REVEUSE - 22

CHAPTER- 22

‘Enge i ngaihtuah a?”

Abel-a a rawn thu thlaa,amah si chetin min pawt hnai zui zat bawk.A lo haw lai ka hre miah lo.

‘Engmah...’ ka tum aiin ka aw a chang lam hret.

‘Min en teh..’ tih pahin amah en thei turin min kuai hera,ka ngaihtuahna hriat tum niawm takin ka mitah tak a en runa, ka biang a kut zungpuiin a tuai hauh hauh bawk.

‘Sawi la...’ amah bawkin a ti leh supa,diktak chuan sawi tan mai dan tur ka hre lo.Hun kal tawh thil a ni a, sawi chhuah kher hian engmah hlawkna ka hmu dawn lo,ka nat belh zawk hial maithei.

‘Engmah a ni lo,i chau em?” ka ti ta zawk.Thudik hre turin ka huaisen tawk tlat lo.

‘Chu lam chu nakinah le,ka Motor thawm pawh hre lo khawpa i lo ngaihtuah kha hriat ka duh rih tlat’ luhlul zetin a ti leh a,a hmelpa zetah chuan enge a ngaihtuah a hriattheih loh.

‘Fa neih hi enge i ngaihdan?”

‘Maw?!’ a hmel a danglam zawka, mahse a reh leh rang lutuk a ka hmusual anih ka ring leh ta zawk.

‘Fa neih mawle..’

‘I rai tihna a ni em?” a hmelpa leh hriam hraih maiah chuan nichin lawk ang bawk khan engemaw ka hriatthiam chiah si loh a lang leh zawka, mahse a in Control leh vat tho.

‘Rai ta ila...’

‘Wow...i chiang em?” a awah phurna a lang ta thung.

‘Ka rai lo..’ ka ti nghata, a kut ka dahthlak saka, ka inlahrang zui daih bawk.

‘Anih chuan fa neih i hmanhmawh tihna a ni em?..Ok,tan ka lak nasat angai anih chu’ zawi tein a hui hawk bawk.

‘Hmanhmawh lo,ka hriat duh zawk chu lo thi ta se engtin nge ka awm ang tih leh engtin nge i awm ang tih ka ngaihtuaha” ka ti leh salha,dam thlapa sawi chhuah ka tum teh nangin ka beidawng chiang viau lawi.

‘Enge sawi i tum chiah? ‘ a ti hmuka,a hmelah nelawmna pakhatmah a lang lo.

‘Ka sawi tum chu i hriat kha..i fa i chan vang leh i u ten fa an neih dawn vangin i hmanhmawh em em a....’ ka sawi zo hman lo,ka ban puamah a rawn mana, a vuan nghet bawk nen a  na viau.

‘Tu nge hrilh che?” a ti tuara, a thinrim tih ka hre tho nangin a au vak ka lo beisei lo lutuk bawk nen ka phu vak bawk.

‘Min hrilh tu a pawimawh lo,chu ai chuan keimah min mamawh vanga min mutpuia ka lo ngai che hi a ka inti zawk...’

‘Martha....’ a ti leh hrawka,min hmer na zual sauh,a mit thim khup maiah chuan pawisak nei lo tih a lang thei bawk.

‘Min ti na ania’ ka ti leh hmaka.

‘Nang hian thil awmze nei lo i sawi tih i hria em?” a ti leh hmuka, tlem chuan a aw a nem ta deuh, mahse nawr luih chi a ni lo tih mi a lo tan chuan hai chi a la ni chuang lo.

‘Awmze nei alawm ka sawi,i U ten fa an neih dawn vangin fa neih ve i duha, chuvang chuan maw khatianga i lo tih?”

‘Ngawi tawh rawh’

‘Ka ngawih vangin thudik a danglam phah chuang hleinem...’

‘Thudik chu i hriatfiah hunah i la sawi dawn nia,tuna i duh duh i sawi ang kha ni loin’ a ti leh hrawka, na tuar a ang phian bawk.Nia, a na ang chu,a fa a chan tak kha a sun leh pawh a ni ta ve ang..

‘Min thlah rawh...’

‘Khawnge i kal dawn?”

‘Ka duh duh naah,i tenawmna ngaihtuah turin hun ka mamawh belh anih hmel hi’ ka ti leh sak.

‘Martha...’ a ti leh thawta, min thing nawk bawk.

‘I bula awm ai hian thih mai a tha zawk hial ang, ka nu thiam loh emaw ka lo ti hmana,mahse nangmah zawk hi i dik lo ,i dik lo hulhual..tiang taka i na anih chuan ngah nge i then? Nei mai ta che...’ ka tum loh tawpin ka mittui a rawn baw zawih mai,rang zetin ka hru tawk bawk.

‘I sawi zo tawh em?” zawi supin a ti a,ka mitah tak a en run bawk.

‘Aw,chuan i fa i chan vangin pawi ka tih pui che..’

‘Ka inchhirna tur engmah tih ka duh lo,i kal thei ang’ tih pahin min thlaha,thutthleng hnung a ngheng chawrha, a hmai a hup zui daih bawk.

Ka tho tham thama, inchung lam ka pana, chaw pawh ka la ei lo, mahse ei chakna pakhatmah ka nei lo,Khumah ka lawna, Blanketin ka inkhuh zui hmak bawk.

‘ Engkimah a u hi a thik thina, an naupan lai atang tawhin a u hi a tibuai renga, tharum nei zawk anih avangin a u a ti na fo bawk,ka ngaihsak lo ni loin ka hrem thin zawka,tunah pawh a u ten naute an nei dawna, nasa takin a buai leh tho ang.Ka fa te anni a, kei aia hrechiang an awm lo,ka enkawl danah dik lo a awm emaw ka ti hial thina,i theih chuan fa neih pui vat la ka duh ber’ a Nu khan min ti anih kha..

Fa neih ka duh alawm,chu pawh Abel-a fa ni se ka duh ber, ka pasal tak tak niin ka lo ngai tawha, mahse, kha naute ka sawi chhuah vang ringawt pawh khan min khawih mai hnial lo khawpin a khawsa anih kha.Tiang em em a amahah effect a nei anih si chuan engvangin nge a then? A u in a neitur a duh loh chuan ngatinge a neih mai loh? A chapona zawng zawng dah thlain ngen ang hmiang,Zawhna hlir, chhang thei tu erawh amah Abel-a chauh..Chhanna erawh ka hmuh ngai ka ring eih lo thung.Thil tamtak ka phut hauh lo,amahah hian Mampuii hian engmah effect a nei lo tih sawi se ka duh ber, mahse chutiang a ti si lo...

‘Khawnge i awm?” Jeffrey-an min rawn call a.

‘Officeah..enge?’

‘Ka lo chho dawn,i chhuak dawn em?”

‘Aih’

‘Ok, ka lo chho nghal’

Ka phone ka daha, ka chair hnunglam ka nghenga, mut ka chak ngawih ngawih, nizan khan ka muhil lo tluk a ni a, Abel-a inthlak thawm leh Room a chhuahsan thawm pawh ka hrereng nangin ka che duh lo,ka rin ang ngeiin zankhuain a lo let lo.Thlakhat deuhthaw kan mu dun tawha, ka ngai vawng vawng, mahse amah hriattir erawh ka tum lo bur.Zing lamah ka lo chhing seka, mahse a Motor tlan chhuak thawmah ka harh lehnghala,khawiah nge a kal dawn ka hre hauh lo.Zawh ka tum hek lo.

‘I tha em?” Ka bul lawk atangin Awmtei’n min ti a, peih lo zetin ka mengchhuaka,ka lu a na ngut ngut bawk.

‘Tha e, ngatinge?”

‘Ngati lo e,i nawm loh hmel lutuk a’ a ti a, min ngaihtuah hmel zetin min en reng bawk.

‘Nizan ka mu tha lo lutuk a..chuvang aniang, ka lu a na deuh bawka’ ka ti ta nge nge.

‘Abel-a a awm lo mi?”

‘Awm e’

‘In inhau chu a ni si lo maw?” a ti leh a.Ka lu ka thing ringawt.

A hnu rei vak loah Jeffrey-a a rawn luta, nidang ang bawkin a lang thar sara, hmuh a nuam leh pek,a nui sang leh ka mood in mil lo lutuk chu ka ner ru nak bawk.

‘I ei duh ka ringa’ tih pahin ka Dawhkanah KFC bucket a rawn hunga, ka riltam zia ka hrechhuak nghal zat,nizan khan engmah ka ei lo a, tukinah lah tih tham ka ei hek lo.

‘Duh chiang, enge min dil dawn a?” ka nui a, thil min dil duh a neih chuan min tlawn nasa thin a,ka sawi tum hrethiamin Awmtei leh Diki an nui hak hak bawk.

‘Engmah...ei phawt ila,kan ei zawhah ka sawi ang’

‘Engmah i ti bawk sia,enge a awmzia?”

‘Ei mai mai teh, i nghal lutuk,i pasal mizia i la zo tawh’ a ti leh a, ka then sak nangin ‘i Pasal’ tih lai tak chuan min deng deuh dawt thung.

Awmtei leh Diki an rawn thu hnaia,Awmtei bawkin lakchhuah tumin a hawnga, ka hmaah a rawn dah hnaia, a rim rawn nam chu ka hnarah na zetin a rawn luta, ka inring hman lo,ka uak pawp mai..

‘Sorry....’ tih leh thawh ka ruala, Toilet ka pan nghal rawk rawk bawk.

Toilet chhungah nasa fein ka uak leh a, mahse ka luak tak tak thei chuang lo,nizan leh tukin engmah ka ei mumal loh vangin ka pum Ulcer a rawn nasa leh a ni ngei ang.

‘I tha em?’ kawngka bulah Awmtei a lo dinga,ka bu nghauh ringawt.

‘Arsa i ei duh lo tih ka lo hre lo a’ Jeffrey-a nuam lo ti hmel chu ka ena, ka khawngaih zawk.

‘Ka ei duh alawm,i lo ken hmasak pawh ka ei teuh kha’ ka ti a, a rilru tihnawn nan ka nui lui var var bawk.

‘Anih si chuan ngatinge? Nang hi....’ min kawka,a hmel a danglam vek bawk.

‘Enge?” an pathumin ka en kuala, an hmel landan in ang lo lutuk chu ka nuih a za zawk.

‘I rai a ni chiang lutuk...’

‘Teuh lo lutuk...’ rang lutukin ka ti a, mahse ka chhungril erawh a khur titih,nichin khan ka lo ngaihtuah thleng miah lo,ka rai maithei..Ni lo..tun dinhmunah rai ka duh lo..

‘I phat ran danah khan  a chiang reng alawm’ Jeffrey-a bawkin a ti leh a,ka hlauhthawnna ti lang lo turin ka in Control a ngai nasa viau bawk.

‘Ka pum ulcer vang anih kha mawle,khawi lo la rawh..Ka ei thei reng alawm’ ka ti leha, ka va bana,mahse ka lak hmain Awmtei’n min rawn lak khalh ta zawk.

‘Ei lo mai teh,keiman ka ei duh alawm,bakah i nu pawn i ei apiangin i buai ziah a ti ania..’ ka en vata, a mit siai zauh ka hmuh takah chuan ka thawl hawk mai.Ka ei fo a,ka buai ngai lo.Chu chu Awmtei hian a hrechiang lutuk,mahse min chhan nan a ti mai zawk tih ka hria, ka Cousin a ni a, Jeffrey leh Diki tan awih loh ngawt chi a ni lo.

‘Enge i lo kal chhan sawi vat rawh, ka haw hma dawn ania’ thil an ei zawh hnuah ka ti a.Ka chau a, ka khua a sik ru er er bawk.

‘Um,i nau te hi tu emaw ber free an awm em?’

‘Awm chiah lo ti ila mamawh dan azirin an awm thei tho bawk’ ka ti a, Abel-a te In khawih tura kan lak te team kha an awma, a tulna hmun apiangah ka kal kual tir mai zel.Kum thar hma chuan hna lak belh leh na hun a awm tawh lo.Thla khat leka zawh tur te anih ngawt loh chuan..

‘A tha lutuk,ka mamawh alawm,Dawr khu tih danglam angaia,karhnih khat bak a ni lo ang’ phur zet hian a ti nghal hluai mai.

‘A va buaithlak awm ve,in khar ngawt thei awm si lo’ ka ti a,an dawr a liana, inchhung mamawh leh eitur lam chi an zuar kim em em bawk nen nikhat inkhar pawh an buai nasa hle ang tih a chiang.

‘Khar dawn lo,i hman chuan tunah zuk en ila..’ a ti a.Ka hnial dawn zeta, mahse ka bu ta nghat zawk.

Kan inzui thlaa,nidang ang bawkin an lo buai leh pek,Room lehlam hi an dawr vek ni siin bangin a dai danga, luh pawh theih vek a ni nangin a hranpaa nghah tawp ngai a ni thung,thawmhnaw lam a tam zawk bawk.

A bul chiaha In hi mi dang in a ni a,chu chu an lo luah tel zawk dawn a lo ni a, a duh dan tlangpui a sawi a, thil harsa lutuk tur a ni lo.Mahse, a design erawh ka siam tur ni loin aman Idea a lo nei saa,ka tan awlsam zawk ,buaithlak ber zawk chu zana thawh angai nasa dawna, ka enpui ziah angai dawn.Nilengin midang Siteah an buaia,zan lam lehzel lo pawhpen kha thil nuam a ni lo.

Ka nu te ka tlawh khat avangin In lamah kal ka duh,hma deuh hlekin Office ka chhuahsana, Awmtei zawhna ka pumpelh bawk,Diktak chuan ka rai leh rai loh chungchang kha min zawt ngei ngei dawn tih ka hria, ani pasal lo nei tawh chuan engkim hi a man thiam vel vek bawk nen ka hmachhawn chak fahran lo.

Ka rai maithei,in test ka ngai ang..Mahse, rai ta ila engtin nge ka tih ang?Abel-an a hriat chuan min khawih duh hial maithei,mahse chutiang ni loin a u te nupa elhsen nan lawm ang takin a lang chiam thei tho bawk.

Ka nuin min lo hmu chu a lawm ngang mai,ka kal lohna pawh thla a tling dawn tawha,a demawm loh.

‘Nu, chaw ka ei nghal dawn ania’ thutthlenga mut pahin ka ti a.

‘Enga? Abel-a a lo kal dawn ami?”

‘Dawn lo e, a buai deuha, chuvang ania chawei nghal ka tum’ dawt ka sawi ta ngawt,hrilhhriat tumna ka nei lo.Nilengin vawikhatmah kan la inbe hek lo.

‘A that chu,mahse haw tlai lutuk lo la a tha ang,In in a fal si,ngaihtuah i na thin’ a ti leha, ka bu ringawt.

Ka pa tawng lawng lawng thawmah ka harha,ka lo muhil daih chu niin.Ka ban ka lek kanga, ka sana ka en a.Dar 6 a pel tawh.

‘Nang hi i rawn tlan a mi?” ka u in min rawn thut titih a.

‘Teuh lo em maia..tho teh,i rit’ ka ti a,thawh tumin ka in nem kanga.

‘I lo kal khat si,ee.. Vawiinah in pa te ka hmu tak,a u nupui nen khan...’ a ti leha, ka na zawk bawk.

‘I hmu ve bawk ang chu, i ngaisang tihna nih mai chu’ ka ti leh salha, kan upa ber dawt engmah sawi loa nui var var chu ka en a, kan unau zingah chuan ka ngaina fal nalh.

Ka beisei loh zetin ka ei tui ta phian,kan titi nak naka,tawng kan inchuh nawk nawk bawk,ka thlamuang ngawih ngawih.Haw tawh lo a awm hlen mai ka chak zawk,thil theih a ni der si lo.

Muangchangin ka tlana, Adele zai ka ngaithla paha, ka khua a har vawng vawng mai, thlasik rim a nam tan tawha,la vawt lutuk lo mahse tlan zawnga thliin min rawn chhem chuan min ti harh sawng sawng bawk.

Kawta Abel-a Motor lo inhung ka hmuh rualin a haw tawh tih hrilh hranpa ka ngai lo,zingah a chhuaka, ka hmu hman lo.Ka u sawi dan khan Mampuii nen an inzui a, ka ngaihtuah zawng ringawt pawn ka awm a nuam lo titih.Hmeichhe dang daih nizawk se a zia mahna,mahni U nupui te nena inkawp tlat hi a tenawm mai pawh niloin a tlawm thlak bawk.A u nupui a ni tawh chung pawha a duh tih a thup thei lo hian ka induhtawkna zawng zawng a ti chhiaa,ka ngaihuah zawng pawn ka na vek thei hial bawk.Nidang a ka haw hunah ka la haw lo tih a hrereng chungin ka awmna hre turin vawikhat pawh min rawn call hek lo.Chu pawh chuan natna bak min thlen lo,ngaihtuah loh law law ka duh zawk.Kan bul tanna hrerengin inzawmna nei loin lo awm mai zawk ila tha tur ania, mahse atthlak zetin ka inzawmpuia,ka duhna nasa tial tial lah tihreh theih a ni tawh hek lo.

‘Khawnge i kal?’ inchhung ka luh rualin min lo ti a,a hmel dur khup maiah chuan a ngaihtuahna engmah a lang lo,mahse tih thinrim belh erawh a tul lo tawp tih a chiang.

‘Khawiah nge ka kal vak anga?’ ka thinrim hauh lo nangin tha taka chhan kher a phu tlat lo.

‘Maw?” a ti thawta,ka meng phak awk bawk.Eng chu a hua chu nimaw?

‘Officeah..enge a?” a thinrimna ngaipawimawh lo niawm takin ka ti liam puat.

‘Oh..anih chu mawle,a ropui hle mai?” a ti leh hluka,a awah tihelna a lang chiang viau.

‘Nia, ropui..’ ka ti nghata, inchung pan tumin Step lam ka pana,mahse  ka kalna tur dal takin a rawn ding leh hmiah.

‘Kalsawn teh..’

‘Tun chiah ka zawt leh ang che, khawiah nge i kal?” a ti leh hmuka, a aw hlauhawmzia chu haider theih a ni lo.

‘Ka nu te Inah’

‘Jeffrey-a nen khan maw?” min thawng deuh zawk nangin ‘a ni lo’ tih kual vel ai chuan niawm taka awm mai a tha zawk.

‘Aw..’

‘Daw thei lutuk..’ min bia pawh a ang lo.

‘I kalsawn thei tawh angem?” ka ti leha.

‘Aw, mahse ka sawi tur ka sawi zo phawt ang’ thupe aw zet hian a ti leh a.

‘I thusawi ka ngaihthlak a tulna ka hre miah lo’ ka ti ve thung, mahse a kalsawn loh chuan ka ngaithla dawn tho tho tih ka inhre kar thung.

‘Tul i tih leh tih loh ka ngaipawimawh lo.Tun chiah ka sawi ang,kha Jeffrey-a kha i bula a awm ka hmu leh anih chuan dam i thlahlel lo hle ang’ a ti hmuka,a sawi ring hauh lo nangin a ti mai mai lo tih ka chiang,mahse enge a thu zawm kher a tulna? mi fel leh thianghlim a ni hleinem.

‘A pawi khawp mai,ka hmuh fo ka ka la ringa, nangpawn min hmu dun fo bawk ang..’ ka nui lui sak bawk.

‘Anih chuan in pahnihin in thi vat dawn anih chu..’

‘Ni lo e.Mampuii ang mai maia mawl ka ni lo ania,i duh duha i kaihkual tur in i uite ka ni lo..’

‘Sawi leh teh..’ min rawn din hnaih lehzual sauha,a perfume rim chuan ka hnar a rawn verha, ka luak a chhuak nghal ut ut bawk.

‘I uite ka ni lo,i duh duha i tihkual tur ka ni lo,nang ang lo takin Jeffrey-a hi chuan mihring enin min en a, Sex Toys satliah ang ni loin...’

‘Tihnat che ka duh lo,mahse kha Tuai kha chu ka khawih hreh hauh lo ania..hrereng rawh,tuman ka nupui min tawmpui ka duh lo..’ a ti leh a, ka sa zak mai.

‘Kei pawh mawle, tuman ka pasal min tawmpui ka duh lo ve tho,mahse nang hi chu i danglama,i bialnu in i fa a pai lai pawh thikthu vang ringawtin i thahsak duh ania...’

‘A tawk...’ a ti thawta, ka ding khawng lah bawk.

Vanneihthlak lutukin ka phone a ri ta hlauh,kan boruak tang lutuk kha hun rei lo te chhung chauh nimahse ka chau vekin ka hre tho,ka bag ka zuk zena, ka la chhuaka, Jeffrey-a a lo la ni zui..

‘Hello...Jeffrey’ ka ti sapa, a hming lam rik kher a tul hauh lo.

‘I haw tawh em? Kan thil khawih tur kha...’ a sawi zawh hmain Abel-an a rawn phih thla thuta,chumi rual deuhthaw chuan bang a deng nghal dawt bawk,a chetdan chuan min ti hamhaih lutuka,tawng mai nachang hre loin ka en tlawk tlawk ringawt.