STOP-20

Chapter- 20

‘Khawiah maw?”

‘Ka lo thawn ang che, lo kal vat’ phone a tawp zui hmak bawk.

Kan dawr ka la thleng dawn si lo,kawngsir dinna remchang ka en a.A la vang hrep zui, Chaltlang leh Chanmari inrinna laiah dinna tur a awm mai ringin ka tlan leh a,ka beisei ang ngeiin a lo awm reng bawk.

Ka phone ka en a, ka u msg a lo awm kalh,mahse, tlan let leh angai,bakah a rawn sawina hmun lah Hotel a ni a, enge a tih ang ka hrethiam pha bau lo.Ka turn pawpa, a awmna lam pana ka tlan pahin ka call bawk, mahse, a pick miah lo,ka ti nawn leha, a pick chuang lo, Makima numberah ka call leha, Switch Off..

Motor tawt lutuk lo mahse ka kal tumna hmun thleng turin minute 20  dawn ka tlan leh ta tho,Motor dahna tur a awm dawn lo tih ka hriat lawk avangin Mc ah ka daha, ka kalna tur lam panin kein ka kal ta zawk.Ka u ka call leh a,rang fe in a pick ta thung.

‘I lo thleng tawh mi?”

‘Aw, hei, Hotel kawtah ka dinga, khawiah ber maw ka lo kal dawn?” ka ti a, Room number a rawn sawia, hmanhmawh turin min rawn tur leh bawk.

Receptionist hnenah ka kal duhna room awmna lam zawh ka tum zeta, mahse, engemaw hian min mawlha, ka zawt ta lo, inchung panna lam ka zawt ta zawk,zawh ngai phei chu a ni lo,mahse, a bulah ka ding tawh miau a,ka mamawh min lo zawh tlat avangin ka zawt ta mai zawk.Elevator ka hman theih thu leh ka duh chuan Step zawk pawh tih a sawia, lawmthu ka hrilha, Lift lam ka pana, mahse, a inkhar hman chiah, nghah leh ai chuan tiin Step lam ka pana, ka tlan chho titih..

Room number ka en paha, ka kal na tur chu a kil berah a lo awma, kawngkhar ka kika, ka u in a rawn hawng nghal vat bawk,mahse, a hawng zau lo,a hmai deuh chiah a lang, min rawn pawt a, min phih lut a ni ber,a kalh leh nghala, a ngaihna hre lo zet hian ka en a,a hmai a dang var papa,engemaw thil rapthlak lutuk tawng tih hai rual a ni lo.

‘Eng nge thil awmzia?” ka ti hmuk.

‘Lo kal rawh,he lamah..’ tih pahin Bathroom kawngkhar niawm tak a hawng zui a, lut lo in amah zawk a tawlh hnung leh daih bawk.

Ka kal hnai a, LALPA.. ka thil va hmuh chu ka mumang lamah pawh ka la man chhin ngai loh khawpa rapthlak a ni tawp mai, che zui lo in ka ding khawng luh bawk.

‘Hei hi..i tih maw?” ka aw a zawi hle bawk.

‘Aih...ni lo,engmah ka ti lo,mahse, Mama,min chhan rawh’ ka hawileta, a mittui a tling pama, a hmai chu Paper ang maiin a var vek bawk.Ka hawi let leha, Bath- tub sira Ruati thisen nena tlu khawng reng chu ka en a, ka rilru buai nuaih nuaih tihfim tumin boruak ka hip lut kawk kawk bawk.

‘Hotel lam hi i hriattir em?”

‘Aih..ka thei lo alawm”

‘ I tih anih si loh chuan theih lohna tur engmah a awm lo, keiman ka ti ang..’ ka kekawr ipte ka zena,ka phone ka phawrha, mahse, rang lutukin min rawn pawh thlak sak.

‘Enge i tih a?’ ka tum aiin ka au ring hret.

‘I thei lo ka tih kha...’

‘Anih chuan ti hian i thih tir dawn tihna mi?”

‘Aih, tunah pawh khan a thi tawh zawk maithei asin,chhuak vat zawk ang, chuan..Ben-a nakinah be mai rawh, Ben-a ten an chingfel thei ang’ a hriatna a hloh then anih loh tal chuan a tih pawh chu a ni lo tak tak mahna.

Ka pan hnaia, a ban rek ka zuk khawiha, muang fan deuhin  a lo la phu zauh zauh, ka thaw huai mai,engmah hlauhthawn tur a awm lo.A thi em pawh a ni lo.

‘Khawi phone kha, Ben-a tunah ka call anga, a fel a ni mai,mahse, ti chuan kan kalsan thei lo ania’ ka ti leha, ka awah thinrimna tih lan loh tumin ka insum nasa ngiang bawk.A che hrata, mahse, ka phone min pek tum hmel a pu chuang lo.Ka kut ka dawha, a hmui a peta,a rilru a insual buai nasa anih hmel.Ka pan hnaia, ka phone ka laksaka, a tang deuh nangin ka pawh thlak sak ta tho.

Ben-a hi thil a ti thei hle tih sawi a ngai lo,a hnaah a hlawhtlin mai piahlamah Police lam pawh hmelhriat a nei tha tawk a, a duh phawt chuan mi pawh that ila min chhan thei ang tih ka chiang.

‘Hello...’

‘Ben..khawiah nge i awm?’

‘Office vawiin chu ka kal,hei Court lamah kan buai fel chiah,enge ni ta?” zangkhai vah hian a rawn ti a.

‘Buaina kan nei tlat mai’ ka ti a.

‘Eng zawngin?”

 Kan awmna leh Hmeichhe pakhat thisen nen a tlu reng kan hmuh thu te, mahse, amah hi ka u nen inhmelma sa annih vanga Police lam call thei lo kan ni tih ka hrilh nghala, a thaw hawk mai..

‘Mami emaw nangmah pawh kha roomah khan in kal tih tu emaw talin an hria em?”

‘Aih, kei chu tuman min hmu lo,mahse, lawk...’ ka u ka ena,

‘Hetah i kal tih tunge hria?’

‘Tumah, amah hian msg min rawn thawna, chuan ka kal nghala, tumah ka zawt lo’

Ok, i chiang em?” tawngka a min chhang loin a bu ringawt.

‘Ben,tuman min hmu lo chuan kan hre ve ve a,chuan...?’

‘In awmna kha tunah chhuahsan rawh u..vatin,abak chu keiman ka rawn ti ang, min ring tawp rawh’ midang hriat hlau niawm tak hian a aw a zawi hle bawk.

‘Ok, kan kal nghal e..ka ring che ania, thil thlen dan engmah ka la hre bik lo a, nakinah ka rawn be leh ang che’ ka ti supa, ka phone ka off nghala, ka kekawr ipteah ka thun nghal bawk.

‘Kal ang le,engemaw ken luh i nei em? Chuan thil khawih emaw i nei em?” ka ti a.

‘Aih, room ka luh atangin ka khawih chu Kawngkhar hawnna lai handle hi nimai, chu pawh Hanky ka hmanga’ a ti a, a thluak chu a fim lawi si,mahse, tunah engmah sawi hun a ni lo.Ruati Ban ka zuk khawihna lai kha ka u Hanky in ka hru faia,ka kut ze thla a lan ka duh lo.Kawngkhar hawnna ka vuana, ka kut lawnga khawih loin ka jacket tlangin ka vawn hnan a, ka u ka kai bawk,pawn lamah tumah an awm lo tih ka hmuh rualin ka kai chhuaka, dimtein ka khar zui hmak bawk.

Lift hmang loin stepah ka chhuk puia,vanneihthlak zetin tumah kan tawk lo hlauh,Hotel lian pangngai ve tak a ni a,Christmas vuak vet a ni bawk,mahse,mi tam hun anih ka rin nen ka luh pawh khan mi an tam lem lo.

‘Pangngai takin awm tum rawh, i landan kha a dik lo nasa ania, min lo chik viau chuan kan buai palh thei ania’ ka ti supa, a bu nghat nangin a hmai dang lap erawh a la ngai reng.

Kal pahin ka tih ngai loh takin ka titi thlaa, min chhang lo nangin ka duh duh ka sawi mai,mi kan tawk palh anih pawhin keimah niah danglamna an hmuh loh nana ti ka ni ber,Hotel kawngkhar ka pen chhuah rualin thil rit lutuk min delhtu laksak ang maiin ka zang hawk bawk,min thawng hle tih ka hre tho nangin ka hriat aia nasain min shock zawk anih hmel.

‘Motor i keng em?” ka ti a.

‘Aih, Taxi ka hmanga, i rualin ka lo haw mai ang’ a ti a, tlemin a pangngai leh deuh tawh tih a awki ah a hriattheih,nia..ka u kha a ni miaua, engmah hian an ti chau tak tak thei pawn ka hre lo.

‘Um, ka drop ang che,kal ila’ ka ti a, ka Motor dahna lam panin ka kal zui nghal mai, min rawn zui ve mai bawk,Diktak chuan ka u lo rinhlelh tur ka nei lo,bakah khatiang ti duh tur chu ka u bak an awm hek lo,mahse, enge ka tih chuan ang? Ka u a ni tlat si alawm le, chumai bakah a tih a ni ngei em tih engmah ka hre hek lo,thil thlen dan pawh ama sawi chin bak ka hre hek lo.Mahse, thil pakhat erawh ka chiang lehzual..Unau chu Unau kan lo ni,abak engmah sawifiahna tur a awm lo,a ril lutuka sawifiah tum chi lah a ni hek lo.

‘Ka chhuah hmain msg min rawn thawna, tunge anih ka hriat loh vangin ka call a, a reject zela’ kan tlanchhuah hnuah a ti chhuak leh ta chauh.Zawh ka tum rih lo a, ama sawi hun ka nghaka,a sawi ta chiah bawk.

‘Chuan?’ka ti hmuka, a bak engmah sawi tur ka hre lo, mahse, tun tum aia tawngkam nem deuh a tawng ka chak tum hi a la tam kher awm lo ve.

‘Msg bawkin amah hmu turin min rawn ti leha, chuan a rawn insawi bawka,engmah hmuhna chhan tur ka nei lo tih ka hrilha, mahse a pawimawh a ti tlata, tumah hrilh lo turin min ti bawka’ a ti leh a,ka melh zawka, mahse,pawnlam a en daih avangin a hmel ka hmu thei lo.Hmuthei pawh ni ila thudik a sawi leh sawi loh ka hre thei kher lo ang, Hmeichhe In control thei tak anih mai bakah ahma atangin angaituahna awm a hmelah a  hriat theih khat viau.

‘I va thlen in tunge kawngkhar lo hawn che?”

‘Tuman, ka kika, a reh vang vanga, ka nem chhina, a inhawng ta mai sia,chuan tumah ka hmu lo a, Bathroom lamah thawm ka hriaa, ka va en chuan tikhan a lo tlu a, ka buai vek,nangmah ka hrechhuak hmasa ber che a, ka lo call nghal che’a ti leh a.Rin dan tur ka thiam lo, a sawi dik maithei, dik lo maithei bawk,engpawhnise Ben-a lo nghah bak engmah tih theih a awm lo.

‘Ok, tunah tihtheih engmah kan nei lo, i tih a ni emaw ni lo emaw kan kalsan rih phawt a, engmah sawi loa ngawih tawp a tha ber ang, Ben-a erawh chu diktaka i chhan angai ang’ ka ti leh supa.

‘Nia, kha bak engmah han sawi belh tur ka hre lo,Ka pa hrilh ila a tha angem?’ a ti leh a.

‘Teuh lo’ ka ti hlur mai,a rilru hahna tur engmah siamsak ka duh lo.

Ka u te in kan thlen hma chuan tumah mah kan tawng leh ta lo,mahni rilru ve ve kan kawm a, kan ngaihtuah erawh thil pakhat anih ka ring thlap,ka mitthlaah Ruati hmel dang bui mai kha a lo langa, ka mit ka chhing sawk bawk, ka hlau lem lo,mahse, min shock lutuk mah mah,Ruby-i bulah enge ka sawi ang ka hre lo,a theih chhung chu sawi loh tawp zawk ka duh hial ang.

Dawr lam ka pan leh ta tho,haw ngawt ila Ruby-in a lo hriat tawh phei chuan ka in control zo lo maithei, Dawrah awm nileng ila,in ngaihtuah fim phawt ila, Bakah Ben-a chetdan lo nghah ngar ngar angai, Inah chuan sawi rik ka duh lo bur.

Ka Officeah ka thu hnawk mai,ka chau hlauh hluah, Ben-a call ka duh a, mahse, aman min lo biak nghah rih tha ka ti thung.Ka phone rawn nghawr thutah ka thu kang deuh awk mai, ka lo muhil sek hman anih hmel.

‘Aw, Ben..’

‘Khawnge i awm?”

‘Dawrah ka awm, enge chanchin ni ta?”

‘Damdawiinah an dah tawh, a la thi lo...mahse, thisen a hloh hnema, a lu a sawhna hle bawka, a harh mai a rinawm loh’

‘LALPA... a thi lo hlauh chu a va lawmawm si em..’ ka tum loh tawpin ka ti chhuak hluai bawk.

‘Nia, lawmawm tak a ni, mahse, tu nge amah kha?”

‘A thui lutuk,phone a sawi chi a ni lo,in Officeah ka lo kal ang’ ka ti a.

‘Aih, tunah chuan ka thiannu damlo tiin ka buai phili vel meka, i lo kal duh anih chuan Hospital lamah zawk’a nui hak bawk.Ka nui ve ringawt, a zat vang erawh a ni lo chiang.

‘Ni lo,inlan loh tawp ka duh zawk,eee.Chuan,amah kha i hria ang, Ruby Best kha ania’

‘Ouch, chu chu anih chu,ka hmu tawh tih ka hriaa, ka hmuhna ka hre tawh lo thunga,anih chuan Ruby i hrilh em?”

‘Aih,hrilh lo..Ka duhdan chuan keini lam atang chuan hre miah lo se tih hi”

‘Ok, i sawi tum ka man chiah lo nangin i duhdan chuan ni rawhse..mahse, keiman Hotel kha ka calla, ka thiannu pakhat biak ka duha, ka call a pick thei lo tiin ka sawia,hriat hun a awm maithei..’ka thaw hawk mai.

‘A hriat hun chu a la awm ang chu, tunah pawh a hre tawh reng maithei,engpawh nise i ngaihtuah fel mai ang tih ka chiang, ka ring che ka tih kha’ ka ti leha, engtin emaw tal ngaihtuah chhuak se ka ti takzet,keimahni lam tupawh kan lan rual rualin Ruby-in a ringhlel vek dawn tih ka chiang,chu chu ka duh lo, ka u lah mualpho taka man anih ka duh hek lo.

‘A chhungte an lo kal tawh em?” ka ti leha.

‘A phoneah khan a u number kan hmu a, kan call nghala, an lo kal mek..’

‘Ok, a that hlauh chu,anih chuan Ruby chu an lo hrilh mai ang’

‘Um,an lo kal hmain ka haw mai angai ang, anih loh chuan a u pawh chu ka hre bik si lova, bakah ka Bialnu ang dawn dawna sawi mai angai titih a’ a nuia..

‘Ka lawm takzet,i buai phah tih erawh ka hria, mahse i kutah kan in nghat tak tak’ ka ti leh a.

‘Jamie, thil hi min dil khat tih ka hria, min pui zawk zar zar, tun tum chauh hi tih takzeta min dil ka la hria, theihtawp ka chhuah ang, a boral em a ni lova, chuvangin lo hahdam rawh,engmah a thleng lo ang’ a rawn ti leh duah,rin ka duh lutuk mah mah.

‘Ole, ka hlauthawng lo, i awm alawm’

‘Lawk’’ka off hmain a rawn ti leh rih.

‘Um’

‘Mami hmelma anihna lai tak kha ka hre duh’

‘Makima nen an inkawp thin,thla hmasa lawk khan nau a ti tla bawk’

‘Makima fa tihna ni em?”

‘Um..’

‘Ok, ka hrethiam e..anih phawt’

A sawi ang ngeiin engmah ka dil ka la hre lo, an khawsak a nuam over lo va, rethei bakberh erawh anni tihna a ni lo,Law a zir laiin kan inhria a,kan inkawm nasa ta viau, hun a kal zela, Anggu-a ang em chuan ka kawmngeih hauh lo nangin a rintlak tih hre tur khawp chuan kan inkawm,bakah ka theihna apiangah ka tanpui tawh thina,an Insakna bungrua nise kan Motora kan phurhsak tum a tama, bill midang angin ka siamsak ngai hek lo,a let leh ka phut vang a ni lo,mahse, ka lo tih that tlemte kha tunah chuan a rulh letna hun a ni ta te pawh a ni ang.

Room kawngkhar an rawn kika, lut tura ka tih rualin kan Sales Manager a rawn luta, vawiin atangin Dawr kan hawng tan chauha, servicing lam phei chu engmah kan la la ngam lo, helam hi chu Showroom anih avangin Dawr duh an awm takah tiin kan hawng mai zawk,rin lawk ang ngeiin mi an tlem viau.

‘Sir,Pawisa kan mamawha’ tih pahin a mamawhna a ziah chhuah sa chu ka dawhkanah a rawn pharha.

Kan Accountant hian sum lam chu a buaipui vek thina,mahse, Thingtlang lam mi anih avangin Christmas chawlh hmangin a hawa, a bulah hian Cheque sign sa pahnih vel hi chu ka dah ziah,ka awm loh laia hman na tur tul a awm thut takin tih thuah a ni ber.Ka en kual zawr zawra,nidanga kan hmanna ngai tho, Fuel lam bawk, kan Dawr thin teah hian Cheque in Coupon kan lei lawk thina, thlatin bi tuk zat chiah awm lo mahse limit nei deuh roh in ka kalpui vek,kan sales azirin hei hi chu a tam tum a awm bawk.

‘Um, hei hi cheque a pek thin kha a ni em?” ka ti a.

‘Aw, keimah ka zuk kal mai ang chu ka ti a, Customer an awm lem lo bawka’a ti leha.

‘A that chu, ka haw hma angaia, in duh leh nidang aiin inkhar hma mai dawn nia, bakah naktukah ka zin chhuak dawna, i kutah a awm rih mai angai dawn a, a tul leh min rawn call mai dawn nia’ ka ti leha, kan zin tak tak erawh ka ring ta lem lo.

‘Ok, sir...ka theihtawp ka lo chhuah dawn nia’ a ti leha, safe ka hawnga, cheque ka phawrhchhuaka, ka signa, a dang pahnih sign sa ka pe tel bawk.

A chhuah hnu lawkah kei pawh ka chhuak ve nghala, Inah haw tlang mai ila a tha ka ti leh ta zawk,sana ka melh zawka, dar 2 a la ri lo deuha, tun thlengin Ruby-in min la rawn call miah lo erawh mak ka ti.A haw tawh angem ka hre lo,Damdawiinah an dah fel tawha, tu emaw tal chuan an hrilh a hun tawh.Ben-a sawi hmang khan a u in a hre tawha, chuti anih chuan Ruby-in a hriat a hun tawh.

Ngaihtuahna thar ka nei ta thut,ka ding a, Ruby ka call ta zawk,a haw tawh leh tawh loh pangngai takin ka zawt thei reng.

‘Hello...’ a awki zangkhai vah maiah chuan engmah dik lo a awm lo ang tih ka hrethiam nghal mai.

‘I haw tawh em?”

‘Aw, ka thleng chiah, khawnge i la awm?’ a rawn ti ve nghala.

‘Ka lo haw dawn meka, i la haw loh takin ka ti mawle’

‘Haw tawh e,fimkhur deuh khan rawn inkhalh la’ a ti zangkhai leh vah.

‘Yeap...Boss,i thu vek alawm’ ka nui a, ka hmel a hmu thei lo ka lawm zia chu pui tak a ni.Min hmu thei ngat se chuan ka nui lui tih a hre ngei dawn tlat atin ni.

In kan thlen in ka hmu mai lo,ka pain amahin Tv a lo ena,thil thleng ka mithlaah a lo lang nghal zat, ka lu ka thing nawk bawk.

Roomah ka chho tlanga,Ruby ka hmu mai lo,mahse, Bathroom lama thawm a awm avangin a inbual emaw anih ka ring mai,Khumah ka let thla tawpa, chunglam ka melh vang vang bawk.Phone vibrate ri ka hriat rualin ka tho a, ka phone emaw tiin ka kekawr ka dapa, a lo ni lo..Khum sir Cabinet hniam chen chawn chunga Ruby phone charge lai zawk ka bana,ka en a.Number ringawt.

Charger ka phawia,pick mai loin Bathroom lam ka panpuia,

‘Mate, i phone hi ka lo chhang dawn em?” kawngkhar kik pahin ka ti a.

‘Tu nge?”

‘Ka hre lo, number tawp, i Contact list a mi a ni lo’

‘Um, lo chhang la..ka inbual zo tep’ a rawn ti leh lang lang.

Khum lam ka pan leha, ka pick zui nghal bawk.’Hello..’

‘Mala mi?” Mipa aw hian a rawn ti a.

‘Aw, ni e, Ruby hi a inbual a,tu nge ka biak?”

‘Keimah, Rinsiama,Ruati u kha ka nia, hei..Ruati Damdawiinah a awma, lo hre ve se’

‘Ehe, ngatinge?” mak tih hmel fe hian ka ti let vat bawk.

‘A Accident ti mai ang,tunah chuan a la muhila, ngaihtuahawm chu a  ni lo, lo hre ve hrim hrim ula’ a rawn ti leha.

An awmna damdawiin hming ka zawt ngial, kan kal nghal tur thu ka hrilh bawk, mahse, chhungrilah inthiam lohna in min fan rawih rawih thung.Ka tih ni hauh lo mahse ka u chhan ka duh luatah ka tlanchhia a ni bera, engtin nge nuam ka tih tehlul ang?? Tiang hi ka ni ngai si lo, dik ni a ka hriat chu ka ti thin,ka chhiatpui dawn anih pawn ka ti tlang ziah tho,mahse, tunah enge ka tih tak hi??

‘Tu nge a?” Ruby aw hian a rawn ti a, a lo chhuah lai ka hre miah lo.

‘Ruati u..’

‘Maw? Ngatinge a?” muangchangin ka hawi leta,a mitah tak ka en lui a, tiang hian a mita en harsa ka la ti ngai lo.

‘Ruati a accident a, mahse, tunah chuan ngaihtuahawm a ni lo a ti a,insiam la, kan kal nghal mai a tha in ka hria’ ka ti leh supa, a ang pham mai..

‘Ngatinge? I ti tak tak em?’ mangan hmel zet hian a ban a phar hliai bawk.

‘Fiamthu chu ka sawi lo phawt, insiam rawh le, bakah a tha leh tawh an tih kha...’ dam thlapin ka ti leha,a la che chuang lo, ka tho a, ka pan hnaia, a darah ka ban pahnih ka daha,ka kuna, a mitah tak ka en run bawk.

‘Le...hahdam la, um..i bulah ka awm ka tih kha’

‘Aww, mahse...aaa, nia, ka’n insiam nghal lawk’ a ti buh nak mai.A mitah khan ka hriatthiam chiah si loh a lang zawka, mahse, a bo lehnghal daih avangin enge anih ka hre lo.

Ka pa hnenah kan kalna tur ka hrilha,kan zin tur cancel angai maithei tih ka sawi tel zauh bawk,Ruby thu ngawi ngar mai chu ka melh ru leh zauh thina, enge a ngaihtuah ang ka hre lo,Ruati nen hian an inbe pawp reng tih chu ka hria, Makima khan Ruati awmna a zawt tih nimin khan a sawia, ka lo zawt fiah ta lem lo, Ruati te chu an Inah a awm mai turah ka lo ngai ve ngawt kha ania,a awm loh leh a zin nimah turah ka dah bawk.

‘Accident tak tak anih i ring em?’ a rawn ti chhuak a,a aw a zawi hle bawk.

‘I sawi awmzia ka man chiah lo’ ka ti tha ve mai bawk.

‘Ruati mawle, a zin chhuak miah lo tih ka hria, engtin nge a accident ngawt theih ang?”

‘Motor loah pawh an Accident thei tho alawm,i hriat kha, a tlu sual palh pawh a ni theia’

‘Aih, chutiang anih ka ring lo...mahse,ih..aaa, ka sawi loh a tha zawk ang’ a ti leh halha, a chal a dawm vang vang bawk.

‘A muhil a ti a, a harh veleh i zawt dawn nia, amah bak tumah hrechiang an awm lo maithei a’

‘Nia, Hotelah a khawsa a, a u bulah chuan zin tur angin a insawia, chu pawh keimah chauhin ka hria a, ni lo..i hre ve zawk tihna ni em?” min deng dawt bawk.

‘I sawia ka hre chiah,diktak chuan ka ngaihven lem lo’ka aw a chang lam hret.

‘Sorry...i thinrimna tura sawi ka ni lo ania’ a ti sepa,ka nui hawk ringawt.

Damdawiinah reife kan awma, tumah hrechiang an awm tlat loh avangin rinthu sawi sep sep bak engmah tih theih a awm lo,Ruby rilru hah hmel chu en  harsa ka ti em em bawk,ka u tih a ni em ka hre lo,mahse, lo ti pawh nise enge ka tih chuan ang?

Kan haw hnuah pawh a tawng mang lo, riahpui a duha, mahse, Ruati u ten an hniala, chaw pawh tih tham a ei lo, kan zin tur thulh mai chi anih leh nih loh kan sawi ho a,kan lo tihfel sa vek tawh anih avangin kan cancel ta em lo,mahse,kan cham hun tur erawh kan pawt tawi ta thung.Mahse,kan beisei anga nuam erawh a ni ta lo chiang,Phone ri hlekah a beng a chhi hra a, chanchin a zawt chamchi bawk,mahni In lam thleng a ni chungin hlauhthawn nei ang maiin a ti hra a, a rilru Aizawl lamah a awm daih tih a hriat reng bawk.

‘Ruati u ka be zo chiaha..’ ka inbual zawha room ka luh veleh a lo ti nghala, a thu khawng auha, min melh ngar bawk.

Aizawlah kan let leh tawha, kan thlen na a la rei lo ,a inbual hmasaa,ka inbual ve leh ta chauh.’Chuan..?” ka ti supa, ka sam ka hru nawk nawk bawk.

‘Ruati a harh tawha’

‘Ehe..a va lawmawm ve,kal nghal i duh em?”

‘Aih, duh lo..a biak theih chuang loh an ti a,a thluak lamah fel lo a awm anih hmel,a tawng thei lo an ti’ka khawng nghal luh bawk.

‘Ekhai aw..a va lawmawm lem loh si ve..mahse, a tha leh mai ang’ ka ti supa, ka thawmhnaw hak tur a lo dah chhuah chu ka la kanga.Ka ha zui nghal mawlh mawlh bawk.

‘Nia, a zia lo...mahse, chu ai chuan hei hi ka hre duh,Ruati awmna Hotelah khan enge i tih?chu pawh a Accident ni ah berkher lehnghal” ka thil tih lai ka tawp chawta, ka thisen kal zawng zawng an tawp vek in ka hre hial bawk.