STOP- 19

Chapter- 19

‘Maw?! Malsawmtluang,tu nge ka nih i hria em?” min rawn kal hnaih pahin a ti that a,a mit a sen ram bawk.

‘Aw, hria e...ka u i ni a, nang chuan i nau ka nihna i chhu chat tawh thung’ ka ti leh supa, a pen lai a tawp chawt bawk.

‘I sawi dik, chuvang takin ka lak atangin engmah dawn inbeisei suh’

‘Ka beisei ngai pawh ka lo hre lo’ ka nui lui hawk bawk, ka u hi ka nu boral hma avangin ka nu ang maia ngaiin ka zui nasa a, min duat ngiang bawk.Mahse, keima ke a ka din hma chuan ka dil mahna, mahse ka lo dil anih pawhin ka pa pawisa atang thoin min pe ang tih ka chiang,keima puala sumdawnna bul ka tan hnuah phei hi chuan engmah ka dil ka hre lo,Pasal a nei tawh bawk nen ka tibuai khat hle zawk.Makpa te hnena thil dil kual dun dun hi ka zah zawng tak anih mai bakah Pathian zarah dil ngai in ka awm lo ve hranpa bawk.

‘I beisei ngai ka ti lo,mahse...’

‘Khawngaihin duhtawk tawh rawh u’ Ruby rawn tawng chhuak chuan a thu sawi lai sawi zo loin a tawp tir leh daih,ka kawngah a rawn kuaha, ka en thla a,a hmai dang lap maiah chuan manganna a lang thei a, engthil nge kha mitenawmpa khan a tih chiah ka hre lo.Hetiang taka hlauhlawpa awm tir tur hian enge a tih chiah chu Dintluanga ka la zawt mai ang.A vawikhatnan ka u Pasal ang ni loin Hmelma angin ka ngaihtuah ta chiah bawk.

‘Nia, kal tawh rawh, i pasal kha buaipui ngai anih kha’ ka ti leh sup a, min chhan tum niawm takin a ang ziaua,mahse a nui ta hak,min en loin Ruby a en a,hmuhsitna nen a melh a,a nuih dan  lah kha a zat vang ni loin hmuhsitna lam a ang mah zawk bawk.

‘I tha em?’ ka u kalsawn veleh ka ti a, kan dinna bula thutna tura siam, Far kung behchhana an kilh behah chuan ka thutpuia.

‘Aw...mahse..ka hlau ‘ ka darah a lu a rawn nghata.

‘Hlau suh,i bulah ka awm hi,mahse, engtin chiah nge a tih che?” a samah ka chula.

‘Engtinmah,helaia Naupang ho nen thla kan lo lak laiin a rawn kal ve a, min be duh tih a sawia, engmah sawi tur kan nei lo ka tih veleh khan min rawn phih deuha, Naupang ho kha an tlan darh veka,mahse..Dina kha a lo kala’ a tawp lam a zuih ral titih.

‘Ok...a tha vek e..Mahse, nidangah chuan ka tel loin khawiahmah kal tawh suh,Makima hi zu a in nasa a, a zu in hian a tibuai tawh niin a lang ania’ ka ti leh a, a samah ka fawp vang vang bawk.

‘Nia..mahse, chhungkua kan ni a, Inah pawh a duh duh hunah a lo kal thei a?’ a ti lawi leh rat, a sawi dik chiah, kan unauin inhmu thiam lo eng ang mah ila ka pa a damchhung chuan ka u hi kan inah a lo kal a bang dawn lo,chutiang bawkin Makima pawn ka pa a rawn hmuhna tur engmahin a dal hek lo.

‘Mala...’ ka chhan leh hmain Anggu-an min rawn ti a, ka hawi let nghal vat bawk.

‘An kal tawh mi?” ka ti a, Ruby inlak hran tum chu ngaipawimawh lo luiin ka kuah ngaiin ka kuah bet lui tlat bawk.

‘Aw, kal tawh, keini pawh hi kal ve mai kan duha’ tih pahin a rawn thu ve a.

‘Nia, kal rawh u..Dina kha a kal nghal nge?”

‘Kal nang, ama rualin lawm kan lo kal..in kal ve nghal dawn em?’ a ti leh a.

‘Kal nghal ang, mahse, ka pa te kha engtin nge an awm? Engmah hre lo se ka duh a’

‘Hre lo tawp ang..Naupangin an sawi loh chuan,Makima khan engmah buaina a siam zui hleinem, i u khan haw hma an ngai tih a sawi a, aman motor a khalh bawka...I u hi chu a ngaihtuahawm loh ania’ za lo zet hian a nui zui hak bawk.

Nia, a ngaihtuahawm ngai miah lo, engtiklai pawn amah a in enkawl thei a, a lu a zo vah bawk, a pasal ngei pawh hian a ngam lo tih chang ka nei zawk hial thin, mahse, midang erawh chuan a pasal a enkawl dan leh khuahkhirh dan hi an hre kher lo ang.A pasal hi hmeichhe dang nen an che khaw lo fo mai hi ka dem rualin dem loh rukna ka nei tel bawk,Mipa kan nih ang hian khuahkhirh kan duh lo,mahni induhtawkna kan nei lian em em vek.Hmeichhia pawn an nei lo ka ti lo,kan awmdan engkim min control tum leh min phuar beh tlat hi tu mahin kan duh hek lo.

Home kan chhuahsan chuan khua a tlai tawh,Anggu-a kan rualin a haw ve ta zawka, Ruby ngawi ngar mai chu ka mitsirin ka en leh zauh thina, pawnlam a thlir a, a sam tawn kim loh chu thliin a chhem leng dar dara, enge a ngaihtuah ang ka hre lo.Kan Boruak ipik churh mai chu tih zangkhai tumin Anggu-a a titi a, a khat tawkin ka zawm ve leh zauh thin a, Ruby erawh ngai a la awh lo tih hai rual lohin engmah a sawi ve lo, ama khawvelah a cheng niin ka hre ber.

Anggu-a kan thlah kuala,hmundanga peng kual loin In lam kan pan ding nghala,mahse, zan lam boruak anih tawh mai bakah Khawpui chhung chei en an lo la tam viau bawk nen Jamah kan tang leh fe a, In kan thlen meuh chuan Ruby a muhil bam tawh.

‘Kan thleng e..’ a darah ka khawiha..Dino-i leh a u rawn chhuak chu ka melh zawk bawk,lo chhuak kher lo se chuan a muhil lai hmel chu thlir rih ka duh ngei ang.

‘Uum...ka lo muhil daih a...’ a zi mara, a ham bai bai bawk.

‘A pawi miah lo,i muthilh theih chuan a tha zawk..’ka ti supa, min rawn en a, za vak lo hian a then sak bawk.

Motor hnung ka hawnga, kan thil hawn vel Dino-in  a la chhuaka,kan bag ka khai thung..

‘Chho ila..’ Ruby min rawn zui lut chu ka en a.

‘Um, lo han chho rawh, kan thil hawn hi kan dahfel pui lawk ang’ a ti a, ka chhan leh hmain Kitchen lam a pan zui nghal mai bawk,a lo awm tirh atang khan engmah ti lo turin ka hrilh thin,a mamawh tihsak tu tur an awm a, engmah a tih ve kher angai lo tih pawh ka hrilh tam tawh, mahse, a zawm thei lo,tihtur a hrilh rualin engkim aman a tihpui vek zela,eirawngbawl chenin a enpui vek, inchhung an tihfai leh insuk te pawh tihpui chang a nei tho,kan room phei chu midangin an khawih a phal lo bur,ka sawisel tum a piangin engmah tih tur awm lo a nin thu a sawi mai zela, tunah chuan hauh emaw hnial pawh ka tum buai tawh lo.Dawrah nise ka pa a thu chawta, kal ve bawk thin mahse Nitin a kal lem si lo a, engmah tihtur neih loh a ning hi ka dem lem lo.

Roomah ka chhoh sana, Bathroom lamah tuilumna ka va on leh rih, nizan khan kan inbual lo ve ve a,hun ka nei a a rem anih chuan zing leh zanah ka inbual ziah, mahse, nizan kha chuan midang nen Bathroom kan intawm mai bakah ka tum aia hmain ka muhil ta kha ania..Ruby lo chhoh hmain tui lo lum sa ila, a rualin kan inbual thei ang chu,Sex lam vang erawh a ni lo.

Ka thawmhnaw ka phelha,Balbawmah ka dah ve thlap, kan bag ken erawh ka dah tawp,khumah ka lawn a, Tv ka on a, en tur zawngin ka hmet kual dun dun bawk.Ka rin aiin Ruby a rawn chho har ta phian,ka phone ngawr dar dar chu en loin ka pick up thawr.

‘Hello..’ ka tv en lam ka melh reng tho.

‘Keimah Dina..in thleng tawh em?” Dintluanga a lo ni a, ka chhungrilah engemaw ka hriatthiam chiah si loh a lo lang nghal zawk bawk.

‘Aw, thleng deuh chiah,nangni zawk?’ ka ti let ve a.

‘La thleng lo ti ila kal kualna tur ka neia,Ruby a awm hnai em?” a rawn ti leh a,ka thu mar ta nge nge,Dintluanga nen hian kan cousin hoah chuan kan inkawm nasa ber nangin thil ho mai mai sawi turin kan in call khat viau.Ani pawh a ni a, keipawh ka ni bawk,kan inbia anih chuan a pawimawh a ni deuh tlangpui.

‘Awm hnai lo, enge ni?” ka aw ngaihthlak a nuam viau lo.

‘Vawiin khan ka sawi ta lo a.

‘Eng chu?” ka ti hluk.

‘Makima khan Ruby a lo rek beta...’ min deng dawt mai..

‘Maw?” ka aw a khur titih.Ka kut ka humruh tlat bawk.

‘An awmna lamah khan ka teikual mai mai kha ka va kala, naupang ho darh deuh hak kha ka hmu a, ka phei vata, Makima khan Ruby kha Far kungah khan a lo nawr beta, a lo reka..mahse a rei lo..’

‘Ka rawn be leh ang che’ min chhan let hmain ka off zui nghal hmak,ka chhungril thinrimna vanga sahal huam huam tih reh tumin ka mit ka chhinga, ka kut ka humruh tlat bawk.A lo phih deuh niin Ruby khan a sawi a, kha pawh kha ka duh lo, mahse, anihna takah chuan phih mai lo in a lo rek a..Na zetin Khum ka hnek nghek ringawt,lukhamah ka hmai ka phuma, vawi tamtak ka thinrim tawh thin, ka thinrim ber tum ti a sawi tur ber pawh ka hre tawh lo, mahse...tun aia ka thinrim zawk tum hi ka nunah ka la tawng lo tih erawh ka chiang.

‘I inbual tawh mi?” Kawngkhar inhawng ri ka hriat rualin Ruby awin a rawn ti a, mahse, ka che chuang lo.Engmah a sawi loh vangin ama chungah pawh ka thinrim tel tho tlat.

‘I tha em?” min rawn bawh titiha, ka darah a rawn fawp zui zat bawk.

‘Engvangin nge i sawi loh?” ka aw a ring lo, mahse, a hre phak ang tih ka hria.

‘Eng chu?” a inbengkanga.

‘A vaiin..’ ka inlet thawka,a mitah tak ka melh ngur bawk.

‘Eng..engmaw ka sawi loh?” a chil a lem khalh bawk.

‘Makima khan a phih che nge a rek che?”

‘Oh...’ a hmui a hup a,a tawlhsawn nghal daih bawk.Ka thu chhuaka, khum atanga chhuk a tum chu ka man beta, ka pawt hnai rawk bawk.

‘Enge thil zep hi a tulna? nangmah ni loin Ruati nen an inkawp tih ka hre veka, chubak enge zep tur la awm fo? I tan enge ka nih a?” a tawp lam chu ka au a ni ber.

‘Ih...ih...chutiang lam a ni lo,eng lo..’ sawi zo thei loin a chil a lem a, a hmelah manganna a lang chhuak chiang viau bawk.Eng hi nge a hlauh fo ka hrethiam hlawl lo.

‘I pasal ka ni tih hi i lo la pawm ngai miah lo zawk anih hi..’ ka vawnna ka thlaha,ka nem deuh nawk bawk.

Khum atangin ka ke ka hlangthla a, ka lu ka dawm zui vang vang bawk’chutiang a ni lo’ ka nghawngah a rawn kuaha ka darah a hmai a rawn phum kak bawk,dik tak chuan amah ka haw lo,mahse a thil zep hrat lutuk hi ka duh lo,a bulah ka awma, ama lamah ka tanga, ka venghim dawn tih ka hrilh chung pawha min ring lo niawm taka ka laka zep a nei fo mai hi ka hua a ni zawk.

‘Min reka, Ruati awmna ka hrilh duh loh vangin..mahse..ih,min rek na hman lo a, Dintluanga a lo kala..chuan, nangpawh’amah bawkin a ti leha, ka nghawng hnung lamah a hmuiin a rawn nawra.Min tih lungawi a tum tih ka hria.

‘A tirah khan ka zawt chea, i sawi mai thei lo ami?” tlemin ka aw a nem ta deuh.

‘Sawi chu ka duh lawm, mahse, enge thleng dawn ka hria..chuvangin ka sawi ta lo anih kha’ a ti leh sepa, a sawi dik zia chu keiman ka hrechiang, a tirah khan hria ila chuan Makima kha damin ka chhuah kher lo ang, ka chhuah anih pawhin a na hle ang..

‘Dintluanga’n min rawn hrilha’ ka ti leh supa.A kut ka laksaka,Khum atangin a chhuka, ka pawt hnaia ka mal chungah a rawn thu a, ka nghawngah a ban pahnihin a kuah a, ka mitah tak a en ran bawk.

‘Tuman an khawih nat che ka duh lo,bakah midang vanga kan nupa kan buai leh pawh ka duh lo..i hrethiam em?’ ka ti leh supa, a rawn kun hnaia, ka sam a khawih niap niap bawk.

‘Ka hria alawm, mahse, Ruati te chu ka Best a ni a, a tir atangin engkim ka hre bawka, ka tawpsan ngawt thei lo alawm’ a ti sepa, a insut hraih bawk.

‘Ka hria,mahse, ka ngen che..engmah i ti fel thei lo,chuvangin tunah chuan tawp tawh rawh se, helam hrim hrim chu sawi zui tawh lo ang..um..’

‘Ka lo tum ang, mahse...’

‘Shh...tunah chuan mahse lam engmah ka hre duh lo,inbual ila...mut hahdam kan mamawh ve ve, naktuk emaw tuk lehah in khuaah kan kal dawn kha’

‘Maw?” a ang pham mai..

‘Kan kal ang ka tih kha..’

‘Ka lawm e aw’ ka nghawngah a rawn kuah leha, ka darah a hmai a phum kak bawk.

‘Anih chuan lawmthusawina lam hi?’ ka chhaih a..

‘I duh duh’

‘Ok..tunah chuan inbual ila..a dang chu..’ khum lamah ka thle zauha, a nui hak hak bawk, a nui riah engmah nuih derna lam a lang lo, ngaihthlak a nuam a, min fan raih raih bawk.

A tukah Ka pa a lo haw a,kan zin tur chungchang bawk ka sawipui leha, Christmas leh kumthar inkarah dawr lam kan hawng dawn tho nangin ni rei vak lo kan awm loh pawn engkim a kal thei vek tho a,Buaina tur a awm lo.

‘Ka lo kal ve ang chu,Ruby nu leh pa pawh hmuh an chakawm alawm’ a ti a, ka awih thei lo zawk.

‘I peih phawt chuan a tha khawp ang chu,naktukah chhuak ila...New Year chu helamah hman tho kan ti a,vawiin lamah ken chhoh tur te lei ila kan ti a’ ka ti a.

‘A tha lawm, mahse, dawr inhawng a vang awm em mai’ a ti awlsam mai.A sawi dik tho,vawiinah chuan Kohhran thenkhatah ruai an la theh maitheia,Dawr inhawng pawh a vang pharh maithei bawk.

‘Anih chuan naktuk tuklehah kan kal mai zawk ang,ni 31 a kan let leh chuan a tawk mai dawn a’ ka ti leha,min hnial loin a bu leh mai.

Chhuak loin Inah ka awm nileng ta thak,tlai lamah Anggu-an min rawn calla, Pool khel tura lo kal an tum thu a rawn sawia, Inhnuai room pakhatah hian Pool khelhna hmun ka neia, hunawl kan neih chuan kan thian hoin kan khel fo mai, mahse, tunhnaiah chuan ka lut thla khat ta viau.

‘Lo kal ru,kan khel khat alawm..midang tunge lo kal tur awma?” ka ti a.

‘An awm nual, Ruatkima a lo haw bawka,bakah Ben-a pawh, Dintluanga hi ka la call lo a’ a rawn ti leha,Ruatkima hi kan kawm ve thin tho niin,a pa damlohna vangin reife chu Delhi lamah an awm tawha,an lo haw tih pawh ka lo hre lo,bakah a mizia hi chapo ve tak mai a ni a, ka ngaina lutuk lem lo bawk.

‘Ok, a that chu, lo kal ru..chaw ei nghal ula’ ka ti a.

‘Pawi miah lo,chuan Drinks lam hi?’ a nui a.

‘Ka hre lo,ti thei tho maithei, mahse kei chu ka ti lo ang’ ka nui hak bawk.Ka inkhat ka deuh,Ruby hian zu a lawm lem lo a, amah nen kan inkar a that viau hnu phei kha chuan ka hlauh vang lam ni loin a duh loh zawng tihluih ka duh loh vangin ka in ta meuh lo, reitak phei chu a la ni lo.

‘Aaah, i ti ve lo mai ang chu,i kawl hrim hrim em?’ a rawn ti leh a.

‘Um,tlem chu..mahse, snack lam chu engmah ka kawl lo’

‘Khalam chu ka rawn keng mai ang,kan lo kal har lo ang’ a rawn ti leh zat zata.

Inhnuaiah ka chhuk thlaa, Ruby ka hmu mai lo,pawnlam ka pana, Dino-i nen an lo awm a, Pangpar thenkhat an lo siamtha a, pot nen an lo inchhawp hnawk ram mai.

‘Enge in tiha?’ ka ti a, khawvawh lai lehnghalin a peih mai mai ka ti zawk.

‘Hei,a kung thi tawh leh thi mai tur ho hi kan paih a, bakah lei hi thlak an ngai tawh hlawm lutuk..’ min rawn en pahin a ti a,a kawrlum hak ban a pawt tawm chho a, a kekawr a bal liam bawk.

‘I peih mai mai e a’ka ti hluk ringawt.

‘Naaah, engmah tihtur a awm hleinem’ a ti awlsam mai.

‘Anggu-a te an lo kal dawna, chaw an ei nghal dawn bawka,a buaithlak angem?”

‘Aih, engmah buaithlak a awm lo..mahse, enge an lo tih dawna?” a thil khawih lai a khawih zawm mawlh mawlh tho.

‘Pool khelh an duha..i khel ve duh em?’

‘Teuh lo..’ a ner sak bawk.

‘Ok,mahse dah tawh la, a tlai tawh ania’

‘Kan zo tep..’

‘Ok,pali vel anni dawn ania aw, Dino..chawei tur kan nei anih chu aw’ Dino-i hnenah ka ti leh a, a bu nghauh ringawt, a hma chuan Nu Ruati’n a siam thina,Dino-in a pui ve zauh zauh chauh,mahse, Ruby lo awm hnu hi chuan Ruby zawkin a siam ta thung.Mahse, Nu Ruati duhdan pawh a ngaipawimawh thiam viau tho.Kha leh chen ama ta ang maiin Nu Ruati hian kan kitchen hi a lo enkawl tawh thina,tunah chuan Ruby a awm tawha, a thu thu pawn enkawl se a dik lo hran lo, mahse, chutiang ni loin Nu Ruati a awm anih chuan a rawn ve ziah a, an pahnihin an tidun mai zel thung.Mahse, Dino-i te unau an awm tho bawka, December thla chhung chawlh a la a,Dino-i leh Ruby-in Kitchen lam chu an chang ta chawt.

Anggu-a te lo thlen hmain pool roomah ka chhuk thlaa, an tifai ziah bawka, engmah sawiselna tur a awm hran lo.Atthlak zetin ka mitthlaah Remkimi a lo lang teh tlat,he Roomah hian vawitamtak kan awmdun tawha, kan thian dangte tel emaw tel lo pawhin..chumai bakah engkim he Roomah hian a thleng tawh bawk.

Dar li velah an lo thleng a, Dintluanga pawh a rawn tel  bawk.Roomah kan chhuk thla nghal dial,ka pa pawh hian ka thiante hi a hresa deuh veka, engtin pawh awm ila min sawisel ngai lo,bakah han sawisel ngai khawpin kan awmdan ah tha lo a awm lem lo thin bawka,kartluanin hna ka thawka, weekendah erawh Party te,bakah inkhelh lam te pawh ka ti chauh thin.Weekdaysah hi chuan hlimhlawp lam engmah ka ti ngai lo ti ila a dik ang,thil danglam bik, inneih emaw thihna lam a nih ngawt loh chuan hna ka thulh khat viau bawk.Ka mimal ta niin, keima pual mahnise midang kuta daha,khawimaw laia nuamchena lo awm bo daih hi ka tih zawng a ni lem lo.

‘Nizan kha thil tha lo lam a thleng lo ang chu ka ti maia’ Dintluanga’n rawn thut thlak pahin a ti a.

‘Eng zawngin?” ka phone lam ka en lui tlat bawk.

‘Phone i off ta daih sia, ka rawn call nawn dawna, ka thulh leha’

‘Ok, engmah thleng a awm lo,mahse, min hrilha, ka lawm’ ka ti leh hmuk ringawt,ka lawm chiah em ka hre lo.

‘Nia, atir khan hrilh nghal che ka duha, mahse, thil thleng tur ka hmu lawkin ka hriaa, ka sawi ta lo anih kha’

‘A pawi lo...mahse, a zia lo khawp mai’ ka ti leh a.

‘A ho em mai, mi hrang pawh ka nih loh hi..’ a ti leh supa, za lo zetin ka then suk bawk.

‘Mal...Remi maw kan hmuh dawn tih laia midang hmuh daih zel tak chu a awm lo hu mai’ Ruatdika’n a rawn ti a, ka melh zawka,a inhnem tawh viau, an lo thlen tirh atang khan engmah khel ve loin a la in char char.

‘I sawi ho em maia..’ka chhan buai ngai loin Ben-an a rawn ti ta hlauh.

‘Ho ka ti lo nimaia, bakah Remi leh helai room pawh hi a inhmeh tawh a,kha te chu thilmak pawh a ni hleinem’ a la ti leh ta fo.Nia, kan inzui chhung kha kum tam tak nilo mahse kan inzui nasa a, amah lo pawn mak an ti tho.

‘Thil dang sawi teh,Ruby tan pawh a nuam nang’ Anggu-an a ti hmaka,a awah lawm vak lo ri a hriattheih bawk.

‘Hah..a hre chuang hleinem,tak takin ka sawi mai mai mawle,thinrimna chi pawh a ni lo,Mal, i in ve dawn lo mi?” a tih zawm leh zat.

‘Aih, in lo mai teh ang’

‘Eheu,kan mo thar chuan a control nasa che nimaw?’ a ti leh ham hama, a khawsak dan engkim mai hi ka huat zawng a ni ziah.

‘Control nang, ka dry ve hranpa,i in char chara, rawn khel ve rawh’ pangngai takin ka ti ta tho.

‘Peih lo, hetia thian ho a awm mai mai ka chak vangin lawm ka lo kal,inkhel tur ni loin’ a thle bak bawk.

‘ Anih chuan lo thu ngawi hle hle la, lo in char char rawh, i duh duh i sawia,mood i ti dik lo’Ben-an a ti a,a tum nghal vuau bawk.

‘Nimai e,nangpawh khel mai mai rawh,i bialnu tet tet  nen’ a ti leh nghata, Ben-a bialnu hi nu te lam, hmel pawh tha lem lo tak a ni a, mahse, Ben-a hian a then hleithei lo.Amah a lian bawk nen a zakzeh titih..

‘Ok, nanga Bialnu hmu lo ai chuan a tha zawk, ti khan lo in char char la,i tawng peih loh thlengin in la, Motorah kan load mai dawn che nia,chu chu a awlsam ber’ Bena bawkin a ti leh a, kan nui hawk hawk hlawm bawk.A mize ngeiawm leh tawngkam mei nei fek fek hi  a hma atangin Ben-a hian a chhan dan tawk a thiam ber ziaha, Ben-a a tawng ve tawh chuan rei a chhang ngam ngai lo.

Chawei tura min rawn koh meuh chuan dar 8 a hnai thuak tawh,kan khel khat bawka nuam kan ti tlang ngang aniang, tuman riltam lam pawh kan sawi lo,room chhung ka enkuala, Meizial khu a zam chuka,Ashtray a khat thur bawk.Chaw kan eikham hnu lawkah awm khawmuang tawh loin an haw a,Ruby eisiam an fak viau vek.

‘Dawrah i kal dawn em?” ka thawh hmain Ruby-in min rawn bia a.Inbual zo hlim tih hriat zet hian Bathrobe a haa, a lu a tuam tat bawk.A thawmhnaw bawm a hawnga, hak tur zawngin a keu kual dan dan bawk.

‘Kal maithei,ngatinge?”

‘Ka va bazar ang chu ka tia, i rualin ka lo chhuak ve dawn mawni? Driver dang an awm si lo a’ min en chuang loin a ti a.

‘Ka lo Bazar pui zawk dawn che mi?”

‘Ngai lo,lei vak tur pawh a awm lo ang, ka nu thil min chah leisak ka duh vang a ni mah zawk’ ti leh mai.

‘Um,Dawrlam chu ka chhuah dawn tho chuan kal lawk ka duha, ka pa hian dawr a hawng em?’ ka ti leha, inhnuaiah ka la chhuk thla lo..

‘Hawng lo,naktukah kan zin dawn tho chuan hawng lo law law mai ang a ti a,a lo kal ve tur mak ka tihzia hi..’ a ti hlaia, min rawn ena, a hmelah lawmna a lang chhuak chiang viau.

‘Nia, mak tak a ni..nih leh..thil i ei tawh em?” ka ti leh a.

‘Aih, ei nang, i la tho dawn lo mi?”

‘Tho tura min duh leh duh loh animai’ ka nui a,a ner nak mai.

‘Nghal em mai..tho la,a tlai tawh sin..’a kekawr hak tur lak chhuah a ha nghal sat sat bawk.

‘Pawisa i mamawh chuan i Ac ami kha hmang mai la,ka rawn transfer leh mai ang’ tho chuanglo in ka ti leh supa.

‘Ka Ac ah maw? Engvakmah a awm lo,ih...i sawi takah chuan ka khawl ve ang ang kha ka hmang zo titih a, ka mamawh ang ka ring’ a hmai a sen awp sawp bawk.

‘I Acah ka transfer zauh zauh alawm, a awm nual ka ring’ ngaipawimawh lo hmel fe hian ka ti leh a.

‘I sawi ngai si lo a..’

‘Min dil ngai chuang bik lo a, i mamawh ka rin thin vangin ka transfer alawm,hmeichhia hi chuan neuh neuh in ngah a’ ka nui a..

‘Nia, mahse, ka lawm e aw’

‘Pasal te hnena lawmthu sawi fo hi a tha a, mahse, a tul ber lo ania, lawmthusawina tura ka duh i hriat kha’ ka melh runa, a biang a sen leh awp awpa, tihngaihna hre lo hmel zet hian a lei min chhuahkhum zauh ringawt.A inhera, a thawmhnaw hak tur lam bawk a en leha, ka hawisawn thei lo,tiang tak hian nun hi a hlimawm thei ang tih ka lo ngaihtuah ngai lo..Nulat Tlangval kawngah a blind em em a, engkimah a hmasaber ka ni hial maithei..Remkimi nen khan engkim kan ti a, ka ngainep hauh lo,Nupuiah pawh lo nei ila pawi ka ti lo maithei, mahse, Nupui te laka hmasa ber nih hlutzia erawh ka zir chhuak kher lo maithei.

Bazarah ka dropa,Showroom lam ka pan san zui mai,pawisa hi min dil ngai lo a, mahse, a mamawh a a hman turin kan inneih hnu thlatin kha ka Ac tangin ka transfer ziah a, ka hrilh lem lo,tukinah ka hrilh ta chauh kha ania, engmah a lo khawih ngai bawk si lo nen ka transfer ho kha a ngai ang angin a lo la awma, a tlem chhe lo..

‘Hello..’

‘Mama, lo kal vat teh’ ka u a lo ni a, Motor ka khalh hi chuan a tlangpuiin Earphone ka hmang ziah.

‘Maw? Khawiah maw?’ ka ti hu ringawt, min mamawh lo leh min huatna bak pai miah lo kha anih tlat avangin mak tih loh theih a ni lo.

‘Address ka rawn thawn ang che,ih...thil engemaw a thleng ania, puih ka ngai..’ a rawn tap titih bawk..