REVEUSE-11

CHAPTER- 11

Ka muhil thei lo,ka mumeng kar a, ka inlehnaah ka taksa a kham urh tawh.Abel-a nen kan bul tanna ka ngaihtuaha,a ho lam lutuk pawh a ni mahna,ka hna chungchangah min tihbuai vang leh a mize chapo lutuk ka huat ngawih ngawih laiin ka mamawh lai bera ka bula awm anih leh tlat si  avang khan amah ka duhna kha zawi zawiin a lo pianga, thla khat vel lek a la ni chungin min Duatna leh a mize pa tak vangin min hip bet titih a,thianho zinga mal bik nih hlauh vang leh Nula Senior,single bawk si nih duh loh vangin ka lo’Aw’ hma lutuk zawk a ni mai angem? Hriat pawh ka hriatchian hma hauhin ka inzawmpuia,anihna takah chuan inhumhimnan ka hmang zawk,tiang chiah khan min lo hmang ve anga, a u nupui tur nen an inkar zep nan min kawp a duh a ni ta ve ang.Ka thu chhuak ta nge nge.

Rosanga nen kha chuan thian nihna atangin zawi zawiin bul kan tana, kan nghet em em bawka, mahse, Abela hi chu chutiang engmah a awm lo,ama sawi ang chiahin han inlem kual velna hun awm loin thawklehkhatah kan inzawm thut a ni ber.

‘I va chauh hmel ve’ ka nuin min hmuh veleh a lo ti a.

‘Aih, chau vak lo.Nizan ka mu tha lo lutuk a’

‘Anih kha, i mit hnuai a val pap alawm,Awmtei’n hna a rawn zawm veleh karkhat vel chu chawlh la ang che,i rimtawng anih hi’ a ti leh mawlh mawlha, ka pawm thlap,mahse, tun tum chu hna vang ni loin Abel-a vang a ni tlat.Hrilh hriat kher erawh a tulna ka hre hauh lo,tumna ka nei hek lo.

‘I u te Inah ka zuk chhuk lawk ang,Nungi ka tir chhuaka, ka thil chhuan hi lo en lawk la’ a ti leha,ka bu ringawt.

Kan upa ber te hi kan In atanga hnaiteah an Indang ve a, an awmna hi ka pa In tho a ni a, a hnuaiah chhungkaw pahnihin an luah ve bawka, ama hna leh a nupui hna bakah Inluahman ka pain a lak tir vek bawka, an harsa lem lo.Bakah,kan kep theih ang ang hi chu kan la kep nual tho bawk.Rooma ka let leh chuan ka phone ri tawp lam ka hre hman,ka en vata, mahse ka Contact list a mi a ni lo,bakah Abela a nih ka beisei vang nge ka mood a ti chhe zual zawk mah.

Phurna engmah nei loin ka inkhalh chhuaka,ka zin vanga chau ka ni lo tih lah ka chiang,vawiin hi Abel-a tein kan khawih tawpna anih tawh hmela, mahse, ama In lei thar lam erawh khawih zui tur a ni tho.Inah a awm angem ka hre lo,Farmah kha chuan kan kal laiin a awm lo ngei,a u te Inneih hun a hla tawh lo bawk nen,chance tam zawk an mamawh ang chu, chumi atan chuan Farm lamah Problem nei angin a insawi leh mahna..Ka ngaihtuah zawng ringawt pawn ka luak a chhuak hlui thei.

Gateah tlan lut loin pawnah ka dinga,Mihring luhna tur an siamah ka lut ta zawk, ka rin ang ngeiin Abel-a car a awma, a Bolero erawh a awm lo.Awm lo mai mai tehse.

‘Ngatinge phone i pick loh a?” Abel-a nen kan inhmawchhawn ta ran mai.Diktak chuan a lo call lai ka hre miah lo zawk.Bakah Inah a awm tih ka hre lo hrim hrim.

‘’I lo call loh chuan pick a har ang ka ring’ zawi sapin ka ti let salh thung.

‘Maw? Ka lo call lo maw? Khawnge i phone?” a ti leh hmuka, sut tlang huphurhawm zetin ka kalna tur takah a ding tlat bawk,Inchhung lam ka thleka, tuemaw ber tal an lo chhuah ka beisei a, mahse tumah an lo chhuak lo.

‘Tumah an awm lo,khawnge i phone chu?”

‘Khatiang khan min be lo la ka duh khawp mai,ka duh leh ka pick anga, ka duh loh leh ka pick lo anga,a hrim hrimin i biak duh hun apianga biak theih turin i chhiahhlawh ka ni emaw i ti aniang e’ ka ti a, ka tawng hnem bawk aniang ka thaw hawk bawk.

‘Engmaw i sawi?”

‘Ouch,i beng te pawh a lo ngawng anih dawn hi” ka ti leh salh,ngeiawm zetin ka nui lui hak bawk.

‘Engthil hrep nge maw i hriat le?” a ti leh hluka.

‘Engmah, nge hriattur a awm zawk ami?”

‘Awm lo’

‘Anih chuan a tha nih chu, kalsawn la,hna enfel tura lo kal ka nia’ ka ti leh hmaka,a kut humruh tlat chu ka melh zawka, ngaihpawimawh lo hmel zetin ka hawisawn leh nghal daih,a kekawr ipte a zena, a insehruh nasat danah a thinrimna thunun vel a ang,a hmel dur khupah chuan min thin nawk nawk a chak tih hai rual a ni hek lo.

‘Enge i thinrim chhan ka hre lo,mahse, min hrilh chuan kan sawi dun theih ka ring’ a ti leh supa,a aw a zawi hle bawk.

‘Engmah sawi dun tur a awm lo,anihna takah chuan thla khat vel lek atan kan inhmang tangkai tawn hle tihna a nih ber kha,chuan, pawi i tih loh chuan ka lo kal tlang ang chu’ ka ti leh a,ka thle bak bawk.

A hmel dur khup chu ka ena, a inpetruh fun bawk,diktak chuan a tir lam ai khan tunah chuan ka rilru a fim leh tawh,ka tawngkam te kha huatthlala tak anni bawk nen min khawih mai ka hlau rilrua,mahse,hreh hmel zeta a tawlhsawn takah chuan engtinmah min ti dawn lo tih ka hrethiam chawpchilh mai.

A sawi ang tak takin tumah ka hmu lo,Inchung lam ka pan ding nghala,engkim khawih zawh tawh tih hriat takin an lo ti fai vel mek,tunah chuan he Inah hian ka kal nawn leh a ngai tawh lo ang, a Farm House lah Inneih zawh lama khawih tan tur chauh a ni a,Awmtei a lo la kal theih loh pawn a hna hi chu Muana ka khawih tir mai ang, Muana hna leh Office hna kawp pawh pawi ka ti lo.

‘Biak lawk che ka duh ania’ Room kawngkharah a rawn daka.Eng nge maw a hriat hrep ni?Midang awm lai a ni a, ka hnial ngawt thei hek lo.

‘Ok, lo lut la..’Zangkhai vahin ka ti a, Marcus-a room kan siam fel tawh chu lungawi zetin ka thlir kual dauh dauh bawk.

‘Inhnuai lamah zawk,mimal thil deuh ania’ a ti leh supa, Hnathawktu pathum te chuan nuam lo an ti hmel ngang mai.

Phur lo zetin ka zui chhuak ta nge nge,Stepa a chhuk thla chu ka zui ve a,enge sawi a tum ang tih ngawt ka rilruah a awm,Mampuii nen an khawsak dan tenawm tak kha ka hre tawh tih a lo hrechhuak leh hman a ni maithei.

‘Helamah hian ‘tih pahin inchung panna step tawntirh bula Kawngkhar awm chu a kawk zauha, a hawng zui nghal bawk.

Muangchangin ka pen luta, Library a ni tih a hriat theih,a zau over lo nangin a felfai thlep thlawp hle thung, bang zawng zawng chu Lehkhabu chi hrang hrangin a khat vek tih theih a ni a.Semi Sofa,nalh zet a inhunga, Dawhkan lian vak lo leh Chair a awma, lehkha chhiar laia hman tur niawm tak Lamp nalh dangdai tak Dawnkanah a inhung tel bawk.

‘Thu la..’ a ti supa, hnial ka tum zeta, mahse ka thulh leh.

‘Ka hmanhmawh viau ania’ bet lo zetin ka thu a, ka mal chungah ka kut ka daha, ka hmer kawp tlat bawk.

‘Hmanzan khan ka rawn call back dawn chea, a tlai tawh avangin ka lo call ta lo a...’

‘Engmah sawifiah angai lo ania...’ ka ti sapa, Dawhkan nghengin a dinga, a kut pahnihin Dawkan tlang a nem bawk.

‘Kha thilah khan ka thiam lo tih ka pawm thlap, chu bakah atukah khan zing atangin ka buaia.Ka phone lah ka ti bo bawk a’

‘Oh, a va pawi ve’ chhungrila pawi tihna nei miah loin ka ti halh ringawt.

‘Nia, mahse, i number hi ka hrechiang hman tawha, thil pawi lutuk erawh a ni lo.Nimin khan ka call tlang thei lo che a,tukinah erawh i pick lo a’ a ti supa, kha number ka save loh kha ni maithei.

‘I tum loh chuan a tlang lo ang,bakah engmah miss call ka hmu lo’ a ri erawh chuan ka ti thung.

‘Tlem tal hian min ring thei lo tihna mi a?” a ban a phar hluaia, beidawn hmel zet hian a dahthla leh a.A thaw hawk bawk.

‘Enge i duh?”

‘Maw?”

‘Enge i duh ka zawt che anih chu”

‘Nangmah...’ min melh runa, ka a emaw a ti niin ka hria.

‘Chutiang chu a hma khan sawi la ka awih maithei,tunah chuan ka ten che tihah hian ka chiang viau ania’ ka ti salha, mahse, ka aw erawh a dam leh thlap thung.

‘Ten a!?,enge tenawm ka nihna?” min rawn hnaih nghal ruaka, ka darah na zetin a rawn tham zui nghal bawk.

‘Min thlah rawh,min ti na alawm mawle’ ka ti that mai.

‘Au vak vak mahla he room atang hian engmah a chhuak dawn lo,bakah i nau te ho Inchung lamah an awma,inhnuaiah lah tumah an awm lo’ a ti hmuka,min hmer na zual sauh bawk.

‘Min thlah rawh, Mampuii ka ni lo ania’ ka duh reng vanga sawi chhuak ka ni lo,a lo lang hmasaber ka sawi pawp a ni mah zawk.

‘Sawi nawn leh teh”

‘Mampuii ka ni lo ka ti anih chu,chuan i kut tenawm hi lasawn bawk la’ a mitah tak ka en lui tlat, a mitmeng hlauhawm zia chu a alh emaw tih mai tur a ni bawk.

Ka beisei ang ngeiin min thlah chiang viau,ka thutna sirah a rawn thu thla ve chawrha,a lu dawmin a kun nghal daih bawk.

‘Hna hi kan zo tawha,tuna mi hi a hrana bill min pek dawn chuan Office lamah i rawn ngaihven dawn nia,anih phawt’ tih leh thawh ka ruala.

ka nunah a vawihnih nan ka mipa tawn ka thlah liam leh ta, engmah han nat em emna tur ka la nei hman lo, rei a la ni hek lo,mahse, ka induhtawkna a ti chhia a.Ka chapo ve na te infiamnan a hman tlat avangin ka chhungril a na vawng vawng thung.

‘Ani nen kan inkar hi i hre duh tak tak em?” kawngkhar ka hawng tur chiah chu a rawn tawng leh chuan min ti tawp leh rih.

Muangchangin ka hawi leta,na tuar a ang phian bawk.

‘Hre duh ti ila weekend a in riah dun kha in riah dun loh phah dawn tihna mi?” ka sawi chhuak ta nge nge.

‘Maw? Kha kher chu ka pha e’

‘I farmah ka lo kala, engkim ka hmu ti ta ila’

‘I hmuh dan a dik lo tiin ka chhang ang che’

‘A that chu, mahse, kan inkar hi a tawp tawh,engmah hriatbelh ka mamawh lo’

‘I duh duh in i titawp thei ngawt lo’

‘Oh, thei lutuk,Mipa i nih vanga ka nun infiamnan i hman hi a rem lo ania’

‘A tha nih chu,i chhuak thei ang’

‘I sawi vang ni hauh loin ka chhuak ang’

Kawngkhar ka hawnga, na zetin ka nem khar leh bur bawk,chak zetin Motor dahna lam ka pana,Motor ka hawng sawk sawka, ka tlanchhuak zui chu a ni ber, rei lo te pawh a ni bulah khan ka awm peih lo,ka chapona chhe mek kha nuam ti takin a thlir miau alawm le.

Kawng fal laiah Motor ka tidinga,ka rilru buai nuaih nuaih tihfim tumin boruak ka hip lut vang vang bawk,kan inchhan na kha ka ngaihtuaha, naupan chhiatthlak lutukin ka hre leh hnuhnawha, ka nui ta nge nge.Nuihzat vang erawh a ni hauh lo.

Karkhat zet kan inbe ta lo,an bill pawh an nauin a rawn buaipuia, amah nen inhmuh kan ngai ta lo.Ka tehkhin thiam dan ber chuan chhum kara Ni, rei lote lo lang zawk hi ka tehkhin ber.Ka nuna a lo lan chhung khan nuam ka ti a, min duatna te vang khan ka lo thlamuang bawka, mahse, chhum lo langin a hliah thut ang maiin tunah chuan a kalbo leh ta chu ania.Mahse, ka khua a har tih erawh ka pha lo,kan inkawp chhung kha rei ni lo mahse ka thiltih engkim a hre duha, min rawn calla, lunch ka ei leh ei loh thlengin a hre duh thin kha nia.Tunah chuan a reh ta vang vang chu ania.

‘Hey, enge maw i ngaihtuah thin le?” Jeffrey-an ka hmai bul lawkah a kut a rawn hmet ri a, ka phu zawk bawk.

‘Engmah..min bia mi?”

‘Hahthlak thei,bia...bia..bia’ a nui a.

‘Sawi nawn leh la’

‘Naktuk chu?”

‘Eng maw?’

‘Kha i hriat tawp loh kha’

‘Hre lem nang,i sawi dawn alawm’ ka ti a, tlawn pah titihin ka nuih lui sang bawk.

‘Phakar lutuk,naktukah ka thian te nen chaw kan eikhawm dawna,ka bialnu lemah changin min kalpui rawh ka ti anih chu’

‘No...’

‘Yess’ rang fein a ti ve thung.

‘Ka hmelchhe viau a mi le?” ka ti hlaka,angaihna hriat loh hmel fe hian a hawi buai nak thung.

‘I hmelchhia ti ila ka bialnu lemah chang rawh ka ti nang’ a nui a.

‘Anih chuan ka luck lo hmel a, i bialnu ni tawk lekah min ngai tihna mi?’

Kan infiam nasa thin,nel lah kan innel bawk, kan officeah a lo leng chho reng renga,an dawrah lah nitin ka lut ve bawk.Kan dawr thlang lawkah an mahni hian a pa hming chawiin dawr changtlung tak anneia, an neih kim avang hian kal mai a awlsam a, hmundang a kal leh kher ngai lo in mamawh tam zawk kan lei thei a, chumai bakah Aizawlah hi chuan  Sea Foods lam an kawl tha berin ka hre bawk.

‘Tak takin Friday  zanah kan huanah Party kan nei dawna, in buai viau ka ring nangin zankhat lek tur mah nise min set sak thei ngem ka ti a”

‘Decoration satliah nge siam kual ngai a awm?” ka ti a, ka hreh lem lo.

Abel-a te in Khawihtu Mistiri kha a la awla, Abel-a hna bik lah kha Macus-a te Inneih zawh lama khawih tan tur ania, mahse regular taka thawh theih tur anih vang leh amah kha ka duhzawng tak anih avangin kan hnuaiah a nghet in a awm ta law law.Lo awm ngawt ngawt aiah han thawh tur a awm chuan a duh ka ring zawk mah.

‘Siamkual ngai a awm ang,Party tih lemah khan Band kan nei dawna, Stage lian vak lo siam angai dawna’

‘Ok, kan naute ka lo bia ang aw,vawiin Tuesday ania,in duh ang chu kan puitlin hman mai ang’ ka ti a.

‘Lawk,a theih dawn leh dawn loh Confirm hmasa ang’ ka ti leh rih,kan Mistiri ka calla, ka rin lawk ang ngeiin harsatna a lo nei lem lo.

Wednesday atangin kan tana, an huanah Stage siam nana mamawh kan phur luta,zankhat atan chauh a ni bawka hautak lo thei ang ber leh rintlak tur si kan duh avangin a harsa phian,Officeah ka awm hman meuh lo.Friday chawhnu lamah kan zo fel a,Pool lian vak lo an neih pawh zan lama a duh tan zuan luh mai theih turin Light engkim kan fit fel veka, kan cheisak vek bawk.

‘I kal ve dawn tak tak em?” Diki’n mak tih hmel fein min ti a.

‘Dawn e,ka rawn lam ang che,a nuam phian ang’ ka ti satliah,boruak thar dawn ka duh vang a ni pah fawma, chumai Bakah Jeffrey-an min sawm nasa bawk nen kal ve ka hnial ta lo,Party na leh Concert na tur te hi kan khawih sak foa, sawm pawh min sawm ve ziah, mahse ka kal ngai lem lo.Zanin erawh kal ve ka duha, hna ka thawhrim mai bakah Party boruak han chhim pawh ka chak ve deuh hrim hrim,an band lah Mizo band te zinga ka duh ber an la nizui bawk.

Dar 8 rik hma hretin kan thlenga, an lo awm nual tawh,Security pawh a that hmel viau.Prog hi dar 8 a tan tur a tih a ni nangin an tan hman ka beisei lo.

‘Ka’n vak kual mai mai teh ang,nangmahin i awm hreh em?” Diki hnenah ka ti a.

‘Aih, hreh nang..kal rawh’ a ti a, a hmelhriat sa pakhat lo awm ve nen chuan an ti ti bawrh bawrha, ka kalsawn lai pawh hre hmel a pu lo.

Mi tlem deuhna laiah ka kal phei zela,thing thutthleng lo awmah chuan ka thu a,Light engin a chhun pha chiah lo nangin thla bial a hun hnai tawh bawka a thim chhe lo, van lam ka thlira, a thiang kuka,Arsi an phe neuh neuha,a lunglenthlak vawng vawng mai.

‘I tha maw?” aw lo chhuahna lamah rang lutukin ka hawilet a.Ka beisei loh zet ka hmuh takah chuan ka thu khawng nghal lah mai.

‘Tha...’ ka ti hmaka, helaiah hian ani hi hmuh ka beisei lo mai pawh ni loin ka ringchhin  eih lo zawk.

‘Ka lo thu ve thei ngem?”

‘Kalsawn ka lo tum chiaha’ tih leh thawh ka ruala. Mahse, amah ka kal pelh hmain ka banrekah a rawn man a, min pawt deuh dawrh a, a rim chuan ka hnar a verh zak bawk.

‘Min thlah rawh’ ka ti chang fak, mahse, ka sawi hre lo niawm takin a hmer leh vaka,min pawt hnai leh rawk tho.

‘Ka be duh che lawm’

‘Sawi dun tur kan nei lo’

‘Nei e,khang kum kalta chhung zawng zawng khan ka rilru i luah reng tih te pawh sawi ka duh a’

‘Min thlah rawh,ka au vak chuan i chak lo viau maithei ania’ Ka aw a khur dar dar mai, ka hriatthin Rosanga kha chu bo hneh tak a ni.

‘I duh chuan au vak la, pawi ka ti hleinem’ a nui a,a awmdanah pawisak a nei miah lo tih a lang reng, a hmaa ka hriat loh hlauhna in min fana, ka chhungrilah min man titih..

‘Thlah la a tha zawk ang ka ring’ Mipa aw hian thim chin atangin a rawn ti a.Abel-a aw a ang ,mahse, a lo kal ka beisei si lo.

‘Tu nge i nih hrep le?” sehchilh nawk nawk hian Rosanga’n a ti ve thung.

‘Keimah Abel-a.I man beh lai mek kha ka bialnu a ni bawka’ a rawn kal hnaia,kei niloin Rosanga a melh run bawk.