REVEUSE-10

CHAPTER- 10

‘I tha em?” ka kut rawn vawn pahin a rawn ti a, ka phu zawk bawk.

‘Aih,aw..tha e’ ka ti bah nak mai.

‘I hmai a dang vek a..’ ka kut a hmer vang vang bawk.

‘Damdawiin boruak hi ka zo lo thina,chuvang aniang’ ka ti a, a ngaihthat nan ka nui lui sak bawk.

‘Ok...Tih chak deuh ka nei a’ a then suk mai.

‘A timing lo em mai a’

‘Ka chak pawh i hre hleinem’ a mit a siai zauha,min chhaih tih a hriattheih.

Kan tawng hre phak midang an awm leh awm loh ka enkuala, kan hnaihah tumah thu an awm lo hlauh,Hming lam tu lah chuan a phone ngawt a buaipui bawk.

‘AB,min nghak rei em?” Hmeichhe aw hian a rawn ti a,ka insang mar nghal teuh ringawt.

‘Rei lo e..i hman hun hun kha a tawk mai’ a ti a.

Muangchangin ka hawi pheia,Room kawngkhara ding,Hmeichhe nalh leh mahni inringtawk tak mai chu ka en a,ani pawn min lo en ve chiah bawk.A hmel danglam zawk chu ka hmuh rualin Abel-a kut ka hmer salh ringawt,mahse,ka rin loh zetin a nui ta sak.

‘Lo lut ula,eitur chah ang..Ka ril a tam lutuk’ a tih zawma.

 Phurna pakhatmah nei lo hian Abel-an ka luhna tur kawngkhar a nem zauah chuan ka luta, a hma pawn Rosanga nupui tur in a hna a thiam zia ka hre tawh,engtin nge tunah khan ka hriatchhuah leh miah si loh.

‘Khawiah emaw ka hmu tawh che em?”

‘Keimah maw?” ka mawl hmel ngawt ang.

‘Aw..mahse, ka hai che pawh ni maithei’ a ti leh a.

‘In inneihni khan a lo kal ve a,chu chu  i hmu a ni maithei’ Abel-an a rawn ti ta hlauh.

‘Oh,anih dawn chu,ka vannei khawpa,mi hi ka vawikhat hmuh tawh hi chu an hming leh tunge annih hre lo mah ila ka hmu tawh tih hi ka hrethei tlat zela’ a nui a.

‘Putea i chhun anih chiah chu’ Abel-an nui hawk chungin a lo ti ve a, an in pawh hmel ngawih ngawih.

‘Ok,aniang..Eitur nghah chhungin ka lo en lawk dawn che mi?’ a ti a

Ka tho a,Damlo mutna tura khum an dahah chuan ka lawna,ka mu zangthal a,a hma pawn min check vek tawha, hlauhthawnna ka nei lem lo.Mi te pawh an hnar a thi fo a,kan naupanlai pawn ka u hnar a thi nasa thin.Ka nu leh pa kha an hlauhthawn pawh ka hre ngai lem lo.

‘A tawk e..Mahse, eng eng emaw test tur ka ziak anga, tunah in tih hman tawh loh pawn Mondayah ti ula, ka lo en leh nghal dawn nia’ a ti a.

Ka thutna ngaiah ka thu leha,test tur a ziah mawlh mawlh chu ka ena, a hma a ka in entir nen chuan tlemin a danglam ta,a hma kha chuan engmah test tur min pe lo a,ka that thu a sawi tlang pawp a,a ngai thutak lo viau bawk.

‘In hmanhmawh viau em?’ min en loin Abel-a a en a.

‘Hmanhmawh ti ila Matty hi Damdawiin kal leh angaia,ngatinge?”

‘Kan pa a lo kal meka, a lo thlen har ka ring tawh lo,a be duh che a’ ka thinphu a rang nghal zaih zaih mai.

‘Eng chungchangah nge?”

‘Ka hre miah lo,nizanah khan rawn call che a tuma,a call tlang thei lo che a’

‘Anih chuan kan lo nghak mai dawn mi?’ min rawn ena,ka hmelah ka hreh zia a lan loh hram ka beisei takzet.

‘Ka nu khan haw hma turin min duha’

‘Chuti nih chuan Eve, inpa chuan min lo call mai rawh se, anih loh pawn ka lo be dawn nia’ zangkhai vuh hian a ti a, ka thawveng ru nghal hawk thung.

‘Nia, a tha lawm..Mahse, Matty hi hmu ve se ka tih nen’ a nuia, min rawn ena, a hmelah engmah a ngaitauhna awm a lang lo,mahse, ka ngaina ngai dawn lo tih ka hre thei nghal tawp.Rosanga nupui anih vang erawh a ni lo.

‘Engmah hlauhthawnna tur i nei hleinem’ zawi supin a ti nghuta, rang lutukin ka melh vat bawk. Mahse,a Motor khalh lai ah rilru zawng zawng a pe emaw tih mai turin hmalam a en daih thung.

‘I sawi awmzia ka hre lo’ ka aw a khur titih.

‘I test result tur mawle’

‘Ok..’

‘I va hlauthawng ve,i check-up hmasak khan i tha an ti tak tak em?”

‘Aw..’ ka chhang rang lutuk chu mak ti hmel zet hian min rawn melh a, mahse, a hawi let lehnghal mai.

Keiin ka lo hlauh zawk chu Rosanga nen kan chungchang zawk a ni a, ka test tur thil te kha engmah ka lo hre chang leh tawh lo zawk.A rawn sawi chhuah danah khan a lo hresa turah ka lo ngai a, a hria tih min hrilh a tumah ka lo ngai hman pek.

‘Anih chuan engmah dik lo i nei kher lo ang,mahse, Evelyn-i hi chu a fimkhur thina,test engmah nei lo a i tha tih sawi kha a duh lo tihna maiah ka ngai’ a ti leh a,tawngkaa chhang loin ka bu nghauh ringawt.

‘Damdawiinah nge Inah?”

‘Inah..’

‘Ok,a hma khan Damdawiinah let leh i duh tih i sawia, mahse, a hnu khan i nuin haw hma turin a tih thu che i sawi leha’ a ti leh supa.

‘Um,nia..haw hma kha ka ngaipawimawh zawk’

Ka beisei lawk ang ngeiin engmah Testah dik lo a awm lo,hnar thi satliah a ni tawp mai.Vitamin eitur leh Damdawi eitur tlem min pe tel tho thung.

Abel-a te Inah hnathawk tur ka hruaia, Rinpuia’n a enkawl thei tura ka beisei laiin a site enkawl laiah Problem a nei ta tlat,Midang lah koh pen ngam chi zia zang anni lo.Keiman ka tih a ngai ta nge nge a,nitin Abel-a te Inah ka kala,mahse rei tak erawh ka awm ngai lo.Abel-a nen kan inzawmna hi a la rei loh nen mak khawpin a nghet,min Duat hluak lo nangin a Caring thawkhat.Nitin kan inhmuh mai bakah zan lamah a lo len tum a awm a, a lo len loh pawn call in rei tak tak kan inbe fo bawka,mahse, Msg type lam erawh a peih lo ngang thung,Social Media lam hian a tibuai pha miah lo emaw tihtur khawpin a lawm lo bawk.

‘Khawiah emaw ka hmu tawh che in ka hria”

Aw lo chhuahna lamah rang zetin ka hawi leta,Marcus-a lo ding reng ka hmu nghal chiah bawk.Thla dawn kan thawk tawh chung hian ani hi ka hmu tam lo.

‘Keimah maw?”

‘Um,Delhiah i awm thin em?’

Aw..’

‘Chutah chuan a ni maithei,keipawh ka awm thin a’

‘Anih dawn chu’ ka ti liam satliah.

An In ka kal apiangin Abel-a a awm ziaha, vawiin erawh Farm lamah tihtur pawimawh a neih avangin a kala,ka thlen hmain a lo chhuak hman tawh,a riah mai theih thu a sawi bawk.Marcus-a erawh hi chu a Room neitu zawk tur ni siin a awm ngai meuh lo, Abel-a leh a nuin an buaipui vek zawk.Mak ka ti deuh thin nangin zawh erawh ka la zawt lo.Bakah,Abel-a hian incheina lam engmah a care lo,Marcus-a erawh chutiang a ni ve hauh lo,thla khat dawn an Inah ka kal tawha, an unau Mize in persan zia erawh ka hrechiang thawkhat,Abel-a a khauh a, a thinchhiaa,a tawng duh lo.Marcus-a erawh chutiang a ni ve lo.A nu leh pa teah hian  an kal hran hlak nimaiin ka hre bawk.

‘Tintin,i nau hi a lo haw lo maitheia,Zanin kha engtia tih chi nge?’ a nu in rawn luh ve pahin a rawn ti a.An chhungkaw prog ni turah ka ngaia, lo hriat ve tumna ka nei lo.

‘Ka hre lo,amah bia la...’

‘Nia,Matty,a hrilh lawk che em?”

‘Eng..aih..engmah zanin lam Prog min hrilh lo’

‘Amak thin,tlemin ani hi chu hriatthiam zel angai ania’ a nui a,ka nui ve ringawt bawk.

Dar 5 velah Office ka chhuahsana,ruah a tla cherh cherha, ka lung a leng vang vang mai.Zinga min rawn biak bak kha Abel-a nen kan inbe leh ta lo,nidangah chuan Lunch ka ei tawh leh tawh loh min rawn zawt ziah thina,vawiin chu a buai ngang aniang a reh hmak mai.

Awmtei te Inah ka kal kuala, Damdawiin an lo chhuah hnuah ka la tlawh leh hman lo,bakah mumal tak pawn Naute enna tur ka la pe lo.Kal pahin eng eng emaw ka lei teuha, ama eitur duhzawng Jeffrey-a te dawr ami ka pack tir teuh bawk.

‘Mumal takin engmah ka la zawt miah lo che,a ni tak tak em?” A pasal chhuah veleh a ti nghala,thuruk sawi niawm takin a la tawng zawi phian zui.

‘Eng chu maw?” tih pahin ka naute pawm dan ka thlaka.

‘Hre lo der lo mai teh,a zei dawn sia maw” a nui a..

‘I chhe mai anih chu a’

‘Diki a sahal,ama bialpa zawk emaw tihtur khawpin a phur’

‘Naupang alawm a la nih le’

‘I va han ngeiawm tak..diktak chuan ka lawm lutuk,tha taka nau ka nei ka lawm ang em chuan lawm zo lo mah ila hmalam i pan hi ka lawm alawm’ a ti leh duah.

A sawi dik ngei ang, chhete mahin ka ringhlel hek lo,ka natna te, mumal nei lo a ka khawsak dan zawng zawng kha ani aia min hrechiang an awm lo.

‘Ka hre lo,a mizia hi ka la hre chiang lo a,mahse, hlim chu ka hlimin ka hria’

‘Ka hria alawm,a Care zia che pawh Tluangpuii sawi nuam tih ber anih kha’  he nu tak hi chu a.

Ka mut dawnah Abel-a ka call ta nge nge,a buai hle anih pawhin tun thleng thlenga buaina a neih tawh loh ka beisei ve ngawt.A pick dawn lo emaw ka tih hnuah a pick ta hram.

‘Hello..’ hmeichhe aw hian a rawn ti a, ka tisual emaw tiin ka ena, mahse, ka tisual lo.

‘Abel-a a biak theih em aw?’

‘Aw, lo nghak lawk’  ka chhungrilah ngaihthat lohna a rawn awm nghal ngawt pek.Tun ang hunah tunge hmeichhia a awmpui ang,a phone pick mai ngam tur lehnghal,a farnu a ni lo tawp ang tih ka chiang.

‘Hello...Boo’

‘ I va buai awm ve’

Sorry,nia..Nakinah ka rawn call ang che’

‘Ok..’ ka ti hman tawk,a Off zui nghal daih bawk.

Engthil tak ti ang maw? Vawiin khan thil pawimawh tak zanlamah tihtur nei ang khan an awma,mahse, engmah min hrilh chiang ta lo,Abel-a phei chuan min hrilh lo hrim hrim,hrilh a hnekin min be lo zawk.

Ka harh leh chuan khua a lo eng at tawh, ka phone ka ban vata, engmah a awm lo,morning wish pawh a awm lo a,nizana min rawn biak a tum pawh engmah call na a awm chuang lo.

Peih lo zetin an In lamah ka inkhalh chhuaka, zingah ka hnar a thi leh avangin ka chau deuh nghulh bawk nen ka mood a fuh hlawl lo.Nidang ang bawkin a nuin min lo dawngsawnga, a pa erawh chu a dan pangngaiin ka thlen hlima min biak bak min be zawm lem lo.Hna pawh kan zo thuak tawha,kartharah ni khat vel lek khawih a zawh theih mai a ni tawh.

Ka tlan luh khan Abel-a Car a awma, a awm emaw ka ti dawn zeta mahse,Bolero zawk Farm kal nan chuan a keng thin tih ka hre leh hnuhnawh.

Hna pawh ka thawk mumal lo nileng ta ngawt,engmah ka tih a tui lo,Abel-a lah a reh veng veng bawk.Inneih a hnai tawha, an inbuatsaih nasa tih pawh ka kal reng avangin ka hmu ve vek,mahse, Inneih inbuatsaihna lamah a buai anih pawhin ngatinge nizan khan kha Hmeichhia nen khan an awm dun? Farmah a buai anih pawn ngatinge hmeichhia a hruai kher? Nge a staff te zinga mi zawk?Aih, a ni hauh lo ang,phone a pick mai ngam tlat, Khanu kha tunge anih ang?  Zawhna hlir..

‘Mat,kan khaw lamah ka haw angai dawn thut mai’ Rinpuia’n min rawn call a.

‘Ngatinge? A va pawimawh awm ve’ ka ti a.

‘Ka pi a boral thut maia, i lo kal lai pawn i hmuh kha’ a rawn ti a, ka ngaihtuah buai lem lo.

An khua ka han kal khan ka hmu a, Rinpuia te nen an khawsa ho bawka,a beng a ngawng deuh tih mai loh chu a mit pawh a la fiah that zia te min hrilha,ka hrechiang hman lo nangin Rinpuia te tan chuan a hlu dawn lutuka,an tuar viauin ka ring.

‘A va han zia lo tak,tunah kal nghal i duh em?”

‘Aw, duh ang,hei kan inbe kual meka,dar 7 velah kan chhuah theih ka ring’ a rawn ti leha.

‘Min mamawhna i neih chuan sawi hreh lo la’

‘Diktak chuan Motor kan in daih lo a’

‘Lo kal la, ka Car in keng thei lawm,naktukah Muana te nen kan lo chho anga, ka hawn thla leh mai ang’ ka ngaihtuah lawk hauh lo.

‘I buai phah lo ang maw?”

‘Aih,a tul chuan ka pa Jeep pawh a awm ang, naktuk Sunday a ni a,engmah mamawhna tur a awm lo ang’ ka ti leha.

‘Ka beisei phak lo asin le,mahse, ka lawm lutuk ringawt,Inah nge ka lo kal ang Officeah i la awm zawk?”

‘Officeah ka la awm, Inah min drop anga, chuan i la nghal mai dawn nia’ ka ti leha.

A lo thlen hmain Staff groupah Rinpuia te chhiattawh thu ka post nghala, pawi an tih thu an rawn sawi liam liama,Muana’n min rawn call vat.Ka car an ken dawn thu leh kal ve tha ka tih thu ka hrilha, a ngaihdan a lo ni ve bawk,Sena leh Ruata ka be leha,anni pawn kal an lo duh ve tho.A vuini tur Sunday a ni tho bawk nen vanduaia chungah a remchang phian mai.

Rinpuia’n in ah min dah se ka ti zeta, mahse, an hmanhmawh ka rin avangin Taxi in ka haw ta zawk, a inthlahrun zia ka hria.Lawmthu a sawi thiam lo tih pawh ka hria, mahse a lawm em em tih ka hre tho,tawngkaa sawi hluah ka phut lo.

Zingah Muana’n min rawn lama, Awmtei’n pangpar thawn a duh avangin kan va lam kual leh rih.Beisei aiin khua a thiang tha phian bawk,mahse, ka rilru erawh a fim lo,nimin nileng pawh khan Abel-a call ka la dawng chuang hauh lo.Va biak lah tlawmah ka la ve tlat bawk,ka khua a har nge ka thinrim zawk pawh ka hre hrang chuang lo,ka tawt vek ti ila a dik ber ang.Ka tihtur engmah pawh ka hrilh ta bik lo.A farm kan tlan pelh lai chuan ka thlir dauh dauh nangin engmah ka hmu hran lo,bakah Sunday a ni a, Inah a haw ka ring hrim hrim bawk.

Muana te khua kan chhuahsan leh chuan dar hnih a pel tawh,Sena ka bulah a chuanga,Muana leh Ruata an chuang dun thung, Inzui tur kan nih avangin kawngah engemaw tawh palh pawh awm se  ka hlau hran lo.Sena titi suam suam chu ka ngaithla liam vel mai mai,he kawngah ngei hian Abel-a nen kan bul tanna hmun kha a awma, ka hriatrengnaah a thar iar iar bawk.

‘RTSah khan peng lawk ila,thlai tiak lak ka duha’ a tih ri chuan ka suangtuahna ram atangin min tiharh zawk.

‘Khawiah maw?”

‘RTSah’ a ti nawn ve leh mai.Ani hian Abel-a nen kan inkawp tih a hria em ka hre lo.

‘Tun ang hunah thlai tiak engatan nge i tih a? nun pawh a nung thei tawh nang’

‘Ka Cousin pakhat hi a thawka,rawn thawn a tum thina,a hman lo ziah maia.Kal remchan lai laiin lak ka duh mawle’

‘A tha lawm, i va la zuai anga, kawngah ka lo nghak mai ang che’ ka ti a.

‘Nia, ka rei lo ang, ka’n call lawk nghe nghe ange’ a ti leh a.

An Farm peng bulah ka dinga, Sena a chhuka,Muana te an rawn thleng ve chawpchilh nghal mai bawk,ka rin aiin a rei ta zek,Muana te lahin luh ve an lo chak tumhrang bawk nen Gate lian zet inhawng saah chuan ka pen lut ve ta nge nge.

‘Enge in tih dawn?” Gate bulah chuan Duty tih hriat tak hian min lo tidinga, ka kal hmasak tum khan ka hmu miah lo.Chhan tumin ka ang ziau hman tihah Mipa pakhat hian a rawn au ta hlauh.

Ka kal hmasak khan zan thim lai anih avangin ka lo hmu chiang lo a,khaw enga han hmuh meuh chuan a farm a pui ngang mai.Mahse, Sunday anih avangin hna engmah an thawk lo,thawktu ho an lo awm nuala,Sena Cousin in a lang thei lai lai min kawhhmuh hlawma, Staff Quarter tura sak,chhawng hnih a sangah chuan Staff tamzawk an khawsa tih a sawi bawk,a sawi hmangin staff 20 bawr vel an khawsa anih hmel.

‘Farm neitu hi i hriat zawng a ni em?” kan tlanchhuah hnuah a ti a.

‘Hre chiah lo,ngatinge?’ pangngai thei ang berin ka ti a,Dawt ka sawi leh sawi loh min zirchian nachang a hre lo ang tih a chiang.

‘Eng ni lo e,ka Cousin khan a sawi hmangin mak tih ka neia’

‘Eng maw a sawi?” ka lungphu a rang nghal titih.

‘RTS dawr neitu te fapa naupang zawk ta ania, an fapa upa zawk chuan thlathar hian nupui a nei dawna, mahse,tunkar tawp lam khan an fapa naupang zawk leh a u nupui tur chu Farmah zan hnih an rawn riak a ti a,thil mak tak niin i hre ve lo maw?”

Thilmak !!!! ni lo,thil tenawm leh inbumna a ni zawk ang chu..