STOP- 27

Chapter- 27(last chapter)

Enge a sawi tum chiah?

‘Chutianga ka ngaih a tulna tur lai tak kha sawifiah leh ka la duh cheu’ ka ti leh hmuka, tlemin ka aw a dam ta deuh.Mahse, min chhang tawh dawn lo emaw tih turin a ngawi leh daih lawi.

‘Hon...oh,Sorry’ ka in Control hman lo,kan inneih chhung khan a hming hian ka ko mang lo,’Mate’ ka ti anih loh chuan ‘Hon’ ka ti tlangpui zawk.

‘Ka dah phawt ange’ a ti sepa,ka chhan let hmain a off zui nghal daih bawk.

Ka call lehnghala, ka rin ang chiah,vawikhat a ring zawka, a hmet busy a,ka ti nawn leh,a Switch off hman ta tho.

A sawi awmzia kha hriat tumin ka ngaihtuaha, engmah ka ngaihtuah chhuak chuang lo.Khang kum kalta chhung zawng zawng khan fanu ka lo nei renga, mahse, ka hre miah lo.Chumai bakah ka biakpawh miah loh avangin an nufain an lo thlamuang hle bawk a...Ka thu chhuak ta nge nge.Tukverh ka nawr tawlha, Balcony ah ka chhuaka, Thla ral lam eng dul deuh ruih chuan Balcony a rawn chhun a,rannung hram chiah chiah bak thawm awm loin a reh ruih  bawk.

Ruby ka nuna a lo luh hnu khan a tha zawng leh chhe zawngin engkim a inher danglam ta vek,a kalbo hnuah pawh chutiang bawk chu a la ni ta fo.Hmangaihna hi enge anih chiah ka hre ngai lo,amah ngei pawh kha ka mamawha, ka duh tih ka hria,sexah leh kan nunphungah hrim hrim pawh khan amah aia min ti lungawi ka la tawng ngai lo.Nupa kan nih dun chhung kha rei lo mahse kum tamtak nupa lo ni tawhte tawn ang kha kan tawng kim thawthang thung.Kan inhaua, a changin a tapa,a changin kei ka lungawi lo thin,khang hunah zawng zawng khan ka lungawina tur a hria a, ka thinrimna tur pawh a hria.Chutiang chiah chu keipawh ka ni thin..Mahse, Nupa kan nihna aiin a thiannu natna a ngaipawimawha, kan inkar khi siamthat tuma ka beihna a hnawl fithla thak bawk.Ka mamawh lo...

‘Ka mamawh lo che...’ ka kut ka humruh a, kum liam fe tawh hnuah amah ka hmu leha, Mawipuii bula ka sawi ang ngei khan amah neih let ka tum lo,ka fanu ka duh...mahse, kei aia ka chhungril hrechiang tu nge awm? Ka fanu ka duh na aiin amah neih let ka duhna hi a la nasa zawk fan si alawm le...

‘I free em?” Anggu-an phone a pick veleh ka ti nghal tawng.

‘Tunah nge nilengin?” a rawn ti awlsam ve mai bawk.

‘A pahnihin...’

‘Ouch, vawiin chu tihtur ka lo nei asin,engthil nge a?”

‘Ka fanu hmuh ka duh,Ok, a pawi lo.Keimah pawn ka kal thei’ka ti leh nghuta.

‘Nang hi..I fanu ani tih i chiang em?”

‘Za ah za”

‘Maw?! Ruby in a sawi tihna nge?”

‘Aw,chuan keipawn ka hria..’

‘Engtia tih nge i tum?”
‘Ka la sawi thei lo’

‘Ok, mahse, J..thil atthlak ti suh ang che,i fanu anih rualin a nu fanu a ni tel ania, a natna bak engmah belhchhahsak suh’dam angreng deuh hian a rawn ti ta duah.Za lo zetin ka then suk ringawt.Nidang ang chu nise ka khak let ngei ang tih ka hria, mahse, tunah chuan ka ti ta lo.Ani chu naupang pahnih te pa a ni a.Kei aiin fa te Hmangaihna kawngah tawnhriat a ngah zawk tih ka hre miau a.

‘Engmah ka ti lo ang..’ a rilru nawn nan ka ti ta tho.

Ka u te dawr ka pan ding nghal pawp,ka beisei ang ngeiin a lo awm a, an nau te tihtur a lo hrilh lawng lawng tawh.Min hmuh veleh min rawn pana, mahse, a laka ka rilru put dan danglam ta vek erawh lantir hun a ni lo tih ka hria.

‘I va hma ve..enge i lo tih dawna?” a rawn ti nghal a.

‘Ka chhuak lawka,bakah Biak lawk che ka duh a’ ka ti supa.

‘Eng thilah maw?” a ti a,ka chhan hmain eitur ka duh leh duh loh min zawt leh rih.Ka lu ka thing ringawt thung.

‘A pawimawh angreng, midang awm loh na ah ni se ka duh bawka’

‘Um,nia..helamah hian lo kal la’ tih pahin thlang lam a pana, ka zui ve vut bawk.

‘Le...’ a ti a, a kut a suih at bawk.

‘Ka fanu kha a thi lo tih i hria em?” engmah han thluaithlum deuh pawh a awm lo.

‘Maw?! Aw...aih...enge sawi i tum chiah?” a ti bah nawk nawk mai.Mahse a tawngkam leh a che zia chuan chhanna atana ka duh ang min pe fel vek tawh thung.

‘Nimin khan ka hrechhuaka, ka fanu kha a lo thi miah lo a,mahse, a thi anga min hrilh tu te kha nangmah leh ka pa inni a.Tum sa renga dawt min hrilh anih ka ring lo che u.Ruby- i fin kan chelh lo tlangah ka ngai mai bawk’ ka ti ta duah.

‘Aw..nia..nimaithei,mahse, a va mak ve..a ruang pawh ka hmu ngei sia’ a ti leh a,a hmela maktihna lang chhuak chu thup tum teh mahse a thei lo tih ka hai hek lo.

‘Nia, mak tak a ni,nangmah mai lo ka pa pawn mawle’ ka ti leh nghuta, ka kekawr ipte ka zen a, amah thah chaka ka kut ka humruh lai a hmuh ka duh lo.

‘Ka hrethiam lo’ a ti leh sepa, ka bu ringawt.

‘Ka kal dawn, tihtur ka nei nuala..anih phawt’ tih leh inher ka ruala, min chelh tumin min au hauh lo,ka beisei lawk sa anih avangin mak ka ti hek lo.

Mawipuii te clinic ka pan lehnghala,Mawipuii hmuh tum a kal erawh ka ni lo.Zonuna zawk.Ka biak lawk vek tawh avangin min hmuh pawn mak ti hmel a pu lo.

‘A changtunu zawk hmu loin min hmu duha, engthil nge?” nui chungin a lo ti nghal a,Mawipuii te nen an inkawm nasa a, chumai bakah Mawipuii nen kan inzui pawh a hre hmasa pawl a ni hial ang.

‘Nia...thil harsa deuh hlek ka dil duh che a’

Ok, sawi la..nang meuhin i tih te chuan ka hnial ngam nang’ a nui leh a.

‘Hun i nei em?” ka ti leh rih, Nidangah chuan Hospital lamah a buai fe thina, a hnuah helaia thu turin a kal leh chauh zel.

‘Aw, ngah thawhkhat.Vawiin chu hun ka nei nual mai..Dar thum hma chu’ a ti tha ve mai bawk.

‘I enkawl lai zinga pakhat kha ka hmelhriat hlui a ni a..Hmeichhe naupang kum li mi vel.Anu kha ka hria a..’ ka ti a,Hmeichhe naupang hming ka hre tlat lo.

‘Chuan?”

‘Eng tiang taka Serious nge anih ka hre duh a’ ka ti leh sup.

‘Tlang taka sawi turin min duh em?”

‘Ka duh a, ka beisei bawk che’

‘Ok,a tha lawm..tunah hian Mawipuii vanga i hmelhriat kha ni loin i nupui hlui nena in fanu enkawltu Doctor ka nih angin min en la ka duh’ ka insangmar nghal tawlh tawlh thei.

‘I lo hresa a’ ka ti nghut ringawt.

‘Aw, hresa,theih se chuan Ruby hian min pan lo ang, mahse, Teeta-i a pian hnu lawk atanga enkawltu ka nih avangin midang a pan thei lo.Helaiah hian i bialnu te nen kan thawk ho tih lah a hai hek lo.A hmu maithei che tih hriaiin kan fimkhur hle bawka’ sawi ve tur engmah ka hre lo.

‘I zeppui tihna nge?” ka awah demna ri a hriat tel theih.

‘Aw..Doctor ka ni a, ka damlo enkawl ten rem an ti anih loh chuan engmah ka sawi chhuak thiang lo,tunah pawh hian nizanah Ruby thu ka hmuh vangin i zawhna te ka chhang thei che’ a ti leh a.A lo be lawk thlap anih hmel e.

‘Anih chuan enge a natna ber?”

‘A thluakah hian bawk a awma, a tet lai khan vawihnih kan zai tawh,vanneihthlak takin a bawk ber kha kan paih thei ta hlauh a.Eng em a thleng ta lo hlauh, mahse,nikum kum tawp lam atang khan a buai leh a, tuna kan en dan chuan bawk lam a ni tawh lo.A thisen hi a cancer niin a lang’ ka nghing lawih thei..

‘Maw?!!’ ka aw a tham tuak bawk.

‘Aw..a thluak lam emaw tiin MRI kan tih tir leha, mahse, chulam a lo ni lo tawp..Nimina a test result ah khan a tha veka, a thisen lam ka test tir leha,a result min rawn pek kha Medicine Doctor ka va thawna,a thisen a cancer tih a chiang thawkhat e’ ka tum loh tawpin ka rum chhuak hawk mai.

‘A nu in a hria em?”

‘A hre maithei, mahse,chiang tak chuan ka la hrilh lo’

‘Enge ka tih ang?”

‘Engpawh.Ruby hian neih a nei tawh lo.A fanu enkawl nan hian enge a tih i hria em?”

‘Hre lo,hre tur pawn fanu ka nei tih ka hre lo..’

‘A kal lehlam a hralh tawh,hei hi chu sawi tura tih ka ni hauh lo nangin i hriat a tul maithei,mahse, amah khawngaihna i tihlan a tul chuang lo ania,ka sawi chhan zawk chu i fanu enkawlna atan hian i tihtheih zawng zawng ti tura ka duh vang zawk che’

Engmah ka ngaihtuah thei lo..ka khaw hmuh a tawi tup vek ringawt.

‘Mala,nang chuan pawisa i mamawh apianga hman tur i nei,mahse, Ruby hi chuan a nei lo,thei se chuan amah pawh hi a inhralh duh mai ang,mahse, chu zawng a thei lo.A hralh tur neih chhun a kal hi a hralh tawha,a nu leh pa in an ram neih ve ang ang an hralh zo tawh bawka..in lo inthen tawh a, chu pawh a rei tawh...mahse, i fanu a ni a, i tih theih apiang ti turin ka ngen che,Nakinah i inchhir lutuk hlauh ange’ he thu dam thlapa min hrilh tu Doctor kha ka vawikhat hmuhna a ni lo,karkhatah nitin deuhthaw ka hmu..Mahse, vawiin kha chuan ka hriat thin Doctor pakhat kha ni loin ka fanu nunna chhan tura mi pawimawh ber, Angel tluk zet in ka hmu ta thung.

Gate, thira siam ri rak ka hriat rualin ka hawi chhuak vata,ka hmuh tum ka hmu chiah bawk.Kawngkhar ka nem hawnga, ka hmaa Hmeichhe kal hnak hnak chu ngawirengin ka zuia, a sam a chhip lamah hnawk deuh niaihin a tawn khawma,kekawr thawl hnak a haa, T-shirt tial,bantlawn a hak chu a kekawr kawngah a bilh lut bawk.A Inluah ka kal hmasak ber tum kha ka mithlaah a lo lang nghal zut zut bawk.Zuitu a nei tih hria niawm takin a ding chat, ka ding ve nghal a,bihruk lam ka ngaihtuah lo,a rawn hawi leta.Kan inmelh ta ran mai..

‘Nang maw?” a ti sapa, a aw a ring lem lo.

‘Aw..keimah..;

‘Enge i duh?”

‘Nangmah,chuan ka fanu pawh’ ka ngaihtuah lawk dan kha chuan ka fanu enkawl ka duh tih hrilh mai tur ka ni a, mahse, a ni ta lo.Nia..tu nge ka bum chuan ang? Ka nunah hian tlawmna tur ka hmu ngai lo a, ka hmuh ve hmasak ber chu amah hi a ni a..Vawikhat ka tlawm tawh,hnawl a ni thung, mahse, vawikhat ka tlawm tawh tho a, vawihnih nana tlawm leh chu enge a pawina tur?

‘Khawngaihin kalbo rawh’ a inher hmaka, chak zetin a pen zui nghal hmawk hmawk bawk.

‘Ni lo e...’ a ban rekah ka hmera, ka phih let deuh nawk bawk,a te zui nghal that mai.

‘Hetiang chuan ti suh’

‘Nia,min zui mai la...a tha em?” a mitah ka en run bawk.

‘Ka..ka...Bawihte-in min nghaka’

‘Ka hria, tunah chuan Nurse nen an awm mek ang’ ka ti supa, a mengphar awk bawk.

‘Nurse maw?”

‘Aw..kal ang le..’ tih pahin Motor dahna lamah ka kaia, min hnial lo in min zui ve dat dat bawk.

Kawngkhar ka hawnsaka, a tawi muang deuh hrat nangin a lut ve ta tho,ka kal kuala, ka thu lut ve a,ka tlanchhuak pawp bawk.

‘Khawiah nge min hruai i tum?” a ti sapa, ka melh zawka, zuanthlak mai inpeih niawm tak hian a thu mar at bawk.

‘Kan thlen hunah i hre mai ang’ ka ti sup ringawt.

‘I u emaw i pa pawh min hmuh tir i tum lo ang tiraw?” a ti leh a, a aw a pangngai ta viau.

‘Oh..tum chiang,tu ber in nge dawtsawi che u ka hre duh’ ka ti nghuta, ka u leh ka pa in dawt an sawi ngei tih ka hre vek tawh, mahse, engvangin nge Ruby zawk pawh hian a zep tlat hriat ka duh vangin tiang hian ka che mai zawk.

‘Ding rawh’ ka phu zawk bawk.A au ring lam hret.Mahse, ngaipawimawh duh loin ka hmalam chauh ka en lui ngur thung.

‘Ding rawh..’ a ti leh thata, ka inrin hmain min rawn bawha, Steering a rawn herh ve nghek bawk,a chet dan teh thut chu ka beisei lawk lo lutuk lam mah..Kawngsir fal deuh lai kan thlen veleh ka hung fel thei ta hram..

‘Enge tih i tum a? kan thi mai dawn asin’ ka ti nghal tuar bawk.

Engmah sawi loin min rawn ham tumin a rawn che leha, mahse, ka lo inring sa deuh bawka, ka thle zauha,a kut ka man beh saka, a thutna ah ka nawr bet zui hmiah bawk.

‘RUBY, duh tawk rawh’ vin vak awmzia a awm lo tih ka hria.

‘Min thlah rawh,i kut bawlhhlawh khan khawih pawh min khawih suh’ a ti khur dar dar mai.

‘Ok, i duh dan anih phawt chuan,mahse,min khawih lo ang tih sawi phawt rawh’ ka ti nghuta, a ngawi ngar mai..Reivak lo ka vuan beta, a tal leh laih takah chuan ka thlah zui ve mai bawk.

Hnuglam a ngheng chawrha, a sam chawlleng rawn tla thla deuh niaih chu a bengah a zep a,thinrimna control tum a ang viau bawk.

‘Inah khan min va drop leh thei em?” min rawn en a.

‘A tul ka tih hunah le’ ka ti ve thung.

‘Engmah sawi dun tur kan nei lo asin’

‘Fanu ka neia, a thi niin min rintira,i tlanbopui zui bawka’

‘I tan chuan a thih mai kha a tha ber,chuan i fanu anga sawi i tum hi ti tawh lo la ka duh’ a inringtawk hmel leh ta viau.

‘Nangmah nen kan inkar chu engpawh nirawhse, ka fanu hian a tuar zui ka remti lo..’

‘I lo lan ve a, Pa nihna i rawn lan tir hian a rilru i tibuai anga, i tuar tir tam zawk ang’ min melh kal mai.

‘Kan tangrual thei a...’

‘Kan thei lo,a chhanchu i bulah hian thlamuanna ka nei ngai lo ang bawk khan ka fanu hian hlau chunga a nun a hman ka duh lo’

‘I in nghahna ka ni thin emaw ka lo ti a’ ka ti hmuk ringawt.

‘I ni thin, a changin.Mahse, kha in lian leh reh ruih ah khan i kal chhuah hnu lawkah min hmusit tura i u a lo kal nghal zel lai te, ka tihsual changa midang bula min tih mualpho tuma ka thiltih engkim a enthla te..In awmpui zawng zawng te nena ka che vel enthlak ka nih takah kha chuan thlamuanna hmun a ni lo a, ka tan hmelma vek inni’ a mit a chhinga, a hmui a pet tlat bawk.

‘I sawi awmzia ka hre lo...’ ka ti ro hulh ringawt.

‘I hre lo ang, hriat i tum ngai lo miau alawm,Ruati vang khan ka na a, ka natna i hmu thei ngai lo..A accident tirh atang khan i u ka ringhlel tawh, mahse.Nang..nang lehzel kha chu ka ring tel lo che’

‘Kha thilah khan telna ka nei lo..’

‘Sawi ai chuan hmuh hian a fiah zawk asin..Nupa kan nihna kha ka zaha, Ka neih phak loh tawp ka nei che a, then leh mai mai che kha ka tum ngai lo..’

‘Anih chuan enge i tih hi?”

‘Ruati naupai i u in tihluihna hmanga a tih tlaksak kha i hria em? Hre lo..Anih leh Ruati accident na hmuna i kal lai leh i chhuak leh lai CCTV record te,Ben-a i thiltih tir zawng zawng te kha engtin nge ka hriat i hria em? Ricky-a kha i ringhlel tiraw? A ni lo..a vaiin i u hnen atangin ka dawng vek..’

‘Maw?!’ engmah ka hrethiam lo,ka melh tlawk tlawk ringawt.

‘Engvangin nge khang thil vang khan ka pasal hi ka then kher ang che? I ngaihtuah ngai em? Engvangin nge ka tlanbo kher? I ngaihtuah ngai lo ang,ka hma ka sial vangin ka tlanbo angin i ngai ang tiraw? A dik..ka hma ka sial..mahse, i tana tha lo a thlen loh nan leh ka fanu nun chhan nan ka tih a tul avangin ka ti asin..’

‘Sawi tawh suh....’ ka kut zungtangin a hmui ka va khar a, mahse a thle sawn hmak.

‘Ni lo e,sawi hun ania lawm,chuan ka hmuh nawn leh che angaih loh nan tal pawh’

‘Aih, i sawi loh vanga ka hmuh zui theih dawn che chuan sawi lo mai rawh’

‘MALSAWMTLUANG,engmah i hrethiam thei lo hi amak ka ti che,khang zawng zawng ka tuar tawh hnu kha chuan ka kalsan hlen tawh che asin,nangpawn hmeichhe dang kut i lo chelh tawh bawk,ka lawmpui che,Thinlung takin..Midang ta nitur hian ka phal ngai lo che a, mahse, ka ta i nih ngai dawn loh miau avangin Hmeichhe tha tak i tawng hi ka lawmpui tawh zawk che..Hlim ang che’

Kawngkhar hawnna a dap rak rak chu che loin ka thlir mawl tawp,min rawn en a.

‘I lock anih hi,ka chhuk duh a’ a biangsum lang kalh khawpin a nui a..Ka chhungril kehsawm leh rum vawng vawng hi engtin nge a haider theih zawk? Vun pilh nasa lutukah hian chi a al nimaiin ka hre bawk.

‘Aih..kal suh’ ka hnaih nghal ruak bawk..

‘Min khawih suh ka tih kha,khang kum chhung zawng kha ka hmang ral mai mai hleinem,nitin nangmah theihnghilh tum chein ka hun ka hmanga..ka ngaihzual chang che apiangin RUATI thi tur mangang au rawl kha rapthlak ti chung chungin ka ngaithla thin asin..chumi rual chuan khatiang i ti chunga i chungah engmah ka tih theih chuang si loh vangin mahni indemna nen ka tap muhil leh thina..ka tan chuan mithi i ni tawh...’

‘Mate....’

‘Ni lo,ka tan mipa awmchhun i ni thina, ka Hmangaih chhun i ni bawka,ka hriatrengnaah hian min duatna leh min ngaihsakna i tihlan thin lai chauh kha hriat ka duh,adang i tih zawng zawng kha chu ka tana i thih hnuah a nih avangin Pasal sun,Hmeithai angin ka in ngai tawh zawk...A chhanchu khang kum reilote i nupui ka nih chhung khan nun awmzia ka hria a, Hmangaihna hlutzia te pawh..kha kha hriatreng atan ka duh tawk e..’

Hmeichhe puitling leh mahni inringtawk tak a ni sa reng,tunah phei chuan khang hun lai ai khan a lo puitlingin amah a inringtawk zual ta zawk.A duh engkim sawi turin a chak tawk tawh bawk..

Nung reng chung leh thaw reng chung hian Mihring hi a thih theih tih ka lo hre ngai lo..,Engtikah nge Ruati chunga thlengah khan ka tel ve lo tih a hriat ang ka hre hek lo.Ka hriat chhun zawng chu kei hi Ruby tan Mithi ka ni a, kei pawh a tello chuan Mithi ka ni tih ka inhrechiang ta bawk..

Ka hmaa thlan vung tharlam zet,Thla eng in a chhun en iar chu ka en a,ka mittui avangin ka khawhmuh a phe vek bawk.Helai hmunah hian ka fanu a mu a, nimin piah te kha chuan ka kut kha a kut tereuhte khan a chelh ve tang anih kha..

‘Apa..ka thih hunah vanah ka kal angem?” a hmel pawisawi lo zet leh a nu ang em em mai kha ka mitthlaah a lo langa.

‘Kal ang chu, i fel alawm,mahse, i thi dawn hleinem’ a chalah ka fawpa.

‘Mi zawng zawng kan la thi vek ang Anu in a ti a’

‘A sawi dik alawm..’

‘Anih leh ka awmloh hunah Anu bulah i awm angem?” a ti leh anih kha,ka chhang thei lo..Kum nga thla khatin a la tling lo a,mahse, a natna vang nge ka hre lo,a fing em em tlat.

‘I duh phawt chuan” ka ti ta tho.Beiseina pakhatmah ka nei lo tih tihlan kher tul ka ti lo..A kut tereuhte in ka kut a sik niap niapa.Min melh kiau bawk.

‘Duh ang ka ring,mi te chuan pa an nei vek thina,mahse, tunah chuan keipawh ka nei ve tawh tho a..Pa tak tak i ni ang tiraw?” a samah ka hmai ka phuma,ka mualpho ta em lo.

Mumal nei manglo a ka nun ka hman laiin Ruby-in min rawn call hlawl.

‘I theih chuan i Teeta-i rawn hmu ta che,hun a nei tlem tawh a’ a rawn ti anih kha...Ka tlanchhuak rawk rawk a ni ber.Khang thil zawng zawng ka hriat hnu khan ka fanu neih let tum a ka huaisenna te kha an bo zo vek tawha, Ruby-i lo tuarna zawng zawng te kha keima duhna ringawt en chungin ka ti chhe lui ngam hlawl lo.Mahse, keimahah Mawipuii a beidawng ta thak..Beisei tlak awm lo khawp nun ka hmuh tir miau a.A demawm loh..

Thla hnih ka hman tawh zawng zawng zinga hlu ber ka hmang zui ta thung, nitin ka fanu bulah hun ka hmanga, a tir chuan min ngaina hauh lo,mahse, nitin a bula ka awm takah chuan Naupang rilru thianghlim tak na na na chuan min ngaina ta thuai..Ruby erawh chuan nu anih angin a tihtur a hlen chhuak thak,ka tan beisei tur engmah min siam sak lo.A tuarchhel zia lah mak tih mai loh chu sawi dan tur a awm lo..

Ri rak ka hriat rualin ka hawilet nghal vat.Ka hnungah Ruby a lo ding a,a lo kal lai ka hre lo.A mittui vangin a mit a hnawng chap bawk.

‘Hetah i awm tih ka hre lo a’ a ti lawi rat bawk..A tuarna te leh a hah rimtawng luat vangin a pawr fapa, a tla deuh dak bawk, mahse, chuti chung chuan a hmelthatna a bo chuang eih lo.

‘Aw...i lo kal dawn tih ka hre lo a’

‘Keipawh...i awm tih ka hre lo a..’a ti leh sepa,October thla eng no nghulh ah chuan a lang fiah viau, a ding zum deuh zat bawk nen a lang der dep lehzual..

Ka pan hnaia, nidang angin a tawlh hnung lo,a din ngaiin a ding mawl tawp..A kut ka zuk vuana, ka tim deuh tih a hriat loh hram ka beisei takzet..

‘Min ngaidam rawh...’

‘Ngatinge? Engmah i tisual hleinem..’

‘Ka tawrhtir zawng zawng che vang pawh hian ngaihdam tlak ka ni lo..mahse..i tel lo hian nun hman ka peih tawh lo,ka nawr lui thei chuang lo che tih erawh ka hria a..’

‘Sawi tawh suh,kei chauhin ka tuar hleinem,i tuar nasa tih ka hria alawm’

‘I hre lo ang, ka chapo tih ka hria,mahse, chuti chung chuan i lakah hian ka chapo zo lo fo tih ka hria...’

‘Nia, i chapo..i induhtawk em em bawk,keipawh ka ni ve bawk..Mumal nei lo tawpa nun i hman lai khan i u khan tap chungin min rawn bia asin..Bawihtei hmu tura ka lo call che khan a tul vang ni loin engmah min phuartu awm lo a ka zalen tak vang anih kha...’ a ti leh a, a thaw halh bawk..Ka pan hnai leh sauh.

‘Ka u maw?” ka hrethiam chiah lo.

‘Aw, Ruati kha a duh reng vanga khatianga ti a ni lo,an inhniala, a nem tlu a..Bath tub tlangah a lu a tauh ani tih a sawia, engvangin nge a tal awk tir che erawh ka hre lo..Ngaihdam dil hi ka lo hmu tawh thin, mahse i u anga ngaihdam phu zawk kha an awm anih pawhin nang chauh hi i ni ang’ hah hmel zet hian a thaw leh halha, min rawn melh chho kar bawk.

‘Anih chuan bul kan tan tha leh thei em?” a biang tawn tawnah ka dawma..

‘Thei ila ka ti..mahse, i tan manganna mai mai nih ka duh tawh lo’

‘I ni lo ang, i ni ngai hleinem..’

‘Ka hmangaih thin che,ka tan i thi ka tih lai pawh khan ka hmangaih na che angai reng..’

‘Min hmangaihna aia nasa khan ka hmangaih che’ a tawng leh tur ang deuh ziau tawh chu ka zu khar hmak...Ka kawngah min rawn kuah ve nghal chial bawk..

A tal deuh laiha,ka thlah mai lo..mahse, ka awmah a rawn nem a, a kut lehlamin ka kawr tlang a pawt bawk.

‘Ngatinge?” ka aw a tham tuak bawk.

‘A tawk tawh..’

‘Aih..tawk lo...’

‘Mala, thil pawimawh ber chu maw...i natna ka ni leh tur hi ka duh lo ka tih kha..’

‘I ni ngai lo ang tih ka hria alawm...’ a hmui kau deuh chu ka kutzungpuiin ka tuaia..Mahse, ka kut a la sawna, a inlahrang ta tho..

‘Kal tir che hi ka duh ngai lo asin,mahse, a tul miau si..Ka tuarchhuak tawha, ka hriat duh ber pawh ka hre tawh bawk..’

‘Enge i hriat duh? Ka Hmangaih che tih kha a ni em? Anih chuan engtiklai pawn ka hrilh theih tur chein ka bulah awm rawh’

‘Kha thil kha ka hriat duh a ni a, a pakhat zawk chu Ngaihdam dilna kha..ka hre ve ve tawh..Ka hahdam thei tawh ang’ A inkuangkuah hlana, a nui var var bawk..

‘Ka Hmangaih che,chuan,Min ngaidam rawh,i natna tur engmah ka ti leh tawh ngai lo ang..’

‘Ka hria alawm’

‘Anih chuan enge min la dang tu awm?” ka pan hnai leha,a tawlhhnung ve hrat thung.

‘Ding rawh’ a ti sep a, a sawi ring hauh lo nangin ka ding ta tho..A duh loh zawng engmah tih ka duh lo bur.

‘MALSAWMTLUANG.....’ a ti leh sapa,ka beisei loh lutukin a mittui a tlaa,a hru zauh bawk..

‘KALSAN CHE KA DUH LO,MAHSE,KA NATNA HIAN MIN EIRAL MEKA, THLA KHAT EMAW A AIA TAM HRET EMAW A AIA TLEM ZAWK EMAW CHAUH HUN KA NEI ASIN..CHUVANGIN KAL RAWH..ENGKIM HI TAH HIAN TAWP ZAWK RAWH SE’

Tawpna chu hei hi a ni e,nun hi hlimna chauhin tawp se kan ti thin a, mahse, kan tih vang hian a tawp dawn der si lo..

                                                STOP