STOP-24

Chapter- 24

‘Ruby...i tawng ka hrethei lo nia...min lo call teh’ a rawn ti leh a,ka off ta ngawt.Phone ka hum vang vanga,ngaihtuahna mumal ka pu thei lo..

‘I insiam zo tawh em?” Ruby aw in  a rawn ti a, muangchangin ka inher a.

‘Aw...tuemaw in a lo call che a, mahse, a tawng ka hrethei lo’ ka ti supa, ka mood inthlak danglam vek tihlan loh tumin ka in control nasa viau bawk.

‘Maw? Tuemaw chu tunge?” nui chungin a ti a, a rawn kal hnaia, a phone ka pe a.Ka thle buk ringawt.

A la a, a rawn call tu a en a, a chal a char nghal tap mai.

‘Tu nge a?”

‘Ricky-a nih hi..enge min lo call le?’ angaihna hriat loh hmel fe hian a ti a.

‘I thianpa nia..call back la,ka kal ania aw’ ka ti leh supa, ka kuna, a chalah ka fawp zauh bawk.

‘Bye...lo haw hma la ‘

‘Ok..ka lo tum dawn nia, kalna tur kan neih kha’ ka ti a, ka nui lui suk bawk.

Driver in min lo nghak ran tawh,kawng tluanin vawikhatmah ka tawng lo,ka rilruah thildang engmah a awm hek lo.Ruby hmelah khan mak ti hmel kha a awm a,engmah a hriatpui lo zawk nge ka hrethiam bau lo,mahse Ricky-a khan ngatinge awlsam tak khan a rawn sawi mai theih si??zawhna hlir, chhanna awm chuang si lo..

‘Kan thleng ania’ Driverin a tih thawmah ka hawi chhuaka,office building kawtah kan lo awm tawh.

Ka chhuka, staff hoin min lo wish sap sap chu ka chhang liam vel mai mai.Room ka pan ding nghala, ka insehruh nasa lutuk nge pawh ka hre lo, ka tang tung bawk nen ka hah hluah hluah in ka hre bawk.Inleng kawmna tur Sofa inhungah chuan ka bag ka thehthla tawpa, ka chair lam ka pana, ka thu thla hnawk bawk.Ka hah hluah hluah,atir khan engkim lo hrilh ta zawk ila a tha mai tur,mahse...ka thei si lo anih kha..Ruby hmel ka mitthlaah a lo langa, ka nuna a lo lan hnu hian engkim a inthlak danglam ta vek chu anih hi..A tha zawng leh tha lo zawngin a danglam vek.

‘Aw..Mam’ Hello pawh ti loin ka u in a rawn ti a.

‘Thil pakhat ka zawt leh duh che’

‘Aaa, eng chu maw?”

‘Ruati kha...’

‘Ka tih a ni lo’ sawi pawh ka sawi zawh hmain a rawn ti nghek..

‘I chiang em? Engmah hi zep hlen theih a ni lo ania’

‘Ka hria,mahse, zep tur engmah ka nei lo a, sawi tur pawh ka nei lo, khanu kha ka hua,i hria.,mahse, engmah ka ti lo...’ uar zet hian a rawn ti leh nghek bawk.

‘A that chu..mahse, tunah hian tuemaw in kan unau hian min chhui tih hria la,fimkhur hle ang che’ ka ti leh nghut.

‘Oh,,tu in maw min chhui a? enge fimkhur ka ngaihna tur?” a rawn ti leh talh.

‘Nangmah vangin kan tal awk thei, khami ni khan a roomah i awm tih theihnghilh suh, chutiang bawkin kei pawh ka awm’ ka aw a chang beng bawng viau.

‘Sawi tawh lo teh ang, theihnghilh tumin zantin ka beia, ka hne tawh’

‘Sawi hi ka chak ring suh,ka chak lo takzet,mahse...Dawt pakhat thup tur hian kan kal thui ta mah mah anih hi tiraw’ ka ti lui leh kher.Dawt ka sawi tlat lo, khami ni khan ka duh dan angin kal tlang mai ta ila chuan engkim hi a fel vek zawk ang, mahse...awmzia a awm lo.Inchhir pawh a sawt chuang lo.

Ruby hnen atangin call dawn inring in ka awm a ni ber, hna lam pawh engmah ka ngaihtuah peih lo, mahse, engmah a rawn sawi ta hauh lo.Ben-a ka call ta zawk.

‘Enge ni ta a?” zangkhai fe hian a rawn ti a. Thla thar maiah nupui a nei dawna, a phur viau,chutiang bawkin Dintluanga pawh.

‘Biak che ka duha, khawiah nge ka rawn hmuh ang che?”

‘Engthil ah maw? Ti hian sawi mai la’ a nui a.

‘Phone a sawi chi a ni chiah lo,a hma a mi bawk kha’

‘Eng? Oh...Ruati kha maw?”

‘Um..ni tho mai..hmuh che ka mamawh’

‘Tunah lunch turin ka kal dawn chiaha,PEMARINah lo kal la, i theih chuan?

‘Thei e..ka lo kal nghal ang’ ka ti a, ka off a.Tukverh bulah ka dinga, kawng lam ka thlir thla a, Nidang ang bawkin Motor a tawt leh pek,Office bike ka hman mai loh chuan PEMARIN thleng turin darkar fe ka mamawh ang tih ka chiang.

Inhnuaiah ka chhuka, Driverin min hmuh veleh a lo ding vat bawk,mahse, ka kutin ka zapa.Counter a lo thu hnenah Office Bike a awl leh awl loh ka zawta, a awl tih a sawi a,chahbi ka la a.Ka hmang lawk dawn tih ka hrilha, mak tih hmel zet hian a mengphar awk bawk.A demawm loh, vawikhatmah ka la hmang lo miau a.

Mc ah Bike ka daha, PEMARIN ka pana,Ben-a a lo thu vang tawh.

‘I va lo thleng hma ve’a lo ti nghal vat bawk.

‘Nia, Bike in ka lo kala,bakah min nghah rei lutuk chuan i thinrim leh dawn tih ka hria lawm’ ka ti ve a..

‘Thinrim dawn nang, kan nau te hnenah ka let tawh dawn lo tih ka sawi sa vek alawm..i ei ve nghal dawn em?” a tih zawm a.

‘Pawi miah lo,i ei ang ang animai, chah belh nghal la’ ka ti a.

He lai restaurant hi kan Hmelhriat pakhat ta ania, inhre tha tak ni loin a satliah deuh thung,kan kal ngun viau,a thawk te pawh hian min hre tawh a, kan kal chuan tlangnel takin kan khawsa bawrh bawrh ngam tawh.Eitur a chah belha, thil ho mai mai kan sawi hmasa a, an inneih tur chungchang ka zawta, an inbuatsaihna leh Honeymoon an hmanna tur vel a sawi a,a hlim tih a hmelah pawh a lang thei hial bawk.

‘Le...sawi la’ a hmui hruk fai pahin a ti a.

‘Ruati chungchangah khan tuman case an file lo in ka hria a?” ka ti supa.

‘Aw, i hre dik..mahse.’ kan thusawi hre phak an awm leh awm loh a en kual a.

‘Case file an awm lo,a thihna kha Damdawiin a ni bawka, a lan dan maiah kha chuan sawi buai tur awm pawn a lang lo.Mahse, tuemaw hi chuan hriatfiah a tum viau in ka hria’ rawn kun hnaih pahin a ti a.

‘Nia, chutak chu..Ricky-a kha i hria em?” ka ti nghut a.

‘Hria ti ila hre vak lo,In inneih lai vela Ruby te kawm ve deuh kha ni lawmni?”

‘Aw..amah kha, eng ber nge hriat a tum ka hre lo,mahse, hriat nei a ang in ka hria’

‘Enge chu chu a awmzia?” bo hmel fe hian a ti hu.Zingah Ruby a lo call leh a thusawi ka hrilh a, mahse, a vai chuan ka sawi lo,tuemaw rinhlelh nei angin a tawng tih ka sawi.

‘Chuti chu nangmah ni lam a sawi em?”

‘Aih, sawi lo..mahse, thil engemaw rinhlelh tur a neih chuan Ruby hnenah sawi angai lo a..’

‘Nia, a dik ang..lawks,dan kalh chu a ni tehmeuh maia, mahse, tu emaw ber tel lo chuan he thil hi a kalpui dawn lo,naktukah Bar room lama kan nau te ka lo enfiah tir dawn nia, a che dawn anih chuan kan chet khalh thei alawm,hriat an neih chuan min hrilh mai ang’ a ti ta duah,engmah sawi loin ka bu nghut ringawt.

‘Eee, tu nge buaipui i tih kha?” ka ti leh rih.

‘A cousin pakhat hian ka bialnu a nih tak tak leh tak tak loh min zawt chiama, khami ni khan engvanga be duh nge ka nih tih te pawh.Chuan, Lawyer pakhat min nel ve tak hian min zawt zauh tawh bawka,amah chu a ni phei chu ka ti lo a,Engpawhnise naktukah hriatchian ka lo tum ang’a ti leh ta duah.

‘I talbuai ve mai ka hlau hle mai’ ka ti leh supa, a lu a thinga, ngaihsam hmel fe hian a nui duh lek.

Office ka thlen lehin dar 4 a ri tawh,tum aimahin kan rei ta,ka phone ka phawrha, Ruby lo callna a lo awm kalh bawk, a lo call lai ka hre miah lo.

‘Hello..’ ka call a pick rualin zangkhai vah hian a rawn ti a, ka mitko ka san awk bawk.

‘I lo call a?” ka ti sup.

‘Aw, i lo haw dawn tawh em tih ka hre duh a’

‘Haw hman chu nimai, ka chhuak lawka..Office ka thleng leh chiah’

‘Um,mahse..ti hian ka lo ngaihtuaha..Ka ni te in chu ka lo va inthlah tir mai anga,Office tang khan lo tlang ula’a rawn ti leh a.Ricky-a kha a call back ngei ka ringa, mahse, amahah engmah danglam a awm hauh lo,mahse, a danglam loh na hian min ti lawm chuang der lo.Danglam se ka ti hek lo.

‘A tha lawm,i chhuah dawnah min lo hrilh la’ ka ti a, Office kawngkhar ka darin ka nek hawnga,ka tum loh lutuk ka hmuh rualin ka ding chawt bawk.Ka phone ka la thla a, ka ban ka phar hluai ringawt.

‘Surprise...’ ka chairah a thu tlum kaka,a biang sum nalh zet lang kalh in a nui var var bawk.

Ka pan pheia, thawh tumin a insiam rema ‘Tho duh suh’ ka ti nghut bawk,a thu tha veleh mai bawk,Dawhkanah ka thu a, sawi mai tur hre loin ka melh chhuk run bawk.

‘Min en reng lo la’

‘Nuam ka tia lawm’

‘Mahse, i thinrim hmel alawm’

‘Aih,teuh lo’ ka ti hmuka, a kut ka laksaka,ka pawt hnaia,ka fawp vang vang bawk.

‘Thil dik lo a awm em?” ngaihthat loh hmel fe hian a ti sepa.

‘Aih,ka ngai che a.Ka beisei loh lutukin ka hmu che a’zawi supin ka ti a.A nui hak mai..Ka malah a khabe a rawn nghata,min rawn melh chho a..A langtha takzet.

Kawrdum,ban nei lo a ha a, a nghawng a zau lam tep bawk, mahse, a over lo.A ban leh a nghawng lang chin no nung sar mai chu a kawr rawng chuan a ti langsar lehzuala,a sam sei ve tan deuh tawh chu a tawng kang deuh a, a hnawk ni si loin a pawr deuha, mahse, a inhmeh zawk mah in ka hria.Nidang ang bawkin a hmaiah Make-up hmuh tur a awm mang lo.

‘Scarft i keng em?’ tih pahin a banah ka piai zauha,a te that bawk.Nidangah pawh ka ti fo,a haw  hle tih ka hriat vangin tihluih nuam ka ti ve tlat thung.

‘Tikhan ti thin lo teh,a duk ziah ania’a ti hlar mai..Ka nui suk duh chauh.

‘A duk mai mai te chu..Keiman mawi ka ti tho a’ a ner nak mai.

‘Scarft chu?’ ka ti leh a.

‘Aw, keng e, ka kawr ban a bulh em hi..a lum lutuk a ka bagah ka dah rih nih kha..kan kal hman nghal tihna mi?’ a ti leh a.

‘Aw, hman a nimai..lawk..’ nimin a thil tih tur ka sawi lawk tawh sa an tih leh tih loh ka la zawt leh lo tih ka hrechhuak leh rih.

‘Ka ni in a lo call seka,chuvang mai mai mawle..E, ka pa a lo haw hma a’ a ti leha, ka bu ringawt.Ka bag dahna ka pana,ka hai kuala, ka duh ka hmuh veleh inhnuai lam ka calla, ka thil tih tur sawi an tih theih leh theih loh ka zawta, an la buaipui mek thu in min chhanga, ka beisei aiin a khirh hrep dawn a ang.

‘Sir...ka lo lut lawk thei em?” Kawngkharah kan Sales Manager pakhat a rawn daka.Ruby a hmuh rualin a tim leh deuh anih hmel.

‘Aw.Lo lut rawh,enge ni ta?” ka ti a.

‘Kar kaltaa  loan a Motor kan pek chhuah pakhat kha buaina kan nei a...’ inthlahrun hmel zet hian a ti a.

‘Ok,vawiina chinfel chi a ni em?”

‘Ni tawh lo, tunah kan hre chauha,naktuk lamah Bankah tlan angai dawna’

‘Anih chuan naktukah kan sawi mai dawn mi? Hei chhuah kan lo tum chiaha’ ka ti a, Ruby a melh leh zawka.

‘Awle, ka lawm e’ a ti a, a chhuak zui ve mai bawk.

Ruby ni te an fel ta viau, Ruby tan tak pawh a nuam lo hial maithei,a hma zawngin chhiahhlawh nimai awm khawpin an ti duhdaha, tunah lem Lal ang maiin an cheibawla, an ti tha huam mai,kei lah min ngai pawimawh em em bawk.Mahse, Ruby ber hian a ngaidam thei viau tlat zel.An awm ang angin a en a, an danglam tak vangin danglam ve tumna a nei lo niin ka hre hial.

Tunah chuan Ruby nau pai pawh thla sarih a ni ve ta, ka hlauhthawn ang kha engmah a thleng ta hauh lo,Ben-a khan a lo ngaihven ngeia, tumah chutiang lama biak rawn an nei lo tih min rawn hrilha, tunah thla a liam leh fe hnuah pawh engmah thawm a la awm ta chuang lo, kei pawn ka hrereng ta bik lo.Kan nunah engmah harsatna lian tham sawi tur kan nei lova,Naute lo piang tur tan engkim a tha thei ang ber kan duh a, ka u lah a phi buai peih em em a, fa lo nei tawh anih ang ngeiin keini nupa tan chuan a hlu a,Nu dinhmun a luah a ni hawt e.Nau neih dawn hnaiah Ruby nu lo kal turin Ruby-in a chaha, keipawn ka han be ve bawk.Mahse, Makima nen erawh kan inpawh tak tak thei ta lo.Inah erawh a lo kal ve fo tho,Ka pa mitmei ven vang ringawt pawn ka mil lohna tihlan ka duh lo bur thung.Kan nupa in vawikhatmah kan la sawi chhuak leh lo ve ve a, mahse, kan chhungrilin kan ngaidam lo ve ve tih erawh ka pawm hmiah.

‘I lo haw hma thei angem?” Ruby-in min rawn calla, a aw a zawi raih bawk.

‘Ka la buai deuha, enge ni ta?”

‘A pawi lo mai..’ ka chhan leh hmain a off nghal daih bawk,ka phone ka melh nghek ringawt,eng chu a hria nimaw? Hlauhthawnna ka nei thut, a nuam lo pawh a nimaithei..Ka call back nghal.

‘I tha tiraw?”

‘Aw..’ a ti tawi leh tak mai.

‘Ok,lo haw hma ka lo tum dawn nia’

‘A tha lawm’ a ti zuai leh raiha,a awmdanah chuan na nei a ang viau.

‘I tha tak tak em?”

‘Tha ka tih kha..’bak deuh hlak hian a rawn ti a, ka nui ringawt.A raino thinchhia kha a la reh ta lo cheu tih ka rilruah a lo awm nghal zat bawk.

In ka thlen chuan Ka pa pawh a lo haw tawh,inhnuai lamah Ruby ka hmu lo a, tun hnai chu mut a duh leh zuala, a dul puar luah hian a ti hah em em thin bawk nen,Roomah a tawm deuh chawt hrim hrim. Inchungah ka chho tlang nghala,Room kawngkhar ka nem hawnga,a lo thim thiap mai..Ka ding deuh chawt bawk.Kawngkhar bula Switch awm tlar that chu ka dapa, ka hmeta, a eng ta iar..Ka beisei loh tawp thil ka hmu nghal zat bawk.

Sofaah a lo thu a, chunglam a melh ngar bawk.

‘I muhil emaw ka ti a?’ tih pahin ka pan hnaia, a che chuang lo.

‘Mate..’ a darah ka zuk khawiha, a phu zawk bawk. Min rawn en a, rang zet hian ka kut a nem thla a, Thlahrang a hmu emaw tih mai tur in a mengphawk hra a, a mit a sen arh bawk.

‘I tap elaw?”

‘Aih...mahse...ka hua che’ ka khawng nghal luh bawk.

‘Maw?!’ ka dingmara, ka nui chhuak hawk mai.

‘Ka hua che....ka haw lutuk che..’

‘Engvangin maw? A chhan sawi la’ a awmdan chuan min barakhaih lam hret.

‘Hei hi....’ a phone a rawn lek chhuaka,ka hmuh theih turin a rawn dah hnaia..Ka zuk en a..

Enge anih ka hre mai lo,a bulah ka thu thla ve a, mahse, thei leh thei loin thawh tumin a bei nghal zat.

‘Thu la,thawh kher angai hleinem’ ka ti nghuta, a banrekah ka vuana, a tal nghal laih bawk,mahse, ka thlah duh lo..Ka hmer na sauh thung.

‘En zo vek la, ka huat chhan che i hmu ang chu’ a aw a ring lo, a damthlap zawk.A phone a rawn thehthla thaka, ka la vata, a thil min entir tum chu ka play a..Enge anih ka hmuh rualin ka thawk a sak nghal tawlh tawlh mai.

Kha Hotel rooma Ka u lut lai a ni a, a thim zawka, a rawn lang leha, ka lut lai a ni ve ta thung, a hnu lawkah kan unaua kan inzui chhuak leh lai a lang lenghal zat bawk.

Mate..hei hi?” sawi mai tur ka hre lo.

‘Aw...kha kha...ka lamah i tang emaw ka lo ti asin,engtin nge i tih theih?’

‘I hmuh ang kha a ni lo,ka ni lo ka tih kha’

‘Engmah sawi suh, ka ngaithla duh lo,ka mitin ka hmu a..ngaihdan ka siam thiam ve bawk asin’ a aw a zawi ta lo,a au a ni ber zawk.

‘Kha thil kha ka sawifiah thei..’

‘Aih, tunah chuan engpawh sawi la ka ring tawh lo che, atir khan ka zawt che a, ka rinna che ti chhe suh ka tih che kha...mahse, i ti vek tawh..a tawp tawh’

‘Ni lo..a tawp lo,min sawi tir rawh’

‘Nia, i sawi ang, dawt bawk i sawi leh anga..mahse, min bum thei tawh lo ang tih hre rawh,khang thla kal ta chhung zawng zawng khan hei hi hriat tumin ka bei asin,mahse engvangin nge tunah hian ka nat i hria em? Ka pasal ngeiin min bum hi ka na,chu aia ka nat zualna chu ka thian tha ber dikna hailang turin ke ka pen ngai dawn lo zawk hian min ti na’ a mittui tla tur chu duh lo niawm tak hian a hru tawk bawk.

‘Ni e...engmah sawi tur ka nei lo.I duh duh ti mai la, engmah ka sawi sel lo ang’ min melh ngar mai, a che phata, min rawn hnaiha, na zetin ka samah a rawn thama,engtinmah tihlet ka tum lo,a duh duhin che se, min kal san loh chuan ka duh tawk.

‘Ka hua che..Ka haw lutuk che, engvangin nge Phuba i lak? I u ai hian enge ka hlut lohna? Ka natna i hmu lo a, i u natna chauhi hmuh vangin ka thiantha ber i that asin’ a tap zui nghal hlawp hlawp bawk.

‘Mate...’ ka ti tham tuak mai.

‘Khatiang khan min ko suh.Ka pumah hian i fa a awma, a lo pian hunah a pa in a nu thiantha ber a that tih a la hria ang,engtin nge itih ang?” min kek leha,ka thut ngaiin ka thu khawng luh ringawt.A tap khur hlawk hlawk chuan ka chhungril thlengin a fana, ka mit ka chhinga, hnem tura kuah ka duh hluah hluah,mahse, ka thei si lo..Mumang tha lo nizawk se ka ti takzet.

‘Inthen ang’ ka sam a kehna a thlaha,a inlahrang zui nghal bawk.

‘Aih...’

‘I duh leh duh loh ni loin keiman ka duh vang zawkin,Ka pa ka zuk hrilh ang’ a ti leh sapa,a inhera,pen hnih vel a pena, a pai nawka, chhutah a tlu sawp thla nghal hnawk bawk.