REVEUSE-6

CHAPTER-6

Ka hnar han khawih ka tuma, a kut a la sawna, ka hnar ka vuana, mahse, ka kut a rawn vuan ve ta thung.

‘Buaipui ka ngai lo ang’

‘Shh,tawng lo teh’ a ti nghuta.

Ka darah nghet zetin a vuana,ka dar lehlamin amah ka nek ran bawk,Diki rawn kal hnai chu ka ena,ani tan chuan thil thar a ni lo bawka, mangang hmel a pu hran lo.

Reivaklo kan awmdan ngaia kan awm hnuah inlakhran tumin ka chea, mahse, hre lo ang hmiahin a awm tlat.

‘A reh tawhin ka hria..’ka ti sepa.

Awih lo hmel zetin min en vung vung thung.Mahse, min kuahna a thlaha,a kal sawn ta tho.A thutna ngaiah bawk a thu leha,engmah sawi loin min melh ngur bawk.

‘Ka’n intifai lawk ang,a rei lo ang’ tih pahin ka tho a, Drawer atangin Cotton roll ka phawrh chhuak nghala,ka chevel min thlir reng tih ka hriat vang nge nidang ang lo takin ka che a khawr tlat bawk.

Ka chhuah leh pawn a thut dan ngai bawkin a lo la thu ta reng,Diki ka hmu lo thung.

‘A zia lo hle mai,ka ti khawtlai ang che tih ka hlau hle mai’ thut pahin ka ti a,mahse, min chhang loin min melh reng ringawt.Ka hmaiah engemaw dik lo a awm zawk nge mawni? Ka intifai tha viau khan ka hre sia.

‘Engtik atangin nge tiang khan i awm?” teh daih chuan a.

‘Eng chu?” a zawhna ka haider ve thung.Ka mimal thilsawipui tur atan ka thlan loh pawl a ni ang.

‘I hnar thi kha..’

‘Oh,regular takin a thi bik hleinem’ ka nui lui hak ringawt.

‘Chulam chu ka zawhna a ni lo,a thi tanna a rei tawh em?”

‘Tak takin la rei lo e..’

‘Doctor i hmu em chu ka hre lo nangin hmu la a that ka ring’

‘Ka hmu alawm,thil serious tak a ni lo’

‘Ok,a tha lawm..’

‘Blueprint siam tur chuan a hmunah ka lo kal phawt angai dawna,Team thar tur kan siamrem chhungin lo kalna hun chu ka nei maiin ka ring a’

‘Ok,kha thil khan a tibuai lo tak tak che em?”

‘Aih,teuh lo’

‘Tunah hian kal dawn ila i hman angem? Motor chu keiman ka khalh mai anga’

‘Oh,a va chawpchilh..ok,a tha zawk ang’ ka ti leh lawi.Vawiinah an duhdan ka enfel theih chuan zan lamah Design engkim ka khawih thei anga, chhun lamah chuan thildang pawh ka ti thei zawk ang chu.

‘Anih chuan kal ila..’ a tho nghal vut bawk.

Darkar chanve a liam leh chuan kan kalna hmun turah kan awm hman tawh,a hma khan ka kal tawha,ka kal hmasak ber atangin a hmun hian min hip nghal tawp,Aizawl khaw pawn ni tho si,Darkar tam kal ngai ni si lo, kawngpui atanga hnai lutuk lo,hmun fianrial leh reh raih mai a ni a,luh dawnah Hmawng kung lian zet a awma,Hmawng kung rinchhan deuhin Thir Gate an siama,an siamna a rei tawh thawkhat tih a hriattheih.

‘Hei hi in chhungkaw ta nge nangmah?” Inchhung pana kan kal pahin ka ti a.

‘Keimah..Kumin khan ka leia,chei that a mamawh zia chu i hriat ka ring’ a ti tha ve mai.Ka bu nghauh ringawt.

Tala lian leh hlui angreng tak awm chu a hawnga,Kawngkhar,Teak thinga siam,Lian leh hlui rup mai chu a nem hawn rualin a chik tuah tuah bawk.Ka zui luta, Engmah furniture han hmuh mai tur  awm loin puan dum hian an lo khuh vek,ka hawi kuala, pawnlam landanah kha chuan ka kal hmasak aiin a lang hlui tehchiam lo, mahse, inchhung erawh hmuar rim a nam rum ruma, inchung hmunkhat lai atangin tui a far kauh kauh bawk.

Puana an khuhna pakhat chu a pawthlima, a khu nghal rum rum mai.Fur lai lehnghalin engtin tak nge tianga vut in a bawh theih ni?

‘Engmah hi khawih chet a la ni lo,In khawih tan theih hun a chian veleh bungraw awm ang ang hi chu kan dahchhuak nghal vek ang’ a ti sup a, sawi hmasak ber tur hre loin ka bu nghat ringawt.

‘Thu la,din reng ai chuan a nuam zawk ang’ amah bawkin a ti leha.

Engmah sawiloin thutna awm chhunah chuan ka thu a, ani erawh a ding mar uta, inchung tui rawn farna lai chu a melh chho vung vung bawk.

‘Hetah hian i cheng dawn tihna a ni em?” ka tum loh tawpin ka ngaihtuahna ka sawichhuak,ka sawi rualin ka inchhir nghal vang vang bawk.

‘Ka chenpui tur azirin ka cheng maithei..I awm duh ngem?” min rawn en thuta, ka lo en ve reng bawk si nen kan mit a intawng siah, rang lutukin ka hawisawn nghal vat bawk.

‘Teuh lo,tiang hmun fal hi ka ngaina lo’

‘A hmun i thlir kual vel laia i hmel awmdan leh i tawngchhuak a inpersan hle anih chu’ awlsam zet hian a ti supa,ka ner nawk ringawt.Nia, dik tak chuan a hmun hian min hip ngei.Pawnlam kawtzawl zau lutuk lo awm te pawh hnim bur loin fai taka enkawl ni phei se chuan a nuam lehzual ang.

‘Kan enkual dawn mi niang’ tih pahin ka ding chhuaka.

‘Khawi lai atangin nge tan i duh?’

‘A rem na lai apiang animai’

‘Ok, anih chuan Inchunglam en hmasa ila, chuan Kitchen leh Living room.Pawnlam pawh i en duh ka ring’

‘Um, duh ang..chho ila’ ka ti a,min chhangloin a inher vuta,a bawp sei zeta a pen chu tlan titihin ka um a ngai hial!

Inchung Room awm chu ka ena,room pahnih a awma, a lian lo ve ve,Bathroom leh Toilet inkawp pakhat room inkarah a awma,banga Wall paper an bel te pawh a thlera, a uai deuh hnuang bakah a bet chhun te pawh a hmuar uar bawk.Thinga siam khum a awm ve vea,ka nem chhina, a che lai lai mai.Mut emaw thut nan hman chi a ni lo tih a chiang.In hnuai lama tui rawn farthla kha ka en chianga, inchung room chhuat hi thingphel vek a ni a,Inchung rangva pawp atangin a rawn luta,chuta tanga lo lut chu a lo ni a,siamthat vat anih loh chuan a mawih har lo tawp ang,In hlui leh rawih lam a ni tawh bawk si.Ka duhtawk ka en hnuah Inhnuai lamah kan inzui thla leha, Chokaah ka luta,min rawn zui ve zel tih a thawmah ka hre thei,Room dang ang bawkin a hmuar nasa,tui khawihna lai vel phei chu a then a chim titiha,mahse, thil danglam deuh hlek a awm,Eisiamna atana hman chi Chemte, a bawmah fel thlapin a inthiat tlara,a fawng lam a hmuar deuh nangin a steel lai erawh a la tle tha hlawm.Eitur siamna leh Gas dahna vel bakah Dinning Table,lian vak lo a bial a siam a awma,Chair erawh pakhatmah a awm lo.

 Thil ngaihtuah chhuah ka nei,duhdan a nei a, kan siam hmasak a cancel anih si chuan enge ka enkual kher? Tunah engmah aman a sawi leh si lo.

‘Lawk,Enkual kher hi kan mamawh em ka ti leh deuh,i duhdan sawi mai la,ka lo draw anga,chumi hnuah Estimate te kan siam anga..Chuti tur zawk chu niin ka hria’

‘Ahh...i hmuh dan a pawimawh alawm’ a nui suk ringawt.

‘A tira ka ngaihdan kha chu ania, mahse,nangman duhdan i neih kha i sawi tur ania.Pawimawh thuah chuan tunah hi chuan pawimawh hran lo,a chang chuan a pawimawh tho bawk, chu erawh keiman engkim Design ka siam dawn chauhin.Nang chu duhdan i nei sa alawm’

‘Ka duhdan kha ka cancel leh..i duhdan danin siam rawh’ leh lawi chuan..

‘Engmaw? I mumal lo hle mai’

‘Ahh, mumal lo maw?’

‘Aw..’

‘I ngihtuah ngai em?”

‘Eng chu maw?”

‘I mize tlang zet leh lan mawi tum miah lo hi,mahse, kei chuan ka duh zawk’ a kekawr ipte a kut lehlamin a zen a, Choka chhung lian lo tak maiah chuan a vei kual a,Chemte inthiat tlar that chuan a mit a la ani hmel, a pan hnaia, pakhat a phawrhchhuaka,a lek vut vut bawk.

‘Hna hi tha taka thawh ka tum thin,abak chu ka mimal thil a ni a,midang te ka share ngai lo’ ka aw a nem lo,a ring lo bawka, mahse, a chiang viau.

‘Ka hria alawm..Anih chuan tunah hian Dar 1 a pela,Kan in lamah Lunch ei turin kal ta ila..’

‘Keimah nen i tihna ni em?”

‘Aw’

‘Officeah min Drop theih chuan ka lawm ngawt ang’

‘Inah chuan hna dang a la awm ka tihna ania,sawi lan kher tul ka lo ti lo a’ ka zak veng veng mai,Nula anga an In min hruai tumah ka lo ngai hman, mawl ka inti lutuk.

‘Ok, mahse, helai chauh hi kan inbiakna kha ania’

‘Ka hria, ka lo ngaihtuaha, ka hna i khawih dawn tho chuan Kan In lam ami khawih hmasa ta zawk la ka ti a, bakah helai hi chuan a nghak thei’

Sawi tur hre loin ka melh reng ringawt,infiamna bungrua emaw min ti ni berin ka hre tawh,a duh duh a sawia,a hnuaia hnathawk angin min en ta ni berin ka hria.

‘Chiang takin ka hrilh ang che,i hna hi ka khawih duh lo,a vaiin..Ka cancel nghal’

Ka thinrim luatah ka aw a khur dar dar mai.Tiang em ema midang te tham lo mi hi ka hre ngai lo,thawnthu te pawh nizawk awm a ni.Hnamdang zingah chuan Mipa ngeng leh luhlul,Sum chiah atchilh,Suma engkim chinfel tum an lo awm anih pawhin a mak lo,mahse, Mizo zingah ngei an lo awma, chu pawh ka hmaah pawisak nei miah lo leh tihsual nei lo niawm taka a ding hi ka awih thei lo zawk.

‘Ka ring chiah lo’ a hmui hnuailam a pet sawi zauh ringawt.

‘I en dawn nia’ tih leh kal ka ruala, mahse, amah ka kal pel chiah tihin a kut phe zawk ka hmu hman,chumi rual deuhthawin ka kawngah a rawn kuah thuta, amah si rawk khawpin min pawt hnai nghal dawrh bawk.

‘Enge i tih a?”

‘I hmuh ang hian ka kuah mek che’ a ti supa,a chetdan teh thut chuan min thawng lutuka, chet lak mai nachang ka hre lo.

‘Min thlah rawh’ ka ti tuara,mahse, ka sawi hre lo ang hmakin a awm ngaiin a awm.Ka hresual nge ka hre lo,ka hnung lamah chuan engemaw ri deuh dap dap  thawm niawm tak ka hre bawk.

Ka tal laih laiha,min kuahna a nghet sauh thung.A awmah ka nema,mahse, min thlah chuang lo,a kut lehlamin ka kawngah a kuaha, lehlamin ka tukhumah a dawm bet tlat bawk.

‘Tal suh,chuan..i awm ngaiin awm bawk ang che’ ngenna a ni lo a, Order a ni zawk.

‘Abel...’

‘Ka hria..’

Enge a hriat ka hre lo,min kuah dan ngai ngaiin ka awma,a lungphu ri dat dat ka hre thei hial.

‘A tawk e’ a sawi zuah rualin min thlah a,mak takin ruak deuh huaiin ka inhre tlat pek.Zahthlak hian a..

‘Tiang khan min fiam tawh lo la a tha in ka hria’

‘Takzet’ a mithmul a ti sang uk ringawt.

‘Aw, tun laiah Hmeichhe humhalhna hi a nasa ania,bakah hmeichhe dang i khawih chaka intlar an lo awm anih pawhin kan vai chuan kan ni vek lo tih i hriat a tha ang’ ka ti ta duah.

‘Ka lo hre reng dawn nia,mahse tunah kher kha chuan ka khawih chaka intlar zingah i tel emaw tel lo emaw khatianga ka tih che kha a tul tlat.Bakah ka chak vak bik lo ang tih pawh hre tel la’

A hmelpa leh chang zet chu ka ena, a insehruh teuh bawk, engvanga thinrim nge anih ka hre lo,a chetdan mawi lo zet avang khan kei hi thinrim tur zawk ka ni chiang,enge a lo huat ve ngawt?

‘Ka kal thei tawh em?” ka ti leh hmaka.

‘Thei reng,chuan, ka duh vang renga kuah cheah min ngai tihna a ni em?”

‘Aw..’

‘A that chu, i hnunglam saw han hawi la’

Ka hrethiam chiah lo nangin ka hawi ta tho,mahse, ka thil va hmuh chuan min ti ip chawih thung, ka tawlhhnung nghal hrata, Abel-a taksa khauh tung ka si nghal tih ka hria, mahse, pawi ka ti thak lo.

‘Saw  thil...i hmu tihna mi?” ka aw a ri chang chang.

‘Aw, vanneihthlak zetin ka vawm fuh hlauh bawk...’ a ti leh supa, a awah tih elna a lang chiang viau bawk.

Ngam leh ngam loin ka melh leha, Rul lian pangngai tak, dum tle zuar mai,Banga chemtein a kilh beh vu mai chu ka en a,ka tim ur ur mai, ka dinna hmasa ka ngaihtuah leha, ka mit ka chhinga, Abel-a ka ngheng hnai leh sauh ringawt.

‘Ka lawm e aw’ ka aw a khur dar dar mai,Rul aia hlauh hi ka nei anih pawhin VANRAM kai loh chauh a ni mai awm e.Chutiang khawp chuan ka hlau.

‘Anih chuan vawihnih ka lakah thil i ba tawh tihna nia..’

‘Ok, vawiin atan chuan ka pawm e..tihsak theih che ka nei anih phawt chuan..’

‘Tunah chuan hna min thawhsak dawna, i ba hmasa i rul mekah ka ngai phawt ang, a dawt lehah chuan kan Inah ka rualin i  lo kal ve anga, ka Nu leh pa i hmu ve ang’

A nu leh Pa va hmuh chu thil har a ni lo,ka tana a tih kha a hlu lutuk.

Motorah ngawirengin kan chuang duna, kan rilru ve ve kan kawm mawp mawp anih hmel,tunah rih chuan hna lamin ka rilru a luah miah lo,kha Rul ringawt kha ka rilruah a awm tlat,ka duh loh tehreng nen ka mitthlaah a cham tlat bawk.

An In kan thlen chuan ka thaw hak mai,ka lo Dream thin kha a kim biai,Kan in hi Khawpui chhungah a awma, kan thenawmte nen kan insik lohna chu  Khap lek a ni hial ang, a chhung erawh a nuam thawkhat, zahpuiawm loh tak a ni bawk.

Abel-a te In erawh chu Khawpui chhung nisi in Mimal ram a ni tih a hriat ngawih ngawih,an thenawm te nen pawh an inhnaih lo,Gate lian zet a awma, Kawtzawl zautak an neia, Motor pawh a dah theih nual ang,tunah pawh pahnih a awm sa reng bawk.Chumi bakah Garage niawm tak, a chunga inleng kawmna tura duan a awm tel cheu,Pangpar mumal takin an phun tlar dula,Fur lai anih vang nge par erawh an par mumal lo.Garage chungah pawh chuan a tlang kualah Sharon kung nalh tak taka cut, a khat mawi tawkin an phun tlar bawk.Luh deuh chiahah Golden oak kung lian leh tar lam a awma, Sharon a zam khat luka, a rawn kur thla chuan Kawtzawl chanve thleng lo deuh a zar hliah  bawk.Hnahthel tla vanga hnawk erawh a siam tam anga, a par erawh a nalh hle ang tih a rin hriat theih mai.

‘Nu, i tha em?”

Nu pakhat, Motor thawm hriaa rawn chhuak chu a biaa.Mizo nuah chuan a tawk pawl a ni ang,kum 50 bawrvel hmel a pu a, a landanah mai pawh a zahawm thawkhat,a mitmeng lian kel kawl chu a fapa mitmeng nen danglamna a awm mang lo,Abel-a nu a ni tih sawi kher ngai loin a hriat theih vek.

‘Aw,nang zawk?”

‘Ka tha..min lo nghah rei ka hlaua,chuan,hei hi Matty..nizanah ka hrilh tawh che kha..Matty,ka nu anih hi’ min rawn ena, a hmelah chuan ka hriatthiam chiah si loh ngenna niawm tak a lang zawk bawk.

‘Um, ka hmu e,Inchhungah i pa te pawh an awm,Bawihi lo kal rawh’ min rawn ena, a nui var var bawk.

Inchhungah kan inzui luta, Pa upa lam pakhat leh Abel-a nena in ang zet Mipa pakhat bakah Hmeichhe hmeltha leh fiah kak mai a ni a, an titi kan pawtchat nge an vaiin an ngawi thap bawk.

‘Min lo nghak rei em?” Abel-an a tih takah chuan Boruak rit deuh churh kha a reh chawpchilh nghal mai bawk.

Lo thu ho chu min hmelhriattir hlawma, Pa upa lam kha a pa a ni a, Mipa pakhat zawk erawh chu a u a ni thung,a hming Tintin-a.Mahse, Marcus tia koh a duh thu a sawi nghal,Hmeichhe lo awm erawh chu Marcus-a nupui tur a ni thung.Thla thar maiah an innei dawn tih an sawi tel bawk.

Lunch ka ei ve nghal vanga mak ti hmel tuman an pu lo,chumai bakah a nu hnenah khan a hma zanin ka chanchin a lo hrilh tawh angin a sawi zauh bawka,chuan,ka hna vanga an In tlawh ka ni tih vawikhatmah sawi lan a ni lo.

‘Khawnge i awm?’

Phone ka pick rualin Tluangpuii’n a rawn ti nghal a.

‘Ka mu dawn chiah,naktuk chu aw..’ ka ti a, Office lama min rawn tlawha, site min tlawhpui a intiam vek tawh.

‘Ka hria, chu ai chuan vawiinah Abel-a te inah Lunch eiturin i kal tak tak em?”

Mak ti zetin ka mengphar vak ringawt, Abel-a nen an in nel hle tih chu ka hria, mahse, engtin nge chutiang a lo hriat hman?Mipa tawng duh leh thil sawi zawt zawt chi a nih hmel si lo,bakah ka lunch ei mai mai sawi vul chuk tlak a ni hek lo.

‘Aw,hna kan en a’

‘Aahh,chutiang lam ka hre miah lo.,Ka hriat zawng chu kan Abel-a hian Inah a nu leh pa bulah a Bialnu inhmelhriattir turin a hruai tih zawng animai’

‘Ni lo..a teuh lo lutuk,vawi nga pawh kan la inhmu tling nang..’

‘Ka hria,mahse, ka hlauthawng ania,Abel-a u nupui tur kha i hmu em? Abel-a nen Mumbaiah an inkawp thina, tun thlengin Abel-a khan ngai a la awh leh lo ania’

Ka va han hrethiam lo ber..