STOP-3

Chapter- 3

“Enge i duh?” a vawikhatnan a aw a khur tih ka hria.Chu chuan ka kal chhan a hrechiang tih a ti lang nghal tlukah ka ngai ve hmiah thung.A thuhniama a phone a chhara,a keh leh keh loh pawh en lo in a hum nghal hmak bawk.

“Tuemaw in Carin tun ang hunah a rawn thlah chea, keiin pawn lamah hian ka lo nghak bawk che a,helai veng ho hian i luck zia an hriat loh ka hlauhpui che” ka ner nawk bawk.Ka awah ka ten zia a lang thei hial.

“Ih,chutiang lam ka ngaihtuah lo..mahse, tun ang hunah hian hmuh che ka beisei lo a..” a ban a vai zauha.A thaw deuh hiai bawk.

“Nia, min beisei lo ang tih ka chiang, khawi chahbi?” ka kut ka dawha, helai hmunah hian engmah tih ka tum lo.A hmel buai deuh nak chu ka ena, a mitmeng lian leh zahawm zet chuan ka chhungril a hmu tlang thei hial in ka hre bawk.Engatinge hetiang hmel pawisawi lo lutuk nei si hian midang tahna a thlen tlat ka hrethiam hlawl lo.Chu chuan min ti thinur hlur bawk.

“Angai lo e, khawngaihin min lo zui rawh” a aw a khur ta lo, ahma a ka lo hmuh tawh ang chiah khan a aw ah inrintawkna a lang leh ta bawk.

A inhera, stepah a chhuk thlaa,engmah sawiloin ka zui ve mai bawk,a hma khan ka lo zuk en vek tawha,he In hi kum thum vel bawr a luah tawha, a khat tawkin a nu leh pa leh a chhungte dang an lo kal ve deuh renga,amah tak hi chu an khaw lamah a haw ngai meuh lo tih te pawh ka hre vek tawh.Mahse, tuna kan buaina ang chi Mipa vanga sawisep a kai awm hriat a ni leh miah thung lo.Mahse, hmanhmawh taka chhui kan nih vang pawhin kan hre kim mai hauh dawn lo tih a chianga,chubakah kan zawh ber lah kha a thiannu ber a ni zui bawka.A chanchin chhe zawng engmah a sawi duh kher lo ang tih a chiang.

Chhawng hnuaibera Gate lian vak lo thinga siam awm chu a hawng rak raka, ka zui tawh lo emaw ti niawm tak hian  a rawn hawileta, ka lo ding hnai bawk nen min rawn tauh deuh titih a, a te deuh that bawk.

“Sorry...i thawm ka hre miah lo a...” a ti niah niaha, a hawilet lehnghal mai,kei erawh lungtum ang maiin ka ding ngawi ngur ringawt.A chetdan naupangchhia deuh chuan mak deuhin min fan ka ti dawn nge min hip leh pek zawk pawh ka hre nek lo e.

Gate a hawnga, Kawngkhar a hawng leh tur chu a kut tuamna ka hmu chiah, nidawn tak,nizan khan chhuat tihfai a tumna lamah Darthlalang keh them khan a kut a at tak alawm le.

“Khawi, keiman..” chahbi ka pawhthlak saka, min hnial tuma a ang ziau tawh chu ngaipawimwh duhloin Tala lam ka khawih zui nghal daih bawk.Ani pawn engmah a sawi ta chuang lo.Min hnial a sawt lo tih hi a la hrethuai dawn tho a, tunah rih chuan min hnial deuh mahse pawi ka tih loh lai tak pawh a ni mahna le.

A inchhung a zau hran lo, thu tura min tih pawh nghak loin ka thu a, aneitu zawk si a tim dai mai, ka ep zawngin a rawn thu thla ve a, tlanchhiat mai inpeih at niawm hian a thu mar auh bawk.

“A tlai tawh khawp mai a...” min en loin a malchunga a kut dah lam a ena, a kut tin fai sar leh engmah hnawih loh chu a kheuh niap niap bawk.Dinglam erawh a kutzungtang sei sang mai a chanve aia tam a intuam tel thung.

“Nia, ka nghak rei khawp mai che,pawisa engzat nge i mamawh ang?” ka tawngkam bung lutuk hrep pawh chu a.

“Pawisa ka dil lai che ka hre lo a..” ka mitah tak min melh ran bawk.

“Min dil lo a, mahse, ka u pasal i kawp chhan hi Sum i mamawh vang anih loh chuan i hur...” sawi zawmloin ka ngawi leh daih.A hmai sen awp awpah chuan a thinrim tih a lang theia, a hmui a pet fan bawk.

“Chhuak rawh..” ka beisei loh lam in min chhang ta zawk, tawngkam mawi vak lo a hmang dawn emaw ka tih laiin a ni ta hauh lo.A thinrim vang nge ka hre lo,a aw a khur dar dar bawk.

“Chhuak leh mai turin darkar tam ka nghak lo che”

“Enge ka tihsual min hrilh ta che, hetiang a min ti tur hian i enge ka nih?”

“Ka engmah,ka tana pawimawh te suma lei ka tum ngai lo,lei ka tum chhan che i hria.Makima ai hian ka pe tam zawk ang che, i duh chuan eizawnna tur ka pe thei bawk che” a thutna bula Remote a rawn thlawkphei fua a, ka thle hman nangin min fuh ta tho,ka beng a thip nghal vang vang bawk.Amah zawk chuan mangan hmel fe hian a hmui a hupa, a duh ang ngeiin min vawma, mahse, mangang hmel a pu leh lawi.Hei chiah hi a nihna a nih hmel e.Mipa pawh hlau lo leh ngeng lutuk mai.

“Enge i tih a?” ka aw a ring lo nangin hriat a nuam hauh lo ang.Ka beng ka khawiha,a hnawng deuh a, ka kut ka ena, Thisen a kai a, thi nasa chu anih hmel loh.

“Ka..ka hre lo,che suh..” a ti bah nak mai, a rawn tho a, Room kawngkhar niawm tak awm chu a hawnga, reilote ah a lo let leha, Lapua a rawn huma,min rawn pana, a hmai dang lap maiah chuan rapthlak tihna niawm tak hi a lang theia, zanin chu nidanga ka hmuh laia mi ang kha a ni lo,mahni pawh inveng him zo lo, hmeichhe der dep leh Nu zem mai  chiahin a lang a,tihnat a awl hmel takzet bawk.

A rawn ding hnaia, Damdawi hmehchhuah chi a lo keng tela, a kut na lamin a chelha, a herh hawnga, lapuaah a tata, thutthlengah a theh thla a, ka bengah a  lapaw ken in a rawn depa, a thip zawk bawk.

“Ka tihpalh lutuk..eng lo..” mumal lo zet hian a ti leh niah niaha, tlaia ka thinrimna kha vawm bo ang duak a ni tawh, mahse, hetiang maia inthlahdul ka tum chuang lo,Sumdawnna kawngah ka elpui leh ka tana hnawk te hneh turin engpawh ka ti thei thina, tunah he Hmeichhe satliah lakah hian ka tlawm ngawt tur a ni lo.

A kut nel thep chuan ka beng a rawn khawih leha, a kut a dam hle bawk,min din hnaih bawka a perfume rim dam raih mai chuan ka hnar a rawn verh leha,amah nen a inhmeh reuh tlat a, he rim hi ka hriat apiangin amah hi ka hrechhuak tawh ngei ang tih ka ngaihtuah vang vang mai.

“A tawk ang” ka ti hmuka, ka beng ka han khawih tur chu a kut ka tawk fuha, rang lutuk hian a la sawn vat bawk.

A thutna ngai bawk a pan leha, a hmai dang diau maiah chuan chau hmel a langa,he nu hi enge anih chiah? Ka u amah vangin a tapa, kei lah amah khawngaihna rilru ka pu tan mek bawk.A hmel chhe lo a, hmeltha a ni hek lo, mahse, amahah hian mi hipna mak deuh a awm tlat lawi si.Mahse, hei ngei hian Makima pawh a ti a mek reng bawk alawm le..Nia, Makima leh Ka u..Kei pawh hetiang mai mai ngaihtuah tura kal ka ni lo.

“Ka lo kal chhan ka sawi leh ang, Ka u pasal nen in chanchin hi ka hria ka tih tawh kha, bansan la ka duh, i hna i chan dawn anih chuan ka hnenah emaw ka thiante hnenah pawh hna a awm,i la duh loh cheu chuan Pawisa ka pe thei che ka tih kha..Duhthlan tur pathum ka pe che anih chu..” ka ti ta duah, ani erawh chuan hnuailam a melh ran thung.

“Thil hriatsual i nei anih ka ring, chuan, Pi pawn..” min melh zawka, hnuailam a en lehnghal daih.

“Aih, khalam chu ka ngaipawimawh lo, nang pawh nikhat ni loin Darkar khat lek i inluah leh i nihna hreturin ka ngaihven chea, ka hre mai renga.Kha thil,ka u a pasalin kut a thlak phah na kha ka hresual lo ang tih ka chiang” min rawn ena, a mengphawk hra bawk.

“Chutiang engmah ka ti lo..vawiin tlai khan Pu khan kut a thlak lo...ih..” ka ban ka vaia,a tawng zawm tur  a tawp chat bawk.

“I sawi mek hi ka Farnu te chanchin a ni a, ka tan ka Farnu aia pawimawh a awm lo,i thutlukna ka hre duh..Ka sawi pathum kha i duh i thlang thei”

“Engmah kha ka duh lo vek”

“Midang beih hi hrehawm ka ti lo tih i hretawh maithei,chutih rual erawh chuan chance i neih reng laia tihchhiat vek che hi nuam ka ti lo ania, mahse, hetianga i awm dawn chuan ka ti hreh chuang hauh lo thung ang”

“Ka hre lo..engmah ka ngaihtuah thei rih lo...” a lu a thinga, a sam a che tel ve siau bawk.

“Engpawh kha thlang la i thlan ni atangin ka tih sak nghal vek ang che’ ka ti leh nghut a.

“Pawisa hmanga leikual theih ka ni lo a, mihring ka ni ve asin” a mit a khap sak sak bawk.

“Ok,pawisa i mamawh vangin hna i thawka, tunah chuan i induhtawkna khan a la tibuai che tih ka hria, mahse naktukah i chhanna ka hre duh in ka ring..i theih phei chuan kal zawm tawh lo la ka duh cheu,tun thla i hlawh tur chu keiman ka pe mai ang che” ka ti leh a,a bu ringawt.

Ka u in ka haw min lo la nghaka, ka kalna tur ka sawi bawk si lo nen a mangang deuh anih hmel,ka thawm hraiin a rawn hawi vata, a mit sen ramah chuan a tap nasa anih ka ring mai.

“Khawnge i kal?” a ti a, a rawn tho a.

“Remi te Inah ka kal a, khawnge ka pa?” ka ti a, ka kal hauh lo,nizan thil thleng avang khan min rawn biak a tumna pawh ka chhang peih eih lo zawk.

“A mu tawh, mahse,Remi chu tah a lo kal sia..”

“Maw?”

“Hetah a lo kala, a call tlang thei lo che a ti sia” mak ti hmel a hmelah a lang thei.

“Nia, ka va kala, kan in nang fuh lo a, chuvang anih chu,anih leh in pa a lo kal em?” ka ti ta zawk, keima chungchang lam engmah sawi ka peih lo.

“Kal lo..lo kal ngam tur a ni lo”a ti ram hmak a, mahse, a beisei ru ang tih erawh ka hre thei tho.

“Anih chu, engpawh nise naktukah ngaihtuah zui zawk ang, mut a hun tawh..Mangtha phawt” ka ti a, ka tho a,ka mood a fuh hlawl lo.

“Chaw i ei dawn lo mi?”

“Aih, ka ei chak lo..” ka ti a, ka ei chak lo tak tak.Chaw nghei mai mai hi ka pa huat zawng tak ani tih hre mahila zanin chu ka ei peih hlawl lo.

Muhil thei lawk loin ka let kual seka, ka mit ka chhin apiangin a hmel pawisawi lo leh mangang hmel kha ka hmu zui zat zel bawk,mahse, lehlamah ka farnu a awma, a tahna khawp thlentu kha ka ngaidam thiang lo, a pasal nen an inthen dawn emaw then dawn lo emaw engmah ka ngaipawimawh lo, ka u ti taptu anih na bak ka ngaihtuah thiang hek lo...Mahse, a hmai dang lap maiah khan engmah ti hmel a pu si lo,nilo.. a ti thei ang, engmah tih theih loh a nei lo tawp ang.Ka beng ka khawih a, a kut zungtang sei sel sawlin a khawihna kha ka hre chhuak lo thei lo.

Ka Phone nghawr dar darin min ti harha, ka let thawka, Curtain chhah zet inzar vang nge ka hre lo, a thim deuh khup a, khua a la var lo zawk pawh a ni maithei bawk,ka lukham in ka beng ka hup a, hriat loh der tumin ka bawkkhup zui leh a, a tawp ve mai bawk,mahse, a rawn ri leh a, ka dap kuala, meng chuang loin ka pick a.

“Hello...”

“Mama,I u ka nia, vawiinah ka hmu duh che a” ka u pasal aw hian a rawn ti a,ka chhang mai lo.

“Ka sawi i hrethei em?” a rawn ti leh a

‘Aw, hrethei,kei nen inbiak na tur kan neih ka va hre lo ve”

“Nei , i u nen kan chungchangah hian sawi tur a tam ania, i pa chu ka be tawha” lukham ka thehsawna, ka zangthala, chunglam ka melh a.

“Engtik laiin nge i biak?”

“Nimin khan ka be tawh, i u kha chu lo awm phawt se,nangmah nen kan sawifel a tulin ka hria” nidang ang lo takin a aw a nguai hle bawk.Nia, a nguai ang chu, a in ngaihtuah fim anga, a rilru a hah hle ta ve ang.Mahni nupui aia hmeichhe dang thlangtu ni miau hek le.

“Kei nen kan sawi avangin ka u rilru a dam phah ka va ring lo”

‘Khawngaihin..” tham deuh hian a rawn ti a.

“Aw, dar engzatah nge?” ka ti ta zawk.

“I officeah ka lo kal mai ang”

“Ok, mahse, thulh leh hni hne tur kha chu ni tawh lo la ka duh ania, hna lamah ka buai dawna” ka ti leh hmuka, a hmaa a rawn thulh ngawt kha ka ngaihdan a pel miau a.

Ka Off a, reivak lo che loin ka mu a, ka mitthlaah Ruby hmel  a lo langa,nizan kha a muhil thei kher lo maithei tih ka ngaihtuah a, ban ngawt kha a hreh maithei,bakah ka tihdan kha ani ang hmeichhe induhtawk ve si khan a pawm zam kher lo zawk maithei..Engpawhnise duhthlan tur ka pe a, chu pawh pathum lai lehnghal.

Ka pa leh ka u in Dinning table an lo kil a, inbe mangloin an lo ei dun mawlh mawlh bawk,ka thawm hriain ka pa a rawn hawi chhuak vuta.

“Mama,vawiin lamah tihtur hmanhmawhthlak i nei dawn em?”

“Aih, hna pangngai a nimai,chuan  mi biak tur ka nei bawka,eitur min lo pe nghal aw” tih pahin kan nula lo kal hnai mek chu ka bia a.Chair ka pawt chhuaka,ka thu ve nghala, ka u erawh ngawirengin a ei ngai in a ei mial mial thung.

“A that chu, Sangberi te man hlan kha vawiin a ni tih i hria em?” a ti leh a.Ka bu ringawt,dik tak chuan ka theihnghilh chiang lutuk.Sangberi hi ka Pa u fanu naupang ber a ni a, Ukil niin a tih tawhna lamah chuan a ti tak tak bawka hriat a hlawh viau.A pasal tur erawh Doctor a ni thung.

Ei tur min rawn pe a,zing lamah hian a tlangpuiin chaw pangngai kan ei meuh lo,thei leh Juice lam kan ei nasa a, duh chuan eitur a awm reng thung.Ka pa hi hrisel lohna em em nei lo mahse a kum a tam ve tawh avang hian a in uluk lehzual a, eitur lamah a fimkhur viau.Buh hi kan ei tam lo ve ve a, a hming chauh tak takin kan ei a ni ber.Zingah a kal chhuah hmain Thei leh thlai hring bakah Juice a ei a, chhunah Lunch tur hi In atangin an pe thung,zan lam hi a tisual fe anih loh chuan dar 8 ah a ei ngei ngei thung.A pelh mang ngai lo, hunbi  nei thlapa khawsa a ni a, kan chhungkaw in enkawlna hi ka pi khan a lo kengkawh tha bawka kei pawh hi ka khawsa duhdah mai mai khat viau.Mahse, Mipa fel tak erawh ka ni lo lo chiang.

“Dar 3 ah chuan i thlen hman loh pawn thlen tum la, kei chu vawiin Dawr lamah ka awm lo mai ang, midang an awm teuh tho bawka,i Papuia te In lamah ka va awm ang” a ti leh a.Ka pa u hi chu ka pa ang lo takin Sawrkar hna a thawka, IAS niin phai lamah a hun a hmang tam zawk,a pension hnuah helamah an inbengbel tak tak ta chauha a fa te an puitling bawka, an khawsak a nuam thawkhat,mahse, ka pu fapa anih miau avangin eiruk lamah a hmingchhe hauh lo thung.Ka pa nau hmeichhia a ni a, an pathum hian an inkawmngeih em em a, engpawh ti se an inthlawp tha em em bawk.

“Bawihi,engtin nge i awm dawn?” a ti leh a, ka u thu ngawi ngar mai chu ka ena, mak takin nizana ka hruai haw khan ka pa khan engtin a lo ti lem lo a, a lo ngaihsak hluak hek lo.Thil thlen dan a sawi lai pawh khan ngawirengin  a ngaithla a, hnem na lam engmah a chhakchhuak lo,awm rih turin a ti mawl tawp ringawt anih kha.

“Ka hre lo..” a plate a nawr sawn a.

“Nizanah hetah i riak tawha, vawiin chu haw la a thain ka hria..” hnial chi hauh lo a khauh hian a ti a, hetianga ka pa a tawng tawh hi chuan kei pawh hian ka hnial ngai lo tluk a ni a, he a mize ngeng tak hi kei hian ka lo chhun ve chiah bawk tih hi ka inhrechiang tial tial bawk.

“Mahse Pa...’ a hnial ta tlat.

“Niminah Makima nen i lo haw hma khan kan inbe tawha,nizanah kan inbe bawka...” dam thluam hian a ti leh a.

“Ani te chuan a thiamthu bak a sawi nang..” a ti hlaka.

“Thu rawh’ tho tura a in nemkang tawh chu a ti hluka, a thu leh zal zal chu ka ena, engmah ka la sawi ve ta lo,ka pa hian Ruby ka va hmu tih kha a hria em ka hre lo, mahse, engvangin nge a fanu lamah hian a tan miah loh ka hrethiam  lo.

“I Pasal chuan a thiamthu a sawi ngei a, nangpawn i thiamthu i sawi ve bawka,ka fanu i ni a, engvangin nge i lamah ka tan loh ang? Mahse, i dik lo a lo nih chuan ka fanu pawh nila i lamah ka tang dawn lo,pasal nei i ni a, chuvangin i pasal hi keini aiin i chungah a thu zawk tih hi hrereng rawh,aman a rawn dah che a ni lo a, i nau rualin i lo haw a, nizanah pawh Makima chuan i lungawi nana riah tir mai chauh che anih kha...”a ti ta duah.Kan nula te eitur min chhawp sak hnuah tumah Dinning roomah an awm ve ngai lo bawka, engmah sawi hrehna tur a awm lo.Nu Ruati erawh lo awm ve mahse kan chhungkaw zinga mi tluk thuak a ni a, a pawina a awm tam lo.

“Pa, vawiinah Makima ka lo bia ang,a tha em?” ka plate nawrsawn pahin ka ti a.Min rawn en a.

“A tha ang, nizan pawh khan biak che a duha, mahse, i awm lo a,a call tlang thei lo che anih kha” a ti leh a, a tho a.Kei pawh a tho zui ve nghala, ka u thu tum bar chu ka melh zawka, amah zawk hi a dik lo mai angem tih ka rilruah a lo lut zauh a, ka lu ka thing nawk bawk.

Office ka thlen hnuah Bank lamah kan Accountant nen kan chhuak dun leha,kan rei ta phian,Office ka let leh meuh chuan dar khat a pel dawrh tawh, Ka u pasal in min lo nghak ran tawh bawk.

“Min lo nghak rei em?” ka ti a, a lu a thing ringawt, a rilru a hah hmel viau bawk.

‘I u hian ka call a pick duh lo a,bakah amah biak awmzia a awm dawn chuang lo a” engmah dang sawi hmasa loin a ti a,a hmai a tuai pawk bawk.

“Kei nen kan inbiak hian a fel phah dawn em ka hre lo a,mahse, sawi la” ka ti a, ka Kamiz ban kilhna ka phelha, ka thlep chhing a, vawiin khaw lum uap churh leh ruah tla si hi ka mood nen a inhmeh hluah hluah.

“Nimin khan engtin nge i bulah a sawi ka hre hauh lo nangin a insawithiam ang tih ka ring sa a” a thaw deuh huai bawk.Kei erawh ka sa deuh zawk thung,ama thiamthu sawi tur a a nupui nau a rawn pan hi a tihtur a ni hauh lo.

“Engpawh nise nizan khan dar 11 bawr velah i bialnu an tih kha i va dropa, thildangah ka u chuan thiam lohna a lo nei anih pawhin kha kher kha chu i pha thei in ka ring lo’ a mitah ka ena, hahdam hmel takin ka chair hnunglam ka ngheng bawk.

“I sawi dik, engtin nge i lo hriat chu ka hre hauh lo nangin,nimin tlaiah kher kha chuan i u a dik lo hulhual” a ti leh a.

“A dik lohna lai a lo awm anih pawhin i dik loh hmasak miau chuan engpawh a ti theia, a pasal i ni miau a” ka aw a nem fahran lo.

“I sawi dik,engpawh tise ka nupui a ni a, ka fa te nu a ni bawka, chumai bakah ka Hmangaih bawk,mahse, tun hnaia a awmdan hian min ti a vek tawh” a hnunglam a ngheng chawrha, chunglam a en vung vung bawk.

“Engpawh nise, ka lo sawi tur a awm hauh lo nangin ka lo ngaihdan chuan i bialnu ni a a rinhlelh kha ban ta mai la, engkim a fel mai ang chu” min rawn en a, a hmel buai deuh nak chu ka hmuh hmaih hauh lo.

“I tidik,mahse, ka ban ngai loin vawiin khan a bang fel tawh zawk.Pawi erawh ka ti, engmah inrinlawkna nei lo in a ban a ngaia” a ti leh a, a lamah a la tang ta fo.Thil mak tak a ni, a nupui a hmangaiha,a bialnu a duh a ni mai awm e a.Kha nuah khan engthil tha nge a hmuh hrep ni?

“Chuti chu buaina a kiang animai alawm, ka u chu Inah a awma, va kal la..”

‘Mala, mipa ka ni a, induhtawkna ka nei ve bawk asin,mahse,tun tum chauh chu ka tlawm leh anga, abak chu ka thei tawh bikin ka ring lo..”a sam a tuai leh puata,ka hrethiam teh nuaih lo e, enge kan Inah a va kal avanga a tlawm ngawt na tur engmah ka hrethiam eih lo.A nupui a lungawi lo anih chuan a thlem ve bawk ang chu.

“Nangni hi in tawp tak tak ami a?” Anggu-a ka hmaah a rawn thu a,ka thil ei lai ka eizawm mawlh mawlh thung.

“Ka biak che hi mawle aw” a ti leh a, ka en ta nge nge.

“Enge i hriat duh ber?” Naktukah Meeting kan nei dawna,kan meeting na a rawn tel tur phai lama kan Company lam mi te Airportah lo zuk lam ka duh avangin hmanhmawh zetin thil ka ei a, eitur tui leh tui loh pawh ka hre mumal lo.

“Remkimi nen hian in tawp tak tak ami a?” a sawi nawn leh a.

“Aw..” ka ti mawl tawp.Josy party na kan kal atang khan thla a liam leh daih tawh bawk.

“A nat hmel khawp kha,niminah a lo kala..” a ti leh a, ka bu ringawt.

“Enge i hriat a? engmah sawipui theih loh..” lungawi vak lo niawm tak hian a ti hluka, ka nui ringawt.

“Eeee, thildang daih, ka nu in a sawia, i u te an inthen a mi a?”

“Then lo..”

“Ngatinge a? i awmdan a mak em mai a”a tho a.

“Mak nang, ka buai alawm,Airport kal ka ngaia,lo kal ve zawk teh” ka ti a, min rawn ena.

“Enge i tih dawna?” tha tak in a ti leh mai,ka tihtur ka hrilha,Darkar chanve a liam leh meuh chuan Airport kan thleng dawn thuak tawh.

Ka u chanchin a rawn sawi chhuah takah khan ka mitthlaah Ruby a lo langa, a In ka kal tuk khan hna a bansan nghala, biak pawh ka tum buai ta lo,mahse, karkhat hnuah ka Officeah lehkha a rawn thlenga,ka offer zawng zawng kha a hnawl vek tih min rawn hrilh thlap.Hmeichhe chapo leh induhtawk tak a lo ni nameuh mai.Mahse engpawh tise pawi ka ti lo a, ka ngaihven hek lo, ka duh ber ka u te  boruak lah engmah dik lo zui a awm lo a,ka hnenah engmah sawi a nei leh ta lo.Nitin ka hnaah ka buai na tawk ka hmua, zantin deuhthaw party naah ka kala,Hmeichhia lam erawh ka ngaihven rih lo,ka mamawh lo nge ka hre lo,ka ngaihven lo tawp.

“Lawk, he lai Cabinah hian kan thenawm a mi te an awma, kan kal kual lawk ang” ka u in a tia, kan cousin pakhatin nau a neia,kan unauin kan en a,kan haw tur a pengkawi leh rih.

“Um, inhnuaiah ka lo nghak ang che” ka ti a, Stepah ka chhukthlaa, Gate ka chhuak chiah chu Hmeichhe pakhat hmanhmawh fe a Taxi a a lut hi ka va hmu a, ka en nawn leh kher, amah kha...Taxi kawngkhar khar tumin a rawn bana,mak takin ka hmuh hnuhnun ber tum ang tho khan a kut a la tuam ta cheu.Thla a liam tawha, engtin nge tun chen chen a la tuam a ngaih ang?

“Enge i en a?’ ka u in min rawn biaa, ka dinna ngaiah ka lo la ding reng,Ruby te awmna lam ka va hawi phei a, tumah an lo awm tawh lo.

“Engmah,ka lo nghak che.Kal ila..’ ka ti a, thildang a sawi zawm mawlh mawlh chu engmah ka ngaihtuah lo.

“Khami tlai khan Pi a lo kala,Ruby khan percelah thil a lo khungkhawma,a tawn na Nylon hrui a roll ami kha zai chah a tuma, a bakcheh kha a ti kak sa vek sia, Piin a pawt thuta...” ka hmaa thu,thil min hrilh tu chu ka en ngawt ngawt ringawt.Kha vang ngei kha a lo nih chu..A kut kha Darthlalang kehthem khan a at ringawt emaw ka lo ti asin le..