STOP-2

Chapter- 2

Jam nasa lutuk vangin reife ka tang a, kan tawlh zeuh zeuh chauh,ka hmalam ka ena, Hmeichhe pakhat in ka motor hmaah kawng a rawn kana, dak chhuak meuhin ka va en a, a rawn hawi leta, amah kha..Mahse min hmu ve lo thung, a kal zawngin a sam a phe dar dar a, Motor Light in a hmai a chhuna, a hnar tlema bawng lam lek lek leh a hmui chhah deuh lam, fawh nuam hmel zet chu a inhmeh takzet..

Vawiin khan min chhang beidawng thak,hna lamah an buai avangin an rawn ko ta bawk nen engmah thutlukna siam loin ka kalsan ta ngawt, mahse,ka kal tur erawh tha takin min thlah thlap lawi.A mithmul er nalh zetah khan a thinchhe ve thawkhatin ka ring, a hnar a te a, a bawng lek lek, mahse, a inhmeh tlat lawi.Khawi lam atanga rawn chawr chhuak nge ka hre lo,mahse, amahah khan ka la hmuh ngai loh zahawmna niawm tak ka hmu tel tlat .A incheina kha a simple hle a, mahse, kha pawh a inhmeh em em tho. kum 25 -27 inkar vel anih ka ring ve ngawt.Ka hnunga Motorin horn a rawn hmet ri a, ka nui chhuak hawk mai,eng ka ti ta nge kei hian tiang taka hmeichhe naran lutuk ka ngaihtuah zui chiam ni?!! Ka a thut pawh a nimahna le.

Kan In ka thlen meuh chuan dar 7 a ri thuak, ka pa a lo thleng fel ve deuh chiah bawka, Mipa ve ve kan nih bakah kan tawng duh lo dun bawk nen kan In hi thawm a awm ngai mang lo, Ui lian zet pakhat kan nei a, chubakah kan nula te pahnih,Tripura lam mi an awm tel bawka,kan naupan lai atanga kan awmpui thin, Nu Ruati erawh langin a lo kal ziaha, kan In atangin ka pa Driver nen an innei a, an inneih hnuah pawh langin a lo kal zawm zela,kan chhungkaw inrelbawl dan engkim a hre hneh hle a, ka pa hi pu loin a u mai bawk,a pasal hi ka pa hnenah thawk tawh loin tunah chuan an taxi a khalh ve tawh bawk.

Kan Driver pahnih an awma tel bawka, anni erawh kan inhnuai chiahah room hran ve ve neiin an mahni in an inbawl hrang a, a chang chuan kan Inah ei tum an nei bawk.Kan dawr bungraw phurh nan Motor lian ke sawmpahnih nei chi pathum kan nei a, anni erawh hi chu In lamah an rawn kal ve ngai meuh lo,abak chu Inah ka pa nen Motor hran ve ve kan kawla, Bullet ka neia, ka khalh chhuak meuh lo,tin, GYPSY hlui tawh tak, ka pu duh em em thin kan kawl tela,  a tha tawh chiam lo nangin ka pu ta anih avangin hralh kan tum lo.

“Enge vawiin lam chanchin?” Ka pa in a thil ei lai ei mawlh mawlh pahin a ti a.

“A pangngai,..ee, vawiin chu Motor a lo thleng hlawma, mahse, chawhnu lam kha Ka u te dawrah kal ka duh vangin Workshop lam ka chhuk hman ta lo” ka ti a, ka plate ka nawr sawna, mahse, ka tho lo,ka pa hian thil pawimawh sawi laia thawhsan hi a huat ber a ni miau a.

“A that chu, vawiin chu hnaah kan buai deuh,engpawh nise i u te nula chu enge a an hmela?”

“A pha...” ka ti mawl tawp.

‘Ahh, kha chu chiangsa a nia i hmuh dan mai zawk kha nia ka zawh che”

“Engmah hmuh dan ka nei lem lo, mahse, ka u hian a hresual anih rinna erawh ka nei”

“Chutak chu alawm pawimawh, anih chuan i u hnenah i sawi kher ngai loin nangman i en fiah mai a that ka ring” a ti a, a plate a nawr sawn ve a, a tho a,a kut sil tura a kal chu ka en a, kum 70 a hnaih ve tawha, mahse, a la hrisel tha a,engmah Insawiselna a la nei lo.Ka nu Boral atangin kum a liam hnem tawh, mahse, Hmeichhe lamah a mualpho awm ka hre ngai lo.Inkhawm a ngaihsak hluah lo nangin Sunday chawhma a thulh mang lo a, Sawma pakhat a ngaipawimawh em em a, kohhran leh khawtlangin mamawhna an neih phawt chuan a tlanchhe ngai lo a, kan Inah thilzuar leh kutdawh lo kal beidawnga chhuak leh an awm ngai hek lo.

Ka u ka biaa, ka hmuh thu leh ka bia tih ka hrilha, a dang engmah ka sawi lo,ka rin ang ngeiin a pha tih ka sawi rualin a rawn vin nghal thak,ka dawhthei lo ang bawkin ka Farnu pawh hi a dawhthei bik lo.A chang chuan a mizia avang hian a pasal hian a lo ning anih pawhin awm ka tih ka ring ru zauh zauh, mahse, ka farnu a ni a, engpawh tise ka tan chuan a tih apiang a dik a nimai.Ka neihchhun a ni tlat.Tuman an sawisel ka phal hek lo.

“I lo kal dawn em?” phone ka pick veleh Anggu-an a rawn ti nghal thawr, kalna tur kan nei tih ka lo hre leh tawh pek lo.

“Kal lo mai dawn mawni” ka nui a,a rawn nui ve hawk hawk bawk.A model kawp kha zankhat bak a kawp dawn hauh lo tih ka hai hek lo.

“Ka kal meka, hmanhmawh ve teh, Remi i rawn lam kual leh chhung nen..” a rawn ti leh a, a sawi dik, Remkimi hi nghah ngei ngei angai ziah.Vawiin khan dawra ka let lehin a lo awm tawha,ka lungawi vak lo tih a hriat chuan hei hi a tihdan fo a ni ve hrim hrim,mahse, call ka pick loh vanga lo kal a ni tih a sawia,ka buai vanga pick lo ka ni tih sawi ka tum zet nangin anihna tak ka sawi ta zawk kha ania.Mahse, thinrim khum reng ka tum hran lo.

“Yeap, kan tlai loh hram ka beisei ania,mahse, Heritage ami in tih tak?” ka ti leh rih.

“Aw,nang hi nimin atang khan engemaw i hriat le?” a rawn ti hlur mai.

“Ka buai tih hi hria la,Josy chuan a pasal a rawn hruai em?” ka ti leh a, Josy hi Dehradun kan awm lai atanga kan kawm ve tho a ni a, mahse, kan School kalna a hran thung, Vai hausa zet pasalah a nei a, kum 3 lai an innei tawha, mahse, fa an la nei lo ,amah hi Designer thiam leh thangduang tak a ni a, a pasal hian a thlawp tha em em bawk.

“Hruai nang, amah in,an pa kha hna lamah Hongkongah a kal a tih kha,Group kha en teh” a rawn ti leh a, vawiin hian kan thian ho Whatsapp group lam ka la lut mumal lo,bakah Phone khawih neuh neuh hi ka peih lem lo a, ka khawih ve pawn Games ka khel a ni tlangpui.

Ruah a tlak sek avangin khua a vawt deuha, T-shirt var ka haa, Leather Jacket,chhing deuh hlek ka hak hnan leha,Cotton Jeans dum ka ha bawk, ka kum 25 na pianchama ka pa min pek Rolex company kutchhuak,Sana lawk leng lawng ka buna, Sana dang pawh ka nei chungin he Sana aia duh hi ka nei lo.Aman to leh to loh lam niloin ka pa min pek anih avangin ka ngaihlu a ni zawk.

Remi ka lam kuala, ka kal chhuah dawn khan ka call lawk vek nangin ka thlen chuan a lo la inpeih ta lo fo,an inchhung luh ka chak lo viau chungin ka lut ta tho,A nu hian min ngaizawng zawk emaw tihtur khawpin min be tha hiam zela, ka tithei vak lo,A pa erawh pa tha leh kawm nuam tak a ni thung.

“Enge ka thawmhnaw hi a an awm?’ka tlanchhuah rualin a ti a, ka melh zawka, nidang ang bawkin a nalh thawkhat,inchei a thiam hle a, mi zingah pawh a langsar viau zel.

“I nalh..”

“A va tawi ve, i duh chiah lo nge?” ka malah a kut a rawn daha.

“Ni lo,i nalh ka ti lawm..adang ka sawi zawk dawn mi?” ka ti leh a, ka mal a rawn vawnna kut a ti che a.Ka thaw hawk mai.

“I sual em mai a”lungawi vak lo niawm tak hian a ti hmak a, mahse, a kut che erawh a tawp chuang lo.

“Helaiah hian chet i duh loh chuan i kut kha..” ka nui hawk bawk.

“Pawi miah lo..”

“Tak tak?” a nui a.

“Um, mahse, a tul loin ka ring”

“Nia, helai chu kan veng a la ni bawka, bakah Motora Hmangaihna chen ngawt hi a fuh lo maithei a...engpawh nise zanin chu Josy vanga kal ka ni lo ania” ka melh zawka, a mithmul lem sei er nalh zet chuan ka tum loh tawpin Ruby mithmul,a pianpui tih hriat taka a tawk chauha sei leh er nalh kha min ti hrechhuak tlat.

“Mal...ngatinge a?” ka malah a hmer deuh salh bawk.Ka lu ka thing nawk thung.

“Vawiin lam ka lo ngaihtuah a,Sorry..anih chuan Josy a thinrim dawn anih chu” ka tihzawm a.

“Ho e,amah vangin ka kal lo nangin reivak lo chu a party ah kan awm dawn tho a..”a ti leh a, nia, hei chu kan tih loh dan pawh a ni hleinem.Vawi tamtak Party chhuanlama hmangin Hotelah kan awm dun fo tawha, hrehawm lah a ni hek lo.

“Dintluanga a lo kal dawna, Room te chu kan Book thei ang chu,Tunlai mikhual an nei tam lo atih kha” ka ti leh a, Dintluanga hi ka Cousin a ni a,mahse, hnai tak erawh a ni lo.Kan mizia erawh a inhnaih viau.Hotel lian tak a neia, a farnu leh ka u hi an inkawm nasa a, kan first Cousin tak tak ni lo ho rau rauah chuan kan pawh ber hial maithei.A nau erawh ka ngaina vak lo,a induhtawk reuha, chumai bakah a nu nen an zia a in anga, Dintluanga bialnu boral tumin kan inkhak hlak tawha, khata tang khan an Inah ka kal leh ta miah lo.Thil ka theihnghilh mai mai lo hi a buaithlak tih tum ka neia, vawi tamtak Dintluanga hian pawi a tih thu sawi mahse an In a va kala,a nu va hmuh hi tlawmah ka la tlat.

“Dintluanga chanchin i hria em?”

“Eng chanchin?” ka ti tha ve mai, thil hlui ka ngaihtuah chhuahna chuan ka nuna mi pawimawh tak,ka pi  kha min hriatchhuah tir miau a ka mood a inthlak hlawk tlat.

“Kar hmasa party naah a bialnu thar a rawn hruai an tih kha..” mak ka ti viau.Tu tak ni ang maw? Nimin mai pawn ka biaa, engmah a sawi si lo.

“Khawi lam mi nge a?”

“I hre lo ang, Puia Manager kha ania..Puia i hria em?” a ti leh rih, ka bu ringawt, kan inkawm ve lemlo nangin Dintluanga thianpa ber anih avangin thil tihkhawm nikhuaah ka hmu ve zauh zauh.Mahse,a nu a sa leh hle dawn anih hmel,a bialnu hmasa pawh kha an chhungkaw milpui anih loh avang ngawtin tikhawp khan a duh lo tih a ti lang ania, tuna mi lah a thianpa Manager mai anih tak tak chuan...mahse, Betty..

“Betty nen an la inkawp emaw ka tia..”

“Kei pawh..mahse, Puia Manager chu a bialnu nen an in ang lutuk an ti a” a ti leh a,lo in ang emaw ang lo emaw ka ngaipawimawh lo, a tawrh nasat zia ka hriatpuia, hlim se ka duhsak ber.

Party na tur kan thlen chuan Motor a lo awm nual tawh,kan lut chho a, Josy-in min hmuh veleh min rawn pana,  a nui sang bawk.

“Hey J..Remi..in tha em?” zangkhai vah hian a rawn ti a, a bula awm hi a hahdamthlak thin,Show hlawhtling zet nei zo hlim hlawt a ni bawka, a mood a tha takzet.

“Kan tha..in pa a lo haw tel ve em?’ ka ti nghut a,.

“Aih, a hna lamah a buai a, enteh Rem, in pa hi a tawngkam bul zet hi i ning em?” nui chungin a ti a.

“Aih, hei hi lawm a duhawmna..’ ka nui hawk ringawt,vawi tamtak ka tawngkam bung lutuk hi a sawisel thin tawha,hlauh enah min en lo tih ka hai chuang lem hlei lo a.

“Engpawhnise intur lam chu induh duh kha lo inlak mai ru” a ban avai zauha, midang lo thleng thar lam a pan leh a, keini pawh thutna tur lam kan pan bawk.

Anggu-a ka hmu mai lo,nizan lam ka duh aiin ka inhnema, in vak rih loh pawi ka ti lo.Remi hi chuan zu pangngai a in lo a, Beer erawh a duh ve viau.A intur leh ka intur ka la a, kan thutna lam ka pan leh laiin Anggua leh hmeichhe pakhat an rawn lut ve chiah,ka rin ang ngeiin hmeichhe dang bawk.Min rawn hmu a, a ban a rawn vaia,ka vai let ve mai bawk.

“Dar engzatah nge kan chhuah ang?” ka beng bulah a rawn ti a, a thaw lum hiam chuan min ti danglam a, kal chhuah vat ka pawiti lem lo.Mahse, Dintluanga ka la be ta lo,a lo kal ka rin nen ka hmu hek lo.

“I duh hun hunah, mahse, Dintluanga ka la call lo a..”

“Naaa, tunah dar 10 ania, room a awm nang” ka darah a lu a rawn nghata, midang lam su nghawng nghawng lam chu ka ena, ka hriat lem loh an awm nual.

“A pawi hleinem,chahbi ka keng tho a” ka ti a, a thaw hak mai.

“A tha lawm, mahse, ka riak chhuak thei lo maithei nia” a ti leh a,ka beng a seh zauh bawk, Mipa duhzawng leh tihlawm dan engkim hi a hre vek emaw tihtur khawpin a zei.

“I nu biaksak tur chein min duh em?”

“Duh chiang, nang te chu kei aiin a ring che lawm..” a sawi dik,min ring ni loin a fanu nei se min tih vang zawk.

“Chhuanlam tur lo ngaihtuah la..Wash roomah ka va kal lawk ang” ka ti a, a thu ngila, a zi mar ar ar chu ka ena, a thil in khan a hneh deuh bawk aniang a meng si deuh sapa, a lang duhawm viau bawk.

Josy hnenah kan hawsan mai dawn tih ka hrilha,a tum deuh hmak chuan a lungawi vak lo tih a ti langa, mahse, ka ngaipawimawh lem lo.Kawngkhar lam kan pana, ka banah a vuana,a ta ka nihzia tihlan a tum niin ka hre ber.Stepah kan chhuk thla a, Gate pui kan chhuak tur chiah chu Mihring kalna tura kawngkhar te deuh an siam chu a rawn inhawnga,hmeichhe pakhat, bawr zet hi a rawn langa, a kun tlat avangin kan ding chu min rawn hmu lo anih hmel,a ri zui bur a, Veranda chhuat chang zetah chuan a thil ken a zuk insawha,a keh ri chhuai bawk.

“LALPA...i kalna en ta che” Remkimi aw ki fiak thak ka hre zui nghal zat, ka en vata, a kawr hma lam huh nuaih mai chu ka hmu ve chiah,a thil rawn pawm kha enge anih ka hre lo nangin Wine bur turah ka ngai a, kha kha a insawhkeh emaw ka ti maia, mahse, Remkimi kawr a huh tel chuan thildang pawh a keng tel anih hmel.

“Ka tihpalh lutuk...” a rawn hawi chhuaka, kha nu kha..min rawn en zawka, hnuailam a bih leha, a thuhniam zui nghal zat bawk.

“Tihpalh i tih khan ka kawr hi a fai phah dawn hleinem...mawl lutuk mai” a ti leh hlak a, chhuata thil tla keh chu ka rin ang chiahin zu a lo ni a, a nam thur vung vung mai.

“Ka hria lawm, mahse, engmah tih theih ka nei lo a, he laia thil tla keh hi kan tifai lawk ang, khawngaihin min lo nghak rawh” a ti leh a, min en lo hrim hrim.

“A pawi lo, kal mai ang,kha chu kan tifai mai ang chu” ka ti a, a kawngah ka kuaha,ka hmaa hmeichhe thingthi titih a thu chu ka melh zawka, min en chuang lo.

“Nidangah fimkhur tawh rawh, bakah Delivery girl satliah mai mai lehnghal i awmdan a ngeng lutuk” ka mit ka chhing sawk mai.Ka duh aiin a tawng tam hret bawk.

Muangchangin a rawn dingchhuaka,min en loin Remkimi a en a,a hmelah zam hmel a lang lo,a thawmhnaw hak danah In atanga lo kal tawp a ang viau, kekawr lian hnek hnuk a dum a ha a, t-shirt rawng dal lam deuh a haa, a sam kir kawi deuh kha a tawn daih bawk.

“Ka tihpalh ka tih kha, min lo nghak lawk la hei hi ka tihzawhah ka tihfai sak mai ang che ka tih bawk kha..” a mitmeng lian kel kawl chuan a melh ngar mai.

“I va han zak thei lo..nang hi..” a ban a lek kang uaih mai,mahse, rang zet hian a ka va man beh saka,ka phih deuh sawk bawk.Hetiang mai maia a thinrim vak hi ka hrethiam miah lo.

“Khawngaihin i kut lek suh, ka tisual ngeia, mahse, mahni aia upa te kutthlak nan chuan a nep em mai..” a awki hniam sat mai chuan min fan raih raih mai,amah a induhtawk lutuk chu ka lawm ru tlat pek bawk.

“Ruby, i kut a thi ania” Gate duty Security pa rawn tawng ri ka hriat rualin a kut ka en thla vat, chhuatah hmun li velah thisen farna a val kalh mai.Rang zet hian a hum vat bawk.

“Kal ang...” Remkimi ban rekah ka chelha, a awmdan hniam lutuk khan min ti thinrim hluah hluah.A beer in vang khan a in control theihna a hlauh anih ngawt loh chuan kha kha a mize chhungril a ni ngei ang, vawi tamtak Anggu-a hian a sawi tawh, ‘Thlahtu te atanga hausa sa ni lemlo, hausa thut te leh mi aia nei em em lo,Motor pahnih khat kawl chin hi an chapo duh ania” a ti thin a, chu chu anni pawh hi an nihna chiah a ni bawk.

A duh lo chung an Inah ka thlah luia, a tap deuh par bawk, ka engahmah a thawk tlat lo,engber kha nge ka huat chu ka hre lo,mahse, ka thinrim hlur thung.Kha hmeichhia khan khatiang thawmhnaw ha chung khan enge a rawn tih dawn ka hre lo, mahse, a lo kal ngeia, zu bur tam fe a keng bawk.

“Aw, Mama..” Phone a pick rualin a rawn ti a.

“In nula khan hna dang thawh tel a nei em?” ka ti ta nge nge, nizan khan ka tum loh tawpin ka ngaihtuah zui ta reng,vawiin chawmhma lamah pawh angai bawk..

“Ngatinge?’ min rawn zawt let a.

“Ka hre duh mai mai..”

“Thawh awm pawh ka hre lo,amah hi Thingtlang lam mi ania, amahin a khawsa tih zawng ka hria” ka thaw deuh hawk mai.A mize ngeng lutuk khan engtak nge maw a ngenpui ni ang le??

“Anih chu..In pa Dawrah a kal em?” ka ti leh a.

“Kal e, i va hmu dawn ami?’

“Hmu lo ang, Workshop lamah kal ka tuma” ka ti a, nimin khan ka kal hman ta lo a, vawiin lamah lah kal mai ka tum laiin inleng ka nei leh neuh neuha, Lunch zawh veleh kal nghal mai ka duha, bakah tun hnai hian engemawah Workshop lam enkawltu hi Mechanic lamin Complaint an nei zauh zauha, enfel angai pah bawk.

Workshop hi khawpui pawn lama kan ramah kan nei a,Motor lian lo thlenkhawmna hmun anih bakah Servicing zawng zawng helamah kan dah vek avangin a Building a lian tha hem hawm viau, a hnuaiah a thawk te awmna tur Quarter kan siam vek bawk.Motor pekchhuah tur ho ka enkuala,an lo Complaint leh hlau niawm fahranin min zui ve zel bawk.Sumdawnna enkawl hautak zia hi ka ngaihtuah fo mai,eiruk tum reng renga khawsa an awm a, rinawm tlur an awm ve bawk.Hlawh hi ka pe chhe lem lo a, mahse, chuti chung chuan eiruk tur zawng chi hi an awm  ve leh zauh tho.Hetiangah chuan Mizo aiin hmandang an rinawm zawk zel emawni ka ti thin.

“Mama...” phone ka pick rualin ka u in a rawn ti a,a aw a dik lo.

“Enge ni ta?” ka ti hmuka, ka dinna atangin ka kal hrang deuh a.

“Lo kal rawh tunah..” a rawn tap titih..

“Khawiah? Ngatinge?”

“Dawrah mawle,lo kal vat rawh..” phone a off zui daih bawk.

Darkar khat a liam leh meuh chuan ka u te dawr ka thleng fel der tawh,ka hmanhmawh tehreng nen khawpui chhung luh tan dawnah Jam nasa lutuk vangin rei fe ka tanga leh a, ka tum aia tlaiah ka thleng ta zawk.Dawr an lo khar vek tawha, Kawngkharpui ber chiah an lo hawnga, chu pawh zim te chauhin..

Ka nem hawnga, ka u amahin a lo thu a, a hmel chu hnuh hrep hnu a ang takzet.

“U...enge thleng a?’ ka aw a hriat veleh a rawn hawi a, min en a, engmah sawi loin a tap chhuak nghal hawk mai.Engmah ka hrethiam lo.Ka u hi kan naupan lai atangin a tah awm ka hre ngai lo.Hmeichhe luhlul leh ngeng lutuk ani a, a tah theih pawh ka lo ring ngai lo.

Ka pan hnaia, a thutna chair banah ka thu a, ka kuaha, a tap zui hliam hliam mai.Engmah zawh hun a ni rih lo tih ka hria, ngawirengin a hnungah ka chul saka, bakah hmeichhe tap thlem hi ka thiam zawng a ni hek lo.

“I hria em? Vawiin tlaiah khan ka va phawka, kan inhau buaia, kha hmeichhe chhan nan khan  Makima’n kut min thlak a...” a sawi hleithei lo.Kei erawh ka kut ka humruh a, chutiang taka mualpho a siam ngai khawp chuan enge ka u hian a lo tih ka ngaihtuah lo,ka hriat zawng chu a pasal a ni a, engpawh a ti thei,ka chhungrila thinrimna so bulh bulh chuan tualthah mai pawh ka hreh dawn hauh lo tih ka hai lo.Eng ang pawn ka u hi a lo thiam lo a ni thei, mahse, thisen zawmpui ka neihchhun a ni a, a pasal hian a hau duh anih pawhin mi hriat loh laiin a hau theia, hetiang a mualpho lutuk a a siam hi ka ngaihdan chin tawk a pel lam mah a ni e.

A inluah bulah darkar khat aia tam ka nghak tawh, a chanchin hriat tumin ka chhui tira, darkar rei loteah an hrechhuak nghal vek,u Makima hmuh tumna ka nei tawh lo,ka u kan inah ka dah fel te tea, a fa te tumah Aizawlah an awm lo hlauh,kalna tur sawi loin ka chhuak lehnghal a, Ka pa in ka tihtur min zawt lo, a fanu hnem turin engmah a ti lo erawh ka dem.

Motor kawngkhar inkhar ri dawt thawmah ka harh a, ka lo muhil sek hman, ka sana ka ena, dar 11 a ri tawh,ka hawi chhuaka, ka u Pasal car tlanliam tur chiah ka va hmu hman,kawngkhar ka hawnga, ka hmaa hmeichhe kal thla chu ngawirengin ka zuia, ngaihthat lohna nei niawm tak hian a ding chata, a rawn hawi leta,min hmuh rualin a mengphar awka, a phone ken lai a thlauh nghal tap bawk.