chuang hauh lo nangin in  chhungkua nen inzawm tumna ka nei ngai lo” dam thlap hian a ti leh a.

“Chuti anih chuan i hna hi bansan rawh”

“Khawngaihin hna leh mimal buaina kai kawp suh” a tawngkam chhuak a dam leh thlap tho, mahse, nek luih ngawt chi anih hmel miah loh,anihna takah chuan ka sawi engmah khan a tawk che zo lo a ang.

“Ka kaikawp hauh lo” ka tum aiin ka tawngkam a chang,ka Pa leh ka Pu tawngkam bung zet hi ka chhawm roh a, ka tawngkam hi a nem ngai mang lo.Nelawm lo nih lah ka ka hlawh phah tam tawh.Chutih rual chuan ka eizawnna lamah, ka elpui te hneh nan a tangkai viau thung.

“Chuti anih chuan ka hna ka zawh hunah inbe mai ta ila, tunah chuan Customer kan nei nual a..”Dawr chhunglam enin  a hawi kuala, a hawi zawngin a sam,a dar chen lek,tlema kir lam lek lek,Dum tih dawna Dum si lo, uk eng deuh hlek chu a che tel ve a, a inhmeh takzet.Ni lo,hetiang lam ngaihtuah thei ka ni lo...he Hmeichhia hi Hmeichhe satliah a ni lo,ka u tahna thlen tu,kan chhungkaw nun ti nuam lo tu a ni tlat..Chu aia pawimawh zawk chu ka u te hnathawk mai a ni a, Hmeltha tih leh nalh tih zawng ai chuan ROBOT angin en mai a tha zawk.

Mahse, he Hmeichhia..Zahawmna humhim chhunlama hmanga ka biak mek hian mak takin min HIP  tlat,hetiang taka hmeichhia min dodal ngam hi ka la hmuh loh vang pawh a ni mahna le.