REVEUSE-8

CHAPTER-8

‘Um, ka hria e.Mahse, inti thei vak lo la,nakin lawkah ka Fanu a la ni ve dawn tih ka hre lawk thei tho bawk ania’ a ti leh a

 Ka hmai a sa nghal hat hat mai,engtiang takin nge Abel-a hian a nu leh pa bulah min lo sawi zui ang? Tluangpuii thilsawi kha a ruk tak chuan ka lo ngai thutak lutuk lo kha ania,mahse tuna a landanah hi chuan palzam mai mai chi a ang ta lo tawp.

‘Ka lo zuk chhuk ang’ tih pahin ka banah a rawn khawih zauha,nelawm takin a nui var var bawk.Tawngkaa chhang loin ka bu  nghauh thung.Diktak chuan engtianga han hmachhawn tur nge ka hre lo,sawi ve mai tur pawh ka haihchham tlat bawk.

A nu chhuah veleh a rawn lut ve ta thung,Room kawngkhar a pawt khar nghal daih bawk,a chhan hriat si lohin ka awm a nuam lo nghal ringawt bawk.Min rawn kal pela, Khum bula Turverh lian zet awm chu a nawr tawlha, pawnlam a thlir zui vung vung bawk.

‘Thil ka zawt thei che angem?” ngawihreng nuam ti lo zet hian ka ti chhuak ta nge nge.

‘Um, sawi la..’ a ti hmuka, a nu awm laia a awmdan nen kha chuan Lei leh Van ang maiin a inpersan leh tawh.

‘I nu sawi awmzia kha ka hre lo a, bakah nizanah Tluangpuii’n min rawn biaa, Nimina In ina lunch ka ei ve ngawt kha a rik chhuah danah dik tawk lo a awm niin a lang bawka’ ka ti ta duah.

Muangchangin a rawn inhera,T-shirt hring a hak chuan a pian nalh zet chu khuh bo zo loin a ti lang nalh mah zawk.Kekawrbul,a khup thleng deuh chiah a fual a haa,Loafer a bun bawk.A chawn lang thei chin chu ka melh zawka, amah a sang tha bawka, a sei thlurha,Hmul in a khuh dap bawk.Ka tum loh zetin ka hrawk ro lutuk tih ziawm nan ka khuh khauh bawk.

‘Ka duhdan takin an sawi ti ta ila?” a thle buk ringawt.

‘Kei chuan ka duh lo hulhual ang tih i hria’

‘Vanduaithlak nge Vanneihthlak  takin hre lo tlat,Nula i ni a, tu ta mah i ni lo a, chutiang chiah chu keipawh ka ni bawka’

‘Oh, anih chu..Ka single leh single loh lam i lo buaipui tur a ni lo in ka hria’

‘Aaaah, ni chuang lo e, Tlangval ka ni a,ka duh chuan nula chu ka ngaihven thei ang chu’

‘Kha chu midang hnenah i la sawi dawn nia,tunah chuan hna ka nei a’

‘Midang hnena sawi tumna ka nei lo hlauh mai.Bakah Tluangpuii chuan a lo sawi ta sa sa a, ka duh zawng nei turin ka um ngar ngar zel tih a sawi tel mial lo maw?” a ti leh supa, ngeiawm zet hian a then suk bawk.

Tawng tumin ka ang ziaua, mahse, ka chip leh ta zawk,a sawi dik lutuk chuan ka sawi tur min thulh tir ti ila a dik zawk mah ang.

A rawn kal hnai chu ka ena, a hmel thutak run leh nelawmna tel miah lo chuan mak takin min hip tlat,Rosanga ka mitthlaah a lo lang zat,ani kha chu hetiang mipa a ni lo.A nelawma, a tawngduh lutuk lo nangin tiang a nelawmna nei lo a ni ngai lo.Mahse, ani chu a kal tawh.

‘Mipa tamtak anga nula zui kuala,an duhzia an hrilh a,in thlem kual lam hi ka tum lo,mahse, ka umzui ang che ka tih chuan a chhan sawi kher tul pawh ka lo ti lo,a tul zawk em?” min si tepin a rawn dinga, min melh chhuk run bawk.

‘Theihnghilh rawh’ ka ti tawka, a mitah ngam leh ngam loin ka en lui ve tlat bawk.

Mahse, ka inrin hmain ka kawngah a rawn kuaha, amah si rawk khawpin min pawt bet nghal zat,a taksa lian leh khauh tungah chuan ka bet leh ta ran mai.

‘Ti hian enge a an ang?” a rawn kun hniama, ka dar,ka kawrin a khuh phak loh chinah chuan a hmui lum thar thar chuan a rawn nawra,ka thaw hleithei lo.

‘Eng..min thlah teh’ ka ti bah naka, ka aw khur hrep pawh chu.

‘Min hip ang bawk hian keipawn ka hip che tih hi thup tum lo mai teh,nangmah vang hian ka tih ngai loh tak tak ka ti nual ania’ a ti leh supa, tun tum chu ngeiawmna lam ri engmah hriat tel tur a awm ta lo.

‘Kal sawn phawt teh’ tih pahin nemsawn tumin ka che a, mahse, ka kut lehlam chu a rawn man beta, a kawng fek rat maiah chuan a nem bet zui ta daih.

‘Chhanna ka hmuh hma chuan kan kal lo ang’

‘Ka chhan tawh che kha..’

‘Ka hre miah lo,nge ka duh ang chhanna ka hmu lo zawk.I sawi tur chin chu  i hriaa,bakah a harsa lo..Ka nu lo chhoh leh hmaa min chhan mai loh chuan kan awm reng angai dawn ania,chuan hei hi ka Room a ni lo a, ka u Room a ni bawka’  zawi tein a nui hak bawk.

Hetianga tlang leh lutuk hian tu mipa mahin in ngaizawng turin min sawm ka lo la beisei ngai lo,inbiak tlangnel hmasak te chu khawi lam.Mahse, thian nih hmasak kher hi enge a tulna? Rosanga nen khan thian kan ni hmasa a, engkim kan inhre pawh sa deuh veka, mahse, a tawpna kha a awlsam lulai lutuk.Abel-a min sawmna hi enge dik lo awm chuang? A mizia a tlang a, a duhzawng a pehhel thiam loh miau avangin tiang hian a che a ni mai..Mahse, hetiang kher hi chu Mumangah takngial pawh ka la mang chhin ngai lo.

‘Ka...’ ka tih lai takin pawn lamah tawng thawm a rawn awm ta hlauh.Ka thaw huai mai.Mahse, Abel-a zawk chetsawn tum awmin a awm ta tlat lo,ka melh chho a.

‘Midang lo kal vang maiin ka duh hmu loin ka thlah che i ring tak tak em?” a ti supa, a rawn kun hniam zui zat.LALPA.. thleng lul suh se.Ka mit ka chhing ta ngawt.Mahse, ka rin ang kha engmah a thleng ta lo hlauh.

Tawng thawm chu a rawn hnai zela, Room pawnah mai a ni ta hial,Abel-a lahin min thlah tum awmin a awm si lo,ka mengchhuaka,hnai lutukah uluk zetin min lo en vang vang mai.Atthlak zetin ka ip chawih bawk.

‘Vat...’  pawisak nei lo tih hriat zet hian a nui suk bawk.

‘Ka....ka pawm’ ka ti hman chauh, min thlah nghala, Room kawngkhar inhawng thawm ka hre zui zat bawk.Diktak chuan ‘Ka pawm lo’ tih tum zawk ka ni a, sawi zawhna hun a awm lo,hun min pe hek lo.

‘Hetah law in lo awm? In enkual tawh mi?” rawn titu Hmeichhe sang leh nalh thlarh mai chu ka en a,hai rual lohin Abel-a te unau a mi a ni tih a hriat nghal hliah hliah.

‘Um,anih hi..Rose,hei Matty nia..Mat,ka farnu neihchhun Rosalind-i..I duh chuan Rose tiin i ko thei ang’ a ti supa, hamhaih zet hian ka bu nghat ringawt.

‘Aaaah,engtikah nge ka hmuh ang che ka lo ti a,hetah i awm ve tih tuman min hrilh miah lo a’ zangkhai vah hian a ti nghal sawt sawt mai,min rawn chibaia.

‘Mama hian i kutah bawk a dah leh tihna mi?” min en loin Abel-a a en a.

‘Dah chiah lo, ka nu zawkin a dah,Matty hian a khawih nghal dawna’ min rawn ena, a hmela min Duatna niawm tak langchhuak chu ka hmuh rualin ka tim sawk thung.

‘Eh,a va tha ve,anih chuan i Room lam leh Kitchen pawh chu a khawih nghal hman ang chu,tiraw Matty?”a tih zawm leha.

‘Ka hre mai lo le, helai bik hi a hmanhmawhthlak avangin kan insiamrema,kan Indaih lo ve lutuk a’ ka ti tha ve mai.

‘A ni ngawt ang, bakah a pawi hleinem, Au Tea te chu hetah a khawsa dawn anih pawn i awm ve dawn hunah  i duh ang thlapin in chei anga’ a nui a.Ka hrethiam chiah lo nangin ka nui ve ta tho.Engatinge hetah a chen loh ang?

Chhan mai dan tur ka hre lo,heng chhungkaw Member te hian enge an hriat hrep ni? Niminah mai helaiah a vawikhatnan ka kala,chu pawh hna vangin,an lo hriat dan a dik tawk lo anih pawhin hriatfiah an tum miah lo,an fapa in a Bialnu anga min lo sawina an pawm hmiaha,reilote hnua innei mai tur angin min treat vek in ka hre bawk.Mumang te pawh a ang rum rum zawk e.

‘Chhuk ila,chhuah leh ka ngai dawna,Matty hian hna a ngah bawka’ tih pahin ka kawngah a rawn kuaha,ka insangmar nghal teuh thung.

‘Um,ka nu ka rawn zawng zawka, khawiah nge a awm?” kawngkhar pan pahin a ti a.

‘Inhnuaiah a chhuk anih kha, a awm lo mi?”

‘Awm lo..Kan pa leh Naute pawh inhnuaiah an awm bawka’ a ti leh a, Hmeichhe tluang leh midang te laka rilru kawi pu miah lo tur hmuhin ka hmu nghal ringawt.

Inhnuaiah chuan Mipa pakhat,keimah ang rual vel tur hian Mipa naupang,kum khat bawr vel a lo awmpuia,Rose-i pasal a ni tih ka ring thiam ve mai, mahse, pangngai takin Abel-an in hmelhriattir leh ta tho.Chhungkaw inpawh leh inkawmngeih tak anni tih a hmuh theih nghal mai.An makpa pawh an unau ami ang maiin an en niin a lang.Mi hausa tamtak te hi chhungkaw inpawh lo em em mai, mahni tlat tlata tla mai mai ka hre fur,anni hi chu chutiang chhungkua anni dawn lo tawp tih a hriat theih.A awm viau,a nu in a fa te a en danah khan a lang mai.

Chau zetin Office ka thlen veleh ka thu hnawk ringawt,eng hna mah ka va khawih pawh chu a ni si lo.A boruak khan min ti chau hluah hluah,Abel-a ka mitthlaah a lo lang a, ka chhanna kha a dik lo tih ka hrilh a ngai.Call chuan ka sawi dawn lo,hmaichhanah lek phei chuan a teuh lo lehzual,Msg in ka hrilh tawh mai ang chu.

‘I va chauh hmel ve, intur i duh em?’ Diki’n min lo ti nghal sawt sawt.

‘Aw..Beer te pawh in ila a tha ta ve ang’ ka ti hlaka, mak ti hmel zetin a meng phar awk bawk.

‘Tak tak,mahse Beer te chu..’

‘Ka ti mai mai anih kha, Coffee tak tawk min lo siam zawk rawh’

‘Ok,ee,Rinpuia khan min rawn biaa, hna thar khawih tur lama hnathawktu tur kha a hmu a ni awma, Tlai lamah rawn kal kual a tuma’ a ti leha,ka bu ringawt.

Naktuk hi zirtawp a ni tawha, tunkar chu a kal chak lam hret in ka hria, Abel-an min lo tibuai ve sek bawk nen ka hna a sawt hlawl lo.Naktukah Tluangpuii a chhuk anga, a tuk lehah Awmtei Nau nei turin a lut ve dawn thung.Ka buai tur zia a hria,Beisei pawh min beisei ngam lo law law.

Abel-a nu thilsawi dan ka ziah lawk ang ang te en pahin hmanraw mamawh tur leh Drawing ka siam leha,ka siam zawh meuh chuan dar li a hnai thuak tawh,Zana kan chawei chhuah hun tur kha dar 8ah a ni a, tlai a hlauhawm hran loh.

Ka ziah zawh hnu reiloteah Rinpuia a rawn thleng ve a,Mistiri tur a rawn hruai nghala,Helper tur pahnih a nei nghal thei dawn bawka.Ka thaw huai mai,In thar hlak siam hi thil harsa a ni lo a, awm tawhsa siam danglam tum hi a hautak mah zawk.Closet  leh thildang te pawh siam that vek a duh a,kha lam kha chu kan Team neihsa pakhat atangin an pawhpen mai theih ka beisei ve ngawt.

‘I hman tawh em?’ phone ka pick rualin Abel-a aw hian a rawn ti a.Ka mengphar awk ringawt.

‘Eng turin maw?”

‘Zanin hian kalna tur kan nei a, i hre lo nge i hre lo der?”

‘Ka hre lo anih hmel’

‘Tluangpuii khan a hrilh che in ka hria’

‘Oh,tah khan i tel ve dawn maw?”

‘Dawn chiang,Tluangpuii hi i  thian anih ang bawkin ka thian a ni ve tho ania’

Beidawng thinrim zet hian ka phone ka off nawk nawka, khumah ka vawm phei daih bawk,hun reilote,amah nen kan inhmuh hnuah hian engkim mai hi a thleng chak lutuk,ka tihtur apiangah a lo lang ve a,ka kalna tur nise a kalna tur a lo ni ve ziah bawk.Thawveng taka thianho titi khawm pawh ka chak laiin ka thawpik hle dawn ta anih hi.Tunah thulh leh rum rum pawh ni ila Inah a lo ka duh hial maithei.Aaah, kan In a hre lo,mahse, a duh phawt chuan a zawng chhuak mai ang tih ka chiang.Eng thil nge maw a duh hrep ni? A u Nupui nei tur tihel nan hmanruaah min hman a tum zawk nge mawni?

‘Ngatinge Abel-a a kal ve dawn tih i sawi loh?” Tluangpuiin Phone a pick veleh ka ti nghal hlar mai.

‘Ngatinge? Ka sawi loh pawn a tel turah i ngaihsa ka lo ringa” hrep tak hian a.

‘Ring ila ka kal duh i ring em?”

‘Wow,in hmuhnaw tan riau ania’ nui hak hak pahin a ti duh lek.

‘Anih chu a..thian ho tih khan keimahni lam emaw ka ti asin’ ka tawng danah lungawi lo ri a hriat tel theih.

‘Sorry,chutiang lam ka lo ngaihtuah miah lo a, diktak chuan Abel-a hi ka thian ve tho a ni a, nang nen in lo inhre saa,midang pawn an hre sa vek bawka..A lo kal ve vangin Problem i nei ang tih ka hre lo’

‘Problem...amah ngawt pawh kha Problem hlawm anih kha’ uar zet hian ka ti leh nghek.

‘Anih chuan ka’n bia ange,lo kal lo mai se, a ngaithiam vek ang’ a ti sapa, ka rilru a nuam lo leh lawi.

‘Aaa, angai lo mai..’

‘Tak tak??”

‘Aw,ngai lo..’

Insiam lawk loin ka mu leh ren rawn,Abel-a bawk ka mitthlaah a lo langa,han duh loh ngawih ngawih tur Mipa a ni miah lo,an nihna te, amah hrim hrim pawh hmeichhe tamtak chuan duh ngawih ngawih tur a ni zawk.Kei ngei pawh hian tha taka inzui emaw thian anga bul tan chu ni ila ka hnial kher ka ring lo,tunah erawh hi chuan khatiang lam engmah a awm lo,ka lo beisei thin,Mipa,pa tak leh mi hipna ngah tak,midang zingah pawh min duh zia tilang hreh lo,hmeichhe dang te awh ngawih ngawih, Caring tak nena bul tan ka lo chak thin,heng zawng zawng hi Abel-a hian a nei vek hial maithei,mahse, kan bul tan dan erawh beisei lawk loh lutuk thil a ni ta thung.

Dar 7ah ka insiam tan ta chauh,ka kal chhuak dawn tih ka sawi lawk avangin ka chhungte erawh chuan chaw an ei tawh thung.Ka insiam laklawh laiin ka room kawngkhar an rawn kik a.Lut tura ka auh chuan kan nula a rawn daka.

‘U,i thianpain a nghak tawh che nia aw’ a rawn ti a,ka hresual emaw ka ti zawk.

‘Maw?” ka ti a,tumah min rawn sawm tur emaw min nghak tur zanin hian an awm lo.

‘I kalpui tur a lo thleng tawh, a call tlang thei lo che a’a ti nawn leh a.Mak ka ti tawlh tawlh thung.

‘Ok,ka lo chhuk nghal ang’ a ri erawh chuan ka ti ta tho.

A kal veleh ke lawngin ka room pawnah ka chhuak a,ka room piah deuh atangin Inhnuai Living room a thu a hmuh theih chiah avangin ka naupan lai atangin inleng kan neih leh neih loh ka bihthla fo tawh.Ka beisei loh lutuk ka zuk hmuh takah chuan ka thaw hak mai, rang lutukin ka tawlh let nghala,mahse, tuemaw ka va tauh dawt mai.Ka hawilet vata, ka u a lo ni a, a mitmeiin zawhna min zawt zui nghal zat bawk.

‘Engmah,Nungi koh ka tuma, a ngai leh lo a’ ka ti liam puata, min chhan letna pawh nghak loin Roomah ka luhsan daih bawk.

Roomah tawmreng theih ni hek lo,hreh zetin ka chhuk ta nge nge,ka thawm hraiin an rawn hawi nghal thap bawk.Kekawr lian thawll deuh hnak a thui ka haa,Top thui mawltawp ka ha bawk,pheikhawk  pawh sang lo aia sang tihtur,a hmalam pum,a hnung lama kaihna awm ka bun bawk.Engtiklai mahin incheina hi ka uar ngai lo ve hranpa tawp.Neih erawh ka nei dul tho.

‘Engmah i sawi lo a,amah hi i Motor ke chhiat zana puitu che kha a lo ni renga” ka nuin a lo ti nghal hlak hlak.

‘Nia,sawina hun pawh a la awm loa,bakah ka sawi ngai lo pawn i lo hre tho alawm’ ka nuia, Abel-a lam ka hawi duh lo lui tlat bawk.

‘I u in sawi lo se chuan ka hre nang mawle,a lo kal dawn tih i hresa renga, sawi ve tur che lawm..’a ti leh a,ka nui ringawt,Abel-a lam ka hawi ta nge nge.

‘Kal ila..’ pangngai thei ang berin ka ti a.

A rawn ding chhuaka, a dress a inhmeh lehpek.A sam chhip, buk deuh chu uluk fahranin a khuih a,a bek tawn tawn erawh a kawng thung,kawng vek erawh a ni lo,a khabe ruh kual nalh zet leh fai tha taka hmul tawite  to siar siar chu a langsar viau,mahse, a tilang pa zawk mah.Kekawr uk eng lam a haa,Kamiz a taksa phuar deuh hlek,a ban tlawn a ha bawk.Mahse, a ban a thlep chhing thung, Kawnghren dum,sin lam a hreng bawk.Nidang ang bawkin Loafer bawk a bun leh,ka hmuh apiangin Loafer a bun ziah,a ngaina hle anih hmel,mahse, angai a la bun miah lo.

Kawngkhar thleng ka nuin min rawn zuia,leng leh ngei ngei turin Abel-a a la ti zui,ka nu a ni na vang vangin a vawikhatnan ka ngei,he pa hian Min tanpui tehmeuh nangin chutiang chiam chiama lo tlawn a ngai ka ti lo bur.A awm mai mai pawh a induhtawk sa nen,a chapo na a belhchhah sak mai mai.

‘Mark 100 ah 90 vel ka Score nghal in ka hria’ kan tlan chhuah hnuah a rawn ti chhuak sup.

‘Enga?” ka ti hmak ringawt.

‘I nu khan min pawm nghal thlap a, i u pawn’ a nui hawk bawk.

‘I duh duha khawsak kual vel hi engtik atangin nge i chin?’

‘Chutiang a ka awm pawh ka lo hre hleinem’ a ti awlsam mai,ka melh zawka, a Motor khalh lai chauh ngaihtuah niawm tak hian hmalam a melh ngur thung.

‘Sawm miah lohin i lo kala, tuemaw talin i awmdan hi mawi lo tiin an la hrilh ngai lo che a mi?”

‘Tiang hian ka awm ngai tlat loh avangin hrih lo hlauh’

‘Anih chuan ka hrilh cheah ngai rawh,bakah vawiin khan ka chhang zo hman lo che a,Ka pawm lo tih ka tum zawk’

‘Aaah, ‘lo’ tel lo khan ka pawm fel vek tawh’  a ti leh hmuk a, ka va han ngei tak.

‘Hmeichhia te hi an duhna ngaipawimawh miah loa i duh ang anga i kalpui thin vang ami i bialnu hlui hian i u a thlan zawk?”

 Motor a ding dawta, ka lo inring si lo,ka tawlh hma dawrha,Darthlalangah ka va intauh titih.Thinrim zet hian Abel-a lam ka hawia,mahse, a hmel dur khup ka hmuh rualin ka thinrimna a reh nghal riai riai thung.Hlau zetin ka thu tawm ta chaih zawk.