BLACK HORSE

REVEUSE(Dreamer): Maengi Ralte

                        CHAPTER- 1

“Nangmahin i kal thei tak tak ang maw?” min ti tu ka Cousin lam ka chu ka hawia.

“Ka thei lo ka tih chuan min kalpui thei leh thut dawn si tihna mi?” ka ti a, ka ner sak bawk.

‘Ah, ka thei lo tih i hria lawm’ a thle bak mai.

‘A tha  lawm,anih chuan min ngaihtuah tawh suh,bakah khi lamah Rinpuia a lo awmsa tho a, problem ka nei palh anih pawhin ka call mai ang’ka ti leh a, a bu nghat nangin a rilru la hmin lo tih hriat zet hian min melh reng tho.Ngaipawimawh duh lo lui in ka hmaa Computer lam ka en san ta zawk.

‘Eee, ka theihnghilh hman tepa,nimin khan hei hi a lo thlenga..’ a ti leh a,ka hawi chhuaka, Envelope var nimaiin ka hria,a rawn tho a. Ka Tableah a rawn daha.Ka la kang ve thung, a landan maiah chuan Inneih sawmna Card a chhungah a awm duh hmel,a var satliah ni loin a rukin a par a,a a tle neuh neuh bawk.

Ka let a, ka rin ang chiah, tuemaw te Inneih sawmna a lo ni ngei, ka hawnga, ka la chhuaka, mahse, tu nge anih ka hmuh rualin ka thawk a sak nghal talh talh  thung.

‘Tu te sawmna nge?” tih leh min rawn laksak a ruala,mahse tu nge anih a hmuh rualin Anchhe lawh ri ka hre zui zat,mak ka ti hran lo..A vawikhat nan keimahin ka Longrun dawna, ka chak lo sa tawh tih nak laiin tunah he thil hrep hi ka hmu leha,ka nunah ka paih chhuak fel tawh emaw ka tih kha a lo let leh ta,a nat dan pawh a la ngai ta fo.

‘Rapthlak lutuk,engtin nge a ngam zawk a?” tih leh hlak pahin a hlawm tawp tawpa. Ka thutna sira Dustbinah chuan a vawm lut zui nghal daih bawk.

High School ka kal laiin kan intawnga, kan School kalna kha hi High School leh Higher a inkawp vek,Pawl 10 ka zir laiin ani hi pawl Sawmpahnih,kum laklawhah a rawn lut ve a,a tir phat atangin a lar nghal.Kum laklawha lo kal anih mai bakah a lo kal hnu lawkah kan School pumpuiin  Annual Sport kan neia, Sport lam zawng zawng a ti thei vel vek.A liana, a hmel tha tehchiam lo,ka thiannu Cousin a nih vang nge ka hre lo,kei chuan tha ka ti ngai lova,Hmeichhia zawng zawngin an duh rawn kha mak ka ti zawk hial thin.

Mahse, ka thiannu kal tlangin kan innel ta thuai tho.School banah kan haw ho zauh zauha,kan ban hmasak zawk tum chuan kan haw ho ngai lo.An ban hmasak tum erawh chuan ka hmu ziah thung.Kum tawp dawnah Tuition ka kal zui leha, chuta tang phei chuan tihpalh nge tih luih hriat lohin kan inhmu tlai tin ta..Kan inkawm a, kei aia a upa hle chungin ka kawmngeih ve ta thuai.A tawng duh lem lo,engtik laiin nge kan induh pawh hriat loin kan inkawp nghet chu a ni zui ta mai reng kha ania.

‘Matty,i tha em?” ka darah rawn khawih pahin a ti sapa,ka phu zawk thung.Ka melh zawka, harsa ti ru zetin ka nui lui sak bawk.Ka hming hi ‘Martha’ tih nimahse ka thiante,ka naupanlaia ka kawm thin  leh chhungte zawng zawngin ‘Matty’ ti vekin min ko.School ka kal lai a ka thiante erawh chuan ‘Martha’ emaw ‘M’ tiin min ko tlangpui thung.

‘Tha tehreng mai,mahse..tlem chu che a awm ve maithei’ ka nui ri hak bawk.

‘Ka hrethiam che,bakah a nunrawng ka ti hlawm tawp’ lungawilo aw hian a ti leh halh a, ka dem lo.Nia, hetianga Inneih sawmna min pe hi ka lawm a ring tak tak nge min tihel na zawk ngaihtuah tham tak a ni ringawt,kan inkawp rei avangin kan hmelhriat te zawng zawng in an hre vek hial ang,kan inthen leh pawh an hre vek bawk.A chhan erawh kei leh ani bakah ka Cousin chauh hian an hria.Ni lo..Aman midang a hrilh anih leh thuhran..

‘A ho lutuk,keipawn ka la sawm ve duh maithei sin’ ka ti a, mahse, ka sawi rualin ka sawm ngai dawn lo a, ani nen engmah tihdun emaw hmun khata awmdun pawh ka duh leh tawh ngai lo tih ka hrechiang em em thung.

‘Kal tawh rawh, hei hi ka zo anga keipawh ka chhuak ang’ a rilru tihnawm nan zangkhai thei ang berin ka ti leh a, ka hlawhtling thawkhatin ka hria.

‘Um,lawk,i nu in i kal tur a hria em?” a ti leh rih.

‘Aih,a hriat loh a tha zawk..i hrethiam tiraw?”

‘Tehreng mai..Fimkhur ang che, i nu hmachhawn hi ka chak miah lo,i chungchangah ngat phei chuan..’ a ner nang chu ka en a. A sawi dik,ka chungchangah chuan tuman ka nu hmachhawn an duh ngai lo vang.

Darkar khat a liam leh meuh chuan ka kal tumna thleng turin darkar khat leh tlem bak ka mamawh tawh kher lo ang,ka vawikhat kalna a ni lo nangin kawng erawh ka bel lo,ka fimkhur thawkhat viau bawk.Ka mood chhe lutuk min pui tur niawm hrimin khua a dur deuh a, ruah tla mai tur a ang viau bawk.

Ka beisei ang ngeiin Darkar khat leh a chanve vel ka tlan leh hnuah ka tumna hmun ka thleng a, ruah pawh a tla ta mai bik lo.Rinpuia’n min lo hmuaka, reivak lo kan thut chawlh hnuah an Khaw tana thil pawimawh tak,an Community Hall sakna tur kan thleng a,hmun zawl rai nuam tak a ni a, an laih zawl belh tih a hriattheih bawk.Aizawl hmun a awm atan ka it nghal ngawt, Khawchhung ni siin hetiang hmun rem tha an nei a, chu pawh Mimal ram nen ramri fel tak a nei bawk, a hmun thlen hmain engmah ka tihlawk theih loh avangin ka theih ang angin ka fangkuala, hna a awlsam zawk nan thla ka la kual nual bawk.

Rinpuia pa hi an khaw VC term li lai chelh tawh a ni a, din tawh loh a tum pawhin an khaw mi te zawkin a ngenin an ngen fo mai niin an sawi bawk.Ka hmuh tirh phat atangin mi tha leh Dik a ni ang tih ka hrethei nghal mai.An Hall sakna tur fund an hmuh zawng zawng te leh an hmanna zawng zawng pawh a duh duh en theih turin a dahchhuak zel mai bawk niin an sawi leh zel.

Dar 4 pelh hretah an khua ka chhuahsan leh a,awihawm loh khawpin khua a thiang nuam leh tawh.Hmanhmawh loin ka tlan a,thli thawin ka sam a rawn chhem len dar dar chu ka bengah ka zep a,kal lama ka huphurh ang aiin nuam ka ti ta zawk.Kha inneih sawmna avang khan chhungrilah thil hlui tamtak a lo lang ngei ang, Officeah khan awm ila chuan duh lo eng ang mahila ka ngaihtuah let ngei ngei dawn tih pawh ka hria.

Tunah chuan ani kha chu an chhungkaw sumdawnna,Apu atanga an chhawm kha tilian leh zualin Sumdawng lian leh hlun tak anni tawha, a hranpa taka hmelhriat lem lo pawn an dawr hming an hre fur thung ang.Mahse, zaithiam lar te ang em a mihriat hlawh erawh a ni hran lo.Mizo zingah sumdawng lian fe fe an ther fur tawha,anni pawh hi chutiang zingah chuan a hlun ber pawl anni a, mahse, a enkawltu ber nimahse amah tak aiin a Pu hmingin hriat a la hlawh zawk.

Kan inthen hnu khan Lehkhazir lamah ngawt ka rilru ka pe ta kha ania.Ka hlawhtling thawkhat,nuam ka tih ber hna ka thawk tawha.Chanmari ah Office ka neia, lian tak ni lo mahse keima pual a nih tlat avangin nuam ka ti tho.Ka nu leh pa hian min support tha em em bawk nen nuam ka ti takzet, mi hriat ka hlawh ve ta tial tiala, keimah maia tih a harsat tak hnuah ka Cousin in min rawn pui ve leha, a awlsam zawk nan midang hna enkawltu tur mipa vek 4 ka lak belh leh bawk.Rinpuia pawh hi chung zinga pakhat chu a ni bawk.Anni enkawlna hnuaiah hian hnathawktu,regular taka kan chhawr, Mistiri leh Helper kan nei bawka.An in sak dan tur ka Design sak mai bakah hnathawktu tur leh hmanrua zawng zawng nen ka pek theih avangin ka tan thil a awlsam lehzual.Chutih rualin kan bill erawh a sang thawkhat.Tunah May  thla chauh a la ni nangin tunkum bik atan chuan eng hna mah kan lak belh thei tawh lo.Vanneihna ropui  tak tih loh rual a ni lo.

Tuirial leiah ka tlan kaia,kawngsir rem laiah Motor ka hunga, Lei lamah ka phei leh rih,Fur a intan tawh nangin tui a tam hran lo.Ka hmuh thei chin,Lui luang kawi ngiai ngiai mai chu ka thlira, ka lu ka thing nawk a, Motor lam ka pan ta zawk.Ni e, Ka ngaihtuahna a mal ka intihna leh khawharna rawn lut tur ka hre lawk thei miau a.Hetiang taka ka hlawhtling tawh chung pawh hian ka hlawhtlinna min tawmpui tu atan ani kha ka la mamawh miau si alawm le.

Sana ka en a, Dar 5 leh a chanve a ri tep,khua a la thim lo nangin a thim har tawh lo ang tih a chiang.Muangchang lutuk loin ka tlan ta thung,ka thlen har chuan ka nu a lo mangang leh viau maithei, keimah in ka Longrun dawn tih pawh ka hrilh ngam lo kha nia.Fanu mal ka ni a, ka u te mipa hlir pathum an neih hnuah kei hi an fa atan min la a…Ni e…ka pianna nu leh pa ka hre lo..Ka mit ka chhing sawk mai..He thil vang hian a ni lawmni ka rilru hliam sak ka niha,ka damchhung daih tur natna ka pai tak..

Vawilehkhatah Motor a sawt tawka, a inphih leh nawka, a ri zui nghal bur bawk.Ka awmdan tak pawh ka hrechiang hman lo,ka lungphu rang nghal dawt dawt leh ka chhungrila hlauhna rawn awm vanga ka kut khur nghal dar dar chu ka hriat chhun a ni rih mai.

Ka hawi chhuaka, ngaiawh leh tumin thawk ka la vang vang bawk.Kawngkhar ka hawnga,khua a thim chhulh tawh,Kawngthlang lama tlak dal,Thira siam chu ka va su a lo ni a, Motor hmalam sawi deuh leh khuar duk chu lungawi lo zet hian ka en a,engvangin nge tiang khan ka awm?

Ka car ke ka biha,ka thaw hawk mai..A ke veilam a thep vek.Hei vang chiah hi anih hi..Ka phone ka phawrha, Signal a awm der lo.Atthlak  zetin a ke spare ka keng hek lo.Kengpawh ni ila keimah chuan ka thlak thei kher lo ang.

Ka kalsawna, phone ah signal a awm theih nan ka phone ka lek kang a, awmzia a awm lo.Motor lo kal nghah mai loh chu tih theih engmah ka nei lo.Motor lamah ka let leha,thu lut loin pawnah ka nghak ta ngawt.

Sana ka ena, Darkar chanve lai ka awmna ngaiah ka awm tawh, mahse motor pakhat pawh a lo la tlan lo.Ka ngaituah leta, Rinpuia te khua ka chhuahsan hnu khan Motor pahnih bak ka tawh awm ka hre miah lo.An sawi dan khan he kawng hi tunhma lam chuan  Tuirial thleng hi Metal a ni a, lun pawh a lun lem lo,Nikum lam atangin an siamtha a, Tuirial pelh phei hnu lam kawng pawh tunah chuan an metal tawh,mahse, Fur a intan tawh vang nge Kawng lun tak erawh a la ni ta chuang lo fo.Hei vang hi a ni ngei ang Rinpuia khan min ngaihtuah viau ni.

Khua a thim tawh bawk nen Beidawng zetin Motor ah ka lut a, Ka chhungte tal call thei ila a zia tur.Motor Light ka on a, Rannung hram chiah chiah bak engmah thawm dang hriattur a awm lo.Seat hnunglam ka nghenga, ka hlau hran hauh lo nangin ka beidawng titih.Naupangchhia ka ni tawh lo,Motor lah ka khalh tan atangin kum hnih a tling ve tawh,mahse, ka vawikhat Longrun na a ni a,hetiang thil hi a thleng ang tih reng reng ka lo ngaihtuah  phak lo.

Motor thawm niawm tak ka hriat rualin ka thu mar awka, Chhaklam ka hawi chho a, Motor Light niawm tak rawn eng deuh pap pap ka han hmu nghal chiah bawk,Ka chhuak nghala,tu pawh nise ka tih dina, an tanpuina ka dil ngei ngei angai.

Rei loteah kawngkawi atangin Motor a rawn lang zui ve mai,ka pen chhuaka, mahse, a tul lem lo.A rawn hnai zela, ka ban ka vai lauh lauh bawk.Gypsy  hlui tawh lam ani tih a Number plate lang thei atangin a hriat, a chhunga thu erawh ka hmu chiang thei lo.Min tlan pel hreta, a tlan tlang dawn emaw ka ti hman,mahse, ka Motor thlang deuh hlekah a ding ta hlauh.Misual a lo ni mai angem tih ka rilruah a lo lut zawka, ka pen tan tawh ka tim chawih mai.

Motor Engine a tih thih takah chuan a thim ngai te bawkin a thim leh nghal mup.Ka Motor lah ka lo off hman bawk nen..Motor kawngkhar a inhawng ri leh Inkhar leh dawt thawmah chuan ka tum loh tawpin ka phu zawk bawk.Torch Light engin min rawn chhuna,ka hmaiah tak a rawn chhun avangin ka mit hliah turin ka ban ka lek chho vat bawk.

‘Sorry, harsatna i tawk tihna ni em?” Mipa aw thum lam hian a tih ri ka hre zui nghal zat bawk.Amah mai nge ni a midang an tel pawh ka hre lo,mahse, ama thawm bak engmah thawm dang erawh a awm lo.Min pawngsual ta se….Ka lu ka thing nawk ringawt.

Ka ban ka dahthlaa, Torch Light en chunga min rawn pan hnai tu ruangam chu chiang lo ruaiin ka hmu theia, Light ka lam hawi zawnga keng anih avangin a hmel ka hmu thei lo,mahse, a sang thawkhat tih erawh ka hrethei  tho.

‘Aw, ka Motor ke hi a puncture a,bakah tlak dal thir an kham hi ka su bawka’ ka ti halha, ka kut ka kuangkuah zui than  bawk.

‘A engine lam effect a neih hmel em?” min rawn si lo chauh.

‘Engine lam chu a tha in ka hria,mahse, a ke ber a chhiat avangin ka back ngam lo’ ka tawlhsawn hrat bawk.Min rawn kal pel thuaka,Motor chhung lam a en kual leh pup pupa, ka Chahbi khai a hmuh rualin a On a, a Head light a on nghal bawk.Hmalam chauh eng nimahse tlemin a zia ta thung.

Motor hmalamah a kal kuala, a ke en tuma a kun hniam chiah chuan a hmel ka hmu chiang  thei ta chauh.Rei vakloah a rawn ding chhuak leha, min rawn en a.

‘A spare i pai em?”

‘Aih…chutak chu ania ka buaina’

‘Anih chuan i chhungte emaw thian…tupawh,i call duh chuan?”

‘Oh, duh tehreng mai,mahse tah hian Signal ka nei miah lo’

‘Nia, ka sawi tum chiah min sawi khalha,Signal nei tur chuan i kal hlat deuh ala ngai ang’

‘Maw?” ka ti ringawt.Engtin nge Signal awm loh thu sawi a tum ngawt theih?

‘Khilai chhak lawkah khian Huan pakhat a awma,tah chuan Signal a awm ang,i duh chuan min zui thei a’a ti awlsam leh mai.

‘Mahse…tu nge i nih ka hre si lo..’

‘Ahh, nitak..engpawh nise tanpui che ka tum mai ania, min zui dawn nge dawn lo?” Pawisak nei lo hmel zet hian a ti awlsam leh mai.

‘Sorry..Duhthlan tur ka nei chuang lo a’ ka ti leh hram.

Motor lam panin kan inzui thla a, ka chuang lut tur erawh ka tim leh titih.Mahse, ka chhungte ka biak ngei ngei angai, mi dik lo leh hlauhawm anih loh hram nan ka Tawngtai ru ta zawk.Motor a turn pawpa,a Motor han khawih vel a hnehsawh ngang mai.A lo tlan na lamah kan tlan chho leha,ka ngaihtuahnaah thil a lo lang zawk.

‘I kal tumna i thulh phah ang tih ka hlau hle mai’ ka ti a.

‘Um,nia…thulh.Mahse, a pawimawh hran lo’

‘A pawi ka ti..’

‘Uh….i thiamloh pawh a ni hran lo’ a ti leh mai.Eng ang mizia nge a neih hre turin ka la hrechiang lo nasa, mahse, Pa nelawm tak erawh a ni lo hmel, chumai bakah a ngaihsam viau in ka ring nghal hmak.

A chhak lawk a ti nangin Minute nga vel lai kan tlan leh,ke chuan lo han kal thlen mai a harsa deuh ang,Kawng atangin Dinglamah kan penga,thir Gate lian zet a lo awma, a chhuka, a va hawnga, a rawn let leha, a chevel chuan ka tum loh tawpin Rosanga min hriatchhuah tir ta tlat.An lian ve ve tih mai loh chu in anna reng reng an nei der lo thung.

Kan tlanluta, chhuk mai loin ka hawi kual leh rih.Kan hma zawnah chuan In pakhat a dinga, Bakah kawtzawl lang thei chin pawh a zau tha,Light eng tha zet hian a chhun eng pup bawk.

‘Lo chhuk la…’ a rawn dak leha, a chhuk lai pawh ka lo hre lo.

Kawngkhar ka nem hawnga, In lam pana a kal chu ka zui dat dat ringawt,ka hawi kuala, a sir kil lamah chuan Bolero pakhat a dinga, Scooty var ka hmu thei bawk.Huan enkawltu atana an dah a ni phawt ang.Tun ang laiah chuan huan nei tha deuh te chuan Enkawltu rinawm tak tak an dah deuh vek tawh.Keini pawn Kum hmasa lam atang khan kan Huanah Khawchhak lam chhungkaw pakhat kan dah ve bawk.

Ka phone ka phawrha,a sawi ang ngeiin Signal a lo awm ta ngei,Ka nu ka call nghala, min hau nasa dawn tih hrereng mah ila ani aia biak hmasak duh zawk ka nei chuang lo.

‘Naute...i va lo haw har ve’ Hello pawh ti loin a pick veleh a rawn ti nghal.

‘Nia,Nu...englo ania,vawiinah Rinpuia te khuaah hna enin ka kala,chuan....’ ka ti hman chauha, a rawn vin thak chuan min ti tawp leh rih.

‘Enga?! Engthil atthlak nge i tih a?” a lungawiloh zia a hriattheih.

‘Engmah ka ti hran lo,hna ania, i hria lawm.Mahse, tunah hian ka Motor ke a chhiaa, kal luih ngaihna a awm si lo a’

Ka hria,hna chu a ni ngei ang, ka sawi tum zawk chu nangmah in i kal lo ang tih i sawi ka beisei a’

‘Aih,keimahin...’

‘LALPA le(h)..’ a thaw hak ri ka hrethei.A hmel hmu thei ila chuan thinrim zet,huatna tel si loin min melh leh reng bawk ang tih ka chiang.

‘Mama te an awm em?” a thinrimna ka haider lui.

‘Awm,an awm vek, Khawiah nge tunah khan i awm?” thinrimna ai chuan hlauhthawnna lam a ri ta zawk.

‘Ka hre mai lo,Tuirial chu ka rawn pel chho tawha, mahse, ka kalna lam hi kawng thar ania, ka awmna lai ka hre mai lo.Chuan, tunah hian huan pakhatah ka awm meka...’

‘Mi awm an awm em?”

‘Aw.awm e..’

‘Zawt nghal rawh, awmve khan a hmun hming chu a hria ang chu..vat in..’

Ka hawi kuala, min hruai tupain Veranda atanga inkuangkuah meuh a min lo thlir vung vung chu ka va hmu a,Light engin a chhun fuh lo nge a inpetruh teuh nimaiin ka hria.Thinrim hmel a pu deuh bawk,engvanga thinrim ngawt nge ka hre der lo thung.

‘Thianpa..oh..Ka pu,he lai  hmun hi enge a hming?” ka ti a, a hmui hnuailam a petsawi zauh chu a ngaihna hre lo zet hian ka melh reng ringawt.

‘RTS Farm ti la..’

RTS Farm...khawiah emaw chuan ka hre tawh tlata hriatna ka nei.Ok,engpawhnise a hmun hming ka hre tawh emaw hre lo emaw tunah chuan Ka nu hnenah ka awmna ka hrilh nghal a tul ber zawk.