REVEUSE - 23

CHAPTER- 23

Chhuata ka phone tla darh nuaih mai chu ka ena, a vawmna thawkhat tih a chiang, ka awmdan ka hrethiam lo, ka thinrim nge ka rilru a na zawk pawh ka hre lo,ka mawl huih ringawt.

‘Min nawr lui suh,kha chu  a bul tanna chauh anih kha..’ a ti hmuka, muangchangin ka en a, kan insan hleih bawk nen ka melh chho ha mai.

‘Nang ang Ramsa kawlh,nihna mumal nei lo hi ka hlau che emaw i ti anih kha,ka phone i vawm chhiat avang khan engmah a danglam dawn hauh lo ania’ ka aw a dam thlap bawk.Ka awmdan chu a beisei lawk lo tih hriat tak hian a hmel a buai ve nak a.Mahse, rei erawh a ni lo.

‘Chuti maw?” min rawn din hnaih leh a, min rawn si titih..A perfume rim chu a hma aia na zawkin ka hip lut leha, ka insum hman lo,ka uak pawp bawk.

‘I tha em?’ zawi supin a ti a,min rawn vawn tum niawm takin a ban a lek kanga, ka per sawn nawk thung.

‘Ka tha...’ ka luak chhuak rawn in tham leh chu uak leh mai hlauin hmanhmawh zetin Toilet ka pan ta zawk.

A tul aia rei mah Toiletah ka awm luia,min ngaihven ka ring hauh lo nangin hmachhawn leh ka chak lo.Darthlalangah ka in ena, ka hmai a dang lapa, nizan ka mut that loh vang khan ka mit hnuai a val kual raih bawk.

‘I tha em?” kawngka kik pahin a rawn ti a,ka chhang lo.

A rawn kik leha,ka la chhang chuang lo,a hnuah phei chuan a rawn chum titih ta zawk,eng chu a hria ni maw? Min tihnat pawh hreh lo khan ka thih nghal leh nghal loh en a tum zawk nge mawni?

‘Kal bo rawh’ Kawngka bula din hnaih pahin ka ti that mai.

‘I tha em?” a rawn ti ve thung.

‘I hriat angai lo,kalbo mai teh’

Min chhang loin a reh ta vang vang,Kawngkhar ka nghenga, ka chau hluah hluah, nimin atang khan thil a thleng chak em em lutuk,engkim a danglam vek,kan In lama haw mai ka chak ngawih ngawih bawk.

Reife hnuah kawngkhar ka hawnga,ka beisei loh lutukin Kawngka bulah Abel-a a lo ding khawng luh mai,a kal sawn daih tawh emaw ka ti kha ania.Hmu lo ang hmiahin ka kalpela,mahse ka beng ka chhi kar tho,min rawn zui tih ka hrethei nghal bawk.

Inchung panna Stepah ka chho a,ka phone lam ka ngaihtuah duh lo lui tlat bawk, ka khup sai dar dar mai chu a hriat ka duh hauh lo,chakna engmah nei lo nimaiin ka inhre bawk.Room kawngkhar ka hawnga, min zui tih hre lo der chungin kawngkhar ka pawt khar nghal daih bawk.Lo luh luih a tum dawn lo tih ka chianga,ka rin ang ngeiin a lo lut lui hek lo.

Ka thawmhnaw pawh hlip loin khumah ka lawna, ka inlukhupa,ka mit ka chhing zui nghal daih bawk,Jeffrey-a khan thil ho mai mai min sawipui tura min lo call a ni hauh lo,in ngaihzawnna lam phei chu hnai lo tak a ni,kan hna chungchang sawi dun tur kan ni tih ka hria, mahse engvangin nge Abel-a hian a huat em em ka hrethiam lo,ani in nupui nei reng chunga hmeichhe dang nen nun a hman avang hian amah ang lek turah min ngai a ni mahna, mahse chu pawh nise engvangin nge a thinrim kher? Min hmangaih lo a, min duh vanga min nei a ni hek lo..

Ka thuchhuak leha, ka bag thutthlenga ka dah ka va la leh rih, ka phone pakhat zawk a awma, Abel-a vawm chhiat zawk kha chu ka hman tlanglawn zawk a ni a, phone tha pangngai tak a ni nangin a to lutuk lo,mahse ka hna lama midang min rawn Contact na ber a ni a,chumai bakah a chetdan kha a in hmuhsit thlaka, a lawmawm hlawl loh bawk.

Khumah ka let leha, Jeffrey-a number a awm tho avangin call back ka duh tlat,amah hian hre lo mahse Abel-a thin tihrim zual nan a bula awmtam ka mamawh zawk.A thinrim poh leh ka zalenna kawng a inhawng hma dawn miau a.

‘Ngatinge nichin kha?” Hello pawh ti loin phone a pick veleh a rawn ti nghal a.

‘Ka phone ka thlauh pek alawm le,enge rawn sawi i tum?” ka ti a, Abel-an a vawmchhia tih sawi kher ka tum lo.

‘Naktuk atanga tan theih anih leh nih loh ka hre duha,ka pa a hmanhmawh riaua’

‘Ok,ka lo be kual ang..Ka lo hrilh leh dawn che nia’ ka ti a.

Rinpuia ka call a, hna lamah tunlai Zama’n a pui thina, an buai zual a reh tih a rawn sawia, a tuk lama thawh tur dang a awm thu ka hrilha, lo hrilh nghal turin ka ti bawk.

Ka mu meng kar mai,thawm engmah awm loin a reh thiapa, Abel-a a mu tawh nge ka hre lo,nizanah pawh ka bulah a riak tawh lo a, a lo riah ka ring lo.Pawi ka ti hek lo,ka pum ni deuh nghulh mai chu ka dawma, ka rai mai hlauhna vangin ka lungphu a rang lehnghal zaih zaih bawk.

Tluangpuii ka ngaihtuah chhuaka, ani hian Abel-a leh Mampuii inkawp pawh a hriaa,chuti anih chuan fa an nei tih a hre tur a ni.

‘Hey,enge ni ta?” zangkhai zetin a rawn ti a.

‘I ngaihawm em a,i tha em?”

‘Hmeli le(h)..nang hian min ngai hlawl lo aw,mamawh i nei anih kha’ a nui har har mai,a sawi dik chiah,Ka be khat viau tih keipawn ka hria.

‘Teuh lo, i ngaihawm alawm’

‘Anih chu a..khawnge in pa?’

‘A awm,enteh,thil ka zawt duh che a’

‘Ka ring vel a ni,han sawi la..’ a ti leh nghauh,a thinrim tak tak dawn lo tih ka hria.

‘Ih..Mampuii leh Abel-a hian fa an nei em?”

‘Enga?”  a rawn ti nghek, ka lo zawt ta kher kher ka inchhir zia chu pui tak a ni ringawt.

‘Angai leh lo...ka sawi mai mai anih kha’

‘Aih, nang hian thil mai mai i sawi ngai miah lo,khatiang kha tunge sawi a?” a rawn ti leh a, ni e.Ani hi chuan min hrechiang lutuk tlat.

‘Hman niah ka hre thawia,Abel-a hi ka zawt a, a pha a..’

‘Wow, a pha anih chuan a ni lo animai,i pasal kha chutiang mai maia nep a ni lo ania..Eh,tunah khan khawnge a awm?” a rawn ti leha,khatiang ka zawt anih chuan kan awm dun lo tih a ngaihtuah chhuak nghal tih ka hria.

‘A dik alawm..’ ka ti sep ringawt.

‘Ring tawp rawh,fa an nei dun anih chuan engvangin nge i hriat loh ang? Keipawn ka hre ngei ngei ang’ a ti leh duah.

‘Um..ka zawt satliah mai mai che mawle,mahse thisa a piang te ni ta se” ka ti leh talh.

‘Ouch..Mat, i dam tha em?” tehdaih chuan..

‘Dam tha,anih phawt aw’

‘OK.Rilru nuam loin lo awm hlek suh,tu nge sawi tu min hrilh la, ka lo zawt chiang dawn nia’ a rawn ti leha,mahse ka pha nawi kual ta mai mai.

Ka thawh chuan Abel-a a lo chhuak leh hman tawh, Ruati amahin a lo awma,a zai rat rat bawk.

‘Ruat...’ rang lutukin a rawn hawi leta, a mengphawk ngang mai.

‘Awi,min ti phu nasa lutuk,thingpui i duh em?”

‘Aih, duh lo..’ ka ti a, Dinning chair ka pawtchhuaka,thingpui ka ngaihtuah zawng ringawt pawn ka luak a chhuak hlui mai,ka thawh veleh khawsikin min tham tih ka hre nghala,ka pum a no hluia, ka luak a chhuak em em bawk.

‘Pu khan i chau a ti sia, enge i an a?” a ti leh a, ka mengphar awk nangin ka in control leh vat.

‘Ka khua a sik deuha, mahse a zia leh tawh,khawnge a kal a?”

‘A zin dawn kha,i hre lawk lo mi?’ mak tih hmel zetin min en a, ka nui ta ngawt,diktak chuan ka hre lo hulhual.

‘A sawi thawi thuaka, nizanah ka mutsan daiah, zingah lah min kaitho bawk si lo a’ ka ti a.

‘E...nidawn tak,tunkar tawpah chauh ka lo haw ang a ti bawk sia,i nuam lo nen a ngaihtuah hmel lutuk che a’ a ti leh a, ka awih lo lutuk tih nghek ka chak, mahse ka ti ta em lo.Za lo zetin ka nui ta sak zawk.

Chaw tlem ka eia, ka ei hleithei lo.Mahse, ka mu tha lo a,hna kal ka ngai bawk nen thil ei loh ngawt ka duh lo.Bakah Abel-a nen kan indo dawn anih ngat chuan ka chak that reng a tul hluah hluah bawk.

Nileng deuhthawin Jeffrey-a te hna lamah ka awma, Officeah Diki leh Awmtei an awm thung,Awmtei a haw hma duh thina,Site lam erawh kan inkal chhawk leh thei tawh thung.Ka buai lutuk pawh a zia ta deuh.

‘Mat...’ ka hminga min ko ri ka hriat rualin ka hawi chhuaka,Evelyn-i a lo ni a.Ka hmuh loh chin pawh ka hre tawh lo.

‘Ehe..i dam maw?” pangngai takin ka ti a, a bu nghauha, a nui var var bawk.

‘Dam alawm, i tha zel em?”

‘Aw, tha zel e..khawnge i kal dawna?” ka ti a.

‘Hei,eng eng emaw ka rawn lei kuala,Clinic lamah ka let leh ang..Hei hi in khawih tihna mi?’ a tih zawm leha, kan hnathawh lai a thlek vang vang bawk.

‘Aw, a neitupa hi a hmanhmawh sia,thutchilh reng angai’ Jeffrey-a rawn kal phei mek lamah ka thle zauh bawk.

‘Aaaa, an dawr an zauh dawn law? Hey, Jeff..i tha em?” a tih zawm nghal zat,an inhre tha thawkhat anih hmel viau.

‘Aw, tha ..enge i rawn tih a helam lamah te?” a ti ve bawk,

An inbe zui mawlh mawlh bawk,kei erawh chuan kan hna lam ka en san leh mai.Karkhat dawn kan thawk tawha,zanah dar 8ah te In ka thleng chauh zela, Ruati te nupa in ka thlen hma chu min lo nghak mai zel.

‘Nang hi i tha tak tak maw?” ka bula rawn thut thlak pahin Jeffrey-an a rawn ti a.Ka hawi kuala, Evelyn-i kal liam tur ka va hmu hman chiah bawk.

‘Tha..mahse tunlai chu ka pum a chiang lo zual lutuk a’ ka ti a,diktak chuan ka pum ulcer vang niin ka hre tawh lo.Ka rai leh rai loh test tumin testna pawh ka lei vek,mahse ka rai ka hlauh luatah tun thlengin ka la test ta lo cheu.

‘I in check-up lo mi?”

‘Aih..ka pum ulcer hi thil thar a ni hleinem’ ka ti a, a rilru hmin tumin ka nui lui sak bawk.

‘Um..ka lo ngaihtuah dan chuan ...’ sawi zawm loin a ngawi leh daih,min melh reng bawk.

‘Engmaw i ngaihdan chu ni a?” ka ti hlaka,ngaipawimawh awm lo takin Mistiri hnathawk mawlh mawlh lam ka en san daih bawk.

‘I rai niin ka hria...’ min deng dawt mai.

‘A teuh lo lutuk...’

‘I test ami?”

‘Nang hi...ka pasal i ni lo ania’ ka nui lui hak bawk.Mahse, a nui ve hauh lo,thutak zetin min en a, thil ngaihtuah muk tak nei a ang viau bawk.

‘I rai lo tak tak maw?” a ti leh supa, tiang ang em ema a thutak hi ka la hre ngai lo.

‘Ngatinge chu chu i lo buaipui viaua? Lo rai pawh ni in rai lo pawh ni ila i tan engmah a ni hleinem’ ka ti sapa, ka nui leh hak bawk.Mahse, a la nui chuang lo fo.

‘Ni se ka ti khawp asin...’

‘Jeff..ngatinge ti khan i awm a?”

‘Engmah...i haider tlat a..’ a ti leh a,a awmdan nidang a ang hlawl lo.

‘Engmaw i sawi?”

‘Sorry..khalam kha chu duhtawk ang..engtik nge Abel-a a lo haw dawn?’ a ti leh daih, a hmel thutak zet kha a bo leh daih tawh.

‘Naktuk anih loh chuan Karthar lamah aniang’ ka ti a, a bu nghauh ringawt.Diktak chuan kan la inbe eih lo zawk.

‘In pa hi chu a nelawm lo ve ngawt mai’ a ti leh a,kan tawng hre phak an awm leh awm loh enin ka hawi kuala,hnathawk tu pathum te kan awmna lo lam kilah an awma,kan sawi an hre phak hauh lo tih ka chiang.Ka thluak a vir zawk thung.Jeffrey-a hian thil tamtak a hre ngei ang.Engvangin nge Abel-a hian a huat tlat? Ka lo ngaihtuah ngai hauh lo nangin Jeffrey-a pawh hian a mil lo ni in ka hre leh hnuhnawh ta.

‘Enteh,kan pa nen hian engtik atangin nge in inkawm tawh?” fimkhur takin ka ti a, ka ngaihtuahna tilang lo turin ka fimkhur viau bawk.

‘A rei tawh mai.Mahse, kan inkawmngeih ta vak lo anih hi’ a nui hak bawk.

‘Naa,chutiang pawh ka lo ngaihtuah lo..chuti chu i hriat teuh dawn chu” ka ti leh a.

‘Hre teuh nang,mahse a then chu ka hria...’ a ti leh a, min rawn en a,a hma ang bawk khan a thutak leh ta viau.

‘Anih chu a, mahse in inkawm bawrh bawrh ka hre khat lutuka,chuvang ania ka zawh che’ ka ti a..

‘Um,diktak chuan Marcus-a nen zawk kan inkawma,Abel-a tak hi chu ka kawm tho nangin chuti takin kan inkawmngeih lo’ a ti leh a.

‘Oh,anih chu mawle..’

‘Matty,min zawh duh i neih chuan min zawt la,eng lo...diktak chuan in nupa hi in hlim lem lo tih ka hria ania,mahse ka hriatna erawh min zawt duh suh,ka sawi chuang lo ang’ a ti leh duah,a sawi dik lutuk chuan ka awm a ti nuam lo,sawi mai tur ka hre loin ka ngawi rauh rauh mai.

‘Ka tan chuan Marcus-a leh Abel-a hi thian ve ve anni a, Marcus-a ka pawh zawk mai chauh,mahse ...i pasal hi dem lutuk suh,a thil paltlang hi a nasa ania’ amah bawkin a ti leha, ka bu ringawt.Ka pasal chanchin a hre teuh ang tih hre mah ila midang bula kan nupa chungchang sawi chhuah hi nuam ka ti chuang lo.

‘Khami zan khan Party naah kan kal ho veka, mahse Abel-a kha Mizo pakhat damlo serious deuh mai buaipuiin Hospital lamah a kal a, kei leh Marcus-a erawh kan nawi deuh vangin  Mampuii te nen kan haw tlang thunga,Abel-a inluahah kan riak vek..Zankhuain Abel-a a lo haw lo a, a hnuah Mampuii rai thu ka hre leha, chu pawh Marcusa-a min hrilh ania,a sawi hmangin a fa niin a sawia....’ ka thaw hleithei lo..Ka khawng vek niin ka hre zawk.

‘Ka sawi loh tur ka sawi niin ka hria’ a ti leh boha, a ding chhuak nghal vut bawk,kei erawh sawi hmasak tur hre loin ka thut ngaiin ka thu mawl tawp.Abel-a hnena naute chungchang ka sawi laia a thinrim zia kha ka ngaihtuaha, engmah sawi loin a lo tuar tlang vek tihna a ni angem?

‘Aih...i sawi tur diktak i sawi zawk...’ ka ti chhuak ta halh zawk.

Min rawn ena, a rilru a buai hmel viau.A rawn thu thla leha,a hmaa thingbung awm chu a chhara, chhuat khawk nuaih mai chu a chhu kauh kauh bawk.

‘Diktak chuan ka sawi vang hian ka thawl hawk ve tho ania,Marcus-a min hrilh a ni a,midang hrilh ka nei lo.Mahse, ka hria tih chu Abel-a hian a hre tho ang,a rai hnu lawkah Abel-a nen an inthena, Abel-a nun chiri zia chu pui tak a ni.Marcus-a Mizoramah awm hlen turin a hawa,Mampuii nen an inkawp zui chat bawk.Mahse, mak tak maiin Mampuii khan nau a hring ta hauh lo.Tumah hre ve an awm lo bawk nen sawichhuah a ni ta lo anih hi..’ nuam tih loh hmel zet hian a ti leh a,ka thaw tha ngam lo.Diktak chuan Jeffrey-a hi a thik emaw ka lo ti hmana, chutiang a lo ni lo.Mampuii vang bawka hua a lo ni...Na ka ti vawng vawng bawk.

‘Engvangin nge Abel-a nen in inmil loh?’ ka ti chhuak hlawl mai,ka sawi tum reng pawh a ni hek lo.Min rawn ena, a hmel a danglam zawka, mahse a reh leh mai.

‘Nia, kan inmil lo..Marcus-a thianpa ka nih rualin ani pawh ka thian tho a ni a, kha thil thlengah khan ka hriatpui vek a ring a ni maithei,engmah kan sawi lo nangin kan inpawh ta lo chu anih hi..’ a ti leh a, a aw a zawi hle bawk.

‘Abel-a tan chuan a na ngawt ang’ ka ti sepa, ka ngaituahna ka sawi chhuak a ni mah zawk.

‘Na ang..mahse a tuarchhel alawm,bakah a finga, a thluak a tha over bawk.An family thil engmah a duh hauh lo,amah leh amah a in la hrang hmiah..’

‘Nia,a hlawhtling bawka...’ ka ti ve sep ringawt.

‘In innei dawn tih ka hriat tirh khan ka ngaihtuah zia che i hrethiam lo zawk ang, ka rin lawk ang ngeiin in hlim lem lo tih ka hre leh a’ a tih zawm leha, engkim Marcus-a kal tlangin a hre zel tih hrilh hran ka ngai tawh lo.Marcus-a ka huatna a zual sauh thung.

‘Kan hlim lo lem miah lo asin,mahse...’ ka hnar rawn za mer mer ka hriat rualin ka dak vat bawk.

‘Ehe..l hnar a thi leh tawh..khawi maw?’ tih leh min rawn ban a ruala,ka hnar min rawn hup pui titih bawk.

‘Damdawiin kal i duh em?’ ka hnar thi a tawp hnuah a ti a,a hlauhthawn hmel phian bawk.

‘Hnar thi mai maiah kal angai hleinem,a ho em mai...dar engzat nge?’ ka ti a, pawn lam ka hawi a,Motor tlan zawng zawngin head light an on vek tawh a, khua a thim chiang tawh viau.

‘Eitur ka va la ang,zanin chu kan thawh rei leh hmel em mai’ tih pahin a tho a, kan awmna chhak lawkah Jojo’s cafe a awma, tlai dangah chuan chaw kan ei nghal mai zel.

‘Angai lo,midang hian chaw han ei se, zanin chu haw hma ka duh’ ka ti a,ka chhungrilah ka chau ngawih ngawih,ka thilhriat zozai te khan ka nawm lohna an ti zual in ka hre hial bawk.

Dar sarihah haw turin ka kalsana, Motor ka dahna thleng Jeffrey-an min thlaha,mahse ka Motor dahna kan thlen veleh ka Car ke thep vek ka hmu nghal,ka phun hlak bawk.Tun ang hunah engtin nge ka siam tawh ang?

‘A pawi lo,ti hian dah la,ka va drop mai ang che’ a ti a,ka inthlahrung ngang mai.Mahse, hnial thei dinhmunah ka ding lo.Taxi koh buai ai chuan min thlah mai se a awlsam zawk.

Nidang ang lo takin a tawng mang lo,ka hriattirh atangin a tawng duh em ema, a nelawm em em bawk,mahse vawiina kan thil sawi te vang khan a rilru a buai ve nge ka hre lo.Ani leh ni lo angin a ngawi ve rauh rauh mai.Kan ngaihtuahna ve ve kan kawm a,kan ngaihtuahna erawh a in hlat viau thung in ka ring..

‘Mat,ka thilsawi vang khan buaina i nei em?” min rawn ti thut.Ka lo in ngaihtuah nasa lutuka,ka phu zawk bawk.

‘Aih,aw..tak takin tlemin,diktak chuan ka pasal u nupui leh ka pasal an inkawp thin tih hriat hi thil nuam a ni lo a’ ka ti sapa, ka zi mar ar ar bawk.

‘Oh,vawiinah i hre chauh tihna mi?” hlauthawng aw a hriat theih.Hei tak hi Abel-a nen an in an lohna.Abel-a hi chuan engmah a hlauhthawn pawh ka la hre lo.A tihsual ngei ngeiah pawh.

‘Ni lo e, mahse thil tamtak ka hrechiang thunga,bakah Mampuii hi a thlah tak tak angem....’ ka ti chhuak halh mai.

‘Mat....tunah hian Abel-a nupui chu nangmah i ni a, Mampuii nen an inthen hnuah tih takzeta a buaipui chu nangmah chauh i ni bawk,Mampuii a thlah leh thlah lohah buai suh,Mampuii hian eng ang pawn tum mahse Abel-a rilru a hneh let thei tawh lo ang, chutiang mi a ni lo’  a ti ta duah.

‘Mahse, kan hlim lem lo tih i hriat kha a dik ania’ ka ti a, kan nupa kar ka sawi chhuak ta nge nge.

‘In inneih dawna ka ngaihtuahna chhan che chu Mampuii ka hriatchian vang zawk,a tibuai ang che tih ka hlauh vangin.Abel-a vanga hlauthawng ka ni lo...’ a ti leh a, sawi tur ka hre lo.

Kawtah a dinga,a hmelah min ngaihtuahna niawm tak a lang thei bawk.

‘Kal rawh,ka lawm lutuk ania’ ka ti sepa,thli vawt deuh chuan ka sam a chhem leng dar dar mai.

Min rawn pan hnaia,ka scarft a rawn khawiha, a min suihsaka, hnial ka tum lem lo, rilru tha tak a pu tih ka hriaa,nula angin min en lo tih ka hre bawk.

‘Lut rawh le,engmah ngaihtuah hah suh’ a ti leh a,ka samah a rawn chul hauh hauh bawk.

Muangchangin ka inhera, in lam ka pana, ka rilru a hnim ruai mai,a hma khan Jeffrey-a hnenah lo sawi tawh ni ila chuan ka zia hawk zawk maithei..

‘Tu nge lo thlah che kha?” ka ding chawt mai,Living room a Abel-a lo thu chu ka hmu nghal zat, a lo haw dawn tih ka hre lo.

‘I lo haw dawn tih ka hre lo a..’ ka ti lawi rat ringawt.

‘Nia, i hre lo..mahse vanduaithlak takin ka lo hawa, chuan nangin nuam i lo chen a??’ a rawn tho a, min rawn pan hnaia, ka tawlh hnung hrat thung.

‘Chutiang engmah....oh..nia..’ ka ti leh lawi,tih nat let ka chak zek zek.

‘Ka la vau na tawk lo che anih hmel...’ a ti leh hmuka.

Chhan tumin ka ang hman ziau tihah Kawngka kik thawm vangin ka thulh leh,Ruati te emaw Security zinga mi an ni ngei ang.

Kawngkhar ka nem hawnga, Jeffrey-a ka va hmu nghal,a nui var var bawk,a kal daih tawh sia, enge rawn tih a tum ang rin ngaihna ka hre lo.

‘I kal tawh maw ka tia,lo lut rawh’ ka ti a, Abel-a nen amah vangin kan inhau meka, lut tura sawm hi thil atthlak tawpkhawk a ni tih ka hai lo.Mahse,tih ngei ka duh tlat.

‘I phone i thlauha,chuvang mawle...’ tih pahin ka phone a rawn lek chhuaka,ka thlauh tih ka hre hauh lo.

‘Oh..ka thlauh tih pawh ka lo hre lo,i awm lo ang tih ka hlau thin’ ka ti lui leh salh.A luhna turin ka tawlhsawna,mahse enge thleng hi...??

A rawn pen luh hmain Abel-an min rawn kalpel fua a, a ban a vai pawp a, Jeffrey-a a pai nghal chawn bawk..Ka te thawt ringawt..