STOP-5

Chapter- 5

“Khawiah nge ka drop dawn che?” ka ti hmuka,tun aia ka tawngkam bung lutuk ka huat tum hi a awm kher lo ang,min rawn melh zawka, hmalam a en leh daih bawk.Motorah a duh lo chung ka nawr lut luia,kha lai hmun kha midang ten mak an tih ka hlauh vanga chhuahsan ka ni lo, amah hian awmfal a mamawh zawk in ka hria, ka kuah chhung zawng khan min kuah let ve loin a ding khawng laha,hlauh nei niawm takin a ti dek bawk,Motor kan thlen veleh ka tlanchhuak pawpa, thui fe kan tlan hnuah a chenna ka hre lo tih ka ngaihtuah chhuak leh lawi.

“Kal zel rawh, kan thleng tep” a ti sepa, pawn lam a thlir dauh dauha,a sam chawlleng thliin a chhem len sak dar dar bawk.

Ka speed ka down a, muangchangin ka tlana, khawpui chhung kan tlanpel tep tawh,engmah kan sawi zui lo ve ve.”Tah khan ding rawh” a rawn ti a, min rawn en chuang lo.Kawngsir rem laiah ka dinga, kawngkhar hawnna a dap rak rak chu ka ena,min biak a tum miah lo anih hmel.

“Khawi lai takah nge i awm a?” Ka ti ta nge nge, min rawn en a,mahse a hawisawn lehnghal mai.

“He lai lawkah hian nimai” a ti hmaka,min hrilh dawn lo tawp tih a chiang,ka hawikuala, kawngkam zawng chu dawr vek a ni tih ka hria, mahse, min hrilh duh loh miau chuan zawt lui mahila awmzia a awm chuang lo.

“Ka lawm e, chuan,Mangtha le” a ti a, ka chhanna pawh nghak loin kawngkhar a hawng sawk sawka, a chhuak zui nghal a, dim te hian a rawn nem khar khap bawk.A kalna enzui ka tum zeta, mahse,ka rilru ka thlak lehnghal, chak fe hian ka tlanchhuak nghal a, ka dawk zawk a nimai, a piah lawka Kawngkawi awmah chuan chak fe hian ka tlanpheia,ka turn pawpa, ka tlan let lehnghala, mahse, ka hmu tawh lo,ka beisei sa a nih avangin mak ka ti chuang lo,ka drop na lai chak fein ka tlanpel pheia,kawngpeng thuam awma kan veng panna lamah ka tlan tlanga,ka Drop na atangin a lang thei tawh lo ang tih velah ka ding a, ka chuk zui nghal a, a chhukna lamah ka let lehnghala, ka beisei ang chiah ka hmu nghal zat bawk.

Muangchangin min tawk zawngin a rawn kal phei hnak hnaka, a phone a bih ngar bawk, khawlai a reh ruih tawha, mi veivak an awm tawh lo tluk a ni a, Motor a khat tawkin an tlan leh zauh thin tih loh chu engmah thawm dang awm loin a reh thuap bawk.

Min rawn su dawta, “nang maw?”min hmuh rualin a ti chhuak nghal that mai,mak tihna vangin a mel bial kal bawk.

“Keimah...”

“Ngatinge? Ih..i kal sia...” a ti bah nawk nawk mai.

“Ka lo let leh anih hi..” ka kekawr ipte ka zena, a hmaah tak ka ding a, ka melh run bawk.

“Eng...ok,kha chu ka buaina a nilo, i duh leh lo let la,i duh loh leh let lo la..” a nui haka, mahse, nuih zat vang niloin thinrim beidawng tihngaihna hre lo nui a ni tih a hmel dang lap maiah chuan a lang chiau viau thung.

“Khawiah nge i kal dawn?” min chhang tawh loin a thaw halha, min kal pelh tumin ka ding lamah a pen zui zat bawk, a mizia hi a chang chuan a ngeiawm viau a, a chang chuan a lawmawm tlat thung.

A kalna turah tak ka din khalh leh nghal hmaka, ngawirengin ka vei lamah pen leh mai a tuma, ka thinin a tuar tawh lo, a ban rekah ka chelh thuta, engmah sawi loin ka motor dahna lamah ka hnuk kal nghal a, a tang deuh nangin kan inlen hleih lutuk a, awmzia a awm lem lo, tlan pah titih hian min zui dat dat a, engmah a sawi tawh lo.

Motora ka nawr lut tur erawh a tal phat mai, hneh zetin a kawngah ka kuah beta, ka nawr lut luia, ka khar saka, ka lock zui hmak bawk,ka thutna tur lam ka pana, ka rin ang ngeiin hawn tumin a bei a, ka lut thawm pawh hre awmin a awm lo.

“Thu mai mai rawh” ka ti hmuka, a rawn hawia, Light ka on lo a, ka dinna lai lah thim lai a ni bawk nen a hmel ka hmu chiang thei lo thung.

“Ka chhuk duh”

“I chhuk dawn lo tih i hria lawm”

“Aih...enge i duh?” beidawng thinrim rawl a ni ta thung.

“Nangmah kha...” engvanga sawi ngawt nge ka nih ka hre bik lo.Ka duh chiah em pawh ka hre hek lo.Mahse thil pakhat erawh ka hria, humhim ka duh,eng lakah nge tih erawh ka hre chuang hauh lo thung.

“Engmah tihsual ka nei lo ka tih kha..” tham chal hian a ti a, enge sawi a tum chiah ka hre lo.

“I tisual ka tih ka hre miah lo” bul zet hian ka ti hmuk ringawt.Sawi miau hek lo i le.

“I u Pasal nen khan kan inzawm lo tak tak, khawngaihin min kal tir rawh, i hmuh phakah ka lo lang tawh lo ang tih ka tiam che” a aw a khur a, ka chhungril a deng dawt thung.

“Ka hria lawm..”ka ti ta nge nge.

“Maw? I hria anih si chuan tinge min zawn? “

“A chhan tamtak a awm”ngaihsam hmel fe hian  ka ti duh lek.A thaw hak ri ka hre zui zat bawk.

“Anih chuan engmah neih ka nei lo a, i duh zawng ka pe thei hek lo che,min kal tir rawh,haw ka duh”a aw a tham chal mai,khawngaihthlak hian a..

“Khapa kha tu nge?” a sawi ka haider lui a.

“Tu?”

“Amah kha, tibuai tu che kha..”

“Ka...ka hre lo..”dawt a sawi niin ka hre tlat thung.A hre ngei ngei ang tih an inbiak danah khan ka chiang.

“Anih chuan khawiah nge i haw dawn?”

“He lai piah lawkah hian ka tih kha..”

“Ok.a tha,kei pawh ka lo kal ang, In awmna Inah i lut lai ngei ka hmuh hma chuan ka kalsan dawn lo che” enge ka tih tak pawh ka hre lo e.

“Ni lo..chu chu i tan a pawimawh lo..”

“Aih., pawimawh tlat, ka u in i laka a tihsual ka rulhna ah ngai mai la..”

“Ni lo,chutiang in ka ngai lo, bakah amah khan thil a hriatsual vang anih kha,engmah ka duh lo, min kal tir rawh’

“Ka sawi ang kha i tih dawn phawt chuan i kal thei reng alawm”

“Ngatinge i sual em em a?” a ti chhuak ta nge nge.Ka nui hawk thung.

A thutna seat hnunglam a ngheng dawta, ka beisei loh tawpin a insut zui hraih bawk,light ka on ta nge nge, a mit a chhing tlata, a hmai mam nalh zetah chuan mittui a luang thla a,engvanga tap nge anih ka hre lo.Ka off leh a,Ka pawt hnaia, a tang lo, ka kuah bet ta nge nge,a chhan ka hre lo, a tap hian ka chhungril a fan a, hmeichhe tap ka hmuh vawikhatna a ni hauh si lo.Ka awmah a hmai a rawn phum kaka, chhuak zet hian a tap zui ta hlap hlap mai.

Reife chu engmah sawiloin a tap ka ngaithla a, a tah chhan hre duh em em mah ila ka zawt lo,a hnungah ka chul saka, a samah ka fawp vang vang bawk.Eng chen nge an thut ka hre lo,a tahna vanga a taksa khur a reh tial tiala, inlak hran tumin a che zui nghal a, mahse, ka thlah duh chuang lo.

“Ka haw thei lo alawm..amah kha ka awmna te fapa ania,min chhan nan i hnek ta sia...” tah chhuak insum aw hian a ti chhuak ta nge nge.

“Shh, a pawi lo, i haw angai hleinem” enge ka sawi tum chiah ka hre bik lo.

“Khawiah nge ka kal ang ka hre lo, ka thiannu lah a zin lai a ni bawk si,tumah han pan mai tur ka hre lo..”a hmai ka awmah a rawn phum leh a, tah chhuak insum tih hriat zet hian a khur leh nghal dar dar mai.

“Min ring rawh,rin ka harsa ang tih ka hria, mahse min ring phawt mai rawh”a samah ka fawp leh a,engmah a sawi ve lo thung.

“Engti kawngin nge ka rin ang che?”

“Lo en tawp mai rawh” tih bak engmah ka sawi lo.

Thil pakhat chiah tih tur ka hria, ni e, ka ti ngei ang..Dimtein ka nemsawna, min en lo in a thutna hnung lam a nghenga, a mit a nuai chat chat bawk.

Motor ka start a, phawk fe hian min rawn en a,”khawiah nge kan kal dawn?”

“Kan inah..”

“Aih..ka thei lo..” mangang tih hriat zet hian a ti lawi rat mai, mahse,ka hre lo der hmiah, ka rilru a tihtur lo lang hi ka thlak leh mai loh nan kan In ka thlen vat angai,engpawh thleng dawn se ka ti ngei bawk ang.

Kan kawtah Motor ka hung fela, mahse,chhuk tum awm pawn a awm eih lo, a thut ngaiin a thu fel at mai,a hma lawka hmeichhe mangang leh puih ngai hluah hluah kha chu a bo leh hmak tawh.

“Chhuk ila..” ka ti supa, min rawn ena, hmalam a en leh mai.

Kawngkhar ka hawnga, a thutna lam ka pana, ka hawn saka, mahse, a che chuang eih lo.

“Ook, a tha alawm,i chhuk duh loh tlat chuan ka pawm luh che angai a nimai” ka ti supa, a inrin hmain ka pawt a, min rawn nek deuh rawka,thinrim tih hriat zet hian a rum hak bawk,ka chawi chhuak nawlha, Motor kawngkhar ka darin ka nek khara,a kawngah ka vuan leh a,a tal phat mai.

“Keimahin ka kal ve thei ania” a ti ta nge nge,ka nui hawk mai, luhlul reuh lutuk, haw na tur pawh nei lo mangang kha tunah chuan a kawlh leh ta viau chu ania,engpawh nise min ti phur thei Hmeichhia a ni tih ka hre tawh tlat, thlah leh mai mai ka tum hek lo.

Inchhungah tumah an lo awm tawh lo, Light pawh a tam zawk a lo in Off tawh,a tlangpuiin ka haw hi chuan tumah an lo meng tawh lo ziah,ka haw hma khat viau bawk.

“Chho ila..” Step lamah ka thle buka,a kut suihin a ding fel at a, inchhung uluk zetin a ena, a zir chiang a ang ber.Mahse, engmah sawi loin min rawn zui ve ta tho.Ka room kawngkhar ka hawnga, light ka chhuah dawn khan on sa in pakhat ka daha,a thim lutuk lo.Ka jacket ka phelha,khumah ka theh thla a, ani erawh thu loin kawngkhar bulah a ding zum zat thung, ka pawngsual thut a hlau anih hmel,Khawngaihthlak hian a..

“Ka pa ka zuk be lawk ang, lo intifai la,kha lai kha Bathroom ania, towel pawh a chhungah a awm sa ang” ka ti supa, a bu nghauh ringawt, kawngkhar ka pana,ka chhuahsan lai pawn a la che chuang lo.

Ka pa room kawngkhar ka kika, ka beisei loh zetin ‘tu nge?” a rawn ti nghal mai,keimah ka nih thu leh biak ka duh lawk tih ka hriha,lut turin min rawn aua, a awah mak tihna a lang thei bawk.

Kawngkhar ka nem hawnga, a tlangpuiin room hi a kalh ngai lo,mahse, ka luh dawn apiangin ka kik hmasa ziah thung, hei hi chu kan chhungkuain kan chin than ve reng a ni bawk.Mak tih hmel deuh hian min lo ena,a demawm hran lo, zan dangah tiang hian ka ti ngai meuh lo a, mahse ka u chungchang ka zawh atang khan a la rei lo a, tunah a mut hnuah ka lut leh ta bawk.

“Enge ni ta?”lukhamin a inkam kanga.A khum mawngah ka thu thung.

“I lungawi lo ang tih ka hre sa nangin ka tih angai miau a...Nupui ka rawn ru”hei hi chu ka tum sa a ni bik lo.Mahse, ka hruai haw tawha, ka nupui anih mai loh chuan engmah nih tir tur dang a awm lo.A duh leh duh loh lam ka ngawipawimawh hek lo.

“Maw?!” ka rin ang ngeiin mak a ti tih a ti lang vek.A chhan tur awm ka rin hriat thei mai bawk, Nia, Remi nen kan inthen hnuah tumah kawp ngheh ka nei tlat lo.

“Nupui ka rawn ru..”ka ti nawn a.

“Um, mahse, nupui nei rual i ni tawha, thinrim na tur a awm hleinem le” dam thluam hian a ti ta thung, a sawi dik, nupui neih hun ka ni tawh,Tlangval nuam ka ti thina, Hmeichhe pakhat nena Inneihna hmingpu a phuarbeh nih ka duh ngai hek lo.Mahse, tunah chuan a danglam tlat,a chungah keimah ngeiin dik lo takin ka lo ti tawha, mawh ka phur niin ka hre tlat tawh.

“I beisei loh tak a ni dawna” ka ti leh supa, engmah sawi loin a bu nghut ringawt.

“Amah chu Rody-i ania, ka u nen a buaina nei kha...” a hmel a danglam nghala, a thinrim nge thildang erawh ka hre lo,a danglam chhung lah a rei hek lo.

“I sawi fiah deuh thei em?” ka beisei aia damin a ti ta zawk.Ka pa hi keimah ang bawka tawngkam no nei lo a ni a, mi hauh chiam lah a thiam loh zawng tak a ni bawk.Mahse, a kum a tam tial tiala, a zaidam tual tual thung.

“Engti zawngin?”ka ti ve thung.

“Ka fapa i ni a,ka hrechiang zo lo chung chein kei aia hrechiang che an awm kher lo ang, i thiltih engkimah i chiang thina,engkim i ngaihtuah hmasa vek zel bawk,a tuna i thil tihah pawh hian a chhan a tha tawk ang tih ka hria, i lo duh ve reng emaw thildang vang zawk pawh nise sawisel che ka tum chuang lo,Mahse,thil pakhat erawh i hria alawm, i U hian a thlah zalen dawn lo a, ama tan a hrehawm hle dawn, chutih hunah chuan i nupui anih angin a lamah i tan angai ang, mahse, lehlamah i farnu a awm thung ang..Ka duh ber chu in unau a in inngeih hi a ni tih i hria” a ti ta duah.

“Ka hria e, mahse, engmah thil tha lo a thleng lo ang” ka ti supa, diktak chuan ka inringtawk hauh lo, ka u mizia ka hria, Rody zawk erawh ka la hrechiang lo,engtin nge ka thiltih mek pawh hi a dawnsawn dawn ka hre hek lo.

“Ka ring che tih i hria alawm,kei chu Pa ka nih angin ka tanna tur pawh i hrechiang nghal anga,engmah thleng lo turin Control ang che”nghet churh hian a ti leh a, tawngkama chhang loin ka bu nghut ringawt.

“Khawiah nge Palai kan tirh dawn le? Naktuk zingah i Putea te ka lo bia anga,Makima tihtur nimahse i u te tihbuai rih loh a fuh ang” ka chhuak tawh tur min zawt leh rih.

“Amah ka lo be dawnnia..Mangtha phawt’ ka ti a, min mangtha ve a, an khaw hming kha chu ka la hria, mahse, chumi hma chuan ama rilru ka hneh hmasak angai.

Room ka lut thawm hriain a rawn hawi phawk hra mai,a landanah chuan Sazupui dan chep a ang phian bawk,khawngaih thla a la hliah hliah mai,a sam a chhipa a zial mum chu a hnawk deuh niaih a,a then a tla deuh a,a inhmeh zawk mah in ka hria.A la che sawn miah lo anih hmel bawk.

“I lo intifai tawh mi?” ka ti supa, a lu a thing ringawt.

“I Roomah hian min riah tir ve i tum lo ang tiraw?” a ti sepa, ka melh zawka,khuma ka jacket dah ka la leh a, Bathroom kawngka bula balbawm awmah ka vawm lut zui zat bawk.

“Ka thil sawi tur hi ngaithla la ka duh,ka sawi zawh hma chu engmah lo sawi lo la ka duh bawk, ka sawi zawh vek hnuah i duh min zawt thei ang” ka ti nghuta,Khum mawnglamah a thutna ep chiahin ka thu a, ka mitah tak min melh ran mai.Zam lo anga lan a tum nasa tih ka hre ru thei tlat bawk.

“Ka pa hnenah nupui tur ka hawn tih ka hrilh tawha, nangmah chhanhimna tura ka tih anih rualin a ni chiah lo ve tho bawk,i chunga ka lo tihsual tawh avanga i natna ka thlen che kha ka rulah i ngai mai dawn nia.Chuan,nupui tih khan a lem ni loin a tak tak a ni bawk a,Mipa kawp lai i neih leh neih loh ka zawt lo che erawh a dik lo maithei,engpawh nise ka tih chhan min zawt suh, kei pawn ka sawi tak ang bak kha engmah tih chhan ka neih ka hre bik lo ania” ka ti hmuka, a hmel a mak tihna lang chhuak chu ka ena, a mengphawk hra bawk..Mahse, mak takin a nui chhuak hak mai.Min ti hamhaih titih,engmah nuihna chhan tur ka sawi hauh si lo.

“I ngeiawm thin tih hre mahila tiang zawng kher kha chu ka duh lo ania..” a nui leh a, a nuih zawngin a hmui bul tawn tawn a khuar kek a, a inhmeh takzet.

“Khawi lai ber kha nge i duh loh?” ka inkuangkuah zui daih bawk.

“A vai khan,i puihna ka mamawh em ka hre chiah lo nangin min pui ta tho a, mahse, a bak kha chu engmah tih a ngai hran lo ania,in In hi a lian thawkhata, mikhual room pawh a awm ang chu” a then leh saka, tun tum chu nuihzat vang niloin tihluihna a ni ta thung.

“Ka sawi kha i man lo anih hmel,mikhual ni loin Nupui turin ka hruai haw che,a dang enge zawh duh i la neih?” ka ti a, ka tho zui a,ka T-shirt hak lai phelh tumin a tlangah ka vuana, rang zet hian a hawisawn vat bawk.

“I duh duh i ti ngawt thei lo ania”

‘Ka duh chu ka ti thin,ka hlawhtling ziah bawk” hawi let chuang loin ka ti leh hmuka, ka kawr ka thehthlaa,intihfai a mut vang vang ka duh.

“Mahse, engvangin nge hetiang i tih? Engmah tihsual ka nei hleinem”

“I nei lo tih ka hria, chuvang takin hei hi ka ti ka tih kha”

“I bulah ka tap a, chuvang chuan puih ka mamawh angin a lang mahna,mahse, i duh duh i ti ngawt thei chuang lo” a aw a chang fak mai.

“Ka duh duh ka ti anih pawhin a chhan a awm ang chu”

“Engmah chhan mumal a awm lo i tih kha”

“I laka ka tihsual rulhna ka tih kha”

“Hetiang i tih vanga min rul turah i in ngai anih chuan thil mak tak a ni ang,i u in min pawm ngai dawn lo tih kei aiin i chiang zawk”a sawi dik..A pawm ngai lo ang.

“Chuti chu ka u lam ngaihtuah loin Inneih na zawk i pawm ah ka ngai thei em?” ka hawi leta, mar auhin a thu a, a mal chungah a kut a daha,a hmer kawp tlat bawk.

“Aih, chutiang ka sawi lo...”

“Ok, engpawh nise ka chaua, mut ka mamawh, ka bulah i mu duh dawn lo tih ka hria,Khumah hian mu la, Sofaah khan ka rawn mu ang’ ka ti hmuka, min chhan let tum niawm takin a ang ziaua, mahse, a chip leh daih bawk.

Shower hnuaiah ka dinga, ka thiltih mek ka ngaihtuaha, kei pawn ka inhrethiam bik lo, eng buainaah nge ka intahluh ka hre hek lo,diktak chuan a sawi kha a dik,ka u nen kan indo tan dawn tihna a ni a, Rody tan min neih hi thil chakawm zawk zawk a ni lo chiang bal,chu mai piah lamah a thawi pawn kan la inzui chhin eih lo a, eng ang mipa nge ka nih a hre lo ang bawkin kei pawn ka hrechiang bik hek lo.Anggu-a ka ngaihtuah chhuak zawk,mak tih vangin a thi thei hial ang,kan seilenna in ang lo hi buaina a tling tawh pang a, chumai bakah ka u khan ama duhdana thil kal turin amah leh amah pawh a inbum duh ania, engtin nge a chet ang ka hre phak lo,mahse, ka ti tlang tawh,tuman an tihnat ka duh ngai lo ang, Inneihna hi enge anih chiah ka hre lo a, ka ngaihtuah ngai hek lo, engpawh ni rawhse, Nupui nei thei turin ka rilru ka siamfel tawha, ka tih tawhah hian ka tlanchhe thiang lo,ka nupui tur hi ka thian te leh chhungten an phut phah suau ang,mahse, pawi ka ti chuang lo.

Ka chhuah leh chuan Tukverh bulah a lo dinga, pawn lam a thlir vauh vauh bawk,a dinhmun tur leh a rilru tur ka ngaihtuahpui zauha,a khirh a ti ve hle ang,mumang emaw pawh a ti hial mahna.

“Inhnuaiah ka chhuk leh lawk dawn ania, tah khan i ding tlaivar dawn lo anih loh chuan mut a hun tawh” ka ti hluka, a rawn hawi nghal vat bawk.

“Ding tlaivar ta ila thil a danglam angem?” zawi fiah zet hian a ti khauh mai.

“Aih, engmah danglam tur a awm lo, ka thawmhnaw bawmah khan hak tur lo inzawn mai rawh’ ka ti a, min chhan hmain Kawngkhar ka pana, ka chhuak zui daih bawk.

A tul aia rei hret Inhnuaiah ka awm khawmuang luia, hun thawl pek a tul in ka hria,pawnah ka chhuaka,kawtzawl ka  kal tlanga,kan compound chhung tho,kan in ep a step awmah ka chho leha, helai hmun hi nipui laia inleng kawmna leh pangpar ho dahna a ni a, a hnuaiah Motor pahnih vel dah a dah theih bawk.

‘Hello...’ a ring chiah tihin Anggu-an a rawn pick nghal, ka then sak mai.

“I va pick rang ve,khawiah nge i awm?”

“In ka thleng chiah, enge thleng ta?” a rawn ti a.

“Engkim a nimai, chuan, naktuk zingah lo kal ang che”

“Engvangin? Mut rei ka duh ania”

“A pawimawh,i lo kal hunah i hmu mai ang” ka ti leh hmuka.

“Eng chu ni maw? Eee, khanu kha..tunge kha? Ruby nge Ludy zawk?”

“Ruby,amah kha zingah chuan i rawn hmu ang, chu pawh ka roomah..”

“Maw?! A rawn au nghek,ka off nghal hmak thung. Ka rin ang ngeiin a rawn call back nghala, ka reject hmak thung.

Room ka let chhoh leh chuan tumah an lo awm lo,mahse Bathroom lama thawm awm chuan a kal hla lo tih min hriat tir tho,Blanket dang ka la chhuaka, sofaah ka mu a, ka muhil hauh lo nangin ka mit ka chhing zui nghal daih bawk.Rei vak loah bathroom kawngkhar a ri raka, a rawn chhuak thawm ka hre zui zat,dimtein a pena, ka mutna bulah a rawn ding deuh vang vanga, reivakloah a kalsawn thawm ka hre leha, ka inlet thuka, ka roomah a ni a, engmah hi haider luih  tum a ngai pawn ka hre leh lo.

Ka khum bulah a dinga, a sir zawng deuha awm ka nih avangin ka en tih a hre lo thung,ka T-shirt a ha a, a tan chuan a lian lam hret, a mal chanve aia thui mah a khuh thla hnak a,ka slipper a bun bawk,chu pawh a Pa slipper bun ang maiin a thawl bawk,a sam a thlaha, zep rual lohin a hmuhnawm.

Ka luah min rawn khawih an awm avangin ka harh a, peih lo zet hian ka mengchhuaka, ka awmna ka hai thelh bawk.

“I phone kha a ri char chara” Ruby a lo ni a, nizana ka thawmhnaw a hak kha ha tawh loin ama thawmhnaw pangngai a lo ha leh thlap tawh.

Ka phone ka ena,ka u a lo ni a, ka maimitchhing  sawk mai.

“Hello..”

“Engthil nge ka hriat tak hi?” a rawn au a ni ber,Ruby ka melh zawka.Hrethiam niawm tak hian a kalsawn ve mai bawk.

“Engthil nge dik lo awma?” zawi sup hian ka ti a.

“Nupui i ru a, chu pawh kha Ramhuai nu kha a ni lehnghala..”  a ring lam hret,ka phone ka la sawna,ka melh nghek bawk.Tun atangin buaina chu a intan ta der chu anih hi maw..