REVEUSE-2

CHAPTER- 2

 Darkar khat leh a chanve dawn a liam leh meuh chuan ka Motor ke an thlak fel titih,ka u te lo thlen hma chu RTSah ka awm ta reng, in mawlbiak reng aiah tiin a hming ka zawt a,ABEL...Mizo hming a neih leh neih loh lam ka zawt lo,tul ka ti hek lo.Zanin hian min pui nasa a,mahse thian kan ni lo,a mimal chanchin lo hriat tum a finthlak loh, kan inpawhzui ang tih na a ni hek lo.In chhung kan luh khan Mipa pakhat, kum 20 vel bawr hian Tv a lo en a,kan thawm a hriat veleh a ding vat bawk.

Ka riltam leh tam loh min zawta, ka lu ka thing mai,Diktak chuan a tam lutuk zawk.Rinpuia te khuaah khan Thingpui leh a hmeh ,ningnel angreng fe chauh kha ka eia, thlen tlai ka inbeisei lo bawk nen Inah ka chhungte rualin chaw ka ei hman ka rin vang in pawi ka ti loa,Kawng laka eitur engmah ka pai hek lo.

‘Mat...enge i ngaihtuah thin le?” ka u in a tih riah ka ngaihtuahna tangin ka harh zawk.

‘Engmah...min bia mi?” ka en zawka, ka hawi let lehnghal mai.

Ka U,min chhangtu in ka Car a khalha,Ka nu leh pa faah chuan a naupang ber,kei aiin kum 3 in a upa zawk.Ka u mipa pakhat zawkin an lo kalna Ka pa Jeep a khalh thung.Ka u nen kan chuang duna, ka u pakhat zawk leh an Mechanic rawn hruai bakah kan Cousin pakhat an chuang ho thung.

‘Bia...engmah sawi loin ngatinge i kal thin le?”

‘Thin...awihawm loh,ka vawikhat Longrun na chiah anih hi’

‘Hmm, ka sawi tum i hria alawm,nangmah i in ngaihtuah lo anih pawhin midang te hi min ngaihtuah ve thin la,a bikin Ka nu leh ka pa’ a ti leh boh a, a sawi dik.Ka tleirawl chhuah phat atangin ka harhvanga, mahse, tumah ka insualpui ngai lo, inhauhpui phei chu ka neih awm ka la hre lo,ka chhungte hian ‘Duatsual theih loh fanu mal’ tiin min sawi thin,kan thenawmte pawh hian an pawmpui viau bawk.Chutiang em a fel chu ka ni lo nangin ka chhungte tana manganna tur leh rilru hahna tur zawng chuan ka awm ka hre ngai mang lo,Ni lo..tumkhat tih loh...

‘A nu leh pa fa a ni ve lo,hetiang hmeichhe ngeng leh harhvang,tu Thisen nge pawh hriat loh nena inzawmna neih ka duh lo,Mizo pawh a ni meuh angem tu hriat ni suh’ ka bengah a rawn ri nawn leha,kum a kal fe tawh chungin nimin ang maiin a nat dan pawh a la ngai ta cheu.

He tawngkam vanga ka manganna te kha ka nu leh pa bulah sawi ngam si loin ka kimki a, na ti em emin ka tuara, Mal leh khawhar ka intihna te kha up beh tumin ka beia, mahse, a Fa hrin te ang bawka min Hmangaihtu ka nu khan ka awmdanah dik lo a awm tih a hrethiam ta tho.Ka mangan ang chiahin an mangang ve a, ka natna min tawmpui in min Hmangaihna an tilang nasa zual sauh.Ka nu leh Rosanga nu nasa namen loin an inhauh phah ta bawk.Chuan, kan tawpa, engmah bul tan that leh theih a ni tawh lo.Mahse, a tawp tawh tih hrereng chung si khan amah ka beiseina kha a thamral ve si lo..

‘Lo let leh hman ka inring alawm,en laiin ka lo thlen em loh pawn nidang a In ka thlen hunah ka lo thleng dawn tho a’ ka ngawih vang vang hnuah ka ti muang fan raih ringawt.Ka ngaihtuahna vangin ka mood a inthlak vek bawk.

‘Ok..a tha lawm,engpawhnise tlem Bonus i dawng dawn tihna nimai...eeee,lo puitu che kha tunge a hming ?”

‘Abel-a’

‘Um...khawiah nge ka hmuh ang aw?’ ngaihtuah muk hmel fe hian a ti leh a.

‘RTS farmah khan min hruaia, a tlangnel phian a,huan enkawltu satliah chu a ang lo..’

‘Yay...ka hre chiah..RTS neitu te fapa naupang zawk a ni tak e.Enge a hmingpum kha aw?? Um..Abel Zosangkima a ni tak.Kar hmasa a kan Meeting khan a lo tel ve alawm le’ a ti chhuak nghal hluai mai.

Ka u hi Sawrkar Dept pakhatah Officerin a awm meka,a hna hi ka ngaihvenpui lem lo.A tui pui bawka nuam a ti em em tih zawng ka hria.

‘Eng Meeting?”

‘Kan Dept bak enge ni anga? A farm atang khan thil tamtak a tichhuak alawm, amah leh tuna rawn lar mek Mineral Water lam pe chhuaktu te nen kan Meeting a,i hre ngai lo mi?’

‘Hre ngai lo chu anih hi,mahse an Farm hming kha chu ka hre teuh ka lo ti a’ ka ti awlsam leh mai.

‘Juice te pawh an siama, an mahni product thil a tam tawh mai.Bakah Farm lo pawh thildang larna hmasa an nei a, Zarkawta an Dawr pawh i hmu reng reng ang chu.Amah kha chu  a luhlul ve ang, kan Meeting na la rei loh nen tunah pawh khan min hre awmin a awm lem miah lo’ a ti leh duah.

‘A hre lo che pawh a ni ang chu,nang luhlul lo zawk pawn i hriat mai bik loh kha’

‘Maithei..Kan Dept lam atang khan 10 vel bawr kan nia,a tawng tam ber ka ni lem lo bawka,min lo noticed hran lo tihna nimai’ a ti leh mai.

‘Lawk,ngatinge ama ta angin Farm kha i sawia? Nu leh pa a nei awm sia,RTS te chu  Family sumdawnna emaw ka lo ti a?” ka ti leh a.Ka tan hriat a tul lem lo nangin a chhan ka hriat si lohin hriatchian chakna in ka chhungrilah min nawr tlat.

‘An Family ta a ni hleinem,ama ta alawm,an chhungkaw sumdawnna te chu a u in a enkawl a...’

‘Ooh...an va hrang teh nuaih ve’ ka ti halh ringawt.

‘Hrang nuaih nge nuaih lo pawh ka hre lem hauh lo,hmanni kan Meeting khan a mizia awm chu a hriattheih ruak .A duh chu a sawi tlang pawp maia,bakah Pawnga khan a hmain a sawi tawha, Lehkha an zir lai pawn tuman RTS te fapa a ni tih an hre lo niin a sawi tak’ a ti leh duah, ka ngawi rauh rauh mai.

Ka rinlawk ang ngeiin ka nu hnen atangin ka phur zawh tawk aia tam Bonus ka dawng ta ngei.Huatna tel lo  thinrimna hi chu an thinrimna dawng tu nih a hrehawm ngai chuang lo.Ka u in min lo puitu fel a tih zia a sawi laiin kei ve thung chuan ngaihtuahna hran daih ka lo nei thung,a hmelpa leh inchei duhdah tak,vei nei em em lo niawm tak leh Huan enkawltu niawm tak..Mahse,Engkim khalai huam chhunga mi neitu lo ni ta daih lawi si..ABEL ZOSANGKIMA kha,a fel lua lo emaw a luhlul deuh pawh nise a chapo lo hle ang tih ngaihtuahna nei chungin ka mithlaah a lang vang vang thung.Ka hmu leh anih hlauh chuan engemaw tal chu ka la treat ang chu.Ka hmuh leh erawh ka beisei lem lo.Ka hmuh leh berah pawh ralkhatah a nih ngawt loh chuan a harsa ang..

‘I tluang fahran lo tih ka hre mai e’Office ka thlen veleh ka Cousin,Awmte-in min lo ti nghal chat.

‘Tluang lo ti ila haw lamah ka buai...’ ka ti hman chauha, a nui var var ka hmuh tak avangin ka ngawi ta zawk.Ka chair ka pawt chhuaka, ka thu thla hnak a,vawin hian eng hna mah ka khawih chak hlawl lo, a vawikhat  nan ka hna mut bo san ka chak ve ta.

‘Nizan khan i nu a rawn au bengchheng khawp mai,ka’n pa lah chu a nuih a za a’a tih zawm leh a.Thatchhe zet hian ka chair hnung nghengin ka thu a, nizan khan a lo va call ngei ang tih ka hriat avangin a thusawi mak ka ti hran lo.

‘Engmah ka hrilh lo a,bakah nangpawh ni la i pasal emaw tu emaw ber chu an bengchheng ve awm tho em mai’ ka ti a.Inchung lam ka melh vang vang bawk.

‘Maithei. Mahse i nu hi chu a nasa bik alawm,engtin nge Pasal i neih theih ang le? Oh...Sorry..ka sawi tum zawk chu...’ mangan hmel zet hian a ban a phar hliai bawk.

A sawi tum ka man mai lo,a ngaihna hre lo zet hian ka ena,a hmela inthiam lohna lang chuan min ti hamhaih mah mah zawk.

‘Enge tih dik loh i neih a?” ka nui hak bawk.

‘Rosanga..ih..amah kha i hriatchhuah phah ka lo hlaua’

‘Oh...ni tak..’

‘Mahse, i hrechhuak lo mai pawh ni loin i theihnghilh niin ka hmu tlat che’ a ti leh halh a, a pen hmawr a seh nauh nauh bawk.

‘Dik tak chuan...Um, ka theihnghilh..A vawikhatna a ni hial mai thei’

‘A va nuam tak,nimin pawh khan ka rilru a nuam thei lo a,mahse, tuna i awmdan en kha chuan i vei miah lo niin a langa,Inneihnaah kal i tum ta hial lo maw?’ a ti leh duah, ka thle bak mai.

‘Ka ring chiah lo,hun kal nual tawh mahse mi thenkhat tan chuan en nawm mak tak ka la ni tho maithei a,chuvangin at so kuala,ka na tawh lo tih midang va hmuh tir kher ka duh lo e’ ka nui lui var var bawk.

‘A dik...mahse, tawngkam i va thiam ta ve’ a hmel a hahdam hawk hmel langchhuak chu ka hmuh hmaih lo.

Midang an lo luh belh ve tak avangin hna lamah kan buai zawm ta zawka, ka mimal thil sawina hun a awm ta lo.Ka kal tirha ka phur loh ngaihtuah chuan ka thawk tui ta phian.Tunhnai deuh atang khan Awmtei awm hahdam se ka duh avangin keimah deuh hlir Siteah ka chhuak a.Thla thar atang phei chuan nau neih chawlh min hmansan tawh dawn lehnghal.

Kan hna hi Rilru sen em em ngai thil leh Budget tlem te a thawk kan nih loh avangin keimah ngeiin a hmunah en ka duh ziah reng reng a,Min ruaitu te Pawisa min pek ang hu aia tha emaw an lawmna tur tawk tal a thawh hi ka tum ber a ni a, ka vanneia tun thleng hian engmah Sawiselna lam kan Siteah a lo la lut lo.Mahse, ngaihdan nghet tak, Ka pa hnen atanga chhawm ka nei.

‘Nitin in thiltihah fakna lam hlir in dawn avangin in tha ber tihna a ni lo a, mi in ang pha ve dawn tan chauh tih hriat tur,Fak lawm leh lutuk hi an hlawhtling ngai lo fo ania,sawisel zawnga in thiltih comment na in dawng anih pawhin a sawiseltu che u haw mai loin an sawiselna pointah che u khan sawisel turin in awm reng em tih ngaihtuah hmasa ula,sawisel tur leh siamthat ngai a awm anih chuan insiamthat nan hman mai tur, anih lem loha nangmahni sawisel chak vang emaw ngei vang hrim hrim che u a an sawisel che u emaw an bei che u anih chuan hai der hmiah mai tur.Fakna leh sawiselna dawngsawng thiam lo mi innih chuan in hlawhtlinna tur in hmu phak ngai lo ang’ a ti thina, he thu hi ziakin dah lo mah ila kei leh ka unaute tan chuan Dan zawm tur, kan theihnghilh ngai miah loh a ni zui ta..

‘I kalna en ta che mawle’ tih ri ka hriat rualin ka tlan deuh dawrh a, ka petek nghal nawk nawk bawk.Tlu ngei tura ka in ngaih laiin tuemaw hian ka kawngah a rawn vuana, hneh zetin min pawt ding nghal zat bawk.

‘Sorry...oh...nang maw?’ Rosanga nen kan inmelh ta ran mai.

‘Um, keimah...i ngaihtuah ding lutuk anih hmel’ a nui suk a,kei ang bawkin a hamhaih ve anih hmel.Hmuh hi ka inbeisei lo satliah pawh a ni lo,a rapthlak lamah a kal mah zawk.

‘He tah law i lo awm?’ hmeichhe aw hian a rawn ti a, a aw rawn chhuahna lam ka hawi nghal zat.A rawn kal hnai chu ka en a,mak tih hmel fe hian min rawn en a, min zirchiang niawm tak a ni,ka kawnga Rosanga min kuahnaah chuan a mit len kual vel a tawp chat, ka harhchhuak nghal zawk bawk.

Rang lutuk hian ka kawng a kuahna ka zuk vuana, ani pawn hrethiam in a la sawn ve nghal mai bawk.Ka tluk hma khan iPad leh Pen ka keng tih ka hrechhuak chiah zui.Tunah khawiah nge an awm tak?!

Ka hawikuala, ka dinna piah deuh,chhuat leh bang inzawmna tur kil si chatin  iPad a lo awma, pen zawk erawh ka hmu zo lo.A pawi lo, pen chu Officeah pawh a la awm teuh,iPad erawh a chhiat chuan a pawi tih piahlam a ni ang,a thar lei leh mai a harsa lo,mahse vawiin a ka pawisa hman leh hisap zawng zawng Office lamah engmah ka la dahtha hman lo,iPadah ala awm vek,engtiang taka na in nge ka paih ka hre si lo,a chhiat loh nan ka tawngtai lo chauh chu a ni e.

‘Ngatinge a?” hmeichhia zawk bawk chuan a rawn ti chhuak leh a, mak tih hmel zetin min melh tawn zak zak bawk.

‘Eng ni lo e, a tlu tur ka lo pui mai ania,engpawhnise ka thian hlui a ni tho bawka’ a then suk bawk.

‘Wow..anih chu..’ a ti hliai mai.

‘Martha...hei hi ka nupui tur,Evelyn-i anih hi..Chuan,hei hi ka thianhlui Martha..’ hmeichhe nalh zet hmel danglam zawk chu reilote nimahse ka hmu hman tho mai.Kum liam teuh tawh pawh nise min lo hre ve a ni mahna le.

‘Ka hmu che chu ka lawm hle mai’ tih leh a kut rawn pharchhuah a ruala,a nui var var bawk.A kut ka vuan zawka, ka thlah leh mai,kei aiin a upa anih loh chuan a naupanna a tam lo in ka ring,ka duh vang ni hauh lo leh ka hmuh ve hma hauhin tu nge anih ka hrethawi tawha,a hna thiam zia leh hnehsawhzia te thlengin..Mahse, a hmeltha hle a,a nalh bawk tih erawh ka hmuh rualin ka hre chawp chauh thung.

‘Anih phawt u,ka hmanhmawh deuh a’ tih pahin ka nui lui saka, engahmah ngai lo niawm taka lang chungin ka iPad awmna lam panin ka kal nghal chu a ni mai.Mahse, a rawn tawng leh chuan min dintir leh ta tho.

‘Eng maw?” ka hawi let a.

‘Inneih sawmna kha i officeah ka rawn thawn tira, i hmu turah ka ngai a’ a mitmeng ngeiawm lutukah chuan tihelna a lang chiang ngang mai.

‘Um..hmu e..mahse..’

‘Ok, a lawmawm, i lo kal ngei kan beisei dawn ania’ a mit a siai zauh bawk.Thei ngat ila chuan ka that ngei ngei ang.