REVEUSE - 24

CHAPTER- 24

‘Enge i tih a?” ka ti leh that bawk.

‘Lo tel ve miah suh..’  a ti hluka,na zetin min rawn melh hrawk a, ka ip chawih bawk.

‘Abel...tiang te chu a..’ Jeffrey-an a ti a, a khabe a tuai vat vat bawk.Thinrim hmel a pu der lo chu mak ti zetin ka melha, Abel-a hmel tur ngun leh Jeffrey nui hmel deuh chu Lei leh Van ang maia inmil lo a ni ringawt.

‘Tun chiah ka hrilh ang che,Ka nupui bulah ka hmu leh che anih chuan a pawi viau ang...’ a ti hmuka, ngenna ni loin thupek a ni tih a chiang ngawih ngawih mai.Engtin nge Jeffrey-an a dawnsawn en tumin ka melh nghal vat.

‘A va pawi ve,min hmuh leh a la ngai dawn a...’

‘A that hlauh chu,i lo en dawn nia..’ tih leh kal hnaih a ruala, ka inring hman lo.Ka che phat a,an pahnih inkarah ka ding ta zawk.

‘Kal sawn rawh...’

‘Aih, i thiltih kha a atthlak lutuk.’

‘Atthlak,huh..nang hian enge i hriat ve a?”

‘Abel..engkim ani hian a hria,ngatinge i zep tih hi kei chuan ka lo ngaihtuah daih asin...’ Jeffrey-an ka chhan hmain min chhan khalha, Abel-a insehruh tlat leh a kut hum  a kekawr ipte a a thun lai chu ka hmuh hmaih hauh lo.

‘I tan leh ta maw? Nangmah chauh in ngaihtuah la a tha lo maw?” thinrim insum ri a hriat tel theih.

‘Um,dik chiah..mahse ka tan chuan Matty hi a pawimawh ania...’ enge a sawi awmzia ka hre lo.Ka thian a ni ve maia, atana ka pawimawh em em na ka hre hauh lo.

‘Anih chuan ka nupui hi i tan mihrang a lo ni lo tihna a ni maw?” ten hmel zet hian a ner nawk bawk.

‘Dik chiah mai..’ ngeiawm lutukin a ti leh a,tih tur ber ka hre lo.Jeffrey-a ka hriat thin kha a ni ta lo emaw ka ti rum rum zawk.

‘Ok,ka hrethiam e..nang leh ka u hi chuan hetiang hi nuam inti ziah alawm,i duh chuan i hruai tel nghal thei ang’ a ti hmuka, a inhera, Inchhungah a lut zui chu a ni der.Ka hamhaih vel vek,min then tihna zawk nge ka hre thiam lo.

‘Min ngaidam rawh,chhan i ngai niin ka hriaa..’ reife kan ngawih hnuah Jeffrey-an a rawn ti a,ka chhang lo.Ka din ngaiin ka ding khawng lah ringawt.

‘Ka kal ange,i buai phah anih chuan chinfel ka tum ngei ngei ang’ a ti leha,muangchangin ka inhera,a thiltih te kha min chhan nan a ni tih hre mahila ka lawm phah chuang hauh lo,Abel-a lo nat tawh thinna hmang khera tihnat nawn leh thil dik niin ka hre lo.

‘Nia, kal tawh rawh..Mangtha le..’ ka theih tawpa pangngaiin ka ti a,harsa zetin ka nui lui sak bawk.

‘Um..mahse, i ngaihtuahawm lo ang maw?” rilru nawm loh hmel zetin a ti leh rih.

‘Ka tha lutuk,kei aiin Abel-a i hrechiang tih i sawi kha..’

‘A dik,nang aiin ka hrechiang mah maithei,mahse ka nawrlui mah mah ang tih ka hlaua, a luhlul zia ka hrechiang em a tin ni’ a ti leh a,tawngkaa chhang loin ka thle bak ringawt.

Tim daiin kawngkhar ka hawnga, mahse a lo ruak hiau,khawiah nge a awm ka hre lo.A lo chhuah leh tlat loh avangin in chhungah a awm tih erawh a chiang reng,Jeffrey-a thil tih kha  lawmawm tak tur anih laiin ka lawm hauh lo erawh thil mak a ni tho.Mampuii vanga anat tawhna hmang khera tihnat nawn leh kha nuam ka ti hlawl lo.Min hmangaih hauh lo tih hre mahila atthlak zetin a natna tur thlen kha nuam ka ti lo.Minute tlem te ralta kha chuan Jeffrey-a hmanga tih nat ve ka chak kha ania,ka duh ang ngeiin a thleng ta chenga ka lawm in ka hlim phah leh chuang der si lo.

Room ka pan chhoa,ka Roomah a awm dawn hauh lo tih ka hria,ka luta, light ka on a, ka rin ang ngeiin a awm lo.Khumah ka thu hnawka, ka chau zual hluah hluah,ka pum a rawn ri raih raiha,mahse engmah ka ei chak chuang der lo.Ngaihtuah chhuah ka nei..Ka tho a, in test ka duh,ka rai leh rai loh ka hriat a tul takzet,naktukah enge thleng dawn ka hre hek lo.

Bath tub tlangah ka thua, ka en mai ngam lo,ka period hun a pel hle tawh,thla thar kan kai tep tawh zawka,ka awmdanah hi chuan a chiang nghal titih tlat.Mahse, ka pum vang pawh a lo ni tak tak theia,Period la na chi ka nih vangin chumi tham pawh chu a ni thei..

Ngam leh ngam loin ka thutna sira ka testna dah chu ka zuk melha,ka thaw hak mai..Line pahnih sen kalh mai chu ka hlauhthawn ruk ni mahse a taka hmuh takah chuan min deng na tih piahlam a ni leh ta tho,ka inrin hmain ka mittui a rawn baw zawiha,hruk pawh ka hru peih lo.Mi te chu an raia, an lawm thin a,Pasal nei lo a rai te erawh ka hre lo.Kei hian Pasal ka neia,mahse ka rai hi lawm tur nge lawm loh tur ka hre lawi si lo,Abel-an a hriat hunah engtin nge a dawnsawn ang ka hre lo.Fa chu a lo duh anih pawhin keimah min duh tel chuang lo ang tih ka chiang.Ka na vawng vawnga, ka inkhawngaiha,ka nu ka ngai em em bawk.

Muhil thei loin ka mu meng kara,ka lu a na ngut ngut bawk,lukham ka khawiha,ka mittui farna lai a hnawng chap mai..Ka dul ka dawma, tunah chuan engmah la ni loin thi hlawm mai mai a la ni tih ka hria, mahse nu ka ni dawn..Ka insut leh hraiha,tu nge kei anga pasal te laka rai zep awm ve ang? Lukhamah ka hmai ka phuma, a hre dawn hauh lo tih hre mahila tah rik ka duh lo.

Ka harh leh chuan khua a lo eng iar tawh, peih lo zetin ka thoa,khawsikin min tham er er bawk,thlasik a intan tawh bawka,a vawt tan viau,kawrlum phiar,fual deuh hlek leh pyjama lian deuh ka haa,muangchangin inhnuai lam ka pana,Abel-a a chhuah daih tawh ka ring ve ngawt.Mahse, nizan khan a Motor a awm hauh lo.Engtin nge a lo haw ka hre lo,kei ang bawkin a Motor a chhe ve pawh a ni mahna.

Ka rin ang ngeiin Ruati chauh a lo awma, min hmuh veleh thingpui min rawn chhawp saka,nidang ang bawkin a titi siam siam bawk.A sawi hre loin ka aw vel mai mai thung.

Nilengin ka nuam lo tluan ta parh,tlai lamah Doctor ka hmu ang ka ti nangin ka thulh leh ta zawk,tunge hmuh mai tur ka hre tlat lo.Awmtei hrilh tur nge hrilh loh tur ka ngaihtuaha,naktuk lamah hrilh mai ka duh ta zawk.Jeffrey-a nen kan inhmu ta miah lo bawk.

Muana a lo kala,ka Motor ke ka siamtir a,peih lo viau mah ila inkhalh haw tho tho ka ngai dawn,Ka nu te In lamah kal ka tum zeta, chu pawh ka thulh leh ta tho,ka awmdan engkim mai chik a hrethiam ziah tu ka Nu ka bum theih ka ring lo.

Abel-a motor a lo la awm lo,mahse nizan pawh khan a awm chuang loa, amah a lo awm tho,in lam ka thlira, a eng iara, Ruati a la awm maithei bawk.

Inchhung a lo ruak hiau,Ruati thawm pawh engmah a awm lo,a haw phei tawh anih ka ring ve ringawt.Mahse, nidangah hi chuan a lo la awm deuh ziah thin a,ka haw hnuah a haw phei chauh zel.

‘Eitur i siam dawn ami?” ka hnung lam atangin Abel-an a rawn ti thuta, ka phu nasa kher bawk.Ka hawileta,Kitchen leh Dinning room indanna kawngkhar biang nghengin a dinga, a kekawr ipte a zen tut bawk.Nidang ang lo takin ruih neih a ang viau bawk.

‘Aih,khawnge Ruati?”

‘A awm lo,karkhat vel chu a chawl ang’ a ti nghuta.

‘Ngatinge? zingah engmah a sawi si lo a’ angaihna hre lo zetin ka ti a.

‘An khaw lamah an haw lawk’

‘Maw? Ngatinge?”

‘Inchhung khawsak hi ngaihtuah ve deuh la,nuam tawla leng kual mai mai lo khan,chuti ni lo se i hre tur ania’ a ner nawk bawk.A tawng dan kher chuan min khei ve zak thung.

‘Ka lengkual lo..’

‘Oh..ka zin leh vat theih nan i lo tawngtai hial ang chu ka tia’

‘Abel...’ ka ti halh ringawt.

‘Um..tunah chuan engkim i hre ta bawka, nuam i ti viau ang chu tiraw?” a ti leha,ka lu ka thing ringawt.Vanneihthlak zetin Motor light engin In a rawn chhuna,tu nge anih ka hre lo nangin ka thlamuang hawk tho.Kawtah a thawm a reha, rei vaklo hnuah kawngkhar kik thawm a awm zui zat bawk.

A inher vuta,Kawngkhar hawnsak tumin a kal zui ngala,Kawngkhar a hawng thawm leh midang a be thawm ka hre leha,a Driver a ni ngei ang.Ka haw lai khan a motor a awm lo a, khawiah emaw a tir chhuak leh a nih hmel.Kawngkhar a khar ri ka hre leha,amah pawh a rawn lang zui leh nghal mai bawk,midangin an rawn zui ka beisei deuh nangin tuman an rawn zui lo.

‘Le,i chhanna ka nghak ania,nuam i tih viau ka ring ka tih kha,ka tawrhna han nuihsawh vel chu eng ang nge anih?’ a hma ang bawkin a nelawm loh.Sawi mai tur ka la hre chuang ta lo fo.Anihna takah chuan a tawrhna te vang khan ka lawm phah loa, ka khawngaih zawk a, ka chunga a khawsak dan tenawm tak te hi ka haw hleithei hek lo.

‘Kei nge tenawm midang tih te pawh hre tel nghal bawk la tha tur ania..’ amah bawkin a ti leh hluka.

‘Nia,ka hre tel vek in ka hria’ ka ti chhuak sap mai.

‘Nizan khan i zui haw nghal ang chu ka ti a’ a ti leh hluka.

‘Thil i ei tawh em?” thildang sawi ka duh..

‘Ngatinge i zui ve loh ka tih chu?”

‘Inhauhna Moodah ka awm lo ania’

‘I che na lutuk i zo lo tihna mi?”

‘Mampuii ang ka ni lo,mahni pasal lo te nena nuam tawl tur ka ni lo..’ ka insum hman lo..

‘Engmaw i sawi?” a aw a ring lo,mahse a aw hlauhawm zia chu pui tak a ni ringawt.

‘Kan inneih dan dik tawk lo mahse ka pasal lo nena nuam chen tur khawp chuan mipa ka mamawh lo..’ ka ti leha,hlau lo niawm takin ka en lui kara,mahse ka chhungril erawh a nuam lo, ka chau nghulha, tluk mai ka hlau zek zek zawk.

‘A tha hle mai,anih chuan hei hi enge?’ tih pahin a kut a rawn lek chhuaka,a thil ken ka hmuh rualin ka ip chawih mai,nizan khan room Dustbinah ka paiha,zingah pawn lam Dustbinah ka paih ang ka ti a, ka lo mangnghilh daih pek..

‘Kha kha...’ sawi zawm loin ka ngawi leh rih.

‘Hei hi sawifiah la tiraw?” tih pahin min rawn pan hnaia,ka tawlhhnung hrat thung.Mahse, bangin min lo dan takah chuan beidawng zetin ka ding mar at ringawt.

‘I pasal lo nen nuam i chen anih si loh chuan engvangin nge i zep si?” a ti leh tuara, a rawn ding hnai ta deuh bawk nen a rim chuan ka hnar a verha, ka pum a let but mai,kan inneih hnuah zu a in ka la hre lo.Zanin tih loh chu..

‘Ka zep lo..hrilhna hun che a la awm lo zawk’

‘Wow,nizanah khan in khatah kan awm duna,min biak avangin i thi dawn tihna a ni em?” a ti leh nghek,ka ip chawiha,ka mit ka chhing ta ngawt.Eng pawh sawi ila a thinrim a zual mai mai dawn tih ka hria.Enge a tih leh dawn ka nghak ta ngawt.

‘Ka chhuak dawn ania..’ ka beisei loh lutuk ka hriat takah chuan ka mengchhuaka,a lo kalsawn mek thung.

‘Khawiah nge tunah i kal dawn?”
‘Ka hmu peih rih lo che..’ min deng dawt mai,chhang zui tawh loin pawn lam a pan chu ka en zui reng ringawt.

Reivak lo hnuah Motor a starta, a tlanchhuak zui nghal mai bawk,a rik danah ngawt pawh a tlanchak thawkhat ang tih a lang thei reng bawk.

Chau zetin ka thu thla hnak mai,engvangin nge ka nun hi a tluan theih miah loh? Enge ka tihsual bik? Nitin zawhna ngai hlir ka inzawta, chhanna ka hmu der si lo.Abel-a hi ka tan chuan pasal mai a ni tawh lo a, ka fa pai lai mek tan Pa a ni tawh bawk,mahse amah ka hrilh loh vangin midang fa ka paiah angai leh ta tho,amah Mampuii sulhnu leh a thil lo tawn tawhte hian engtikah nge a kalsan ang ka hre lo.Ka beidawng hluah hluah.

Ruati’n eitur a lo siam nual hmana, ka beisei loh zetin ka ei hnem phian bawk,Living room Sofaah ka thu khawr hlana, hmu miah loin Tv ka melh reng bawk,Abel-a ka ngaihtuaha, a lo la haw ta lo fo,sana ka en a, dar 11 a pel tawh.A hmel ka mitthlaah a lo langa,a hmeltha vur lo,mahse a hmelchhe chuang hauh lo.Hmeichhiain pa kan tih leh Mipa a awm tura kan duh hi chu a nei kim ni berin ka hre bawk.A luhlul em ema,midang tihnat a pawisa hek lo,mahse min duatna zawng zawng te,min hnem nana min kuah te,avai mai khan ka ngaia,a tello a ka mut hran zan te khan ka ruak vek nimaiin ka hre hial,Rosanga vanga na ni a ka lo inhria kha tunah chuan mak ka ti tawh zawk,Abel-an natna min pek nen chuan a chanve pawh a phak lo hial maithei.Mahse, min duat a, min mamawh ve ni a ka hriat laiin Mampuii vangin kan boruak a inthlaka,a awmdan zawng zawng a thlak vek zel a,min mamawhna nei lo ang maiin a khawsa zui leh a,na ka tih vawng vawng tum a tam lutuk..Mahse, chuti chung chung chuan ka duh tih ka hai der thei chuang lo.

Ka phone ngawr dar darah ka thuchhuak hlawl,ka lo muthlu hman anih hmel,ka phone ka bana, Abel-a..Ka pick hmain Sana ka en leh rih,dar sawmpahnih leh a chanve a kawk va mai..

‘Hello..’ 

‘Ka pi,hei i pasal hi a Accident a...’

‘Maw?’ ka tum aiin ka au ring hret,ka khur nghal dar dar bawk.

A accident na hmun leh Damdawiin an panpui mek tih a rawn sawia, a tawng zawm mawlh mawlh bawk,mahse mumalin engmah ka hre lo,ka thluak a buai vek zawk.

‘Ka pi,ka sawi i hre thei em?” a rawn ti leh vau vaua.

‘Aw..aw,ka lo kal dawn e’ ka ti bah nawk nawk ringawt.Phone ka off a, Driver te awmna in lam ka pana,Kawngkhar kik leh au ka ruala,ka a huih a ni ber.

Darkar chanve a liam leh chuan Damdawiin kan thleng titih tawh, kawng tluanin ka tawngtaia,mahse a mumal lo,chhan tur ber pawh a awm lo hial zawk ang..A din rual deuhthawin ka tlanchhuak rawk rawk mai,hmanhmawh lutukin Casualty ka pana,mahse tuemawin kan ban rekah a rawn vuan a,min rawn vuan tu ka en a, ka beisei loh zetin ka nu..

‘Nu...Abel-a...Abel-a ‘ ka ti nawk nawka, ka sawi zawm thei lo.

‘Um, ka hria alawm,a harh vek e..’

‘Tunah khawiah nge a awm?” ka ti a, inchhunglamah a thle zauh ringawt.

‘Hahdam phawt rawh,amah a tha vek ania,Admit pawh an admit lo maithei ania’

‘Oh,a va lawmawm si em..’ ka mittui a tla thelh bawk.

Ka nu sawi ang ngawta awlsam erawh a ni ta lo,a ke ruh a khi a, a lu a sawh bawk,karhnih lai kan awm hnuah kan chhuak ta chauh bawk,zantin ka riahpuia,a tir lam chuan Marcus-a leh ka nu an rawn riak ve a, mahse a zia tak deuh hnuah erawh keimah chauh ka ni ta thung.Mak takin vawikhatmah Mampuii a rawn lang lo,thawveng hawk tur ka nih laiin ka thawven phah miah lo thung.

‘I chau em?” kan thawmhnaw ken ho ka dahchhuah mawlh mawlh laiin a rawn ti a, ka hawi leta,a hmel dawldang deuh leh a khabehmul to siar siar te, a sam buk deuh te nen chuan a lang dam thlup mai.

‘Aih, chau lo..mahse ka’n inbual lawk ang’ ka ti tha ve mai.

Diktak chuan ka chaua,ka naupai lah ka haw em em bawk.Mahse, kan damdawiin awm khan thil tha tamtak a herchhuahpui ve tho bawk,Ka nu leh ka pa an lo kal tam em ema,ka nu nen kan inpawh leh ta viau bawk,ka rai tih a hre thuaia,zep theih ni hek lo,Doctor min hmuh pui a, engkimah min buaipui vek bawk.

‘Sorry..’

‘Ngatinge?” angaihna hre lo zetin ka en hau mai.

‘Ka tihbuai lutuk che vangin mawle..’

‘Ahh, i sawi ho em mai,ka tihtur ka ti mai zawk anih kha...’

‘Maw? I duty anih vang nge midang hmuha mawi i zawng zawk?” a ti leh supa, ka thil ken ka thlehthlaa.

‘Eng zawk nge i rin?”

‘Ka hre mai lo,mahse nupui i nihna anga i tihtur ti i ang ka ti zawk’

‘I ring dik anih chu..’

‘Ka inbual ve duh ania..’ a ti leh daih,a kal thei tawha, mahse indim erawh a la ngai nasa viau,Motor khalh lo tur leh rit la miah lo turin an hrilh chamchi bawk.

‘Inbual hmasa la...’ ka ti a.Inbual dun ila a nuam phian ang tih ka ngaihtuaha,ka lu ka thing nawk mai.

‘Keimah chuan ka inbual theih ka ring chiah lo...’

‘Maw?”

‘I tihtur ti zo law law la...’

‘Aih...ka thei lo...’

‘Engvangin maw?” a ti leh supa,tawng loin ka lu ka thing ringawt,min en reng bawk nen zahzelah ka thil dah thlak ka la kang leha,suk tur zawng niawm takin ka en kual dan dan bawk.

Damdawiin kan awmchhung zawng khan ka buaipui nasa a,kan pahnih inkar pawh a danglam dawrh tih ka hai hauh lo,a accident hma leh khami zana kan inhauhna te kha tumah mahin kan sawi chhuak leh ta lo,kan awmdan danglam ta vek hi amah pawh hian a hai in ka ring hek lo.Mahse, ka hretiam lo,ka zam leh titih tlat.

‘Enge i hlauha?” ka bul mai atangin a rawn ti supa,a lo kal hnaih lai ka hre miah lo.Muangchangin ka hawi chhuaka, a hmel hriatthiam har leh ngeng ngulh mai chu ka ena,ka duh mai ni loin ka Hmangaih tel bawk tih ka inhrechiang em em tawh bawk.

‘Engmah...ngatinge ka hlauh ang?” ka tum aiin ka aw a mar tha phian bawk.

‘Dik chiah, i hlau lo ang,mahse i biang a sen veka..’ zawi tein a nui hawk bawk.

‘A vawt em alawm..’ ka ti hlak ringawt,a nui leh a,ka hmai sa hat hat chuan a sen nasat tur zia min hriattir tho.Tihngaihna hre lo zetin ka hawi leta, ka thiltih lai bawk ka tihzawm leh a,ka hnung a za mar mar thung.

Ka beisei loh lutukin ka hnung lam atangin ka kawngah a rawn kuaha, ka darah a rawn nawra,a thaw lum ham ham chuan min fan rawih rawih bawk..

‘Ka ngai che alawm...’ a ti sup bawk..