REVEUSE - 18

CHAPTER- 18

Min thing leh nawka,chet mai nachang ka la hre chuang lo,ka rilru a buai vek zawk,hlauhna leh manganna a inkawp vek bawk,tiang khawpa a thinrim hi a chhan ka hre hek lo, Jeffrey-a ruala ka kal vanga thinrim anih chuan enge a chhan ni ang? A ruala ka kal vangin engmah thil tha lo ka ti a ni chuang si lo.

Ka mit ka chhinga, ka rilru buai nuaih nuaih tihfim ka tuma,huaisenna tlem la neih pawh a bo mai loh nan ka chet angai.Ka rilruah ka lo ngaihtuah phak ngai miah loh a lo lang ta tlat bawk,duh chuan sawi mai rawhse, he thil vanga ka nun hrehawm rukna hi duh leh mi zawng zawngin hria ang hmiang, ka hahdam zawk mah maithei asin.Chuan,he Ramhuai lakah pawh hian engmah ka hlauh angai tawh lo anga, ka zalen mai ang chu.zalen...chu erawh ama lakah chauh a ni ang,kha thil thleng kha a bul atangin kan tharthawh leh dawn tihna nimai.

Ka mengchhuaka, a hmel chang leh rum ul mai chu ka ena, ka hlauhna hnawhbo tumin ka kut ka humruh tlat bawk.

‘I kut la sawn rawh’ ka ti chhuak sap bawk.

‘Engmaw?!’ mak tihna a awah a hriattheih bawk.

‘I kut hi lasawn rawh,paihsawn sak kher che ka duh lo ania’ ka ti leh hmaka, a hma ai chuan tlemin ka inringtawk ta zawk.

‘Ka sawi kha i hria em? I duh duha awmthei emaw inti suh’ a ti hmuka, mahse  hma ai chuan a zia ta deuh.

Ka che ta phat, a kut ka paihsak sawka,ka inkuangkuah zui leh than bawk,ka chetdan tehthut chuan a barakhaih niawm tak hian  engmah ti loin a din ngaiin a ding mar uta, min melh reng bawk.

‘I sawi duh phawt chuan sawi ta che,i duh duhna hmunah va sawi kual rawh,ka hlau tih i hriat avangin min nei lui tawha, engmah hi hlauh ka nei hleinem,i nupui nitura ka remtih hnu atang khan Mihring ka nihna pawh a bo vek tawh,engmah thlakhlelh tur chuang ka nei lo.Thih leh dam engmah a danglam lo ka tihna anih chu..’ ka ti ta duah, ka sawi hnem bawka, ka sawi zawh rualin ka thaw hak mai.Ka hlauh rukna kha a reh nghal hawk bawk.

‘I chiang chiah maw?” a ti leh supa, ani leh ni lo ang takin a inringtawk lo ni a hriatna ka nei.Mahse, a hmel chang zet chuan ka hresual a ni tih min hriattir lehnghal tho.Mahni inthiam lo chungin hetiang hmel tuman an pu hauh lo ang.

‘Chiang lutuk mah mah zawk, va kal la..Pawnah nge Living Room lamah zawk i sawi hmasak ang? Ka nupui hian a tleirawl laiin mi a thata,chumi hmang chuan a duh lo chung ka nei lui te va ti la.....’ ngeiawm zetin ka nui lui hak bawk.

‘I ngawi thei tawh em?”

‘Ngawi turin min duh tihna ni em?” ka ti ve thung.

‘I ngawih a that ka ring’ a ti leh supa, a inhera, Sofaah bawk a thu thla hnawka, a hmai a hup zui daih bawk.

‘He thil vang hian min vaua,ka duh lo chung i nupui ka ni tawh, khawngaihin duhtawk tawh rawh,tumah i ti na lo,nangmah bawk ania i intih nat ni.I nupui hi kha thil vang khan man tawk emaw hmingchhe takin ka awm anih pawhin i duh emaw duh lo emaw i tuar tho tho dawn..’

‘Enge i duh?” min rawn en a..

‘Maw?”

‘Enge i duh?” a ti nawn leh sup.

‘Ka thil duh min zawt dawn anih chuan then che ka duh’

‘Aih, chumi lo thildang’

‘Ka awmdan engmah sawisel suh, Nupa lem mai mai kan nihna ang chiah hian a lem nih ka duh ber,ka thiltih engmah sawisel lo la,keipawn engpawh ti la ka sawisel lo ang..chuan min vau tawh suh’ ka ti a, ka kut ka kuangkuah at bawk.

‘Ok, a tha alawm,naktukah ka pa ka lo bia anga, ka Inah kan insawnchhuak dawn nia,hetah chuan engmah i duh dan angin a kal thei dawn lo,sawtah chuan Room hran kan hmang thei anga,i duh duh i ti thei bawk ang’ a ti a, a awki nghet charh maiah chuan a ti ngei ang tih ka ring nghal thlap, mak takin khatianga thil a sawi tawh kha chuan ka chhungril hian a ti ngei dawn tih a ring hmiah zela, a ti ngei zel bawk.

Ni e, Indangah awm ila kan pahnih tan pawh a tha zawk ang.Fapa naupang zawk nimahse a mahin In a nei hrana, engtikah emaw chuan kan kal ala ngai ngei ngei dawn tih ka hriat ang bawkin an vaiin an hre vek,a hma an ti deuh anih pawhin Abel-a duhdan anih tlat avangin a Pa hnen atangin hnialna engmah a awm lo ang.

Ka hnar rawn za mer mer ka hriat takah chuan engmah sawi loin Bathroom ka pan rawk rawk mai,diktak chuan a bulah ka awm chuan min tanpui ngei dawna, kha kha ka duh lo bur.A tanpui ngai nih ka duh lo.

‘I tha em?” kawngkhar rawn kik pahin a rawn ti ta chiah,thei leh thei loin Tap ka bana, ka herhhawa,ka chet zawngin ka ka lamah a lut thlaa, ka uak thata, ka khu zui bawrh bawrh bawk.

‘Rawn hawng rawh...’ a hma aia nain a rawn kik leha, a chum zawk pawh a nimaithei,a sawi anga tih erawh tumna ka nei lo,Bathtub tlangah ka tukhum lam ka nghata, ka ka chhung lama a rawn luh belh leh hlauin ka daka,nidang ang bawkin ka lu a haia, ka mit a vai chum chum bawk.

Kawngkhar ri bur leh Abel-a rawn tlan lut chu chiang lo ruaiin ka hmu a,mahse lo hnial turin chakna ka nei eih lo.Ka zawi ngawih ngawiha, muthilh ka chak hluah hluah bawk.

‘I tha vek ang,hahdam rawh..um,hahdam rawh.I bulah ka awm ania’ ka beng bulah a rawn ti a, chupawh hla taka mi angin ka hre tlat bawk.

Min rawn kuaha, bang nghengin a thu sawp nge pawh ka hre lo,a malchungah ka thu a, a darah ka tukkhum ka daha,amah ka hnar a rawn hup chu thei leh thei loin han paih sawn ka tuma, mahse,ka hlawhchham..

‘Muhil suh,Hon...khawngahin..intiharh hram hram teh..’ a ti leh a, ka phu deuh zawk nangin rei a ni lo...A thim riai riaia, engkim a bo ta vek zawk.

Enge min ti harh tu hre si loin chiang zetin ka harh zawk,rang zeta thutchhuah ka tum chu tuemaw in ka kut a vuan tih ka hriat rualin ka thulh lehnghala, muangchangin ka mu thla leh a,ka kut vuantu lam ka hawi ta zawk.

Khawvar tan tir,eng deuh ruaiah chuan a hmel a langchiang vak lo,a muttui hmel viau,ka kut zungtang karah a kut a rawlha, a awm chungah a pawt phei daih bawk,Nizan thil thleng kha hriatchhuah tumin ka mit ka chhinga,engmah hriatchhuah ka nei lem hlei lo.Abel-a hian min buaipui hle tih bak engmah ka hre lo.Nasa takin kan inhaua, Minute reilote lekah nasa takin min buaipui ta thung.Nizan khan Abel-a hi ka bul hnaiah awm lo ta se engtin nge ka awm ang ka hre lo..

Khum che datah ka harh leha, ka lo muhil leh daih chu niin,Abel-a mutna lam ka hawi vata, a lo ruak vek tawh,Sana ka ena,dar 8 a kawk va tawh.

‘Good Morning..’ aw ka hriat rualin rang zetin ka inlet lehnghal a,Abel-a min lo thlir reng tih ka hmu nghal zat bawk.

‘Morning...’ tih pahin thawhchhuah ka tuma, a che vuta,min rawn ban nghal a,Mahse, a kut rawn pharchhuah chu ka hmu lo der hmiah thung.

‘Enge i an?”

‘Ka tha,chuan nizan vang khan lawmthu ka hrilh che i ring anih chuan ka tum lem lo ania’ ka ti leh duah.

A ding mara, hriatthiam har zet hian min en a,ka beisei loh zetin a nui chhuak hawk mai,a awmdan chuan min ti hrilhhai letling viau bawk.

‘Enge nuih tur awm a?”

‘Engmah,i huaisen reuh lutuk hi i lawmawm’

‘Nia, ka huai viau ania’ ka ti salha, khum atangin ka chhuka,diktak chuan nizan thil thleng kha hriat ka duh lutuk mah mah zawk.Engtin nge ka awm zui tak zel tih te pawh...Mahse, zawh ka tum bau lo.

‘Abel...’ a hming hian ka ko khat viau.A chhan ka hriat chiah si loh hian ka koh dawn hian ka tim tlat zel.

‘Um...’

‘Nizan chungchang kha...’

‘Engmah thleng vak a awm lo,i chau satliah anih kha, zan hmasa i mut that loh vang anih ka ring..’ a ti supa, ani lo ang takin a awki a zangkhai vuh bawk.

‘Aih, chulam ka sawi tum a ni lo..’

‘Maw?” mak tih hmel zet hian a ti hu..

‘In hran luah chungchang kha...’

‘Oh..nia,ka pa ka be tawh,Mondayah kan insawn lut dawn nia’

‘A va awlsam angreng ve’

‘Awlsam...nia,ka duh chu ka ti ziah thin tih an hriaa, inhnial vak na tur a awm lo’ a ti awlsam leh mai.

‘Mampuii’n engtin nge angaih a?” ka insum hman lo,a hmel danglam zawk chu rei lo teh mahse ka hmu hman tho.

‘Ani ai chuan i ngaihdan kha a pawimawh zawk’ awih lo lutuk hian ka ena, mahse a hmel a engmah langchhuak loin min ena, a inkuangkuah thun bawk.

‘Ka bulah chuan lemchan i mamawh lo ania...’ ka ti ta nge nge.

‘Eng lemchan mah a awm lo’

‘Nia, kan Inneihna chauh lo hi chu’ ka lo tihzawm vat bawk.

‘Aih, hei pawh hi a lem a awm lo,i duh lo chung ka nei lui mai zawk che, a lem erawh a ni lo..’

‘Wow,a va ropui ve,Cindrella ang mai ka nih chu...’ ka ti halha, ka ner lui nak bawk.

‘Chu erawh a ni chiah lo,chuan...thil dang,min lo hnial lo la,chumi tichiang tur chuan fa ka duh ania,bakah kha Tuai kha i bulah hmuh tawh loh ka duh,abak chu engpawh i ti thei..’

‘Min vau tihna a ni em??”

‘Aih,Pasal ka nih angin ka duhdan ka sawi, i duh dan han sawi ve la....’ a ti leh supa, angaihna hre lo zetin ka ena, a thinrim duh hauh lo,engemaw a hriat hrep ni..Ka lu ka thinga, beidawng thinrim ru zetin ka nui ta ngawt.

‘Intifai la,thil eiturin ka lo nghak ang che’ a ti leh supa, ka inrin hmain ka Samah a rawn fawp zauha,a dingmar lehnghala..Room a chhuahsan thlengin ka awmdan ngaiin ka awma, diktak chuan a chet dan khan min ti khawng lo chauh chu a ni ber e.

Nizan khan ‘Hon’ tiin min ko tih ka hrechhuak leha,min buaipui lai khan a ti der hmel miah loh,a awah khan min duatna ri niawm tak a hriattel theih hial zawk,tukin a awmdan zawng zawng nen khan a mak vel vek,mahse Ngatinge Jeffrey-a hi a huat tlat ka hrethiam lo,Ni lo.Marcus-a bulah ka awm a phal miah lo bawk.Engemaw a hriat hrep ni? Amahah hian dik lo a awm zawk nge a lo thik zawk? Ka nui chhuak hak mai.Engvangmahin a thik dawn lo lutuk tlat.

‘Abel-a khan a ma In lamah in awmdawn a ti a,ngati teh thut nge?’ ka nuin Thingpui rawn dah pahin a ti a.

‘Nia, kan insawn ang’ ka ti liam puat, Thingpui ka bana,Abel-a leh ka pa te ho Living room lamah an awm thung.

‘Ngatinge ka tia lawm mawle,In ineihna pawh a la rei lo a, Inah buaina in nei ami?” a ti leh a.

‘Aih, teuh lo mai..’

‘Engemaw i hriat le? Zep nei tun angin ka hmu che ania’ a ti leh a, min en reng bawk.

‘Engmah ka zep lo,Abel-a te chuan kan inneih hma atang in ama Pual In a nei tih i hriat ve reng kha,bakah amah bawkin Sumdawnna hran a neia, keini kan Indan mai a awlsam alawm’ ka ti ta duah, Thingpui sa zet chu ka dawt hlak bawk.

‘Chu pawhnise a la hma em alawm’ a ti leh talh.

‘Hma chuang nang, indan dawn chuan tih fel hma a tha zawk alawm’ ka ti awlsam leh mai,diktak chuan ka nu hi ka bum hleithei lo thina, tun tumah pawh hian a mitah tak ka en ngam lo.

‘A tha lawm,i nu leh pa phalna thlap anih te chuan ‘ a ti leh fo.A rilru a la hmin chiah lo tih a chiang.

‘Phal e,engmah harsatna an nei lo..’

‘Um, mahse a fal deuh em maia,i awm ngam dawn ami?”  a ti leh a.

‘Abel-an Security tur a ruai alawm,kan awm hma atangin an awm tawh zawka, bakah chhungkaw pakhat,In vel enkawltu ang deuh,In tifai vel tur kan nei dawn bawka, an awmna tur pawh a sa tel nghal vek alawm’ ka ti ta duah,a rilru nawm na tur anih chuan a vaiin ka hrilh law law a tha ber.

Ka nu teinah chaw kan ei nghala, nidanga ka la hmuh ngai loh tawp ang bawkin Abel-a a khawsa zui zel,ka u te pahnih nen football chanchin tui zetin an sawi ho a,a hnu lawkah sumdawnna lamah an pakaia,a hmel a dam thluama, tihmawh leh induh zet, chapo leh midang te chak lohna hmang tangkaia vau thin kha chu bo hneh tak hi a ni ringawt.Ka chhungte lah hian a rilru chhungril hre hauh loin an rilru zawng zawngin an pawm hmiah mai bawk.

‘Naktuk chu min puitu tur kan mamawh angem?’ ka nu tein atangin In lam kan pan meka,mutchhuakin min zema, ka ham zui bai bai bawk.

‘Farm lam ami ho an awm ang, bakah i thawmhnaw leh ka thawmhnaw a ni deuh mai dawna’ a ti a.A sawi dik, inchhung bungrua engmah ken ngai a awm lo.

‘Ok,a tha lawm..’ ka ti satliah..Kan insawn dawn tih ka nu leh ka pa a hrilh laiin ka awm ve lem lo a,mahse ka pain Zing chaw kan ei laiin a sawi chhuaka, a sawi danah an rilru a na emaw an lungawi lo hran lo tih a lang theia, an beisei sa reng zawk a thleng nimaiin a lang zawk.

‘Thil ka zawt thei che em?” ka ti sapa, pawm lam ka hawia, thli thawin ka sam a chhem leng dar dara, favang boruak a ni tawh bawka, kawr ban nei lo ka ha nangin a nuam tawk viau tho.

‘Han sawi la...’ a ti tha ve mai bawk.

‘I u nen hian engmah inmil lohna in neih awm ka hre si lo a,nangmah hian Mampuii nen in inkara a tlak zeh vangin i hua tih a ni em?”  ka sawi zawh rualin ka sawi loh tur ka sawi niin ka inhre leh hnuhnawh.

‘Chhang lo che ila pawi i ti angem?”

‘Aw,pawi ka tih ka ring’ a aw dam thlup chuan thil pawi lutuk ka sawi lo angin min ngaih tir leh lawi.

‘Kan inkarah a tla zep hran lo,anihna takah chuan ka u hian ka nu Hmangaihna min chhuhsak vangin ka hua..’

‘Oh..Abel..’ ka beisei loh lutuk a sawi takah chuan ka ti chhuak halh mai.

‘A pawi lo, tunah chuan tumah ka mamawh tawh hleinem,ka bulah i awm bawka’ a ti leh supa, min rawn en thuta, ka lo en reng bawk si nen kan mit a intawng siah, rang zetin ka hawi sawn nghal vat bawk.

Chawhnu lamah kan inthiar lut kim titih,ka nu leh pa bakah Marcus-a te nupa leh Abel-a nu leh pa an awm bawka, kan vaiin kan In tharah chaw kan eia, kan ri mam mam mai,Aizawl atanga hla tak ni lo mahse a hmun a fala, kan awmna piah deuh,minute 5 kal velah keini ang bawk hi Chhungkaw dang an awm vea, nakinah chuan hmun lun tak pawh a la ni maithei, mahse tunah rih chuan a reh tha viau,kan In hi kawngpui atangin a peng leh a,Tlang angreng deuh,a chung zawlah kan awma, mahse kawngpui atangin sang tak tih tur a ni lo.Kawngpui hian Aizawl veng thenkhat,tlem a chuan hnuai lam a paltlang titiha,a khat tawkin Motor tlan an awm ve reng bawk.

‘I room bul chiah hi ka hmang dawna, min mamawh chuan min ko mai dawn nia’ Abel-an a ti supa.

‘Um’ ka ti ringawt.

An haw zawh tak diakah chuan a reh ta raih,kan in atanga reilote,minute khat vel lek kalah In enkawltu te awmna a awma, Nupa rek anni a, an fel viau,Security tur mi pathum a ruai tela,anni bakah Driver room tur a awm tel bawk.

Kawngkhar ka check fela, Roomah muangchangin ka chho a, tunah chuan kan pahnih chauh kan ni ta a,diktak chuan nimin leh vawiin hian ka hriat thin Abel-a kha a bo hmiah, a dam thluama, min ngaihven viau bawk.Mahse, min ngaihven huam hi ka duh hauh lo,a mize pangngai, sual tak kha ni sela, ka tan engkim a awlsam zawk.Midang tel miah lo a khawsa dun tur kan ni a, ngainat mai palh ka hlau zek zek.