REVEUSE-5

CHAPTER- 5

‘I awih mai angai dawn anih hi’ hahdam hmel zet hian a thu a, a kut zungtangin a chair ban a kik ri kauh kauh bawk.

‘Ok, nia.. angai dawn ngei anih hi’ ka ti sepa,hahdam tak anga lan tumin ka bei nasa viau.

Ka chairah ka thu thlaa, inhmatawna han thut takah leh hna lam sawi dun tur han nih takah chuan ka hriatthiam chiah loh zamna niawm tak in min fan raih raih bawk.Min hre ngai miah lo chuan min hmu se chuan kan landanah kei hi Office neitu zawk niloin Inleng zawk emaw Boss te chaira lo thu ve ngawt ka ang khawp ang.

‘In tur i duh angem?” zangkhai thei ang berin ka ti a.

‘Aih,ka duh ang chi i kawl hmel loh em mai’ a mit a tizim a, a hmelpa zetah chuan nuihzatna niawm tak a lang thei bawk.

‘Kawl maithei,tak takin eng Problem nge in neih le?”

‘Problem,aih..nei lo’ leh lawi si chuan..

‘Mahse, a hun hmain hna khawih turin min rawn dil a,kan inbiak tirh khan kan khawih theih hun tur nen kan sawi fel veka,in rawn hmanhmawh leh ta thut siah hian chhan tha tawk a awm turah ka lo ngaia’ ka tum aiin ka sawi hnem.

‘Ok,Nia..Problem em em han tihtur chu a ni lo nangin khawih hma theih anih chuan tih mai zawk ania,bakah he Construction neitu hi ka hriatchian takah chuan hna chungchang sawi turin min hip ta riaua’

Ka hmai a sa nghal hat hat mai,inhmu thei ngat ila chuan a sen nasa hle ang tih ka hria.Han hawisawn ngawt chi a ni si lo.Ka zamzia tilang lo turin ka kut ka mal chungah ka daha, ka humruh tlat bawk.Ka Motor ke min buaipui hlim kha chuan hmuh leha,Eitur engemaw tal treat kha ka tum ania, a teuh ta lo nasa chu anih hi a.

‘Problem hran inneih loh chuan a hun tiam ai hmaa khawih kha chu thil theih loh bur a ni e,i duh chuan midang i khawih tir thei reng ania’ ka ti dam thlap.Ka tawng danah zamna nei ka ang lo.

‘Ka Manager ilo hrilh tawh kha ka la hrereng e’ a ngai ho hmel lutuk chuan ka awm a tinuam lo letling.

‘Anih chuan kan sawifel tihna ni mai em?’

‘Maithei..’

‘Thil harsa anih loh nen, min lo call mai zawk la tha tur ania’

‘A dik,mahse,Hman zana Hmeichhe pakhat,a Motor ke chhia ka thlaksak leh Nimin maia Inneih na a ka hmuh kha hriatchian theih anih takin ka lo kal a..’ a then suk bawk.

‘I nghal hle mai,mahse,naupang ka ni tawh lo ania’

‘Dik lutuk,naupang tawh lo tak, mahni in enkawl thei tak bawk, Mipa ngaihsak miah si lo khan min ti phur riau a’ ka nui chhuak hak mai,ka nuih chhan ka hre lo,nuihzat tur a awm miah lo zawk,mahse ka nui ta tho chu ania.

‘Khawngaihin min hrethiam la,tlai lamah chhungkaw prog kan neia,kan sawi tur kan sawi zawh tawh chuan...’

Ka ding chhuak nghal a, mahse, thawh tumna nei hmel a pu lo.Ka tawng dan kha mi pangngai tan chuan mawi taka in hnarna a ni tih haider chi a ni lo.Ani lah mi pangngai chunglam a ni a,mahse,ka sawi ngaipawimawh awmin a awm chuang eih lo.

‘Anih chuan ka hna chu inkhawih hma thei lo tihna a ni em?” a ti leh sup a.

A awmdan chuan min ngaipawimawh lo a, ka thilsawi kha engmah a ngai thutak miah lo tih a tilang chiang viau,a mizia hi ka hmuh apiangin a danglam zel nimaiin ka hria.

‘Aw, tihngaihna dang a awm lo.Hnathawktu kan nei tam tawk lo a, keini tehlul min rawn dawr duh kan lawm nen,midang inbiak mai ka duhsak zawk che’

‘Anih chuan Ba ka rawn thing dawn che ti ta ila..’

Ka melh nghal vat, ka awih thei lo zawk.

‘Maw?” ka ti sapa, a rawn dingchhuak mek chu ka melh reng bawk.

‘Kha zanah khan lo kal lo ta ila, i chhungte kha i be thei angem?’

‘Oh..chutiang lam ka lo ngaihtuah miah lo..’

‘Nia,han sawichhuah kher kha nuam ka ti miah lo,mahse, mihring chuan midang lakah thil tha kan tih chuan a lian emaw a te emaw a let leh kan beisei vek thin’ a ti leh duah.

A sawi hi a dik tehmeuh nangin hetiang mize Cheap lutuk hi a nih ka lo ring miah lo.A chevel chu ka en a, sawi mai tur ka haihchham tlat,a inchei hran lo,Kamiz,Gray colour a ha a, a spot neuh neuh bawk.Cotton Jeans dum a ha a,a ho lam teh nangin a inhmeh tho.Ka ngaihtuahna vangin ka mengphar deuh awk mai.Tiang zawng hian nimin khan amah ka ngaihtuah tawh bawka, tunah pawh Nalh tih lam bawkin ka ngaihtuah leh ta!! Diki leh Awmtei’n ka ngaihtuahna hi hria se engtin tak ngai ang maw??

‘I hmanhmawh bawk sia ka kal phawt ang,zanah emaw naktukah pawh i thu tlukna ka lo nghak reng dawn nia’ a ti leh hmuka.

Ka chhan letna pawh nghak loin a chhuak zui chu a ni der.Ka hmuh hmasak ber khan min puitu anih vang khan ka lawm lutuk nge a Chapo lo hle ang tih kha ka ngaihtuah dan a ni a, mahse, a lo ni lo tawp.Khatiang thil ho tham te min tihsak kha tunah min thing let ta tlat,chumai bakaha Manager khan hlauh namen loin a hlau bawka,amah ka hmuh hmaa a mizia tur ka rinlawk kha anihna tak a ni zawk tih ka pawm ta thlap.

Ka pu tein ka panna kawngah leh ka awmchhung pawn rilru dang ka pu thei der lo,engtin nge ka tih ang? A sawi ang ngei khan ba ka nei chiang,a thil min tihsak kha holam tak pawh nise min mamawhnaah chuan ka tlanchhe ngawt thei lo.Mahse, engtin nge ka tih chuan ang?

‘I buai em?” Awmtei’n phone a pick veleh ka ti a.

‘Buai lo,mahse a tlai tawh em hi..Enge a?”

‘Eng lo,nia.A tlai tawh tih chu ka hre tho a,vawiin khan hmanni a lo kal te kha an lo kal leha,kha hna khawih hma duh te kha’

‘Chuan?”

‘An pu a lo kala,chuan,amah chu ka Motor ke chhiat tuma min pui tu kha ania’

‘Wow..a va pui ve,ka awm laia a lo kal lo pawi ka tihzia hi i hre pha lo zawk ang’

Mak ti zetin ka Phone ka lasawna, ka melh vak ringawt.

‘Enge pawi tur?”

‘Diki’n chhe lo a tih em em kha nangmah puitu a lo ni hi mawle’ he nu hi chu a.

‘Anih tak chu,chutiang zawngin ka lo en miah lo.Ka buaina zawk chu hna kha khawih hma turin min duha,chumai bakah Ba min rawn thing bawka’ ka nui lui hak bawk.

‘Ehe! Chu zawng a fair lo,engtin nge ni ang?” a ti nghal hliai mai.

‘Chu chu lawm ka buaina,Ba ang zawnga min thing anih chuan engtin nge ka tih anga? Ka hrethiam lo,a hma kha chuan ka lawm nen,tunah chuan ka haw hluah hluah’

‘Aahh,em em a,huat kher na tur a awm lo.Tu nge i nih a hriat takah chuan i laka a lo tih tawh ngaihtuahin a beisei a rawn ti sang pawh a ni thei’

‘Ni pawh nise, enge ka tih theih chuan a?” ka tum aiin ka aw a vin hret.

‘Chu zawng ka hre lo tawp.Mahse, kei chu thil pakhat ka chiang,i tih angai dawn,ngei ngeiin..Ka nutei hian a ngaizam mai mai dawn lo’ a ti leh a.

A sawi dik, ka nuin a hriat chuan tihdan engemaw tal zawng turin min ti dawn.Ka hna lamaah hian vawikhatmah a la inrawh ngai miah lo,mahse,a fanu min lo pui tawhtu anih tlat avangin a ngaizam mai mai dawn lo tih ka chiang.

‘Mat,lungngai lo phawt ang.Bakah thil ka request duh che,i thinrimna kha inhneh tir loin,nangmah pangngai kha nih tum tlat la..Engemaw tal chu i ngaihtuah chhuak ngei ngei ang’

‘Ok, ka lo tum dawn nia’ ka ti zuai raih.

Ka Phone ka off a, muthilh ka tum buai lo law law,chunglam ka melh vang vang a,engtin nge ka tih ang ka la ngaihtuah chhuak thiam lo.Kan hna kal mek ho ka ngaihtuaha, tumah han pawhpen chi an awm lo.Pawisa lamah chuan ka buai lo.Mahse, Awmtei a awm si lo,ani tal awm se chuan team thar din ila,keiman en ta mai ila a theih vek.Mahse, Office nen engtinmah enkawl kawp ngaihna a awm lo.Site dang kal mek ho hi nitin ka tlawh lo,nikhatah pahnih ka tlawha, a tukah a dang pahnih..A enkawltu te ka ring tawka, mahse, ka rintawk vang ngawtin an kutah ka hlan pumhlum thei lo.Manager tu emaw ber Team thar enkawl turin dah dawn pawh ni ila thla khat vel tal keiman ka enpui vek an ngai dawn tho.

Mut kham lo zetin ka harha, ka lu a na bur mai bawk.Ka Phone ka bana,ka on chawpa,Phone hi loh theih loh vangin pahnih ka hmanga, hna leh mimal number bik neih loh theih a ni lo.Hna lama ka hman hi chu zanah hian ka mut dawnah ka Switch off mai thina,mahse, zantin erawh a ni lo.Ka off loh tum takin Abel-a Manager khan min rawn be fuh thei hrep lehnghal.

Msg a rawn lut tak taka, en loin Bathroomah ka luhsana,hmanhmawh lo zetin ka inphih faia,Handling machine chunga Darthlalang lian vak lo awmah chuan ka in ena, ka mit hnuai  val kual raih ka hmu nghal chat.Ka mut theih loh chuan tiang hian ka awm ziah.

Ka khum ka siam zawh hnuah ka phone ka en leh ta chauh,Msg ho a indawtin ka en dan dana, ka mit la zet ka zuk hmu nghal chat.

‘Good Morning’

A tawi tek tawk viau,a number lah ka Contact list ami a ni lo bawk,tu tak ni ang maw.A dp en ka tuma, engmah a dah lo.Han hriatchhuahna tur chi a dah lo hrim hrim.

‘Vawiinah hna i kal hmain Officeah min rawn tlawh lawk la’ Rinpuia hnenah ka ti a.

‘Ok,ka lo kal dawn nia..’

Rinpuia hi kan hnathawk te zingah chuan ka rin ber a ni a, sawiselna tur ka la hmu lo,mifel famkim chu a ni hauh lo nangin a rintlaka, a hna hi a ma ta ang maiin a en bawk,midang te pawh an fel lo ni hauh loin ani ang em hi chuan tumah ka ring lo.

Site tlawh tura ka chhuah hmain Rinpuia a rawn thlenga, mamawh bik engemaw thil an nei anih loh hi chuan Office an rawn kal meuh lo.An mahni site enkawl theuh lamah an buai ngar ngar zel mai.

‘In hna hi kal pensan theih chi a ni em?”

‘Aih,nikhat emaw nihnih pawh..hei aia rei hi chu chawlhsan chi a ni lo’

‘Um, ka hrethiam..’ ka ti sepa, ka pencil kenlai ka seh nauh nauh bawk.Ngaihtuahna fumfe ka nei thei meuh lo.

‘Thil pawimawh a awm nge?”

‘Um,awm tho mai.Novembera kan tan tur,Farm House chei that kha tunah khawih turin min rawn ngena’

‘A theih loh,tuman kan khawih lai pensan kan duh lo vekin ka ring, i hriat kha’

A sawi dik chiah, an hnuaia mite theuh an Controla, hna awmdan engkim plan kan siam angin an kalpuia, an tan a pawimawh lutuk.

Nia, ka hria.Mahse, amah kha In khua ka lo kal tuma min puitu kha a lo nia, niminah ka hre ve chiaha, ba ka neiin ka inhre ve a’

‘Ba...a rawn thing che mi?”

‘Aih’

Engvanga hum duh nge ka nih ka inhre lo.Mahse, Rinpuia bulah a tawngdan kha a vaia sawi ka duh der lo,hna lamah chuan ka ring tehmeuh mai, ka mimal thil nena inzawm thei ang chi erawh share tumna ka nei eih lo.

‘Anih chuan kan khawih theih hun kha lo nghah mai angai anih chu’

‘Chutiang chu nise ka ti khawp mai,mahse, khawihsak ngei ngei an ngaia’

‘Ka va hrethiam lo..’

‘Engemaw harsatna an neia,min tilui lo nangin khawihsak theih chuan khawihsak ka duha.Keimah tak pawh hian ba nei niin ka inhre ve bawka’ ka ti leha.

‘A theih dan ber chu Team thar kan mamawh tihna anih chu’

‘Dik chiah, chu chu nia sawi ka tum..Mahse tuemaw ber hian kawp mai a tul dawna, i tih theih chuan?”

‘Eh..ok,theih loh na tur a awm lo ang,mahse, nangmah zawk i pawimawh ber a’

‘Ka hah deuh mai ang chu,Bakah kan bill pawh a ngai aiin a sang ang’ ka ti a.A bu nghauh ringawt.

Rinpuia kal hmain Abel-a manager,Muana ka calla, hna chungchangah a pu ka be duh tih ka hrilh a.A number nei hawt si lo khan niminah khan ‘min lo call mai ta che’ ka ti kha nia,atthlak ka ti leh hnuhnawh.

‘Vawiinah kan khawih thei ang tih leh mahse hnathawktu kan indaih loh vanga nghah hret kan ngaih tur thu ka lo hrilh anga,tlai lamah ka rawn be leh dawn che nia’ ka ti a.A bu leh mai,a huphurh nge huphurh lo pawh ka hre lo,bakah ka ngaipawimawh tehchiam lo, lo huphurh pawh nise awmzia a awm chuang lo,amah chhawrtu ka nih tlat avangin tih tul ka tih chu a tih mai angai.

‘Hello’

‘Matty, keimah Abel-a’

‘Ok..hna chu kan lo khawih ange’

‘Ka hria lawm’

‘Eng?”

‘I khawih dawn tih hi mawle’ ring vak lo hian a nui hawk bawk.A va han huathlala tak.

‘Anih chu,mahse, min nghah tho chu a ngai ang,kan hna kal a laklawh vek avangin hnathawktu dang ka zawn belh angai dawna,hmuh mai theih anni em ka hre lo bawka’

‘Um,a tha lawm.Officeah i awm chuan ka lo kal ang’

‘Ka awm’ ka ti tawi tak ringawt.

A hnu rei vakloah Diki’n tumeaw lut tura a sawm thawm ka hria, mahse, amah anih ka ring lo.Hawi pawh ka hawi chhuak lo, lo ni pawh nise ka hawi chhuah nghal kher na tur ka hre hek lo.

‘I buai thei hle a ni maw?’ Mipa awin a rawn tih rualin ka hawi chhuak nghal vat,ka beisei loh tawpin Abel-a a lo ni a, kan inbiak atang khan minute tam a la liam si lo.

‘Aw, i hmuh ang hian..i rang hle mai.Thu la’ tih pahin chair lam ka kawk zauh bawk.

‘In dawr thlangah khuan ka kala,lo thlen nan hun a ngai rei vak lo’ awsam zet hian a ti liam puat,Chairah a thu a, a bawp a khawkherh a, hahdam hmel fein hnunglam a ngheng ur ur bawk.

‘Anih chu, Thingpui emaw Coffee pawh, enge i duh ang?”

‘Coffee ka lo in ang’ a ti tha ve mai.

Diki hnenah Coffee no hnih siam turin ka ti a,Diki hmel danglam vek leh phusa sek chuan ka thin a tirim hlur bawk.Engvanga lo phusa chiam nge maw anih hrep ni?

‘Ka tibuai hle nang chein ka tihbuai belh leh dawn che,a hmaa kan tum sa kha tlem ti danglamin a Blueprint pawh a hran siam ka duha’ a ti supa, a no tlang a kut zungtangin a rin zai zai bawk.

‘Hna tan tawh hnua tih danglam leh hi a harsa zawk,tunah chuan ka la tan lo a, a pawi lo...’

Ka hnar rawn za mer mer chu ka han khawiha,a Thi leh dawn anih ka ring thiam tawh..Ni lo..tunah chuan ni lul lo..

‘Um,anih chuan a hmaa Blueprint kan siam sa...Oh..i hnar kha’

A  sawi zawh hmain a rawn lum nghal pap mai, nidanga a thi pawh hian na lo mahse a nuam ngai lo,mahse,tunah tak hi chuan ka zak.Zah in awmzia a nei der bawk si lo.

Ka daka, ka ka lama a rawn lut tur vengin thawk pawh ka thaw tha ngam lo.Ka mit ka chhing tlat bawk,tuemawin ka hnar a rawn khawiha,Diki niturah ka ngai mai,mahse, Drawer a pawh hawn lai ka hre miah lo.

‘Che suh,hahdam la, min ring tawp rawh’

Abela awin zawi supa a tih ka hriat rualin ka mengchhuak nghal zawk,Diki ni loin amah zawkin ka hnar a hupa, ka hnar a hup lohna lamin amah si chetin min kuah hnai nghal salh bawk.