REVEUSE-3

CHAPTER- 3

‘Tehreng mai..Ka lo kal ngei dawn nia’ zangkhai vah in ka ti a, ka chhungril na leh nuam lo nghulh hliah khuh turin ka nui lui var var bawk.

Office ka let leh meuh chuan khua a thim lek lek tawh,Vanneihthlak lutukin ka iPad a chhe lo hlauh bawk.Rosanga te ka hmuh hma kha chuan ka hna kha ka thawk chak a, ka rilru zawng zawngin ka thawk bawka, mahse,engvang hrepin nge ka hmuh tura a lo awm ka hre lo,ka awm a ti nuam lo a, palzam tum eng ang mah ila harsa ka ti lutuk tlat.Amah nen kan inthen hnu khan ani kha chuan rei vak lo hnuah hmeichhe dang a kawp zui leh mai tih ka hria,khati chung khan atthlak zetin ka beisei ru tlat anih kha.Tun thlengin Mipa ka la hnaih leh ta lo cheu.Mahse, tun thlenga tumah kawp ka nei lo hi chu amah vang ngawr ngawr a ni in ka hre lo thung.Tumah hi ngaihzawn en in ka en lo a, tumah pawn min en bik lo nimaiin ka hria.Ka ngaihven lo ve tawp.Hna ka thawk mawp mawpa, ka theih ang angin Kohhran leh Khawtlangah ka inhmang a, ka active thei ngang lo zawk.Chhungkaw lian leh zahawm pangngai, tumah awt lem lo kan ni bawk nen rilru hahna chhan tur engmah ka nei ngai lo.

‘Ka haw dawn ania aw..’ a Bag lak pahin Awmtei’n a ti a.

‘Um, keipawh ka rei tawh lo ang.Ka tih lai hi ka ti zo lawk anga ka kal ve nghal a nimai’ tih pahin ka iPad a ka thil dahsa ho ka Laptopa ka dah luh mek ka en lehnghal mai.

‘E,vawiin khan nangmah be duh a lo kala, i number ka lo pe mai ania’ a rawn ti leh a.

‘Engthilah nge? Hna anih chuan nangpawn i be thei reng tho sia’ mak ti deuhin ka ti a.Ka awm kher loh pawn amah hian a lo dawr ve thei vek.

‘Nia,hna chu ania, mahse nangmah kher an be duh che a.Kan full tawh tih chu ka hrilh tho a’

‘Ok..anih chuan keimah min la be duh talh tihna ni em?”

‘Ka hre lo.I biak theihna tur number a duh sia,i Card ka pe ta mai’

‘Um..a tha lawm,lo ngaihtuah hah vak lo phawt ang’ ka nui a.

‘Nia..ka kal e..Pawnah kan pa a awm..Bye aw’ a ti a, ka ban ka vai zauh ringawt.

Zan dang ang bawkin dar 10 a rik meuh chuan ka mu fel leh than tawh, Ka room hi inchung bera awm a ni a.Kan Unau room a indawt phei vek a,ka room leh kan upa ber room a indawt chiaha,  mahse kan upa ber  hi a indan tak avangin a ruak ta a,Mikhual kan neih changin an hmang mai thin a,anih lemloh chuan a ruak in a awm mai. Inhnuai lamah ka nu leh pa Room bakah kan Nula room a awm thung.

Ruah surin tukverh a rawn theh rik that that chu ka ngaithla kara,engmah ngaihtuah mumal ber pawh ka nei chuang lo.Tukverh lam ka hawia,pawnlam eng a rawn luh deuh raih avangin a thim chhe lutuk lo.

Ka Phone nghawr dar darin min ti harha,ka ban a,ka pick hmain Sana ka en leh rih.Dar 10:20pm chiah chiah,ruah pawh a la sur ta reng.Tun ang tlai tawhah tu tak ni ang maw?

‘Hello’

‘Pi Martha-i tiraw?” Mipa aw hian a rawn ti a.

‘Aw, ka ni e.Enge ni ta?”thutchhuah pahin ka puansin ka tlawhhlim a.

‘Vawiiah in officeah ka lo kala,i lo awm lo a..Nangmah kher biak che ka duh a’

‘Anih chu mawle,eng chungchangah nge?”Ka tum aiin ka aw a chang lam hret, chhunah ka card a la a, tunah dar 10 hnu lamah a lo call chauha,ka lawm fahran lo.

‘Kan hna chungchang,November lam daih kha kan hun nimahse tlemin min tih hma sak thei angem?”

‘Oh...Nangni maw? Ka thawhpui khan hna thar lak tur emaw a ti a,bakah ka card kha chu i nei sa turah ka lo ngaia’

‘Nangmahni rawn dawrtu tak che u kha a awm tawh lo a, keimah hian ka thlaka, chuvang zawkin ania Officeah khan ka lo kal.Naktuk lamah min khawihsak theih dawn leh dawn loh report pek ka ngaia, chuvangin a tlai deuh tawh chungin ka hman hun anih vang ania tunah ka lo call’ a tih zawm leh duah.Eng ang hnathawktu nge ni ngai? A pu reng reng pawn a va han chhawr rim awm ve.Tun ang tlai tawha hna pawimawh sawi tur a midang call hman chauh chu!!!!!!!!

‘Ok,engpawhnise naktuk lamah kan sawi zawk dawn mi niang? Chutiang thil lian tham chu tuna thutawp lo siam ngawt kha a finthlak loh riau a’

‘Nia, a dik alawm.Mahse, Boss hian naktuk chawhma lamah a hre duh a’ a la ti ta cheu.

‘Hna hi sawi lawk mai a harsa viau ania.I hriatthiam ka ring,in hun kha November anih avangin kan la sawi tha leh ang chu kan ti kha ania.Bakah kan khawih laiah hian rilru zawng zawng kan lo pe a.’YES’ emaw ‘NO’ pawh ka ti lo ve ve phawt ang.Naktuk dar 11 ah kan inbe dawn nia’

‘Mahse....’

‘Khawngaihin min hrethiam dawn nia.Anih phawt le’ a rawn tawng leh hmain ka off nghal hmak.

Muthilh leh tumin ka mu a, ka beidawng thak.Ka tum loh tawpin ka mitthlaah Rosanga leh a nupui tur an lo lang a,duh loin ka inlet thak ringawt,awmzia a awm lem hlei lo va.

Chhungkaw thil tihkhawm nikhua leh thianho inhmuhkhawm tum a an sawi tam ber chu ‘Pasal nei tawh rawh’ tih hi a ni ta.Thil huatthla la tak ni lo mahse a dawngtu tan thil ninawm tak a ni ve thung.Pasal hi ka nei lo ang ka ti hauh lo nangin neih chakna ka nei lo.Inah engmah lungkham buai ka ngai lo a,ka mamawh ka thawkchhuak bawk.Thawkchhuak lo ta tehreng pawh ni ila ka mamawh ang ang ka tihkualna tur hi chu thil huphurhawm a ni chuang lo.

‘Pasal neih loh i tum hi a niang e,kan dampui reng dawn lo che a,nakinah chuan i u ten Nupui an la nei kim anga,i pangchang reng thei lo maithei.Kan awm loh hunah pawh thlamuang taka i awm nan leh i upat hun atan Fa neih emaw Pasal neih hi a tul’ ka pain min ti a.Mahse, tum khat chauh.Ka nu chuan vawikhatmah a la sawi ri ngai lo.

Ka harh leh chuan khua a lo var tawh,nizan khan dar hnihah pawh ka la muhil ta lo cheu kha ania.Khum bula sana ka hun chu ka en a,dar 7..Ka nu in min rawn kaitho har tawh lo tawp ang.Tho mai peih loin ka mit ka chhing leh rih.

‘Good Morning’ office ka thlen veleh Awmtei’n a lo ti nghal var.Kei aiin a kal hma ziah.

‘Morning..enge i an a?” tih pahin ka chair ka pana.

‘Ka tha..pawnah khan nangmah hmu duh che kha a awma, i rawn hmu em?”

‘Keimah maw? Aih..hmu miah lo,tu nge a?”

‘Nimina lo kal bawk kha,nizanah Phoneah in inbia a ti a’

‘Uh...ee,ka hre leh si e..Dar 10 pelh hnuah min lo call tih a sawi tel em?’ ka ti hlaka, ka nek nak bawk.

‘Sawi tel lo hlauh..Ngatinge a?”

‘Eng?”

‘I mood a va han uih ve’

‘Teuh lo’

‘Khati phei chuan a uih zia a langchiang lehzual..’ a nui zui hak hak bawk.Nia, a dik..Engpawh ka pha dawn anih chuan rang lutuk lam maha chhan let hi ka tihdan a ni a,Awmtei hian chu chu a hrechiang lutuk tlat.

‘Nizan ka mu tha lo,i Client duhawm tak khan hna chungchang sawi turin ka muhil min rawn kai tho a’

‘I inhauhpui tihna mi?”

‘Aih..inhauhna chhan tur a awm lo,an mahni kha November a kan khawih tan tur te kha an nia,tih hma dan a awm em tih min rawn zawt a.I awih lo zawk ang’ ka ban ka phar kual chiam ringawt.Engvanga thinrim em em nge ka nih pawh ka hre nek lo.

‘Shh...duhtawk teh..’a nui leh a.

‘Enge nuih tur awm a?” ka ti leh hlaka.

‘’I awmdan kha,a Senior thlak e’ a hmui a hupa.

‘I hmel anih chu a’

‘Kei aiin kum khat chauhin i nau tih hria la..Pasal neih ngen te pawh i ang alawm’ ka nui ve ta nge nge,Nula upa ti a sawi chiam tur la ni lo mahila naupang chhia erawh ka ni tawh lo.Rilru hi a puitling mawh em mai tih chauh lo chu.

Computer ka on a, mail ka hawng kuala, hna chungchang vek.Bungraw leina tur pawisa mamawh an rawn sawina leh pawimawh dang dang report hlir.

‘Min lo hrethiam lawk..’ ka hawi chhuak vat a.Min rawn be tu chu ka en nghal vat bawk.

‘Thu la..’ tih pahin ka tarmit ka nawr chho zauha,hna ka thawh lai hi chuan ka bun ziah.Ka mit hi chhe over a ni lo nangin hna ka khawih lai chuan bun ziah ka duh ve tlat.

‘Nizana rawn be tu che kha’

‘Um..Awmte,November hmalam zawnga hna kaldan tur duan lawk kha min lo ensak lawk mai teh’ ka ti a.

‘Lawk, a rei lo ang’ a ti awlsam mai.Kan inleng pa lam bawk ka hawi leh a,Coffee emaw thingpui pawh a duh leh duh loh ka zawta, a duh loh thu leh lawmthu min hrilh zawm zat.Ka chin than ang bawkin a landan ka en uluk lehnghal viau.A la upat hmel tehchiam lo,a cher reng rawng viau bawk,ui eiru niawm takin a ti dak a, a Confi lo hmel ngawih ngawih.Engamah hmain ka lo khawngaih ve ringawt, nizana a rawn sawi danah khan a Boss kha a khirh kual vel hmel sia, ani lah hi a ti ang deka.

‘Matty,tihngaihna a vang maithei..Tuna mi,Ruata te khawih lai hi Septemberah an zo turah ka ngaia,midang zawng hi chu October leh November.Tihngaihna a awm bau lo’

‘Ok, ka lawm e..’ ka ti sepa.Ka hmaa thu lam ka hawi zawm nghal a.

‘Ka pu, in hna hi November hma chuan a harsa takzet.Tihdan tur dang ka hre miah loa, ka hriat dan ber chu midang in duh chuan in lo be thei a’ hetianga Customer te tih hi ka vawikhatna a ni a,ka thiam loh ni miah lo mahse ka chhungrilah nuam lo tihna a lo awm nghal zat tho.

‘Ka hre lo,khalam chu Pu ka lo be leh phawt ang.Tihdan hram awm thei se ka tih nen...’ rilru hah hmel zet hian a ti a.

‘A pawi ka ti takzet,keini tehlul min duh der a, mahse in duh hun hi kan lo insiamrem dan anih avangin kan tawlh hma thut thei si lo a’ ka ti a.Nizan khan ka ngei tehreng nen tunah chuan ka khawngaih leh tlat lawi.

‘In pu chu biaksak che ila i duh em?” Awmtei’n a rawn ti ve a.Ka lo ngaihtuah miah lo.

‘Ni lo e,vawiinah kan inhmu dawna, tah chuan ka hrilh ang,Ka kal phawt ange’ tih pahin a tho a.

‘Lawk,engvanga hmanhmawh ta thut nge tih hi min hrilh a rem em? A case a zirin rilru han siam dan pawh a awm thut thei a’Awmtei mengphawk vak chu ka hmu reng nangin ka haider lui tlat thung.

‘Chulam chu amah nen in sawidun a rem chuan i Card hi ka lo pe ang.Ka kal phawt ange’

Tumah mah tawng loin reife kan thu renrawn,engvangin nge beiseina awm miah lo kha Hope ka pek ngawt ka hre lo.Eng problem pawh lo neise tihngaihna a awm lo tih ka chian tluk zetin Awmtei pawn a chiang.

‘Enteh,ngatinge tiang kha i sawi ka hrethiam miah lo,thla thar atangin ka chawl dawna’

‘Ka hre bik lo’

‘Anih si chuan nang hi i a tihna a ni mai em?” ka melh zawka, a hmel nur nang maiah chuan mi a angin min hmu tak tak tih a lang reng.Kum khat aia tam kan thawk dun tawha,vawiina  ka mizia ang hi ka la nei ngai lo.Khatiang thil atthlak lutuk pawh kha ka sawi ka la hre hek lo.

‘Sorry..ka a niin ka inhria’ ka ti ta thlawt.Nimin atang khan ka dik thei lo.Rosanga te ka hmuh vang kha chu anih ka ring si lo.

‘I hnar kha..’a ti thata, ka kawrah a rawn far nghal zat.Rang zet hian ka zuk en a.Ka phun hlak bawk.Ka hnar hi tunhnai deuh atang khan a thi leh ringawt zela,hriat lawk theihna tur engmah a awm ngai lo.Bakah na engmah a awm chuang hek lo.

‘Ngatinge? A na  em?” Awmtei’n a rawn ti nghala, Diki a rawn tho ve nghal vat bawk.Diki hi Peon ang deuha kan hman a ni a, Office ka hawn tirh atangin kan bulah a awm tawha, kan inhrechiang thawkhat tawh.

‘Aih..na lo’ tih pahin ka hupa,dak chungin Drawer ka pawt pah bawk,ka la pawt hawng mai thei lo zui bawk.Diki a rawn thleng hmasa,ka Drawer a rawn pawt hawnga,enge lak tur hrilh angai lo.Cotton roll a rawn phawrha, a pawt thlaa,ka hnarah a rawn hmehbel nghal chawt chawt bawk.

Ka hnar thi tih tawp tuma kan beih chhung hi rei a ni lo.Mahse, lem palh a hlauhawm thin a, reilote pawh nise thil nuam tak a ni miah lo bawk.

‘Hmanni khan i in entir ta em?”

‘Aw...engmah problem ka nei lo.A la reh ve mai ang, tiang hi an tam mai a ti’ ka ti liam puat.In entir tul ka tih loh vei nen min tur lui tlata, ka han kala, ka rin ang chiahin a lo ngai thupui falua lo.

Site hnihah ka kala,ka nileng ta thak.Engmah buaina ka tawk lo.Nidangah ka hnar a thi tum pawn han chauh zui viau pawh ka nei ngai lo hrim hrim bawk.Office tlawh tawh loin ka haw tlang ta zawk.Kan In thleng turin darkar hnih tal tawp hun ka hmang leh pek.Kan khawpui neih chhun mai bakah kan kawng neihchhun te hi a zim tawhsa nen hian kan la nekchep a, kawngsira Motor dah mai mai a tam bakah Insa tur lahin Kawng nek ranin kan sa duh tlat zel.Tunah chuan AMC lam an khauh ta bawka, kawng hnaih leh lutuk a insak hmuh tur a vang ta zawk.

‘Vawiin kal i tum ta em?” Tluangpuii’n min rawn call a, ani hi Rosanga Cousin leh ka thiannu ni bawk a ni a.Rosanga nen kan buaina tamzawk pawh kha a hria.Mahse, Awmtei ang em chuan a hre kim lo thung.Rosanga nen kan inkawp tawh loh hnuah pawh amah nen hi chuan kan la inthlah tak tak chuang lo,mahse, State dangah hna neiin a awma,a lo haw chang anih lem loh chuan Phone call leh Msg tih vel bak inkawm ngaihna a awm tak tak tawh chuang lo.

‘Khawiah?”

‘Misualpa te Inneihna’ ka thaw hak mai.

‘Ahh...kal se min ti tak tak em?”

‘Aw..’Hmeichhe harhvang tak,lu zo veh vawh leh a duhzawng chu tlang taka sawi pawp thin  a ni a,a kum upa deuh tawh mahse a mizia engmah a la thlak chuang lo.Thlak ngawt theih a ni hek lo.

‘Ka kal chak lutuk lo ang tih chu  i hria anga, mahse, ka nat vang a ni lo ania’

‘Ka hria.Ani vang hrep khan tun thlenga i la na anih chuan ka thiannu MARTHA kha i ni nang’ a nui zui kar kar bawk.

‘Nghal lutuk,a hrim hrimin Officeah pawh i lo kal lo a, Inah pawh i lo kal chuang lo.Awmtei a awm si lo a, ka buai tur zia pawh i hre pha nang’ ka ti hlaka.

‘Ninawm,kal ang..Pha kual duah loin..Hna ringawt ngaihtuah loin i nun kha chen ve rawh.Dar 11 ah min rawn lam ang che’ a phone a off zui nghal daih.Tihngaihna hre lo lutukin ka phone ka melh vak ringawt.

‘I phone khan i pawi a sawi ami?” ka sama pawh pahin ka u in a rawn ti a, kalsawn pahin a nui huk huk bawk.Tun thleng hian naupang ber ka nihna angin min la Naute chei tlata.Min fiam dan pawh danglam a la awm meuh lo.

‘Sawi lo..enteh..Vawiin hi Rosanga te inneih ni ania’ midang an awm leh awm loh ka thlek leh rih.

‘Chuan..?” a Thingpui in tur thlit chhuah pahin a ti awlsam mai.

‘Kal nge tha ang kal loh?”

‘I thu thu’

‘I va han biak tlak loh tak’

‘Enge? Kei chuan ho ka ti ve tlat.Kum engzat nge liam tawh? Kum 10..a aiin a tam zawk em? Bakah hmana i hmel ang kha i pu tawh lo a, i ha rual lo lutuk siamremna pawh i vuah tawh lo a’ a nui a..Ka lei ka chhuahkhum vak ringawt.

Ka tleirawl chhuah hlim hian tuman hmeltha min tih ka hre ngai lo.Inchei ka uar lo a,ka u te Mipa vek annih avangin Hmeichhe thawmhnaw aiin Mipa thawmhnaw ka ngaina zawk.Barbie nena in awmlem vel pawh ka tuipui lo.Ka ha rual lo nuaih mai tihrual nan Brace ka la vuah tel zui bawk.Ka sam bu lah a chhah em em a,ka zuah sei ngai mang lo bawk.Ka ha tihrualna hi ka u te hian min chhaih nan an hmang nasa thina, Naupang tih takah ka tahpui tum lah a tam.

Dar 11 a rih meuh chuan ka hna tul kalsanin Tluangpuii lam turin an In ka thleng der tawh.A lo insiam peih vek tawha, rei pawh thu loin kan tlanchhuak zui mai.A tawng siam siama, amah hi Designer thangduang tak a ni a,Mizoramah hna thawk loin Mumbai lamah awmhmun a khuar a,hriat pawh a hlawh viau bawk.

Ka lo rin lawk ang thil a thleng ta lem lo,tuman min melh hrek hrek pawh ka hre hek lo.Kum a kal nual tawh bawka, miin min enbik tur leh hmuhnawm tura ka in ngai kha ka ringsual anih hmel,ka hahdam hawk thung.

‘Ehe! Tuemaw ka hmu ania.Ka be lawk duh’ tih pahin kan thutna lo lam panin min kaia,tu tak ni ang maw?

Mipa lo dingkhawm deuh taih bul kan thlen chuan a dinga,min hnungchhawn zawnga ding tih loh chu an rawn hawi nghal thap bawk.

‘Hey...Abel’ tih leh lo hawi ve lo ber banah chuan va vawn a ruala,ka rilruah thil hriatchhuah ka nei zawk bawk.Kha Abel-a kha...

A rawn inhera, amah kha a lo ni tak tak..Kan inhmuh atang khan thla a liam tawh.A tir lam kha chuan ka rilruah hmuh leh duhna a awm thina,mahse hun a kala, ka lo hre leh tawh lo.

An inchibaia,tih ve mai tur hre loin ka lo ding mawl ve ringawt.Min rawn en zawka, a hawi let leh mai,min hre hmel a pu lo,ka hmuh hmasak zawk ang lo takin Suit thui nalh zet a ha zuiha, a palian bawka, a lang nalh tih piahlam a ni.

‘Hei ka thiannu,Matty..Mat, hei hi Abel-a nih hi..Mumbai kan awm tirh lama ka kid thin’ a nui a.Za lo zetin ka then ve ringawt.

‘Matty...i dam maw?” a ha var rual nalh zet langin a then suk bawk.