REVEUSE- 13

CHAPTER- 13

An sawi awmzia hre loin ka melh tawn seka, an unau lah insual mai ngam khawpin an in melh bawk.Vanneihthlak zetin tumah kan hnaihah an awm lo hlauh.

‘Min hrethiam ula,ka kalsan mai ang che’ ka ti a,tumah mah in min chhang lo,min chhan ka beisei lo sa ve hrim hrim bawk.

Mahse, ka inrin hmain ka ban rekah Abel-an a rawn man thuta,Kawngkhar lam panin min pawt kal nghal dawt dawt mai,ka tawng dawn zeta,mahse,a hmel a thinrimna lang chhuak,Sapui hliam ang maia rapthlak chuan min ti tawp leh hmiah.A hma pawh khan a thinrim hmel ka lo hmu tawh, tun ang khawpa a thinrim hmel erawh ka vawikhat hmuhna a ni thung.

A ding chuta, ka inring hman lo, ka va su deuh dawt bawk.Min rawn en a.Tlemin a hmel a lang dam ta deuh.

‘Khawiah nge i Car i dah?”

‘Sawtah sawn” tih pahin MC parking lam ka kawka,min chhang loin a hma ang bawk khan min pawt kal zui leh mai.

‘Chahbi..’ Motor bul kan thlen veleh a ti leh hmuka.

‘Keiman ka khalh mai ang’

‘Inhnialna Moodah ka cheng in i hria em?”

Engmah sawi tawh loin ka Chahbi ka phawrha, ngawirengin ka pe a,a kal kuala, a thu luta, ka luhna turin Kawngkhar a rawn nem hawnga,ka Car mah nise ka lut hreh takzet,Mahse, tihngaihna a awm chuang lo.

Thui fe kan tlan hnuah kan In lam kan pan lo tih ka hrechhuak chauh,ka ngaihtuahna ngawt ka lo kawm vangin khawi kawngah nge a tlan pawh ka lo ngaihven miah lo.

‘Hey, khawiah nge min hruai dawn a?”

‘I hre mai ang’ bung zetin a ti hmuk.

‘Haw hma ka ngai ania’

‘I chhungte hnenah ka hruai chhuak dawn che tih ka hrilh tawh’

‘Mi tenawmpa le(h)’

‘Engtin maw min koh kha?”

Keima hriat tawk lekin ka sawi emaw ka tih kha a lo ring deuh anih hmel,mahse, pawi ka ti hran chuang lo,ani aia Mipa tenawm hi ka la hmu miau lo a.

‘Tenawm ka ti mai ania’

‘A tha,ka tenawmna ka hmuh tir dawn che lawm’ a ti leh hmuka.

Ka chhang duh ta lo,a ti duh tak tak anih vaih chuan ka chan a chhe hle ang, Khawpui chhung kan chhuahsan tan tawha, Motor a tlem pharh tawh.A hma pawh khan a Speed kha chak pangngai tak a nih tawh nen tunah phei chuan chak tak a ni tawh,a rukin ka thutna seat ka thama, ka mit ka chhing ta ngawt.

Reife hnuah Motor a din takah chuan ka mengchhuak ngam ta chauh,ka thaw tha ngam lo kha nia, Tukverh Glass ka ti hniama,duhthawh zetin Boruak ka hip kawk kawk bawk.Ka hawi kuala,a Farm houseah kan lo awm reng tawh.A chhung lam khawih laklawh lai anih avangin Light a awm veka,kawtzawl hnim bur te pawh kha kan thawh tan hmain an tifai vek tawh bawk.Zanah phei chuan a lang nalh reuh phian.

‘Chhuk rawh’ zawi sup hian a ti leh nghuta.Mahse, a sawi hre lo ang hmakin ka thut ngaiin ka thu lui tlat thung.

‘Sawi duh i neih chuan tah hian sawi rawh’ ka ti hmaka, pawn lam ka hawi daih bawk.

‘A tha lawm,han pawmchhuah vel chu chu a hrehawm hran hauh lo ang’ a ti leh supa,  a thutna kawngkhar a hawnga, ka thutna lam pana a rawn kal kual chu ka ena, a sawi ang kha a ti ngei dawn tih ka chiang.Rang zetin  a rawn thlen hmain ka hawnga, ka chhuak fel thauh.

In lam pana a kal chu muangchangin ka zuia,sana ka en zauha,dar 7 a ri tep tawh,ka nu te hnenah min chhuahpui tur thu a sawi tak tak anih hmel,engmah call ka la dawng lo.In thlen hun pangngaia ka thlen loh hi chuan ka nu hian min rawn call ziah thina,Rinpuia te khua ka kal tum atang phei kha chuan a hlauthawng lehzual.

Tala lian leh rinawm zet chu a hawnga,inchhungah ka zui luta,tunkarah ka la kal miah lo,ka hawi kuala, ka kal hnuhnun ber ai khan hna an lo thawk tam fe tawh zawk.Inchhung erawh a hnawk viau.Han thut mai na tur pawh a awm lo.

‘Inchung lam khi a ziawm.Chho ila’ a ti leh supa, tlemin a aw hriat a nuam ta deuh.

Engkim a chhung awmdan tur ka Design vek a ni a, Room awmdan tur engkim ka hre sa vek.Room awm hmasa ber chu a hawnga, a thim thiap.Mahse, rei a ni lo, a ri khapa, a eng ta iar..Ka thaw hak mai.

‘Hetah hian i cheng chu a ni em lo maw?’ ka ti chhuak nghal hliai bawk.

‘Aw..i hmuh ang hian tah hian ka riak,chuan hetah hian kan Inneih hunah nangpawh i khawsa ang’

Ka chhang lo, ka hawi kuala,room hi luah theih nawk nawk chuan kan zo tawh, mahse, engmah cheimawina lam kan la hmang lo.Light pawh mumal taka fit engmah a la awm lo.Khum awm loin bang kil lam Chhuatah Mattress chhah tha zet hi a awm a,Lukham pakhat leh Blanket zangkhai chi a awm tel bawk.

‘Thu rawh’ a ti leh supa.

‘Aih..’

‘Ka chau ania,inhnial ka peih lo’ min rawn ena,a hmel a lang dam thluama, chau hmel a pu tak tak bawk.

Mattress chungah chuan ka thu ta nge nge, rawn thut ve tumna nei hmel a pu lo,Tukverh nghengin a dinga,ka chevel min en vung vung ringawt.

‘I ril a tam em?” teh daih chuan a..

‘Aih..’ mahse, ka pum ri kal raih raih chuan dawt ka sawi tih a tilang chiang nghal,a la nui suk zui bawk.

‘Diktak chuan Zanin hian kan Inah Dinner eitur i ni a,khatiang boruak vang hrep khan kan khawtlai ta thung anih hi a’ a tawng tawp lamah chuan thinrim insum niawm tak hian a sehchilh nak  mai.

‘Engmah i sawi lawk si lo a’

‘Sawi lawk lo,rawn lam pah nghal che tumin ka lo kal,anih loh chuan nang te hian min hnial leh ngei dawna’ a thle buk bawk.

A sawi dik zia keipawn ka hria,diktak chuan tihluihna vanga min nei tur niin hnial thei hauh lo mah ila ka hnial foa, ka duhdan te lo chuan min nawr kal thei lo fo tlat.

‘Duhthlang thei ka ang hle mai’ ka ngaihtuahna ang ni lo in ka ti chhuak hlak thung.

‘Dik chiah, mahse, i thlang thei lo chung hian min hnial ziah sia lawm..’

‘I u khan min hmuh a duha, chuvang ania ka lo chhuah..’

‘Ka hria,tun chinah chuan ka u hi ka tel lo chuan lo hmu leh tawh ngai lo la a tha ang’ a ti leh nghuta, thil tenawm zet chanchin sawi ang mai hian a ner nawk bawk.

‘Ka va hrethiam lo...’

‘Hriatthiam tur a awm lo,chu zawng chu’

 Sawi leh mai tur ka hre lo,a hma khan hetiang hian an inmil lo tih ka hre hauh lo,an In kan kal tum pawh khan tha takin an titi ho maia,engmah dik lo a awm ka hre lo,an mizia an in ang lo ang bawkin an tuipui zawng a in ang lo satliah maiah ka lo ngai ve tawp kha nia.Mahse, tuna a landanah hi chuan chhungrilah ser thuk tak,siam that mai mai chi loh an pahnih karah hian a awm niin a lang ta thung.

‘Ngatinge tah hian min hruaia?’ ka ti sapa.Hetianga titi mai mai tur hian helaia kal kher hi kan mamawh hauh lo.

‘Thil....lawk aw’ a phone a rik takah chuan a ti hmuka, a kekawr ipte atangin a phone a phawrha, rawn call tu a hmuh rualin anchhe lawh niawm tak hian a phun hluk bawk.

‘Aw nu...’ ka meng phar awk thung.A nu anih si chuan ngatinge a lo call vanga a thinrim kher ang?

‘Kan lo thleng har lo ang..Aw,hei ka bulah a awm” a tih zawm leha, a biak hma khan a mood a tha lo hle kha ania, mahse, a biak danah lawmlohna leh thinrimna nei ang pawn a awm lo.

‘Kan kal dawn mi?” min rawn en a.

‘Nia, mahse...thil min hrilh tur i neih si loh chuan ngatinge tah min hruai kher?’ ka inbengkanga.Min puih tum hmel a pu lo.

‘Hetah hian kan Inneih hunah pawh kan cheng zui maithei,mahse chu erawh hunin a la hril ang,zanin hian kan Inah chaw i rawn ei dawna, ka nu leh pa hian an ngaihdan tlang takin an sawi dawn tih pawh ka hria,an sawi ang kha thil nih dan turah i ngaih ka duh lo,mahse thil pawimawh ber erawh chu Ka nu leh ka pa hi ka ti na thei lo,chutiang bawk chuan nangpawh chan che ka tum hek lo.Neih ka tum dan che a fuh lo pawh a ni maithei,mahse,tihnat belh kher che ka tum lo’ a ti ta duah.

An In kan panna kawng tluanin kan tawng ta miah lo, kan rilru ve ve kan kawma,kan ngaihtuah erawh a inpersan hle in ka ring.A sawi awmzia kha pakhatmah ka hrethiam lo,a naupang zawk a ni a, ngatinge hmun dangah chen kher a tum ka hre lo.Bakah a nu leh pa tihnat a duh si loh chuan a nu leh pa sawi ang chu ngatinge a nih mai si loh? Kei pawh min chan a duh lo a ti bawka,a nupui ka la ni thuai dawna, ka duh emaw duh lo emaw ama ta ka la ni tho tho dawn,kan inneihna a tawp anih ngawt loh chuan ka zalen leh ngai tawh dawn lo kumkhua, Fa pawh kan nei dun hial maithei,ka ngaihtuah zawng ngawt pawn ka biang a sa hat hat thei.Mahse, beisei loh law law a fuh ang,kan bul tan na pawh tihluihna a ni tlat,chutichung chuan min tihnat belh a tum bawk si lo.Engmah ka hrethiam lo.

An In kan thlen chuan ka beisei loh zetin Tluangpuii a lo awm,ani bakah Abel-a best tur Amawia a lo awm tel ve bawk.Diktak chuan Tluangpuii lo awm ve ka hmuh rualin ka thawl nghal huai mai.An sawi danah Marcus-a te nupa Mampuii chhungten chawei turin an lo sawm chhuak anih hmel.Pawi erawh ka ti lem lo,engvangin nge an unau an inmilloh ka hre hauh lo nangin vawiin an tawngkam atang khan Marcus-a hian Mampuii a chhuhsak ni a rinna ka nei a,a ruk takin Abel-a ka tan nghal titih ngawt bawk.

‘Ka rin aiin in rei a’ a bula ka thut veleh a lo ti sa sa.

‘Ka’n intifai zuai ang,Farm atangin ka rawn tlanga,ka rei lo ang’ pangngai takin Abel-an a ti a,ka bula a awmdan nen kha chuan danglam tak a ni ringawt.

Kan chawei boruak a nuam viau,kan chawmhmeh engkim Abel-a nu siam vek a ni a, a siam thiam takzet.Nu tawng duh tak a ni lo nangin a nelawm em em thung,ka hmuh apiang hian a lang thar sara, a sam nise uluk takin a zial fel thlap ziah.

Ka rin angin engmah Abel-a nu leh pain an sawi leh ta lawi si lo,chaw kan eikham hnu lawkah kan hawsana, Abel-an min thlah a tum nangin keima Cara kal kan nih avangin tul ka ti lem lo,ani pawn a ti lui hek lo.Mahse, Motor ka luh dawna min hrilh erawh ka rilruah a cham zui vang vang tho.

‘Enteh,thil mak ka tih deuh chu maw Abel-a leh Marcus-a hi an in ang lo leh lutuk a..’ satliah angreng takin ka ti a.

‘Amak pawh ka ti lo’ a thil ei lai ei zawm mawlh mawlh pahin Tluangpuii’n a ti a.

 Inneih kawr min thui zawhsak tih an rawn sawia, hmundanga Order loin Mizo Designer kan neih that takin min khawihsaka,kan han enfela,mawi an tih zia leh ka inhmeh an tih thu an sawi laih laih nangin ka engahmah a kal lo,kar khat chauhin kan Inneih hun tur a dang tawh bawk.Engmah boruak dik lo thleng a awm leh ta lo,Abel-a nen kan inhmu ngun tial tiala, ka ngainat phah hauh chuang lo nangin ka tana huattur zawnga a awm zui lem loh avangin amah ka huat lutuk na pawh tlem chuan a zia ta deuh.

‘Kei chu mak ka ti,tiang em ema in ang lo hi a’ ka ti leh hlaka, ka eitur chu ei loin ka chawk kual sek ringawt,ka ei chak hlawl lo.

‘Eng lo...’ a hawi kual leh rih.

‘Sawi mai mai teh, i awmdan vel kha ka huatzawng tak’ ka nui a.

‘Chutiang a awlsam taka sawi ngawt chi pawh ni lo lawm,mahse i la hre lo tak tak hi kei chuan mak ka ti zawk’ a ti leh a,enge a sawi tum ka la man pha chuang der lo.

‘Anih chuan sawi la..’ ka ti nghata.

‘Marcus-a nu leh Abel-a nu hi a in ang lo aw’

Ka thil ei lai ka hak titih,he thu kher hi chu ka lo la beisei chhin ngai lo,amah Tluangpuii ngei pawh hian Marcus-a zawk hi a nuin a duat zawk tih a sawi tawh.

‘Eng fiamthu nge ni a?” ka khuh leh rih.

‘Eng fiamthu mah.Marcus-a nu Boral hnuah Abel-a nu nen hian an inneia, mahse, Marcus-a hi a pawm seiliana,a hna a bansan bawk,Doctor tha tak a ni a,mahse, Marcus-a tan hian a inpe pumhlum thak’ a ti leh duah.

‘Ka awih thei lo’

‘Amah zawt la ti nia, mahse, a thinrim zawk hial maithei,engtiklai mahin tuman nu hrang tih an sawi ngai si lo a’ a tih zawm leha, ka thil eitur ka nawrsawn ta ngawt.Engmah ei chakna ka nei lo.

Kan inneih vel tur atalangin hna pawh ka kal mumal lo a, Awmtei leh Diki mai bakah midang an buai lutuk vangin vawiin hian Office ka tlawha, Abel-a lahin kan Inneih hmaa a In siam zo turin min tur bawk nen kan buai dan a thuah hnih mai pawh a ni lo, thuah sarih a ni zawk.Mahse, ka chenna hmun tur anih dawn tlat avangin a hma ang ngawt rilru kha chu ka pu ta lo.

Te thawt ri ka hriat rualin tu emawnin min rawn bawhthlu nghal rawk,enge anih ka hriat hmain chhuatah ka tlu a, ka hriat leh hmasak ber chu tuemawnin min bawhbet tih zawng a ni mai.Min bawhbet tu dar kar atangin thei leh thei loin ka hawi chhuaka,engvanga min bawhbet nge anih ka hmuh takah chuan ka lungphu a rang nghal dawt dawt mai.

Inchung lam atangin an thil dahkhawm a lo tla a, min bawhbet tu hian min rawn chhan him lo se chuan min tlak ngei ang.Thawh tumin ka insiamrema, mahse, ka kawngah a rawn kuah a,min pawm nghet lehzual sauh.

‘Che suh, tihian awm lawk ang, a rei lo ang’ Abel-a aw hian a ti sup bawk.