REVEUSE- 9

CHAPTER- 9

‘I duhtawk thei tawh em?” a aw hlauhawm zia chu pui tak a ni.

‘Eng nge ka sawi a?” ka chhungrila ka hlauhna awm tilang lo turin ka in Control nasa viau thung.

‘A tir atang khan ka hmeichhe duhzawng i ni a, ka umzui che ka tih kha,abak engmah ka mimal thil i sawi ka duh lo,keipawn ka sawi lo ang’

‘Wow..chu pawh i duhdan leh bawk maw? A va ropui ve’ ka tum aiin ka aw a ring hret, ka hlauhna a reh nghal duak bawk.

‘Aw, ka duhdan.Kan inkawp dawn anih chuan kan pahnih chiah kan ni a, hun kal tawh lam ngaihven ka duh lo’

‘A va tha ve,ih e..diktak chuan ka haw lutuk che’

‘A lawmawm anih chu’

Chhan leh ka tum lai takin ka phone a ri ta hlauh, ka phawrhchhuaka, Tluangpuii a lo ni a..Pangngai taka ka biak theih nan ka pick hmain duhthawh zetin Boruak ka hip lut leh rih.

‘Hello..’

‘In lo thleng dawn tawh em?” zangkhai fe hian a rawn ti a, ka mood nen a inmil lo thak, chumai bakah Abel-a nen kan kal dun tih hresa niawm fahranin ‘in’ tih  a rawn hmang bawk.

‘Dawn tep,a rei tawh lo ang’ ka ti sepa,music ri ruai ruai ka hrethei bawk.

Ka phone ka bagah ka khunga, pawnlam ka thlir zui daih bawk,biak ka chak lo a, engmah sawi dun pui ka peih hek lo,haw lamah a ruala haw loh dan tur ka zawn angai ngei bawk ang.

‘I chal kha i tauh na em?” Ka beng bul maiah zawi supin a rawn ti a, ka tum loh lutukin ka phu zawk bawk.

‘Na se i tih dawn tehreng nen a na lo hlauh’ hawi pawh ka hawilet chuang lo.

‘Mat...’

‘Tikhan min ko miah suh, ka thiante leh ka chhungte chauhin min ko thin.Tiang chu i ni lo ve ve’ ka ti leh hmaka,ka hawi leta, a mitmeng tur zet chu ka ena, a thinrimna thunun vel a ang viau,mahse ka mit ka lasawn duh bik lo.

‘Ok,a tha lawm..i duh loh chuan hmingdang ka ngaihtuah angai dawn anih chu’ a ti leh supa, engmah sawi leh tawh loin Motor a start a, kan kalna tur kan thlen hma chuan vawikhatmah kan tawng leh tawh lo.

Min hmuh veleh Tluangpuii a lo ri nghal chul mai,kan thiante dang an lo awm nuala, kan School kalpui thin te,tun thlenga kan kawm zui tak anni hlawm.Amah Tluangpuii thiante dang an lo awm ve bawka, kan vaiin 10 kan ni a,Pantei ka hmuh veleh ka pan ding nghal nalh,kan School kal ho lai khan Tluangpuii nen Pantei leh Awmtei te nen hian kan inkawm thina, Tluangpuii ang em chuan ka kawmngeih lo,kei aiin Awmtei nen an inkawm nasa zawk.Mahse, ka thawveng hawk tho,Abel-a bula ka awm angai ta lo hlauh.

Ka va melh zawka, mipa dang ho nen an titi khawma, a hma ang bawkin an ngaichang leh thap niber hian ka hria,nep hlawm zel zul lutuk,enge maw a nih chiam le a?

‘A chhe lo thak..’  aw rawn chhuahna lam ka hawi vat.Pantei a lo ni a, Wash roomah a kala, a lo let leh lai ka lo hre lo.

‘Tu maw?’ ka ti a,a chair rawn pawh hnaih deuh pahin a rawn thu a.

‘Amah saw, tu nge nise i tih a?” Abel-a te thutna lamah a thle zauh bawk.

‘Amah tih ngawt, a hming i sawi loh chuan amah tihtur an tam em mai’ ka hre lo der tlat.

‘Abel-a bak tu nge ni ang?’

‘Ah,ani aia tha vek anni zawk lo mi?’ ka ti ve thung.

‘Hmelah chuan anni mahna,mahse,a pumpuiah chuan Abel-a tluk tu ka hmu lo’

‘Chuti chu nei hmiah mai rawh’ ka nui var var bawk.

‘Takzet..ka hnial miah lo ania’

‘Lutuk,i nei thei reng ang, Bakah nula a lo mamawh viau thei asin’ ka ti leha, mahse, a hmel danglam nghal vek ka hmuh rualin ka sawi tur aia thui hret ka sawi tih ka hre leh hnuhnawh.Awmzia a awm tawh der si lo.

‘Anih chuan in inkawp miah lo tihna a ni em?’ a ti ta chat.

Chhan tumin ka ang ziaua, mahse ka chip leh daih,ka tum dan chuan ‘kawp nang’ tih kha ania, mahse, mak takin chutianga chhan chu ka hreh ru tlat,bakah kan inkawp angin ani pawh hian a lo hria anih chuan inkawp anga lan mai hi enge a that lohna? Kum 30 ka hnaih tawha, ka la single ta reng bawk,vawi tamtak thiante leh chhungte fiam pawh ka hlawh tawh,bakah Abel-a pawn a bialnu niturin min um dawn tih a sawi tawha, mi hriat dan hi dik lo a awm chuang hlek lo.

‘Enge i rin dan?’ ka then lui sak bawk.

‘Ka rindan maw? Ih,diktak chuan in inhmeh ka lo ti tawp, in lo kal dun dawn tih Tluangpuii’n min hrilh tirh atangin ka lo mitthla vel che u a, bakah in lo thlen hnuah pawh Abel-a mit sawn a kalsan mang hleinem che’ a ti ta duah, thil tul lo lutuk ka sawi vanga ka thawpik hman kha a kiang ta hawk bawk.Mahse, a sawi ang khan Abel-a mit ka chungah a fu tlat tak tak em tih erawh ka hre lo,alam hawiin ka thu lo miau a.

‘Em em a che’ ka ti hlak ringawt.

‘Em em lo,i hmuh theih loh vang mai zawk anih kha,Joseph-a hian tiang sawn min en ve se chuan ka tuiral vek ang’ a ti leh talh,Joseph-a hi a bialpa a ni a, kum 5 vel lai an inzui ve tawh.An la innei thuai pawn a rinawm viau.

‘A en em em ang che, i hmu lo anih chu,kei pawn ka hmuh bik loh kha’ ka nui a,a nui ve hak hak bawk.

Kan chawei boruak a nuam ta phian,a tir kha chuan Abel-a lo kal ve tur vangin ka mood a inthlak nghal vek kha nia,mahse, engmah buaina min thlen lo, min ngaihtuah hurh hek lo.Mahse, Dinner kan einaah erawh ka bulah a thu a, min Care zia a tilang hreh hauh lo,mak takin ka lawm ru tlat lawi bawk.

‘Wash roomah ka va kal lawk ang’ ka ti a,haw lam kan hnaih tawh

‘Ok, i lo let leh hunah kan kal mai dawn nia,i chauin ka hria’ a ti supa. Uluk zet hian min en runa, a hmelah enge a ngaihtuah ka hre thei lo.

‘Um,ka rei lo ang’  tih pahin ka tho a.

Ka hma darthlalanga ka hmel lo lang chu ka ena, Abel-a sawi ang chiah khan chau hmel a lang thei,mut ka mamawh pawh a nimahna. Ka hmuiah Lipstick ka tat a,rawng tak lam ai chuan ka hmui rawng ang deuh,natural taka lang thei  ka hmang tlangpui.

Ka lipstick ka bagah ka thuna, ka hawichhuak leh chiah chu ka hnar a rawn za a,enge thleng dawn ka hrethiam nghal vek,mangang zetin ka bag ka pawt hawng leha, Hanky lian lo te awm chu ka la chhuaka, ka hnarah hmehbel pahin ka dak nghal bawk.

‘Ehe, ngatinge?” Tluangpuii aw hian a rawn ti a,ka ban ka vai ringawt, ka kun hniam ngam lo, tlem te pawh nise a baw thla hawk dawn tih ka hria.

‘Lawk...’ a tlan chhuak thawm ka hre zawm zat,hreptak hian..Abel-a a ko dawn tih hrilh chawp ka ngai lo.

Ka rin ang chiahin reiloteah thawm a rawn awm nghala,mahse tunge lo kal en tur pawn ka hawisawn ngam chuang lo.Ka mit ka chhing ta zawk,ka zak hluah hluah, zah lahin awmzia a nei der si lo.

‘Ok..ok..i tha vek ania, Tluangpui,tuemaw hnenah khan Cotton tam deuh hlek min lo dilsak lawk ta che..Aih, ngaihtuah suh,keiman ka ti thei lutuk’ a tih zawm zat.

Min rawn kaisawna, ka hnungah a rawn dinga,ka hnar a rawn hup ve a,amah ka rinchhan theihna turin a insiamrem a,min kuai daka,a darah ka lu ka nghata,a kut lehlamin ka kawngah a kuaha, lehlamin ka hnar a hup thung.Nidang ang lo takin ka mit a vai ram ram bawk.

Tluangpuii rawn let leh thawm leh Midang awm lo tura Abel-an a tih thawm chu ka mang hriat deuh ruai,mahse, tlu lo turin ka insehruh fan fan thung,Abel-an min kuah bet tlat lo se chuan ka tlu mualpho ngei ang tih ka chiang.Nidangah pawh ka hnar a thi fo a, tiangin ka chau ngai si lo,mak tak a ni.Sawi ngaihna awm lo khawpin ka chau hluah hluah a ni ber.

‘Hahdam la, a reh tan ania...’ ka beng bulah zawi supin a ti a, a hma pawh khan min hnem nan zawi tein engemaw min hrilh reng bawk a,diktak chuan ka thlamuanpui ngei tih ka hre bawk.

Minute 10 a ral leh chuan a rehfel titih,mahse, darkar tam a liam hmanin ka hre thung,keimaha kal turin chakna ka nei hlawl lo, Abel-an ka kawngah a kuaha,ka hnarah Lapua a la inhnawh tut bawk.Motor kawngkhar min hawnsaka, ka lut tur pawh min pui thlap tho.Hnial tumna ka nei lo,hnial a hnekin min kalsan mai ka hlau zek zek zawk.

‘Sorry...ka tibuai hle mai che’ kan tlanchhuah veleh ka ti a, ka inthlahrung tak tak.

‘Tibuai nang,ka lawm zawk mah’ mak ti deuh hian ka en a.

‘Ngatinge?’

‘I duh emaw duh lo emaw min ranchhan angai alawm’ a ti supa, ka ner nak ringawt.

‘I sual e a’ ka ti sepa, pawn lam kan tlanpelh lam ka hawi vauh vauh bawk.

Tawng lo a reife kan chuan dun hnuah Motor a ding a, kan In kan thleng tawh tih ka hrethiam mai,ka muthlu miah lo,mahse, kan din takah chuan ka harh hawkin ka hre thung.Muangchangin ka thu mara, ka hawi chhuaka,kan dinna hmun hi kan In a ni hauh lo.

‘Ngatinge?”

‘Ngatimah’ kan inchhang tawk viau.Ka chhungrilah hlauhna a rawn lut zawka,mahse a reh leh chawpchilh mai.Nichin lawka min puitu,ka rinchhan kha chu a ang leh tawh hauh lo.

‘Haw ka duha, mut hahdam pawh’

‘Chumi hmain thil tihduh ka nei ‘

‘Eng...’

A rawn tawlhhnai thuta, ka thutna seat nghenchhan chungah a kut a rawn daha,a kut lehlam,zungtang sei thlurh chuan ka biangah a rawn khawiha,chetna chang pawh ka hre lo.Ka sam ka bengah a zepa, a kutzungpuiin ka beng bul a tuai paha,ka mitah tak a en run bawk.

‘Abel’ ka aw a ri chang chang...Tawng leh tuma ka ang hman ziau tawh chu a hmui hnawng chap leh chhah tap chuan a rawn khar ta hmak.Ka hamhaih lutuk,chhan letna chang pawh ka hre lo,hawisawn na chang pawh ka hrechuang lo.

Dim leh dam raihin ka hmui hnuailam a rawn fawpa, a leiin a rawn nawr kau zui bawk.Ka hnar hnawhna la awm tut nen,ka landan nalh loh tur zia ka ngaihtuaha,mahse duhthawh zeta min rawn fawhna chuan rei min ngaihtuah tir lo,a zei lutuk chuan ka awmdan zawng zawng min theihnghilh tir vek tlat.

Min thlah meuh chuan kan thaw dun hlawp hlawp thei hial,zah lutuk vangin ka hmai a sa hut hut in ka hre bawk.Ka khabeah a rawn dawma, min kuai dak leha, a rawn kun hniama,mahse  ka chalah a rawn fawp ta zawk.Chesawn loin min kuah bet vang vang bawk.

‘Midang tumah hnaih lo tum suh ang che.Ngenna pawh a ni lo a, Order zawk anih chu’ a ti supa, ka samah a rawn fawp leh vang vang bawk,ka chhang let lo,chhan letna tur mai ka hre lo,bakah chhan let ngailoin keipawh hian midang ka ngaihven dawn lo tih ka chiang.

Ka Room kawngkhar kik riah ka harha, che loin ka mu lui vang vang,nizan thil thleng kha..Ka mumang a ni hauh lo,mahse Abel-a ka hmu leh ngam angem?Nizan kha chuan sawithiam si loh khan min phuarbet tlat anih kha.

‘Mambawih,tho tawh rawh.Dar 8 a ri dawn ania’ ka nu awin a rawn ti a, ka inlet thaka,ka khum bula Lamp stand a ka sana hun chu ka en a,  a sawi ang tak takin dar 8 riknan minute tlemte chauh a awm tawh.

‘Aw, ka lo tho ang’ ka au leta, mahse, lukhamah ka hmai ka phum zui leh mai.

Ka phone ka dapa, tho kang chuangloin ka en a,whatsapp msg a lo awm vang mai,ka lock ka hawnga, Abel-a..

‘Good morning..My Boo’

Nizan khan ‘Mat’ tia min ko kha duh loin ka khak anih kha,a sawi ang ngeiin min kohna tur chu a thlang fel ta chiah reng,ka ngaihtuahna vangin ka hmai a sa nghal hat hat thei hial,amah ka hmu hauh lo chung pawn tiang khawp hian keimahah effect a nei chu a nia.

Rosanga nen kan inzui lai ka ngaihtuah chhuak leh ta nge nge,kan inzui lai khan tiang tak khan in kiss a nuam tih pawh ka lo hre ngai lo a, vawikhat mai ni lo vawitamtak kan in kiss ngei,tiang taka danglam kha anih ka hre ngai lo.Ka nunah a vawi hnihna turin Mipa ka la lut leh dawn ta chu ania,Rosanga vanga ka natna aia tam kha min pe anih chuan ka tuar zo hauh lo ang,Rosanga nen khaikhin phei chuan Abel-a hi chu a chungnung lawr lak a, a sual duh phawt chuan Rosanga ai khan a sual hle bawk ang.

‘Ka beisei aiin kan hmu har ka lo tia’ ka u in min chhaiha,ka hrethiam reng nangin ka hre lo lui tlat.

‘A fel hmel ka ti khawp mai,bakah Thawnthu te pawh a ang alawm,Nu..in hunlai te pawh a ang hial lo maw?’ ka u bawkin a ti leha, rum deuh hian ka melh ringawt.

‘Engtia kan hun lai maw? ‘ chawhmeh chan mawlh mawlh pahin ka nuin a ti a.

‘Motor chhia kha an lo insiampuia, thlakhat vel a ral chuan Dineout turin a rawn lam ta vel a...’ a ti leha.

Ka pa nui huk huk chuan ka pa a awm ve tih min hriattir chauh,mahse, ka u emaw ka nu pawn an thilsawi duh sawi loh phah nan an hmang chuang lo ang tih  ka chiang,ka u te bialnu  pawh hi ka nu leh pa awm lai pawn ka chhaiha, ka fiam ziah.Nu leh pa tha ber chu ka ti hauh lo nangin an fate duhna an dah lal thiama, min khak ngai lo.Mahse, kawng dik lo kan thlang dawn ni a an hriat chuan min zilh hau fo,kei ngei pawh min duat em em chung hian ka naupan zual lai chuan ka nu hian min kuk lawlh lawlh tum a nei ve tho.Hetiang Nu leh pa hi nilose kan upa ber nupui hi Mo sual tak chhuahin a chhuak ngei ang.An inneih hma atanga hmeichhe nasa ve tak,sawi hat kai kha a ni a,mahse, Nu nih tlin tak,mo fel takah a chhuak ta daih.

Office ka tlawh hmasaa,Motor ka khalh peih ngang loh avangin kan Taxi hman thin ka biaa,chawhnu lamah Awmtei awmna Hospital lam ka pan ta chauh,Hna hmanhmawhthlak lutuk a awm rih lo nangin an zai hun tur chawhnu lam anih vangin khawih tur awm ang ang ka khawih fel hmasa ta zawk. Abel-a te hna kha Monday atanga tan tur a ni a,a hna khawihtu tur Mistiri ka be fel vek tawha, nikhat naah chuan a chhung vuak thiah leh in senghawi vel a tul dawn avangin engmah hmanrua kan mamawh dawn lo.Bakah a tul zualpui tur chu ka siamfel titih tawh.A rei berah thlakhat kan mamawhin ka ring.An inneih hma chuan kan zo hman vek ang tih ka chiang.

Ka phone ka ena, Abel-a..Zinga min rawn wish bak kha min la be leh miah lo,nizan pawh kha tihpalh a thleng a nih ka ring leh rum rum hman.Mahse, keipawn biak chu sawi loh,a msg pawh ka reply lo.

‘Hello..’

‘Khawnge i awm?”

‘Awmtei an zai dawna,ka Cousin..ka kal mek’

‘Ka hria,khawi Hospital nge?’ a rawn ti a, ka hrilh a.A hmain Awmtei nen an inhmuh awm ka la hre lo.Mahse, a hria atih chuan a hria a nimai.

‘Ok, an zawh veleh min rawn hrilh la,hruaina tur che ka nei ania’ a rawn ti a.

‘Khawiah maw?” a ngaihna hre loin ka ti ringawt.

‘Kan kal hunah i hre mai ang,Dar 4 hmaa i hman theih chuan a tha ang’ a ti leh supa.

‘Kan kalna tur i sawi si lo a’ ka ti leh talh,ka sana ka en a, dar 1 a pel tawh.

‘I la hre mai ang ka tih kha,Motor i keng em?”

‘Aih.’

‘A that chu,ka rawn lam ang che’ a ti leh nghuta, ka chhan let hmain a off zui daih bawk.

Ka thlen chuan an lo awm deuh laih laih tawha, Awmtei ber pawh an lo la lut hman tawh,Ka nu nen kan thu duna,Awmtei pasal phe sek chu ka en a, ka khawngaih ve ringawt.Fa nei ve dawn ta ila Abel-a hi engtin nge a awm ang? Ka ngaihtuahna vangin ka nui ringawt,engtinnge Abel-a ka pasal tura ka ngaituah ngawt theih ni? Hahthlak hian a..

Ka rin aiin an zai rei ta phian,darkar khat dawn Operation theatre a awm hman ang tihah an zai zo a, fapa a nei tih an rawn sawia, lawm vangin kan thum nghal hak mai..Diktak chuan midang zawng zawng aiin a lawmawm zual bik a tih loh theih loh,vawihnih ngawt a chhiat tawha,tuna mi bak hi nau pai leh an beisei ngam hek lo.

‘I haw tlang dawn em?’ ka nuin min ti a.

‘Aih,kalna tur ka neia,Ka u bia la, a lo hruai hman lo che mi?’ ka ti a.

‘Angai lo,i ni ten min thlah kual pah dawna,Motor i keng si lo a, i haw ve nghal duh takin ka ti zawk’ a ti awlsam mai.

‘Ka kalsan dawn che u, Awmtei chu naktuk zan lamah ka riahpui mai ang,zanin chu midang an riah duh ka ring’ ka ti a, ka bulah chuan a pangchang thei ngei ang,mahse, a nu leh a pasal riak se nuam a tih ka ring zawk.

Stepah ka chhuk thla a, Abel-a ka call ang nge call lo ang tih ka ngaihtuah lai takin amah zawkin a rawn call ta hlauh.Ka hman tawh tih ka hrilha,min rawn lam dawn thu a sawia, nghak turin min ti bawk.Khawiah tak chuan min hruai a tum chu nimaw??

‘Khawnge kan kal dawn a?’ kan tlanchhuah hnuah ka ti a.

‘Ka thiannu kan hmu dawn mawle’

‘Eng turin maw?’ a ngaihna ka hre lo.

‘I hnar kha kan check tir ang’

‘Aaah, angai lo.A hma pawn ka entir tawha,engmah tha lo a awm lo’

‘Kan hria ang chu’ a ti duh lek.Hnial ka tum zeta ka hnial hneh dawn chuang lo tih ka hriat chian lutuk avangin ka ngawi ta zawk.

Mc ah Motor kan daha, kein Hospital roadah kan phei duna,diktak chuan a zahpuiawm hlawl loh.Damdawi zawrhna dawr lian zet bulah min din puia,dawr nghaktu in a lo biak danah chuan an inhre tha hle tih hai rual a ni lo,min rawn melh leh zawk thin chuan ka hriatthiam chiah si lohin ka awm a ti nuam lo ve ngawt bawk.

‘A en zo tawh hlawm em?” Dawr Countera lo thu hnenah chuan a ti a.

‘Aw, zo a nimai,han chho ru,a lo nghak che u’ a ti a,ka kutah a rawn vuana,a kutzungtang sei thlurh chu ka kutzungtang karah a rawn rawlha, nghet zetin a hum zui hmak bawk.

‘Chho ila..’ a ti supa,nimin leh vawiin inkar hi a zim lutuk,mahse, Abel-a nen kan chhungril inzawm tir tur hian a tawk em em tho chu anih hi a.

Mi pakhat lut mek a lo awma, pawna thutna awmah chuan kan thu dun a, Doctor hming inziak chu ka en a,hriat tawhna neiin ka inhria,mahse, khawiah nge ka hriat ka hrechhuak zo lo.

‘I thiannu maw kan hmuh tur hi?”

‘Aw, ti ila ka Putea fanu’

‘Ok..a hming hi ka hriat hnu a ang lutuk,a lar viau zawk nge?”

‘Ka hre lo, thiam chu a thiam thawkhat..lawk,hmanni khan Inneihnaah khan i kal ve kha..’ ka hrawk a ro nghal halh mai.

‘Tu..tu maw?’ harsa ti zetin ka chil ka lem a.

‘Tluangpuii te nen kan inhmuh kha,a Pasal chu Rosanga....’

Enge a sawi zawm ka hre tawh lo,ka bing mum mum ringawt..