REVEUSE - 19

CHAPTER- 19

Ri deuh burah ka harha,ka thu chhuak nghal vat bawk.Kan awm hran atangin karkhat a tling tawha, Ruati te nupa an awm ve deuh reng nangin zan lamah kan pahnih chauhin kan awm thin thung,mahse a tlangpuiin Room lamah kan awm tam zawk ve ve.

A ri  ka hre leh,Kawngkhar dimte a khar ri a ang,tu nge ni ta ang? Abel-a a zin a, tunge tun ang hunah thawm nei tur ka hrethiam lo,dim taka kal ri ka hre leha,ka mur ar ar bawk.Stepa rawn kal chho ri ka hre leha,Step hi thing anih avangin dim deuh pawn kal se ri hriat a har lo.Ruati te nupa riahpui tura min tih laia ka hnial kha ka inchhir ta viau bawk.

Dimtein khum atangin ka chhuka,Room kawngkhar a rawn hawn ruala vaw mai thei turin hmanrua ka ngaihtuaha,ka thawmhnaw dahna bula Nihliap ka khai ka hrechhuak nghal,Light ka on ngam si lo,ka indap pheia,ka lak  rualin nghet zetin ka hum nghal bawk,Kawngkhar bulah ka ding a,ka tiril khur dar dar chu thunun ka tuma, mahse ka beidawng titih.

Pen ri rawn hnai tial tial chu ka ngaithla kara, thawm a dim viau tih a hriat theih,ka Room kawngkhar zawnah a tawp ta chat, thawk pawh ka thaw tha ngam lo.Reivak lo a reh hnuah pen thawm bawk a awm leha, Abel-a room lam a pan nimaiin ka hria,engtin nge ka tih ang? Abel-a a awm lo tih a hriat rualin ka Room lamah a rawn kal leh tho ang..

Abel-a Room leh ka Room inkarah thutkhawmna hmun,lian lo te a awm a,ka mut dawn khan Light ka Off then hlawm nangin Dul deuh hlek pakhat erawh ka off lo tih ka hria,Dim thei ang berin Kawngkhar ka hawnga,ka dak chhuaka, Abel-a Room kawngkhar rawn  inkhar ka va hmu hman chiah.Enge ka tih ang? A lo chhuah leh hma ngeiin a Room kawngkhar pawn lamah ka lo va din hman angai,ke lawngin ka kal phei them thema,Room kawngka bulah ka ding ta than,vaw mai thei turin ka Nihliap ken ka lek kang sa a,tumah an awm lo tih a hmuh rualin a rawn chhuak ang, chumi rual chuan Dim map loin ka hlap nghek mai ang.

Ka rin aiin a rei ta hrep,kan mu hrang tih an hriat lohna turin Abel-a Roomah hian engmah a awm lem lo,a thawmhnaw tam zawk leh a thil pawimawh pawh ka Roomah a awm deuh vek.Kawngkharah ka beng ka ti si a,thawm ka ngaithlaa,a reh thiap mai.

Nem hawn mai tumin ka kut ka lek kanga,mahse, thawm ka hre leh lawi,rang lutukin ka Dinna pangngaiah ka ding leha,vaw mai thei turin ka Nihliap ken ka lek kang nghal bawk.

Ka ding fel hman awrh tihin a rawn inhawnga, Min kal pelh rualin ka hlap nghal pawp bawk,a rum hawk ri ka hrethei,ka vaw nawn leha,a rem lai laiah ka hlap pawp pawp a ni ber.

‘Engemaw i tih le? Tawp teh...’ Abel-a awin a tih ka hriat rualin ka tawp nghal hmak.

‘Nang...ngatinge?” ka ti lawi rat ringawt.

‘Aw, keimah..’

‘Rukru emaw ka ti che a...’ ka hlauhthawn zia ka ngaihtuah leta, ka thinrim teuh bawk.

‘Sorry,tih harh che ka hlaua, ka ti harh tho che anih hi a’ a ti supa.Light hliah zawng deuha a din avangin a hmel ka hmuchiang thei lo,a thinrim em pawh ka hre lo.

‘I lo haw tur engmah i sawi lo a...min ti hlau alawm’ ka ti leh nghek..

‘Ka rawn call chea, i pick lo a...engpawhnise a tha vek e,chuan,Security Gateah a awm renga, engtin nge lo luhruk theih i rin a?’ a ti leha, a sawi dik chiah..Mahse, khati taka thawm a dim avang leh a zin miau avangin ka indem lutuk lem lo.

‘Ka hria, mahse i thawm i dim lutuka,bakah i Motor thawm pawh ka hre lo a’ ka ti leh nghat ringawt.

‘Oh..ka thiam loh a ni e,engpawhnise i kut thlak a na viau ania’ a nui a.Ka hmai a sa hat hat thung.

‘Chaw i ei tawh em?’ nuam lo ti zetin ka ti ta ngawt.

‘Um,kawngah ka rawn ei a.Ka tum aiin ka tifel hma leh sia..’ a ti tha ve mai, a lu a tuai vut vut bawk.

‘I na viau tak tak em?”

‘Rawn en chiang la...’

‘Aih,ka tihpalh anih kha,mahse...i thiam loh ka ti tho tho’ ka ti leh talh.

‘Ok, ka pawm e..Mu leh tawh la..’

‘Um, mangtha’ tih pahin Room lam ka pana,kawngkhar ka hawnga, ka luh fel veleh a lo luh ve hlau niawm takin ka kalh nghal hmak bawk.

Ka muhil thei ta lawk lo,kan awmhran hnu ka ngaihtuaha, kan pahnih chauha awm tak rengah chuan kan inpawh ve tial tiala, tha taka titi dun tum pawh kan nei ta zauh zauh,mahse min khawih emaw min hnaih hrim hrim tumna a nei ngai lo.Tlai tin dar 7 hmain a lo haw ziaha,kei erawh dar 6ah te ka thleng tlangpui,tha takin kan inbiaa,kan titi a..Nupa ang ni loin thiandun a In inluah tawm kan ang zawk mah.Kan indan dawn khan fa neih a duh tih min hrilha,mahse chutiang lam hawiin min beisei hauh lo.Min en danah Hmeichhia ang niloin Mipa angin min en zawk mahin ka hria.Thawveng hawk awm tak ka nih laiin ka thawveng phah hauh lo.Diktak chuan Awmtei te nupa ka awh ngawih ngawih tum a tam tial tial zawk.

‘Thil ka dil duh che a’ chaw kan ei laiin ka ti a.

‘Sawi la..’ a ti tha ve mai.A thil ei lai chauh ngaihtuah niawm takin a ei zawm mawlh mawlh bawk.

‘Tlaiah ka thiante’n chaw an rawn ei duha,Prog dang duan lawk sa i nei em?”

‘Aih,nei hran lo..lo ei se la..’

‘Um,anih chuan i lo haw hma thei angem?’ ka ti leha.Ruati Kitchen lamah a ri rak rak renga, kan tawng a hre phak tih ka hre ve ve.

‘Haw hma tura min duh chuan ka lo haw hma thei,min duh lem loh chuan an haw hnuah pawh ka lo haw thei tho a..’

‘I awm ve chuan nuam an ti zawkin ka ring’

‘Ok,chuti chu haw hma ka lo tum dawn nia’ a ti a,

Diktak chuan ka sawi tum tak ka sawi hauh lo.Ka thiante tih khan Office lama ka thawhpuite ho anni a,Jeffrey-a a tel ve dawn bawk.Ka sawm hauh lo nangin nimina kan sawi lai khan a awm vea,Awmtei leh Diki’n an sawm tel ve nghala, ka tan lo hnial kha thil mawi a ni lo.Abel-an hmuh a duh hauh lo nangin ka sawm tel ta tho,a sawi ang em kha chuan a huat ka ring hek lo.Kan inneih hma daihin an inhre tawh sa a,an pahnih inkarah inhuatna chhan tur tha tak an lo nei anih chuan kha chu an pahnih inkar a ni a, ka buaina a ni lo.Bakah min vau na kha ka hlau miah lo tih a hriat takah kha chuan min vau nawn leh ka ring tawh hek lo.

Keiman engkim siam ka duh avangin ka haw hmaa,Awmtei leh an pa an lo kal rual anga, midang erawh chu a hu hoin an lo kal mai turah ka ngai thung,Jeffrey-a erawh engmah a rawn sawi lem lo bawka ka be ta lo,a lo kal ve mai turah ka ngai ngawt.

‘Abel-a a lo haw hma thei dawn em?’ Awmte-in a ti a,ka bu ringawt,

An naute hi thla li vel chauh a la ni a, mahse a hrisel thaa,a chum em em bawk,ka rin ai takin a chhuahpui nasa chung hian a dam lo meuh lo.

‘Midang ho hi lo thleng hma se ka ti,haw tlai lutuk chu a buaithlak a..ee,Mampuii kha a rai tawh em?” a ti leha.

‘Rai awm pawh ka hre lo’

‘Enteh,.....’ a ti a, Living room lam a en leh rih,kan pahnih chauhin kan awma, thuruk sawi tum a ang viau.

‘Ka en che...’ ka nui a.

‘Kan pa hian a sawia, Abel-a leh Mampuii hi an inkawp thin a ti a’ a sawi zawi ngang mai.

‘A sawi dik anih chu..’

‘I va ngai awlsam em em...’ a ti hlaka, min melh danah mi a melhin min melh a ni ber.

‘Tu pawn hun kal tawh kan nei vek alawm,ka ngaipawimawh lo’ ka ti awlsam leh mai,diktak chuan ka ngaipawimawh lutuk,chuvanga he Inneihna hian min phuar anih hi ti a au khum nghek ka chak hluah hluah.

‘Chutianga i ngaih theih chuan a tha lawm, mahse...ih,In indang hma bawk sia, engemaw Problem in neih ka lo hlaua’ a ti leh sep.A sawi dik lo hauh lo,tu te pawn an rin dan a ni vek ang,Awmtei ang hian min hrilh ngam lo mai zawk.

‘Kan Inneih hma khan kan Inneih hunah tah hian kan awm dawn tih Abel-an a nu leh pa a hrilh lawk alawm,bakah Abel-a hian sumdawnna hran a neia, an Family ta hi a u in a enkawla, engmah kan ta tur a awm hleinem’ ka nu bula ka sawi ang chiah ka sawi leh.

‘Um, chutiang zawng chuan a dik tho mai..aaa, tul loah ka lo buai mai mai niin ka hre ta,enteh, In inneih dawn atang khan ka hriatthiam chiah si loh hian ka hlauthawng tlata,mahse, Abel-a awmdan ka en hian engmah hlauhthawn tur awmin ka hre vak lo..A en danah che hian a duh zia che a hriat veka’ a ti leh duah,kei erawh awih lo lutukin ka nui hak thung.

Muana te ho an lo thleng ruala,a hnu lawkah Jeffrey-a leh Diki an lo thleng veleh,kan awmkhawm takah chuan kan ri ta laih laih,mahse ka chhungrilah nuam tih lohnain min thama, Abel-a lo haw hunah Jeffrey-a a hmu ngei ngei dawn,kan boruak pangngai taka kal mek hi ka sawm ve vangin a chhe vek ang tih ka hlau viau,Pahnih chauha khawsa kan ni a, in mil lo reng renga khawsak chu ka thil chak zawng a ni lo.

‘Mat...i phone kha a ri char char ania’ Awmtei’n a rawn ti a, ka lo inngaihtuah nasa lutuka, ka phone ri ka lo hre pek lo.

Ka en vata, Abel-a a lo la ni zui.Pawn lam ka pana,pawn ka thlen hnuah ka pick ta chauh.

‘Hello..’

‘Ka lo haw hma thei dawn lo a,i lawm lo viau em?” a rawn ti nghal a,ka then sak ringawt.Ka lawmna ngai pawimawh ber te pawh a ang alawm mawle.

‘Lawm lo viau lo e,mahse hna lamah buaina a awm ami?”

‘Um,mahse buaina chhete,ka tlai over lo ang...’

‘Ok,nia..a pawi lo..chawei turin ka lo nghak dawn che em?”

‘Ngai lo mai rawhse, i thiante an awm bawka..’

‘Um...i tlai viau dawn chuan lo sawi leh la..’

‘Ok,ka lo sawi dawn nia...anih phawt’

Tlai nitla turin ka dinna ep lam a chhun en phut mai chu ka thlir vang vanga,ka kum a naupang tawh lo,mi min hmuh danah chuan pasal tha tak ka neia, hna ka nei bawka, ka awhawm viau mahna..Mahse, ka pasal neih dan mak zia te hi hria se, an awih lo zawk hial ang..Ka dawihzep lutuk vanga thleng anih tlat avangin engmah sawisel ngam tur erawh ka ni lawi si lo,tunah pawh ka hlau lo tih a hriaa, engtinmah min ti lo,inthen hi dil ta ila a phal maithei..Ni lo,inthen ka duh chiah em?reilote chauh la nimahse Abel-a ka rinchhan tum tam tawhzia leh ka chhungte hlimna a thlen te hi ka hre lo der thei hauh lo ang.

Kawngkhar in khar ri datah ka harh zawk, ka thu mar nghala,Abel-a a lo haw anih ka ring mai.Midang haw vek hnuah Room lam pan mai loin Living roomah Tv en in ka thu a, ka lo muhil hman sek anih hmel.

‘Ehe...min lo nghak alaw?” min rawn pan pahin a ti supa,a chau hmel viau bawk.

‘Aih,aw...nghak tho mai..chaw i la ei awm si lo a’

‘Ka nu te inah ka ei a,Hna thilah ka pa ka va biaa’

‘Ok, a tha lawm..i tifel thei ta em?”

‘Tifel animai..ka han inthlak lawk ang’

‘Kei pawh mut ka duha...tlemin ka chau ve deuh a’ ka ti a, ka zi mar ar ar bawk.

‘A tha lawm..mahse, Roomah ka mamawh ho ka lak angai dawn ania’ Stepa chhoh pahin a ti a,Ruati’n Inchhung a tifai thina, engmah rinhlelh tur awm lo thei ang berin kan fimkhur viau,zan mut nan chauh a room a hmang a ni ber.Vawiin pawh khan Diki leh Awmtei khan an enkual vela, mahse engmah rinhlelh tur a awm lo ang tih ka chiang.

Ka chau ngang aniang ,ka luin lukham a sik rualin ka muhil nghal a ni ber,ka harh leh chuan khua a lo eng iar tawh,muangchangin ka inphih faia, Inhnuaiah ka chhuk thlaa, Kitchen lama zai rat rat bak engmah thawm a awm lo..

‘Good Morning..’ kawngkhar a rawn luh pahin Abel-an a rawn ti a, min rawn pan hnaia,enge a tih dawn tih ka ngaihtuah chhungin ka samah a hmuiin a rawn nul thuak bawk.

‘Eng....?’ ka ti hman chauh tihin a mitmeia min Warning na ka hmuh takah chuan Ruati emaw midang tu emaw an awm hnai tih ka hrethei mai.

‘Thil i ei tawh em?” a ti leha,ka lu ka thing ringawt.Ka rin ang ngeiin Ruati pasal leh Mipa pakhat an rawn inzui let mek ka va hmu nghal chiah.

Driver thar tur a ni tih a sawia,In lamah kha chuan ka nu te nen Driver an in tawm vek zel a,amah hian Motor khalh hi nuam a ti nge amahin a inkhalh chhuak mai zela,mahse Driver neih hi ka support viau tho..

Tawng tuma ka ang ziau tawh chu ka phone ri vangin ka thulh leh,Abel-a nu a lo ni a,ka pick nghal vat.

‘Tlaiah chaw in rawn ei hman angem?” phone ka pick veleh a rawn ti a, a phur hmel viau bawk.

‘Ka va hre mai lo,kei hi chu ka hman ngei a,mahse Abel-a zawk hi,lawk aw...’ ka ti a, phone ka beng bul atangin ka la sawna, ka piaha Abel-a leh Driver thar thu dun lam ka en a.

‘’Abel,ka nu ania,In lamah tlaiah chaw kan ei hman leh hman loh min rawn zawt a” ka ti a.

‘Ka nu...’ hmui phunin tu ka nu zawk nge min zawt leh rih,amah ka kawka, a then suk bawk.

‘Nangmah i hman chuan keichu hman e’

Ka nu hnenah kan ei hman dawn tih ka hrilha, thildang kan sawi leh nual,kan awmhran hnuah In lamah ka la kal leh ta miah lo,hnaa ka buai mai bakah tlai lutuka haw ka duh loh thin avangin ka kal kual lo law law thina, ka nu hian min rawn call zauh zauh a,kan that leh that loh a hre duh a ni ber.Ka pa erawh chuan vawikhatmah min la rawn be lo,kan Insawn ni a an lo kal bak tumah an lo la kal leh bik bawk lo a,a chang hi chuan Abel-a sawi ang khan an fa te hi an thliar hrang deuh tak tak ni a hriat chang ka nei leh zauh thin bawk.

Chaw kan eikham veleh insiam turin Room kan pan nghala, Rinpuia te Site lamah kal ka ngaih vangin nidang aiin ka hmanhmawh deuh,ka inbual tawh avangin ka thawmhnaw hak tur ka enkuala, tun ang hunah hi chuan ka insiam hun a ni tih a hriat vang nge Abel-a a lo kal ngai lo.Nizan kan chaweikhawm ka ngaihtuah leta,Jeffrey-a awm laia Abel-a lo haw lo ka lawm zia kha,ka hlauthawng tih ka haider lui duh lo.Engemaw buaina a awm mai palh hlauin ka tang teuh ringawt,mahse a lo haw tlai dawn tih min rawn hrilh takah kha chuan ka inthlahdul thei ta chauh kha ania...Engvanga haw em em mai nge maw anih le?

‘Nizanah khan tu tu nge lo kal?” tawng ri ka hriat rualin ka vir zawk a ni ber.

Abel-a hahdam hmel zeta Sofaa a lo thu ka hmuh rualin ka awm ka hup ringawt,engtiklaiin nge a lo luh ka hre hauh lo,a nui suk ka hmuh rualin ka thiltih awmze awm loh zia ka hrechhuak nghal zat.Ka hawi let leh vata, rang lutukin ka thawmhnaw lo awm hnai ber ka pawthlaa,ka inthawlh nghal sawk sawk bawk.

Muangchangin ka hawi leta,zahzelah ka inkuangkuah fel than bawk.

‘Eng maw i sawi kha?”

‘Nizanah tu tu nge lo kal?” a sawi ngai bawk a sawi nawn leha, a hma lawka nuihza hmel lang kha a bo chiang leh tawh viau bawk.

‘Kan Office ho...ngatinge?”

‘Engtiklai khan nge Jeffrey-a hi i Staff a lo nih tak a?” a ti hmuka, ka ding khawng nghal lah mai.

‘Ka Staff a ni ve ka tih ka hre hleinem’ ka ti let ve salh thung,a chhan pawh hriat hleih loin a lo mil lo ve ngawta, ka thian a ni a, engvang mahin thlah ngawt ka tum hauh lo.

‘Anih si chuan min ngaipawimawh lo hle tihna a nih chu..’ a rawn ding chhuaka, ka ip chawih thung, mahse ka hlau tih tihlan ka tum lo bur,engmah hlauh chhan tur ka neih ka hre hek lo.

‘Engmah in ngaihpawimawh lohna lam a ni lo..Ka thian ania, hetah chaw an rawn ei dawn tih a hriaa, a lo kal ve animai..enge a dik lohna?” ka ti leh hmaka,ngaipawimawh lo hmel zetin ka inher a, ka kekawr hak tur zawngin ka keu kual san hmiah.

‘Anih chuan that ka chhuahna hi i lo ngaihlu lem lo anih chiah chu’ ka hnung lawk atangin a rawn ti leha,min hnaih thawhkhat anih hmel.

‘That i chhuah tih pawh ka lo hre hleinem..Ok,tunah chuan insiam ka duha, i chhuak thei angem?” ka ti leh hmaka, ka la hawilet duh chuang lo.

‘Hei hi ka In a ni a,ka Room a ni bawka, ka duh duh hunah ka lutin ka chhuak thei..Chuan nangpawh hi Jeffrey-a nupui niloin keima nupui i ni bawka..’ a ti leh supa, a hma ai khan min hnaih zawk tih hriat zetin  ka beng a thawk khum pawh ka hre thei hial bawk.

‘I kal sawn thei angem?”

‘Ahh,ka tum lo hlauh..’ a sawi zawh rualin ka kawngah a rawn kuaha, ka bengkawm a rawn fawp thawi thuak bawk.

A chetdan chu ka beisei lawk loh lutuk anih avangin ka chesawn mai lo,ka thaw a chham dawn emaw ka ti zawk,ka khup a zawi huaia,ka tluk mai ka hlau hial bawk.

‘Min nawr lui lo la ka duh ania,Fa ka duhna hi tihluihnaa puitlin ka duh lo tih hrereng bawk ang che’ a ti leh supa, a sehchilh deuh nak bawk.

‘Kalsawn rawh...’ tih leh tal ka ruala,ka beisei loh zetin min thlah ve mai bawk.

Ka inhera,kekawr ipte zen tut chunga a kalsawn chu ka melh a,ka hua nge ka hlau zawk pawh ka hrethiam tawh lo...

’Min khawih tum tawh suh,bakah i hriat tura ka duh bawk ka sawi nawn leh ang,Jeffrey-a emaw ka thian tupawh hi thlah ka tum lo ania,nangpawh i duh duhin i awm anga, keipawh ka duh duhin kan tih kha..chumi tur chuan kan awmhrang reng bawka..’ ka ti ta duah, ka awki chang zet chu a hria anih pawn a ngaipawimawh lo tawp tih a mithmul a tihsan uk danah hai rual a ni lo.

‘Anih chuan zanah Jeffrey-a theihnghilh tir tur chein ka rawn mut ve angai anih chu..’ a ti a, a dar a ti sang uk bawk.

‘Tenawm..Sex hi chutiang mai maia awlsam a ni lo ania.’

‘Oh,Nupa karah chuan thil harsa a ni chuang hleinem..a lo ni reng zawk nge?”

‘Nupa tak karah chuan a ni maithei,keiniah chuan ni ve lo..’

‘A tha lutuk,nupa tak nih kan zir mai angai dawn anih chu...bakah Jeffrey-an ka tih theih loh ti a ka ngaih vanga thikna lo awm hi tihreh pawh a tha’ a mitmeng de sawr sawrah chuan tihelna a lang thei a,a ti duh tak tak maiin ka ring bawk.

‘Chhuak rawh...’

‘Tehreng mai,zan lamah zankhuain hun kan nei alawm’ a thle buka,tawngkain ka chhang thei lo,ka perfume bur a thlawk phei nghal fua,a lo thle deuh nangin a fuh ta tho..A ri deuh pawpa,chumi hnuah chhuatah a tla thlaa,a keh nghal vek,Perfume rim a nam nghal rum rum bawk.

‘Nasa reuh lutuk...’ a ti supa, min rawn pan hnaia,ka tawlhhnung hrat thung.

Ka bul a rawn thlen hmain ka tawlh leha, Khum lamah rang lutukin ka tlana, mahse ka tlai ta tho,ka kawngah hneh zetin a rawn mana,min pawt let nawk bawk..

‘Min khawih suh..’ ka ti thata, ham tumin ka kut ka lek chhuaka, mahse a thle hman,ka tal laih laih chu ngaipawimawh lo zetin min kuah beta,na zetin ka samah a thama, min kuai dak zui nghal bawk..A hmel chang leh insehruh fun mai chu ka ena,a thinrim tih hai theih a ni lo.

‘Kut min thlak emaw min tihnat tum tawh suh ang che,i hria em?” a aw a ring lo,mahse hlauhnain ka chhungril a fan raih raih tho.Chhang loin ka chil ka lem ringawt,ka sam a thamna a thlah a,min nem kat deuh nawk bawk.Kawngkhar lam a pana, a hawnga, na lutukin a rawn nem khar thuaia,Banga kan inneih thlalak tar a tla dawn emaw tih turin a che lawp bawk,tlak erawh a tla ta em lo hlauh.

Hna lamah ka rilru ka pe thei hlawl lo,nidang ang lo takin ka mitthlaah Abel-a a awm tlat,kan inhauh vawikhatna ni hauh lo mahse vawiin chu ka awmdan a danglam vek,Rinpuia thilsawi ka zawt nawn ngun viau bawk.Jeffrey-a thik ni a a insawi khan min tidanglam nge pawh ka hre lo.Mahse, min duh vanga thik ni loin a tih theih loh a tih vanga thik zawk anih kha..

Ka nu te In ka thlen chuan a lo la thleng lo,ka nuin min lo zawt nghal chat,hna lamah a kal a, a lo tlai hret dawn thuin ka chhang ta ngawt.Diktak chuan tukin khan ka kal chhuah hmain a kal chhuaka, kan inbe leh lo hrim hrim zawk.

‘In pa chu i bia em?” Marcus-an rawn din hnaih ve pahin a ti a, ka thutna bula Railling awm a bawh titih.

‘La be leh lo,a lo thleng dawn tawhin ka ring’ ka ti  awlsam ve mai bawk.

‘Ani hi chu a danglam ka tih tawh kha,bakah a lo kal chak vak lo maithei..’

‘Ngatimaw?”

‘I hria em ka hre lo a, ka nuin a rawn koh chhan che u chu Mampuii rai vang ania’

‘Oh..a va lawmawm ve, tuman min la hrilh miah hleinem’ ka ti chhuak nghal hliai mai.

‘Um,nakina sawiah an khek anih dawn chu’

‘In va zep thei tak,thla engzat nge a hriat chi em?’ ka ti leh a.

‘Thla khat vel ti ila a dik ang,Abel-a lo kal chak loh chhan chu tikhan i hria ang chu’ a ti leh a..

‘Aih, hre miah lo..’ ka ti ve thung, diktak chuan ka hrechiang lutuk mah mah zawk.A hmeichhe Hmangaih em emin a fa ni lo a pai hi a na ngawt ta ve ang.

‘Sawi kher tul ka ti lo nangin Mampuii hi ka chhuhsak niin a ngai tlata, bakah keipawh ka Confi vak lo..’ a ti leh a, tuemaw tal lo kal ve se ka ti takzet,ani nena hetiang lam sawi hi nuam ka ti hauh lo.

‘Ka hriat kher angai lo ania,thildang sawi zawk ila..’ ka ti ta nge nge.

‘Um,nia.I tan chuan hriat nuam a ni lo tawp ang,mahse thudik hi haider duh suh..kei ang bawk hi i ni ve tih ka hria alawm’ a ti leh ta fo.

‘Ka lo va lut ange’ tih pahin ka tho a,mahse ka kal na tur dal takin a rawn ding leh hmiah,midang inchhungah an awm vek,han au vak ngawt lah a dik chuang si lo.

‘Khawngaihin kal sawn rawh’ ka ti chang fak mai.

‘Lutuk,mahse ka sawi zo phawt ang..Ka fa nge i pasal fa zawk ka hre hauh lo ania..’ zawi tein a rawn ti leh a..Min deng dawt a ni ber,ka chhungril na lutuk tihreh tumin ka insehruh ngat ngat bawk.

‘Sawi nawn leh teh...’ Abel-a aw ka hriat rualin ka hawi chhuak nghala,a u hnungah a lo ding run tawh,Marcus-a aiin a sang deuh zawka, a hmel rum leh chang zetah chuan tualthah mai duhna niawm tak a lang thei bawk.

‘Oh..i lo hria a ni maw?..Dawt ka sawi hleinem tiraw?”

Abel-a kut a a phe vuaia, Marcus-a a pai dawrh bawk..Hnek nawn leh tuma a rawn kal hnai chu engmah ka ngaihtuah hman tawh lo,an inkarah ka tla zepa, Abel-a kawngah ka kuah a,a awmah ka hmai ka phum zui hmak bawk.Abak tih dan tur dang ka hre tlat lo.