REVEUSE- 20

CHAPTER- 20

‘Zosangkim,I u kut i thlak alaw?’ ka nu aw fiak thak ri ka hre zawm zat,kan pathum chauh kan awm emaw ka ti a, Ka nu lo kal lai ka hre lo,Abel-a insangmar tawlh tawlh ka hrethei bawk.

‘Nu, tun tum chu khawngaihin lo tel ve suh..’ nelawmna tel hauh loin a ti hmuka, ka hnungah a rawn chula,ka lungphu in ngai a la awh thei lo..

‘Engtin maw i tih a?’ ka nu bawkin a ti leh,ka hawi chhuaka, Abel-a hmela na tuar tih hriat zet lang chhuak chu ka han hmu nghal chiah.A hma pawh khan a sawi tawh, Marcus-a hian a nu hmangaihna a chhuhsak tih kha..

Ka kuahna ka phelha,ngam leh ngam loin ka nu ka ena,a hmeltha tak maiah chuan Thinrimna a lang theia, min en loin Abel-a a melh ran bawk.Midang an awm leh awm loh ka hawikuala, tumah an awm hnai lo.

‘Tun tum chauh lo tel ve suh,khawngaihin..’ Abel-an a ti nawn leh.

‘Abel...khatiang...’ ka ti hman chauh tihin ka kut a rawn vuana, ka kut zungtang karah a kut a rawn rawlha, nghet zetin a hum zui hmak bawk.

‘Kan kal phawt ang,kal ang le..’ tih leh min kaih kal a ruala, engmah ka hrethiam lo.Min kaih ang angin ka zui dat dat ringawt.

Gate pawnah min kai chhuaka,ka nu khan min koh din emaw Abel-a chelh tumna a nei hauh lo kha mak ka ti ngawih ngawih zawk,Marcus-a sawi ang khan Abel-a fa a nih theihna chance a awm pawh a ni mahna,mahse ka chhungril hian a nih a ring lo ve tawp.Mi tha tak a ni lo,kan Inneih dan pawh a dik lo,an inkawp na hliahkhuh tura min nei a ni tih ka hrereng chung hian ka chhungrilah a fa a ni dawn lo angin ka ngai tlat thung.

Driver a phone a,a tawng danah khawiah emaw a tir chhuak anih hmel,chuvang takin a lo kal lai pawh ka hre lo a ni ngei ang,Motor thawm engmah ka hriat loh laiin a lo lang thut anih tak kha..

Reivakloah a Motor a lo thlenga,ka Car erawh Awmtei te Nupain an hman duh avangin ka hman tira,In thleng min thlah ringawt,inmil lo viau mah ila Abel-a ruala haw ka tum sa hrim hrim zawk.

Ngawirengin a hnungah kan thu duna, In kan thlen thlengin vawikhatmah kan tawng lo,ka kut a vawn a thlah hek lo,ngaihtuah muk tak nei niawm tak in hnunglam a nghenga, a mit a chhing tlat bawk.

In kan thlenin khua a thim thut thut tawh,Roomah ngawirengin ka zui chhoa,Driver khan mak a ti deuh anih pawhin a demawm loh,chawei turin kan kala,kan ei lo a, chutah kawng tluanin kan tawng miah lo bawk.

A bag ka kensak chu thutthlengah ka daha,ani erawh ngawirengin a kawr hak lai a phelha,a pheikhawk a tlawh phelh leha,Bathroomah a lut zui nghal daih,a thawmhnaw kalsan nuaih mai chu ka tifela,enge sawi hmasak tur ka hrethiam bik lo.

‘Ka mu lawk dawn ania’ tih pahin Khum a pana, nidang ang chu nise ka khuma a mu tur ka sawisel ngei ang, mahse tunah chuan engmah sawi hun a ni lo tih ka hria,ka bu ringawt.

Khumah a lawna, puan pawh sin lo in a bawkkhupa,a mit a chhing zui nghal daih bawk,ka pan hnaia,puan ka sintira,kan boruak tawn kha a hahthlak tih ka hria, chumai bakah a lan danah tun maia intan ni loin hun rei tak lo intham tawh puakkeh a ang zawk mah.

‘Light ka Off dawn em?” ka ti sepa.

‘Off rawh...’

Khum bula Switch tlar that chu ka hmeta,pawn lam a thim tawh bawka,Room chhung a thim tha viau..Phone light ka hmet enga,Inhnuai lamah inthlak pawh inthlak loin ka chhuk thla ta zawk.A awmdanah khan amah chauha awm a mamawh ngawih ngawih niin a lang tlat.

Ruati koh ka tum zeta,mahse, keiman ka siam theih tho ka rin avangin ka thulh leh ta zawk, Fridgeah chawhmeh siam awlsam chi ka dah tih ka hria, ka hawnga,Sausage leh Soup Powder ka phawrha,thildang siam nan chuan a tlai deuh tawh.Eisiam thiam tak ni lo mahila ka nu khan Pasal la nei tur ka nih hrerengin engkim min zirtir vek.

Ka siam peih vek hnuah Inchung lamah ka chho leh ta chauh,a muthilh ringin thawm dim takin ka lut a,Light engmah in On a awm loh avangin ka Phone Light bawk ka hmanga, kawngkhar inhawng tangin Pawnlam light eng a rawn lut raiha, thim lutuk erawh a ni lo.

Ka rin ang ngeiin a lo muhil tak tak,hahdam hmel takin saisirin a mu a,engtiang takin nge a rilru a lo hah thin ang tih ka ngaihtuaha, Mampuii fa chu ama fa pawh lo ni se engtin nge Marcus-a khan ka bulah a sawi theih zawk ka hre lo,a tawng danah khan huat tur awm miah lo mahse midang te chanchin sawi a thiam hle ang tih ka ring ve tawp.

A puan sin tlema inhlim deuh chu ka siam that saka,a sam dum tha zet chu ka khawih chak tlat pek,tim daiin ka zuk ban de de a,mahse ka khawih hmain ka kut ka hum ta zawk.Kei hi ka rilru a dik hauh lo,tunah khan Mipa anihna leh Pasal anihna angin ka en anih kha.Engtin nge ka theih zawk? Ka nun hrehawm taka min phuar bet luia,min vau bet reng tu leh Hmeichhe dang nen an nawmchenna hliahkhuh tura min nei anih kha ka theihnghilh tur a ni hauh lo.Tunah midangin a fa an pai maithei zui bawk...

Kalsawn tumin ka inhera, mahse ka beisei loh lutukin ka ban rekah a rawn vuana, ka phu nasa kher bawk.

‘Khawnge i kal dawn? reilote lo mu ve rih rawh..’ a ti tham tuak a,ngeiawm emaw tihelna lam ni loin ngenna niawm tak a hriattheih zawk.

‘Ka tiharh che law?” ka ti chhuak sap thung,a thusawi ka haider lui tlat bawk.

‘Aih,tiharh lo..lo mu la..’ a ti leha, a hma ang bawk khan ngenna a hriat tel theih.

Rei lo te ka in ngaihtuaha,ka pheikhawk ka tlawh phelha, ka lawn ve ta nge nge,eng ang pawn ka chungah sual se,hnemtu a mamawh lai hian ka kalsan ngawt thiang lo.

Khumah ka lawna,ka lawn fel veleh min rawn kuaha,ka awmah a hmai a rawn phuma,a khawsa zia engkim mai chuan min fan rawih rawih mai.A vawikhatnan ka rilru zawng zawngin Nupui tak tak nih ka chak ve ta hial bawk.Tim daiin ka kuaha, a samah ka chul hauh hauh bawk.

‘A sawi kha i ring em?’ reife ngawirenga kan mut hnuah a rawn ti chhuak hlawl.

‘Eng ber kha?’ ka hrereng nangin ka ti ta zawk.

‘Ka fa a ni lo’

‘Ka ring che alawm’

‘Engtin nge khatiang a sawi theih ka hre hauh lo,tenawm lutuk’ a ti leh hmuka,na tuar aw a hriattheih bawk.

Ka kuahna ka lasawna,tawlhsawn tumin ka chea, mahse a hma aia nghet zawkin min rawn kuah a,a thaw lum ham ham bawk.Mak takin ka sawi ang ngei khan he thilah hi chuan ka ringhlel eih lo.

‘Khatiangin sawi lo la,eng ang pawn thinrim la i u a ni tho ania’

‘Ka u a ni leh a nau ka ni hi hrehawm ka ti thin,RTS family a ka piang hi pawi ka ti asin’ a ti leh hrawka, a ti tak tak ngei ang tih a aw nghet charh chuan a ti lang chiang viau.

‘Chutiangin an ti ngai lo,i thinrim anih pawhin khawvel eng hmuh tirtu che i nu leh pa sawisel lo la a tha asin..’ dam thlapin ka ti a,amah dem zawnga tawng erawh ka duh lo.

‘I tan chuan a ni ang chu,mahse kei chu keimah chauh ka ni a,tumah ka mamawh hek lo..’ a ti leh hmuka,ka nu leh pa tak ka hre lo tih ka rilruah a lo lang zawk..

‘Ngatinge ka nu khan a dan loh che tih ka ngaihtuaha’ a ri erawh chuan ka ti ta zawk,ka ngaihtuah let pawh hian mak ka ti  lo thei lo.

‘Min dang dawn hleinem..’

‘Enge a awmzia? i dik lohna a nih si loh chuan..?”

‘Ka nu lakah hi chuan ka dik lo ziah thin zawk,thiamthu sawi turin chance pek ka ni ngai lo’

‘Anih leh vawiin thil thleng kha ka pain a hria angem?”

‘Kan haw thut chhan kha chu ka nuin a sawifel mai ang,ka u erawh chu a ngawi hmiah thung ang’

‘Abel...’ ka ti chhuak sap ringawt..Ka khawngaih hluah hluah.

A awmdan a siamrema, ka lu a darah a daha,ka samah a rawn fawp vang vang bawk,a awmdan engkim mai chuan min fana, a thiam loh engmah a awm lo ang tih ka ring ve tawp bawk.

‘Ka u hi ka nu tan chuan a pawimawh ber ziaha,kan naupan lai atangin ka dikna sawiturin chance min pe ngai lo..’

‘Mampuii chungchangah pawh hian a ni ang tiraw?’

‘Aw...lai hi khawih teh’ tih pahin ka kut a laa,a nakah a nem beta, ser niawm tak ka khawih fuh nghal tih ka hria..

‘Hei enge?”

‘Light On la...’ a ti ve thung.

Ka tho a, Light ka on a,ka hawi let leh chuan a puan sin a lo thehhlim vek tawh,kawr ha loin a mu a,a pian nalh zet chu hmuh hmaih tum luih pawn a theih loh.

‘Hetah hian...tih pahin ka kut a rawn la leha,a hmaa ka khawih ngai bawk kha min khawih tir leha, a nakah a ser thla raih a,zai pui tawk tawh a ni tih a rin theih mai.Kawr ha loin a hma pawn ka hmu tawh,mahse, ser a neihawm ka lo hre lo,ka hmu ngai lo zawk.

‘Ngatinge?” ka ti sepa, tim deuhin ka chul kual zai zai bawk.

‘Kal pakhat chauh ka nei...chuan,khatianga i khawih kual kha i duhtawk loh chuan....’ a mitmeng thim raih maiah chuan a sawi zawm tur awm ka hmu thei..Rang zetin ka kut ka lasawn vat bawk.

‘I kal an thlak tihna maw?”

‘Aw..Kum 5 vel chu a ni ve tawh..’

‘Chuan....’ ka ti ringawt.

‘Lo mu leh phawt la....’ a ti supa,a ban lehlam a phar duai bawk,amah hlat deuh hlekin zangthalin ka mu thlaa, mahse a rawn tawlh hnai leh ta tho.Min kuai hera,ka khabeah a rawn dawma, ka hmui hnuailam a kutzungpuiin a rawn nawr kaua,hnial tumna pawh ka nei lo.

‘Ka nu tan chuan ka u hi a pawimawh ber,i hre tawh maithei,ka u hi ka nu fa a ni lo a, mahse ka nu hian a pawmtlei thung,ka hriat ve hmasak ber pawh ka u vanga ka nuin min hauh hi a ni a,kan naupan lai hun chhung zawng khan ka duh zawng tih phalsak ka nih loh laiin ka u tan engkim a awm thung.A fa ka ni lo zawk emaw ka ti thin,Rosalind-i a lo pian ve takah khan tlemin ka zia ta deuha,chuan kan naupan lai atangin Ka u hian ka engkim min neihsak a tum thina,a tawpah chuan pek a ni ziah bawk.Min neih sak  theihna pawh ka nu vang a ni ziah bawk.Mahse, nang hi chu min chhuhsak ngai lo ang..’ a ti ta duah..

‘A hrehawm thin ngawt ang’ ka ti chhuak halh ringawt, a dang engmah sawi belh tur ka hre lo.

‘Aw, hrehawm thin.Inchung Room ruakah kan insual avangin min kalhkhuma, zankhuain ka nak na vangin ka tal tlaivar thak,a tukah ka khua asik avangin min entira, ka kal a fel lo tih an hmu a, chiang takin kan pathumin a chhan kan  hria,kan insual lai khan ka u in ka min tlawha,vawihnih ka pumah a tum titih bawka,hremna a pek ve ringin ka nghaka, mahse an sawichhuak ta miah lo..’

‘Nakinah sawi i duh zawk em?”

‘Aih,i hriat vek hi a tha..Khata tang khan ka mizia ka thlak danglam ta vek, ka tawng ngai mang lo,ka sawi ve awmzia a awm dawn chuang loh avangin engmah ka sawi ve ngai lo, ti tura min tih apiang ngawirengin ka ti mai zel,a hnu kumah lehkhazir turin Mumbaiah min daha,Delhiah ka u an dah thung,thlatin ka u tlawha ka nu a kal laiin thlathum hnuah te ka nu ka hmu ve chauh thin,a rei hnuah phei chuan kum khatah vawikhat a ni leh mai..Ka pawi ti chuang lo,pawisa ber min pek chuan a tawk mai.Mampuii ka tawnga,ka harsatna engkim hrethiam tu a ni bawka, mahse chu pawh ka u bawkin tunah chuan a nei leha....’

‘A pawi ka tih pui che...’ ka ti sep ringawt, eng tiang takin nge a nu leh pa mai bakah a u a lo huat thin ang ka hrethiam pha lo zawk.Mahse, hei erawh ka hria,a tuar nasa lutuk..Hetiang mizia a neih hi a demawm hlawl lo.

‘Mampuii hi i hmangaih ang tiraw?” ka ti ta nge nge, ka pasal hnena a bialnu hlui a Hmangaih leh Hmangaih loh zawh hi a tlawm thlak tih ka hai bik lo,mahse ka hre duh miaua.

‘Hmangaih lo,mahse ka nuna Hmeichhia ka tawn tawhah chuan a ber a ni thung’

‘Ok....’ ka ti sepa, ka chil ka lem khalha,diktak chuan ka induhtawkna a chhe chiang lutuk chuan min ti na vawng vawng bawk.

‘Min en teh...’ a ti leh supa,ka khabeah bawk a rawn dawm leha,amah en thei turin min kuai dak nghal bawk.A kut lehlamin a inbengkang titih thung.

‘I thik em?”

‘Aih...’

‘Tak tak?”

‘Ka hre lo,mahse nuam ka ti lo...’

‘He i mizia hi alawm ka duh thin.Thil i hre duh anih chuan tlang taka i sawi pawp mai hi ka duh thin,Diktak chuan Nupui tak ni lo anga en che hi a harsa hle ania’ a thensuk bawk.

‘Kan awmdan pangngai hi ka thlang zawk’ ka chhang rang lutuk chu a nui suk bawk.

‘Kei chuan ka thlang lo,Mampuii hi ka nunhlui a ni a, nang erawh tun ami..I pawimawh zawk hle bawk.Nupui i nihna hi thil pakhat chauh lo chu i hlen chhuak vek bawk’ a ti leh a..Chhan mai dan tur hre loin ka ngawi rauh rauh ringawt.

‘I ril a tam em?” a ti leh daih.

‘Um,ka siam zo vek tawha,zuk ei ila...’ ka ti a.Min chhang lawk loin min en deuh vung vunga,kei lah nidang ka ang thei der lo bawk.Hakthlak hian a..

‘Enge i ngaihtuah ka hria alawm,ka fa anih leh nih loh i ngaihtuah anih kha,thil pakhat hria la ka duh,fa ka nei dawn anih chuan ka nupui hnenah ngei ka nei ang..i chiang em?” a ti supa, sawi mai tur hre loin ka bu nghauh ringawt.

Inhnuaiah kan inzui thlaa,ka thilsiam ho lam zet kha ka sit leh hnuhawh,mahse, tihngaihna dang a awm chuang lo,ka chawhmeh siam ho an lo dai leh hman vek,ka chhuang tha leha, Abel-a erawh Living Room lamah Tv bulah a thu thung.

Ka siam peih hnuah ka ko ta chauh, inbe mang loin kan ei duna, ka thilsiam a tui leh tui loh engmah a sawi lo.

‘Ruati i ko mai dawn maw ka tia” ka thleng seng fel min en run chungin a ti sup.

‘Aih,keiman ka ti thei thoa, bakah a harsa lo..’

‘Ka hria,mahse a tihtur ania lawm’

‘A ho em mai,ka Inchhung ania,ka tih chang a awm ve bawk ang chu..’ ka ti a, mahse ka sawi zawh rualin ka ngaihtuah leta, ka inchhir zui zat.Mahni ta ang maiin ka tawng anih kha, Abel-a ka en vata,a hmelah chuan ka sawi kha a hrechiang tih a lang reng bawk.

‘Anih chuan ka lo pui dawn che mi niang? Ka In a ni ve tho a’ a then suka, min rawn pan hnaia, ka Bowl ken khawm chu min rawn laksaka, thlengsilna ah a daha,Apron khaina atangin Apron a la thlaa,a awrha, thleng sil a tum tih a chiang,hnialna chang pawh hre loin ka en reng thung.

‘I ti thei tak tak ang maw?’ ka ti chhuak ta nge nge.

‘I lo en dawn nia..’ a ti awlsam et,a sawi ang chiahin a thlengsil lai ka thlir ta reng,engkim kha a tih than niawm takin a thiam em em vek tlat.

Ka mu meng kar mai,Abel-a thilsawi kha a vaiin ka ngaihtuah leta, engvangin nge ka nu khan khatiang a tih? Mahni fa ni lo enkawl chu a harsa maithei,keipawh ka nu leh pa tan khan a harsat chang a awm ang, mahse min hmangaih vangin ka u te rilru an tihnat ve ka ring hauh lo thung.Mahse, Abel-a chungah erawh a thleng tlat.A thilsawi te kha awih lo ngawt dawn mah ila vawiina ka nu chet dan khan a tichiang vek.An buainaah khan Abel-a zawk a rawn hau nghal ringawt.Marcus-a thiam loh anih a ring lo leh nghal hmiah a ni ngei ang.

Hlau lutukin tlanchhiat ka tuma, mahse ka tlan thei der lo,Biakthana lu hek bui mai chu ka ena, ka theihtawpin ka au vak vak bawk..

‘Hon..i tha em?” ka lu a rawn sawi pahin Abel-an a rawn ti a,ka chhang lo,ka ban tawk tawka, ka kuah bet tlat bawk.

‘A tha vek ania, i mumang mai mai anih kha...’ a ti leh supa,min hnem nan ka hnungah a chul hauh hauha,ka samah a rawn fawp vang vang bawk,kei erawh ka khur hlawk hlawk thung.

Kan inkar a inthlak danglam ta hlawk,a harsatna leh a thil tawn te min hrilh vang kha nge ka hre lo,kan inkar zau zet kha a ziawm ta viau.Nitin hna kal turin kan chhuak ruala,Car ka keng ngai mang lo,Tlaiah min rawn lam haw ziah bawk.Ka hnaih tial tiala, ka ngaina satliah lo tih ka inhrechiang em em nangin ka pawm duh lo tlat thung,amah hriattir phei chu hnai lo tak a ni ringawt.In lam atangin tuman min rawn la be ta miah lo,kan that leh that loh lam pawh engmah an rawn ngaihven hek lo.Pawi ka ti hauh lo nangin Abel-a ka khawngaihna vang zawkin Ka nu leh Pa huat ve mai ka hlau rum rum zawk.

‘Matty...’ ka hminga min ko ri ka hriat veleh ka inher vat,Mampuii a lo ni a.Diktak chuan ka beisei lo viau bawk.

‘Oh,nang maw? Enge i an?’ ka beisei lem lo tih a hriat loh nan pangngai takin ka ti a,min chhang loin a bu nghat ringawt.

‘Ka tha,eng eng emaw ka lei kuala’ tih pahin a ke bula Basket a kawk zauh bawk.

‘Kei pawh mawle,midang an tha em?”

‘Um, kan tha..hun i neih chuan pawn lama Cafeah khuan inbe lawk ila..?” a ti leha, chu pawh ka beisei lawk loh bawk.Mahse, ka bu ta tho.Ka thil lei tur ka lei sawk sawka, mahse Counterah kan in line leh fe.

‘Hmanni khan nuam lo ka ti lutuka’ a coffee no en ran chungin a ti sapa,chhan mai dan tur ka hre lo.A chhan diktak a hria em ka hre lo nangin ka nu khan engemaw tal kan haw thut chhan atan khan chhuanlam a siam ngei ang.Abel-a pawn a sawi kha.

‘Diktak chuan Marcus-a leh Abel-a inkar tha lo hi keimah vang a ni a..’ a ti leh a.

‘Um..’ ka ti ringawt.

‘I tan hriat a nuam lo maithei,mahse ....’ a ngawi leh daih...Ka lungphu a rang nghal zaih zaih a, thil tha lo tak thleng tur ang maiin ka awm a nuam lo viau bawk.

‘I sawi hreh chuan sawi duh suh,tu pawn hun kal tawh kan nei vek alawm’

‘Nia, a dik reng,mahse....ih,a pawi ber chu Abel-a leh kei hi Hun kal tawh kan ni lo tlat atin ni’ a ti sepa, a sawi zawi hle nangin ka bengah chuan tek tla nen a danglam lo.Min den nat dan pawh a sawi zawih vangin a nep phah hek lo.