REVEUSE-4

CHAPTER- 4

‘Um..tha lawm, nang zawk?” zangkhai thei ang ber hian ka ti let ve a.Ka hmuh hmasak kha chuan a nelawm viau khan ka hria a, tunah chuan a hmel a nelawm lo ngang mai.Midang lo awm ve pathum te pawh min hmelhriattir hlawma, an fel hmel hlawm viau mai.An inbiak danah an innel thawkhat tih a hriattheih mai bawk.

‘I Motor ke lamah Problem i nei leh tawh em?”zawi sup hian a rawn ti a, Tluangpuiin mak ti hmel zeta min rawn en chu ka en ve a, ka thle bak ringawt.

‘Nangni pahnih hi..in inhre sa tihna ni em?”

‘Aih’ ka chhang rang lutuk hrat.

‘Hre sa ti ta ila...’ ka melh vata, a glass no ken lai a chawikang zauh ringawt.

‘Enge in awmzia? Sawi vat’

‘Hman deuh khan ka Motor ke a chhia...’ a lo tawng ve takah chuan ka tawp leh rih.

‘A Motor ke Spare lei tur hian kan kal duna,chuan,ka thlak sak vek...’ ka melh reng ringawt.

‘Nang hi...’ min rawn nghawka.

‘A ni lo..aaa, a ni aniang’ Abela lo nui ka hmuh takah chuan ka nui chhuak ve hak mai.

Inneihna hmun kan awm chhung chu kan awm ho ta reng,a tawng chhuak leh a thusawi midangin an ngaichang deuh zel chu mak ka ti hran lo.Mi hausa te hi chu hetiang hi annih dan a ni ziah tlat.Kan harsa ngai lo a,mi hausa lawr erawh kan ni ngai chuang lo.Mahse, Abel-a te dawr RTS hi chu kan naupan lai atang pawhin kan hre tawh.Ka lo ngaihven hluah ngai loh avangin tu nge a neitu ni a eng mi nge annih erawh ka hre ngai lo,mahse Aizawla khawsa hlun mi nawlpui chuan an Dawr hi chu kan hre vek in ka ring.

Zanlama Party nei tur erawh chuan min sawm kal zo ta lo.Kan haw dawn thleng khan Abela te nen kan la awm ho a,a hranpa takin Rosanga te hmuhna hun ka nei lo,ka lawm zawk.

‘Enge i an a?” ka room a rawn luh pahin ka nuin a rawn ti a.

‘Engmaw?” ka damlo miah si lo,engvangin nge min zawh ka hre lo.

‘Vawiin i kalna lam ania.Amah vang hian i la na niin ka lo hmu che a’

‘Aaaa, Nu..a teuh lo mai’ ka ti chhuak halh ringawt.Ka nu hi ka tan chuan nu a ni satliah ngawt lo,an mahni hringtu an nu te enkawl ngei ai hian kan inpawh zawk hial maithei.

‘I u khan a sawia,mahse, ngaihtuah ngai i nih a rin loh thu pawh a sawi tel tho’

‘A sawi dik anih chu’ ka ti sepa, ka lukham nghengin ka thu mu a, ka phone ka khal nauh nauh ringawt.

Ka nu erawh a vei kuala, ka Dressing table a thil awm a va rem tha leh thin a,a nervous chang hian tiang hian a awm fo tih ka hria.

‘A chang chuan i pa nen hian kan sawi dun thina, amah vang khan i la na anga, midang hi i ngaihsak lo emawni kan ti a..’

‘Pasal nei turin min duh tihna ni maw?” ka nui hak hak mai.

‘Teuh lo,theih se chuan kan bulah awm reng la kan duh zawk.Mahse, i kum a la tam tial tial anga, keini pawh kan la awm lo ang,tah tak chuan i khua a la har dawna, that laia kan rilru ang hi upat hnu chuan kan taksa hian a tlin tawh lo fo a, tuna kawng rem i rah lai hian Pasal nei la kan duh,mahse kan tur lo che ania’ a ti ta duah,A vawikhatnan a sawi ve ta chu ania.Mahse, min nin vang a ni hauh lo tih erawh ka chiang.

‘A dik alawm,mahse, neih ngawt tur an vang em mai’ a rilru tihnawm nan ka nui lui leh hak bawk.

‘Ngaihven hek lo che, hei vang tak hian alawm kha pa vang khan i la na ni a ka hriat le’

‘Ngaihven ngawt dan a vang e,pawnah sawn ka va chhuak anga, ka va au mai dawn mi?”

‘Uang viau lo teh,thenawmnu pawn an Nau tan a it teh che kha’

‘A awm lo e a,inzawnpui tih vel hi ka rilrem zawng a ni lo’ ka zi mar a, ka ham zui bai bai bawk.

‘Ka fiamthu anih kha, i nu Thani te chu a uang alawm,a tlai tawh,mu tawh rawh’ tih pahin Kawngkhar a pana,mahse, a hawn hmain a rawn hawi let leh rih.

‘Naktuk kha i theihnghilh ange, i Pu a thinrim nasa dawn ania, nangmah chauh hmeichhia i ni tih hrereng la’ a ti leha.

 Diktak chuan ka theihnghilh chiang khawp.Ka pu, ka nu pa piancham a ni a.Ka nu te unau Pahnih chauh anni a, kei chauh an tu te zingah Hmeichhia ka awm,diktak chuan Duat rawn chu ka ni chiang e.Ka pu aimahin ka Piin min duat zawk.

‘Theihghilh nang..mahse, ka tlai maithei nia, vawiin hna ka kal si lo a.’

‘I kal theih chuan a tawk mai..’

Ka Phone riin ka mutui lai min tiharha,lak ka tum zeta, ka mut ngaiin ka mu leh ta zawk.A tawp zui ve mai bawk.Men pawh ka meng peih lo.Tun ang huna inbiak reng reng.Muthilh leh tumin ka inkhuh tha sauh sauha, pawn lama ruah sur thawm chuan mut min ti chak ngawih ngawih.Ka muhil leh hman tep tihin a rawn ri leh,ka che chuang lo, a tawp ve mai ang..Mahse, a tawp rual deuhthawin a rawn ri lehnghal..Hrep tak hian..

‘Hello..’ ka aw a chang fak mai.                                                       

‘Ka pi,Muana ka nia.Thla hmasa lama hna chungchang rawn be tu che kha’

Ka  buai deuh nak nangin rei a ni lo,kha pa, cher leh dawdang tak,confi lo em em kha ka mitthlaah a lo lang a.Midang biak hun a hre thiam thei ngai dawn lo nge a Bossin a tur lui leh zawk ni ang? Ka thinrim teuh mai.

‘Aw..enge ni?”

‘Ka rawn tihbuai che chuan min ngaidam la,vawiinah Bossin rawn hmuh che a duha, hun i nei angem?”

‘Eng thilah nge?”

‘A hmaa ka rawn sawi bawk kha nia, kan reh vang vang nangin tunah amah hian rawn hmuh che a duh a’

Midang be mai tur khan ka ti a,an harsatna min hrilh turin ka ti bawk,mahse, engmah an rawn sawi ta lo kha ania.An cancel lo a,an pu pawn an problem engmah a rawn sawi ta chuang lo.

‘Naktukah min rawn be thei angem?”

‘Naktuk!? Enge i sawi awmzia?”

Mak a ti hmel lutuk chuan mak mintih tir zawk, a a deuh zawk nge mawni?

‘Aw,Naktuk..tunah chuan mut hun a ni a’

‘Aahh,tunah hian zing dar 7 vel a ni a’

Ka inperh tho zawk a ni ber.Ka hmai a sa hut hut bawk.Rang lutukin ka mutna bula Sana awm chu ka ena, a sawi dik chiah,khua a nawm loh avangin Ni a lang lo a, chhum a awm bawk a ni ngei ang.Chuvangin khua a thim khupa, Curtain chhah zet inzar chuan a ti thim zual bawk.

‘Sorry,nizan ka mu tha lo a.Khua a la thim emaw ka ti atin ni’ ka ngei ngawt kha ka zak veng veng.

‘A pawi lo,keipawh ka lo call hma hrim hrima.Chuan,hun i nei thei angem?”

‘Dar engzat velah nge lo kal a duh ang?”

‘Dar hnih ti ila..’

‘Ok,site lam ka tlawh hmasa anga,Lunch turin dar 1 velah Officeah ka let ka ring,ka lo insiamrem dawn nia’ ka inthiam loh lutuk vang nge kei leh kei lo ang takin ka aw a dam thlap mai.

Ka Phone ka dah thlaa, ka hmai ka hup vang vang ringawt.Inhnuai lam ka chhuhthlak chuan a lo la reh thap,midang pawn thawh an hai ve tho anih hmel e.Keima tan chuan thawh hai nasa ka la ni lo,mahse, ka nu leh ka pa hi an tho tlai ngai lo.Choka lam ka pana, ka thawm hraiin kan nula a rawn hawi nghal vat bawk.

‘Thingpui i duh em?’

‘Ka lo inthlit mai ang,ka nu te an la tho na nge?”

‘Tho tawh e,Pu nen an chhuahna a rei tawh mai’a thil chhuan chawh pahin a ti awlsam mai.

‘Khawnge an kala? Khua a nawm loh loh nen’

 Thingpui thlit tumin Kettle ka bana.

‘Dawrpuiah kan kal dawn an ti a,abak engmah an sawi lo’

‘Um,ka zawt mai ang’

Ka nu ka calla, a pick thei lo, Call leh ka tum lai takin amah zawkin min rawn call back a.

‘I putea Bp sang a zual deuha, mahse hei a tha a kan lo haw mek e’ a rawn ti a.Ka thaw huai mai.

Office ka thlen veleh hna tul tih hmasak tur ka en thuak thuaka, tlai lamah kal chhuah hma ka ngai dawna,Chubakah Siteah rei tak ka awm thei dawn lo.Dar hnihah mi hmuh tur ka nei sa bawk.Zingah ruah a sur nasat vei nen tunah chuan awihawm loh khawpin Ni a sa leh at tawh.Awmtei awm lohna la rei loh nen ka buai a zual takzet,Diki hian Office lam bik hi chu a lo enkawl vek thei, mahse thil tak tak sawi turin a tih theih loh chin a tam.Site a an hnathawh entur phei chuan kal tir chi a ni lo.

‘Hello’

En pawh enloin ka pick a.            Zuala thil min entir lam ngawt ka thlek bawk.

‘I lo let dawn hnai tawh em?’ Diki a lo ni a.

‘Aw,ka zo tep,ngatinge?”

‘Nangmah hmu tur che a lo thleng tawha’

Rang zetin ka sana ka en nghal.LALPA le(h).Dar hnih a pel tawh.

‘Amah kha ka lo be lawk ang’ ka ti ta zawk.

A ri deuh rak raka, ka be duh tih a hrilh thawm chu ka ngaithla kara,a hnuaia thawk pa khan a hlau em em mai si a, eng mizia tak nei ang maw?

‘Hello’

Mipa aw thum lam hian a rawn ti a,Putar lam,khirh tak ni tura ka ngai kha ania,mahse, a awah chuan a la upat hmel lem lo tlat.

‘Min hrethiam teh,Site lam hi kan buai ta riaua.Ka tum angin ka awm thei ta lo a,mahse,ka rei tawh lo ang’ nuam ka ti chiah lo.

‘Ok, a pawi lo.Keipawh hian tih hmasak lawk tur ka neia, chumi chhung chuan i lo thleng hman mai ang chu’

‘Nia..chutiang chu a tha ang’

Tu nge anih ka hre hauh lo nangin vawikhat inhmuhna tura han tlai ngawt mai chu thil nuam tak a ni lo.An hna kan khawih tura min rawn biak tirh khan an In siam that tur vel kha Awmtei nen kan en veka,midang ang lo takin an mahniin Design deuh roh,duhdan bik an lo neia.Mahse, chu chu a neitu ni loin an hnathawkin min hrilh thung.Tunah an hun thlen hmain tih hmanhmawhsak min rawn dil leh a, chu pawh an hnathawk bawkin a rawn sawi leha,engang mi nge annih ka rin hriat ruak thei.Mi hausa, mahni kut zala engmah ti peih lo an ni ngei ang chu.A pawi lo,eng mi pawh nise ka tan chuan a in ang vek.Ka thawhchhan chu Pawisa vek.Oh..nuam ka tihna nen.

Zuala nen rei vak lo kan inbe leha,hmanhmawh zetin Office lam ka pan ta zawk.Ka tum lawk dan kha chuan en thuak chauh a ni a, mahse, a neitu lam ten an duhdan an thlak danglam vangin tlem siamthat angaia,keimah loin a Design an khawih thei si loa, vawiin a tih fel ngei ngei angai bawk.

‘Khawnge?”

Office ka thlen veleh Diki hnenah ka ti nghala.

‘A lo la let lo,awi..U Matty,a chhe lo lutuk’ a nui a, ka ner nak thung.A naupan thlak mang e ka ti rilru.

‘A tha nih chu.A lo let leh hunah ka lo hrilh dawn nia,ee.Dik.Jeffrey te dawrah ka pu thil tur ka pack tira, min zuk lak lawk teh’ ka ti a.

Chau zetin ka thu hnak mai,ka phi buai kual vel lutukin min ti chau vek,chunglam ka melh vang vanga,ka Nu thilsawi ka hrechhuaka,Pasal neih bawk.Ni e,kum naupang ka ni tawh hauh lo,mahse, Pasal nei rawh intih teh ngawt hi a fuh lem lo,ka hmelthat tawk loh hi chu engpawhnise ka zei lo lutuk nge ka hre bik lo.Mipa, min han ngaizawng awm an awm pawh ka hre lo.Engemaw keimahah hian Dik lo a awm emawni ka ti rum rum zawk.

‘A number a dah em?’

Diki hnenah ka ti a, dar thum a pel hle tawh.A lo la let ta lo cheu.

‘Aih, dah miah lo.Chuan,vawiin hi haw hma ka duh hun kha nia’ nidawn tak.

‘Kei pawh,mahse, keimah zawk ka tlai hmasa sia.Lo nghah ngat ngat mai loh chuan..; ka nui a.

‘Nghah man a awm dawn lutuk,ka haw hma tur hi thulh mai ka duh’ a ti leh a, a va mak bawk tak.

‘I ho lutuk,an hna kan khawih dawn alawm,kan la hmu hne hlui dawna,I pasal pawh a la ni thei ania’

‘Awi, ka a vek thei ang..’ a nui a.A mizia hi a lawmawm hrim hrim.

‘I at leh si ten a tha nang’

‘Nangmah nen in inhmeh ngawt ang’

Ka melh zawka, nui tawh loin a hmel a thutak viau, min en ran bawk.

‘Ka ring chiah lo,kei te chu Tlangval alawm ka nih’ ka nui lui hak mai.

‘I ngaihven lo em lawm,tunah pawh u Jeffrey-an a lo sawi leh kha’a ti a.

‘Lo rak ve mai mai teh se’ ka ti duh lek.

Jeffrey ber kher hi chuan engpawh sawise thutak a awm dawn lo tih ka hria.Kan Office thlang lawkah Dawr lian zet an neia,Office kan hawn hnu lawkah kan innel ta thuai kha ania,mipa dang ang lo takin min ngam nghal bawrh bawrh viau.A tir lam chuan ka ngaithei lo lek lek thin a, mahse, a reia, a mize tlang tak leh engmah zep nei lem lo a min fiam pawp pawp te pawh ngaiah ka nei ta zawk.Thian tha tak tih tur ni chiah lo mahse mipa thian satliah ang chuan a chhiar tel theih tho.

Dar li rik dawnah Diki a hawa, ka hmanhmawh tawh bawk nen ka bet tawh lo,a lo kal hma lo thut ngawt ngawt aiah tiin peih lo chungin bill vel ka enfel ta zawk.Ka tihzawh hnuah pawh a lo la thleng ta lo fo.Eng ang mihring nge maw anih dawn le??Ka hmuh hma hauhin ka mil lo nghal tawp a ni ber.

‘Hello..’

Muana ka call ta ngawt,’Martha ka nia,I boss hi ka nghak renga..A rawn kal thei dawn tawh em le?” ka ti a, ka lungawilohna ka thup hram hram bawk.

‘Aw, a lo chhuak tawh’

‘Ok,anih chu’ ka ti a.

Ka hnuai kawngpuia Motor tawlh dul dul chu ka thlira,ngaihtuah mumal pawh ka nei chuang lo.Minute 10 ka nghak leh anga, a lo la let loh fo chuan ka kalsan ngei ngei ang.Muangchangin ka inhera, mahse, ka hnunga lo ding ka hmuh rualin ka phu zawka, ka tum loh tawpin ka rak thawt bawk.

‘Sorry’

‘Nang’

Kan tawng chhuak rual chiah,a  nui suk ka hmuh takah chuan ka nui ve ta ngawt.

‘Ka in nghah tir che avangin thupha ka chawi  e’ a kekawr ipte a zena, ka mitah tak min melh run bawk.

‘Maw?” a thusawi ka hriat chian loh vanga zawt ka ni lo,a sawi awmzia ka man loh vanga zawt ka ni zawk.

‘Ka rei lutuk vangin thupha ka chawi anih chu’ a ti leh supa, ka Table hmaa Chair awmah chuan a thu zui daih bawk.

‘Ka nghak che maw? Ka va hrethiam lo..Oh..Ni lo,nang hi i ni tihna mi?”

‘Aw,ka nih ka ring’ awlsam zetin a ti leh mai.

‘Abel..ka awih thei lo’

 Ka ban ka phar hliaia, beidawng zetin ka dahthla leh riai riai bawk,engvanga beidawng ta viau nge ka nih pawh ka hre chuang der lo.Ka hmuh tum loh lutuk ka hmuh vangin ka beidawng te pawh a ni mahna.