STOP- 11

Chapter- 11

Ka beisei loh lutukin a nui hak mai, a mit a de sar bawk.A a emaw tiin ka melh nghek thung.

‘Enge nuih tur awm?’ka aw a chang beng bawng viau,a nui hmel a tawp riai riaia,na tuar hmel a rawn lang leh zawka,mahse, a reh leh mai.A hmui a pet zauh a.

‘Engmah,sorry...’ a ti sepa, a kalsawna, diktak chuan  nuam ka ti miah lo.Ka thinrim anih pawn khatianga ti tur ka ni miah lo,a tel lo hian ka awm thei lo ang ka ti lo,mahse, ka hmuh phak lohah kal tak tak se chuan ka buai hle ang tih erawh ka chiang.

Ka thawmhnaw ka phelh sawk sawka, engmah sawi loin Bathroom ka pansana,min melh ru zauh zauh tih ka hre tho nangin ka haider hmak.

Ka chhuah leh chuan a lo awm tawh lo,Inhnuai lamah a awm anih ka ring mai, mahse, zuk chhuk a zuk zawn kher erawh tul ka ti lo.Library ka pana, hna tlem khawih a ngai tho a, bakah ka rilru tawt tlat hi tihfim ka ngai.

Laptop ka on a. kan sales leh Stock vel update ngai ho ka enkual zui nghala,tunthla a ral tepa, December thleng turin kar pawh tling lo chauh angai tawh, mahse,mak khawpin kan sales a lo up hman ta tho, nikum lam kha chuan December ah a tha over kha ania, mahse, tunkum chu November ah pawh nikum December a kan sales a pha thuak mai,thla a zawh meuh chuan a pel zawk hial maithei.

Ka phone a nghawr dar dara, en lem loin ka bana, ka pick zui nghal mai bawk.

‘Hello.’ Ka ti hmuka, Laptop lam ka melh daih thung.

‘Mal,in thlen na a rei  tawh em?” Marin-a a lo ni a.

‘Um, thleng tawh e,enge ni ta?” ka ti a.

‘Eng ni lo e, a tul chiah lo nangin hrilh ve hrim hrim che ka duha, in haw hnu lawk khan Remkimi kha a thilei a dik lo anih ka ring, a pum a na a..’a rawn ti a.

‘Ehe,a va zia lo ve, tunah engtin nge a awm a?’ ka ti a.Tlem chuan ka chhungril a khawih ve deuh.

‘Damdawiinah kan kalpuia, hei a zia deuh e,Ruby tan khan a nawm loh ka hlau deuha’ a rawn ti leh a, ka dem hran lo,Ruby hian kan inkawp thin tih a hre veka, Remi lah hian hriattir a tum lui ngar ngar emaw tih mai tur a ni bawk.

‘Ka lo kal ang’ ka ti ta nge nge.

‘Angai kher lo ania’ a rawn ti thuaia, mahse, ka rilru ka siamfel tawh,zanin chu engemaw tal ti a chhuah ka mamawh hrim hrim.An awmna Damdawiin hming ka zawta, a rawn sawia,ka thil tih lai ka save a,room ka pana,Ruby a lo awm tawh, khum atangin Tv a lo en a, ka lut thawm hraiin a rawn hawi vat bawk.

‘Ka chhuak dawn ania’ hrilh loh ngawt dik in ka hre lo.

‘Emergency a awm ami?’ amit lian kel kawl chuan min melh kal mai.

‘Aw,ka lo haw lo zawk maithei’ ka ti leh nghuta, a hmel a danglam zawka, mahse, a bu ta tho.Ka thawmhnaw hak lai chungah Jumper ka hak belh a, lukhum phiar ka khuma, Running shoe ka bun bawk.Ka insiam chhungin vawikhatmah a tawng lo,ka be zui hek lo.

Motor ka start thawm hraiin kan Driver, ka mimal a ka hman thin a rawn chhuak nghal var,engtin nge Motor thawm a hriat hman ka hre lo.

‘Ka kal ve angai em?’ a rawn kal hnaia.

‘Aih,ngai lo e, mahse ka lo haw lo matheia,inchunglam i lo ngaihven dawn nia’ ka ti a, a bu nghata, Gate hawng turin a kal zui nghal mai bawk.

Damdawiin ka pan ding nghala, Marin-a a lo la awm bawk,Casualtyah an lo daha, nachawkna in an jection a, a muhil tih min lo hrilh nghal thuai bawk.

‘Mala,i lo kal a ni maw?” Remkimi nu in a rawn ti a, ka bu ringawt.

‘Zanin chu riak turin min ti a, mahse, khum awl a awm tho a, a pawi lem lo.Nakin deuhah an sawn lut dawna’a ti leh a, rin ai takin a na anih hmel,ka rilruah thil engemaw a lo langa,kan chaweikhawmna ah khan Chakai an siam tela, kha kha a ei anih ka ring nghal mai,kan inkawp tirh lam hian Dintluanga te Hotelah Chakai an siam tui zia ka sawia, kan va ei duna, khami tum khan a eisuala, Damdawiin kan kala, eitawh lo turin an lo ti a,mahse, a hrereng anih si chuan engvangin nge a ei leh kher?Mahse, a ni lo thei tho bawk.

Darkar chanve aia tam kan awma, Ward a an sawn fel veleh Marin-a nen haw turin kan chhuahsana,Marina-a tlanliam hnuah tlanchhuak ve mai loin Motorah reife ka thu a, sana ka ena, Dar 10 a la ri lo, haw chakna pakhatmah ka nei lo,zanin chu a vawikhatnan Ruby tel lo a awm ka duh ve ta tlat.

Dintluanga ka calla, a pick mai lo,ka off a, ka call nawn leh tur chiah a rawn call back ve thung.

‘Enge ni ta?” a rawn ti duta, engemaw tih laklawh lai nei a ang viau.

‘Room awl i nei em?”engmah han thluaithlum ka nei lem lo.

‘Aahh,ka va hre mai lo, Single nge Double zawk?” a rawn ti a.Single ka duh tih ka hrilh ve mai,Inah ka haw anih chuan room dang hman ka tum hauh si lo a, mahse,keimaha awm ka duh tlat lawi bawk si avangin ka haw loh mai a tha ber.

‘Ok, lo nghak la,ka rawn call leh ang che’ a ti a.

‘Ok..’

‘A awm loh pawn ka room i hmang thei ania’ a rawn ti leha, nidawn tak, ama room a awm tak alawm.

Reivak loah a rawn call leha, Single Room pakhat a awm tih min rawn hrilh a, ka thaw deuh hawk mai, enge ka tih chiah hi a??

‘Ok,ka lawm hle mai,i tha em?” ka ti leh hnuhnawha, nimin khan Anggu-an a bialnu thar nen inneih an tum tih a sawi a, ka zawt ang ka ti zeta, ka hriat a tul anih chuan min la hrilh mai ang tiin ka ngawi leh ta zawk kha ania.

‘Um,tha..ka hrilhfel tawh kha..’a ti leh a.A hmeichhe kawp thar pawh min hrilh a tum lem lo a ang.Nia,hei chiah hi ania in ang min tihna chhan thin,kan tawngtam lo dun em em a, kan mimal chanchin midang share chiam kan ching lo ve ve bawk.

Darkar khat a liam leh chuan Hotelah ka awm hman tawh, muhil thei loin ka let sek a, vawikhatmah ka haw dawn leh dawn loh min zawt tur pawn min rawn be lo,msg takngial pawh engmah a rawn thawn chuang lo.Ka thuchhuak ta nge nge.Enge ka thinrim chhan ber?Ricky-a nen zep an neia  ka hriat vang kha a ni a,ngatinge ka zawh mai loh? Remi nen kan inkawp lai kha chuan a lungawilohin sawi mai se ka ti a, keipawn ka duh loh zawng tlang takin ka sawi ziah,mahse, ngatinge ani hi a nih tak vanga engmah sawi loa ka thinrimna ka up beh kher?...Khumah ka letthla leh hnawka,ka ban ka khama,a chhanna pahnih chiah a awm..Nia,a phat kual ka ringa, tin, thudik min hrilh ka hlau bawk tlat alawm.

Dintluanga ka call leh ta nge nge,a tlai tawh tih ka hria, mahse, intur ka mamawh, engmah hre lo a let tawp ka mamawh rih tlat.

‘In tur ka mamawh’phone a pick veleh ka ti nghal tawng,a rum hawk ri ka hre zui zat bawk.

‘Enge maw i hriat le?’ bak deuh hian a rawn ti hlur bawk.

‘Ka mamawh,i nau te call teh..Roomah lo dah rawh se’ka ti leh hmuk a.

‘Nang hi i nupui nen in buai em?”

‘Aih..’

‘OK,mahse, Nupui nei chunga hmeichhe dang nen Hotel room kha tih bawlhhlawh ka phal lo ania’a rawn ti leh a, ka ner nawk mai,Hmeichhe dang ngaihtuah chu khawi lamah,pakhat lek pawh hian buaina min thlen chu a nih hi a..Au nghek lo turin ka insehruh a.

‘Rawn dah rawh se, ka duh zawng i hriat kha..’ ka ti hluka, ka off zui nghal hmak bawk.

Minute 5 hnu velah Room an rawn kika, ka va hawn sak vata, Mipa pakhat,uniform ha ap hian ka intur a rawn keng a lo ni a, ka laksak a, ka khar zui leh nghal hmak bawk,Hotelah hian zu an pe chhuak reng em ka hre lo, mahse, ka duh anih chuan a awm ang tih ka chiang.

Ka phone nghawr dar darin min ti harha, peih lo zet hian ka mengchhuaka, mahse, ka mit ka chhing lehnghal vat bawk, ka lu a na lutuk,a na satliah pawh a ni lo, ka bek tawn tawnah an chhu emaw tih mai turin a na nghawr dawt dawt zawk,ka bawkkhup thawka, ka  tukhumah lukham ka daha,phone ri ngaihsak loh luih tumin ka beng ka hup zui daih,a tawp zui ve mai bawk.

Mahse, rei  lo teah a rawn ri leh ta tho, ka awmdan tidanglam chuang loin ka bana,tunge anih en turin ka meng ngam tawh rih lo.Ka beng bulah ka dah hnaia.

‘Hello..’ mutchhuak aw zet hian ka ti sup bawk.

‘Sir, Good Morning, vawiin lam hi i rawn Office dawn em tih ka hre duha?” ka manager a lo ni a.

‘Ka tum,enge ni ta?”

‘Nimin lama lo kal Mechanic te Conference chungchang rawn be tu che khan  a nghak che a” LALPA leh...Mechanic te hian kumtin vawikhat tal Training /Conference an nei thina, he sumdawnna ka kalpui ve hnu hian State angah vek kan la kal chhuaka, Tun kum hi kan dawn hun a ni ve ta thunga,, North east lam bik chauh a nih rualin an uluk em em a,a hun a thlen hmain Company mi leh sa pakhat talin a hmun tur en felin an kal hmasa thin a,nimin lama lo thleng a ni a, vawiin a inbe chiang tura inthlah kan ni a,Training tur te hi Mechanic leh Supervisor sawm atanga sawmhnih rual anni thina,tih mai mai chi a ni lo.

‘Ka lo kal ang,eitur a lo pe ula...’

‘Ok, dar engzatah nge i lo thlen theih ang?’ a ti leh ta fo.

‘Tunah dar engzat nge?”

‘Dar 12 a la ri lo deuh..’ hahthlak hian aw...

‘Ka lo thleng har lo ang’ ka ti leh a, ka off a, ka phone ka thehsawn nghal daih bawk.Ka thin a rim leh hlur tawh,hmeichhe pakhat vang hian engvangin nge tiang a ka khawsak hrep ni??

Peih lo zetin ka tho chhuaka, ka lu lah a nat dan ziaawm a hnekin a zual mah zawk.Ngaihthat loh na tur erawh a ni lo tih ka hria, zan lamah ka in nasat chuan tiang hian ka awm ziah,Nachhawkna ka ei a,ka zia leh mai zel bawk,mahse, tunah chuan eng damdawi mah ei tur a awm lo..Ka rim lah a tui fahran lo, Bathroom ka pana,shower ka hmang zuaia, ka zawh veleh Dintluanga ka biaa, ka bill vel nakinah min lo thawn turin ka ti a, a aw ve mai bawk.

Tlai thim dawnah In ka thleng ta chauh,mahse, vawikhatmah ka awmna chin hre turin Ruby-in min rawn be lo,office ka pan na kawngah damdawi ka lei a,kha khan ka lu na a tireh mai,mahse, ka mood erawh a danglam chuang lo fo.

Roomah ka chho tlanga,ka haw thawm a hria nge hre lo ka hre lo,min ngaihven tur pawn a rawn chhuak eih lo.Kawngkhar ka hawnga, Khumah a lo bawka,laptop a hma zawnah a awm bawk.ka thawm hriain phawk hra hian a rawn hawi chhuak vat a, rang fe in Laptop a khup thak bawk.Ka mood chhiat tawh sa nen a khawsak dan chuan min ti thinrim zual sauh, thin nawk nawk ka chak hluah hluah.

‘I lo haw chiah mi?” a ti a, a rawn tho a.Kawrlum phiar, lian deuh a haa, kekawr lum thawl hnakin a ha bawk.A sam a then a chhip lamah a bawk a, a hnuai lam erawh a thlah thung.A lang duhawm leh pek.

‘Aw..’ ka chhang tawi tek tawk viau.

‘Enge a an a?” ka thawmhnaw ka phelh laiin a rawn ti leh sapa, a sawi tum ka man chiah lo.

‘Eng chu?”

‘Eng nge ni ang? I kal chhan kha?” a hnar a tum dat bawk.

‘A tha..’ thil danglam deuh min zawt emaw keimah lam ka that leh that loh min zawt tura ka beisei anih chuan ka a hle ang.

‘A lawmawm chu,i inbual duh em?” a ti leh a.Nizana inthlahrung dek kha a ang leh ta lo.

‘Duh, ngatinge?”ka aw a nem lo.

‘Eng ni lo a, eitur ka lo zuk en dawn mi ka ti” a ti awlsam leh mai.

‘Aw, a that chu, ka inbual zawh veleh ka rawn ei ang’ ka ti nghuta, nizana ka chawei bak kha Coffee no khat tih loh  engmah ka la ei leh lo.

Tuilumah ka inchiah vang vanga, ka harh deuh hawkin ka hria, Company staff lo kal lah kha thil duh uluk Over chi a lo ni a, kan conference room kha a pawm thei mai,mahse,eng eng emaw thlak danglam tur a sawi nuala, Mikhual lo kal tur te Hotel vel chungchang zawng zawng lah a uluk lam mah bawk, an zuk kal hian tiang tak hian an lo buaipui tih pawh ka lo hre lem lo,a  senso lamah buaina ka nei hran lo.Bakah an mahni staff te theuh kalna tur an rawn intum vek dawna,a thenin Staff pathum te an kal tir thina, a thenin pahnih.Conference chhunga ei leh in leh an veivahna bak engmah kan pawisa hmanna tur a awm lo thung.

Ka mithlaah Ruby hmel a lo langa, engvangin laptop kha ka hmuh hlau niawm taka a khup kher? Engpawh lo ti se enge hmuh hlauh tur awm? Ka thluak a vir zawk mai,ka intleuh sawk sawka, a laptop a keng lo anih chuan ka check sak thei vek ang.

Ka beisei ang ngeiin khumah a ngai ang angin a lo kalsan tak tak,nidang ang bawkin  ka thawmhnaw hak tur a lo dahchhuak sa vek a, hmanhmawh fe in ka inthawlha, a lo let leh hma a lo check hman ka duh, ka chet dan hi chetdan mawi lo a ni tih hre mah ila a thil zep ruk hi ka hriat a tul tlat,an inkawp lo angin hre tawh mah ila an lo inkawp ru thei, anih si loh chuan engmah zep ruk tur a awm ka hre hek lo.

Ka kuai kaua, a lock ka hawnga, fb a lang nghal at,a sirah Inbox open loh a awm va bawk, ka click a, ka beisei ruk ang ngeiin Ricky-a a lo ni a, ka lungphu a rang nghal dawt dawt mai.

‘A lo haw loh chhan i lo zawt dawn nia, dawt ka sawi lo ang..’ tih atangin a intana, keima chungchang an sawi anih hmel,mahse, Ruby-in ka chanchin mawi lo zawng engmah a sawi lo, ka ti thla zela, ka mit la tur ka hmu ta chiah.

‘Hre lo ang, nizan hmasa khan kan inbiak lai khan ka hnungah a lo ding renga’ Ruby thawnchhuah zawk.

‘Ehe,a va zia lo,mahse, a pawimawh lai a hriat loh chuan a tawk mai’ tiin Ricky-an a rawn reply a, an sawi dunna a tlar thla pat, mahse, enge an zep ruk ber an sawi lang chuang hauh lo.Ka hriat an duh lo hle a, an tan buaina ka ni tih erawh an sawi ve ve..Ka khup thawka, na zetin khum ka hnek pawp a, awmzia a nei thui lo nasa ngang mai.

Inhnuaiah ka chhukthla a, kitchenah kan nula te eisiam a lo puia, hei hi chu a lo awm tirh khan ti lo turin ka ti vek,mahse, awmzia a nei lo,hrilh pahin aman a ti ve zela, a eisiam lah ka pa duhzawng tak a lo ni lehzel nen ka khap ta lo law law.

‘Kan ei mai dawn mi?” a lo ti thuaia, ka bu ringawt, Dawhkan sira Chanchinbu awm chu ka la a, ka en kual a, engmah chhiar ber tur hre loin ka dah leh a, ka phone ka phawrha, ka tih ngai loh takin runluih ka chak tlat,tu hmeichhia mah hi midang thik tura runluih emaw ka la nei ngai lo,ka duh chu ka duh maia, ka duh tawh loh chuan ka kalsan mai bawk.Mahse, ‘ani ‘hi chu ‘ani’ a ni tlat.Ka nupui anih ang bawkin a pasal ka ni a, hmeichhe dang,mi hriat laih khawpa ka kawp tawh hi ka ngaihven anih chuan na a ti lo anih pawhin a induhtawkna lian lutuk hi chu a nghing ve tur a ni.

Remkimi number ka hmet chhuaka, ka call ta nge nge.

‘I tha em?” a pick veleh ka ti sup bawk,Ruby ka melh ru zauha,a plate ken lai muangchanga a dahthla chu ka hmuh hmaih lo,mahse, a rawn hawi chuang lo.

‘Aw, ka tha,nizanah i lo kal an ti a” chau hmel deuh hian a rawn ti leh a.

‘Kal e,i harh mai si lo a’ka ti leh supa, Ruby eitur rawn chhawp chhuak chu ngaihsak loh hmel fe hian ka awm lui tlat bawk.

‘Nia, a zia lo,i hria em? Chakai kha ka ei a”

‘Ka hria alawm, i ei tur i ngeih leh ngeih loh tur pawh kei aia hrechiang an awm hleinem’ ka ti lui leh salh.Ka bulah Ruby a rawn thu thlaa, min en loin ka eitur Soup a suaka, ka hmaah a rawn chhawp hnai nghal  bawk.A hmel dam thlapah chuan engmah a ngaihtuahawm a hriattheih loh.

‘Nia, i lo kal leh ngem?”

‘Ka lo tum ang,thil ka ei dawn chiaha’ ka ti leh a.

‘Min lo ei kep dawn nia,i lo kal leh ka lo beisei ang’ chauh hmel fe hian a rawn ti leh a, ka kal leh ang tih ka hrilha,phone ka off a,mahse,ka beisei leh ka tum angin Ruby hmelah engmah a lang tlat lo.Hei pawh thinrim belhna bawk.

‘Vawiin kha Airportah i kal hman angem?” ka insiam mawlh mawlh laiin a rawn ti a.Vawiin hi ka pa te lo haw a ni a ni a, kan Conference kan tan ve dawn chiah thung.

‘Hman lo,lo zuk kal rawh’ka ti nghuta, ka necktie dahna Drawer ka pawt hawnga.

Kha zan atang khan kan boruak in that lam a la pan ta miah lo, a zual mah zawk emaw ka ti hial,zantin ka haw hma ngai lo a, dar 10 hmain ka thleng mang lo, ka duh aiin Zu ka in nasa hret bawk,kan hna lamah kan buai chu thuhran nise ka ti lui a ni mah zawk.Zantin khum khatah kan mu a, mahse, kan insi ngai lo.Hei tak hi harsa ka tih lai ber a ni bawk.

Ni reilote chhung lek la ni mahse Remkimi nen kan inkawp angin kan lar leh ta laih tho mai, mahse, pawi ka ti lo,mak ka ti hek lo..Mizo kan ni miaua, helaia a thawia an hriat kha mel khat danah chuan an Confirma, a aia hla hretah phei chuan chiang tawh tak anni.Inbiak pawh hi a tul vang chauh tak takin kan inbia nimaiin ka hria,mahse, ka awmdan engmah tawngkam khat mahin a sawisel ngai lo,lawm tur ka ni em ka hre lo a, mahse, ka lawm lo chiang tih erawh ka hria.

‘Um, kan motor kan keng thei em?” a ti leh a, Dressing table lian zet hmaah ka dinga.

‘Keng rawh,ka u te lam an hman dawn lo..’ ka ti leh nghut a.

‘A that chu...ih..thil pakhat, ka pa a lo haw dawn chuan i awmdan i thlak deuh thei angem?” ka khawng nghal luh mai.

‘Enge sawi i tum chiah?” ka kekawr ipte ka zena, muangchangin ka inher a.

‘I haw tlai thina, bakah zu i in deuh ziah bawka...chuan?” a ngawi leh daih.Ka awmdan a chik miah lo emaw ka lo ti a, a lo hre khawp e.Mak takin ka chhungrilah nuam tihna a rawn awm nghal zauh bawk.

‘Chuan...?” chang zetin ka ti leh hmuka, ka chhungril a thilawm thup nan ka aw chang leh bung zet ka hmang ta thung.

‘Ih...Remi nen in chanchin hi?” a hmui a peta.Min en loin Tv lam a melh daih bawk.

‘Eng chungchang?” nawrluih ka chak lu hrat.

‘Sawichhuah kher hi ka duh miah lo a,mahse, in inkawp leh tih thawm hi ka pa hian a hriat ka duh lo a.’A tawp lam chu a riat nawi vek.

‘Ahhh...anih chu, a hre lo ang’ ka ti hmuka,ka inher leha,’kan inkawp lo’tih ka sawi thei reng. Ka Necktie ka pawt chip nghal a, Vawiin chu nizan lam ruah a sur avangin khawvawh dan a na lam hret.Jacket, ka taksa rem deuh zaiha thui ka haa, a chungah Over coat lian lam deuh ka hak thuah leh bawk.

Nilengin Confernce na lamah ka awm a, hmun danga min sawisel lehna tur ang chi engmah ka duh loh avangin tihsual palh awm thei lakah ka fimkhur takzet,dar hnih velah Msgin ka pa te lo thlen tawh thu Ruby-in min rawn hrilha, kan boruak dik loh hnuah ka hna kal Msg a min rawn biak leh hmasak ber a ni a, mahse, chu pawh ka pa chungchang a ni thung.

Office ka chhuahsan dawn chiah tihin Anggu-an min rawn calla,hepa pawh hi a lo haw hun tur kha naktuk a ni tawh.

‘Enge?” Hello pawh ka ti buai peih lo.

‘Khawnge i awm?”

‘Ka haw dawn chiah..’

‘Whatsappah Video clip tawite ka rawn thawn che kha aw,i hman veleh lo en teh’ a rawn ti a.Engtak ni maw?

‘Ok, mahse In ka thleng phawt ang,naktuk ami i lo haw hun kha?” ka ti leh a.

‘Um,mahse, ka thil rawn thawn che kha Ruby hmuhtir chi a ni lo ania’ ka chhungril a deng dawt mai, mak takin hlauhthawnna in min fan rawih rawih bawk.

‘Eng chungchang nge ni leh ta?”ka ti hluka.

‘I en hunah i hria ang, thil inthup lian pui a ni mai,eee...nang hi ka hnek chak lutuk che” a rawn tih zawm zat.