STOP-4

Chapter-4

Kha zanah khan a hmelah engmah tihsual nei lo hmel a langa, a pha bawk reng a, Makima pawn ama thiamloh a ni lo tih a sawi bawk.Mahse, ka u hian engtiklaimahin dawt min hrilh ka la hre ngai lo a, engvangin nge dawt min hrilh ngawt ang?Mahse, ka hmaa thu hian mit ngeiin a hmu a, dawt a sawi ngawt ka ring chuang hek lo,vawiin khan Ruby kut tuam ka mit ngeiin ka hmu ve tho bawk, Darthlalang keh them vang ngawt nitur kha chuan a tuam rei lam hrat chu ania lawm,Mahse...Ka u ka ringhlel tihna a ni tlat.

“Ka zawhna tha taka min chhan avangin ka lawm e” ka ti supa,a bu nghata, a hmui a pet a.

“Khawngaihin keimah atangin i hria tih chhuak lo hram se ka lawm ngawt ang” a ti a, ka bu ringawt.Kalsawn tuma a inher tawh chu ka ko ding leh rih, thil hriat duh dang ka la nei ta fo.

“Ka u kha in pu khan kut a thlak mial em?” a mitah tak ka ena, ani erawh chuan min en ngam loin hnuailam a melh daih.

“Aih..thlak lo,mahse, Ruby kut thi zuk buaipui a tum kha Pi in a pawt buaia, nemsawn a tumna lamaha nem thlu palh a” a ti leh a, ka tum loh tawpin ka thaw hawk mai.

Ngaihtuahna mumal lo zet nen In lam ka pana, ka Motor khalh lam in ka rilru a luah eih lo,ka mitthlaah Ruby pawisawi lo hmel leh ka tawngkam na lutuk vanga a hmel dang diau mai kha a lang a, a vawikhatnan ka inthiam lo ve ta.Kha thil thleng zawt fiah tura ka u te dawra thawk ka va hmu ta hial kha nuam ka ti lo,kan chhungkaw tan mualpho theihna kawng a ni tel bawk, mahse,hriat fiah ka duhna in a tur in min tur miau a,ka beisei phak piahlam chhanna ka va hmu ta bawk.

In ka thlen veleh ka pa roomah ka tlang nghala,mu chungin Tv a lo en a,ka thawm hriaiin a rawn hawi chhuak vut bawk.

“I lo haw chiah mi?” thut mar pahin a ti a.

“Um,pa thil ka zawt duh che”

‘Eng?” mak tih hmel deuh hian min en a, Pafa kan ni a, mahse, mipa ve ve tih takah han titi dun chiam te kan nei khat viau,nilengin hna lamah ka chhuaka, ani Dawr lamah a awm ve bawk nen Inah kan awmdun khat viau,mahse, kan inpawh lo tihna erawh a ni leh hauh lo thung.

“Ka u te intihbuai tuma Makima thil hrilh che ka hre duh” ka ti mawl tawp.

“A eng ber maw?” man chiah lo niawm tak hian a lu a hiat a.

“Ka u min hrilh dan kha chuan a bialnu vangin kut a thlak a ti a..chutiang lo lam chuan enge a hrilh che?” ka aw a chang lam mah mah.

“Um, kha kha maw? Nia,Makima rawn sawi dan kha chuan i u In an dawra nula pakhat a tihliam palha, a buaipui tur a lo khak deuh kha ka nem sawna, ka lo nem na deuh a ti anih kha,ngatinge?”

“Engmah...ka han intifai lawk ang,i ei tawh mi?” Sana ka melh zauha, dar kua a ri tawh.

“Aw, ka lo eisan mai che nih kha” a ti awlsam ve mai, a theih hram chuan eidun hi a tha kan ti a, mahse, kan ei dun meuh chuang lo.

“Mangtha le” ka ti a, min mangtha ve a,room ka chhuahsana,kan nulain chaw eitur a lo siam dawn leh dawn loh min lo zawt thuai bawk.Ka intihfai zawhah ka ei ang tih ka hrilha, dik tak chuan engmah ei chakna ka nei lo.

Khumah ka let tawp ringawt, ka u leh Ruby ka mitthlaah an inlan chhawk sek a, Ka u ka hua nge alakah ka thinrim satliah ka hre lo a, Ruby erawh ka ngaihtuah zawng ngawt pawn alaka ka thil lo tih tawh vang khan keimah ka indem lo thei lo.Ka thiltih tawhah hian ngaihtuahna fimtak ka hman thin avangin ka inchhir lehna tur ka tih awm ka la hre ngai lo, mahse, ani erawh a danglam ta tlat chu anih hi.

“Hmeichhe pakhat ka hmuh ngei ngei ngai a awm” Anggu-an phone a pick veleh ka ti nghal tawng,a rawn nui hak hak mai.

“Engatan?”

“Ka mamawh a ni tawp mai”

“Anih chuan ka zawnpui dawn che tihna mi?”

“Anih loh chuan hriilh che ka mamawh miah lo”

“Ok, kan zawng ang, ka thianpa hian hmeichhia zawnpui tura min sawm vawikhatna a nih vang hrim hrim pawn ka zawng ang tih ka chiang” thawveng zet hian a rawn ti leh a.

“Ka lawm e”ka ti hmuka.

“Mahse, khawiah nge zawn tan tur?”

“Ka hre bik lo..”

“A va mak awm ve, ahming te,chuan khawiah nge an chen tih te?” a rawn ti leh a.

“Chung zawng zawng chu hria ila chuan zawnpui ka ngai nang” a rum hak mai.

“Nang hi enge i hriat a?” mak tih hmel deuh hian a rawn ti leh a.

“Engmah ka hre lo,engpawh nise zanin  kha thulh suh ang che’ ka ti leh a, min chhan let hmain ka dah zui daih bawk.

Zingah a inluah ah khan ka va kala,mahse, a lo awm tawh lo,khawiah nge a awmzui tak ka zawh lahin an hre der lo lehnghal.Hmeichhe mak leh danglam bik a nih zia ka chiang tawlh tawlh mai.Engvanga hmuh tum nge ka nih ka inzawt a, a chhan a awm lo..Hmuh ka duh a ni tawp mai.Ahma khan ka hriat duh kha awlsam takin ka hre mai a,mahse tuntum chu khatiang ang kha a ni ta lo,an khaw lama biakpawh na tur,ahmaa  ka zawn tir khan a neia, mahse, tumah a be pawp thei lo.Muangchang deuh chuan zawng ila ka zawng hmu tho ang, mahse, hmuh nghal ka duhna in a turin min tur a ni tawp mai,a thiannu hrep lah khan a number a lo thlak ve daih bawk.

Dar 5 ah Office ka chhuahsana, khar erawh kan la inkhar fel lo thung, a tlangpuiin khar hun thleng thleng hi ka awm ziah chuang lo zawk,Manager tha tawk tak ka neia, chuvangin a khar thleng hi chuan ka awm a tul lem lo.

“I chhuak dawn ami?” ka pain ka chhuak tur min lo zawta.

“Um,kalna tur ka neia..Hmanni a Sponsor lam panga min rawn bia tih ka hrilh che kha,zanin hi an show neih hun a nia”

“Lo thu lawk teh” tlemin mak ka ti deuh nangin ka thu ta tho.

“Enge?” ka Phone ka khawih pah mawlh mawlh a.

“I u te nen chawlh hmangin kan zin dawn emawni kan lo ti a”

“A tha khawp ang chu” ka ti awlsam mai,kumtin vawihnih tal hi chu hetiang hian an kal chhuak ziah miaua, a chang chuan keipawh ka kal ve tum a awm bawk.

“I kal ve hman angem? I u khan a call i pick lo a ti a” nia, pick lo,ka be peih tlat lo.

“Aih, hman lo ang.Engtikah nge kal in tih a?”

“Ka hre lo,kar tharah hian Naupang an exam zo dawna, chumi hun chu a tha ang te kan ti deuha” a ti leh a,ka bu ringawt.

“Ka kal dawn, in kal duh hun kha sawi ula Ticket ka lo en dawn nia” tih pahin ka dinga, ka jacket ipteah ka phone ka khung a.

“Um,thil pakhat..” a ti leh rih.Ka melh thla a,ka rilru a hmanhmawh tawh.

“Sawi la...”

“I u hian engpwh tise i farnu a ni tih theihnghilh ngai suh ang che, nangmah bak tumah neih a nei lo ania” nghet churh hian a ti a, ka bu nghut a,ka kut ka humruh a, ka pa hmuh loh turin ka jacket ipte ka zen daih bawk.

“Engpawh thleng se unau hi chu unau kan ni reng bawk ania” a ti leh ta fo.

“Ka hria lawm,chuvang takin ka ngawireng anih hi,mahse, Pa,pasal a nei tawha, kan ta aiin a pasal ta anihna a tam zawk ang chu” ka insum hman lo.

“A dik,mahse, kawppui inneih tak avang ngawt hian unau in nihna hi a dal ta tihna a ni lo,insum zel la,i tihsak theih apiang tihsak ang che,chu aia duh engmah ka nei lo ania” a ti leh a, a sawi dik,an unau ang chiaha awm turin min duh ngei ang tih ka hria.

Ka kalna tur ka thlen chuan mi an lo awm nual tawh,kan Motor hralhchhuahna dawr hmingin he Prog buatsaihna ah hian Co-Sponsored kan ni a,main tura min rawn dilna ka hnawlsak thung,diktak chuan ka ngainep hauh lo nangin infiama lam nise ka hnial lo zawk ngei ang tih ka chiang,Fashion show lam hi chu ka tuina a ni lem lo a, ka mimal ngaihdan tak min zawt phei se chuan kan thangchak lutuk tiin ka chhang ang, kan thawhchhuah nena inmil lo khawpin incheina leh intih changkanna hian min thing kual a,thil tak tak ti tura ke pen erawh kan thatchhia tih hi ka ngaihdan nghet tak a ni bawk.Mahse, mi tumah hi ka sawisel chuang lo, an nun a ni miaua.

“Ka pu helamah hian in table tur a awm” ka inher vuta, nia,amah kha...a mengphar deuh awka, mahse, a in control lehnghal mai.Helai hmunah hian engtin nge a lo awm ve tih lam ka rilruah a lang eih lo.

“Kan lawm e,kal ila..” ka tawngchhuak chang zet chuan ka chhungril a ka lawmna awm chu a khuhbo hneh kher thung.A bu nghat, hma a hruaia, Anggu-an min rawn zui bawk.Dawkan, mi pali zela kil theih turin an lo ruahmana, kan thutna turah ka hming a lo intar thlap bawk.Ka thutna tur chair min pawhchhuahsak tuma a kut a rawn lek chhuah rualin a kut tuamna ka en vat,mahse, a tuam na ka hmu ta lo.Nimin mai kha chuan a tuam ngei a,a dam thut anih ka ring hlauh lo.

“Angai lo ang, ka lawm e..” keimahin ka pawt chhuaka, ka thu thlaa, Dawhkan chunga ka hming inziak chu ka khup zui nghal hmak bawk.

“Mamawh in neih chuan min ko mai dawn nia,hun nuam tak hmang turin duhsakna ka hlan che u” a nui saka, min en miah lo in a kalsawn zui nghal mai bawk.

“Dar engzatah nge kan tan dawn?” Anggu-an a no tuai hauh hauh pahin a rawn ti a.

“Dar 8..tihtur dang i neih ka ring lo tawp” ka en a.

“Aih, nei nang, ih..Rinky te ina ka kawp zuai kha zanin hian a tel ve dawna, eeee, tunge kan zawn tur chu?”

“Angai leh tawh lo..”

“Enga?! Enge awmzia?” a rawn kun hnaia.

“Ka hmu tawh mawle..”

“Jamie, i awmdan hi tunlai chu mak ka ti riau ania” a ti leh a.

“Engmah mak a awm lo, i ngaihdan anih chu..” Remkimi rawn kal phei mek ka hmuh rualin ka hawisawn zui daih bawk.

“Remi te nen kan Table a in ang dawn tlat mai..a nuam dawn e” za zet hian a nui zui kur kur bawk..

“Hey,in tha em?’ Remkimi awin a rawn ti zui ve zat bawk.Muangchangin ka hawi chhuaka,kan inthen hnu atang khan ka be zui leh ta miah lo,min rawn biak pawh a tum nasa, mahse, ka duh tawh loh lakah ka let leh ngai lo miaua, engahmah ka ngai zui lo,na emaw khawhar pawh engmah a awm lo.Mahse,mak takin Hmeichhe dang kawp zeuh pawh nei loin thla ka tluan ve ta parha,ka fel ta viau pawh a ang.

“Tha lawm, i tha zawk maw?” panggai takin ka ti tha ve mai.Ka sira chair a pawt chhuaka, a rawn hruaitu ka en zawka, mahse, Ruby a lo ni tawh lo.Hmeichhe dang zawk, nia, ka thut ve chhung chuan a lo let leh tawh lo ang.

“Sumdawnna lam te..” min biak zui tum zet hian a ti leh a, ka bu nghut ringawt, ka phone ka en san zui daih bawk, nidang ang bawkin a nalh leh viau, a langsar leh larh tawh bawk,mahse, a hmaia make-up a belchhah luk mai chuan a tih lan mawi lam aiin a ti lang beh lek lek,Rody hmel,Make-up tel mang lo nen ka khaikhin ru zauh bawk.Amak teh e, nidanga ka ngaihpawimawh miah loh thlengin amah vangin ka ngahven ta viau zel chu a nih hi a.

Darkar khat lai kan thut hnuah chawlh kan nei ta hram, dik tak chuan eng amah kha ka mit han la tak a awm miah lo,hmeichhe incheina lam a tam hle a, Model te an nalh tlangpui tih zawng bak ka rilruah a awm miah lo, chu ai chuan Hmeiche pakhat, Tray a intur lam chi sem kual tu khan ka rilru a luah hnem zawk, engtia biak tan tur nge ka hre hauh lo nangin biak ngei erawh ka duh, a awmna hriat ka tum bawk.Ka hre ngei bawk ang.

“Ka va chhuak harh lawk ang,ka rei lo ang” Anggu-a hnenah ka ti a, a bu liam satliah mai,Remkimi nen an titi a, enge an sawi lam pawh ka lo ngaihven lo.

Pawnlam ka pana, midang chhuak ve an awm nual bawk,Gate an kalh veka, mahse, kan awmna Auditorum hi a hmun a rema,a compound chhungah Motor park na hmun tur zau tha zet a neia, chulam chu ka pan pheia,ka Car lam ka pana, hawng chuang loin ka nghenga, ka Cigarette ka phawrha, ka hip zui vang vang bawk,dik tak chuan ka zu tam lem lo,mahse, ka pai ve ziah tho.

“Aih, min khawih miah suh..” Hmeichhe aw fiak deuh thak hian a ti ri ka hria a, ka hawikual vata, Ruby aw a ang viau.

Ka dinna piah, tlem thim deuh laiah chuan hmeichhia leh mipa an ding duna, a thim deuh avangin an hmel erawh ka hmu chiang thei lo,mipa leh hmeichhia anni tih zawng ka hria.Chumi te chu annih leh nih loh ka hre lo, ka hawi kuala, tumah dang an tawng ka hriat phak mai tur ah awm ve awm ka hmu lo.Kan piah lam hla deuh hlekah chuan an ding bial laih thung.

“I thuruk tam zawk hretu ka ni a, tiang mai mai hian min ti hlek suh” mipa aw thum lam hian a ti leh duta, mi tawng lo ngaihthlak hi a mawi hauh lo tih ka hria, mahse, tu te nge annih ka hriat miau loh avang leh min hmuh chuan loh avangin pawi ka ti lem lo.

“Engpawh hria la pawi ka ti lo, mahse, min khawih  i tum leh chuan...?”hmeichhe aw bawk chuan a ti leh a,mahse, te that riin a zui nghal zat,ka Cigarette ka paiha, ka rap hlum a, muangchangin ka pan ta nge.

“Thianpa,thlah rawh,a duh loh kha” ka aw a nem fahran lo.An pahnihin an rawn hawi chhuaka, kan inhnaih bawka ka hmu chiang thei ta,ka rin ang ngeiin Ruby a lo ni chiah renga,mipa zawk erawh ka hre lo.

“Engmaw i lo sawi?” mipa zawk chuan min rawn ena,a rui a ang viau.

“Thlah rawh” abak engmah ka sawi lo.A thlaha, min rawn pana.Min rawn hnek a tum tih a awmdanah ka hria,a ban a rawn vai kual pawpa, ka thle zauha, min hnek thelha, a pai chawn bawk.Khawih ve enah ka en lo.

“I tha em?” Ruby ka ena, a hmel a zam hmel chu ka hmuh hmaih lo.

“En rawh...” a ti thata, ka lu a hai nghal chhawk bawk.Ka inher vuta, min rawn hnek leh tuma a rawn phar chu a ban rekah ka man beh saka, na zetin ka herh let nghek bawk,a ri thawta, a rak zui nghal tuar bawk.

“Khawngaihin thlah rawh...” tham tiak hian a rawn ti a, mahse, ka la thlah chuang lo,leiah ka nem thu thla hnawka, aban ka herhna ka la thlah dul chuang lo.

“Thlah hram rawh, a ban kha a tliak mai ang” ka kawngah ka hnung lam atangin a rawn kuaha, a chetdan chu ka beisei loh lutuk avangin ka ding khawng luh ringawt.

Ka thlah ta nge nge,Torch light eng zet hian ka hmai a rawn chhun nghal siaha, ka mit ka chhing zui nghal sawk mai,mahse, ka kawnga nghet zeta min kuah bettu zawk chuan min fan rawih rawih thung.

“Enge thleng?” mipa aw hian a ti thawta, ka mengchhuaka.Ka lu a hai deuh tlat bawk.

“Kan tha e...engmah a ni lo” ka ti hmuka, ka hmaiah en tawh loin ka khawih thluk pa zawk a en leh a.

“I tha em?” kun hnaih pahin a zuk ti a.

“Ka ban...a na lutuk..” a ti nawk nawk mai.

Ka kawnga kuahtu chuan min kuahna a thlaha, a kut a la sawn tur erawh rang fe hian a banrekah ka man beh saka,keimah si chetin ka pawt bet zui nghal hmiah bawk.

“Ka kal angai ania” zawi te hian a ti sepa, amah a inrintawk Na ka hmuh thin kha a bo vek.

“Ka hria, mahse, ka rualin le.Chuan hei hi tu nge?” kan bula thu sawp nuaih pa lamah chuan ka thle zauh bawk.

“Ih...ka hre lo..khawngaihin” ati bah nak mai..

“Kal ila...” tih pahin a kawngah ka kuaha, vawt a tih vang nge ka hre lo, a khur dar dar mai.

“Jamie,ka zawng che a,ehe...enge thleng a?” Hall luhna bulah kan intawka,keimah min en loin ka bula ding a en daih bawk.

“Hei,ka lo let dawn chiah..”

“Nang hi...nichin khan ka hmu che em?”

“I hmu ang, kan luh tirh khan kan table turah min hruai kha,chuan,Ruby..hei hi ka best,Anggu-a ania, kan lo thlen tirh khan i hmuh tawh kha,Bawiha, amah hi ania min zawnpui rawh ka tih che..Ruby anih hi..” enge ka tih lam chu nakinah ka la ngaihtuah ang, mahse, tuna ka duh ber chu amah humhim hi a ni tawp mai, eng lakah nge ka hum dawn erawh ka hre hauh thung lo.