STOP -13

Chapter- 13

Muangchangin a rawn ding chhuaka,kei leh kei lo angin sawi mai tur ka haihchham ve tlat.Helaiah hian ka hmuh ka beisei loh dan chu pui tak a ni,chumai bakah Remkimi nen kan chanchin a lar tih hre mahila Ruby hmuh lai khera hetianga awm hi ka duhdan a ni hek lo.

‘Ruby...eheu! Jamie...” Anggu-a a rawn lang nghal zat bawk,tur zet hian min rawn melh a,a lungawi loh chuan tiang hian a awm fo thina, a huat zawng tawngkam hmang zeuh ila chuan kut a thawh dawn tih pawh kei aia hrechiang an awm kher lo hial ang.

‘Kan lo han chho ang,Rick..kal ila’ Ricky-a banah a va vuana, Ricky-a hamhaih hmel chu hawisawn nghal mahse ka hmu hman tho.

‘Anih phawt u’min rawn en lah pahin Ruby-i zawkin a rawn ti leha, tun tum chu a aw a pangngaia,a dam leh thlap tawh zawk.Stepa an kal chho chu ka en a, ka hriatthiam si loh hian ka awm a nuam lo zual sauh bawk.

‘Enge in tih dawna?” bung nghut hian Anggu-an min rawn ti leh a,ka en a, a hma lawka a thinrim hmel kha a lo bo leh tawh.Mahse, ka bula ding Remkimi erawh a hmu lo der hmak.

‘Emy-in nau a veia..”ka ti supa.A mitko a san awk duh chauh.

‘Anih chu, kan han chho ve phawt’tih leh inher a ruala.Biak leh hman miah lohin a kal zui nal nal bawk.

Emy te awmna lam kan pana, ka rilru erawh inchunglamah a awm daih thung, eng ti turin nge an kal ang? Ricky-a hmelah khan nuam lo tihna a lang a, Ruby erawh a tir lamah na tuar hmel,Anggu-a lah lawm lo hmel a pu bawka, mahse, an vai khan an kal ho tih erawh a awm dan atang khan a hriattheih lawi.Enge an tih ang?ka hriat ve si loh Ricky-a leh Anggu-a hriat theih ni lawi si chu??Keimah leh keimah ka la inthiam ru ta cheu.Mahse, hei hi Mihring kan ni tih tichiangtu chu a ni si alawm, kan dik lohna ai chuan tuemaw tihsual kan hmu lian zawk zel miau a.

Ka Phone a ri kauha, ka en vata,Anggu-a msg a lo ni a,ka opena,’ ka be duh che, tunah’tih zawng,ka beisei lawk sa a ni tho.

‘Ka va chhuak lawk ang’ Remkimi hnenah ka ti a.

‘I chho ve dawn mi? Ka lo kal ve ang’ a ti a, ka lu ka thing ringawt,tunah tak hi chuan ka thiam loh ni mahse ka haw hlur tho.

Pawnlam ka pana, Anggu-a numberah ka dial nghal bawk, vawikhat chauh a ring hman tihin a pick nghal mai.

‘Khawnge i awm a?” ka ti supa.

‘Pawnah..ka hmu che’ a ti hmuka, ka chhuak pheia, hall lai takah chuan in entir tur niawm tak an la thu nual.Pawnlam ka pana, ka hawi kuala, ka hmu mai lo.

‘Helamah’ tih ri ka hriaa, ka haw phei a, a sira Eichawp dawr lian vak lo bulah chuan a lo dinga, a phone ah tu emaw a be mawlh mawlh bawk.Ka chhuah hma lawk khan kan inbiaa, tu nge maw a lo biak leh chiam hman ni?!

Ka pan pheia, a phone a kawk zauha, ngawirengin a bula Bike ding nghengin ka ding ve nghala, ka kekawr ipte ka zena,Cigarette ka phawrha, pakhat ka la chhuaka, ka tana, ka hip zui vang vang bawk, mipui pun khawmna leh mi zingah hian ka zu khat viau,mahse, zanin chu ka mamawh tlat.

‘Le...sawifiah la” rawn din hnaih pahin a ti a, kei ang bawkin Cigarette a phawrh ve a, a tana,a hip ve vang vang bawk.

‘Eng ber chu?” ka ti supa, a sawitum ka hre lo ni loin ka haider lui ve hrim hrim.

‘Ka awmloh laia i chanchin an sawi zawng zawng hi chu ngaiah ka nei mai, a dik lo hulhual tih hre mahila ka lo haw phawt anga, an sawi ang hian i kawp leh  reng em tih ka fiah ang ka lo ti a, mahse, chu chu a tul ta miah lo,hetah hian Ruby mangang em emin a awma, nangin kha nu mai mai kha i rawn buaipuia..”a sawi tawp lamah chuan a sehchilh deuh nawk mai.

‘Ka buaipui lo,ka lo kalpui mai zawk’

‘Oh, chu chu buaipui nen enge a danglamna?”

‘Danglam tehreng mai,bakah Ruby lama i tang ta viau hi enge awmzia?” ka ti hmuka, ka meizial bung ka paiha,ka rap hlum a.

‘A lamah ka tang ni loin kei chu a dik zawk lamah ka tang thin’

‘Chuan,kei hi dik lo zawkah min ngaia, min ko meuhin min hau ta a’ ka nui hawk bawk.Ka nuih chhan erawh ka hre lo.

‘Ka hauh loh che chuan hau thei tu tur che midang ka hre lo,mahse i duh loh chuan engmah sawi ka tum lo’ a ti a.

‘I duh chuan i sawithei reng,mahse, i lo hmu em? Tu nge a rawn kalpui kha?”

‘Keimah nen kan lo kal,Ricky-a khan min rawn zawm veleh chiah bawk anih kha’

‘Tak tak?”

‘Aw, a call tlang thei lo chea, min rawn call a.Chuan tunah hian Ruati engmah hre loin a let reng tih i hria em?” a ti leh a, ka ding khawng luh mai.Makima nen an zin dun emaw ka ti a, mahse Makima tunah Silcharah a awma, ani hetah thichhawngin a let renga..Awmzia ka hre teh nuaih lo e.Mahse, min call tlang thei lo maw? Midang zawng zawng pawn an theih laiin engvangin nge a theih loh bik ang?

‘Ngatinge?” ka ti supa.

‘Ka la hre bik lo,ICU ah a awma, chuan,Ruby khan a buaipuia,a mangan tawh nen nang lahin natna dang i lo thlen sak leha..’ min dem ngawih ngawih tih a awah a hriat theih.Nia, kei pawh ka indem ni loin nuam lo ka ti a, ka inthiam lo ve chu anih hi..

‘Min call tlang thei lo chu amak hle mai’ ka ti hluka, a dang sawi mai tur ka hre lo.

‘Nia, kha chu engpawh nise a pawi ka ti,hriat mai hi a pawi lo a, hmuh kher kha chuan a dengna ve ang, inchung ka han chhoh khan a lo tapa, Ruati vanga mangang anih rualin nangmah vanga tap zawk anih ka ring..helaia koh chhuah che a sawi hi a hun a ni lo a, a hmun pawn a ni hek lo..mahse, tul ka ti tho..’ a ti leh duah.

‘Chho ila..’ ka ti hmuka,min rawn ena, ka a emaw a ti niin ka hria.

‘Khawiah maw?”

‘ICU ah chuan mawle,ka lo kal ve ang chu’

‘Aih, tunah chuan kan mamawh lo chein ka ring..chuan i duh aia tam ka sawi anih chuan ngaihdam ka dil nghal ania’ a ti leh a..ka bu ringawt, ka nun hman danah midang tumah an inrawlh ka duh ngai lo,mahse Anggu-a hi chu ka naupan lai atanga ka kawm leh ka unaupa ang maia ka en a ni a, kan inkawm rei tawha,kan inzui nasa chungin tun tum hi ka nun dan a sawisel ka hriat vawikhatna a ni a,Ka haw hran lo.

Ka chho ta lo law law, Remkimi an inah ka dah leha, ka mood hrethiam niawm takin a tawng lo,min biak pawh a tum bik lo.Amah ka dem lem lo thung, keimah hian beiseina ka siamsaka, ngampa taka ka bula khawsa turin ka daha, a tuartu chu kei bawk ka ni leh ta chiah bawk.

Ka pain amah in News a lo ena, kan nula te Kitchen lamah an awm anih ka ring mai,chaw hi kan ei hmain an ei tlangpuia,unau anni bawka room an intawma,an roomah Tv kan dahsak a,chawei lo a ka chhuah emaw hna vanga ka haw har tum hian a chang chuan an room lamah an lo kal hman thina, ka call mai zel bawk.Thil harsa a awm lem lo.

‘Ruby i rawn tlawh kual em?” ka pain min lo ti a,ka bu ringawt.

‘A cal tlang thei lo che a, a mangang reuha, kei lah vawiin chu ka nuam lo riaua, ka kalpui peih mang si lo a’ a ti leh a, Tv lam a thlir pah reng tho.

‘Engtin nge i awm a?’ ka ti a.

‘Engtin awm lo e, ka rit deuh mai zawk,Boruak vawt lutuk hian min hmet chau deuh aniang..eee,i Nu home te kha i tihsak tawh em?’ a ti leh a, min rawn en ta bawk.Ka nu khan a damlaiin Children home enkawl a nei thina, amah leh a thiannu in an enkawla, mahse, ka nu a awm loh takah khan a thiannu in amaha kalpui a tuma,ka pa in a phal lo,kan enkawl zui ta zela, tunah chuan ka nu thiannu kha a fa te an fel ta vak lo ve deuh bawk nen a inhnukdawk titiha, kan kutah a awm ta chawt.Ka pa phei hi chuan ‘i nu Home’ tiin a sawi kher zel.Keiin pawisa ka pe a, ka u in a enkawl tam ber thung.

‘Naktukah ka lo tihsak dawn nia, ka u khan naupang ho hruaichhuaha, bazar pui kha tha a ti a’ka ti a, Christmas thlen nan kar tam a awm tawh lo.

‘Kha lam kha chu in duh dan nitehse.Tunah chuan Ruby a awm ve ta bawka, a kutah hian awm tam sela, i u nen thawkdun rawh se’ a ti leh boha,ka bu ringawt.

‘Ka lo bia ang, ka han intifai lawk’ tih pahin Step ka pana.

‘I kal leh dawn lo ami?” a rawn ti leh a.

‘Ka hre lo,kal leh maithei,a riak maithei bawka’ ka ti ta ngawt,diktak chuan ka be lo hrim hrima, ngaihven tur pawn ka chho ve lo tih hria se engtin tak ngai ang maw???

Roomah ka chho a, khumah ka let tawp, chunglam ka ena, ngaihtuahna mumal ka pu thei lo,Ricky-a nen an nih vang khan ka thinrim ngei,mahse, enge ka nih bik? Chumai bakah Anggu-a khan tan tak takin a tan bur,a tah chhan lah kha min puh titih bawk,mahse, keimah vanga tap tur chuan a harsa ang tih a hriat loh vang a ni ve tho.Engtin pawh awm ila pawi ti hmel a pu ngai lo a, ka haw tlai emaw a bula ka riah loh pawh pawi ti awmin a awm ngai hek lo.Anggu-a khan an kal chhan a la hriatpui thlap leh ta zela, Ricky-a nen lah khan a ringhlel ve miah lo tih a chiang,Nia, engmah ka hriat ang a hre ve hleinem,Ruby in min call tlang thei lo tih a sawi a,mahse, ngatinge mi zawng zawngin min call tlang theih si?? Ka phone ka phawrha, min rawn call a tumna msg tala ka dawn leh dawn loh ka check a, engmah a awm lo.Ka thinrim hluah hluah,engvanga berin nge ka thinrim erawh ka hre chuang der bawk si lo.

Ruby ka call ta nge nge,a pick lo.Ka ti nawn leh ta tho.Ka pa vang tal pawn ka biak ngei ngei angai.

‘Hello..’ a tawp a tawpah chuan a rawn ti ta nge nge.A aw a zawi sepa, a chauh hmel hle bawk.

‘Khawiah nge i awm?” ka tum aiin ka aw a chang leh pek.

‘Damdawiinah bak khawiah nge ka awm ang?”

‘Ok,ka lo kal ang, eitur ka rawn ken dawn che em?’ ka ti leh hmuka.

‘Aih, lo kal angai lo,bakah ka ril a tam lo’ rang lutuk lam mah hian a rawn ti a,ka ner nawk mai.

‘I riak dawn tihna mi?”

‘Ka la hre lo,midang an lo kal loh chuan ka riah angai maithei’ a ti leh a, Ruati hi Ruby te nen khawkhat an ni a, mahse, anni unau pawh hi an naupan tet lai atangin a upa ber te bulah lehkha zirin an awm tawha,Ruby ai pawn an khua an chhuahsan hma zawka, tunah phei chuan an mahni in In nei ve in  a u mipa pakhat zawk te nupa nen an khawsa tawha,a nu leh pa erawh an khaw lamah huan te neiin an awm a, an kar tawn a ni ber.

‘A chhungte an awm ang chu’ ka ti leh supa.

‘Awm lo,khilamah an chhoh lai ania’

‘Ok,i riak dawn anih chuan min lo hrilh leh dawn nia’

‘Um’ a ti sepa, engmah ka sawi leh hmain a off ta daih bawk.Ka phone ka sirah ka theh pheia, engvanga dam lo nge tih pawh ka zawt lo tih ka hrechhuak leh chiah.

Ka pa nen inbe mangloin thil kan ei duna, ka chhuk thlak tirh khan a haw dawn leh dawn loh bawk min lo zawt leha, a la chian loh thu leh ka kal leh dawn tih ka sawi ta ngawt kha ania, kal khan enge ka va tih chuan ang ka hre miah lo, mahse, kal loh pawn Inah engmah tihtur ka nei chuang lo.

Chaw kan ei kham veleh ka chhuak zui chu a nimai, tlaia Ruby ka hmuh khan Sweat shrit leh Jogger pant a ha a, Uggs a bun bawka, khaw vawt vin tuk maiah hian  kawrlum dang a mamawh belh ka rin avanin Jacket pakhat leh Mufler ka ken saka, tul a lo ti lo viau anih leh ka hawn leh mai ang chu.Tunkum chu thlasik khaw nuam pawh kan hmu hleithei lo,ruah tui a tla reia, December thlaah pawh ruah a la tla leh thina, khua a hnim a, chhum em zing lo mahse a vawh dan kum dang nen tehkhin chi pawh a ni lo,a nat in a na ti ila a dik ber ang.

Damdawiin kawt maiah Motor dahna tur awl a lo awm nual tawh, ka indahfela, luh chhoh ka chakna leh hrehna a inzat reng.Sana ka en zawka, dar 9 a hnai thuak tawh,luh chhoh a theih angem ka hre lo, mahse, ka huphurh chuang lo.

Ka lut ta nge nge, a thawmhnaw ka kensak ka khai bawk.Inchung panna step lam panin ka kal a, ka rin ang ngeiin Guard a lo awm a, a lo khar vek bawk.

‘Inchung lamah ka chho thei angem?” ka ti a,min rawn en a.A hna a tlin hmel phian.

‘Enge i tih dawn? Riak tur nge?’a ti a.Min en uluk viau bawk.

‘A tul chuan ka riak ang,ICU ah khian ka kal chhan tur a awma’ ka ti leh a.He hospitalah hian kan thian pakhat Doctor thiam tak a awma, engmah harsa a awm hran lo, mahse, luh tlang leh tlang loh mai maiah ani tihbuai tul ka ti lo.

‘Awle,nia..kal la,a hun tawh chiah lo nangin’ a ti a, a kalhna a hawng zui rak rak bawk.

ICU kawtah an lo awm deuh laih laiha,Ruby emaw Ricky-a pawh ka hmu mai lo,thutna awl lah a awm hek lo.

‘I lo kal alaw?” mipa aw hian a rawn ti a, ka darah a rawn khawih zauh bawk.Ka hawi leta, Nelson-a a lo ni a.A nui var var bawk.

‘Um,nia,kan nu thiannu Ruati kha a awm a’tih pahin ICU lamah ka thle buk bawk.

‘Ka hria e, Innu pawh kan room lamah a awm alawm, lo kal la’ a ti a.A kalna lamah ka zui pheia, amah hi kan thian dangte hnen atanga hria ka ni a, tuai ni si lo,mahse, pa tih em em tur ni lawi si lo a ni a, Doctor tha tak a ni a, a mizia leh Doctor nih hi a inhmeh em em a,a thiam mai bakah a thawkrima, a la senior over lo nangin hriat a hlawh hle tawh.

Room a kan inzui lut thawmah a chhung a lo awm te an rawn hawi hra hlawma,mahse, Ruby ber pawh chu ka hmu chuang lo,room lian a ni lo a, hmuh lohna tur lai a awm hek lo.

‘Ruby Toiletah a lut lawka’ka rilru hria niawm takin  lo thu ve hmeichhe pahniha cher zawk chuan a lo ti a,min lo hria anih hmel, ka bu ringawt.Chair awl awmah ka thu thla ve nghala, ka thil khai ka bulah ka dah bawk,hetah Ruby a awma, mahse, Ricky-a leh Anggu-a khawiah nge an awm ang?Anggu-a lah ka kal pahin ka calla, a pick duh lo nge min chhang thei der lo.

Toilet kawngkhar a ri raka, ka hawi vata, Ruby a rawn chhuaka, min rawn hmu thut chu a mengphar deuh awka, a phu deuh zawk bawk.A tap nge a taksa lamah harsatna a nei ka hre lo,a pawr deuh phanga,a mit a sen ram bawk.

‘I lo thlenna a rei tawh em?’ zawi deuh sep hian min ti a,ka bula thutna ruakah chuan a rawn thu thla ve hnak bawk.

‘Aih, rei lo..enge tunah a an a?” ka ti a.

‘A zia deuh chu an tia,mahse, ka hrethiam chiah lo..’lawi deuh rat hian a ti a, a in sut deuh hraih bawk.

‘Mal,coffee aw...Ruby nang i in ngam em?” Nelson-an a rawn ti a.

‘Aih, ka duh lo mai ang, ka lawm’ a ti a, athen sak bawk.

‘Ok, duh loh lam ai chuan ngam lo a ni zawk em?” a nui a, rang zet hian min rawn melh a, hnuai lam a en leh nghal vat bawk.

‘Ngam e, ka in chak lo zawk’a ti leh thuai bawk, in ngam lohna chhan tur ka ngaihtuaha, ka hre lem lo.

Coffee min rawn pe a, Nelson-a a tawng mawlh mawlha, ka aw liam vel mai mai,ka rilruah thildang daih a awm tlat.Ruby ka melh leh zauh thina, min en lo in a phone lam a en ngara, tuemaw nen an inbia tih hriat takin a type deuh reng bawk.

‘Ka va en leh lawk ang aw’ tih leh thawh a ruala,ka tho ve nghal vut bawk.

‘Ka lo kal ang,eee.Jacket ka rawn ken che a,muffler pawh’ ka ti supa, min rawn ena, a mitah engemaw a lang zawka, mahse, a bo lehnghal mai bawk.

‘Lo kal ve duh lo mai rawh,engmah tih theih vak a awm lo’ a ti sapa, a jacket ka khaina Paper bag a rawn bana, ka pe a...phawrh pawh phawrh loin a khai chhuak zui mai bawk.

‘Ruati tiraw a hming kha?” Nelsona’n a rawn ti leh a.

‘Um..ngatinge?”

‘Ngati lo e, in vannei ka ti khawp mai,aaa..amah saw a vannei ber ’a ti leh a.

‘Eng ti zawngin maw?” a sawi awmzia ka man lo.

‘Khatiang khawpa risk sangah a  la dam saw mawle’

‘Oh,nia...’ ka ti supa, eng lam nge a natna pawh ka hre lo a, a risk a san leh san loh lah ka hre hek lo.

‘Naute kha thla 4 a ni tawha, chu pawh Doctor tel lo lehnghalin paih a tum ania,tunlai khawvelah mi zawng zawng hi an fing tawh emaw ka lo tia...engtin nge khatiang a tih theih zawk ni...bakah...’a sawi tawp lam engmah ka hre tawh lo...Nau a pai tih ka hre lo a, mahse, tu fa nge tih erawh tumah zawh ka ngai lo...Ka hmai ka tuai pawka, ka thaw hawk bawk.

Ka u in a hria angem? He thil lian lutuk hi a ni mai angem Ruby leh Ricky-an an lo zep chu??!!!