STOP-23

Chapter- 23

Thinrim tihngaihna hre bawk si lovin ka phone ka melh reng ringawt,a thinrim anih pawn tha takin kan sawi dun thei renga, chumai bakah ka insawifiah ve na hun min pe miah lo bawka, a fair hlawl lo.Khuma ka phone ka thehthlak rualin msg tone a ri ve chiah, rang lutukin ka la kang lehnghala,ka open vat.Ruby bawk a lo ni a.

‘Lo call rih suh, ka buai lawka’

Anih hle tak chu...ka insehruh teuh mai.Reply pawh ka reply ta lo,Anggu-a call ka tum zeta, ka thulh leh, kan nupa inkara midang lo tel ve sek hi a tul ber lo,ka best ni mahse a sawi tur chin leh a hriattur chin a awm tho.

Hna kal lovin nilengin Aarav-a te nupa ka chhuahpui ta zawk,Anggu-a bakah Dintluanga leh  Ben-a an tel ve bawka,mahse, Remkimi a tel lo thung, ka thaw huai mai, ka hmu peih rih hlawl lo.Hmuifang lamah kal an duha, Sialsuk tlawh an duh bawk,Nilengin hun nuam tak kan hmang ta tho, mahse, ka rilru erawh a kal ding viau lawi..

In ka thlen leh meuh chuan zan dar 7 a ri tawh,nileng khan Ruby-in min rawn call ta miah lo, a buai vanga ka call a pick lo anih chuan call back tur a ni a, mahse, a ti lo.Naktuk tukleh maiah  a lo haw tawh dawna,engmah boruak tha lo zawk thlen belh ka duh hek lo,mahse, min biak duh miau si loh chuan siamthat dan tur ka hre lo.

‘Vawiinah Ruby-in min rawn calla,naktuk ah zawk an lo haw dawn leh si a,a call tlang thei lo che a’ ka pain chawei mawlh mawlh pahin a ti a.

‘Nia, signal a tha lo a..Dino,ka lo ei ve nghal ang’ tih pahin ka thutna tur ka pawtchhuak zui zat bawk.Diktak chuan khawimaw laiah signal a awm lo zeuh pawh a ni maithei, mahse, Hmuifangah leh Sialsukah kha chuan biak tlang theih loh tur khawpa Signal problem engmah a awm lo tih ka chiang.

‘Um,anih chu..hruai angai lo ang a ti a,Ruati u te kha an hmanhmawh leh thut si a ni awm e’ a ti leh a, chhang loin ka bu ringawt, Anggu-a ten Dintluanga Hotelah chawei nghal an rawt nangin ka hniala, Dintluanga lahin kalna tur a neih thu a lo sawi ve bawk.

Reivak lo ka pa nen kan titi a, Room lam ka pan san ta zawk,mu chungin Tv ka en a, en tur ber hre loin ka hmet kual dun dun bawk.

Ka phone riin min ti harha, ka hmu mai lo,ka hawi kuala, chhuatah ka zuk hmu a, ka thlauh lai pawh ka hre lo,ka chhara, min rawn call tu ka ena, ka beisei loh zetin Ruby..

‘Hello...’ka tum aiin ka aw a bung lam hret.

‘I mu tawh nge i la haw lo?”

‘Khawi atangin maw?” ka thinrim ru tun bawk.

‘I thiante nen  in chhuak a ni lawmni? Ka pa khan a sawia’ pangngai takin a rawn ti dam leh thlap,engmah thinrimna nei awm pawn a awm lo,ngaihbel luih ngial ka tum pawn ka hlawhchham.

‘Aw, chhuak, ka thianpa Aarav-a leh a nupui an lo kal ka tih kha’

‘Um, ka hria lawm, Photo ka hmuh kha’

‘Khawiah?” ka thawn tlat lo, ama min rawn thawn kha kei leh Remkimi thudun lai chauh a ni a, a dang a hmu tho tih ka hre lo.

‘Instagram ah nizan khan Ben-an a upload nghal vek alawm’

‘Oh..’ ka ti sup ringawt, Instagram,Facebook..Twitter,engamah hi ka tuipui lem lo,mahse Ben-a leh Anggu-a hi chuan nuam ti tak anni, ka sawisel chuang hek lo.

‘Nizan kha ka sawifiah thei’ ka ti leh sup ringawt.

‘Eng ber chu?” ka bulah awm se chuan a mawng er nalh zetah khan ka beng ngei ang.

‘Remkim kha a kal ve dawn tih ka hre lo..kha khan i thin a tihrim chuan ka hre lo tak tak,i hmuh kha chu kan vaia thla kan lak dawna ka bula a rawn thut lai tak anih kha, abak kan thu dun hauh lo bawka’

‘Aaaah, ka thinrim hleinem...’ a nui hak hak bawk.A awmdan tehhrep chuan min ti hrilhhai let ling,a thinrim vangin call pawh a pick lo a, a reject bawk a.

‘Chuti maw?”

‘Aw, tak tak,mahse, nizana ka hmuh thut kha chuan tlemin a rim ve deuh’ a nui leh a, mahse, a zat vanga nui a ang ta lo.

‘Tu nge rawn thawn che?” ka ti nghut ringawt.

‘Tuman, Ben-a post ka hmu ka tih kha, ih...ka ngaihtuaha, ka thinrim kha dik ka ti lo a,ka ring lo che kha a ka inti a’ a ngawi leh rih,kei erawh ka then suk thung.Ka hahdam nghal huai bawk.

‘Chuan...’ a ri erawh chuan ka ti leh sup ringawt.

‘Engmah a awm lo ang tih ka hria lawm,nizan khan min hrilh loh vangin ka thinrima, msg pawh ka thawn nghal chea, mahse, a hnu khan ka ngaihtuaha, khatiang zawnga ka ring che kha mawl ka inti a, ka zak bawk alawm’

‘Lo haw vat rawh’ engmah thil dang ka sawi lo,sawi tur ka hre hek lo,ka ngai hluah hluah tih chiah ka hria.

‘Yes, Boss..Naktukah damchuan ka lo haw leh dawn zawka, Ka pa ka hrilh kha, a sawi em?’

‘Ka hria. Min hrilh,mahse, a aia hma la ni thei se’ ka nui hawk a,ani pawh a nui ve hak hak tho bawk, a nui ri chuan ka chhungril a fan raih raih thei hial bawk, tihderna leh a lem tel lo,hlimna vanga nui ri hi hetiang tak hian ngaihthlak a nuam tih ka lo hre ngai lo.

‘A aia hma chu Mumang te pawh ni ta se’

‘Um,chuan, Rinsiama khan ka nuna mi pawimawh ber te pahnih a rawn hruai haw dawn tih hria se, fimkhur rawh se’ ka ti leh nghuta.

‘Pahnih? Tu nge midang?” a hrethiam chiah lo anih hmel thung.

‘Nang leh kan naute kha...’

‘Oh...engmah a la chian loh kha’ zawi deuh sep hian a ti a, engmah fiahna kan la nei lo na chungin testah khan rai anga a lan tawh miau avangin ka pawm fel hmiah tawh.

Kan Accountant a chhuah veleh san ka ena, Ruby te lo thlen a hun tawh, an chhuah hun a rawn sawi atang khan darkar a liam nual tawh, call tumin ka phone ka ban chiah tihin a rawn rawn ri ve chiah.Ka beisei ang ngeiin Ruby a lo ni chiah bawk.

‘Mate,in lo thleng tawh mi?” ka ti nghal tawng.

‘Uum,hei Inah min drop chiaha,i buai em?”

‘Aih,ka buai zo chiah, ka lo haw nghal ang’

‘Ngatinge?”

‘Ka nupui hmu tur hian chhan a neih kher angai tih ka lo hre lo a’ ka nui a.

‘I nghal e a’ a ti nghat ringawt, a hmel tur ka mitthlaah a lo langa, a hmui nalh zet kha a ti poh tarh anga,a ngaihdan ni vak lo thi a thlen apianga a tih thin dan angin  a chal a ti chuar ngei bawk ang,ka ngaihtuah na vangin ka nui suk bawk.

Darkar khat a liam leh chuan In ka thleng fel der tawh, ka thlen laiin a lo inbuala,ka inthlak sawk sawka, Inhnuaiah ka chhuk leha, Lunch ei hun a pel hret nangin a bula ei ka duh vangin engmah ei loin ka haw ta kha ania, Dino-i hnenah eitur a siam leh siam loh ka zawta,a siam thu leh a siam ho a sawi dan dana, a siam nual nangin,Ruby ngainat tak,Button Mushroom soup siam belh turin ka ti ta tho.

Roomah ka let leha, a lo inbual zo ve chiah bawk, a lu a tuama, Bathrobe a ha a,a hnuaiah engmah a ha lo tih hriat zet hian a Underwear dahna inhawngsa bulah a lo dinga, min hmu miah lo,ka thawm pawh a hre lo anih hmel.Ka pan hnaia, hnunglam atangin ka kuaha, a phu zawk mai.

‘Min ti phu alawm le’ min rawn ngheng nghal ar ar lawi..

‘Sorry...ka thawm i hria maw ka tia’ a hre lo tih ka hre tho nangin ka ti ta tho.

‘A pawi lo,in buai lo tak tak maw?”

‘Um..buai lo,chuan, i chau em?”a bathrobe ka pawt kaua, a dul ah ka kut ka daha, ka chul dun dun bawk.

‘Tlemin,thil ei a, muthilh ka chak’

‘Kei pawh,a vawt sia’ ka ti supa, a bengah ka fawp zauh bawk.

‘A tha ngawt ang,eee, i thiante chu engtikah nge ka hmuh ve ang?’ a ding mar deuh a.

‘I duh hun hunah..tunah chuan thawmhnaw ha phawt la’

‘Uum..’

‘Mahse, i hlip leh rang viau maithei nia, chuvangin phelh awl deuh ha la’ ka nui a...A te that mai..

Chaw kan eikham hnuah room lamah bawk kan inzui chho leha, a ham bai bai mai,Curtain chhah zet zet kan zar chu ka pawt chipa,mahse, light kan on avangin a lang thim chuang lo.

‘Lo mu la...’Khum ka beng thaka,ka hmuh lohna a la rei viau lo, mahse, tlemin a lang thu deuha, a cher deuhin ka hre bawk.A hmaiah engemaw a hnawih leh rih,Light a off a, a lang thim nghal deuh ruai bawk.

‘Kan chaweina a la rei lo em a,mahse, a chhuak lutuk tlat..’ ti niah niah chungin khumah a rawn lawna,Blanket a pawt pharha, ka darah a lu a rawn dah a, ka kawngah a rawn kuah chial bawk.

‘Muhil vang vang rawh le, tunah chuan i In i lo thleng tawh lawm’ ka ti supa, a sam fai sar maiah chuan ka fawp a, a sam rimtui leh amah nena inhmeh ngawih ngawih rim chuan ka hnar a rawn verha, sawithiam si loh hian nun hi a famkim hluah hluah in ka hre bawk.

‘Naktukah Doctor kan hmu thei ngem?” zawi sep hian a ti leh rih.

‘Ka hre lo,duh bik i nei em?”

‘Aih,engmah ka hrethiam lo..’

‘Ok,ngaihtuah suh, kha chu ka lo ngaihtuah ang, muhil phawt mai teh’ ka ti leha.

‘Um,mahse, tuna ka muthilh chuan zanah ka buai ka hlau deuh..aaaa, ka buai lo ang, nilengin ka mut a chhuak ziah tunlai chu...’ a ti leh a, a sawi tawp lam chu a riat nawi deuh titih bawk.

Thawh mai ka tuma, ka kawnga min kuah tu an awm tih ka hriat rualin ka mut ngaiin ka mu lehnghal,light kan on loh avangin a thim tha viau bawk,dimtein ka che a, ka phone ka la a,dar riat a lo hnai thuak tawh, ka pa pawh a lo haw tawh ngei ang, ka phone light ka ona, Ruby hmel lang thei tur zawng deuhin ka kenga, ka lam hawiin a mu a, ka dar a kham a, hahdam tih hriat zet hian a thaw ri sek sek bawk.A hmeltha takzet, ka hmuh tirh kha chuan hmeltha ka ti lo,duhawm ka ti satliah mai kha ania..Rei pawh anih hmain ka nupui a ni fel der a, tunah phei chuan ka nupui ni ringawt tawh loin ka fa min paisaktu leh ka nuna pawimawh ber te zinga mi a ni der tawh bawk.

A che sat sata, light ka off vat bawk,mahse, a harh ta tho..Min tih harh hlau niawm tak hian ka ban a la sawn da da a,a let sawna, khum atangin chhuk a,tih phut leh ka duh loh avangin ka che duh lo ta law law.Reivakloah Light a on a,a eng ta iar bawk,zawitea a pen ri ka hre theia, Bathroom kawngkhar a hawnga,a khar ri ka hriat rualin ka thu chhuak ve nghal zat bawk..

‘Ka tiharh che law’ min hmuh rualin a rawn ti nghal hliai bawk..

‘Aih,ka harh ve hrim hrim’ ka nui a.

‘Ka ril a tam leh tawh’

‘A that hlauh chu,midang i ei kep alawm’ ka ti a.Khumah a rawn thu thla leha, min rawn ngheng leh nghal ar ar bawk, ka tho kanga, a sam tla hnawk deuh niaih chu a bengah ka zeh saka.

‘Tho la, inhnuaiah chhuk ang,ka pa ngaihdan a ni lo ang, ka lo mu daih sia’ nuam lo tih hmel zet hian a ti leh a.

‘Min en phawt la..’Min rawn en ve mai bawk,ka pawt hnaia, a biang tawn tawnah ka dawma, a mit a chhing nghal daih bawk, a kut zungpuiin a hmui nem leh vawt thler mai chu ka tuai a, a ang phiau bawk,ka fawp ta nge nge,a lo thlen hnuah mipat hmeichhiat na lam hawiin kan la khawsa hauh lo,ka duh ber a ni lo a, ka mamawh ber a ni hek lo.

‘MALSAWMTLUANG’ Ruby aw fiak thak ka hriat rualin ka hawi chhuak a, ka headphone ka dah thla vut bawk,alam ka hawi vata,a meng tur khai mai,mahse, a landan a duhawm takzet tho, a dul puar ve deuh ak tawh chu a inhmeh mah zawk emaw tih tur a ni bawk,thla thum lai a ni ve tawha, amah naupangchhia a ni tawh lo bawk nen Doctor in indim turin a hrilh ngun viau, vanneihthlak takin rai huat em em a nei lo a, engkim a eitui em em vek bawk.

‘Enge?”

‘Ka sawi kha i hre miah lo mi a?” a ti bak leh hlar mai,a naupai vangin engmah problem kan nei lo nangin a thin erawh a chhe zual viau thung.A rilru a no a, tihnat a awlsam em em bawk.

‘Sorry...headphone ka vuah tih i hriat kha’

‘Chutak reng chu, kha thil kha ka duh lo,a ninawm’ a ti leh hlaka,a tum hmak bawk.Mahse, ka thinrim ve der lo, a awmdan chuan ka nuih a ti za zawk mah..

‘Ok, ka paih nghal ang,anih chuan sawi leh la’ ka tho a, ka pan hnaia, a hmui a ti poh tarh bawk.

‘Tlaiah ka ni ten chawei turin min sawm ka tih kha’

‘Yeap,kan kal ang’ awlsam zet hian ka ti a, a thutna hma chiahah thut tumin chair ka pawt hnai a.

‘A that chu, kan hrilh leh lawk’ tih pahin a phone a ban a, ngawirengin a che vel chu ka en a,naupang chhia nitawh lo mahse a chang hi chuan a chetdan a naupangchhia leh tlat thina, chumai bakah kan in upat hleih a, ka duat tih ka tilang nasa a,hei vang hian a pangchang ngam ta bawk,pawi ka ti der lo thung.Dik tak chuan nuam ka ti mah zawk,mahse, midang awm lai erawh chuan engmah a ti lang ngai lo.

‘Ka hrilh tawh,chuan,naktuk kha Doctor kan hmuh hun a ni bawk ania’a biak zawh veleh a ti leh a, min en ran bawk.

‘Ka hria e..tlai lamah Meeting kan nei dawna, mahse, hun ka lo insiam ang,chuan i ni te in chu Dar engzatah nge kan kal ang?

‘I hman hun hun animai..’

‘Lunch ei turin ka lo haw anga, hnaah ka let tawh lo mai ang,eee.Ka u khan niminah a rawn call che em?” ka ti leh a, ka u in nau kan pai tih a hriat khan that a rawn chhuah ngam leh ta chauh, Ruby pawn lawm takin a lo pawm mai bawk, a chhungrilin a pawm tak tak em ka hre lo thung.

‘Aw, bia e,Naute thil vel tur a lei a,chu chu mawle’ a ti a,thil ngaihtuah nei niawm tak hian chunglam a melh daih bawk.

‘Anih chu...ka insiam thei em?” ka chhaiha.

‘Thei...thei lutuk’

Bathroomah ka luhsana, ka chhuah leh chuan ka thawmhnaw hak tur a lo dah chhuak sa vek,amah erawh a awm lo thung,ka in ha mawlh mawlha,zing atangin khua a lum uap churha, nizan lamah thli leh ruah a thawh nasat nen tunah chuan ni a sa tha et awt viau.

Ka bag ka la a, chhuah ka tum lai takin Ruby phone a ri a, a keng leh ta lo pek,a phone hi khumah kalsan tawp a ching a, ka sawisel ngun viau, thupha a chawi ziaha, mahse, a sim chuang der lo thung.

Ka pan hnaia, a lo call tu ka en a,’R’ tihin a save a, tu tak ni ang maw? Ka pick ta tho.

‘Ruby,a ni tak tak..kha chen ka lo zawn chu ka hmu ania aw...’Ricky-a aw hian a rawn ti a..A awah chuan thil tha leh hlu tak hmuchhuak a ang phian bawk,mahse, ngatinge Ruby a rawn hrilh kher ang?Enge a hmuh chu ni ang? An inbiak lohna a rei tawh maithei, amah Ricky-a pawh hi ka hmuh loh chin ka hre tawh lo.Ruati boral lai pawh khan a lo kal ve hek lo.Heng zawng zawng hi ka ngaihtuah kual nghal vek.

‘Ruby...ka tawng i hrethei em? I pasal leh a u kha anni tak tak ania’ a rawn ti leh a...Min deng dawt mai, kha thil kha...Ruati awmna Hotel a kan kal kha a ni mai angem?